Sɛ Wobɔ Mpae a, Onyankopɔn Tie?

ADWUMA mu panyin bi si gyinae sɛ ebia ɔbɛma obi foforo adi asɛm bi ho dwuma anaasɛ n’ankasa bɛyɛ saa. Saa ara na Amansan Hene no wɔ hokwan sɛ osi faako a n’ankasa de ne ho bɛhyɛ asɛm bi mu akodu ho gyinae. Kyerɛwnsɛm no kyerɛkyerɛ sɛ Onyankopɔn apaw sɛ n’ankasa bedi yɛn mpaebɔ ho dwuma, ma enti ɔkyerɛ sɛ yɛmmɔ no mpae.​—Dwom 66:19; 69:13.

Nea Onyankopɔn paw wɔ asɛm yi mu no da anigye a n’ankasa wɔ wɔ ne nkoa a wɔyɛ nnipa mpaebɔ mu no adi. Sɛ anka obebu ne nkurɔfo aba mu sɛ ɛnsɛ sɛ wɔde wɔn dadwen ne wɔn haw biara ba n’anim no, otu wɔn fo sɛ: “Munnnyae mpaebɔ da,” “munkura mpaebɔ mu ara,” “dan w’adesoa to [Yehowa] so,” “momfa mo dadwen ne haw nyinaa nto [Onyankopɔn] so.”​—1 Tesalonikafo 5:17; Romafo 12:12; Dwom 55:22; 1Petro 5:7.

Sɛ Onyankopɔn mpɛ sɛ otie ne nkoa mpaebɔ a, anka ɔrenyɛ nhyehyɛe a ɛte sɛɛ a ɛbɛma wɔaba n’anim, na wahyɛ wɔn nkuran sɛ wɔmfa nni dwuma. Enti, paw a Onyankopɔn apaw sɛ ɔbɛma ne nkurɔfo atumi aba n’anim no yɛ ade biako nti a ɛsɛ sɛ wonya ahotoso sɛ otie ankasa. Yiw, otie ne nkoa mu biara mpaebɔ ahorow.

Nea ɛnsɛ sɛ yebu yɛn ani gu so ne nokwasɛm a ɛyɛ sɛ Bible no ka pefee sɛ Onyankopɔn tie mpaebɔ. Sɛ nhwɛso no, ɔsomafo Yohane kyerɛw sɛ: “Na nnam a yɛde kɔ ne nkyɛn ne sɛ, yɛsrɛ biribiara sɛnea ɔpɛ a, otie yɛn.” (1 Yohane 5:14) Ɔhene Dawid kaa Yehowa Nyankopɔn ho asɛm sɛ “mpaebɔ Tiefo,” na ɔde ahotoso kae sɛ: ‘Ɔte me nne.’​—Dwom 55:17; 65:2.

Enti bere a akyinnye biara nni ho sɛ adeyɛ a ɛne mpaebɔ no ankasa so wɔ mfaso no, Kyerɛwnsɛm no kyerɛ sɛ sɛ ɔtreneeni bɔ mpae a ɛkyerɛ nneɛma pii. Obi retie. Na otiefo no ne Onyankopɔn.​—Yakobo 5:16-18.

Mpaebɔ Ahorow a Wotiei

Nnipa a nokwarem no, Onyankopɔn tiee wɔn mpaebɔ na obuae no ho kyerɛwtohɔ ayɛ Bible no mu ma. Wɔn osuahu ahorow no si so dua pefee sɛ mpaebɔ so mfaso kɔ akyiri sen ahotɔ a obi nya bere a ɔhwehwɛ ne nsusuwii mu na ɔka ho asɛm kyerɛ no. Ɛkɔ akyiri sen obi mmɔdenbɔ a ɛne ne mpaebɔ hyia no.

Sɛ nhwɛso no, bere a Ɔhene Dawid huu Absalom atirisopam sɛ obegye Israel ahenni afi ne nsam no, ɔbɔɔ mpae sɛ: “[Yehowa], mesrɛ wo, ma Ahitofel [Absalom fotufo] agyinatu nnan nkwaseasɛm.” Na ɛnyɛ adesrɛ ketewaa bi, efisɛ na “Ahitofel ɛfo a otui nna no mu te sɛnea obi kobisa [nokware] Onyankopɔn [no] hɔ ade, saa na Ahitofel afotu nyinaa te.” Ɛno akyi no, Absalom pow ɔkwan a Ahitofel kae sɛ wɔmfa so ntu Ɔhene Dawid ade so no. Dɛn ntia? “Na [Yehowa] na ahyɛ sɛ wɔmma Ahitofel afotu pa no nyɛ ɔkwa, na [Yehowa] de bɔne aba Absalom so.” Ɛda adi pefee sɛ wotiee Dawid mpaebɔ.​—2 Samuel 15:31; 16:23; 17:14.

