Adesamma Anwonwakwan so Ayaresa Abɛn

“YENHUU saa bi da.” Saa na nnipa a wohui sɛ Yesu nam anwonwakwan so asa apakye bi yare amonom hɔ ara no kae. (Marko 2:12) Yesu saa anifuraefo, mum, ne mmubuafo yare, na n’akyidifo nso yɛɛ saa. Tumi bɛn na Yesu de yɛɛ saa? Gyidi baa asɛm no mu dɛn? Dɛn na saa nsɛm a esisii afeha a edi kan mu yi da no adi wɔ anwonwakwan so ayaresa a ɛrekɔ so nnɛ no ho?—Mateo 15:30, 31.

“Wo Gyidi Agye Wo”

Nnɛyi gyidi ayaresafo taa twe adwene si asɛm a Yesu ka kyerɛɛ ɔbea bi a na mogya atu no mfe 12 a ɔbaa ne nkyɛn bɛhwehwɛɛ ayaresa no so: “Wo gyidi agye wo.” (Luka 8:43-48) So asɛm a Yesu kae no kyerɛ sɛ na ɔbea no ayaresa gyina ne gyidi so? So na ɛyɛ “gyidi ayaresa” a ɛkɔ so nnɛ no ho nhwɛso?

Sɛ yɛtɔ yɛn bo ase kenkan Bible kyerɛwtohɔ no a, yehu sɛ mpɛn pii no, Yesu ne n’asuafo no anka sɛ ayarefo no mpae mu nka wɔn gyidi ansa na wɔanya ayaresa. Ɔbea a yɛaka ne ho asɛm wɔ atifi hɔ no bae, na bere a wanka hwee ankyerɛ Yesu no, ofii akyiri de ne nsa bɛkaa n’atade, na “amonom hɔ ara ne mogya no twae.” Bere foforo nso, Yesu saa mmarima a na wɔaba sɛ wɔrebɛkyere no no mu biako yare. Ɔsaa ɔbarima bi a na onnim nipa ko a Yesu yɛ mpo yare.—Luka 22:50, 51; Yohane 5:5-9, 13; 9:24-34.

Ɛnde, gyidi baa asɛm no mu dɛn? Bere a na Yesu ne n’asuafo no wɔ Tiro ne Sidon mantam mu no, Foinikeni bea bi bae bɛteɛteɛɛm sɛ: “Awurade, Dawid ba, hu me mmɔbɔ, na honhommɔne bi rehaw me babea dodo!” Susuw ahoyeraw a ɔde bɛkaa adesrɛde yi no ho: “Awurade, boa me!” Ahummɔbɔ kaa Yesu ma ɔkae sɛ: “O ɔbea, wo gyidi so; ɛnyɛ mma wo sɛnea wopɛ no.” Na ne babea no ho yɛɛ no den “dɔn no ara mu.” (Mateo 15:21-28) Ɛda adi pefee sɛ na gyidi ho wɔ asɛm no mu, nanso na ɛyɛ hena gyidi? Hyɛ no nsow sɛ ɛna no gyidi na Yesu kamfoe, ɛnyɛ ɔba a na ɔyare no de. Na dɛn mu gyidi na onyae? Ɔbea no nam frɛ a ɔfrɛɛ Yesu sɛ “Awurade, Dawid ba” no so gye toom wɔ guam sɛ Yesu ne Mesia a wɔhyɛɛ ne ho bɔ no. Ná ɛnyɛ asɛm bi a ɔreka de akyerɛ Onyankopɔn anaa ɔyaresafo bi tumi mu gyidi ara kwa. Bere a Yesu kae sɛ, “Wo gyidi agye wo” no, na ɔkyerɛ sɛ, sɛ wɔn a wɔyare no nni ne mu gyidi sɛ Mesia no a, anka wɔremma ne nkyɛn sɛ ɔnsa wɔn yare.

