Ɔfã 4: Onyankopɔn Mfirihyia Apem Ahenni Abɛn

Ɔhene Dawid Daa Ɔdedifo No Awo

30, 31. (a) Abusua hama a ɛnam Ɔhene Dawid so bɛn na Yehowa de n’ani dii akyi? (b) Hena babea wɔ abusua hama no mu na Yehowa hyɛɛ no nsow, na wɔde no maa hena sɛ ne siyere?

³⁰ Onyankopɔn a ne werɛ mfi ade, Ahenni apam no Yɛfo a ɔwɔ soro, de too ho so sɛ ɔbɛma apam bɔhyɛ no abam ama Dawid. Ɔkɔɔ so hwɛɛ Ɔhene Dawid ɔnokwafo a na wahyɛ no bɔ sɛ ɔbɛkyekye adehye fi ama no no asefo a wɔyɛ mmabarima. Ohuu Dawid anatõ biako a ɛnam Dawid babarima foforo so, a ɛnnam Ɔhene Salomo so. Saa anatõ yi nam nnipa aduonu afoforo so bedu Serubabel, nea ɔbɛyɛɛ Yerusalem amrado wɔ odiyifo Sakaria nna no mu no so. Na Serubabel wɔ babarima bi a wɔfrɛ no Resa, na ɔno akyi no anatõ no faa nnipa dunsia afoforo so, na ɛno akyi na wɔwoo Heli sɛ Matat babarima. (Luka 3:23-31) Afei Onyankopɔn anhyɛ ɔbabarima nsow, na mmom Heli babea. Wɔwoo no Betlehem kurom wɔ Roma mansin Yudea mu, afeha a edi kan A.Y.B. no fã a edi awiei no mu. Na wɔfrɛ no Maria.

³¹ Bere kɔɔ so no wɔde Maria kɔɔ kusuufam wɔ Nasaret kurom, wɔ Roma mansin Galilea mu. Ɛhɔ na ɔsõo aware, na wɔde no brɛɛ duadwumfo bi a wɔfrɛ no Yosef, Yakob ba, a na ofi Nasaret no sɛ ne siyere.

32. Dɛn nti na Yosef a na wɔde no ama no aware no fata, na asemmisa bɛn a ɛfa Dawid adedifo ho na ɛsɔree?

³² Na saa aware nhyehyɛe yi fata yiye. Dɛn nti na ɛte saa? Efisɛ, ɛwom sɛ na Yosef yɛ duadwumfo wɔ akuraa Nasaret a na enni din no ase de, nanso na ɔyɛ Ɔhene Dawid aseni, a omfi Natan mu, na mmom ofi Dawid ɔdedifo a odi kan, Salomo mu. Enti na Yosef wɔ hokwan sɛ ɔtra ne nena Dawid ahengua no so. So afei de na ɛsɛ sɛ Yosef bɛyɛ ɔhene Dawid daa adedifo a na wɔahyɛ ne ho bɔ bere tenten no honam fam agya tee anaa?

33, 34. (a) Dɛn nti na Yehowa kyerɛe sɛ ɔka Maria ho? (b) Nea esii afei no maa nkɔm bɛn a Yakob hyɛe bere a na ɔrewu no nyaa mmamu?

³³ Wiɛ, ansa na wɔrehyia ayeforo na Yosef afa Maria afi ne fie akɔ faako a ɔne no bɛtra sɛ ne mmara kwan so yere no, biribi a ɛyɛ soronko sii, ade a nnipa a wɔwɔ Nyansahu-Bere yi mu wɔ yɛn afeha a ɛto so aduonu yi mu nnye ntom. Bere no yɛ nea na aka kakra ma afe 3 A.Y.B. aba awiei. Na ɛyɛ Onyankopɔn bere a wahyɛ no agyirae, nea na ofi bere tenteenten ahwɛ kwan. Mpofirim ara ɛbɛdaa adi sɛ na Onyankopɔn ka Maria Heli babea no ho, ɛnyɛ sɛ na ɔyɛ Yudani ababaa nti, na mmom esiane sɛ na ɔyɛ Dawid a ofi Yuda abusua mu adehye abusua no mu aseni nti. Enti na nea esii no rema nkɔmhyɛ a efi honhom mu a agyapanyin Yakob ka kyerɛɛ ne ba a ɔto so anan, Yuda no anya mmamu. Na eyi yɛ afe 1711 A.Y.B. mu, na Yakob a na ɔrewu no kae wɔ Yuda ho sɛ:

³⁴ “Ogyata ba ne Yuda . . . sɛ gyata ne gyatabere; hena na ɔbɛhwanyan no? Ahempoma remfi Yuda nsa, na mmarahyɛpoma remfi n’anan ntam, kosi sɛ Silo, [asomdwoe hene] bɛba, na ɔno na aman bɛyɛ osetie ama no.​—Gen. 49:8-10.

35, 36. (a) Anwonwade bɛn na na Onyankopɔn ayɛ ama Elisabet, Maria busuani a na ne mfe akɔ anim no? (b) Dɛn na ɔbɔfo Gabriel ka kyerɛɛ Maria wɔ Onyankopɔn atirimpɔw a ɛfa Dawid ahengua no ho no ho?

³⁵ Ɔkwan bɛn so na Onyankopɔn kyerɛe sɛ na ɔka ɔbaabun Maria a ofi Yuda abusua mu a na ofi Dawid adehye abusua mu no ho? Onyankopɔn yɛɛ biribi maa Maria a na ɛso sen nea na wayɛ ama Maria busuani a na wabɔ aberewa a na wɔfrɛ no Elisabet, Lewini sɔfo Sakaria yere no. Onyankopɔn nam anwonwa kwan so kanyan Sakaria ne Elisabet awode, enti na wanya asram asia wɔ ne nyinsɛn no mu na na ɛrenkyɛ na wawo ɔbabanin a na wɔbɛfrɛ no Yohane Osuboni no. Nanso dɛn na Onyankopɔn yɛ maa Yudani baabun Maria, nea na bere a wɔde no ama duadwumfo Yosef sɛ siyere no nnya nwiee du no? Oduruyɛfo Luka ka kyerɛ yɛn:

³⁶ “Na ɔsram a ɛto so asia no mu no Onyankopɔn somaa ɔbɔfo Gabriel kɔɔ Galilea kurow bi a wɔfrɛ no Nasaret mu, ababaa bi a wɔde no ama ɔbarima bi a wɔfrɛ no Yosef a ofi Dawid abusua mu aware nkyɛn; na ababaa no din de Maria. Na ɔbɔfo no baa ne nkyɛn se: Wo a wɔadom wo, mo! Awurade ka wo ho, wo a wɔahyira wo mmaa mu! Na ohuu no no, ne ‘bo tui n’asɛm no ho, na odwen ne tirim sɛ eyi bɛyɛ nkyia bɛn. Na ɔbɔfo no see no sɛ: Nsuro, Maria: na woanya Onyankopɔn anim dom. Na hwɛ, wobɛyem na woawo babanin, na woato ne din Yesu. Ɔbɛyɛ kɛse, na wɔafrɛ no nea ɔwɔ ɔsorosoro ba; na Awurade Nyankopɔn de n’agya Dawid ahengua bɛma no: na obedi Yakob fi so daapem, na n’ahenni no to rentwa da.”​—Luka 1:26-33.

37. Ɔkwan bɛn so na Gabriel kyerɛkyerɛɛ wo a Maria bɛwo ɔbabarima a onni ɔdesani agya no mu?

³⁷ Eyi kyerɛ sɛ na Yosef a ɔbɛyɛ Maria kunu no renyɛ Yesu honam fam agya tẽe! Ɛdɛn? Ɔbabanin a wɔbɛwo no a onni ɔdesani agya? Sɛnea ɛbɛyɛ na wakyerɛkyerɛ nea anwonwa kwan so ɔbaabun awo yi bɛyɛ mu no, ɔbɔfo Gabriel kɔɔ so kae sɛ: “Honhom kronkron bɛba wo so na nea ɔwɔ sorosoro ahoɔden abɛkata wo so; enti nso na ade kronkron a wobɛwo no, wɔbɛfrɛ no Onyankopɔn ba. Na hwɛ, wo busuani Elisabet nso ayem babanin ne mmerewabere mu; na nea wɔfrɛ no bonin no, eyi no ne asram a ɛto so asia. Efisɛ Onyankopɔn fam de, asɛm biara nni hɔ a entumi nyɛ.”​—Luka 1:34-37.

38. Dɛn na ɛbaa Maria so afei, na na n’abofra no bɛyɛ hena Ba?

³⁸ Saa kwan yi so no so Maria penee so sɛ ɔbɛyɛ nea ná ɔbɛyɛ Ɔhene Dawid daa ɔdedifo no nã anaa? Luka 1:38 ka kyerɛ yɛn: “Na Maria se: Hwɛ, Awurade afana ne me; ɛnyɛ me sɛnea wo asɛm se! Na ɔbɔfo no gyaw no hɔ kɔe.” Akyiri yi honhom kronkron baa Maria so, na ɔsorosoroni Nyankopɔn ahoɔden bɛkataa no so. Enti obenyinsɛnee anwonwa kwan so, na ɛnnam nea ɔbɛyɛ ne kunu Yosef so. Eyi kyerɛe sɛ na ɔsorosoroni Yehowa Nyankopɔn ne akokoaa Yesu a na afei de wɔanyinsɛn no no Agya. Kyerɛwnsɛm afoforo a efi honhom mu no kyerɛ mu sɛ Yehowa Nyankopɔn yii Ne soro dɔ Ba a ɔwoo no koro no nkwa bɛhyɛɛ Maria awotwaa mu na onyinsɛnee. (Yoh. 3:16; Fil. 2:5-11) Biribiara nni hɔ a na ɛho ntew wɔ eyi ho. Ɛno nti na “ade kronkron a wobɛwo no, wɔbɛfrɛ no Onyankopɔn ba.” Eyi nyinaa bae Onyankopɔn bere a wahyɛ mu, sɛnea wɔakyerɛw no pɛpɛɛpɛ: “Na bere no wiee odu no, Onyankopɔn somaa ne ba a ɔbaa woo no ma ɔbaa mmara ase [Mose mmara no].”​—Gal. 4:4.

Ahenni Apam No Daa Ɔdedifo

39. (a) Hena na na ɔbɛma Maria babarima no ayɛ ɔhene wɔ Yakob fi so? (b) Hokwan bɛn na Yesu nyae denam Maria so?

³⁹ Nea ɔbɔfo Gabriel ka kyerɛɛ Maria no ma ɛdaa adi sɛ na ne babanin no bɛyɛ Ɔhene Dawid Daa Ɔdedifo: “Yehowa Nyankopɔn de n’agya Dawid ahengua bɛma no: na obedi Yakob fi so daapem, na n’ahenni no to rentwa da.” (Luka 1:32, 33) Ɛnyɛ mfeha dunkron a atwam ni Yudafo anaasɛ nnɛyi ɔhonam fam Yudafo no na na wɔde Yesu yi agya Dawid ahengua bɛma no. Ɔsoro Agya, Yehowa Nyankopɔn, na na ɔde Ahenni no ahengua no bɛma no, nea, Dawid fam no, na ɛyɛ nea “ebedi Yakob,” Israel mmusuakuw dumien no agyapanyin, no “fi” nkutoo so. Enti ɛdenam Yudani ɔbaabun Maria so no wɔwoo n’abakan too Dawid adehye abusua no mu, na ɛdenam no so no Yesu fata maa Dawid ahenni no wɔ ɔhonam fam. Sɛnea ɛbɛyɛ na adi nokwasɛm yi ho adanse no wɔde honhom kaa ɔsomafo Paulo ma wakyerɛw asɛmpa a efi Onyankopɔn hɔ no sɛ: “Ne ba no ho, nea wɔwoo no Dawid aseni ɔhonam fam, na wɔayi no akyerɛ sɛ Onyankopɔn ba, tumi mu ahotew honhom fam, awufo sɔre mu, ɔne Yesu Kristo, Yɛn Awurade.”​—Rom. 1:1-4.

