‘Yɛn Ho Atɛn A Yebebu’ Wɔ Nkaedi Bere Mu

“Sɛ yebu yɛn ho atɛn a, anka wommu yɛn atɛn . . . na wɔammu yɛn . . . fɔ.”​—1 KORINTOFO 11:31, 32.

 1. Dɛn na nokware Kristofo bekwati ɔkwan biara so, na dɛn ntia?

ADE a etwa to a Kristoni hwehwɛ ne sɛ Yehowa bebu no atɛn a enye. “Asase nyinaa temmufo no” a wɔhyɛ no abufuw no betumi ama ‘wɔabu obi ne wiase no fɔ’ na wahwere daa nkwa. Eyi te saa sɛ ɛyɛ yɛn anidaso sɛ yɛne Yesu benya nkwa ɔsoro anaasɛ yɛbɛtra ase daa wɔ asase so paradise mu no.​—Genesis 18:25; 1 Korintofo 11:32.

 2, 3. Dɛn na wobetumi abu yɛn atɛn a enye wɔ ho, na dɛn na Paulo ka faa eyi ho?

² Wɔ 1 Korintofo ti 11 no, ɔsomafo Paulo kaa biribi a yebetumi anya ɛho atemmu ho asɛm. Ɛwom sɛ ɔkaa ne nsɛm no kyerɛɛ Kristofo a wɔasra wɔn de, nanso n’afotu no ho hia ma obiara, titiriw wɔ saa bere yi mu. Yɛn ankasa ho atɛn a yebebu no betumi aboa yɛn ma yeanya Onyankopɔn mpeneso na wɔammu yɛn atɛn. Paulo reka Awurade Anwummeduan a wodi no afe afe no ho asɛm no, ɔkyerɛwee sɛ:

³ “Awurade Yesu, anadwo a woyii no mae no, ɔfaa abodoo, na ɔdaa ase bubuu mu, na ɔkae sɛ: Me nipadua a wobubu ma mo ni; monyɛ eyi mfa nyɛ me nkae! Na saa ara nso na adidi no akyi no, ɔfaa kuruwa no kae sɛ: Kuruwa yi ne Apam foforo m’ankasa me mogya mu; da biara a mobɛnom no, monyɛ eyi mfa nyɛ me nkae! Na da biara a mobɛnom kuruwa yi ano no, monka Awurade wu no nkosi sɛ ɔbɛba.”​—1 Korintofo 11:23-26.a

 4. Dɛn na ɛbɛkɔ so April 10, 1990 anwummere?

⁴ Yehowa Adansefo bedi Kristo wu Nkae no April 10, 1990, bere a owia akɔtɔ. Mpɛn pii no kuw a worehyiam no bɛyɛ asafo biako; enti wobenya baabi ama wɔn a wonnya mmɛyɛɛ Yehowa Adansefo ɛ. Nhyiam no bɛyɛ te sɛ dɛn? Wɔbɛma Bible mu ɔkasa. Afei wɔbɛbɔ mpae na wɔde abodoo no afa obiara anim. Mpaebɔ foforo bedi kuruwa no a wɔde bɛfa obiara anim no kan. Sɛ́ anka eyi nyinaa bɛyɛ amanne bi a ɛno ara na wɔyɛ daa anaasɛ ɔkwan kyenkyenenn bi a wɔfa so mmom no, wɔyɛ abodoo anaasɛ nkuruwa dodow ne sɛnea wɔde fa nkurɔfo anim no ho nhyehyɛe ma ɛne ɛhɔ tebea hyia. Ade titiriw a ɛwom ne sɛ nneɛma no bɛso wɔn a wɔwɔ hɔ nyinaa so, ɛwom sɛ dodow no ara ma ɛfa wɔn anim ara kwa de. Nanso, nneɛma bɛn na wɔde fa anim no, na dɛn na ɛkyerɛ? Bio, dɛn na ɛsɛ sɛ yedi kan susuw ho sɛnea ɛbɛyɛ a yebebu yɛn ankasa ho atɛn?