Yetumi hu fi Kyerɛwnsɛm mu nhwɛso horow yi mu sɛ ɔkwan a Yesu faa so saa yare no yɛ soronko koraa wɔ nea nkurɔfo taa hu anaa wɔka ho asɛm nnɛ no ho. Nkurɔfo no anyɛ gyegyeegye biara—nteɛteɛm, nkankye, osũ, adetɔso, ne nea ɛkeka ho—na Yesu nso anyɛ yɛ-ma-yɛnhwɛ biara. Nea ɛka ho no, amma da sɛ Yesu antumi ansa ayarefo bi yare a n’amanneɛ ne sɛ na wonni gyidi anaa na wɔn ayɛyɛde nnɔɔso sɛnea ɛsɛ.

Onyankopɔn Tumi a Wɔde Saa Yare

Ɔkwan bɛn na Yesu ne n’asuafo no faa so saa yare? Bible bua sɛ: “Na [Yehowa, NW] ahoɔden wɔ no so a ɔde sa yare.” (Luka 5:17) Luka 9:43 ka sɛ ayaresa bi akyi no, “Onyankopɔn ahoɔden kɛse yi yɛɛ wɔn nyinaa ahodwiriw.” Sɛnea ɛfata no, Yesu antwe adwene ansi ne ho so sɛ ɔyaresafo. Bere bi, ɔka kyerɛɛ ɔbarima bi a na wayi no afi ahonhommɔne nhyɛso ase sɛ: “Kɔ wo fi, w’abusuafo nkyɛn, na kɔka nneɛma a [Yehowa, NW] ayɛ ama wo ne mmɔbɔ a wahu wo no kyerɛ wɔn!”—Marko 5:19.

Esiane sɛ Yesu ne asomafo no de Nyankopɔn tumi na ɛsaa yare nti, ɛyɛ mmerɛw sɛ yebehu nea enti a na gyidi ho nhia mma nea wɔresa no yare no bere nyinaa ansa na wanya ayaresa no. Nanso, na ɔyaresafo no hia gyidi a emu yɛ den. Enti bere a Yesu akyidifo no antumi antu honhommɔne bi a na ɔyɛ den paa no, Yesu kaa nea enti a ɛbaa saa no kyerɛɛ wɔn sɛ: “Efisɛ mo gyidi sua.”—Mateo 17:20.

Anwonwakwan so Ayaresa Atirimpɔw

Ɛwom sɛ Yesu saa nyarewa pii wɔ n’asase so som adwuma no nyinaa mu de, nanso ɛnyɛ ‘ayaresa adwuma’ titiriw na na ɔreyɛ. Ná ade titiriw bi, ‘ahenni no ho asɛmpaka,’ hia no sen anwonwakwan so ayaresa—a wannye nkurɔfo no sika wɔ ho anaa wammisa ntoboa biara da—no. (Mateo 9:35) Kyerɛwtohɔ no ka sɛ bere bi “ogyee wɔn kaa wɔn Onyankopɔn ahenni ho asɛm, na ɔsaa wɔn a ehia wɔn yare.” (Luka 9:11) Wɔ Nsɛmpa no mu no, wɔfrɛɛ Yesu “Ɔkyerɛkyerɛfo” mpɛn pii, nanso wɔamfrɛ no “Ɔyaresafo” da.

Ɛnde, dɛn nti na Yesu saa yare anwonwakwan so? Ne titiriw no, ɔde daa ne ho adi sɛ Mesia a wɔhyɛɛ ne ho bɔ no. Bere a wɔde Yohane Suboni too afiase ɔkwan a ɛnsɛ so no, na ɔpɛ sɛ wɔma no awerɛhyem sɛ wayɛ nea Onyankopɔn somaa no sɛ ɔmmɛyɛ no awie. Ɔsomaa n’ankasa asuafo kɔɔ Yesu nkyɛn kobisaa no sɛ: “Wone nea ɔreba no anaasɛ yɛnhwɛ ɔfoforo kwan?” Hyɛ nea Yesu ka kyerɛɛ Yohane asuafo no nsow: “Monkɔ na monkɔka nea mote na muhu yi nkyerɛ Yohane: Anifuraefo hu ade, na mmubuafo nantew, akwatafo ho fi, na asotifo te asɛm, awufo nyan, na wɔka asɛmpa kyerɛ ahiafo.”—Mateo 11:2-5.

