So Awo Ntoatoaso Yi Ahu ‘Sɛnkyerɛnne A Ebefi Soro Aba’ No?

AWO NTOATOASO yi mu mpanyimfo no mu binom betumi akae wimhyɛn a wɔde tu kwan no mfiase, bere a Orville Wright tumi de wimhyɛn kyin wim wɔ 1903 mu no akyi. Saa bere no na wobu wimhyɛn sɛ agode kɛse bi. Ná wimhyɛnkafo no de kyerɛ nea otumi yɛ na na wɔde gye nnipadɔm a wɔhwɛ no ani.

Nanso wɔ 1911 mu no, Italy fii ase de wimhyɛn dii dwuma de ɔtopae nketewa koguu asraafo a wofi Turkey so. Afei 1914 dui. Encyclopaedia Britannica ka sɛ, “Bere a nnipa tra wimhyɛn mu de tu kwan de gye wɔn ani no baa awiei mpofirim bere a Wiase Ko I fii ase 1914 no. Sika ɔpepem pii nniso ahorow a wɔde wɔn ho ahyɛ ɔko no mu penee so sɛ wobetua ama wɔn a wodi wimhyɛn ho adwini no maa wimhyɛn ho adwuma no bɛyɛɛ adwuma kɛse mpofirim.”

Ko a Wɔko Wɔ Ahunmu Fii Ase

Wɔ ɔko no mfiase pɛɛ no, na aman ahorow a ɛwɔ Europa no de wimhyɛn wiawia wɔn ho kɔhwɛ nea afoforo reyɛ. Nanso wɔ August 26, 1914 mu no, wɔhyɛɛ da de Rusiafo wimhyɛn bi pem Austriafo wimhyɛn bi a ɛrekɔ akɔtoa wɔn no mu. Wimhyɛnkafo baanu no nyinaa wuwui. Saa da no ara, Britaniafo de wɔn wimhyɛn abiɛsa twaa Germanfo wimhyɛn bi a wɔde sra kwan so ho hyiae na wɔyɛe ma esii fam. Ɛdaa adi sɛ na amanaman no afi ase redi ako wɔ ahunmu. Wɔ October 5, 1914 mu no, Franseni wimhyɛnkafo bi de otuo bi a wotumi tow no ntɛmntɛm traa wimhyɛn mu na ɔde tow Germanfo wimhyɛn bi ma efii soro bɛhwee fam. Ankyɛ biara wɔde atuo ahorow a wotumi tow no ntɛmntɛm hyehyɛɛ wimhyɛn ahorow ho na eyi ma wodii ako a ɛyɛ hu wɔ ahunmu. Bere a ɔko no baa awiei no, na nnipa bɛboro 10,000 ahwere wɔn nkwa wɔ akodi yi mu.

Nea na ɛyɛ hu kɛse ne ɔtopae ahorow a efii wimhyɛn mu guu fam no. Wɔ October 8, 1914 mu no, Britaniafo wimhyɛn abien kɔtotow ɔtopae guu mmeae atitiriw bi wɔ Cologne ne Dusseldorf. Afei wɔ December 1914 mu no, Germanfo fii ase de wimhyɛn totow ɔtopae guu Britaniafo so. Susanne Everett kyerɛw wɔ ne nhoma World War I​—An Illustrated History mu sɛ, “Wimhyɛn a wɔde totow ɔtopae ahorow guu atamfo so no maa ehu kɛse kaa nkurɔfo bere a ɔko no kɔɔ so no.”

Wɔ ne nhoma Flyers and Flying mu no, Aidan Chambers ka hia a na wimhyɛn ho hia wɔ Wiase Ko I no mu ho asɛm tiaa sɛ: “Wimhyɛn atumi atra hɔ wɔ ɔsɛe bere mu. Pii a abubu esiane ko a wɔde koe wɔ ahunmu nti, gugu akono ahorow wɔ Franse; wɔatotow ɔtopae ahorow agugu London ne nkurow akɛse afoforo, nkurow nketewa ne nkuraa ahorow so; wofii ahunmu tow hyɛɛ po so ahyɛn so. Ɔko yɛ nea wɔnam mmarima a wɔnam wɔn mfiri horow no so tu a ɛyɛ nwonwa no so ama asakra.”

