Nhyira A Ɛkyɛn So A Apam Foforo No De Ba
“[Yesu ne] apam a ɛkyɛn so . . . ntamgyinafo.”—HEBRIFO 8:6.
1. Hena na ɛdaa adi sɛ ɔne ‘ɔbea no aseni’ a wɔhyɛɛ ne ho bɔ wɔ Eden no, na ɔkwan bɛn so na ‘wɔkaa ne nantin’?
ADAM ne Hawa yɛɛ bɔne akyi no, Yehowa buu Satan, nea ɔdaadaa Hawa, no atɛn sɛ: “Mede ɔtan mɛto wo ne ɔbea no ntam, ɛne w’asefo ne [n’aseni, NW] ntam. Ɔno [aseni no] na ɔbɛbɔ wo ti, na wo nso woaka ne nantin.” (Genesis 3:15) Bere a wɔbɔɔ Yesu asu wɔ Yordan Asubɔnten mu wɔ 29 Y.B. no, afei Aseni a wɔhyɛɛ ne ho bɔ wɔ Eden no puei. Bere a wokum no wɔ asennua so wɔ 33 Y.B. no, tete nkɔmhyɛ no fã bi nyaa mmamu. Ná Satan ‘aka Aseni no nantin.’
2. Sɛnea Yesu ankasa anom nsɛm kyerɛ no, ɔkwan bɛn so na ne wu no so ba adesamma mfaso?
2 Anigyesɛm ne sɛ, ɛwom sɛ saa kuru no de yawdi a ano yɛ den bae de, nanso anka hɔ. Wonyanee Yesu fii awufo mu sɛ honhom a owu nni ne so tumi ma ɔkɔɔ N’agya nkyɛn wɔ soro, faako a ɔde ne mogya a ohwie gui sɛ ‘agyede maa nnipa pii’ no bo a ɛsom no kɔkyerɛe. Enti, n’ankasa anom nsɛm nyaa mmamu sɛ: “Etwa sɛ wɔma onipa ba no so, na obiara a ogye no di no anya daa nkwa. Na sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” (Mateo 20:28; Yohane 3:14-16; Hebrifo 9:12-14) Apam foforo no di dwuma titiriw wɔ Yesu nkɔmhyɛ no mmamu mu.
Apam Foforo No
3. Bere bɛn na wohui sɛ apam foforo no afi ase reyɛ adwuma?
3 Bere tiaa bi ansa na Yesu rewu no, ɔka kyerɛɛ n’akyidifo no sɛ ne mogya a ohwie gui no yɛ “mogya a ɛyɛ apam [foforo] ade.” (Mateo 26:28; Luka 22:20) Ne sorokɔ akyi dadu no, wohui sɛ apam foforo no reyɛ adwuma bere a wohwiee honhom kronkron guu asuafo bɛyɛ 120 a na wɔahyiam wɔ abansoro dan bi mu wɔ Yerusalem so no. (Asomafo no Nnwuma 1:15; 2:1-4) Saa asuafo 120 yi a wɔde wɔn baa apam foforo no mu no kyerɛe sɛ afei de, na “kan” apam no, Mmara apam no, atwam.—Hebrifo 8:13.
4. So apam dedaw no dii nkogu? Kyerɛkyerɛ mu.
4 So apam dedaw no dii nkogu? Ɛnte saa koraa. Ɛwom, esiane sɛ afei de na wɔde foforo asi ananmu nti, na honam fam Israel nyɛ Onyankopɔn man titiriw bio. (Mateo 23:38) Nanso nea ɛma ɛbaa saa ne sɛ, Israel yɛɛ asoɔden na wɔpoo Nea Yehowa Asra no no. (Exodus 19:5; Asomafo no Nnwuma 2:22, 23) Nanso, ansa na wɔreyi Mmara no afi hɔ de foforo asi ananmu no, edii dwuma titiriw bi. Wɔ mfehaha pii mu no, ɛmaa wotumi bɛn Nyankopɔn, na ɛbɔɔ wɔn ho ban fii atoro som ho. Ɛyɛɛ apam foforo no ho mfonini, na afɔrebɔ pii a na ɛka ho no kyerɛɛ hia a onipa hia ogye fi bɔne ne owu mu denneennen no. Nokwarem no, na Mmara no yɛ ‘ɔyɛnfo a ɛkyerɛ kwan kɔ Kristo so.’ (Galatifo 3:19, 24; Romafo 3:20; 4:15; 5:12; Hebrifo 10:1, 2) Nanso, na ɛnam apam foforo no so na nhyira a wɔde hyɛɛ Abraham bɔ no benya mmamu korakora.