40. (a) Ɛdefa Maria babarima Yesu ho no, dɛn na Yosef hui sɛ ɛyɛ Onyankopɔn asɛyɛde ma no wɔ ne ho, na enti ɛmaa Yesu nyaa tumi bɛn? (b) Luka ka sɛ Yosef yɛ hena ba, na dɛn ntia?

⁴⁰ Bere a ohuu Maria nyinsɛn no akyi no, wɔkyerɛkyerɛɛ mu kyerɛɛ nea na ɔbɛyɛ ne kunu no, na wɔka kyerɛɛ no sɛ ɔmfa Maria nkɔ ne fie sɛ ne yere. Yosef yɛɛ saa, wɔ Nasaret hɔ. Ohui sɛ ɛyɛ n’asɛyɛde sɛ ogye Onyankopɔn Ba a Maria awo no no sɛ n’ankasa abakan na ɔde hokwan no ma Yesu ma ɔfa Dawid ahengua no, esiane sɛ na ɛdenam Salomo so no Yosef yɛ Dawid aseni nti.a (2 Sam 7:13-16) Eyi na Yosef yɛe sɛ ɔma wotwaa Yesu twetia n’awo no da a ɛto so awotwe, na wɔtoo ne din Yesu, na afei nso n’adaduanan da so no ɔde akokoaa Yesu kɔɔ Yerusalem asɔrefi na wɔakodwira ɔno ne Maria. (Mat. 1:17-25: Luka 2:21-24) Eyi nti na wɔfrɛɛ no “Yosef ba” no. (Yoh 1:45; 6:42) Eyi nti nso na wɔ oduruyɛfo Luka anatõ a ɛfa Yesu Kristo ho mu no ɔka sɛ: “Na Yesu ankasa fii ase no, na wadi bɛyɛ sɛ mfirihyia aduasa, na sɛnea wobuu no no, ɔyɛ Yosef ba, [ɔne] Eli ba.” (Luka 3:23) Na wɔfrɛ Yosef a na ɔyɛ Yakob ba ankasa no nso sɛ, “Eli ba” efisɛ na waware Eli babea Maria, enti na ɔyɛ Eli asew.

41. Ɛhe na wɔwoo nea wɔfrɛɛ no “Yesu Nasareni” no wɔ afe 2 A.Y.B. mu?

⁴¹ Akyiri yi wɔfrɛɛ Yesu Kristo sɛ “Yesu Nasareni” ne “Yesu a ofi Nasaret a ɛwɔ Galilea.” (Yoh. 19:19; Mat. 21:11) So eyi kyerɛ sɛ wɔwoo Yesu wɔ Nasaret? Dabi, efisɛ ansa na wɔbɛwo no no, ne nã Maria ne ne kunu Yosef, esiane sɛ wɔwoo wɔn baanu wɔ Betlehem a ɛwɔ Yudea nti, mmara a na Roma ɔhempɔn Kaesare Augusto ahyɛ no hyɛɛ wɔn sɛ wɔnkɔ Betlehem afe 2 A.Y.B. mu na wɔnkɔkan wɔn. Saa bere no na wɔwoo Yesu wɔ Betlehem, nea wɔfrɛ no “Dawid kurom” no, efisɛ ɛhɔ na wɔwoo Yese ba Dawid.​—Luka 2:1-7.

42, 43. Wɔ Gabriel de no akyi no, adanse a ɔbɔfo dii bɛn na yɛwɔ a ɛkyerɛ sɛ na Maria babarima no bɛyɛ Onyankopɔn Mesia?

⁴² Yɛwɔ nea ɛsen adanse a ɔbɔfo Gabriel di faa Maria ba Yesu yi a na ɔbɛyɛ Mesia anaasɛ Kristo, Nea Wɔasra No a na ɔbɛyɛ Dawid ahenni no daa ɔdedifo no ho. Yɛwɔ adanse a ɔsoro bɔfo foforo de mae wɔ anadwo a wɔwoo Yesu, bɛyɛ Oktober, 2 A.Y.B mfiase hɔ no. Ɔbɔfo a ɔwɔ anuonyam mu yi yii ne ho adi kyerɛɛ nguanhwɛfo a na wɔda so hwɛ wɔn nguan wɔ sare bi a ɛbɛn Betlehem no so wɔ afe no mu saa bere no.

⁴³ Ɔbɔfo no ka kyerɛɛ nguanhwɛfo a na ehu aka wɔn no sɛ: “Munnsuro, na hwɛ, mede anigye kɛse asɛmpa a ɛbɛyɛ ɔman nyinaa dea merebrɛ mo, sɛ nnɛ wɔawo Agyenkwa a ɔne Kristo Awurade no, ama mo wɔ Dawid kurom. Na eyi ne mo sɛnkyerɛnne: mubehu akokoaa a wɔde ntama akyekyere no, sɛ ɔda mmoa adidide mu.” Sɛ́ na eyi nyɛ awo bi ara kwa no, wɔnam nea esii akyiri yi no so kyerɛe: “Na mpofirim ara ɔsoro asafo bebree bɛkaa ɔbɔfo no ho yii Nyankopɔn ayɛ sɛ: Anuonyam wɔ sorosoro ma Onyankopɔn, na asomdwoe wɔ asase so, anisɔ wɔ nnipa mu.”​—Luka 2:8-14.

44. Dɛn nti na wɔde abofra Yesu kɔɔ Misraim, na ɛyɛɛ dɛn na ɔbɛyɛɛ duadwumfo wɔ Nasaret?

⁴⁴ Satan Ɔbonsam huu Onyankopɔn Ba yi a na ɔbɛyɛ “Awurade Kristo” no awo no. Esiane sɛ na n’ani abere wiase a n’ankasa di so no ho nti, Satan Ɔbonsam bɔɔ mmɔden sɛ ɔbɛma wɔakum abofra Yesu bere a wɔde no kɔkyerɛe wɔ Yerusalem asɔrefi no akyi, na na ɔnam Ɔhene Herode ɔkɛseɛ a na wanya adwemmɔne no nsa so bɛyɛ eyi. Enti Onyankopɔn bɔfo ka kyerɛɛ Yosef sɛ ɔmfa ɛnã no ne abofra no nguan nkɔ Misraim kosi sɛ ɔbɛte asɛm foforo. Wɔ Ɔhene Herode wu akyi no Onyankopɔn bɔfo ka kyerɛɛ Yosef sɛ ɔnsan nkɔ ne nkurɔfo asase so. Nanso, esiane sɛ na ɔhene Herode babarima Arkelao di Roma mantam Yudea, a Betlehem ka ho no so hene nti, Yosef amfa Betlehem na ɔsan kɔɔ Nasaret a ɛwɔ Galilea mantam mu no mu. Ɛhɔ na Yesu nyinii na wɔbɛfrɛɛ no Nasareni. Ɛhɔ na Ɔhene a na ɔbɛba daakye yi yɛɛ adwuma sɛ duadwumfo.​—Mat. 2:1-23; 13:55; Marko 6:1-3.

45. (a) Sɛnea ɛbɛyɛ na wabɛyɛ Mesia anaasɛ Kristo no ankasa no, dɛn na na ehia sɛ Yesu nya te sɛ Dawid? (b) Bere bɛn na Yesu kɔɔ Yordan Asubɔnten no ho ma wɔabɔ no asu, na dɛn nti na ɔyɛɛ saa?

⁴⁵ Nanso, na asɛm Kristo anaasɛ Mesia, a ɛkyerɛ Nea Wɔasra No no ntumi mfa Yesu ho ankasa de kosi bere a ɔbɛyɛɛ nea wɔasra no no. Na Onyankopɔn nam odiyifo Samuel so asra ne nena, oguanhwɛfo Dawid a ofi Betlehem no mfe bebree ansa na wɔde no sii agua so sɛ ɔhene wɔ Israel. (1 Sam. 16:1-13; 2 Sam. 2:1-4; 5:1-3) Ɛyɛɛ saa ara wɔ Yesu fam. Odii mfe aduasa sɛ ɔdesani a ɔyɛ pɛ no, ne busuani, Yohane Osuboni, fii n’asubɔ adwuma no ase, efisɛ ofii ase kaa Onyankopɔn ahenni ho asɛm saa bere no, sɛ: “Monsakra mo adwene, na ɔsoro ahenni no abɛn.” (Mat. 3:1, 2) Ɛdenam kaseɛbɔ yi so no Yesu hui sɛ bere adu sɛ ɔde ne ho ma Onyankopɔn Mesia ahenni no ho dwumadi nkutoo. Bere a ɔreyɛ adu ne mfe a ɛto so aduasa no awiei wɔ ne desani asetra mu no ofii Nasaret na ɔkɔɔ Yohane a na ɔrebɔ nkurɔfo asu wɔ Yordan Asubɔnten no mu no nkyɛn. Dɛn ntia? Ɛnyɛ sɛ na ɔrekɔ ma wabɔ no asu de ayɛ bɔne ho adwensakra ho sɛnkyerɛnne, ade a na ebi nni ne ho, na mmom sɛ ɔde bɛyɛ ne ho a ɔde rema Yehowa Nyankopɔn koraa, sɛnea ɛbɛyɛ na wayɛ ɔsoro apɛde a ɛfa “ɔsoro ahenni,” Onyankopɔn ahenni no ho no ho sɛnkyerɛnne. Yohane ante ase. Enti yɛkan sɛ:

46. (a) Wɔ n’asubɔ no mu hɔ no, ɔkwan bɛn so na Yesu bɛyɛɛ Mesia anaasɛ Kristo? (b) Dɛn nti na saa bere no Onyankopɔn frɛɛ Yesu a na wabɔ asu no sɛ ne Ba?

⁴⁶ “Ɛno na Yesu fi Galilea baa Yordan ho Yohane nkyɛn sɛ ɔmmɔ no asu. Na Yohane siw no kwan sɛ: Me a ehia me sɛ wobɔ me asu no, na woba me nkyɛn yi? Na Yesu bua see no sɛ: Ma ho kwan afei; na saara na ɛsɛ yɛn sɛ yɛma trenee nyinaa wie pɛ yɛ. Ɛno na ɔmaa no kwan. Na wɔbɔɔ Yesu asu wiei no, ofii nsu no mu ntɛm ara, na hwɛ, ɔsoro bue maa no, na ohuu Nyankopɔn honhom sɛ esian sɛ aborɔnoma ba no so. Na hwɛ, ɛnne bi fi soro se: Oyi ne me dɔba a ɔsɔ m’ani!” (Mat. 3:13-17) Ɛdenam saa Onyankopɔn honhom a esian baa Yesu a na wabɔ asu no so no so no, wɔsraa no, ɛnyɛ Osuboni Yohane na ɔsraa no, na mmom Onyankopɔn. Saa kwan yi so no ɔbɛyɛɛ Mesia, Kristo, Nea Wɔasra No. Na eyi yɛ ofupɛ mfiase wɔ afe 29 Y.B. mu. Afei nso Onyankopɔn frɛɛ no ne Ba, efisɛ mprempren yi de na wawo Yesu sɛ ɔmmɛyɛ ne honhom mu Ba. (Yoh. 1:32-34) Afei de na ɔyɛ honhom mu Mesia anaasɛ Kristo, a ɔkorɔn sen ɔdesani Mesia.

