Bere A Ɛsɛ Sɛ Yɛma Yɛn Ani Da Hɔ No Ni!

“NNAADAA wo ho wɔ mfe a yɛte mu no ho; bere a ɛsɛ sɛ yenyan fi nna mu no adu dedaw.” (Romafo 13:11, Knox) Ɔsomafo Paulo kyerɛw saa asɛm no kɔmaa Kristofo a na wɔwɔ Roma no bɛyɛ mfe 14 ansa na ɔsɛe pasaa de Yudafo nneɛma nhyehyɛe no reba n’awiei wɔ 70 Y.B. mu. Esiane sɛ na wɔn ani da hɔ honhom mu nti, na Yudafo Kristofo no nni Yerusalem bere a nneɛma mu yɛɛ den no, ɛno nti woguanee owu anaa nkoayɛ. Nanso wɔyɛɛ dɛn hui sɛ ɛsɛ sɛ wofi kurow no mu koraa?

Ná Yesu Kristo abɔ kɔkɔ sɛ atamfo betwa Yerusalem ho ahyia na wɔadwɛre emufo. (Luka 19:43, 44) Ɛno akyi no, Yesu maa ne nokware akyidifo no sɛnkyerɛnne a ɛwɔ afã horow a na ɛnyɛ den sɛ wobehu. (Luka 21:7-24) Wɔ Kristofo a na wɔte Yerusalem no fam no, na guan a wobeguan afi kurow no mu no hwehwɛ sɛ wogyaw afie ne nnwuma. Nanso, wɔn anidahɔ ne guan a woguanee no koraa wɔn nkwa so.

Bere a Yesu kaa Yerusalem sɛe ho asɛm siei no, n’asuafo no bisae sɛ: “Kyerɛ yɛn da ko a eyinom bɛba, na ɛdɛn na ɛbɛyɛ wo ba [a woaba, NW] ne wiase awiei no ho sɛnkyerɛnne?” (Mateo 24:3) Wɔ ne mmuaema mu no, Yesu de ne daakye mmae no totoo nna a edii Noa bere so wiase nyinaa Nsuyiri anim no ho. Yesu daa no adi sɛ Nsuyiri no praa abɔnefo no nyinaa kɔe. (Mateo 24:21, 37-39) Ɔnam so kyerɛe sɛ Onyankopɔn de ne ho begye adesamma nsɛm mu bio. Ná ɛbɛkɔ akodu he? Nokwarem no, na ɛbɛkɔ akodu baabi a wobeyi wiase, anaa nneɛma nhyehyɛe bɔne mũ bi afi hɔ! (Fa toto 2 Petro 3:5, 6 ho.) So ɛno betumi asi wɔ yɛn bere yi so?

So Ade Nyinaa Te Nea Ɛte?

Afeha a edi kan no mu Yudafo no pii ansusuw da sɛ wɔbɛsɛe wɔn kurow kronkron no, Yerusalem, da bi. Akyinnyegye adwene a ɛte saa ara na nnipa a wɔte bɛn ogya bepɔw nanso wonhui sɛ ebi apae pɛn no taa nya. Sɛ wɔde kɔkɔbɔ ma a, nea nkurɔfo taa ka ne sɛ “ɛmma wɔ me bere so.” Ogya bepɔw ho nimdefo Lionel Wilson kyerɛkyerɛ mu sɛ: “Ogya mmepɔw taa pae mfeha abien anaa abiɛsa biara. Sɛ apam w’awofo pɛn a na ɛhaw wo. Nanso sɛ esii wɔ wo nananom bere so de a, ɛyɛ w’ani so sɛ anansesɛm.”

