Wotuaa Wɔn Ka sɛ Wɔnantew sɛ Nnipa a Wɔn ho Nni Asɛm

YEHOWA hyira ne nokware asomfo na otua wɔn ka. Ebia ɛho behia sɛ wɔtwɛn kosi bere bi ansa na Onyankopɔn atirimpɔw abam, nanso hwɛ anigye a ɛyɛ bere a wonya ne nhyira no!

Eyi daa adi yiye bɛyɛ mfe mpem abien a atwam ni wɔ Yudani sɔfo Sakaria ne ne yere Elisabet a na wɔn baanu nyinaa fi Aaron abusua mu no asɛm no mu. Ná Onyankopɔn ahyɛ Israelfo no bɔ sɛ sɛ wɔsom no nokwaredi mu a obehyira wɔn ma wɔanya asefo. Ɔkae sɛ mmofra yɛ akatua. (Leviticus 26:9; Dwom 127:3) Nanso, na Sakaria ne Elisabet nni ba, na na wɔanyinyin.—Luka 1:1-7.

Kyerɛwnsɛm no ka sɛ na Sakaria ne Elisabet “baanu nyinaa teɛ Onyankopɔn anim di [Yehowa] ahyɛde ne treneede nyinaa so a ɛho nni asɛm.” (Luka 1:6) Ná wɔdɔ Nyankopɔn araa ma na ɛnyɛ den mma wɔn sɛ wɔbɛfa ɔkwan trenee so na wɔadi n’ahyɛde horow so.—1 Yohane 5:3.

Nhyira Horow a Wɔnhwɛ Kwan

Momma yɛnsan nkɔ afe 3 A.Y.B. mu awiei anaa ahohuru bere mfiase. Herode Ɔkɛseɛ redi hene wɔ Yudea. Ɔsɔfo Sakaria kɔ Yerusalem asɔrefie no Kronkronbea hɔ da bi. Bere a nnipa no nyinaa aboa wɔn ho ano rebɔ mpae wɔ adiwo no, ɔhyew aduhuam wɔ sika afɔremuka no so. Ebia wobu saa aduhuam-hyew yi sɛ ɔsom adwuma a wɔyɛ no da biara da no mu nea nidi wom sen biara, enti wɔbɔ afɔre no wie ansa na wɔayɛ eyi. Ebia ɔsɔfo bi benya hokwan ahyew aduhuam pɛnkoro pɛ wɔ ne nkwa nna mu.

Nea Sakaria hu no ma ne ho dwiriw no. Yehowa bɔfo begyina aduhuam afɔremuka no nifa so! Ɔsɔfo akwakora no bo tu na ehu ka no. Nanso ɔbɔfo no ka sɛ: “Sakaria, nsuro, na wɔate w’adesrɛ, na wo yere Elisabet bɛwo ɔbabarima ama wo, na woato ne din Yohane.” Yiw, Yehowa ate Elisabet ne Sakaria mpaebɔ a efi komam no.—Luka 1:8-13.

Ɔbɔfo no de ka ho sɛ: ‘Ɛbɛyɛ wo anigye ne ahosan, na n’awo nti nnipa bebree ani begye. Efisɛ ɔbɛyɛ kɛse [Yehowa] anim, na ɔrennom nsa biara, na honhom kronkron bɛyɛ no ma afi ne na yam po.’ Yohane bɛyɛ Nasirini a honhom kronkron ayɛ no mã ne nkwa nna nyinaa. Ɔbɔfo no toa so sɛ: “Ɔbɛdan Israel mma mu bebree aba [Yehowa], wɔn Nyankopɔn nkyɛn. Na ɔde Elia honhom ne ahoɔden bedi n’anim akɔdan agyanom koma aba wɔn mma ho, ne asoɔdenfo akɔ treneefo adwene ho, na wasiesie ɔman a wɔaboaboa wɔn ho no ama [Yehowa].”—Luka 1:14-17.

Sakaria bisa sɛ: “Dɛn na mede mehu eyi? Efisɛ mabɔ akora, na me yere nso abɔ aberewa.” Ɔbɔfo no bua sɛ: “Mene Gabriel a migyina Onyankopɔn anim, na wɔasoma me sɛ memmɛkasa menkyerɛ wo, na menka wo nsɛm pa yi. Na hwɛ wobɛtɔ mum, na worentumi nkasa de bɛkɔ akosi da a eyinom bɛba, efisɛ woannye me nsɛm a ɛbɛba mu ne bere mu no anni.” Bere a Sakaria pue fi kronkronbea hɔ no, ontumi nkasa, na nkurɔfo no susuw sɛ wakohu biribi. Nea otumi yɛ ara ne ne nipadua a ɔde yɛ nsɛnkyerɛnne de kyerɛ nea ɔpɛ sɛ ɔkyerɛ. Bere a owie ne baguam som no, ɔsan kɔ ne fie.—Luka 1:18-23.