‘Eyi ne Me Nipadua’

 5, 6. (a) Dɛn na Yesu de abodoo bi yɛe? (b) Abodoo bɛn na ɔde dii dwuma no?

⁵ Yɛakenkan Nkaedi no ho asɛm a Paulo ‘nya fii Awurade hɔ’ no. Nea Asɛmpa akyerɛwfo baasa a na wɔn mu biako wɔ hɔ bere a Yesu de afahyɛ no sii hɔ no kyerɛwee no nso wɔ hɔ. (1 Korintofo 11:23; Mateo 26:26-29; Marko 14:22-25; Luka 22:19, 20) Kyerɛwtohɔ ahorow yi se Yesu dii kan faa abodoo, ɔbɔɔ mpae, na afei obubuu mu na ɔkyekyɛe. Na saa abodoo no yɛ dɛn? Nea ɛne no hyia no, dɛn na wɔde yɛ saa abodoo no nnɛ? Ɛkyerɛ dɛn anaasɛ egyina hɔ ma dɛn?

⁶ Na nneɛma a ɛwɔ hɔ no yɛ nea wɔde yɛɛ Yudafo Twam adidi no bi, na na biako yɛ apiti (abodoo a mmɔkaw nnim) a Mose frɛɛ no “apiti, amanehunu abodoo” no. (Deuteronomium 16:3; Exodus 12:8) Na wɔde awi siam a mmɔkaw, nkyene anaa atomde biara nka ho na ɛyɛ. Esiane sɛ na mmɔkaw (Hebri, mats·tsahʹ) nnim nti, na ɛyɛ traatraa na ebu penpen; na ɛsɛ sɛ wobubu sɛnea wobetumi adi.​—Marko 6:41; 8:6; Asomafo no Nnwuma 27:35.

 7. Dɛn na Yehowa Adansefo de yɛ abodoo Nkaedi bere mu?

⁷ Yesu de apiti na edii dwuma Awurade Anwummeduan no mu, enti Yehowa Adansefo yɛ saa ara nnɛ. Wobetumi de Yudafo abodoo a wɔfrɛ no matzoth a wodi daa no ayɛ, sɛ wɔamfa atomde ahorow, te sɛ atei, gyeene, anaa nkesua, anto mu a. (Wɔrentumi mfrɛ matzoth a nneɛma a ɛte saa wom no “amanehunu abodoo” mma ɛnyɛ yiye.) Anaasɛ asafo mu mpanyimfo betumi ama obi de awi siam ne nsu a wɔayɛ no mmɔre ayɛ apiti no. Sɛ awi siam nni hɔ a, wobetumi de atoko, ɔmo, aburow, anaa nea ɛte saa biara siam ayɛ apiti no. Wɔbɔ mmɔre no ntraantraa na wɔto no kyɛnsee traa a wɔde ngo kakraa bi aka so so.

 8. Dɛn nti na apiti yɛ sɛnkyerɛnnede a ɛfata, na dɛn na di a wodi bi no kyerɛ? (Hebrifo 10:5-7; 1 Petro 4:1)

⁸ Abodoo a ɛte saa no fata efisɛ mmɔkaw (yeast) a Bible no de gyina hɔ ma ɔporɔw anaa bɔne no bi nnim. Paulo tuu fo wɔ obi a ne bra asɛe wɔ asafo no mu ho sɛ: ‘Mmɔkaw kakra na ɛkaw mmɔre nyinaa. Munnyi mmɔkaw dedaw no, na moayɛ mmɔre foforo. Wɔakum yɛn twam guan Kristo no. Momma yɛnhyɛ fa, ɛnyɛ bɔneyɛ ne amumɔyɛ mmɔkaw mu, na mmom kronkronyɛ ne nokware apiti mu.’ (1 Korintofo 5:6-8; fa toto Mateo 13:33; 16:6, 12 ho.) Apiti yɛ Yesu desani nipadua no ho sɛnkyerɛnne a ɛfata, efisɛ na “ne ho tew, onni bɔne, ne ho nni nkekae, wɔayi no afi nnebɔneyɛfo ho.” (Hebrifo 7:26) Na Yesu wɔ hɔ wɔ ne desani nipadua a ɛyɛ pɛ no mu bere a ɔka kyerɛɛ asomafo no sɛ: “Monnye [abodoo yi] na munni, ɛne me nipadua” no. (Mateo 26:26, A New Translation of the Bible a James Moffat yɛe) Abodoo no bi a obi bedi no kyerɛ sɛ ogye Yesu afɔre a ɔbɔ maa no no di na ogye emu mfaso horow no tom. Nanso, pii ka ho.