Wɔnam Abraham Aseni so Hyira Amanaman
5, 6. Wɔ Abraham apam no honhom fam mmamu titiriw mu no, hena ne Abraham Aseni no, na ɔman bɛn na wodii kan nam ne so nyaa mu nhyira?
5 Yehowa hyɛɛ Abraham bɔ sɛ: “[W’aseni, NW] mu na wobehyira asase so amanaman nyinaa.” (Genesis 22:18) Wɔ apam dedaw no mu no, ananafo pii a na wɔwɔ odwo su nyaa nhyira denam fekuw a wɔne Israel, Abraham aseni man no, bɔe so. Nanso wɔ ne honhom fam mmamu titiriw mu no, na Abraham Aseni no yɛ onipa biako a ɔyɛ pɛ. Paulo kyerɛkyerɛɛ eyi mu bere a ɔkae sɛ: “Abraham ne n’aseni na wɔhyehyɛɛ wɔn bɔ no. Ɔnka sɛ: Na w’asefo, sɛnea ɛyɛ nnipa bebree, na mmom [ose] obiako: na w’aseni, a ɔne Kristo.”—Galatifo 3:16.
6 Yiw, Yesu ne Abraham Aseni no, na Ne mu na amanaman no nya nhyira a ɛsen nea honam fam Israel betumi anya biara. Nokwarem no, ɔman a wodii kan nyaa nhyira yi ne Israel ankasa. Wɔ Pentekoste 33 Y.B. akyi pɛɛ no, ɔsomafo Petro ka kyerɛɛ Yudafo kuw bi sɛ: “Mone adiyifo no ne apam a Onyankopɔn ne mo agyanom pamee no mma, sɛ ɔka kyerɛɛ Abraham sɛ: Na [w’aseni, NW] mu na wobehyira asase so mmusua nyinaa. Mo na Onyankopɔn nyan n’abofra no, ɔsomaa no mo nkyɛn kan sɛ ɔmfa ɔdan a ɔbɛdan mo nyinaa afi mo bɔne mu no nhyira mo.”—Asomafo no Nnwuma 3:25, 26.
7. Aman bɛn na wɔnam Yesu, Abraham Aseni, no so hyiraa wɔn?
7 Ankyɛ na wɔtrɛw nhyira no mu kɔɔ Samariafo, ne afei Amanaman mufo so. (Asomafo no Nnwuma 8:14-17; 10:34-48) Wɔ afe 50 kosi 52 Y.B. ntam hɔ baabi no, Paulo kyerɛw kɔmaa Kristofo a wɔwɔ Galatia wɔ Asia Kumaa sɛ: “Kyerɛw no hu siei sɛ Onyankopɔn fi gyidi mu na obebu amanaman bem nti, ɛkaa asɛmpa no kyerɛɛ Abraham sɛ: Wo mu na wobehyira amanaman nyinaa. Ɛnde na wɔn a wofi gyidi mu no, wohyira wɔne gyidini Abraham bom.” (Galatifo 3:8, 9; Genesis 12:3) Ɛwom sɛ na Kristofo a wɔwɔ Galatia no pii yɛ ‘amanaman mufo’ de, nanso wɔn gyidi nti, wɔnam Yesu so hyiraa wɔn. Ɔkwan bɛn so?
8. Wɔ Paulo bere so Kristofo no fam no, na dɛn na ɛka nhyira a wɔnam Abraham Aseni no so benya no ho, na awiei koraa no, nnipa baahe na wonya nhyira a ɛte saa?
8 Paulo ka kyerɛɛ Galatifo Kristofo no, a baabi a wofi mfa ho, sɛ: “Sɛ moyɛ Kristo dea a, ɛnde na moyɛ Abraham asefo, na monam bɔhyɛ no so yɛ adedifo.” (Galatifo 3:29) Wɔ saa Galatifo no fam no, nhyira a wɔnam Abraham Aseni no so nya no bi ne sɛ wɔbɛyɛ apam foforo no mufo na afei wɔayɛ Yesu yɔnkodifo, Yesu mfɛfo Abraham asefo. Yennim tete Israelfo dodow. Nea yenim ara ne sɛ wɔbɛyɛɛ “sɛ mpoano nhwea dodow.” (1 Ahene 4:20) Nanso, yenim sɛnea Yesu mfɛfo a ɔne wɔn yɛ honhom fam asefo no dodow bɛkɔ akowie—144,000. (Adiyisɛm 7:4; 14:1) Saa 144,000 no fi adesamma “mmusua ne ɔkasa ne nkurɔfo ne aman nyinaa mu,” na wɔka ho bi na wɔde Abraham apam no mu nhyira horow ma afoforo.—Adiyisɛm 5:9.