Pii huu eyi ne nneɛma afoforo a ɛkɔɔ so wɔ ɔko no mu no sɛ ɛyɛ Bible nkɔmhyɛ mmamu: “Ɔman bɛsɔre ɔman so, ne ahenni ahenni so. . . . na ahude ne nsɛnkyerɛnne akɛse befi soro aba.” (Luka 21:10, 11) Nkɔmhyɛ yi ho kyerɛwtohɔ biako de nsɛm yi ka ho: “Na eyinom nyinaa ne awoko yaw mfiase.”​—Mateo 24:7, 8.

“Awoko Yaw Mfiase”?

So Wiase Ko I a ‘ahude ne sɛnkyerɛnne akɛse a efi soro bae’ no ka ho no daa adi sɛ ɛne “awoko yaw mfiase,” sɛnea Bible ka no? Abakɔsɛm bua sɛ yiw. Wɔtotow ɔtopae bɛboro tɔn ɔpepem biako fii soro wɔ Wiase Ko II mu. Nea na ɛka eyinom ho ne atuo afoforo a ano yɛ den a ebetumi ahwirow concrete a ne tenten bɛyɛ anammɔn 16 mu no.

Susuw ehu a ɛkaa nnipa a wɔte Hamburg wɔ anadwo biako mu wɔ July 1943 mu no ho, bere a wimhyɛn a emu duru yɛ 700 totow ɔtopae guu wɔn kurow no so no. Wɔyɛɛ saa bio wɔ nnafua abien akyi na eyi maa ogya a ekunkum nnipa bɛboro 40,000 tɔɔ kurow no mu. Adolf Galland kyerɛwee sɛ: “Aguanfo pii a wɔayeyɛ bosaa na ehu kɛse akã wɔn kɔɔ amansin ahorow a ɛbemmɛm no mu. Yɛ a na Hamburg ayɛ hu no trɛw kaa ne nkuraase nyinaa ntɛm ara.”

Wɔtotow ɔtopae pii guguu Warsaw, London, Coventry, Berlin, Dresden, Tokyo ne nkurow afoforo pii so. Ɔtopae a wɔde wimhyɛn totow guu Tokyo so no mu biako maa ogya a ɛdaa adi sɛ ɛsɛee ade kɛse sen nea ɛtɔɔ Hamburg mu mpo no tɔɔ kurow no mu. Ekunkum nnipa bɛboro 80,000. Bere a wɔatotow ɔtopae agu kurow no mu ntoatoaso akyi no, ɔpepem pii guan fii kurow no mu. Abakɔsɛm kyerɛwfo Jablonski kyerɛw sɛ, “Nnipa a wɔte Tokyo no dodow so tew fii ɔpepem anum beduu ɔpepem abien ne ɔpepem biako mu nkyem abiɛsa mu biako.” Ɔbea bi a ofi Japan ka sɛ, “Bere biara a mɛte afiri a wɔde dum gya abɛn anaa mehu nyansin a ɛhyɛ gya mu wɔ asommorofi a ɛrepaapae no, me koma tu na mekae nneɛma a ɛyɛ hu a esisii wɔ me mmofraase no.”

