Onyaa Nea Ne Koma Pɛ

SO ƐYƐ nea wo koma pɛ sɛ wubehu sɛ Mesia Ahenni no redi asase nyinaa so? Sɛ ɛte saa a, ɛnde wohwɛ kwan, na wobɔ ɔsoro Ahenni no mu nhyira ahorow a ɛbɛba asase so no ho mpae. Ɛnde tɔ wo bo ase, efisɛ “anigyinade a ɛba mu yɛ nkwa dua.”—Mmebusɛm 13:12; Yakobo 5:7, 8.

Bɛyɛ mfe 2,000 a atwam ni no, ná ɔbarima bi a ‘ɔteɛ na ɔfɛre ade’ a wɔfrɛ no Simeon te Yerusalem. Ná ɔwɔ Mesia no ho nkɔmhyɛ ahorow mu gyidi, na na “ɔretwɛn Israel awerɛkyekye.”—Luka 2:25.

Mesia Ho Nkɔmhyɛ Ma Anidaso

Yehowa na ɔde Mesia no ho nkɔmhyɛ a edi kan no mae—nea ɛmaa adesamma abɔnefo a wɔrewuwu nyaa anidaso. Onyankopɔn hyɛɛ ne ‘ɔbea’ no, anaa n’amansan ahyehyɛde no Aseni no mmae ho nkɔm.—Genesis 3:15.

Wɔkaa Onii no ho asɛm sɛ ɔbɛyɛ Abraham aseni, na Yakob kaa ne mmae ho asɛm siei. (Genesis 22:17, 18; 49:10) Wɔkamfoo Mesia no Ahenni no anuonyam kyerɛe wɔ nnwom nhoma no mu. (Dwom 72:1-20) Yesaia ka siei sɛ ɔbaabun na ɔbɛwo Aseni no, na Mika hyɛɛ nkɔm sɛ wɔbɛwo no wɔ Betlehem. (Yesaia 7:14; Mika 5:2) Eyinom yɛ Mesia no ho nkɔmhyɛ pii no mu kakraa bi pɛ.

Na Mesia No Nnya Mmmae!

Susuw nsɛm a esisii tete no ho hwɛ, na fa no sɛ afeha a edi kan Y.B. mu rebɛn. Onyankopɔn mfitiase nkɔmhyɛ a ɛfa Mesia no ho adi mfirihyia 4,000 mprempren. Yudafo no ahu Yehowa asɔrefie no sɛe, wɔn man no sɛe pasaa, ne mfe 70 nnommumfa a wɔkɔe wɔ Babilon, na wɔde mfirihyia 500 bio atra Amanaman mufo sodifo nniso ase. Ne nyinaa akyi no, Mesia no mmae!

Hwɛ sɛnea na Yudafo a wosuro Onyankopɔn hwɛ Mesia no ba kwan! Ɔno na ɔde nhyira bɛbrɛ wɔn ne amanaman nyinaa.

Ɔbarima a Ɔwɔ Nidi

Yudafo a wɔwɔ nidi a wɔde anigyina ne mpaebɔ hwɛ Mesia no ba kwan no biako ne Simeon, Yehowa somfo nokwafo bi a ne mfe akɔ anim a ɔte Yudea ahenkuro mu no. Simeon ate biribi soronko bi.

Onyankopɔn de ne honhom kronkron agu Simeon so, na wayi adiyi bi akyerɛ no. Simeon renwu kosi sɛ obehu Nea ɔbɛyɛ Mesia no. Nanso nna ne asram retwam. Simeon renyin, na ɔnhwɛ kwan sɛ obetumi atra ase akyɛ. So ɛbɔ a Onyankopɔn ahyɛ no no bɛbam?

Da bi (wɔ 2 A.Y.B.), awarefo bi a wonnyinnyin pii de abofra bi fi Betlehem ba asɔrefie hɔ. Honhom kronkron yi no adi kyerɛ Simeon sɛ ɛda yi ne da a ofi bere tenten atwɛn no. Ɔkɔ asɔrefie hɔ, kɔhwɛ Nea adiyifo no akyerɛw ne ho nsɛm no. Ɔnantew ahoɔhare so sɛnea n’ahoɔden bɛma no kwan biara, na ohu Yosef, Maria, ne abofra no.

Hwɛ anigye ara a Simeon de gye abofra no to ne nsa so! Oyi na ɔbɛyɛ Mesia a wahyɛ ne ho bɔ no—‘Yehowa Kristo.’ Esiane sɛ Simeon mfe akɔ anim saa nti, ontumi nhwɛ kwan sɛ ɔbɛtra ase ahu Yesu asase so som adwuma a obedi ho dwuma awie no. Nanso, ɛyɛ anigyesɛm sɛ wahu no sɛ abofra. Mesia ho nkɔmhyɛ ahorow afi ase renya mmamu. Hwɛ sɛnea Simeon ani agye! Afei de ɔde abotɔyam bɛkɔ akɔda wɔ owu mu akosi owusɔre bere no.—Luka 2:25-28.