47. Hokwan ahorow a ɔbɛma wabɛyɛ ɔdesani Mesia ara kwa bɛn na Yesu powee, na nea ɔne sra a wɔsraa no hyia no, adwuma bɛn na ofii ase yɛe?

⁴⁷ So Yesu Kristo bɔɔ mmɔden sɛ ɔbɛyɛ n’ankasa ho sɛ asase so hene a “obedi Yakob fi so,” wɔ Yerusalem? Dabi! Wɔ sare so sɔhwɛ no mu no, ɔpowee sɛ obegye akyɛde a Satan Ɔbonsam de maa no sɛ ɔbɛma wayɛ ɔhene a, ɛnyɛ Yakob fi nkutoo so na obedi, na mmom sɛ obedi ahenni horow nyinaa a ɛwɔ wiase no so no. (Mat. 4:1-11; Luka 4:1-13) Akyiri yi, bere a ɔnam anwonwa kwan so maa nnipakuw bi aduan dii no, ɔtwee ne ho fii mmɔden a Yudafo mpempem a wɔadidi amee no bɔe sɛ wɔbɛyɛ no wɔn asase so hene no ho. (Yoh. 6:1-15) Na onim sɛ n’ahenni befi onii a na wasra no sɛ ɔmmɛyɛ Mesia Ɔhene, Yehowa Nyankopɔn, nkyɛn. Ɔrekyerɛ mfiase adwuma a na ɛda no so sɛ nea wɔde Onyankopɔn honhom asra no no ho anisɔ no, Yesu yɛɛ adwuma a asomdwoe wom a ɛne ɔkyerɛkyerɛ ne Onyankopɔn ahenni ho asɛnka wɔ “Yakob fi” no asase so baabiara. Eyi bae saa titiriw bere a na wɔde Yohane ato afiase afe 30 Y.B. mu akyi no.

48. Wɔ Nasaret hyiadan mu no, Yesaia nkɔmhyɛ bɛn na ɔkan kyerɛɛ Nasaretfo no na dɛn na ɔbɔɔ mmɔden sɛ ɔbɛyɛ wɔ nna a na aka wɔ n’asase so asetra mu no mu?

⁴⁸ Wɔ Nasaret hyiadan mu no ɔkenkanee nkɔmhyɛ a ɛwɔ Yesaia 61:1, 2 no kyerɛɛ Nasaretfo no, sɛ: “Awurade honhom wɔ me so, na enti wasra me sɛ memmɛka asɛmpa menkyerɛ ahiafo, wasoma me sɛ memmɛsa wɔn a wɔn koma abubu ayare, na memmɛka ogye menkyerɛ nnommum ne adehu menkyerɛ anifuraefo, na mommegye wɔn, na memmɛka Awurade anisɔ afirihyia.” Sɛ nea ɔde yɛɛ n’asɛnka asɛmti no, Yesu a wabɔ asu no fii ase kae sɛ: “Ɛnnɛ na kyerɛw asɛm yi abam mo asom.” (Luka 4:16-21) Ɛdenam eyi so no na ɔrema wɔn a na anka wɔyɛ ne kuromfo no anya ntease sɛ na ɔyɛ Nea Yehowa Asra No, Mesia no, Kristo no. Wɔ n’asase so asetra bere a aka nyinaa mu no, ɔbɔɔ mmɔden sɛ ɔbɛyɛ nea na Yehowa honhom a wɔde asra no no ama no kwan anaasɛ asoma no sɛ ɔnyɛ no.

49, 50. (a) So Yesu hyehyɛɛ asraafo bi na ɔnam wɔn so de Israel ahenni no asi hɔ bio anaa? (b) Nkyerɛkyerɛ mu bɛn na Yesu de maa Pilato sɛ ɔyɛ ɔhene nanso ɔmpere ahenni?

⁴⁹ Ne saa nti, wamfa ne ho anhyehyɛ wiase yi mu amammuisɛm mu anaasɛ wanhyehyɛ asraafo kuw bi te sɛ Makabeafo no na wampam Romafo no amfi asase no so na wamfa Dawid ahenni no ansi hɔ bio wɔ Yerusalem. Dɛn nti na wanyɛ saa?

⁵⁰ Ɔkyerɛkyerɛɛ nea enti a wanyɛ saa no mu kyerɛɛ Roma amrado, Pontio Pilato a na n’atamfo nyamesomfo de no akɔma no sɛ onkum no sɛ obi a ɔsɔre tia Roma Ahemman no no. Ɔrebua amrado no asemmisa, “Wone Yudafo hene no anaa?” no, awiei koraa no Yesu kae sɛ: “M’ahenni mfi wi yi ase. Sɛ m’ahenni fi wi yi ase a, anka m’asomfo bɛko na wɔamfa me anhyɛ Yudafo no nsa; na afei m’ahenni mfi ha. Ɛnna Pilato see no sɛ: Na woyɛ ɔhene nen?” Ɔredi nokware no ho adanse nti Yesu buae sɛ: “Woaka; na meyɛ ɔhene.” Yiw, ahenni a ɛnyɛ wiase yi a na Roma Ahemman no yɛ so wiase tumi saa bere no fã no so hene.​—Yoh. 18:33-37.

51, 52. (a) Dɛn na Yesu kyerɛkyerɛɛ ‘n’akyidifo’ sɛ wɔnyɛ? (b) So Yesu ka kyerɛɛ asuafo dumien no ne akyiri yi asɛmpakafo aduɔson no sɛ wonni amammui ho dwuma anaasɛ wɔnyɛ asɛmpaka adwuma, na ɔkwan bɛn so?

⁵¹ Na Yesu asɛm, “m’asomfo,” no gyina hɔ ma hefo? Ɛdɛn, n’asuafo a wonni akode, a asomafo dumien (“wɔn a wɔasoma wɔn”) no ka ho. Eyinom nso ɔkyerɛkyerɛɛ wɔn sɛ wɔntwe wɔn ho mfi wiase yi mu amammuisɛm ne n’akodi ho na wɔmfa wɔn ho nhyɛ Onyankopɔn ahenni a wahyɛ ho bɔ ho asɛmpa a wɔbɛkyerɛkyerɛ na wɔaka akyerɛ asomdwoe mu no mu.

⁵² Bere bi a ɔsomaa asuafo dumien no, wanka ankyerɛ wɔn sɛ wɔnhyehyɛ sum ase amammui kuw bi na wɔmma atuatew nkɔso wɔ Yudafo no mu; mmom ɔkae sɛ: “Na mokɔ a monkɔka sɛ: Ɔsoro ahenni no abɛn! Monsa wɔn a wɔn ho nyɛ wɔn den ayare, momma akwatafo ho mfi, munnyan awufo, muntu adaemone; munyaa no kwa, na momfa mma kwa.” (Mat. 10:1-8) Akyiri yi bere a Yesu somaa asɛmpakafo aduɔsɔn foforo no ɔde akwankyerɛ a ɛte saa ara maa wɔn na ɔkaa nea wɔnka kyerɛɛ wɔn, sɛ: “Na kurow biara a mobɛkɔ mu no, wogye mo a, munni nea wɔde besi mo anim. Na monsa emu ayarefo yare, na munse wɔn sɛ: Onyankopɔn ahenni abɛn mo.”​—Luka 10:1-9.

53, 54. (a) Wɔ ne nkɔmhyɛ a ɛfa ne ba ne nneɛma nhyehyɛe yi awiei ho no, asɛnka adwuma bɛn na Yesu kaa ho asɛm siei? (b) Asɛnka adwuma yi a wɔbɛyɛ no mma wɔn kwan sɛ wɔmfa wɔn ho nhyehyɛ dɛn mu, esiane sɛ wonim sɛ nniso a wɔka ho asɛm no fi he nti?

⁵³ Wɔ Nisan 11 afe 33 Y.B. mu, bere tiaa bi ansa na ɔrewu wɔ Twam Da no, Yesu de ne nkɔmhyɛ soronko a ɛfa ba a ɔbɛba daakye ne nneɛma nhyehyɛe no awiei ho mae. Wɔ ne nkɔmhyɛ no mu no, wammu n’ani angu so sɛ ɔbɛka adwuma soronko a ɛsɛ sɛ n’asomfo, n’asuafo, yɛ no so, efisɛ ɔkae sɛ: “Wɔbɛka ahenni ho asɛmpa yi wiase nyinaa de adi amanaman nyinaa adanse; na ɛno na awiei no bɛba.” (Mat 24:3-14) Ansa na nneɛma nhyehyɛe yi awiei koraa bɛba no, ɛsɛ sɛ n’asuafo yɛ Ahenni asɛnka yi wiase nyinaa: “Na etwa sɛ wɔka asɛmpa no kyerɛ amanaman nyinaa ansa.” (Marko 13:10) Ahenni asɛnka yi a wɔyɛ no asomdwoe mu wɔ aman nyinaa mu no mma wɔn kwan sɛ wɔmfa wɔn ho nhyehyɛ wiase amammuisɛm mu na wɔmfa wɔn ho mmata amanaman ntam akodi ahorow ho.

⁵⁴ Te sɛ wɔn Dikanfo Yesu Kristo no, na wɔbɛka Onyankopɔn Mesia ahenni ho asɛmpa no ara kwa. Wɔamma wɔn kwan ne tumi sɛ wamfa saa ahenni no nsi asase so. Na ɛrenyɛ asase so ahenni; na ‘emfi ha.’ Na ɛyɛ ɔsoro nniso a tumi a ɛso sen nnipa de ka ho a ebedi adesamma nyinaa so. Ɛnde, nyansa mu no, Ɔsorosoroni Nyankopɔn a ɔte soro no nkutoo na obetumi de saa Mesia nniso no asi hɔ de adi wɔn a wɔte asase so nyinaa so.

55. Ɛdefa sra a wɔsraa no no ho dwumadi ne Bible mu nkɔmhyɛ ahorow a ɔbɛma anya mmamu ho no, so wobetumi agye fata a Yesu fata sɛ odi adesamma nyinaa so no ho akyinnye anaa?

⁵⁵ Ɛnde, hena, na ɔwɔ soro anaasɛ asase so, a obetumi aka Mesia no, Kristo no, nea wɔasra no ma wabedi hene wɔ adesamma nyinaa so mfirihyia apem no asase so asetra ho asɛmmɔne? Hena na obetumi akasa atia Mfirihyia Apem Hene a ɔbɛyɛ no ɔkwan pa so te sɛ nea ɔmfata? Obiara ntumi. Ɔreka Yesu Kristo asase so asetra a nkekae nni mu ho asɛm no, ɔsomafo Petro ka kyerɛɛ Roma asraafo ha so panyin Kornelio ne ne nnamfo Amanaman mufo no sɛ: “Munim asɛm a ɛyɛe Yudea nyinaa a efii ase Galilea, asubɔ a Yohane kae no akyi, Yesu a ofi Nasaret: sɛnea Onyankopɔn de honhom kronkron ne tumi sraa no, na okyini yɛɛ yiye na ɔsaa wɔn a ɔbonsam hyɛɛ wɔn so no yare, efisɛ Onyankopɔn ka no ho. Na yɛne nneɛma a ɔyɛe Yudafo asase so ne Yerusalem nyinaa ho adansefo.” (Aso. 10:37-39) Adanse no nyinaa ne sɛ, wɔ asase so no, Yesu Kristo wiee nea na wɔnam sra a wɔsraa no no so somaa no sɛ ɔmmɛyɛ no nyinaa. Ɔmaa Bible nkɔmhyɛ ahorow a ɛfa ne ho no nyinaa nyaa mmamu, de kosii mogya dansefo wu mu mpo.

