Afei nso kɔbere mfrafrae sika pa abien bi wɔ saa ɔdan yi mu a ɛho yɛ anigye kɛse. Wɔakyerɛw nea edi kan (nifa so) no so sɛ: “Sion ahofadi afe a ɛto so abien.” Nea ɛto so abien no so nsɛm ne: “Sion ogye afe a ɛto so anan.” Nhomanimfo kyerɛ sɛ wotwaa saa sika yi 67 Y.B. ne 69 Y.B. mu. Na “ahofadi” a wɔka ho asɛm no ne bere a Yudafo no kɔɔ so kuraa Yerusalem mu bere a Cestius Gallus san de ne Romafo asraafo dɔm a wɔrebetua wɔn no kɔe wɔ afe 66 Y.B. mu no akyi no.

Saa san a wɔsan kɔe no maa etumi yɛɛ yiye sɛ wobeguan afi Yerusalem. Nnipa a na wogye Yesu di no guanee, efisɛ na wahyɛ da aka sɛ: “Sɛ muhu sɛ dɔm atwa Yerusalem ho ahyia a, ɛnde munhu sɛ ne bɔ abɛn. Ɛnna momma wɔn a wɔwɔ Yudea nguan nkɔ mmepɔw so, na wɔn a wɔwɔ [Yerusalem] mfi mu nkɔ, na wɔn a wɔwɔ nkuraase no, mommma wɔnkɔ mu.” (Luka 21:20, 21) Ɛda adi sɛ na wɔn a wotwaa saa “nkonimdi” sika yi no nni ɔsɛe a na ɛda hɔ twɛn wɔn no ho adwene biara!

Courtesy of the Natural History Museum of Los Angeles County