Nea Ɛde Anigye Ba

Sɛnea ɔhyɛɛ bɔ no, ankyɛ Elisabet nya anigye. Onyinsɛn, na oboninyɛ ahohora no fi hɔ. Ne busuani Maria nso nya anigye efisɛ ɔbɔfo koro no ara, Gabriel, ka kyerɛ no sɛ: “Hwɛ, wubenyinsɛn, na woawo ɔbabarima, na woato ne din Yesu. Ɔbɛyɛ ɔkɛse, na wɔafrɛ no nea ɔwɔ sorosoro no ba; na [Yehowa] Nyankopɔn de n’agya Dawid ahengua bɛma no.” Maria pɛ sɛ wɔde no di dwuma sɛ “[Yehowa] afenaa.”—Luka 1:24-38.

Maria yɛ ntɛm kɔ Sakaria ne Elisabet fie wɔ Yuda mmepɔw so kurow bi mu. Na bere a Maria kyia no, ne nne ma abofra a ɔda Elisabet yam no huruw. Ɛnam Onyankopɔn honhom kronkron no tumi so no, Elisabet teɛm denneennen sɛ: “Wɔahyira wo mmea mu, na wɔahyira wo yam ade! Na eyi fi he sɛ me wura ne na reba me nkyɛn yi? Na hwɛ, wo nkyia twaa m’asom ara pɛ, akokoaa no de ahosan huruwii me yam. Na nhyira ne nea wagye adi, efisɛ nsɛm a [Yehowa] ama wɔabɛka akyerɛ no no bɛba mu.” Maria gye so anigye so. Ɔtra Elisabet nkyɛn bɛyɛ asram abiɛsa.—Luka 1:39-56.

Wɔwo Yohane

Bere a ɛsɛ mu no, Elisabet ne Sakaria a wɔanyinyin no wo ɔbabarima. Wotwa abofra no twetia da a ɛto so awotwe. Abusuafo pɛ sɛ wɔto abarimaa no din Sakaria, nanso Elisabet ka sɛ: “Dabi, wɔmfrɛ no Yohane.” So ne kunu a ɔda so yɛ mum no pene so? Ɔkyerɛw kyerɛwpon bi so sɛ: “Ne din ne Yohane.” Amonom hɔ ara, Sakaria tɛkrɛma san, na ɔkasa yi [Yehowa] ayɛ.—Luka 1:57-66.

Bere a honhom kronkron hyɛ ɔsɔfo a n’ani agye no mã no, ɔhyɛ nkɔm. Ɔkasa te sɛ nea Ogyefo a wahyɛ ne ho bɔ—‘nkwagye abɛn a ofi Dawid fie’—no aba dedaw ma ɛne apam a Onyankopɔn ne Abraham yɛe fa aseni a ɔbɛyɛ nhyira ama amanaman nyinaa no hyia. (Genesis 22:15-18) Sɛ́ obi a odi Mesia no anim no, Sakaria babarima a ɔwoo no anwonwa kwan so no ‘bedi [Yehowa] anim akosiesie n’akwan.’ Bere a mfe twam no, Yohane kɔɔ so nyinii, na onyaa honhom mu ahoɔden.—Luka 1:67-80.

Wonyaa Akatua Pa

Sakaria ne Elisabeth yɛɛ gyidi ne boasetɔ ho nhwɛso pa. Ɛwom sɛ na ɛsɛ sɛ wɔkɔ so twɛn Onyankopɔn de, nanso wɔkɔɔ so som Yehowa nokwaredi mu, na wɔn nhyira kɛse no bae bere a na wɔn baanu nyinaa anyinyin yiye.

Nanso, hwɛ anigye a Elisabet ne Sakaria nyae! Wɔ Onyankopɔn honhom kronkron no akwankyerɛ ase no, wɔn baanu nyinaa hyehyɛɛ nkɔm. Wonyaa hokwan bɛyɛɛ Yohane Osuboni a odii Mesia no anim no awofo ne n’akyerɛkyerɛfo. Afei nso, Onyankopɔn buu wɔn atreneefo. Saa ara na ɛnnɛ, wɔn a wɔnantew Onyankopɔn kwan so betumi anya trenee gyinabea wɔ Onyankopɔn anim, na wobenya akatua pa pii, esiane sɛ wɔde Yehowa ahyɛde horow traa ase sɛ nnipa a wɔn ho nni asɛm nti.