Saa ara na bere a Hesekia koto srɛɛ Onyankopɔn sɛ ɔnsa ne wuyare mma no akyi no, ne ho tɔɔ no. So na eyi yɛ adwenem mfaso horow ara kwa a Hesekia nyae esiane sɛ ɔbɔɔ mpae nti? Dabida. Yehowa asɛm a odiyifo Yesaia kɔka kyerɛɛ Hesekia ne sɛ: “Mate wo mpaebɔ, mahu wo nusu, hwɛ, me na meresa wo yare.”​—2 Ahene 20:1-6.

Yehowa bɔfo maa Daniel, a wɔantie ne mpaebɔ ntɛm sɛnea ebia ɔhwɛɛ kwan no awerɛhyem sɛ: “Wɔate wo nsɛm.” Wobuaa afoforo te sɛ Hana, Yesu asuafo, ne ɔsahene Kornelio mpaebɔ, wɔ akwan a ɛremma wontumi nka sɛ nnipa mmɔdenbɔ nkutoo na ɛma ɛbaa saa so. Enti, Bible no kyerɛkyerɛ pefee sɛ Onyankopɔn te, otie, na obua mpaebɔ ahorow a ɛne ɔsoro apɛde hyia no.​—Daniel 10:2-14; 1 Samuel 1:1-20; Asomafo no Nnwuma 4:24-31; 10:1-7.

Nanso, ɔkwan bɛn so na Onyankopɔn bua ne nkoa anokwafo mpaebɔ nnɛ?

Mpaebɔ Ahorow ho Mmuae

Wobuaa mpaebɔ ahorow a yɛaka ho asɛm wɔ atifi hɔ no wɔ akwan a ɛyɛ anigye, ne nwonwa so. Nanso, yɛsrɛ sɛ ma ɛntra w’adwenem sɛ wɔ Bible mmere mu mpo no, na ɛnyɛ mmerɛw koraa sɛ wobehu mpaebɔ ahorow ho mmuae a wɔtaa de ma no. Eyi te saa efisɛ na ɛfa abrabɔ fam ahoɔden ne ntease ho, na ɛmaa Onyankopɔn nkoa tumi nantew akwantrenee so. Kristofo fam titiriw no, mpaebɔ ahorow ho mmuae fa honhom mu nsɛm ho titiriw, na ɛnyɛ anwonwade anaasɛ ahoɔdenne.​—Kolosefo 1:9.

Enti sɛ wɔammua wo mpaebɔ ahorow bere nyinaa sɛnea wohwɛ kwan anaasɛ wopɛ a, mma w’aba mu mmu. Sɛ nhwɛso no, sɛ anka Onyankopɔn beyi sɔhwɛ afi hɔ mmom no, ebia ɔbɛpaw sɛ ɔbɛma wo “tumi a ɛboro so” na wode agyina ano. (2 Korintofo 4:7; 2 Timoteo 4:17) Mommma yemmmu bo a tumi a ɛte sɛɛ som no adewa da, na saa ara nso na ɛnsɛ sɛ yenya adwene sɛ Yehowa ammua yɛn mpaebɔ no koraa ankasa.

Susuw Onyankopɔn Ba ankasa a ɔne Yesu Kristo asɛm no ho. Esiane sɛ na Yesu mpɛ sɛ owu sɛ obususɛnkafo nti, ɔbɔɔ mpae sɛ: “Agya, sɛ wopɛ a, ma kuruwa yi ntwa me ho nkɔ.” So Onyankopɔn tiee mpaebɔ yi? Yiw, sɛnea wɔasi so dua wɔ Hebrifo 5:7 no. Yehowa annye ne Ba no amfi hia a ɛho hia sɛ owu wɔ dua so no mu. Mmom no, “ɔbɔfo fii soro beyii ne ho kyerɛɛ no hyɛɛ no den.”​—Luka 22:42, 43.