Ɔfã 6: Onyankopɔn Mfirihyia Apem Ahenni Abɛn

22, 23. (a) Nea ɛne Lewi ɔsɔfo panyin no bɔ abira no, ɔkwan bɛn so na wɔyɛɛ Yesu ɔsɔfo panyin? (b) Sɛnea Hebrifo 7:23-28 kyerɛ no, ɔkwan bɛn so na Yesu sɛ ɔsɔfo panyin no, obetumi agye wɔn a wɔnam no so bɛn Onyankopɔn no korakora?

²² Yuda sɔfo panyin Aaron ne n’adedifo no anyɛ asɔfo denam ntam a Yehowa Nyankopɔn kae so. Nanso wɔyɛɛ Yesu Kristo a na omfi asɔfo abusua biara mu wɔ asase so no ɔsɔfo panyin denam Onyankopɔn ntam so. N’asetra so twae bere tiaa bi denam wu a owui sɛ ɔdesani afɔre a ɛyɛ pɛ no so, nanso, wonyan no kɔɔ ɔsoro asetra a ɔporɔw nni mu mu ma wakɔyɛ daa ɔsɔfo panyin te sɛ Melkisedek. Wɔda nsonsonoe a ɛda ɔno ne Aaron Lewifo asɔfodi no ne n’adedifo ntam no adi wɔ Hebrifo 7:23-28, faako a yɛkenkan sɛ:

²³ “Na wɔn [Aaron mma] de, wɔyɛ asɔfo a wɔdɔɔso, sɛ owu amma wɔantra hɔ ntia; na oyi [Melkisedek a Ɔkyɛn So no] de, sɛ́ ɔte hɔ daa nti, odi sɔfo a wɔnsakra. Enti nso obetumi agye wɔn a wɔnam no so ba Onyankopɔn nkyɛn no koraa, sɛ ɔte ase daa sɛ obedi ama wɔn. Na ɔsɔfo panyin a ɔfata yɛn ne sɛɛ ɔsɔfo panyin yi a ne ho tew, onni bɔne, ne ho nni nkekae, wɔayi no afi nnebɔneyɛfo ho, na wɔama no so akyɛn asoro; ɔno na enhia no daa, sɛ asɔfo mpanyin no, sɛ ɔbɔ n’ankasa bɔne ho afɔre kan ansa na wabɔ ɔman no de; na ɔde ne ho bɔɔ afɔre no, ɔyɛɛ eyi prɛko. Na [Mose] mmara no hyɛ nnipa a wɔyɛ mmerɛw asɔfo mpanyin, na mmara no akyi [bɛboro mfirihyia ahanan no, Onyankopɔn] ntanka no asɛm no hyɛ Ɔba no a wawie ayɛ pɛ daa no sɔfo panyin.”

24. Yesu Kristo yɛ ɔsɔfo panyin wɔ “kronkronbea” bɛn, na bere bɛn a odi sɔfo na ɛsɛ sɛ adesamma da ho ase?

²⁴ Enti asentitiriw a wɔreda no adi wɔ ha no ne nea ɛwɔ he? Wɔada eyi adi wɔ nkyekyem ahorow abien a edidi so no mu (Heb. 8:1, 2) , sɛ: “Na asɛm a yɛreka yi mu titiriw ni: yɛwɔ saa ɔsɔfo panyin a wakɔtra tumi kɛse ahengua no nifa, ɔsoro, sɛ kronkronbea no ne nokware ntamadan a Awurade ankasa na ɛnyɛ onipa pamee no mu sɔfo.” So ɛnsɛ sɛ adesamma da Onyankopɔn ase sɛ wobenya Ɔsɔfo Panyin a ɔte saa a ɔbɛn Onyankopɔn na ɔbɛsrɛ ama wɔn wɔ mfirihyia apem dwumadi no mu bere a wɔde Satan Ɔbonsam ne n’adaemone no begu bun mu no? Yiw! Nokwarem no, Onyankopɔn nsiesie a ɛte saa de nea eye ankasa bɛma adesamma.

25. Dɛn nti na Yesu ansom sɛ ɔsɔfo panyin wɔ Yerusalem asɔrefi, na dɛn na na Yerusalem asɔredan no yɛ ne nsɛso?

²⁵ Bere a na ɔwɔ asase so sɛ onipa a ɔyɛ pɛ no, Yesu Kristo ansom sɛ odwumayɛni wɔ asɔrefi a na ɛwɔ Yerusalem no mu. Mose mmara no amma no kwan sɛ ɔnyɛ saa, efisɛ, na ɔnyɛ Lewini anaasɛ na omfi Aaron asɔfo abusua no mu. Nanso ɔsomee wɔ gyinabea bi a ɛkorɔn na ɛyɛ kronkron mu, wɔ asɔrefi bi a ɛkorɔn na ɛyɛ titiriw a wɔnnam nnipa te sɛ Ɔhene Herode Ɔkɛseɛ anaasɛ Amrado Serubabel anaa Ɔhene Salomo so sii wɔ Yerusalem no mu. Na asɔredan ahorow a nnipa sii, te sɛ ahyiae ntamadan kronkron a Mose sii no yɛ nhwɛso bi ara kwa. (Ex. 40:1-33) Kyerɛwtohɔ biara nni hɔ a ɛkyerɛ sɛ Ɔhene Melkisedek sii asɔredan wɔ Salem, na ná ohia ɔdan bi a ɛte saa ma ɔde asom sɛ “Ɔsorosoroni Nyankopɔn no sɔfo.” Enti, wontumi mfa biribiara a ɛte saa a ɛfa Melkisedek ho nni dwuma sɛ nsɛso. Nanso Melkisedek a Ɔkyɛn So, Yesu Kristo, somee sɛ ɔsɔfo Panyin wɔ sɛnkyerɛnne kwan so kronkronbea ne asɔredan a ɛne, “kronkronbea ne nokware ntamadan a Awurade pamee” no mu.

NOKWARE ASƆREDAN NO

26, 27. (a) Wɔkyekyɛe ntamadan kronkron no ne Yerusalem asɔredan no mu ahe? (b) Nneɛma bɛn na na ɛwɔ ntamadan no ne Salomo asɔredan no pia biara mu?

²⁶ Na ntamadan kronkron a Mose sii wɔ Bepɔw Sinai so ne asɔredan ahorow a ɛwɔ Yerusalem no wɔ mpia abien, wɔfrɛ pia a edi kan no Kronkronbea, na wɔfrɛ nea ɛto so abien no Kronkron mu Kronkronbea, nea ɛyɛ Kronkron sen biara.

²⁷ Nneɛma a na ɛwɔ Kronkronbea hɔ no ne sika pon a wɔde abodoo a wɔfrɛ no “kyerɛ abodoo” gu so no, ne sika kaneadua a nsa ason tuatua ho a akanea sisi so ne sika aduhuamhyew muka no. Ɛdenam nkanea a esisi kaneadua no so no hann so no, na ɔsɔfo panyin no tumi hyehyɛ kyerɛ abodoo no na ɔhyew aduhuam wɔ muka no so wɔ ha. Nanso wɔ ntamadan a Mose sii ne asɔredan a Salomo sii no Kronkron mu Kronkronbea hɔ no, na sika Apam Adaka kronkron no ne ne sika mmuaso a sika kerubim abien sisi so a wɔhwɛ wɔn ho anim a wɔatrɛtrɛw wɔn ntaban mu no wɔ hɔ. Na anwonwa kwan so hann a wɔfrɛ no Sekina Kanea a na ɛwɔ kerubim abien no ntam no ma Kronkron mu Kronkronbea hɔ yɛ hann.

28. Ɔkwan bɛn so na Yuda ɔsɔfo panyin no siesiee ne ho maa mpata afɔre horow no mogya a wɔpete wɔ Kronkron mu Kronkronbea hɔ, enti hefo bɔne na ɔpata mae?

²⁸ Ansa na ɔde mpata afɔre mogya no bɛma pɛnkoro afe biara wɔ Mpata Da no, ná ɔsɔfo panyin a ofi Aaron abusua mu no fa aduhuamhyew ade ketewa bi kura ne nsam na ɔtra mmɔhɔɔ a etwa pia a edi kan ne nea ɛto so abien no ntam no kɔ akyi, na ɔhyew aduhuam no wɔ Apam Adaka no anim wɔ Sekina Kanea no hann mu. Ná eyi bue kwan ma no ma ɔde mpata afɔre abien no mogya san ba akyiri yi, na ɔde eyi apete Apam Adaka no Mmɔborohunu Agua no so. Saa kwan yi so no, ɔpata maa n’ankasa ho ne ne Lewifo abusua no, ne afei Israel man no bɔne. Na eyi ne ɔkwan a wɔfa so pata ma, sɛnea na wɔada no adi wɔ Mose Mmara apam no mu no.​—Heb. 9:1-10; Num. 7:89.

29. (a) Bere bɛn na wobuee ntamadan a Mose sii no ano, na bere bɛn na wobuee Salomo asɔredan no nso ano? (b) Bere bɛn na wɔde nokware ntamadan anaasɛ asɔredan no bae?

²⁹ Mose sii ahyiae ntamadan kronkron no wɔ Sinai sare so fefɛw bere, Nisan da a edi kan, afe 1512 A.Y.B. mu. Ɔhene Salomo wiee n’asɔredan no wɔ Yerusalem afe 1027 A.Y.B. mu, na ɛno akyi ohyiraa so ofupɛ bere Tishri da a ɛto so dunnum afe 1026 A.Y.B. mu. (1 Ahe. 8:1, 2, 65, 66) Nanso bere bɛn na sɛnkyerɛnne kwan so ntamadan anaasɛ asɔredan, “nokware ntamadan” no ne ne “kronkronbea” no bae? Ɛyɛ bere a na asɔredan ankasa a Ɔhene Herode Ɔkɛseɛ no sii no da so ara si Yerusalem no. Ná ɛyɛ fefɛw bere mfiase wɔ afe 29 Yɛn Bere mu. Ɔkwan bɛn so na na eyi te saa? Dɛn na ɛbae saa bere no ma nokware asɔredan ho behiae?

30, 31. (a) Bere bɛn, ne ɔkwan bɛn so na sɛnkyerɛnne kwan so Ɔsɔfo Panyin no bae? (b) Sɛnkyerɛnne kwan so da a woyi bɔne fi hɔ bɛn na efii ase saa bere no, na nea Yesu de mae ne nea Aaron de mae no te dɛn?