Bobesa a Ɛkyerɛ Biribi

 9. Sɛnkyerɛnnede foforo bɛn na Yesu se yɛmmfa nni dwuma?

⁹ Yesu de sɛnkyerɛnnede foforo dii dwuma: “Ɔfaa kuruwa nso, na ɔdaa Onyankopɔn ase wiei no, ɔde maa wɔn kae sɛ, ‘Monnom, mo nyinaa; eyi ne me mogya, apam foforo mogya a wɔahwie agu ama pii, na wɔde apopa wɔn bɔne no.” (Mateo 26:27, 28, Moffat) Dɛn na na ɛwɔ kuruwa a wɔn nyinaa nom ano no mu, na dɛn na ɛkyerɛ ma yɛn bere a yɛbɔ mmɔden sɛ yebebu yɛn ankasa ho atɛn no?

10. Ɛyɛɛ dɛn na bobesa ba bɛkaa Yudafo Twam no ho?

¹⁰ Bere a Mose kyerɛkyerɛɛ Twam adidi no mu mfiase no, wannka anonne biara ho asɛm. Nhomanimfo pii gye di sɛ akyiri yi koraa ansa na wɔde bobesa reka Twam no ho, ebia bɛyɛ afeha a ɛto so abien A.Y.B. mu.b Sɛnea ɛte biara no, na bobesa a wɔde di dwuma saa adidi yi ase no abu so afeha a edi kan no mu, na Yesu annkasa antia. Ɔde Twam bobesa no na edii dwuma bere a na ɔde Nkaedi no resi hɔ no.

11. Nsa bɛn na ɛfata sɛ wɔde di dwuma wɔ Awurade Anwummeduan no mu?

¹¹ Esiane sɛ na Yudafo Twam no ba wɔ bobe twabere no akyi bere tenteenten nti, na Yesu de bobesa kɔkɔɔ a ɛnyɛ den sɛ ebetumi agyina hɔ ama ne mogya na ebedi dwuma, na ɛnyɛ bobesa a ɛnkawee. (Fa toto Adiyisɛm 14:20 ho.) Na ɛho nhia sɛ wɔfra Yesu mogya mu, enti na bobesa a hwee nnim fata sen bobesa a wɔde mmorɔsa (te sɛ port, sherry, anaa muscatel) begu mu ama emu ayɛ den anaasɛ wɔde nnuhuam anaa fan begu mu sɛnea ɛte wɔ (vermouth, Dubonnet, anaasɛ aperitif ahorow pii) mu no. Nanso, ɛho nhia sɛ yɛyɛ te sɛ Farisifo a na wɔhaw wɔn ho wɔ ɔkwan a wɔfa so yɛ bobesa ho, sɛ ebia wɔde asikre kakra guu mu maa ne dɛ anaa anoden yɛɛ hɔ-ne-hɔ anaasɛ wɔde sufre kakra guu mu na ansɛe no.c Asafo ahorow pii de bobesa a wɔtɔn wɔ gua so (te sɛ Chianti, Burgundy, Beaujolais, anaa claret) anaasɛ bobesa a wɔyɛ wɔ fie ara na edi dwuma. Bobesa ne abodoo no yɛ nea wɔde gyina hɔ ma biribi, anaa nsɛnkyerɛnnede kɛkɛ; enti, wobetumi de nea ɛbɛka biara akɔ fie na akyiri yi wɔde adi dwuma sɛ aduan anaa anonne ara kwa.

