‘Sɛnkyerɛnne A Efi Soro’​—Biribi A Ɛde Abasamtu Ba?

“Ebedu afe 2000 no, wobetumi de akode ahorow a ɛyɛ hu a wotumi de di dwuma wɔ ɔkwan a ɛyɛ hu so akɔ ahunmu de atow ahyɛ ahunmu mfiri so wɔ faako a ɛwɔ ne mmeae horow a wɔpɛ sɛ wɔtow hyɛ so wɔ Asase so ha nyinaa so.”

AMANAMAN ntam ahunmu akwantu ho animdefo fekuw no titrani na ɔkaa asɛm a ɛwɔ atifi hɔ no afe a etwaam. Ahunmu akode nyɛ nea wɔka ho asɛm ara kwa. Aman ahorow a wɔwɔ tumi no mu biako atumi asɔ akode a wɔde tow ahunmu hyɛn tuo ahwɛ dedaw.

Wɔ ɔkasa a United States ɔmanpanyin mae wɔ March 23, 1983 no mu no, ɔkaa akode ahorow a ɛwɔ ahunmu a wɔde bedi dwuma sɛ ɔkwan a wɔnam so bɔ wɔn ho ban no ho asɛm. Eyi behia sɛ wɔde ahunmu ahyɛn dodow bi kɔ ahunmu​—ahunmu ahyɛn a ebetumi ahu atamfo no aprɛm ahorow na atumi asɛe no. Aban no frɛ no Ahobammɔ Titiriw ho Nhyehyɛe Mfiase na wɔato nhyehyɛe no din sɛ Nsoromma Mu Ɔko.

Nyansahu ho nsɛmma nhoma biako ka ho asɛm sɛ ɛyɛ “anidaso kɛse ma daakye, nea ɛbɛma nuklea akode ho hu kɛse no ano abrɛ ase.” Nsɛmma nhoma foforo a wɔfrɛ no Nature kae sɛ: “Nsoromma mu ɔko ho nhyehyɛe a wɔyɛ no ma hokwan ahorow a ɛwɔ hɔ a ɛbɛma wɔatew nuklea akode ahorow no dodow so no kɔ so yɛ kakraa bi; sɛ wo tamfo wɔ kyɛm a, wuhia mmɛmma pii.” Saa ara na asɛm bi a ɛwɔ Scientific American mu no kaa “ahobammɔ kɛse a enni wiase nyinaa” a nuklea mfe no ama aba no ho asɛm na ɔka sɛ sɛ ɛba sɛ “ahunmu akodeyɛ mu akansi a anohyeto biara nni mu” di akyi ba a, ɛbɛma “ahobammɔ a yɛwɔ” no so atew bio.

Wɔkaa Abasamtu a Ɛsɛ Sɛ Wɔhwɛ Kwan Ho Asɛm Too Hɔ

Wɔkaa basaayɛ a yɛn awo ntoatoaso yi ahu no ho asɛm too hɔ wɔ Bible mu bere a ɛkae sɛ ‘ehu ne nneɛma a wɔhwɛ a ɛreba wiase no bɛma nnipa atoto beraw; efisɛ wɔbɛwosow ɔsoro ahoɔden’ no. (Luka 21:26) “Ehu” nti, nneɛma pii ma nnipa “toto beraw” wɔ asase no daakye ho

Sɛ nhwɛso no, nyansahufo baanum bi kyerɛw biribi faa asɛm a ɛne “Nneɛma a Nuklea Ɔko Bɛma Aba Wim” ho, na wɔkae sɛ: “Nneɛma ahorow a yɛn kuw no ahu nnansa yi a adwumayɛfo a wɔwɔ Europa, U.S. ne U.S.S.R. asi so dua no kyerɛ sɛ ɛda adi sɛ nneɛma a ɔko a wɔde nuklea akode bedi dwuma wom kɛse no bɛma aba wim a ɛbɛtra hɔ akyɛ no ano bɛyɛ den na ɛbɛkɔ akyiri asen sɛnea wɔasusuw no. Wɔ ɔko a ɛte saa akyi no, asase so mmeae ahorow bi beduru sum, ɛbɛyɛ nwini kɛse, ahum akɛse betu wɔ so, wusiw a edi awu ne mframa bɔne bɛbɔ ntoatoaso wɔ so . . . Wɔ mmeae horow a ɛmmɛn ɔko no mpo no, ɔkɔm bɛma wɔn a wobenya nkwa no nkwa ho aba asɛm na nneɛma afoforo a ɛyɛ hu kɛse befi mu aba.”​—Scientific American, August 1984.