³⁰ Wɔ afe 29 Y.B. mu no, sɛnkyerɛnne kwan so Ɔsɔfo Panyin no puei, na te sɛ Lewi ɔsɔfo panyin Aaron no, na ɛsɛ sɛ onya ntamadan a obedi dwuma wɔ mu. Sɛnkyerɛnne kwan so Ɔsɔfo Panyin a ɔbɔ afɔre yi ne Awurade Yesu a wɔde Onyankopɔn honhom kronkron sraa no ma wabɛyɛ honhom mu ɔsɔfo panyin no. Honhom kronkron a wɔde sraa no yi bae bere a Osuboni Yohane bɔɔ no asu wɔ Yordan Asubɔnten no mu no akyi. Enti, yɛ a ɔbɛyɛɛ Mesia anaasɛ Nea Wɔasra No bere a odii mfe aduasa no bae mfe abiɛsa ne fã ansa na n’afɔrebɔ wu ma adesamma bɔne no reba. (Dan. 9:24, 25, 27; Luka 3:21-23) Saa bere yi no, sɛnkyerɛnne kwan so Mpata Da kɛse no fii ase, na Yesu nyaa biribi a eye sen nea Ɔsɔfo Panyin Aaron nyae wɔ mpata da no ankasa wɔ afe 1512 A.Y.B. mu hɔ, bere a na wɔde ntamadan anaasɛ trabea kronkron no asi hɔ no. Ná eyi yɛ dɛn? Wɔ Hebrifo 8:3-6 ne 9:11-14 no, wɔka kyerɛ yɛn sɛ:

³¹ “Ɔsɔfo panyin biara, wɔhyɛ no sɛ ɔmfa ayɛyɛde ne afɔre mma, enti ɛsɛ sɛ oyi nso nya biribi a ɔde bɛma. Na sɛ ɔwɔ asase so de a, anka ɔnyɛ ɔsɔfo mpo, efisɛ ɔsɔfo a ɔde ayɛyɛde ma, sɛnea mmara no te no, wɔ hɔ dedaw; wɔn a wɔsom ɔsoro nneɛma nhwɛso ne sunsuma, sɛ asɛm a Mose rebesiesie ntamadan no, ɛbaa ne nkyɛn no, na ose: Hwɛ ade nyinaa sɛnea nsusuwso a wɔkyerɛɛ wo bepɔw no so no te. Na afei ne nsa aka asɔfodwuma a ɛkyɛn so, sɛ wayɛ apam a ɛkyɛn so a wogyina bɔhyɛ a ɛkyɛn so so hyɛɛ ho mmara no ntamgyinafo.”

32. Sɛnea Aaron de no yɛɛ ho mfonini no, dɛn mu na Yesu Kristo hyɛnee, na dɛn na ɔde kɔɔ hɔ a ɛhohoro yɛn ahonim ho fi nnwuma funu ho?

³² “Nanso, Kristo a ɔbae sɛ nnepa a ɛrebɛba no ho sɔfo panyin, nam ntamadan a ɛso na ɛyɛ pɛ kyɛn so a wɔamfa nsa ansi, ɛne sɛ, emfi adebɔ yi mu mu, nanso ɛnyɛ mpapo ne anantwi mma mogya, na n’ankasa ne mogya so na ɔnam kɔɔ kronkron mu [nea na ɛte sɛ ntamadan no mu kronkron mu Kronkronbea no] prɛko konyaa daa ogye. Na sɛ anantwinini ne mpapo mogya ne anantwibere nso a wɔde dwira wɔn a wɔn ho agu fi, tew wɔn ho kɔɔ honam ahofi mu a: mpɛn ahe ara na Kristo a ɔnam daa honhom so de ne ho bɔɔ afɔre a ɛho nni dɛm maa Onyankopɔn no mogya rentew mo ahonim ho mfi nnwuma funu mu nkɔsom Onyankopɔn a ɔte ase?”

33, 34. (a) Ɛdenam asu a ɔbɔe wɔ Yordan Asubɔnten no mu so no, dɛn na Yesu yɛɛ ho sɛnkyerɛnne? (b) Dɛn na na Onyankopɔn asiesie ama onipa Yesu, na dɛn nti na ɔde bɔɔ afɔre, na ɔyɛɛ no mpɛn ahe?

³³ Enti, bere a onipa a ɔyɛ pɛ, Yesu, bɛyɛɛ Onyankopɔn Sɔfo Panyin a wɔasra no wɔ ne nsu mu asubɔ no akyi no, dɛn na na ɛsɛ sɛ ɔde bɔ afɔre ma Onyankopɔn? Na ɛnyɛ aboa a ɔba fam sen ɔdesani no mogya a na entumi mpopa onipa bɔne mfi hɔ da no, na mmom n’ankasa ne nipadua a ɛyɛ pɛ, a ɔnam ɔbaabun Maria awo so nyae no. Ohui sɛ na Ade Nyinaa so Tumfoɔ Nyankopɔn asiesie no ma wafata ama afɔrebɔ adwuma yi. Enti, bere a ɔbaa Osuboni Yohane nkyɛn ma wabɔ no asu wɔ Yordan Asubɔnten no mu no, ɔde ne ho bɛmaa Onyankopɔn sɛ efi hɔ rekɔ no ɔbɛyɛ ɔsoro apɛde no. Ne nsu mu asubɔ no yɛɛ ne ho a na ɔde rema sɛ ɔbɛyɛ Onyankopɔn apɛde akodu afɔrebɔ wu mpo mu ho sɛnkyerɛnne. Ɛdefa eyi ho no, Hebrifo 10:4-10 ka sɛ:

³⁴ “Anantwinini ne mpapo mogya ntumi nyi bɔne. Enti, ɔba wiase no, ɔka sɛ: ‘Afɔre ne ayɛyɛde, woampɛ, ɔhonam na woasiesie de ama me. Ɛno na mekae sɛ: Hwɛ, mereba (wɔakyerɛw me ho asɛm wɔ nhoma mmobɔwee no mu) sɛ merebɛyɛ nea wo, Nyankopɔn, wopɛ.’ Kan no ɔka sɛ: ‘Afɔre ne ayɛyɛde ne ɔhyew afɔre ne bɔne ho afɔrebɔ, woampɛ, nanso ansɔ wo ani,’ ɛne nea wɔnam mmara so de ma; ɛno na ɔka sɛ: ‘Hwɛ, mereba sɛ merebɛyɛ nea wo, Nyankopɔn, wopɛ;’ oyi nea edi kan, na ɔde nea ɛto so abien no asi hɔ. Saa ɔpɛ no so na wɔnam Yesu Kristo honam a ɔde bɛmae no so atew yɛn ho prɛko.”

35. (a) Wɔ Mpata Da no ankasa so no, dɛn na wɔde dii dwuma wɔ afɔremuka no so, na dɛn na wɔde mae wɔ hɔ? (b) Na dɛn ne sɛnkyerɛnne kwan so “afɔremuka” a Yesu de ne ho bɛma wɔ so no?

³⁵ Wɔ tete mpata da no so no, ɔsɔfo panyin Aaron de mmoa a wɔakum wɔn no mogya no bi pẽtee afɔremuka no so na afei nso ɔhyew mmoa a wɔakum wɔn no srade wɔ afɔremuka a na ɛwɔ adiwo hɔ wɔ ahyiae ntamadan kronkron no anim no so. (Lev. 16:16-19, 25) Ɛnde, na dɛn ne sɛnkyerɛnne kwan so “afɔremuka” a Yesu Kristo, sɛ́ honhom mu ɔsɔfo panyin no, bɔɔ ɔdesani afɔre a ɛyɛ pɛ no wɔ so no? Ná ɛnyɛ honam fam afɔremuka te sɛ kɔbere afɔremuka a na ɛwɔ ahyiae ntamadan no adiwo hɔ no. Na ɛnyɛ asɛndua a ɔsɛn so wɔ Kalvary kosi sɛ owui no, efisɛ na saa dua no yɛ ade a wɔadome no, na na wɔmfaa ne mogya a ɛsom bo no ntew ho. (Deut. 21:22, 23; Gal. 3:13) Mmom no, na ɛyɛ honhom mu ade a na Yesu Kristo betumi de ne desani nipadua a ɛte ase a ɛyɛ pɛ no bo a ɛsom no ama wɔ so. Na ɛyɛ Onyankopɔn “pɛ.” “Apɛde” a ɔbɛyɛ yi nti na ɔde ne ho bɛmae. Afei de na ɛyɛ Onyankopɔn pɛ sɛ obegye ɔdesani afɔre mmom asen mmoa a wokum wɔn afɔre. Enti, ɛdenam Onyankopɔn “pɛ” yi so no, Yesu de ne desani nkwa no bo a ɛsom mae.

36. Hefo na wɔama wɔn kwan sɛ wonnidi honhom mu “afɔremuka” no so, na dɛn na ebefi mu aba ama wɔn ankasa?

³⁶ Enti sɛnkyerɛnne kwan so “afɔremuka” no bae, nea Hebrifo 13:10 ka ho asɛm kyerɛ Kristofo a wɔasra wɔn no: “Yɛwɔ afɔremuka a wɔn a wɔsom ntamadan no mu no nni ho kwan sɛ wodi ho biribi.” Enti, hwɛ ɔhonam fam adwene a ɛyɛ ne ade a ennyina Kyerɛwnsɛm so ma Kristoman mu asɔfo bi sɛ wobesi honam fam “afɔremuka” wɔ wɔn asɔredan ahorow anaasɛ beae foforo a wɔsom wɔ hɔ na wɔaka sɛ wɔbɔ Kristo afɔre wɔ so mpɛn pii, sɛnea wɔyɛ bere a wɔbɔ “Mass” no! Wɔn a wɔwɔ hokwan sɛ wodidi nokware honhom mu “afɔremuka” no so no, ‘wɔnam Yesu Kristo honam a ɔde bɛmae no so atew wɔn ho prɛko.’

37. (a) Nea ɛka honhom fam “afɔremuka” no ho no, dɛn na ɛbae, sɛnea tete ntamadan no yɛɛ ho mfonini no? (b) Wɔ Yesu fam no, dɛn na adiwo no yɛɛ ho mfonini?

³⁷ Sɛnea na tete kɔbere afɔremuka no si adiwo no mfinimfini wɔ ahyiae ntamadan kronkron no anim no, saa nso na wohuu sɛnkyerɛnne kwan so “afɔremuka” no wɔ sɛnkyerɛnne kwan so “adiwo” hɔ. Eyi nnyina hɔ mma kurow anaa beae bi, na mmom egyina hɔ ma onipa tebea wɔ asase so. Na Yesu Kristo, Ɔsɔfo Panyin a wɔasra no no, wɔ saa sɛnkyerɛnne kwan so adiwo hɔ efisɛ, ná ɔwɔ onipa tebea mu sɛ abɔde a ɔyɛ pɛ. Enti na tebea ankasa a ɔwɔ mu wɔ asase so no yɛ trenee, nea bɔne nni ho, nea nkekae nni mu. Te sɛ Lewini Kora mmabarima no, onyaa atrae maa n’ankasa ho wɔ afɔremuka no ho na wayɛ Yehowa apɛde wɔ Yehowa Nyankopɔn nokware “trabea” a ɛwɔ adiwo hɔ no. (Dw. 84:1-3) N’ani gyee ho sɛ ɔbɛyɛ Onyankopɔn apɛde.​—Dw. 40:8.

38, 39. (a) Dɛn bio na ɛkaa sɛnkyerɛnne kwan so adiwo no ne afɔremuka no ho bae? (b) Asemmisa bɛn na eyi ma ɛsɔre, na Yesu asɛm bɛn na ɛkyerɛ faako a Onyankopɔn wɔ?

³⁸ Ɛnyɛ sɛnkyerɛnne kwan so afɔremuka ne adiwo no nko na ɛbae ma abɛyɛ atrae ama Ɔsɔfo Panyin Yesu a wɔasra no no, na mmom sɛnkyerɛnne kwan so ntamadan anaasɛ asɔredan no nso bae. Efi hɔ rekɔ no, na ‘nokware ntamadan a Yehowa pamee’ no yɛ nhyehyɛe ma honhom mu Ɔsɔfo Panyin foforo no.