Yiw, nokwasɛm a ɛne sɛ ɛnyɛ yare nko na Yesu sae, na mmom ɔyɛɛ anwonwade afoforo a wɔayɛ ho kyerɛwtohɔ wɔ Nsɛmpa no mu no daa no adi pefee sɛ ɔne “nea ɔreba,” Mesia a wɔhyɛɛ ne ho bɔ no. Ná ɛho nhia sɛ obiara ‘hwɛ ɔfoforo kwan.’

Wɔsa Yare Anwonwakwan so Nnɛ?

Ɛnde, so ɛsɛ sɛ yɛhwɛ kwan sɛ Onyankopɔn nam ayaresa so bɛda ne tumi adi? Dabi. Yesu nam anwonwade a ɔde Nyankopɔn tumi yɛe no so ma ɛdaa adi a akyinnye biara nni ho sɛ ɔne Mesia a Onyankopɔn hyɛɛ ne ho bɔ sɛ ɔbɛba no. Wɔakyerɛw Yesu nnwuma akɛse no wɔ Bible mu a obiara betumi akenkan. Ɛho nhia sɛ Onyankopɔn kyerɛ ne tumi denam nnwuma a ɛtete saa a ɔbɛsan ayɛ akyerɛ nnipa awo ntoatoaso biara no so.

Nea ɛfata sɛ yɛhyɛ no nsow ne sɛ, nkurɔfo gyee ayaresa ne anwonwade afoforo no di kosii baabi pɛ. Ebinom a wɔde wɔn ani huu Yesu anwonwade ahorow mpo annye anni sɛ na ne soro Agya no taa n’akyi. “Na wayɛ saa nsɛnkyerɛnne bebree wɔ wɔn anim de, nanso wɔannye no anni.” (Yohane 12:37) Ɛno nti na bere a ɔsomafo Paulo kaa anwonwade akyɛde ahorow—nkɔmhyɛ, kasa horow, ayaresa, ne nea ɛkeka ho—a na Onyankopɔn de ama afeha a edi kan mu Kristofo asafo no mufo ho asɛm akyi no, honhom kaa no ma ɔkaa eyi no: “Nkɔmhyɛ de, wobegu; ɔkasa horow de, ebegyae; nimdeɛ de, ɛbɛsa. Na yehu ade fa-ne-fa, na yɛhyɛ nkɔm fa-ne-fa. Na sɛ nea ɛyɛ pɛ no nya ba a, ɛno na wobegu nea ɛyɛ ɔfa-ne-fa.”—1 Korintofo 12:28-31; 13:8-10.

Nokwarem no, Onyankopɔn mu gyidi a yebenya ho hia ma yɛn yiyedi. Nanso, nea gyidi a obi benya wɔ ayaresa ho bɔhyɛ ahorow a ɛyɛ nnaadaa mu no bɛkɔ akowie ara ne huammɔdi mu. Afei nso, ɛdefa awiei bere no ho no, Yesu de afotu yi mae sɛ: “Atoro kristo ne atoro adiyifo bɛsɔre, na wɔbɛyɛ nsɛnkyerɛnne akɛse ne anwonwade, na sɛ ebetumi a, anka wɔbɛdaadaa wɔn a wɔapaw wɔn no po.” (Mateo 24:24) Nnaadaa ne nsisi da nkyɛn a, adaemone tumi nso betumi ada adi. Ne saa nti, ɛnsɛ sɛ nsɛm a esisi a nnipa ntumi nte ase no yɛ yɛn nwonwa, na ɛda adi sɛ eyinom nyɛ nea wotumi gyina so nya Onyankopɔn mu gyidi a edi mũ.