Wiase Ko II ma wɔyɛɛ akode afoforo a ɛyɛ hu. Wɔ mfe a etwa to wɔ ɔko no mu no, Germanfo fii ase totow asraman a wɔfrɛ no V-2 a ekura mmɛmma a emu duru yɛ tɔn biako. Esiane sɛ etumi twa akwansin 3,500 wɔ dɔnhwerew biako mu nti, eyinom duu Britaniafo asase so wɔ bɛyɛ simma anum pɛ ntam bere a wɔatow akyi. Afei United States de atomik ɔtopae abien guu Japan nkurow a wɔfrɛ no Hiroshima ne Nagasaki so ma ekunkum nnipa bɛboro mpem ɔha amonom hɔ ara. Encyclopaedia Britannica kyerɛkyerɛ mu sɛ, “V-2 a ɛte sɛ atomik ɔtopae no yɛɛ aprɛm mmɛmma a wɔtow fi asasepɔn biako so kɔ foforo so a ɛbae wɔ ɔko no akyi no ho mfonini.”

Wɔ ɔko no akyi no, aman ahorow no yɛɛ nuklea ɔtopae ahorow a etumi sɛe ade kɛse mpo. Wɔde ahopere sɔɔ eyinom hwɛe ansa na wɔde wɔn nsa hyɛ Apam a Ɛbara Nuklea Akode a Wɔsɔ Hwɛ no ase. Wɔtotow nuklea ɔtopae ahorow wɔ ahunmu mpo. Ɛdefa sɔ a wɔsɔɔ biako a ɛte saa hwɛe ho no, Ɔbenfo Mitton kyerɛw wɔ ne nhoma Daytime Star​—The Story of Our Sun mu sɛ: “Ɔtopae a wɔfrɛ no Starfish a wɔtow wɔ July 1962 mu no maa mframa bɔne bi bae mfe pii. Wohuu agyimisɛm a ɛwɔ adeyɛ yi mu no yiye bere a wohui sɛ wɔnam ɛno so asɛe ahunmu ahyɛn pii a ne bo yɛ den koraa no.”

1963 apam no too nuklea akode ahorow a wɔsɔ hwɛ no ano hye nanso ansiw aman a wɔwɔ tumi no kwan wɔ ɔtopae ahorow yi pii a wɔbɛyɛ no mu. Saa ara na ansiw wɔn kwan wɔ ɔkwan a wɔnam so tow a wɔbɛma anya nkɔso no ho. Ɔreka eyi ho asɛm no, abenfo Jastrow kyerɛwee wɔ Science Digest mu sɛ: “Bere a na Germanfo retotow V-2 ahorow agu Britania so wɔ mfe 40 a atwam ni no mu no, na wosusuw sɛ wɔrebɔ mmɔden kɛse, sɛ asraman a wɔtowee no kɔtɔ baabi a ɛbɛn faako a ɛsɛ sɛ ɛtɔ no bɛyɛ akwansin 10 a. . . . Mmɛmma ahorow a Rusiafo ne Amerikafo wɔ a wotumi tow fi asasepɔn biako so kɔ foforo so a wɔayeyɛ no nnɛ no tumi kɔtɔ baabi a ɛbɛn faako a ɛsɛ sɛ ɛtɔ no bɛyɛ basafa 300 bere a atwa akwansin mpempem pii no.

Ɔbenfo Jastrow kɔɔ so kaa aprɛm mmɛmma ahorow foforo a wɔnam so kyere nsɛm wɔ akyirikyiri ho asɛm. Wɔfrɛ no “aprɛm mmɛmma a ne ho yɛ hare” na wɔka sɛ, sɛ wɔkyekyem a, eyinom betumi “akɔtɔ baabi a ɛbɛn faako a ɛsɛ sɛ ɛtɔ no bɛyɛ basafa 25,” sɛ wɔtow a. Wogye di sɛ wobetumi de “aprɛm mmɛmma a wɔn ho yɛ hare” no ayɛ aprɛm a wɔtow fi asasepɔn biako so kɔ foforo so no mmɛmma.

So worennye ntom sɛ nsɛm a efii ase sisii wɔ 1914 mu no yɛ “awoko yaw mfiase”? Di a onipa de “ɔsoro” di dwuma no abɛyɛ nea ɛredi awu kɛse.