³⁹ Dɛn ne saa “nokware ntamadan” anaasɛ asɔredan no? So ɛyɛ ɔdan titiriw foforo bi a Ɔbɔadeɛ no asi ama n’ankasa ho wɔ ɔsoro a aniwa nhu hɔ no? Dabi, efisɛ Onyankopɔn nhia ade a ɛte saa. Ɔsorosoroni Nyankopɔn no wɔ baabi a ɔte daa wɔ ɔsoro. Ɔnyɛ honhom abɔde bi ara kwa a ɔwɔ baabiara wɔ bere biara mu. Sɛ́ ɔyɛ Onipa a onim nyansa no, ɔwɔ n’atrae, baabi a ɔte a wobetumi abɛn no. Yesu Kristo kyerɛɛ n’asuafo sɛ wɔmmɔ mpae sɛ: “Yɛn Agya a wowɔ soro, wo din ho ntew.” Ɔbɔɔ yɛn kɔkɔ wɔ “nkumaa” a wogye no di no mu biako a yebebu wɔn abomfiaa no ho na ɔkyerɛkyerɛɛ nea enti no mu sɛ: “Na mise mo sɛ ɔsoro no, wɔn abɔfo hwɛ m’agya a ɔwɔ soro no anim daa.” (Mat. 6:9; 18:10) Ɛno kyerɛ sɛ, saa ɔsoro abɔfo no tumi bɛn ɔsoro Agya no.

40. Ɛdefa ne soro atrae ho no, dɛn na na Onyankopɔn betumi ayɛ na wɔatumi de atoto “ntamadan” kronkron no Kronkron mu Kronkronbea no ho?

⁴⁰ Nanso, Ade Nyinaa so Tumfoɔ Nyankopɔn no betumi asakra nhyehyɛe a ɛwɔ baabi pɔtee a ɔte no. Enti bere a ɔwoo ne honhom mu Ɔsɔfo Panyin, Yesu Kristo, bere a wɔbɔɔ no asu ara pɛ no, ná Onyankopɔn betumi ama ne soro atrae no aba tebea foforo mu anaasɛ anya nhyehyɛe ahorow foforo, esiane adesamma a wɔwɔ bɔne mu nti (na ɛnyɛ abɔfo a bɔne nni wɔn ho no nti) . Kronkron a ne soro atrae no yɛ boroo adesamma bɔne so. N’ankasa n’atrae no bɛdaa adi sɛ Onyankopɔn a ɔyɛ trenee nanso ɔyɛ mmɔborohunufo ma enti obegye afɔre a ɛfata na ɛyɛ pɛ a wɔbɔ ma adesamma no atom no atrae a ɛyɛ kronkron. Nanso na ɔsɔfo Panyin a bɔne nni ne ho a ɔyɛ kronkron na ɔwɔ Onyankopɔn anim dom na ɛsɛ sɛ ɔde afɔre yi ne ɛbo a ɛsom no ma. Enti ne soro ahengua no bɛyɛ bɔne ho mpata agua. Saa kwan yi so no, Onyankopɔn maa ne soro atrae no faa Kronkron mu Kronkronbea a na ɛwɔ ntamadan anaasɛ asɔredan no mu no honhom fam su horow no.

41, 42. (a) Dɛn na wɔmaa Aaron kwan sɛ obetumi ahyɛn mu ‘pɛnkorɔ wɔ afe mu,’ na ɔkwan bɛn so? (b) Dɛn ne Kronkron mu Kronkronbea a Yesu Kristo hyɛn mu no, wɔ bere bɛn mu, na mpɛn ahe?

⁴¹ Eyi ne nea Bible no ka. Yɛkae sɛ ɔsɔfo panyin Aaron faa mpata da afɔrebɔde ahorow no mogya no kɔɔ Kronkron mu Kronkronbea a na ɛwɔ asase so ahyiae ntamadan no mu no mu, na ɔkɔɔ mmɔhɔɔ no akyi na wakɔyɛ saa. (Lev. 16:12-17; Heb. 9:7) Sɛnea ɛbɛyɛ na wama ne nsusuwso no abam ankasa no, na ɛsɛ sɛ Ɔsɔfo Panyin, Yesu Kristo, hyɛn Kronkron mu Kronkronbea hɔ. Ɛhe na Bible no kyerɛ sɛ ɛwɔ, na ɛyɛ dɛn?

⁴² Tie: “Ɛnde na etwa sɛ wɔde eyinom tew ɔsoro nneɛma no nhwɛso ho; na ɔsoro nneɛma no ankasa, wɔde afɔre a eye kyɛn eyinom na ɛtew ho. Na Kristo anhyɛn kronkronbea a wɔde nsa yɛe a ɛyɛ nokware [kronkronbea] no ho sɛnkyerɛnne no mu, na mmom ɔhyɛn ɔsoro ankasa, sɛ afei okoyi ne ho adi Onyankopɔn anim ama yɛn; nanso wanhyɛn hɔ sɛ ɔde ne ho bɛbɔ afɔre mpɛn pii, sɛnea ɔsɔfo panyin de obi mogya hyɛn kronkronbea daa afirihyia no; anka ɛsɛ no [Yesu] sɛ ɔtaa hu amane fi wiase asefi, na afei a wiase mmere [ankasa] rewie du yi wayi ne ho adi prɛko sɛ ɔnam ne ho afɔrebɔ so beyi bɔne.”​—Heb. 9:23-26.

43, 44. (a) Ɛnde ɛdefa n’asɔredan ho no, dɛn ne Onyankopɔn atrae kronkron no? (b) Dɛn na etwaa Kronkronbea no ne Kronkron mu Kronkronbea no ntam, na ɔkwan bɛn so na Yesu faa eyi mu wɔ sɛnkyerɛnne kwan so de no mu?

⁴³ Sɛ anka ɔbɛma sɛnkyerɛnne kwan so Mpata Da no aba awiei denam hyɛn a ɔbɛhyɛn “kronkronbea” ankasa mu wɔ ntamadan anaasɛ asɔredan mu so no, Ɔsɔfo Panyin Yesu Kristo hyɛn “ɔsoro ankasa” faako a “Onyankopɔn ankasa wɔ.” Baabi a Onyankopɔn ankasa te wɔ ɔsoro yi yɛ nokware Kronkron mu Kronkronbea, Nea ɛyɛ Kronkron sen biara.

⁴⁴ Wɔ asase so ntamadan no ankasa mu no, wɔde mmɔhɔɔ kataa Kronkron mu Kronkronbea no anim, na enti na Kronkron mu Kronkronbea no wɔ mmɔhɔɔ no mu. Enti saa mmɔhɔɔ no gyinaa hɔ maa ɔdesani honam ‘a ɛsɛ sɛ wofi mu na ama obi atwam afi ɔdesani asetra wɔ asase so no mu akɔ honhom mu asetra mu no. Ɛdenam ne wu ne ne wusɔre so no, Yesu Kristo twaam sɛnea ɛbɛyɛ na wakɔhyɛn ɔsoro Kronkron mu Kronkronbea hɔ. Eyi na wɔkyerɛ wɔ Hebrifo 6:19, 20, faako a, bere a wɔaka 144,000 akyidifo anokwafo no anidaso ho asɛm akyi no, ɛka sɛ: “Ɛno na yɛwɔ sɛ yɛn kra sɛkyɛ a ɛntew na etim hɔ a ɛhyɛn mu de kosi mmɔhɔɔ no mu, nea dikanfo bi hyɛn hɔ maa yɛn no, ɔne Yesu a wayɛ Melkisedek akwan so daa sɔfo panyin.” Anidaso a wɔato no sɛkyɛ a ɛwɔ “mmɔhɔɔ no mu” no yɛ ɔsoro de.

ONYANKOPƆN HONHOM MU ASƆREDAN “KRONKRONBEA NO”

45. (a) Dɛn bio na na ɛwɔ “ntamadan” no mu ka Kronkron mu Kronkronbea no ho? (b) Henanom na na wɔkɔ Kronkronbea hɔ, mpɛn ahe na ɔkwan bɛn so?

⁴⁵ Mommma yemmmu yɛn ani ngu nokwasɛm a ɛyɛ sɛ na ɛnyɛ nea ɛwɔ asase so ntamadan anaasɛ asɔredan no mu nyinaa ne Kronkron mu Kronkronbea no so. Ne Kronkron mu Kronkronbea no akyi no, na ntamadan anaasɛ asɔredan no wɔ ɔdan a wosi mu kan wɔ mmɔhɔɔ a etwa mu no anim. Na wɔfrɛ saa pia yi Kronkronbea. (Heb. 9:1-3) Esiane sɛ Kronkron mu Kronkronbea no yɛɛ “ɔsoro ankasa,” faako a “Onyankopɔn ankasa” wɔ no ho mfonini nti, dɛn na Kronkronbea a ɛwɔ mmɔhɔɔ anaasɛ nkataanim no anim no gyinaa hɔ mae? Bere a na ɔsɔfo panyin no nkutoo na otumi kɔ Kronkron mu Kronkronbea hɔ “daa afirihyia” wɔ mpata da no so no, ná wotumi kɔ Kronkronbea hɔ daa, na ɛnyɛ ɔsɔfo panyin no nko, na mmom asɔfo nkumaa no nyinaa nso. Na asɔfo no fa adiwo hɔ, faako a na afɔremuka no wɔ hɔ tẽe kɔ Kronkronbea hɔ; nanso na ɛsɛ sɛ wɔfa nkataanim a etwa Kronkronbea ne adiwo no ntam no mu.

46, 47. (a) Bere bɛn na Yesu hyɛn nsɛso kwan so Kronkronbea hɔ, na ɔkwan bɛn so? (b) Enti dɛn na Kronkronbea no gyina hɔ ma, na hokwan ahorow bɛn na nsɛso kwan so asɔfo no nya wɔ mu?

⁴⁶ Enti Kronkronbea no gyinaa hɔ maa tebea a ɛyɛ kronkron kyɛn adiwo no. Sɛnea wɔde biribi twaa Kronkronbea no anim na wɔn a wɔwɔ adiwo hɔ no nhu nneɛma a ɛwɔ hɔ nti, Kronkronbea no yɛɛ honhom mu tebea bi a ɛkorɔn sen nea adiwo a ɛyɛɛ ɔdesani tebea a ɛwɔ trenee gyinabea wɔ Onyankopɔn anim ho mfonini no ho mfonini. Yesu Kristo hyɛnee tebea a Kronkronbea no yɛɛ ho mfonini no mu bere a wɔnam Onyankopɔn honhom kronkron so woo no n’asubɔ akyi, na enti ɔbɛyɛɛ Onyankopɔn honhom mu Ba no. (Mat. 3:13-17) Ɛdenam Onyankopɔn honhom a wɔde sraa no nso so no, sɛ́ Onyankopɔn honhom mu Ba no, wɔde asɔfo dwumadi hyɛɛ Yesu nsa; ɔbɛyɛɛ Onyankopɔn Sɔfo Panyin, sɛnea Ɔsɔfo Panyin Aaron yɛɛ ho mfonini no.

