Mmofra Bisa Sɛ. . .

So Asanom Bɛboa Me Ma Matumi Agyina Ano Ankasa?

BERE a Dennis nnii mfe aduonu no na ɔfɛre ade yiye. Ohui sɛ na ɛyɛ den ma no sɛ ɔne afoforo bɛbɔ nkɔmmɔ tiaa mpo. Nanso afei Dennis hui sɛ nsa a ano yɛ den betumi ama nneɛma asakra. “Bere a manom nsa kakraa bi no, mitumi kasa.” Enti osusuw sɛ nsa betumi aboa no ma wadi fɛre a ɛwɔ no so no so.

Dennis osuahu no nyɛ nea yɛntaa nte. Mmofra pii nom nsa a ano yɛ den esiane ntease ahorow a ɛte saa nti. Wo nso ɛ? So wobɛnom nsa? Sɛ saa a, ntease bɛn nti na wobɛnom nsa? Ansa na wobɛma saa nsemmisa no ho mmuae no, ebia nneɛma pii wɔ hɔ a wobɛpɛ sɛ wususuw ho.

Wobɛpɛ sɛ wususuw w’awofo ho, efisɛ nea woyɛ no kã wɔn. Afei nso wobɛpɛ sɛ wususuw mmara a ɛwɔ ɔman no mu ho​—sɛ́ mfe a woadi no yɛ nea mmara ma kwan sɛ wobɛnom nsa. Ade biako bio: Wɔaka sɛ gyinaesi biara wɔ nea efi mu ba. Enti bere a woresi gyinae sɛ ɔkwan bɛn so ne bere bɛn na wobɛnom nsa no, wobɛpɛ sɛ wukari nneɛma ahorow a ebefi wo gyinaesi no mu aba no nso hwɛ, efisɛ nea ebefi nsa a wode bedi dwuma wɔ ɔkwammɔne so mu aba a ehia wunsusuw ho no yɛ nea ebenya wo so nkɛntɛnso akyɛ.

Hia a Ɛho Hia Sɛ Wobɛkari Pɛ

Ɛyɛ nea akyinnye biara nni ho sɛ mfaso horow bi wɔ nsa a ano yɛ den a wɔde di dwuma wɔ anidahɔ mu no mu. Bible no mpo gye tom sɛ ebetumi ama koma no ani agye anaa ama aduan ayɛ dɛ yiye. (Ɔsɛnkafo 9:7) Adanse ahorow bi wɔ hɔ a ɛkyerɛ sɛ bobesa ankasa a ano nyɛ den pii ma apɔwmuden (1 Timoteo 5:23) Ɛda adi sɛ eyi yɛ nokware titiriw wɔ wɔn a wɔanyin no fam.

Nokware mu no, so wobɛka sɛ mmofra pii a wɔnom nsa no yɛ saa wɔ anidahɔ mu, sɛnea ɛbɛma wɔate aduan bi dɛ kɛse anaasɛ esiane apɔwmuden nti? Fred a ɔyɛ aberante a na ɔnom nsa pii bere a onnii mfe aduonu no ka sɛ, “Wurentumi nsusuw ho sɛ mmofra kuw bi a wɔn nyinaa adi mfirihyia 15 tete ɔpon ho renom nsa bi a wɔfrɛ no martinis a wɔrebɔ nkɔmmɔ wɔ anigye so.” Ɔde kaa ho sɛ: “Mpɛn pii no mmofra nom nsa sɛnea ɛbɛyɛ a ɛbɛba wɔn ani so.”

Nokwarem no, ɛnyɛ mmofra nyinaa na wɔde nsa di dwuma wɔ ɔkwammɔne a ɛte sɛɛ so. Nanso bere a Nyan! akyerɛwfo bisabisaa wɔn nsɛm no, mmofra pii a wɔanom nsa pɛn no gye toom sɛ wɔn mfitiase atirimpɔw nti a wɔyɛɛ saa ne sɛ ɛbɛba wɔn ani so anaasɛ wɔbɛbow mpo! Ebinom gye toom nso sɛ wɔnom nsa na ama wɔagyina ɔhaw ahorow ano, ama wɔn akokoduru anaasɛ te sɛ Dennis no, aboa wɔn ma wɔatumi ne afoforo abɔ. So ɛbɛyɛ sɛ asiane ahorow bi a ebetumi atra hɔ akyɛ befi nsa a wɔde di dwuma wɔ ɔkwammɔne a ɛte sɛɛ so mu aba?