Saa nneɛma a ɛbɛba wiase nyinaa wɔ ɔko a wɔde nuklea akode bedi dwuma wom no mu no yɛ nea wɔfrɛ no nuklea awɔwbere. Ɛnyɛ nwonwa sɛ nnipa a wɔwɔ wiase no kesee fam mpo koma tu, ɛwom sɛ wɔmmɛn aman a wowɔ tumi no nsase koraa de. Wɔkae wɔ asɛm a wɔato din sɛ “Harmagedon” a ɛwɔ South African Medical Journal mu sɛ: “Ko a wɔbɛko ɔko a wɔde nuklea akode di dwuma wom no bɛma nneɛma afoforo nyinaa a ɛka adesamma akwahosan no ayɛ nea ɛnyɛ titiriw biara. . . . Wɔ ɔko biara a wɔde nuklea akode bedi dwuma wom kɛse mu no, aduruyɛ adwuma sɛnea yenim no begu. . . . Mprempren ɛda adi sɛ nnipa pii nim asiane a ɛwɔ nuklea ɔsɛe ho no kɛse sen bere biara.”

Ɛnyɛ nuklea ɔko ho hu nkutoo na wɔde basaayɛ hwɛ kwan sɛ ɛbɛsɛe nneɛma pii. Wɔtaa ka asiane ahorow a abɔde ahorow a ɛsono emu biara a ɛwɔ amansan no mu de bɛba no ho asɛm wɔ nhoma ne nsɛmma nhoma ahorow mu. Wogyinaa biribi kɛse bi a wɔhwɛ kwan sɛ ɛbɛba abɛpem asase no ho asɛm so na ɛyɛɛ nnansa yi sini bi a eyi hu a wɔfrɛ no Meteor no. Nnansa yi ara mpo, nsɛmma nhoma bi a wotintim wɔ Afrika bisaa asɛm yi: “Ɔkwan bɛn so na adesamma wɔ ahobammɔ wɔ ɔsɛe a ɛnam nsoromatua-dua a ayera kwan so bɛba no ho?” Na wɔaka asase no a ɛbɛsɛe denam nsoromma kɛse bi a ɛbɛpae a ɛbɛbɔ mframa bɔne pii aba yɛn asase no so a ebetumi aba no nso ho asɛm.

So ɛho hia sɛ nsusuwii a ɛte saa no ma wo koma tu? Na ehu ankasa a ɔko a wɔde nuklea akode bedi dwuma wom ne nea ɛbɛba wɔ akyi yi no nso ɛ? So nnyinasosɛm bi wɔ hɔ a ɛbɛma woagye adi sɛ asase no ne adesamma bɛkɔ so atra hɔ

Nea Enti a Anidaso Wɔ Hɔ

Mpɛn pii ɔsɛe kɛse ho asɛm a wɔka no yɛ nea egyina gyidi a ɛkyerɛ sɛ, sɛ ɔbɔadeɛ bi wɔ hɔ mpo a, ontumi nhwɛ n’amansan no so no so. Nanso so ntease wɔ nsusuwii a ɛte saa mu? Ɛdefa Ade Nyinaa so Tumfoɔ, Nyankopɔn no tumi horow ho no, wɔde honhom kaa Bible mu dwontofo no ma ɔkyerɛwee sɛ: “Owia ne ɔsram, munyi no ayɛ, nsoromma a ɛharan nyinaa, munyi no ayɛ. Mo soro mu soro, munyi no ayɛ . . . na ɔno na ɔhyɛe ma wɔbɔɔ wɔn; na ɔde wɔn tintim hɔ daa daa, wahyɛ ahyɛde a obi ntra.”​—Dwom 148:3-6.

Nanso, ebia wubebisa sɛ, ‘Bɔhyɛ bɛn na Bible no de ma a ɛkyerɛ sɛ asase no nso betim hɔ daa?’ Hyɛ no nsow: “[Onyankopɔn], wɔde asase atim ne nnyinaso so, na anhim da biara da.” (Dwom 104:5) Enti bɔhyɛ a efi soro no ne sɛ: “Na ahobrɛasefo benya asase no adi, na wɔagye wɔ wɔn ani asomdwoe bebree mu. Treneefo benya asase no adi, na wɔatra so daapem.” (Dwom 37:11, 29) Nokwarem no, Yesu Kristo faa asɛm fii Dwom 37 de kaa asɛm na ɔnam saa yɛ so kyerɛɛ sɛ ogye daakye bi a enni awiei a ɛwɔ hɔ ma onipa wɔ asase so no di pintinn.​—Mateo 5:5.

Yesu kaa awo ntoatoaso a ebefi ase ahu Onyankopɔn bɔhyɛ ahorow no mmamu ho asɛm too hɔ. Ɔkae sɛ ɔkɔm, ɔyaredɔm, asasewosow, amumɔyɛ ne asiane afoforo bɛyɛ nneɛma nhyehyɛe yi nna a edi akyiri no ho nsɛnkyerɛnne de kaa nnɛ bere yi mu ‘nsɛnkyerɛnne akɛse a ebefi soro aba’ no ho bere a ɔreka ho asɛm ato hɔ no. (Luka 21:10, 11; Mateo 24:6-12) Ebia obi bɛka sɛ ampa, ɛyɛ ade a ɛma obi koma tu. Nanso tie nea Yesu ka: “Na nneɛma yi refi ase aba a, monhwɛ ɔsoro na momma mo ti so, efisɛ mo gye rebɛn. Sɛ muhu sɛ eyinom ba a, munhu sɛ Onyankopɔn ahenni abɛn.”​—Luka 21:28-31.