Esiane sɛ ɛnnɛ, obiara nni hɔ a ɔsa yare sɛnea Yesu yɛe no nti, ɛka yɛn biribi anaa? Ɛnte saa koraa. Nokwarem no, na wɔn a Yesu saa wɔn yare no betumi asan ayare akyiri yi. Wɔn nyinaa nyin wuwui. Ayaresa no mu mfaso a wonyae no yɛ bere tiaa mu de. Nanso, biribi wɔ Yesu anwonwakwan so ayaresa no akyi a ɛtra hɔ kyɛ, efisɛ na ɛyɛ daakye nhyira horow ho mfonini.

Enti bere a Alexandre ne Benedita a yɛaka wɔn ho asɛm dedaw no hwehwɛɛ Onyankopɔn Asɛm Bible no mu akyi no, wɔamfa wɔn werɛ anhyɛ nnɛyi gyidi ayaresa ne ayaresa a egyina ahonhomsɛmdi so mu bio. Bere koro no ara, wɔabehu sɛ anwonwakwan so ayaresa ahorow nyɛ ade a ebi mma bio. Dɛn nti na ɛte saa? Te sɛ nnipa ɔpepem pii a wɔwɔ wiase nyinaa no, wɔn ani da nhyira a ayaresa a ɛbɛkɔ so wɔ Onyankopɔn Ahenni ase no de bɛba so.—Mateo 6:10.

Ɔyare ne Owu Nni Hɔ Bio

Sɛnea yɛahu dedaw no, na ɛnyɛ Yesu som adwuma no atirimpɔw titiriw ne sɛ ɔbɛsa ayarefo yare na wayɛ anwonwade afoforo. Mmom no, ɔde Onyankopɔn Ahenni ho asɛnka no na ɛyɛɛ n’adwuma titiriw. (Mateo 9:35; Luka 4:43; 8:1) Saa Ahenni no na Onyankopɔn nam so de adesamma anwonwakwan so ayaresa bɛba, na wayi adesɛe a bɔne ne sintɔ de aba adesamma abusua no so nyinaa afi hɔ. Ɔkwan bɛn so ne bere bɛn na ɔbɛyɛ eyi?

Bere a Kristo Yesu rekyerɛ nea ɛbɛba mfehaha pii akyi no, ɔmaa ne somafo Yohane nkɔmhyɛ kwan so anisoadehu bi sɛ: “Afei nkwagye ne tumi ne ahenni ayɛ yɛn Nyankopɔn de, na ahoɔden ayɛ Kristo no dea.” (Adiyisɛm 12:10) Adanse nyinaa kyerɛ sɛ efi 1914 no, wɔatow Onyankopɔn tamfo kɛse, Satan, akyene asase so, na seesei, Ahenni no redi dwuma ankasa! Wɔde Yesu asi agua so sɛ Mesia Ahenni no Hene, na seesei wayɛ krado sɛ ɔbɛyɛ nsakrae atitiriw wɔ asase so.

Daakye a enni akyiri koraa no, Yesu soro nniso no bedi atreneefo abusua foforo bi, “asase foforo,” sɛnea yɛbɛka no no, so. (2 Petro 3:13) Dɛn na tebea no bɛyɛ saa bere no? Ɛho mfonini bi a ɛyɛ anigye ni: “Mihuu ɔsoro foforo ne asase foforo, na kan soro ne kan asase no atwam . . . Na [Onyankopɔn bɛpopa] wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.”—Adiyisɛm 21:1, 4.

Wubetumi asusuw sɛnea asetra bɛyɛ bere a adesamma anwonwakwan so ayaresa no nya mmamu no ho? “Ɔmanfo no mu bi renka sɛ: Magurow! Ɔman a wɔte mu no, wɔde wɔn amumɔyɛ befiri wɔn.” Yiw, Onyankopɔn bɛyɛ biribi a gyidi ayaresafo ntumi nyɛ da. “Ɔbɛmene owu akosi daa.” Nokwarem no, ‘Yehowa bɛpopa ani nyinaa so nusu.’—Yesaia 25:8; 33:24.

[Kratafa 7 mfonini]

Wɔ Onyankopɔn Ahenni tumidi ase no, wɔbɛsa adesamma yare anwonwakwan so