W’adwene Nso Hia Adwumayɛ

Osuahu ne ɔkyerɛkyerɛfo a ɔsen biara. Anaasɛ woate biribi a ɛte saa. Bere a ebia osuahu renyɛ ɔkyerɛkyerɛfo a ɔsen biara bere nyinaa no, ɛyɛ nokware sɛ ɛyɛ ɔkyerɛkyerɛfo. Wɔ ɔkwan foforo so no, bere a worenyin no, ɔkwan titiriw biako a wobɛfa so asua ade ne osuahu. Bere a wunya asetra ne emu haw ahorow mu osuahu no, wubesua sɛnea wubegyina tebea horow a ɛyɛ den ano. Eyi ho hia kɛse ma onyin a wo nkate benyin wɔ ɔkwan a ɛfata so.

Yebetumi akyerɛkyerɛ mu wɔ saa kwan yi so: Wo nipadua hia adwumayɛ. Bere a ɛyɛ adwuma no, enya ahoɔden, ɛnte saa? Wiɛ, saa ara na w’adwene te. Ɛno nso hia adwumayɛ. Ɔkwan bɛn so na wode w’adwene yɛ adwuma? Ɛdenam ɔhaw ahorow a wuhu ne ɛho dwuma a wudi no so. Nanso sɛnea wo nipadua no begurow bere a woamma anyɛ adwuma no, saa ara na adwene no nso bɛyɛ mmerɛw bere a woamfa anyɛ adwuma no. Ɛbɛyɛ nea ɛrentumi nni asetra mu ɔhaw ahorow ho dwuma. Ɛno nti na asiane wɔ nsa a wɔde di dwuma sɛ ɔkwan a wɔnam so guan fi ɔhaw ne tebea a enye ahorow mu no.

Dennis, aberante a yɛkaa ne ho asɛm wɔ mfiase hɔ no hui sɛ eyi yɛ nokware. Ɔkyerɛkyerɛ mu sɛ: “Misusuw sɛ mmofra pii nom nsa de yi nneɛma a ɛhyɛ wɔn so no fi hɔ, nea wɔde yi wɔn haw ahorow fi hɔ. Enti wonnsua sɛnea wobedi ɔhaw ahorow ho dwuma ankasa da. Mitumi hu sɛ ɛno ne nea ɛtoo me no.” Wɔ ɔkwan bɛn so?

Kae sɛ Dennis susuwii sɛ nsa a ano yɛ den betumi aboa no ma wadi fɛre a na ɛwɔ no so no so. Ɔkae sɛ: “Bere a manom nsa kakra no, mitumi kasa.” Nanso so asanom ankasa boaa no ma odii ade a ɔfɛre no so? Dennis bua sɛ, “Bere a nsa no atetew m’ani so no, mesan kɔ me kan tebea no mu.” Na mprempren nso ɛ, wɔ mfe bi akyi no? Dennis toa so sɛ: “M’ansua sɛnea me ne nnipa bedi nkitaho a m’ani so da hɔ ankasa. Misusuw sɛ na mintumi nya nkɔso wɔ saa kwan yi so.”

Ɛyɛ nokware saa ara wɔ di a wodi adwene mu basaayɛ ho dwuma no mu. Sɛ wode nsa di dwuma de gyina adwene mu basaayɛ ano mprempren a, ebia ɛbɛyɛ den ama wo sɛ wubedi adwene mu basaayɛ ho dwuma bere a woanyin no.

Sɛ nhwɛso no, susuw Joan a bere a naonnii mfe aduonu no ɔde nsa a ano yɛ den dii dwuma sɛ biribi a ɛma ne ho tɔ no no ho. So eyi nyaa ne so nkɛntɛnso ma ɛkyɛe? Joan a mprempren aka kakraa na wadi mfe 30 no kyerɛkyerɛ mu sɛ: “Nnansa yi, bere a meyɛɛ basaa no misusuwii sɛ: ‘Ɛbɛyɛ papa sɛ mɛnom nsa mprempren.’ Wususuw sɛ wubetumi de nsa adi tebea bi ho dwuma yiye.”

Dennis ne Joan nsɛm a wɔaka no ne nea L. Hennecke, Ph.D., ne S. E. Gitlow, M.D., tintimii wɔ New York State Journal of Medicine mu no hyia: “Bere a nnubɔne [a nsa ka ho] ba bɛyɛ ɔkwan a wɔnam so nya ahotɔ wɔ tebea horow a emu yɛ den te sɛ nhomasua, asetra, anaasɛ nnipa ntam abusuabɔ mu no, hia a ɛho hia sɛ wosua nneɛma pa a ɛbɛma woatumi agyina ano no yɛ nea efi hɔ. Ebia nneɛma ahorow a ebefi mu aba no yɛ nea worente nka kosi wo mpanyimmere mu, bere a abusuabɔ a emu yɛ den a wubenya mu taa yɛ den, na ɛremma wonte nka sɛnea afoforo te nka wɔ nneɛma ho no.”