12. Yesu kyerɛkyerɛɛ mu sɛ bobesa no gyina hɔ ma dɛn?

¹² Na nokwasɛm a ɛyɛ sɛ Yesu kaa ne mogya ho asɛm Twam anadwo no betumi ama wɔakae Misraim aguammaa mogya no. Nanso hyɛ sɛnea Yesu yɛe ntotoho a na ɛsonsonoe ankasa bere a ɔkaa eyi no nsow: “Kuruwa yi ne apam foforo me mogya mu, ɛno na mo nti wɔrehwie agu.” (Luka 22:20) Na Onyankopɔn adi kan ne honam fam Israel man no ayɛ apam, na wɔnam mmoa afɔre mogya so na ɛde sii hɔ. Na nsɛdi bi wɔ afɔrebɔ ahorow no mogya ne Yesu mogya no ntam. Na ne baanu nyinaa ho asɛm wɔ Onyankopɔn ne ne nkurɔfo man ntam apam a ɔde resi hɔ no mu. (Exodus 24:3-8; Hebrifo 9:17-20) Na Mmara apam no mu ade biako ne sɛ na honam fam Israel wɔ hokwan sɛ wɔbɛyɛ ahene ne asɔfo man. (Exodus 19:5, 6) Nanso, bere a Israel antumi anni Yehowa apam no so akyi no, ɔkae sɛ ɔde “apam foforo” besi “kan apam” no ananmu. (Hebrifo 9:1, 15; Yeremia 31:31-34) Na bobesa kuruwa a afei Yesu de rema asomafo anokwafo no gyina hɔ ma apam foforo yi.

13, 14. (a) Sɛ́ obi wɔ apam foforo no mu no kyerɛ dɛn? (b) Dɛn na di a obi di abodoo no na ɔnom bobesa no bi no yɛ ho sɛnkyerɛnne?

¹³ Kristofo a wɔde wɔn aba apam foforo yi mu no ba bɛyɛ ahene ne asɔfo honhom mu man. (Galatifo 6:16) Ɔsomafo Petro kyerɛwee sɛ: “Moyɛ abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de, sɛ monka nea ɔfrɛɛ mo fii esum mu baa ne hann a ɛyɛ nwonwa mu no mmaninyɛ nkyerɛ.” (1 Petro 2:9) Nkwagye a wonya no da adi fann​—ɔsoro asetra sɛ wɔn a wɔne Yesu bɛbom adi ahene. Adiyisɛm 20:6 si eyi so dua: “Nhyira ne kronkron ne nea onya afa ɔsɔre a edi kan no mu. . . . wɔbɛyɛ Onyankopɔn ne ne Kristo asɔfo, na wɔne no bedi ahene mfirihyia apem.”

¹⁴ Nokwarem no, bere a Yesu kyerɛɛ asomafo no sɛ wonni sɛnkyerɛnne kwan so abodoo na wɔnnom bobesa no bi no, ɔka kyerɛɛ wɔn sɛ ‘wobedidi na wɔanom ne pon so n’ahenni mu, na wɔatra nhengua so abu Israel mmusuakuw dumien no atɛn.’ (Luka 22:28-30) Ne saa nti, Nkaedi abodoo no a wodi bi na wɔnom bobesa no bi no kyerɛ pii sen gye a wogye Yesu afɔrebɔ no di ara kwa. Sɛ Kristoni biara benya daa nkwa akɔ baabiara a, ɛsɛ sɛ ogye agyede no tom na ɔkyerɛ gyidi. (Mateo 20:28; Yohane 6:51) Nanso abodoo no a obi di bi na ɔnom bobesa no bi no kyerɛ sɛ ɔwɔ apam foforo no mu, wɔapaw no sɛ ɔnkɔka Yesu ho wɔ n’Ahenni no mu.

Hia a Ɛho Hia sɛ Yebu Yɛn ho Atɛn Nkaedi Bere Mu

15. Ɔkwan bɛn so na Yesu de Onyankopɔn asomfo anidaso foforo bae?