Nkɔmhyɛ Bi Nya Mmamu
9. Ɔkwan bɛn so na Yehowa mmara hyɛ wɔn a wɔwɔ apam foforo no mu no yam?
9 Bere a Yeremia reka apam foforo no ho asɛm no, ɔkyerɛwee sɛ: “Eyi ne apam a nna no akyi me ne Israel fi bɛpam no, [Yehowa, NW] asɛm ni, mede me mmara mɛhyɛ wɔn yam, na makyerɛw wɔn koma mu.” (Yeremia 31:33) Su a ɛda adi wɔ wɔn a wɔwɔ apam foforo no mu ho ne sɛ wofi ɔdɔ mu na ɛsom Yehowa. (Yohane 13:35; Hebrifo 1:9) Wɔakyerɛw Yehowa mmara wɔ wɔn koma so, na wɔwɔ ɔpɛ a emu yɛ den sɛ wɔbɛyɛ n’apɛde. Ampa, wɔ tete Israel no, na ankorankoro anokwafo bi dɔ Yehowa mmara paa. (Dwom 119:97) Nanso na wɔn mu pii nte saa. Ne nyinaa akyi no, wɔkɔɔ so yɛɛ ɔman no mufo. Obiara ntumi nkɔ so ntra apam foforo no mu, gye sɛ wɔakyerɛw Onyankopɔn mmara wɔ ne koma mu.
10, 11. Wɔ wɔn a wɔwɔ apam foforo no mu fam no, ɔkwan bɛn so na Yehowa bɛyɛ ‘wɔn Nyankopɔn,’ na ɔkwan bɛn so na wɔn nyinaa behu no?
10 Yehowa toaa so kaa wɔn a wɔwɔ apam foforo no mu ho asɛm sɛ: “Mayɛ wɔn [Nyankopɔn], na wɔn nso ayɛ me [man].” (Yeremia 31:33) Wɔ tete Israel no, nnipa pii som amanaman no anyame, nanso wɔkɔɔ so yɛɛ Israelfo. Yehowa nam apam foforo no so hyehyɛɛ honhom fam ɔman, “Nyankopɔn Israel,” de sii honam fam Israel ananmu. (Galatifo 6:16; Mateo 21:43; Romafo 9:6-8) Nanso, obiara ntumi nkɔ so ntra honhom fam ɔman foforo no mu bere a ɔnsom Yehowa nkutoo.
11 Yehowa kae bio sɛ: “Wɔn nyinaa behu me afi wɔn mu akumaa so akosi wɔn mu ɔkɛse so.” (Yeremia 31:34) Wɔ Israel no, nnipa pii amfa Yehowa asɛm anyɛ hwee, na wɔde wɔn nneyɛe kae sɛ: “[Yehowa, NW] renyɛ papa na ɔrenyɛ bɔne.” (Sefania 1:12) Obiara ntumi mmu n’ani ngu Yehowa so anaa ongu ɔsom kronn ho fĩ na ɔnkɔ so nyɛ Nyankopɔn Israel no fã. (Mateo 6:24; Kolosefo 3:5) “Wɔn a wonim wɔn Nyankopɔn no” ne honhom fam Israelfo no. (Daniel 11:32) Wɔn ani gye sɛ ‘wobesua nokware Nyankopɔn koro no ne Yesu Kristo ho ade.’ (Yohane 17:3) Hu a wohu Yesu no ma Onyankopɔn ho nimdeɛ a wɔwɔ no yɛ kɛse, efisɛ wɔ ɔkwan a ɛda nsow so no, Yesu “na wayi [Nyankopɔn] adi akyerɛ.”—Yohane 1:18; 14:9-11.
12, 13. (a) Dɛn na Yehowa gyina so de wɔn a wɔwɔ apam foforo no mu no bɔne firi wɔn? (b) Ɛdefa bɔne fafiri ho no, ɔkwan bɛn so na apam foforo no kyɛn apam dedaw no?