Simeon Nkɔmhyɛ Nsɛm

Bere a Simeon ma ne nne so yi Yehowa ayɛ no, yɛte sɛ ɔka sɛ: “Amansan Hene, afei woregya w’akoa kwan asomdwoe mu sɛnea w’asɛm se; efisɛ m’ani ahu wo nkwagye a woasiesie aman nyinaa anim, hann a ɛbɛma wɔayi nkatanim no afi amanaman so na ɛbɛhyɛ wo man Israel anuonyam.” Nsɛm yi kɔ so yɛ Yesu maame Maria ne ne kunu Yosef nwonwa.—Luka 2:29-33, New World Translation.

Simeon de animtew hyira Yosef ne Maria, na ɛda adi sɛ ɔsrɛ Yehowa nhyira ma wɔn na wɔatumi ahwɛ abofra no. Afei akwakora no ma n’ani bere. Bere a ɔkasa kyerɛ Maria nkutoo no, ɔde ka ho sɛ: “Hwɛ, abofra yi na wɔde no asi hɔ ama Israel mu nnipa bebree asehwe ne sɔre ne sɛnkyerɛnne a wɔbɛkasa atia no, na wo nso, afoa [tenten] bi behwirew w’ankasa kra mu, na koma bebree mu adwene ayi adi.”—Luka 2:34, 35.

Simeon Asɛm a Ɔka Kyerɛɛ Maria

Susuw sɛnea Maria tee nka no ho hwɛ. Dɛn na na Simeon kyerɛ? Ná nnipa binom begye Kristo atom na wɔama wɔn so afi wɔn bɔne mu. Nanso, na afoforo bɛpow no, na wayɛ hintidua ama wɔn ahwehwe ase. Sɛnea ɔhyɛɛ ho nkɔm no, Yesu bɛyɛɛ hintibo maa Yudafo no mu pii. (Yesaia 8:14; 28:16) Na Simeon nsɛm no nkyerɛ sɛ Israelfo ankorankoro bɛpow Yesu na wɔahwe ase nea edi kan, na afei wɔasɔre abegye no adi. Mmom no, na ɛbɛsono sɛnea ankorankoro biara bɛyɛ n’ade wɔ ne ho, na ebeyi koma bebree mu nsusuwii adi na ɛde Onyankopɔn atemmu, nhyira anaa nnome aba wɔn so. Wɔ wɔn a wonnye no nni fam no, ɔbɛyɛ te sɛ sɛnkyerɛnne na wɔabu no animtiaa bi. Na ne mu gyidi a afoforo benya no bɛma wɔn nso afi wu a wɔrewuwu wɔ wɔn mfomso ne wɔn bɔne mu ma wɔabenya trenee gyinabea wɔ Onyankopɔn anim. Ná sɛnea nnipa bɛyɛ wɔn ade wɔ Mesia no ho no na ɛbɛkyerɛ nea ɛwɔ wɔn komam.

Na Simeon nsɛm a ese: ‘Afoa tenten bi behwirew w’ankasa kra mu’ no nso ɛ? Biribiara nni Kyerɛwnsɛm mu a ɛkyerɛ sɛ wɔde afoa ankasa hwirew Maria mu. Nanso, ná pow a nnipa dodow no ara bɛpow Yesu no bɛhaw no. Na hwɛ sɛnea Maria dii yaw bere a ohui sɛ wɔde Yesu afam dua ho no! Ná eyi te sɛ nea wɔde afoa ahwirew ne mu.

Simeon De Mesia Ho Nkɔmhyɛ Ahorow Di Dwuma

Onyankopɔn honhom kaa Simeon maa ɔde Mesia ho nkɔmhyɛ no dii dwuma wɔ Yesu ho. Ná Simeon betumi akɔda asomdwoe mu dwoodwoo, ‘efisɛ n’ani huu Onyankopɔn kwan a ɔnam so begye nkwa a Wasiesie aman nyinaa anim no, hann a ɛbɛma wɔayi nkatanim afi amanaman so, na ɛbɛhyɛ Ne man Israel anuonyam no.’ (Luka 2:30-32) Hwɛ sɛnea eyi dii Yesaia nkɔmhyɛ nsɛm no ho dwuma yiye!

Saa odiyifo no hyɛɛ nkɔm sɛ: “[Yehowa] anuonyam beyi ne ho adi, na ɔhonam nyinaa abom ahu.” “[Me Yehowa], mede [Mesia no] mɛyɛ amanaman hann, na woayɛ me nkwagye akodu asase ano.” (Yesaia 40:5; 42:6; 49:6; 52:10) Kristofo Hela Kyerɛwnsɛm no ne nokwasɛm ahorow a aniwa tua di adanse sɛ Mesia a ɔne Yesu Kristo no, ne nokware hann ma amanaman no, Onii a obeyi honhom mu sum nkatanim no na ɔde nkwagye abrɛ nnipa no.

Onyankopɔn Asɛm nka akwakora Simeon ho asɛm bio. Adanse a ɛwɔ hɔ da no adi sɛ owui ansa na Kristo rebue ɔsoro asetra ho kwan no. Ɛnde ɛnkyɛ, wobenyan Simeon aba asase so asetra mu. Hwɛ anigye ara a ɔno—ne wo—betumi anya wɔ wiase foforo no mu wɔ Onyankopɔn Mesia Ahenni no ase!