¹⁵ Sɛnea asɛm a edi kan no kyerɛkyerɛɛ mu no, na Onyankopɔn asomfo anokwafo a wɔtraa ase ansa na Yesu bere no reba no nni anidaso biara sɛ wɔbɛkɔ ɔsoro. Wɔhwɛɛ kwan sɛ wobenya daa nkwa wɔ asase so, adesamma mfitiase fi no mu. Yesu Kristo ne obi a wodii kan nyan no sɛ honhom abɔde, na ɔbɛyɛɛ nea wodii kan faa no fii adesamma mu de no kɔɔ ɔsoro. (Efesofo 1:20-22; 1 Petro 3:18, 22) Paulo sii eyi so dua bere a ɔkyerɛwee sɛ: “Yɛwɔ Yesu mogya mu nnam a yɛde bɛkɔ kronkron mu, efisɛ watue emukɔ ama yɛn ayɛ ɔkwan foforo a ɛwɔ nkwa.” (Hebrifo 10:19, 20) Bere a Yesu abue saa ɔkwan no akyi no, henanom na wobedi akyi?

16. Daakye bɛn na ɛwɔ hɔ ma wɔn a wodi abodoo no na wɔnom bobesa no bi no?

¹⁶ Anadwo a Yesu de Awurade Anwummeduan no sii hɔ no, ɔka kyerɛɛ n’asomafo nokwaredifo no sɛ ɔrekosiesie baabi ama wɔn ɔsoro. (Yohane 14:2, 3) Nanso, kae sɛ Yesu kae nso sɛ wɔn a wodi abodoo no bi na wɔnom bobesa no bi no bɛkɔ n’Ahenni mu na wɔatra nhengua so abu atɛn. So na ɛbɛyɛ asomafo no nkutoo? Dabi, efisɛ akyiri yi ɔsomafo Yohane hui sɛ Kristofo afoforo nso bedi nkonim na ‘wɔne Yesu atra n’ahengua so,’ na wɔn nyinaa ayɛ ‘ahemman ne asɔfo na wɔadi asase so ahene.’ (Adiyisɛm 3:21; 5:10) Yohane huu Kristofo a “wɔatɔ wɔn afi asase so” no dodow nso​—144,000. (Adiyisɛm 14:1-3) Esiane sɛ eyi yɛ kuw a esua koraa, a sɛ wode toto wɔn a wɔasom Onyankopɔn mfe no nyinaa mu no ho a wɔyɛ “kuw ketewa” nti, ɛho hia sɛ yebu atɛn titiriw Nkaedi bere mu.​—Luka 12:32.

17, 18. (a) Su bɛn na Kristofo binom a na wɔwɔ Korinto fii ase daa no adi? (b) Dɛn nti na na adidi ne ɔnom ntraso no yɛ aniberesɛm saa? (Hebrifo 10:28-31)

¹⁷ Paulo kaa eyi ho asɛm wɔ ne krataa a ɔde kɔmaa Korintofo no mu bere a na asomafo no binom da so te ase ne bere a na Onyankopɔn refrɛ Kristofo sɛ “wɔmmɛyɛ ahotefo” no. Paulo kae sɛ nneyɛe bɔne bi aba ɛhɔfo a na ɛsɛ sɛ wodi abodoo no na wɔnom bobesa no bi no mu. Ebinom di kan didi na wodidi anaasɛ wɔnom nsa ma ɛtra so, ɛma wɔn ani kum, na wɔn ani ntumi nna hɔ. Nea efii mu bae ne sɛ “wɔammu nipadua no yiye,” Yesu honam nipadua a wɔde abodoo no gyinaa hɔ mae no. So na ɛno yɛ aniberesɛm saa? Yiw! Esiane sɛ wɔanni no sɛnea ɛfata nti, ‘wodii Awurade nipadua ne ne mogya ho fɔ.’ Sɛ na wɔn ani da hɔ adwene ne honhom mu a, anka ‘wobebu wɔn ho atɛn na wɔammu wɔn atɛn.’​—1 Korintofo 1:2; 11:20-22, 27-31.