Ɛyɛ nea ɛyɛ papa sɛ wubedi ɔhaw ne tebea horow a emu yɛ den ho dwuma tẽe!

“Nanso Wannye”

Wɔ eyi mu no, nhwɛso pa biara nni hɔ a wubedi akyi sen Yesu Kristo ankasa. Wɔ anadwo a etwa to wɔ n’asase so asetra mu no mu no, Yesu huu amane pii. Bere a wɔayi no ama na afei wɔakyere no no, wokodii n’asɛm wɔ Yudafo nyamesom mpanyimfo no anim. Wɔde no baa Pilato anim, na afei wɔde no kɔɔ Herode anim, na wɔsan de no brɛɛ Pilato. Awiei koraa no, bere a wagyina hɔ anadwo no nyinaa no, wɔde no mae sɛ wɔnkɔbɔ no asɛndua mu.​—Marko 14 43-15:15; Luka 22: 47-23:25.

Dɛn na ɛbɛba, sɛ anka wɔ saa tebea no mu no, wɔmaa Yesu biribi a ɛremma ɔnte yaw nka, biribi a ɛbɛsakra ne su a ɛbɛma ayɛ mmerɛw sɛ obegyina saa tebea a emu yɛ den kɛse yi ano a? Ɛno pɛpɛɛpɛ na esii! Bible no kyerɛkyerɛ mu sɛ: “Na wɔde no koduu baabi a wɔfrɛ hɔ Golgota; ne nkyerɛase ne nitiri so. Na wɔmaa no nsa a wɔde aduhuam afra mu, nanso wannye.” (Marko 15:22) Yesu pɛe sɛ n’adwene mu da hɔ. Ɔpɛe sɛ ogyina saa tebea a na emu yɛ den yi ano wɔ ɔkwan pa so. Na ɔnyɛ obi a asɛm to no a na waguan!

Nokwarem no, na wɔde aduru agu nsa a wɔde maa Yesu no mu, na ɛno nti na ɔpowee no. Akyiri yi, bere a wɔmaa no nsa kakra a ɛda adi sɛ aduru nnim no, ogyei. Dɛn ntia? Ne tiaa ne sɛ, ɔde dwudwoo sukɔm a na ɛde no no ano na ama Bible nkɔmhyɛ abam.​—Yohane 19:28-30; Dwom 69:21.

Sɛ wode toto ho a, wo haw ahorow, nneɛma ahorow a ɛhyɛ wo so anaasɛ nneɛma ahorow a ɛhaw w’adwene bɛyɛ nea ɛnyɛ titiriw biara. Nanso wubetumi asua biribi pa afi Yesu hɔ. Sɛ́ anka wode biribi a ɛsakra wo su (te sɛ nsa) bedi dwuma de adi wo haw ahorow, nneɛma ahorow a ɛhyɛ wo so ne tebea horow a emu yɛ den ho dwuma mmom no, ɛbɛyɛ nea mfaso wɔ so ama wo sɛ w’ankasa wubedi ho dwuma. Bere a wokɔ so hyia asetra mu ɔhaw horow pii no, wo ho bɛkɔ so akokwaw wɔ di a wubedi ho dwuma no mu. Wubenyin abenya atenka pa.

Gyinae a wubesi a egyina nsɛm a woate so a ɛfa sɛ́ ebia ɛsɛ wonom nsa, ɔkwan a wobɛfa so anom ne bere a ɛsɛ sɛ woyɛ saa ho no yɛ asɛyɛde a anibere wom. Sɛ wopaw sɛ worennom nsa a, ma w’ani nnye ho. Ɛnsɛ sɛ wopa afoforo kyɛw esiane nsa a wonnom nti. Ɛsɛ sɛ wɔkyerɛ obu ma wo wɔ wo gyinaesi no ho. Wɔ ɔkwan foforo so no, sɛ mfe a wadi no yɛ nea mmara ma ho kwan na wopɛ sɛ wonom nsa a, ɛnde yɛ saa wɔ ɔkwan pa so​—wɔ anidahɔ mu.

[Asɛm a wɔafa aka wɔ kratafa 21]

Bere a wuhyia asetra mu ɔhaw ahorow pii no, wo ho bɛkɔ so akokwaw wɔ di a wubedi ho dwuma no mu

[Kratafa 19 mfoni]

Ebia nsa kakraa a wobɛnom no bɛboa wo ma woatumi akasa nanso ɛyɛ bere tiaa bi

[Kratafa 20 mfoni]

Obi a ɔde ne ho to nsa so no rentumi nsua sɛnea obedi fɛre a ɛwɔ no so no so ankasa