Nanso, amanneɛbɔ a ɛyɛ nokware betumi aboa yɛn ma yɛahu asiane ho nsɛnkyerɛnne na yɛabu no aniberesɛm. Na wɔn a woguan fii Bepɔw Pelée so no mu biako nim ogya bepɔw ho ade, na na ɔte asiane ho nsɛnkyerɛnne no ase. Wɔkyerɛkyerɛɛ nsɛnkyerɛnne a ɛte saa ara mu yiye bere tiaa bi ansa na Bepɔw Pinatubo repae. Ogya bepɔw ho nimdefo a ɔyɛɛ tumi a aniwa nhu a na afi ase rekeka ne ho wɔ bepɔw no mu ho nhwehwɛmu no maa nnipa a wɔte hɔnom no gye toom sɛ ɛsɛ sɛ wofi hɔ.

Ɛnyɛ dɛn ara a, ebinom bebu wɔn ani agu asiane ho nsɛnkyerɛnne so bere nyinaa na wɔagye kyim aka sɛ biribiara rensi. Ebia wobedi wɔn a wɔyɛ ho biribi ntɛm so no mpo ho fɛw. Ɔsomafo Petro hyɛɛ nkɔm sɛ adwene a ɛte saa bebu so wɔ yɛn nna yi mu. Ɔkae sɛ: “Munhu eyi kan sɛ, nna a ebedi akyiri no mu, fɛwdifo a wodi wɔn ankasa akɔnnɔ akyi de fɛwdi bɛba abɛka sɛ: Né ba ho bɔhyɛ no wɔ he? Na efii sɛ agyanom dedae yi, ade nyinaa te nea ɛte fi adebɔ mfiase.”—2 Petro 3:3, 4.

So wugye di sɛ yɛwɔ ‘nna a edi akyiri no’ mu? Wɔ The Columbia History of the World nhoma mu no, John A. Garraty ne Peter Gay bisa sɛ: “So yehu sɛnea yɛn anibue resɛe no?” Afei abakɔsɛm akyerɛwfo yi yɛ nhwehwɛmu wɔ nniso mu haw ahorow, nsɛmmɔnedi ne ɔman mma asoɔden a akɔ soro wɔ wiase nyinaa, abusua asetra a asɛe, di a nyansahu ne mfiridwuma mu nkɔso ntumi nnii ɔmanfo haw ahorow ho dwuma, tumidi ho nsɛnnennen ne abrabɔ ne nyamesom a ɔporɔw wom wɔ wiase nyinaa mu. Wɔde ba awiei sɛ: “Sɛ eyinom nyɛ awiei pɔtee bi ho sɛnkyerɛnne a, ɛsɛ bi dodo.”

Yɛwɔ ntease pa nti a ɛsɛ sɛ yegye di sɛ “awiei” bi abɛn. Dabi, enni sɛ yesuro sɛ asase yi ankasa bɛba awiei, efisɛ Bible no ka sɛ Onyankopɔn ‘de asase atim ne nnyinaso so, na ɛrenhim da biara da.’ (Dwom 104:5) Nanso, ɛsɛ sɛ yɛhwɛ kwan sɛ nneɛma nhyehyɛe bɔne a ama adesamma ahu amane pii no awiei bɛba ntɛm. Dɛn ntia? Efisɛ yetumi hu nneɛma pii a edi nna a edi akyiri a Yesu Kristo kaa ho asɛm no ho adanse. (Hwɛ adaka, “Nna a Edi Akyiri no Mu Nneɛma no Bi.”) Dɛn nti na womfa Yesu nsɛm no ntoto wiase nsɛm ho? Saa a wobɛyɛ no bɛboa wo ma woasi gyinae pa ama wo ne w’abusua. Nanso dɛn nti na ɛsɛ sɛ woyɛ ho biribi mprempren yi ara?

Ɛho Hia Ankasa Sɛ Yɛma Yɛn Ani Da Hɔ

Ɛwom sɛ ebia sɛ aka kakra ma ogya bepɔw bi apae a, nyansahufo behu de, nanso wɔrentumi nkyerɛ bere pɔtee a ebesi. Saa ara, na Yesu kae wɔ nneɛma nhyehyɛe yi awiei ho sɛ: “Da no ne dɔn ko no de, obiara nnim, ɔsoro abɔfo ne ɔba no mpo nnim, gye agya no nko.” (Mateo 24:36) Esiane sɛ yennim bere pɔtee a mprempren nneɛma nhyehyɛe yi bɛba awiei nti, Yesu bɔɔ yɛn kɔkɔ sɛ: “Munhu eyi sɛ, ofiwura nim ɔdasu ko a owifo bɛba a, anka ɔbɛwɛn, na wamma wɔammetu ne dan ase amma mu. Eyi nti munsiesie mo ho nsie, efisɛ dɔn a munsusuw no mu na onipa ba [Yesu] no reba.”—Mateo 24:43, 44.