¹⁸ Dɛn na na ɛsɛ sɛ saa Kristofo no bu ho atɛn no na ɔkwan bɛn so? Titiriw no, na ɛsɛ sɛ wofi koma ne adwene mu bu atɛn hu sɛ wɔafrɛ wɔn sɛ wɔmmɛka adedifo 144,000 a wonya ɔsoro asetra no ho ampa anaa. Ɔkwan bɛn so na wobuu eyi ho atɛn, na so ɛsɛ sɛ pii gye di nnɛ sɛ wɔka kuw ketewa a wɔapaw wɔn fi asomafo no bere so no ho anaa?

19. Tebea a ɛma nneɛma mu da hɔ bɛn na ɛdaa adi wɔ 1989 Nkaedi no ase?

¹⁹ Nokwarem no, nokware Kristofo kakraa bi pɛ na wohu nnɛ sɛ wɔka ho. Wɔ 1989 Awurade Anwummeduan afahyɛ no ase no, nnipa bɛboro 9,479,000 na wohyiaam wɔ Yehowa Adansefo asafo ahorow a ɛwɔ asase so nyinaa mu. Nea ennu 8,700 na wɔkyerɛe sɛ wɔwɔ anidaso sɛ ‘wobegye wɔn akɔ ɔsoro ahenni mu.’ (2 Timoteo 4:18) Dodow no ara​—yiw, Kristofo anokwafo a wɔahyira wɔn afoforo ɔpepem pii a wohyiaam no​—buu wɔn ho atɛn hui sɛ wɔn anidaso a ɛyɛ nokware ne sɛ wobɛtra ase daa wɔ asase so.

20. Wɔn a wɔka 144,000 no ho yɛ dɛn hu sɛ wɔafrɛ wɔn? (1 Yohane 2:27)

²⁰ Pentekoste 33 Y.B. mu no, Onyankopɔn fii ase paw 144,000 no maa ɔsoro asetra. Esiane sɛ na saa anidaso yi yɛ foforo a na Onyankopɔn asomfo a wɔtraa ase ansa na Yesu bere no reba no nni bi nti, ɔkwan bɛn so na wɔn a wɔpaw no behu anaasɛ wobenya mu awerɛhyem? Wɔnam ɛho adanse a Onyankopɔn honhom de ma so na ehu eyi. Eyi nkyerɛ sɛ wohu honhom no ankasa (ɛnyɛ onipa) anaasɛ wonya adwene mu nsusuwii bi a ɛkyerɛ sɛ honhom no ne wɔn rekasa, na saa ara nso na wɔnte ɛnne ahorow a efi ahonhom atrae. Paulo kyerɛkyerɛɛ mu sɛ: “Honhom no ara ne yɛn honhom di adanse sɛ yɛyɛ Onyankopɔn mma . . . Yɛyɛ adedifo nso, Onyankopɔn adedifo ne Kristo yɔnkodifo, nanso gye sɛ yɛne no hu amane ansa na wɔahyɛ yɛn ne no anuonyam bi.”​—Romafo 8:16, 17.

21. (a) Wɔn a wɔasra wɔn no yɛ dɛn hu sɛ wɔwɔ ɔsoro anidaso? (1 Korintofo 10:15-17) (b) Wɔn a wɔasra wɔn no yɛ nnipa bɛn, na ɔkwan bɛn so na wɔde anidahɔ di wɔn anidaso no ho adanse?