So ɛyɛ mmuae a wɔde mae wɔ anwonwa kwan so? Nokwarem no, ɛbɛyɛ saa ama yɛn mu biara! Nanso na eyi nyɛ anwonwade biara mma Yehowa Nyankopɔn, tumi a ɛte sɛɛ fibea no. Na Yesu nim bere a atwam a abɔfo yii wɔn ho adi kyerɛɛ nnipa wɔ n’asetra a edi kan wɔ soro no mu. Enti ɔbɔfo ahoyi renyɛ no nwonwa te sɛ nea ɛbɛyɛ yɛn nwonwa no. Nanso, ɔbɔfo yi a ɛda adi sɛ Yesu ankasa nim no wɔ N’asetra ansa na ɔrebɛyɛ onipa mu no, boa hyɛɛ No den maa sɔhwɛ a na ɛda n’anim no.

Sɛ Yehowa rebua ne nkoa anokwafo a wɔwɔ hɔ nnɛ no mpaebɔ ahorow a, ɔtaa ma wɔn ahoɔden a wohia no na wɔde agyina ano. Saa mmoa yi betumi ayɛ te sɛ nkuranhyɛ a efi mfɛfo asomfo a yɛn ankasa ne wɔn bɔ no hɔ. So yɛn mu bi bɛpɛ sɛ ɔpow saa nkuranhyɛ no, na ebia yɛanya adwene sɛ esiane sɛ yɛn mfɛfo asomfo nhyiaa sɔhwɛ ahorow a ɛte sɛ yɛn de no nti, wɔrentumi nhyɛ yɛn den? Anka Yesu betumi anya adwene a ɛte saa ara wɔ ɔbɔfo a oyii ne ho adi kyerɛɛ no no ho. Mmom no, ogyee nkuranhyɛ no toom sɛ mmuae a Yehowa de ma wɔ ne mpaebɔ no ho, ma enti otumi de nokwaredi yɛɛ n’Agya apɛde. Yɛn nso yɛbɛpɛ sɛ yɛde anigye gye ahoɔden a Onyankopɔn de ma yɛn de bua yɛn mpaebɔ ahorow no. Kae nso sɛ nhyira pii taa ba wɔ mmere a ɛte sɛɛ a yenya boasetɔ no akyi.​—Ɔsɛnkafo 11:6; Yakobo 5:11.

Nya Ahotoso sɛ Onyankopɔn Tie

Sɛ wommua wo mpaebɔ ahorow ntɛm ara a, mpa abaw wɔ mpɔn a etu no ho. Ɛsɛ sɛ mpaebɔ bi, te sɛ nea ɛbɛma obi ankasa anya ahotɔ afi ɔhaw mu, anaasɛ ɛbɛma wanya asɛyɛde kɛse wɔ ne som ma Onyankopɔn mu no twɛn kosi bere a Onyankopɔn nim sɛ ɛteɛ na eye sen biara mu. (Luka 18:7, 8; 1 Petro 5:6) Sɛ worebɔ asɛm bi a ɛhaw wo yiye ho mpae a, kɔ so bɔ fa kyerɛ Onyankopɔn sɛ wowɔ ɔpɛ a emu yɛ den sɛ wubenya ho mmuae, na adwene a wukura no ho tew na ɛyɛ nokware. Yakob daa su yi adi bere a ɔne ɔbɔfo bi tentam denneennen akyi no, ɔkae sɛ: “Meremma wonkɔ gye sɛ wuhyira me.” (Genesis 32:24-32) Ɛsɛ sɛ yenya ahotoso saa ara sɛ, sɛ yɛkɔ so bisa a, yebenya nhyira wɔ bere a ɛsɛ mu.​—Luka 11:9.

Nea etwa to ni. Sɛ amansan Hene no betie wo no yɛ hokwan a ɛsom bo. Esiane eyi nti, so yɛde boasetɔ tie bere a Yehowa Nyankopɔn nam n’Asɛm so ka nneɛma a ɔhwehwɛ kyerɛ yɛn no? Bere a yɛn mpaebɔ ahorow ma yɛbɛn yɛn Bɔfo no kɛse no, yɛbɛpɛ sɛ yetie biribiara a ɔwɔ ka kyerɛ yɛn no yiye.

[Mfonini wɔ kratafa 6]

Onyankopɔn tie yɛn mpaebɔ ahorow. So yetie no denam n’Asɛm so?