⁴⁷ Eyi nti, wobetumi ahu sɛ, Kronkronbea no gyinaa hɔ maa wɔn a wɔde wɔn aba honhom mu asɔfodi yi mu no honhom fam tebea. Wɔ saa tebea no mu no, honhom mu asɔfo a wɔwɔ asase so yi hu honhom fam hann te sɛ nea sika kaneadua no de ma, wodi honhom fam aduan te sɛ nea efi sika pon a kyerɛ abodoo gu so no so, na wɔde mpaebɔ ne ɔsom a wɔde ma Onyankopɔn ho aduhuam ma te sɛ nea wogyina sika aduhuam afɔremuka bi anim no.​—Ex. 40:4, 5, 22-28.

48. Bere tenten bɛn na na Yesu wɔ tebea a Kronkronbea no yɛɛ ho mfonini no mu, na dɛn nti na n’asuafo no annya ne ho ntease a emu da hɔ?

⁴⁸ Sɛ yebu akontaa fi n’asubɔ da so ne honhom kronkron a wɔde sraa no no so de besi ne wu da so (efi 29 Y.B. besi 33 Y.B.) a, na Yesu Kristo wɔ honhom mu asɔfodi awo tebea a Kronkronbea no yɛɛ ho mfonini no mu mfirihyia abiɛsa ne fã. Na nnipa a wɔwɔ honam mu ara kwa no rente ne nnwuma wɔ tebea yi mu no ase na wɔrennya ho anisɔ, mpo n’akyidifo anokwafo no, efisɛ wofi ɔdesani honam fam gyinabea mu hwɛɛ nneɛma. Ná Pentekoste Afahyɛ da no wɔ afe 33 Y.B. mu ne honhom kronkron a wohwie gui, no nnya nnui ɛ. (Yoh. 7:39) Biribi sii wɔn ntease kwan te sɛ “nkataanim a ɛsɛn trabea no kwan ano,” a ɛde nneɛma a na ɛwɔ Kronkronbea hɔ hintawee no.​—Ex. 40:28, 29.

49. Ɔkwan bɛn so na wosiw Yesu a na ɔwɔ sɛnkyerɛnne kwan so Kronkronbea hɔ no kwan wɔ ɔsoro Kronkron mu Kronkronbea hɔ a ɔbɛkɔ no ho?

⁴⁹ Wɔ Kronkronbea no tebea no mu, honhom mu asɔfodi no awo tebea mu no, wosiw Ɔsɔfo Panyin Yesu Kristo a na ɔwɔ asase so no kwan fii Onyankopɔn a na ɔbɛbɛn no tẽe no ho, esiane sɛ na ɔda so ara wɔ ɔhonam mu sɛ ɔdesani abɔde a ɔyɛ pɛ nti. Ná saa sɛnkyerɛnne kwan so “mmɔhɔɔ” a etwa ɔne ɔsoro Kronkron mu Kronkronbea ntam no wɔ hɔ, te sɛ bere a Mose “sii ntwamu mmɔhɔɔ no, na ɔde kataa adanse adaka no ano” no ara pɛ.​—Ex. 40:21.

50. (a) Bere bɛn na Yesu Kristo faa “mmɔhɔɔ” no mu, na ɔkwan bɛn so? (b) Ntam a ɛfa asɔfodi ho bɛn na efii ase dii dwuma wɔ Yesu ho saa bere no, na dɛn ntia?

⁵⁰ Sɛ ɔsɔfo Panyin no, Yesu Kristo twaam wɔ sɛnkyerɛnne kwan so “nokware ntamadan” no mmɔhɔɔ no ho Nisan 16 afe 33 Y.B. mu, denam awufo mu a wɔma ɔsɔre fii so, a ɔnyɛ nea wɔde honhom awo no na onni honam mu bio ara kwa, na mmom sɛ nea afei de wɔawo no koraa sɛ Onyankopɔn honhom mu Ba wɔ honhom mu asetra mu. Ɔsomafo Petro ka no pefee bere a ɔkyerɛw sɛ: “Efisɛ Kristo nso huu bɔne ho amane prɛko, nea ɔteɛ hu maa wɔn a wɔnteɛ, sɛ ɔde yɛn bɛkɔ Onyankopɔn nkyɛn; wokum no honam mu, na wɔma ɔtraa ase honhom mu.” (1 Pet. 3:18) Saa da no so no, Onyankopɔn ntam a ɛfa daa asɔfodi wɔ “Melkisedek akwan so” no dii dwuma wɔ Yesu Kristo ho, afei a ná wɔde ‘nkwa a owu nnim ahoɔden’ akatua ama no no. (Heb. 7:16, 24; Aso. 13:33-37; Rom. 1:1-4) Ɔmaa n’asuafo anokwafo no huu no denam ɔkwan titiriw a ɔfaa so yii ne ho adi kyerɛe wɔ adaduanan a edi hɔ no so akyi no, otu kɔɔ soro na ɔde ɛbo a ne desani afɔre a ɛyɛ pɛ no som no kɔmaa Onyankopɔn ankasa wɔ nokware Kronkron mu Kronkronbea hɔ.​—Aso. 1:1-11; Heb. 9:24.

51. (a) Bere bɛn na sɛnkyerɛnne kwan so Mpata Da no baa awiei, na na atra hɔ bere tenten ahe? (b) Ɔkwan bɛn so na wɔma ɛdaa adi sɛ wɔagye ɛbo a Yesu afɔre no som atom wɔ Kronkron mu Kronkronbea hɔ?

⁵¹ Ɛdenam ma a wɔde saa Kristo afɔre no bo a ɛsom kɔmae wɔ ɔsoro Kronkron mu Kronkronbea no so no, sɛnkyerɛnne kwan so Mpata Da kɛse no baa awiei. Wɔ ɔsɔfo Panyin Aaron a na ofi Lewi abusua mu no fam no, na ɔman no mpata da no yɛ da a ne tenten yɛ nnɔnhwerew aduonu anan pɛ. Nanso, wɔ Ɔsɔfo Panyin Yesu Kristo fam de, sɛnkyerɛnne kwan so Mpata Da bere no bɛyɛɛ mfirihyia abiɛsa ne asram awotwe. Yesu foro kɔɔ soro dadu akyi no, wɔdaa no adi kyerɛɛ n’asuafo anokwafo a na wɔwɔ asase so no sɛ Onyankopɔn agye ɛbo a ne desani afɔre a ɛyɛ pɛ no som a ɔde akɔma wɔ ɔsoro Kronkron mu Kronkronbea hɔ no atom. Ɔkwan bɛn so? Ɛdenam honhom kronkron no a wohwie guu wɔn so wɔ Yerusalem, Kwasida Sivan 6, Adapɛn Afahyɛ da anaasɛ Pentekoste da, wɔ afe 33 Y.B. mu no so. (Aso. 2:1-36) Eyi hyɛ biribi foforo a ɛfa “nokware ntamadan a Awurade ankasa pamee” no agyirae. Yebehu eyi afei.

HONHOM MU ASƆFO NKUMAA

52. (a) Ɔkwan bɛn so na wɔyɛɛ ho mfonini sɛ Melkisedek a Ɔso Kyɛn So no wɔ asɔfo nkumaa? (b) Bere bɛn na wɔde Aaron asɔfodi no sii hɔ, na “abɔnim kronkron” bɛn na wɔde bɔɔ Aaron ti?

⁵² Kyerɛwtohɔ biara nni hɔ sɛ na tete Salem ɔhene Sɔfo Melkisedek wɔ asɔfo nkumaa bi. Nanso, Onyankopɔn Ba a wabɛyɛ “Melkisedek akwan so sɔfo panyin” no wɔ asɔfo nkumaa. (Heb. 5:8-10) Wɔnam Lewini Aaron asɔfo abusua no so yɛɛ eyi ho mfonini. Yehowa Nyankopɔn frɛɛ Aaron ma ɔbɛyɛɛ Israel sɔfo panyin na ne mmabarima bɛyɛɛ asɔfo nkumaa maa no. Wɔ Nisan fefɛw bere da a edi kan wɔ afe 1512 A.Y.B. mu no, odiyifo Mose tiee Onyankopɔn ahyɛde na ɔde Aaron ne ne mmabarima sisii asɔfodi no so. (Ex. 40:1, 2, 12-16; 29:4-9; Lev. 8:1-13) Nea ɛka ɔsɔfo panyin no ntade ho nneɛma ho no, “wɔboroo sika amapa tratraa a ɛyɛ abɔnim kronkron no, na wɔkyerɛw so nkyerɛwee sɛ nsɔanode nkurukyerɛwee sɛ: Kronkron ma Yehowa.”​—Ex. 39:30.

53. (a) Enti ɔresiesie Ɔsɔfo Panyin Aaron abotiri no, Yehowa ahyɛde bɛn na Mose tiei? (b) Hebri adeyɛ asɛmfua bɛn na asɛm “kronkronyɛ ahyehyɛde” no fii mu?

⁵³ Enti, bere a ɔrehyɛ ne nua Aaron atade ma wadi sɔfo panyin no, Mose dii Yehowa ahyɛde so: “Na fa abotiten no bɔ ne ti, na fa kronkronyɛ ahyehyɛde no fam abotiten no anim, na fa ɔsra ngo hwie gu n’atifi fa sra no.” (Ex. 29:6, 7) Esiane sɛ na “abɔnim kronkron yi” ne sika “amapa tratraa” no nti, Hebri Kyerɛwnsɛm no nkyerɛasefo bebree pɛ sɛ wɔde asɛm “abotiri kronkron,” di dwuma. (Hwɛ Ex. 29:6, ase hɔ asɛm; Jerusalem Bible) Nokwarem no, Hebri asɛmfua a wɔde di dwuma daa ma “abotiri” ne “ahemmotiri” no yɛ soronko fi Hebri asɛmfua a wɔde di dwuma wɔ ha sɛ “abɔnim kronkron no” ho. Wɔ Leviticus 21:12 no, wɔde Hebri asɛmfua a edi akyiri yi di dwuma wɔ ɔsra ngo a wɔde gu ɔsɔfo Panyin no ti so ho, efisɛ yɛkan sɛ: “Ommfi kronkronbea hɔ, na onnhura ne Nyankopɔn kronkronbea ho, efisɛ ne Nyankopɔn sra ngo no dwira n’atifi.” Wonya Hebri asɛmfua no fi adeyɛ asɛmfua nazar mu, na wɔkyerɛ ase “ahosohyira” wɔ Hosea 9:10.​—An American Translation; NW.

54, 55. (a) Na wɔfrɛ ɔsɔfo panyin a wɔasra no no dɛn, na sra a wɔsraa no no yɛɛ dɛn ho sɛnkyerɛnne? (b) So Yohane Osuboni no de honhom kronkron sraa Yesu, anaasɛ hena na ɔyɛɛ saa?

⁵⁴ Akyinnye biara nni ho sɛ, na ɔsɔfo panyin Aaron ne n’adedifo no yɛ mmarima a wɔahyira wɔn ho so ama Yehowa Nyankopɔn denam wɔn asɔfodi no so. (Ex. 29:30, 35) Esiane sɛ wɔde ɔsra ngo kronkron sra no nti, na wɔfrɛ ɔsɔfo panyin no “nea wɔasra no” anaasɛ Mesia (Lev. 4:3, 5, 16; 6:22) , saa ara na na ɛte akyiri yi ma Israel ahemfo a wɔsraa wɔn no. (1 Sam. 24:6, 10; 26:9-11; Kwa. 4:20) Enti bere a wɔabobɔ Ɔsɔfo Panyin Aaron mmabarima baanan a wɔyɛ asɔfo nkumaa no din akyerɛ yɛn akyi no, yɛkan sɛ: “Eyinom ne Aaron mma, asɔfo a wɔsraa wɔn ngo a wɔde hyɛɛ wɔn nsa sɛ wonni asɔfo no.” (Num 3:1-3) Bere a Mose, Yehowa Nyankopɔn ne Israel man no ntamgyinafo no sraa ne nuapanyin Aaron ma wabɛyɛ ɔsɔfo panyin no, ná ɛkyerɛ biribi ankasa. Ɛyɛɛ mfonini sɛ ná Onyankopɔn de ne honhom kronkron no bɛsra ne Ba Yesu bere a ofi nsu no mu afi n’asubɔ akyi no.

