Bible No Adwene

Ahobammɔ​—Kristoni Betumi Ayɛ Saa Akodu He?

“Dɛn nti na wode osuro tra ase? Sua akwan pa a wobɛfa so abɔ wo ho ban na woagye wo ho afi ntuafo nsam. Wɔkyerɛkyerɛ akwan a ɛyɛ mmerɛw na etu mpɔn a wobɛfa so abɔ wo ho ban no mu kɔ akyiri. Video a wɔde kyerɛkyerɛ yi na ɛbɛkyerɛ sɛ wobebu wo ho akontaa sɛ woawu anaasɛ woanya nkwa.”​—Obi ankasa ho ban a ɔbɛbɔ video ho dawurubɔ.

ƐHO nhia sɛ obi kyerɛkyerɛ sɛnea wɔbɛtɔ video a ɛte saa pii nnɛ no mu. Wɔ Philadelphia, Pennsylvania, U.S.A. no, mmofra akuw horow ka “Ɔhwe, ɔhwe, ɔhwe” de kyinkyin abɔnten hwehwɛ nkurɔfo a wobetwa wɔn dwow. Time nsɛmma nhoma bɔ amanneɛ sɛ, ‘nsɛmmɔnedi ho hu anya Rio de Janeiro kurow mũ no nyinaa so nkɛntɛnso.’ Wɔ Hong Kong no, akode a wɔde wia ade ne atuo tow rekɔ so wɔ mmeae a na anka​—de besi mprempren no​—ɛnte saa.

Wɔte amanneɛbɔ ahorow a ɛte saa ara wɔ wiase nyinaa. Dɛn na afi mu aba? Newsweek ka sɛ “nkurɔfo dwen asiane a ɛwɔ otuo a wɔbɛtow bi mu no ho.” Kristofo nnee wɔn ho mfii “mmere a emu yɛ den” yi mu nanso so otuo a wɔbɛtotow bi no bɛkyerɛ ankasa sɛ “wobebu wɔn ho akontaa sɛ wɔawuwu anaasɛ wɔanya nkwa”?​—2 Timoteo 3:1.

Basabasayɛ Behyia Basabasayɛ?

Ebinom gye di sɛ ‘sɛ mikura otuo a, minsuro. Mɛtow no ansa na watow me. Anyɛ yiye koraa no, mɛpam no!’ Nanso ɛnyɛ mmerɛw saa.

George Napper a ɔyɛ ɔmanfo ahobammɔ panyin wɔ Atlanta, Georgia, U.S.A., no ka sɛ: “Otuo a wowɔ bi no kyerɛ sɛ woasiesie wo ho sɛ wode nea ebefi ɔdesani foforo a wubekum no mu aba no bɛtra ase.” So Kristoni asiesie ne ho sɛ ɔbɛtra ade a ɛte saa a ebefi mu aba a nea ebetumi aka ho ne mogya ho afɔdi no mu?​—Fa toto Numeri 35:11, 12 ho.

Onyankopɔn Asɛm de ahyɛde ma nso sɛ, ‘Momfa mo mfoa mmobɔ nsɔw’ na, ‘Monhwehwɛ asomdwoe na munni akyi.’ (Mika 4:3; 1 Petro 3:11) Ɛbɛyɛ dɛn na Kristofo ahwehwɛ ahobammɔ wɔ atuo mu na bere koro no ara mu no wɔatra ase ma ɛne Bible mu, ahwehwɛde ahorow ahyia? Sɛnea ɛte biara no, akyinnye biara nni ho sɛ ntuafo no ho bɛyɛ hare wɔ otuotow mu asen nea watua no no.

Yesu powee sɛ wɔde akode bɛbɔ ne ho ban. Ɛyɛ ampa sɛ ɔhyɛɛ asomafo no sɛ wɔmfa nkrante abien nkɔ Getsemane turo a na wɔbɛkyere no wom no mu. Nanso dɛn nti na ɔyɛɛ eyi? Akode a wokurae nanso wɔamfa anni dwuma no daa no adi yiye sɛ, Yesu akyidifo remfa honam fam akode ahorow nni dwuma. Ɛsɛ sɛ wɔhyɛ no nsow sɛ esiane sɛ na Petro wɔ akode no nti, ofi abufuw mu de dii dwuma. Yesu kaa n’anim denneennen wɔ n’ahopere adeyɛ no ho sɛ: “Wɔn a wɔtwe nkrante nyinaa, nkrante ano na wobewu.”​—Mateo 26:36, 47-56; Luka 22:36-38, 49-51.