Yesu nsɛm no kyerɛ sɛ ɔsɛe pasaa a ɛde nhyehyɛe yi bɛba awiei no bɛto wiase yi mpofirim. Sɛ yɛyɛ n’akyidifo mpo a, ehia sɛ ‘yesiesie yɛn ho sie.’ Yɛn tebea no te sɛ ofiwura bi a biribi betumi ato no mpofirim esiane sɛ onnim bere ko a owifo bɛba ne fie nti.

Saa ara nso na ɔsomafo Paulo ka kyerɛɛ Kristofo a na wɔwɔ Tesalonika no sɛ: “Mo ankasa munim yiye sɛ [Yehowa, NW] da no bɛba sɛ owifo ba anadwo. . . . Anuanom, munni esum mu, na ɛda no abɛto mo sɛ owifo.” Paulo hyɛɛ nkuran nso sɛ: “Mommma yɛnnna sɛ wɔn a aka no, na mmom momma yɛnwɛn, na yɛn ani nna hɔ.” (1 Tesalonikafo 5:2, 4, 6) Dɛn na “yɛnwɛn, na yɛn ani nna hɔ” no kyerɛ?

Nea ɛnte sɛ guan a afeha a edi kan mu Kristofo guan fii Yerusalem no, guan a yebeguan akɔhwehwɛ ahobammɔ no nhwehwɛ sɛ yebefi kurow pɔtee bi mu. Bere a Paulo tuu ne mfɛfo gyidifo a na wɔwɔ Roma no fo sɛ wonnyan mfi wɔn nna mu akyi no, ɔhyɛɛ wɔn nkuran sɛ ‘wonyi sum mu nnwuma ngu’ na ‘wɔnhyɛ Awurade Yesu Kristo.’ (Romafo 13:12, 14) Ɛdenam Yesu anammɔn akyi pɛɛ a yebedi so no, yɛbɛda yɛn ho adi sɛ yɛn ani wɔ nea ɛrekɔ so no so, na honhom fam anidahɔ yi bɛma yɛanya ɔsoro ahobammɔ bere a nneɛma nhyehyɛe bɔne yi ba n’awiei no.—1 Petro 2:21.

Wɔn a wodi Yesu Kristo akyi no nya asetra a anigye ne akomatɔyam wom. Yehowa Adansefo ɔpepem pii abehu sɛ Kristofo asuafoyɛ ho kɔndua no yɛ hare na ahomeka wom. (Mateo 11:29, 30, NW ase hɔ asɛm) Anammɔn a edi kan wɔ osuani a wobɛyɛ mu ne ‘Onyankopɔn ne nea ɔsomaa no, Yesu Kristo ho nimdeɛ a wubenya.’ (Yohane 17:3) Adansefo no srasra afie ɔpepem pii dapɛn biara na ama wɔatumi aboa nkurɔfo ma wɔanya “nokware nimdeɛ.” (1 Timoteo 2:4) Wɔn ani begye sɛ wɔne wo bɛyɛ Bible adesua a wuntua hwee wɔ wo fie. Na bere a Onyankopɔn Asɛm mu nimdeɛ a wowɔ no redɔɔso no, akyinnye biara nni ho sɛ wo nso wubegye atom sɛ yɛn nna yi yɛ soronko. Nokwarem no, bere a ɛsɛ sɛ yenyan fi nna mu no ni!