12 Awiei koraa no, Yehowa hyɛɛ bɔ sɛ: “Mede wɔn amumɔyɛ mefiri, na wɔn bɔne nso, merenkae bio.” (Yeremia 31:34b) Ná ahyɛde ɔhaha pii a wɔhwehwɛ sɛ Israelfo di so, ka Mose Mmara no ho. (Deuteronomium 28:1, 2, 15) Wɔn a wɔtoo Mmara no nyinaa bɔɔ afɔre de pataa wɔn bɔne. (Leviticus 4:1-7; 16:1-31) Yudafo bebree benyaa adwene no sɛ Mmara no mu nnwuma a wɔn ankasa bɛbɔ mu mmɔden no betumi ama wɔayɛ atreneefo. Nanso, Kristofo hu sɛ wɔrentumi mfa wɔn ankasa nnwuma so nnya trenee gyinabea da. Wɔrentumi nkwati bɔne. (Romafo 5:12) Wɔ apam foforo no mu no, wɔnam Yesu afɔrebɔ no nkutoo so na enya trenee gyinabea wɔ Onyankopɔn anim. Nanso, saa gyinabea no yɛ akyɛde, ɔdom a efi Nyankopɔn hɔ. (Romafo 3:20, 23, 24) Nanso Yehowa hwehwɛ sɛ n’asomfo yɛ osetie. Paulo ka sɛ wɔn a wɔwɔ apam foforo no mu no wɔ “Kristo mmara mu.”—1 Korintofo 9:21.
13 Enti, bɔne ho afɔrebɔ wɔ hɔ ma Kristofo nso, nanso ɛsom bo sen Mmara apam no mu afɔrebɔ ahorow no koraa. Paulo kyerɛwee sɛ: “Ɔsɔfo biara sɔfo [a ɔwɔ Mmara apam no ase] gyina hɔ daa resom, na ɔtaa bɔ afɔre koro no ara a entumi nyi bɔne da. Na [Yesu] de, onya bɔɔ bɔne ho afɔre biako no, ɔkɔtraa Onyankopɔn nifa ma ɛkɔ so ara.” (Hebrifo 10:11, 12) Esiane sɛ Kristofo a wɔwɔ apam foforo no mu no kyerɛ Yesu afɔrebɔ no mu gyidi nti, Yehowa bu wɔn sɛ atreneefo a wonni bɔne, ma enti wasra wɔn sɛ ne honhom fam mma. (Romafo 5:1; 8:33, 34; Hebrifo 10:14-18) Sɛ nnipa sintɔ nti wɔyɛ bɔne a, wotumi srɛ Yehowa fafiri, na Yehowa gyina Yesu afɔrebɔ no so de firi wɔn. (1 Yohane 2:1, 2) Nanso, sɛ wɔboapa yɛ bɔne a, wɔhwere wɔn trenee gyinabea no ne hokwan a wɔwɔ sɛ apam foforo no mufo no.—Hebrifo 2:2, 3; 6:4-8; 10:26-31.
Apam Dedaw no ne Foforo No
14. Twetiatwa bɛn na na wɔhwehwɛ wɔ Mmara apam no mu? wɔ apam foforo no mu?
14 Wotwaa mmarima a na wɔwɔ apam dedaw no mu twetia de yɛɛ sɛnkyerɛnne kyerɛe sɛ wɔhyɛ Mmara no ase. (Leviticus 12:2, 3; Galatifo 5:3) Bere a wofii Kristofo asafo no ase no, ebinom tee nka sɛ ɛsɛ sɛ wotwa Kristofo a wɔnyɛ Yudafo no nso twetia. Nanso asomafo no ne mpanyimfo a na wɔwɔ Yerusalem no nam Onyankopɔn Asɛm ne honhom kronkron akwankyerɛ so hui sɛ eyi ho nhia. (Asomafo no Nnwuma 15:1, 5, 28, 29) Mfe kakraa bi akyi no, Paulo kae sɛ: “Ɛnyɛ nea ɔda adi saa na ɔyɛ Yudani, nso ɛnyɛ nea ɛda adi saa ɔhonam mu na ɛyɛ twetiatwa, na mmom Yudani ne nea ɔyɛ no ne mu, na twetiatwa ne nea wɔayɛ no komam, wɔ honhom mu, na ɛnyɛ nea wɔakyerɛw mu.” (Romafo 2:28, 29) Ná twetia ankasa a honam fam Yudafo mpo betwa no nka hwee wɔ honhom fam wɔ Yehowa ani so. Wɔ wɔn a wɔwɔ apam foforo no mu fam no, koma no na ɛsɛ sɛ wotwa no twetia, na ɛnyɛ ɔhonam. Ɛsɛ sɛ wotwa biribiara a ɛnsɔ Yehowa ani anaa ɛho ntew wɔ n’ani so fi wɔn nsusuwii, wɔn nkate, ne wɔn botae mu.a Nnipa a wɔte ase nnɛ no pii asetra kyerɛ tumi a honhom kronkron wɔ sɛ ɛsakra nnipa nsusuwii wɔ saa kwan yi so.—1 Korintofo 6:9-11; Galatifo 5:22-24; Efesofo 4:22-24.