Ebia obi bɛka sɛ ‘eyi fa otuo a obi wɔ nkutoo ho.’ ‘Na sɛ obi sua judo, karate, ne kendo de bɔ ne ho ban nso ɛ?’ Bisa wo ho, so ɛnyɛ ɔko anaasɛ afoforo a wubepira wɔn nti na wɔkyerɛ wo eyi? Na so ntetee a ɛte saa no ne sɛ obi bekura akode a edi awu no nyɛ ade koro? (1 Timoteo 3:3) Opira ne owu afi ne sua mu mpo aba.

Romafo 12:17-19 de afotu a nyansa wom ma wɔ eyi ho: “Mommfa bɔne nntua obiara bɔne so ka. . . . Sɛ ebetumi a, mo fam de, mo ne nnipa nyinaa ntra asomdwoe mu. Adɔfo, munnidi mo ho were, na mmom munnyaw mma [Onyankopɔn] abufuw! Na wɔakyerɛw sɛ: Me na aweredi wɔ me, me ara metua ka [Yehowa] na ɔka saa.” Hela asɛmfua a wɔkyerɛ ase sɛ “bɔne” (ka-kos’) no betumi akyerɛ nso sɛ “nea ɛsɛe ade, nea epira.” Enti, ɛsɛ sɛ Kristofo yi pira a wobepira anaasɛ wɔbɛyɛ onipa foforo bɔne ahyɛ ananmu no ho nsusuwii biara fi wɔn adwenem.

Sɛ anka Kristoni befi nkate mu ada n’ankasa abufuw adi no, ɔwɔ Onyankopɔn a ɔka nea edi so yi kyerɛ ne nkurɔfo no mu gyidi koraa: “Nea ɔka mo no, waka [m’aniwa] kesuwa.” Nea ɛne eyi hyia no, Onyankopɔn hyɛ bɔ sɛ ‘ɔbɛsɛe abɔnefo’ wɔ bere a ɛfata mu.​—Sakaria 2:8; Dwom 145:20.

Bere a Ɛsɛ Sɛ Wɔko?

Ebinom ka no akokoduru so sɛ, ‘Mɛko ansa na me sika no afi me nsa!’ Dick Mellard a ɔyɛ ɔkyerɛkyerɛ so panyin wɔ National Crime Prevention Institute no bɔ kɔkɔ sɛ: “Ɛyɛ onipa su sɛ ɔbɛko atia, nanso onipa su betumi ama [wawu] wɔ tebea bɔne mu.” Basabasayɛfo no mu pii kura akode a ɛyɛ hu na ehu aka wɔn ankasa. Wubetumi anya sika a wohweree no bio, na wo nkwa nso ɛ? So asiane a wode wo ho bɛto mu no fata?

George Napper de afotu yi ma sɛ: “Ebia ɔkwan a ɛsen biara a wobɛfa so abɔ wo ho ban ne sɛ wode w’agyapade bɛto asiane mu, na ɛnyɛ wo nkwa. Awifo pii ba adewia, ɛnyɛ awudi.” Wɔ tebea a wɔatua obi anaasɛ wɔregye ne ho sika mu ara kɛkɛ no, nnyinasosɛm a nyansa wom ne sɛ: “Ɛnsɛ Awurade akoa sɛ ɔko.”​—2 Timoteo 2:24.a

Eyi nkyerɛ sɛ ɛnsɛ sɛ wɔhwehwɛ ahobammɔ koraa wɔ tebea biara mu. Wɔ Exodus 22:2, 3 no, wɔka owifo a obi bɔ no kum no bere a ɔrehyɛn ne fi awia ho asɛm. Na wobu ahobammɔ a ɛte saa no sɛ ɛyɛ awudi, efisɛ na wobetumi ahu onii a owifo no yɛ na wɔde no akɔ asennibea. Nanso anadwo de, ɛbɛyɛ den sɛ ofiewura no behu onii no ne nea enti a waba hɔ. Enti, obi a obekum onipa a ɔte saa wɔ sum mu no nni fɔ.

Enti, Bible no mpene abufuw mu a obi befi abɔ n’ankasa ho ban no so. Nanso, wɔ wɔn ho ban a ɛnsɛ sɛ wɔbɔ koraa a Bible mpene so mu no, ɛda no adi sɛ bere a ɛsɛ sɛ obi bɔ ne ho ban wɔ hɔ. Kristofo betumi asiw ntua a wɔde bɛba wɔn ankasa, wɔn mmusua anaasɛ afoforo a wohia ahobammɔ ankasa no ano.b Nanso, wɔremfi ntua ase, anaasɛ wɔrenni were mfa mmɔ wɔn nneɛma ho ban. Wɔrenkura akode esiane ntua a ɛte saa a wɔhwɛ kwan no nti; mmom no, wɔbɔ mmɔden tra ase “asomdwoe mu.”​—2 Korintofo 13:11.

[Ase hɔ nsɛm]

[Kratafa 19 mfoni]

Betrayal of Christ, by Albrecht Dürer, 1508