Dɛn nti na ɛsɛ sɛ wonya anidaso yi? Efisɛ na Yesu nim sɛ ɛho renhia sɛ ne nokware akyidifo ma “ehu ne nneɛma a wɔhwɛ a ɛreba wiase” no haw wɔn nso. (Luka 21:26) Mmom no, wobetumi de ahotoso ama wɔn ti so efisɛ na gye a wobegye wɔn afi ɔsɛe nyinaa ho hu mu no abɛn. Wɔrentumi nya ogye a ɛte saa denam nnipa amammui nniso horow so. Nanso ɛbɛba denam gye a “Onyankopɔn ahenni no” de ne ho begye mu no so. Ɛno nti na Yesu kyerɛkyerɛɛ n’akyidifo sɛ wɔmmɔ mpae sɛ: “Yɛn Agya a wowɔ soro, wo din ho ntew, w’ahenni mmra, nea wopɛ nyɛ asase so, sɛnea ɛyɛ ɔsoro” no.​—Mateo 6:9, 10.

Nanso ebia wubebisa sɛ: ‘Bere bɛn na ogye a wɔahyɛ ho bɔ yi bɛba?’ Ɛdefa awo ntoatoaso a ebefi ase ahu ‘nsɛnkyerɛnne akɛse a ebefi soro aba’ no ho no, Yesu kae sɛ: “Nokware mise mo sɛ, awo ntoatoaso yi rentwam, gye sɛ ne nyinaa aba mu ansa.” Enti 1914 awo ntoatoaso mu nnipa a wofii ase huu saa “nsɛnkyerɛnne” yi bi bɛkɔ so ara atra ase bere a Onyankopɔn Ahenni di asase nyinaa so no.​—Luka 21:32.

So Wobɛka Wɔn a Wobenya Nkwa no Ho?

Wubetumi anya nkwa wɔ ehu bere yi mu, efisɛ Yesu kae sɛ: “Enti monwɛn na monsrɛ daa, na moanya ahoɔden de aguan afi nneɛma a ɛrebɛba yi nyinaa mu, na moakogyina onipa ba no anim.” (Luka 21:36) Yiw, wubetumi ‘anya ahoɔden de aguan.’ Nanso ɔkwan bɛn so?

Nea edi kan no, ɛho hia sɛ wunya Onyankopɔn apɛde ne n’atirimpɔw ho nimdeɛ. Eyi hwehwɛ sɛ wode anibere bɛkenkan Bible no na woasua. Nhyira horow a ɛyɛ nwonwa fi mu ba sɛnea Yesu kae no: “Anigye ne wɔn a wɔn honhom mu nneɛma ho hia wɔn.” Sɛ wususuw ho a, dɛn na ɛma obi nya anigye sen daa nkwa ho bɔhyɛ no? Yesu kae wɔ mpae a ɔbɔɔ Onyankopɔn no mu sɛ: “Eyi kyerɛ daa nkwa, wo, nokware Nyankopɔn koro, ne nea wosomaa no bae, Yesu Kristo, no ho nimdeɛ a wobenya.”​—Mateo 5:3; Yohane 17:3, NW.

Nanso Bible mu nimdeɛ nkutoo nnɔɔso na ama obi anya nkwa wɔ ehu bere yi mu. Yesu kae sɛ: “Nhyira ne wɔn a wɔte Onyankopɔn asɛm na wodi so!” Yiw, ɛho hia sɛ wokɔ so anaa wotra ase ma ɛne Onyankopɔn Asɛm hyia. Wɔ ɔkwan foforo so no, ɛsɛ sɛ yɛkɔ so yɛ Onyankopɔn apɛde. Bible no hyɛ bɔ sɛ: “Nea ɔyɛ ade a Onyankopɔn pɛ no tra hɔ daa.”​—Luka 11:28; 1 Yohane 2:17.

Nnipa a wɔkyekyɛ nsɛmma nhoma yi ani begye sɛ wɔbɛboa wo. Wɔn ani begye sɛ wɔbɛkyerɛ wo ɔkwan a wɔbɛfa so asua Bible no wɔ w’ankasa fie. Nimdeɛ a ɛma nkwa a wubenya no bɛma woanya daa nkwa wɔ Paradise wɔ asase so. (Dwom 37:29) Nokwarem no, biribi wɔ hɔ a wubetumi agyina so de ahotoso ahwɛ daakye kwan.

[Kratafa 29 mfoni]

Wo daakye ne dɛn​—Asase a ahyew? Anaa paradise?

[Kratafa 31 mfoni]

Yesu kyerɛkyerɛe sɛ ‘wɔn a wodwo no, benya asase no adi’