15. Sɛ wɔde honam fam Israel adehyedi toto Nyankopɔn Israel de ho a, ɛte dɛn?
15 Wɔ Mmara apam no nhyehyɛe mu no, na Yehowa ne Ɔhene wɔ Israel, na bere kɔɔ so no, ɔnam nnipa ahene so na edii tumi wɔ Yerusalem. (Yesaia 33:22) Nyankopɔn Israel, honhom fam Israel, no nso Hene ne Yehowa, na efi 33 Y.B. mu no, ɔnam Yesu Kristo a wɔde “ɔsoro ne asase so tumi nyinaa” maa no no so adi tumi. (Mateo 28:18; Efesofo 1:19-23; Kolosefo 1:13, 14) Ɛnnɛ, Nyankopɔn Israel no bu Yesu sɛ Ɔhene a ɔredi Onyankopɔn soro Ahenni a wɔde sii hɔ 1914 no so. Yesu yɛ Ɔhempa sen Hesekia, Yosia, ne tete Israel ahene anokwafo foforo no mpo.—Hebrifo 1:8, 9; Adiyisɛm 11:15.
16. Nyankopɔn Israel no asɔfodi te dɛn?
16 Ná Israel nyɛ ahemman kɛkɛ na mmom na ɛwɔ asɔfokuw a wɔasra wɔn nso. Wɔ 33 Y.B. mu no, Nyankopɔn Israel besii honam fam Israel ananmu, na wɔbɛyɛɛ Yehowa ‘akoa,’ ‘n’adansefo.’ (Yesaia 43:10) Efi saa bere no, nsɛm a Yehowa ka kyerɛɛ Israel a wɔakyerɛw wɔ Yesaia 43:21 ne Exodus 19:5, 6 no, nyaa mmamu wɔ Nyankopɔn honhom fam Israel so. Afei de na Onyankopɔn honhom fam man foforo no abɛyɛ “abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de,” a wɔwɔ asɛyɛde sɛ ‘wɔbɛka Yehowa mmaninyɛ akyerɛ.’ (1 Petro 2:9) Nyankopɔn Israel nyinaa, mmarima ne mmea, bom yɛ asɔfokuw. (Galatifo 3:28, 29) Sɛ́ Abraham aseni no mmataho no, seesei wɔka sɛ: “Amanaman, mo ne ne man mmɔ anigyese.” (Deuteronomium 32:43) Honhom fam Israelfo a wɔda so ara wɔ asase so no na wɔka bom yɛ “akoa nokwafo ne ɔbadwemma” no. (Mateo 24:45-47) Gye sɛ obi de ne ho abɔ wɔn ansa na watumi de ɔsom kronn a ɛsɔ ani ama Onyankopɔn.
Onyankopɔn Ahenni—Ne Mmamu a Etwa To
17. Awo bɛn na wɔn a wɔwɔ apam foforo no mu no nya?
17 Wɔwoo Israelfo a wɔbaa wiase wɔ 1513 A.Y.B. akyi no too Mmara apam no mu. Wɔn a Yehowa de wɔn ba apam foforo no mu nso, wɔwo wɔn—wɔn de no yɛ honhom fam awo. Yesu bɔɔ eyi so kyerɛɛ Farisini Nikodemo bere a ɔkaa eyi no: “Nokware, nokware, mise wo sɛ: Wɔanwo obi foforo a, ɔrentumi nhu Nyankopɔn ahenni no.” (Yohane 3:3) Asuafo 120 a na wɔahyiam wɔ Pentekoste 33 Y.B. no ne nnipa a wɔnyɛ pɛ a wodi kan a wonyaa saa awo foforo yi. Esiane sɛ wobuu wɔn atreneefo wɔ apam foforo no mu nti, wonyaa honhom kronkron sɛ wɔn adehyedi apɛgyadenya no ho “guaha.” (Efesofo 1:14) ‘Wofi honhom mu’ woo wɔn sɛ wɔmmɛyɛ nnipa a Onyankopɔn de wɔn ayɛ mma, na ɛma wɔbɛyɛɛ Yesu nuanom ne “Kristo yɔnkodifo” nso. (Yohane 3:6; Romafo 8:16, 17) Wo a ‘wɔwoo wɔn foforo’ no buee hokwan ma wonyaa anidaso nwonwaso.