[Kratafa 7 adaka/mfonini]

NNA A EDI AKYIRI NO MU NNEƐMA NO BI

“Ɔman bɛsɔre ɔman so”; ‘wobeyi asomdwoe afi asase so.’ (Mateo 24:7; Adiyisɛm 6:4)

Wiase ko abien a akɔ so wɔ afeha yi mu ne akodi afoforo pii ayi asomdwoe afi asase so. Abakɔsɛm kyerɛwfo John Keegan kyerɛwee sɛ: “Wiase Ko a Edi Kan—ne nea Ɛto so Abien no—bɛyɛɛ soronko wɔ bere a atwam no akodi nyinaa ho. Ne kɛse, anoden, baabi a ekodui ne nneɛma ne nnipa dodow a wɔhweree no yɛ soronko. . . . Wiase Ako no kunkum nnipa, sɛee nneɛma, na ɛde amanehunu baa asase no fã kɛse so sen ɔko biara a na aba pɛn.” Mprempren akodi ka mmea ne mmofra sen asraafo. Amanaman Nkabom Mmofra Foto no bu akontaa sɛ, mmofra ɔpepem abien na wɔakunkum wɔn wɔ ako mu wɔ mfe du a atwam no mu.

“Ɔkɔm” (Mateo 24:7; Adiyisɛm 6:5, 6, 8)

Wɔ 1996 mu no awi ne aburow bo kɔɔ soro kɛse. Dɛn ntia? Ná saa aburow nnuan a wɔakora so wɔ wiase no so atew aba nea wobetumi akyekyɛ no nnafua 50 pɛ mu, a na esua sen biara wɔ abakɔsɛm kyerɛwtohɔ mu. Nnuan titiriw bo a ɛrekɔ soro no ma wiase no mu nnipa a wodi hia no ɔpepehaha pii—a wɔn mu dodow no ara yɛ mmofra—de kɔm da.

“Asasewosow bɛba mmeaemmeae” (Mateo 24:7)

Wɔ mfe 2,500 a abɛsen kɔ mu no, asasewosow akron pɛ na emu biara akunkum nnipa bɛboro 100,000. Asasewosow yi mu anan sisii wɔ 1914 akyi.

‘Amumɔyɛ bɛdɔɔso’ (Mateo 24:12)

Bere a afeha a ɛto so 20 yi rebɛn n’awiei no, amumɔyɛ, anaa mmarato abu so. Ɔmanfo a amumɔyɛfo to hyɛ wɔn so, awudifo a wokum nnipa atirimɔden so, ne okunkɛse ka nna a edi akyiri yi mu ahodwiriwde no ho.

‘Ɔyaredɔm bɛba mmeaemmeae’ (Luka 21:11)

Wɔ 1990 mfe yi mu no, nnipa bɛyɛ ɔpepem 30 na nsamanwaw bekunkum wɔn. Nya ara na mmoawa a wɔde yare ba renya ahoɔden a ɛmma nnuru a wɔde ko yare ntumi wɔn bio. Owuyare foforo, atiridiinini, bɔ nnipa ɔpepem 300 kosi 500 afe biara na wobu akontaa sɛ ekunkum nnipa ɔpepem 2. Wɔhwɛ kwan sɛ bere a yɛn mfe du yi mmra n’awiei no, na AIDS akunkum nnipa ɔpepem 1.8 afe biara. State of the World 1996 nhoma no ka sɛ: “Ɛnnɛ nnipa rehyia ɔyaredɔm mu yaredɔm.”

“Wɔbɛka ahenni no ho asɛmpa yi wiase nyinaa.” (Mateo 24:14)

Wɔ 1997 mu no, Yehowa Adansefo de nnɔnhwerew bɛboro ɔpepepem biako kaa Ahenni no ho asɛmpa no. Adansefo ɔpepem anum ne akyi de nkrasɛm yi kɔ nnipa a wɔte nsase 232 so nkyɛn daa.

[Nsɛm Fibea]

FAO photo/B. Imevbore

U.S. Coast Guard photo

[Mfonini wɔ kratafa 4, 5]

Kristofo guan fii Yerusalem efisɛ na wɔn ani da hɔ wɔ honhom mu