⁵⁵ Na Osuboni Yohane yɛ Lewini sɔfo bi a wɔfrɛ no Sakaria a ofi Abia asɔfokuw no mu no babarima. Nanso, Yohane bɔɔ Yesu asu ara kwa wɔ Yordan Asubɔnten no mu; wansra Yesu ma wabɛyɛ honhom mu sɔfo panyin. (Luka 1:5-17; 3:21-23; Marko 1:9-11) Onyankopɔn nkutoo na na obetumi de honhom kronkron asra Yesu.

56, 57. (a) Dɛn na Yohane Osuboni no kae sɛ wɔbɛma Yesu tumi ma wayɛ? (b) Ansa na Yesu regyaw n’asuafo hɔ no, dɛn na ɔka kyerɛɛ wɔn wɔ honhom kronkron asu ho?

⁵⁶ Ɛdefa Yesu ho no, na Osuboni Yohane aka sɛ: “Nea ne ho yɛ den sen me di m’akyi reba, mensɛ sɛ mekoto mesan ne mpaboa hama. Me de, mebɔ mo asu nsu mu, na ɔno de, ɔbɛbɔ mo asu honhom kronkron mu.” Na Onyankopɔn aka nea ɔbɛba yi ho asɛm akyerɛ Yohane, efisɛ Yohane kae sɛ: “Na me de, anka minnim no, na nea ɔsomaa me nsu asubɔ no, ɔno ara see me sɛ: Nea wubehu sɛ honhom no besian abɛtra no so no, ɔno ne nea ɔbɔ asu honhom kronkron mu.” (Marko 1:7, 8; Yoh. 1:33) Enti ɛnyɛ sɛ wɔde honhom kronkron sraa Yesu ma wabɛyɛ honhom mu ɔsɔfo panyin nko, na mmom na wɔbɛma no tumi ma ɔde honhom kronkron abɔ afoforo asu. Nanso, bere bɛn na na ɔde honhom kronkron bɛbɔ asu? Ná ɔrenyɛ saa ansa na ne wu sɛ ɔdesani afɔre a ɛyɛ pɛ no aba.

⁵⁷ Wonyan no fii awufo mu akyi no, ɔsakraa ne ho wɔ honam nipadua ahorow mu, na oyii ne ho adi kyerɛɛ n’asuafo a na wɔda so wɔ Yerusalem no. Dɛn na ɔka kyerɛɛ wɔn wɔ honhom kronkron no ho saa bere no? Asomafosɛm 1:4, 5 ka kyerɛ yɛn: “Na ɔne wɔn hyiae no, ɔhyɛɛ wɔn sɛ wommfi Yerusalem nnkɔ, na mmom wɔantwɛn Agya no bɔhyɛ a ose: mote fii m’anom no, sɛ Yohane de, ɔde nsu na ɛbɔɔ asu, na mo de, nna yi mu ɛrenkyɛ na wɔbɛbɔ mo asu honhom kronkron mu.”​—Twi Bible Foforo.

58, 59. (a) Bere bɛn na asubɔ yi bae, na ɔkwan bɛn so na sɛnkyerɛnne kwan so no Yesu Kristo maa nea ɔsɔfo panyin no yɛe saa da no wɔ asɔrefi hɔ no nyaa mmamu? (b) Yoel nkɔmhyɛ bɛn na efii ase baa mu wɔ hɔ, na ɔkwan bɛn so na Petro kaa asɛm no faa Yesu ho?

⁵⁸ Eyi yɛɛ saa ne sorokɔ akyi dadu. Ɛyɛɛ saa wɔ Sivan 6 afe 33 Y.B. mu, Adapɛn Afahyɛ Da no (anaasɛ Pentekoste) , bere a Yudafo sɔfo panyin de abodoo a mmɔkaw wom maa Onyankopɔn sɛ awi afahyɛ aduankan wɔ Yerusalem asɔredan no mu no. (Lev. 23:15-21) Saa da yi ara no, wɔ sɛnkyerɛnne kwan so no, ɔsoro Sɔfo Panyin Yesu Kristo de Kristofo asafo no maa Yehowa Nyankopɔn sɛ Ne mmakan. (Adi. 14:4) Ɔyɛɛ eyi denam dwuma a odii sɛ nea wɔnam no so hwiee honhom kronkron guu n’asuafo a na wɔretwɛn wɔ Yerusalem no so no so. Na ɛyɛ Yoel 2:28, 29 nkɔmhyɛ no mmamu mfiase, na ɔsomafo Petro a na honhom ahyɛ no ma no kyerɛkyerɛɛ mu kyerɛɛ Yudafo mpempem bɛhwɛɛ-ade-fo no sɛ:

⁵⁹ “Yesu yi ara na Onyankopɔn anyan no, ɛho adansefo na yɛn nyinaa yɛ. Afei wɔmaa no so kɔɔ Onyankopɔn nifa na onyaa Agya nkyɛn honhom kronkron bɔhyɛ no nti na wahwie nea muhu na mote yi agu. Na Dawid ankɔ soro; na ɔno ara kae sɛ; Awurade see me wura sɛ Tra me nifa kosi sɛ mede wo atamfo mɛyɛ wo nan ase ntiaso. Enti ma Israel fi nyinaa nhu ampa sɛ: Onyankopɔn de Yesu no ara a mosɛn no no ayɛ Awurade ne Kristo.”​—Aso. 2:14-21, 32-36.

60. Enti, ɔkwan bɛn so na na wɔnam nea Mose yɛe wɔ Nisan 1, 1512 A.Y.B. no so ayɛ honhom kronkron a Yesu hwie gui no ho mfonini?

⁶⁰ Saa kwan yi so no, Yesu Kristo de honhom kronkron no bɔɔ n’asuafo anokwafo no asu. Na wɔayɛ eyi ho mfonini dedadedaw wɔ Nisan 1, 1512 A.Y.B. mu. Na eyi yɛ bere a Mose de Yehowa mmara mae na ɔde ɔsra ngo kronkron sraa Ɔsɔfo Panyin Aaron mmabarima no. Yɛkan wɔ eyi ho sɛ: “Na Yehowa ka kyerɛɛ Mose sɛ: Ɔsram a edi kan so da a edi kan no si ahyiae ntamadan no trabea no. Na fa Aaron ne ne mma no bɛn ahyiae ntamadan no ano, na fa nsu guare wɔn. Na fa kronkronyɛ ntade no hyɛ Aaron, na sra no ngo na yɛ no kronkron, na onni me sɔfo. Na fa ne mma nso bɛn, na hyehyɛ wɔn ntade no, na sra wɔn ngo sɛnea wosraa wɔn agya no, na wonni me sɔfo, na wɔn sra no nyɛ wɔn daa asɔfodi nkodu wɔn awo ntoatoaso so. Na Mose yɛɛ sɛnea Yehowa hyɛɛ no no nyinaa, saa ara na ɔyɛe.”​—Ex. 40:1, 2, 12-16.

61. Dɛn na ɛsɛ sɛ wɔka wɔ sɛ ebia wɔsraa asɔfo nkumaa baanan a wodi kan no adedifo, ne sɛ ebia wɔde ngo kronkron sraa ɔsɔfo panyin no adedifo mmiako mmiako anaa no ho?

⁶¹ Enti wɔsraa Aaron mmabarima baanan no sɛ Israel asɔfo nkumaa a wodi kan. Nanso, ɛno akyi no, wɔamfa ɔsra ngo kronkron ansra wɔn adedifo a wɔbɛyɛ asɔfo nkumaa no mmiako mmiako. Wobuu ntade ara kwa a wɔde hyɛɛ wɔn sɛ asɔfo nkumaa no sɛ ɛdɔɔso. Sra a wɔsraa asɔfo nkumaa baanan a wodi kan no gyinaa hɔ maa wɔn. Nanso, wɔsraa ɔsɔfo panyin Aaron ɔdedifo biara. (Num. 3:1-3; Ex. 29:29, 30; Num. 20:23-29; Deut. 10:6) Nanso, na ɛsɛ sɛ wobu Israel asɔfokuw no nyinaa sɛ kuw a wɔasra wɔn, sɛnea sra a wɔsraa wɔn a wodi kan no kyerɛ no.

62. Esiane sɛ wɔde no dii dwuma sraa n’asuafo a wɔwɔ asase so no nti, dɛn na Yesu Kristo ma wɔbɛyɛɛ wɔ n’akwankyerɛ ase, na ɔkwan bɛn so na Yohane foa eyi so wɔ Adiyisɛm no mu?

⁶² Wɔ sɛnkyerɛnne kwan so mmamu mu no, ɛdenam honhom kronkron a wɔde sra akyidifo anokwafo 144,000 no so no, Yesu Kristo a ɔwɔ soro no di dwuma sɛ Onyankopɔn Ananmusifo na ɔyɛ wɔn honhom mu asɔfo, n’asɔfo nkumaa a ɔyɛ wɔn Sɔfo Panyin. Ɛno nti na ɔsomafo Yohane tumi kyerɛw nea edi so yi wɔ Yesu Kristo ho sɛ: “Yesu Kristo a ɔyɛ dansefo nokwafo ne awufo mu abakan ne asase so ahene so difo . . . Nea ɔdɔ yɛn na ɔde ne mogya aguare yɛn afi bɔne mu, na wayɛ yɛn ahene ne asɔfo ama n’Agya Onyankopɔn no, ɔno na wɔmfa anuonyam ne tumi mma no daa daa! Amen.” Afei nso: “Wɔakum wo, na wode wo mogya atɔ yɛn ama Onyankopɔn, afi mmusua ne kasa ne nkurɔfo ne aman nyinaa mu, na woayɛ yɛn ahene ne asɔfo ama yɛn Nyankopɔn, na yebedi asase so ahene.”​—Adi. 1:5, 6; 5:9, 10.

63. Ɔkwan bɛn so na ɔsomafo Petro nam krataa so dii Yesu akyidifo a wɔasra wɔn no asɔfodi ho adanse?

⁶³ Nokwasɛm no ho ɔdansefo foforo a wɔde honhom kaa no wɔ hɔ​—ɔsomafo Petro. Ɔrekyerɛw mfe kakraa bi ansa na Romafo asɛe Yerusalem (70 Y.B. mu) ma Lewifo asɔfo a wɔwɔ hɔ no nnwuma abɔ wɔn no, Petro ka kyerɛɛ Kristofo a wɔde honhom asra wɔn a wɔwɔ ɔsoro anidaso no sɛ: “Wɔn na wohintiw, efisɛ wontie asɛm no. Na mo de, moyɛ abusua a wɔapaw wɔn, ahene asɔfokuw, ɔman kronkron, ɔman a wafa wɔn ayɛ ne de, sɛ monka nea ɔfrɛɛ mo fii esum mu baa ne hann a ɛyɛ nwonwa mu no mmaninyɛ nkyerɛ.”​—1 Pet. 2:8, 9, Twi Bible Foforo.