18. Hokwan nwonwaso bɛn na ebue ma apam foforo no mufo a wɔwo wɔn foforo no?
18 Bere a Yesu reyɛ ntamgyinafo ama apam foforo no, ɔne n’akyidifo yɛɛ apam foforo bio, na ɔkae sɛ: “Me ne mo reyɛ apam, sɛnea M’agya nso ne me ayɛ apam sɛ ɔbɛma me ahenni no.” (Luka 22:29, NW) Saa Ahenni apam yi bɔ kwan ma anisoadehu nwonwaso bi a wɔayɛ ho kyerɛwtohɔ wɔ Daniel 7:13, 14, 22, 27 no nya mmamu. Daniel hui sɛ “nea ne nna akyɛ,” Yehowa Nyankopɔn, rema “obi a ɔte sɛ onipa ba” no ahenni tumi. Afei Daniel hui sɛ ‘ahotefo no aso ahenni no mu.’ Yesu ne nea “ɔte sɛ onipa ba” no, a Yehowa Nyankopɔn de ɔsoro Ahenni no maa no 1914 no. “Ahotefo” a wɔne no nya Ahenni no mu kyɛfa no ne n’asuafo a wɔde honhom asra wɔn no. (1 Tesalonikafo 2:12) Ɔkwan bɛn so?
19, 20. (a) Yehowa bɔ a ɔhyɛɛ Abraham no mmamu a etwa to a anuonyam wom bɛn na wɔn a wɔwɔ apam foforo no mu benya? (b) Asɛmmisa foforo bɛn na ehia sɛ yesusuw ho?
19 Wɔn a wɔasra wɔn yi wu akyi no, wonyan wɔn fi awufo mu te sɛ Yesu, ma wɔbɛyɛ honhom abɔde a owu nni wɔn so tumi ma wɔne no kɔsom sɛ ahene ne asɔfo wɔ soro. (1 Korintofo 15:50-53; Adiyisɛm 20:4, 6) Anidaso a anuonyam wom bɛn ara ni! “Wobedi asase so ahene,” ɛnyɛ Kanaan asase no nkutoo. (Adiyisɛm 5:10) So ‘wɔbɛfa wɔn atamfo nkurow ano apon adi so’? (Genesis 22:17) Yiw, na wɔbɛyɛ saa wɔ ɔkwan a edi mũ so, bere a wohu wɔn tamfo, nyamesom mu aguaman, Babilon Kɛse no sɛe, ne bere a wɔn a wɔasra wɔn yi a wobenyan wɔn no ne Yesu bom de “dade poma” yɛn amanaman no na wɔbɔ Satan ti no. Enti wobenya nkɔmhyɛ a ɛwɔ Genesis 3:15 no mmamu a etwa to mu kyɛfa.—Adiyisɛm 2:26, 27; 17:14; 18:20, 21; Romafo 16:20.
20 Nanso, ebia yebebisa sɛ, So akra anokwafo 144,000 yi nkutoo na Abraham apam ne apam foforo no fa wɔn ho? Dabi, afoforo a wonni saa apam ahorow yi mu pi nso nam wɔn so benya nhyira, sɛnea yebehu wɔ asɛm a edi hɔ no mu no.
[Ase hɔ asɛm]
a Hwɛ Insight on the Scriptures, a Watchtower Bible and Tract Society of New York, Inc., tintimii no, Po 1, kratafa 470.
So Wokae?
◻ Bere bɛn na wohui sɛ apam foforo no afi ase reyɛ adwuma?
◻ Dɛn na wɔde apam dedaw no dii ho dwuma?
◻ Hena titiriw ne Abraham Aseni no, na nhyira a wɔnam saa Aseni no so de brɛɛ amanaman no kɔɔ so dɛn?
◻ Wɔ 144,000 no fam no, dɛn ne Abraham apam ne apam foforo no mmamu a etwa to?
[Kratafa 15 mfonini]
Wɔn a wɔwɔ apam foforo no mu no wɔ bɔne fafiri a ɛkɔ akyiri sen wɔn a na wɔwɔ apam dedaw no mu de koraa