²¹ Saa adanse, anaa hu a wohu yi sakra wɔn nsusuwii ne wɔn anidaso. Wɔda so ara yɛ nnipa, na wonya Yehowa asase so abɔde mu nnepa no mu anigye, nanso faako a wɔn asetra ne nneɛma a ɛho asɛm hia wɔn no ani kyerɛ titiriw ne sɛ wɔbɛyɛ Kristo yɔnkodifo. Ɛnyɛ nkate mu adeyɛ bi na ama wɔhwɛ ade saa. Wɔte sɛ nnipa afoforo biara, na wɔkari pɛ wɔn nsusuwii ne wɔn abrabɔ mu. Nanso, esiane sɛ Onyankopɔn honhom no atew wɔn ho nti, wɔwɔ wɔn frɛ no mu gyidi, na wonnye ho akyinnye daa. Wohu sɛ sɛ wodi nokware a, wɔn nkwagye de wɔn bɛkɔ ɔsoro. (2 Tesalonikafo 2:13; 2 Timoteo 2:10-12) Bere a wɔte nea Yesu afɔrebɔ no kyerɛ ma wɔn no ase na wobu wɔn ho atɛn sɛ wɔyɛ Kristofo a wɔde honhom asra wɔn no, wɔde anidahɔ di Nkaedi abodoo no na wɔnom bobesa no bi.

22. Dɛn na wɔn a wɔbɛkɔ Awurade Anwummeduan no ase no mu dodow no ara behu wɔ wɔn ho?

²² Wɔn a wɔde osetie behyiam April 10 no mu dodow no ara nni saa anidaso yi, efisɛ Onyankopɔn mfaa ne honhom no nsraa wɔn na ɔmmfrɛɛ wɔn nkɔɔ ɔsoro asetra mu. Sɛnea yɛhyɛɛ no nsow no, Onyankopɔn fii ase paw 144,000 no asomafo no bere so. Nanso sɛ wowie saa ɔfrɛ no a, ɛsɛ sɛ wɔhwɛ kwan sɛ afoforo a wɔbɛba abɛsom no no benya anidaso a na Mose, Dawid, Yohane Osuboni, ne anokwafo afoforo a wowuwui ansa na Yesu rebue ɔkwan foforo a ɛkɔ ɔsoro asetra mu no wɔ no bi. Enti, Kristofo mmɔdenbɔfo a wodi nokware ɔpepem pii nni Nkaedi abodoo no bi na wɔnnom bobesa no bi nnɛ. Kristofo a wɔte saa no abu atɛn ahu sɛnea wɔte Onyankopɔn anim a ɛkyerɛ sɛ wonim wɔn anidaso a ɛyɛ nokware. Wɔnam wɔn bɔne a wɔde firi wɔn ne nkwa a enni awiei a wonya wɔ asase so no so nya Yesu mogya ne ne nipadua no so mfaso.​—1 Petro 1:19; 2:24; Adiyisɛm 7:9-15.

23. Dɛn nti na Nkaedi no bɛyɛ anigye afahyɛ? (Fa toto 2 Beresosɛm 30:21 ho.)

²³ Ɛnde, momma yɛnhwɛ anigye afahyɛ a ɛbɛba so April 10 no kwan. Ɛbɛyɛ bere a yɛde nhumu bedi dwuma nanso ɛbɛyɛ anigye bere nso. Ɛbɛyɛ anigye ama kakraa bi a wɔwɔ ɔsoro anidaso a wɔde osetie di abodoo no na wɔnom kuruwa no ano ma ɛfata no. (Adiyisɛm 19:7) Ɛbɛyɛ anigye ama Kristofo ɔpepem pii a wɔwɔ anigye a saa anadwo no wɔbɛhwɛ nea ɛbɛkɔ so na wɔasua biribi a wɔwɔ anidaso sɛ wɔbɛkae saa afahyɛ a ɛkyerɛ biribi no daa wɔ asase so no nso.​—Yohane 3:29.

[Ase hɔ nsɛm]

Wo Mmuae ne Dɛn?

◻ Dɛn nti na wɔde apiti fa nkurɔfo anim wɔ Nkaedi ase, na ɛyɛ dɛn ho sɛnkyerɛnne?

◻ Dɛn ne kuruwa a wɔde fa nkurɔfo anim wɔ Awurade Anwummeduan no ase no, na egyina hɔ ma dɛn?

◻ Dɛn nti na atɛn a wobebu ho hia wɔ Nkaedi afahyɛ no ho?

◻ Dɛn nti na worehwɛ Nkaedi a ɛreba no kwan?