“Kuw Ketewa, Munnsuro!”
“Kuw ketewa, munnsuro! Efisɛ ɛyɛ mo agya no fɛ sɛ ɔde ahenni no bɛma mo.”—LUKA 12:32.
1. Na Yesu nsɛm: “Kuw ketewa, munnsuro!” no nnyinaso ne dɛn?
“MONHWEHWƐ Onyankopɔn ahenni.” (Luka 12:31) Bere a Yesu kaa nsɛm yi kyerɛɛ n’asuafo no, ɔkaa nnyinasosɛm bi a akyerɛ Kristofo kwan wɔ wɔn nsusuwii mu fi ne bere so abesi yɛn nna yi mu ho asɛm. Ɛsɛ sɛ Onyankopɔn Ahenni di kan koraa wɔ yɛn asetra mu. (Mateo 6:33) Nanso, wɔ Luka kyerɛwtohɔ no mu no, Yesu kɔɔ so kaa nsɛm a ɔdɔ wom na ɛma awerɛhyem kyerɛɛ Kristofo kuw bi a wɔda nsow. Ɔkae sɛ: “Kuw ketewa, munnsuro! Efisɛ ɛyɛ mo agya no fɛ sɛ ɔde ahenni no bɛma mo.” (Luka 12:32) Sɛ́ Oguanhwɛfo Pa no, na Yesu nim sɛ n’asuafo a wɔbɛn no no behyia mmere a emu yɛ den. Nanso sɛ na wɔkɔ so hwehwɛ Onyankopɔn Ahenni a, ɛnde na biribiara nni hɔ a enti ɛsɛ sɛ wosuro. Enti, na Yesu afotu no nyɛ ahyɛde a emu yɛ den. Mmom, na ɛyɛ bɔhyɛ a ɔdɔ wom a ɛma wonyaa awerɛhyem ne akokoduru.
2. Henanom na wɔbom yɛ kuw ketewa no, na dɛn nti na wɔanya hokwan titiriw?
2 Ná Yesu rekasa kyerɛ n’asuafo no, na ɔfrɛɛ wɔn “kuw ketewa.” Afei na ɔrekasa kyerɛ wɔn a na Yehowa ‘de Ahenni no bɛma’ wɔn no. Sɛ yɛde nnipadɔm a na wobegye Yesu atom akyiri yi no toto wɔn ho a, na saa kuw yi mu nnipa nnɔɔso ampa. Wobuu wɔn sɛ wɔsom bo nso, efisɛ na wɔapaw wɔn ama daakye bi a ɛyɛ anigye, sɛ wɔde wɔn bɛyɛ ahenni adwuma. Kuw ketewa no Agya, Oguanhwɛfo Kɛse, Yehowa, frɛ wɔn a atirimpɔw no ne sɛ ɔbɛma wɔn ɔsoro apɛgyade wɔ Kristo Mesia Ahenni no mu.
Kuw Ketewa No
3. Kuw ketewa no anuonyam ho anisoadehu bɛn na Yohane nyae?
3 Ɛnde, henanom na wɔka bom yɛ kuw ketewa yi a wɔwɔ anidaso kɛse a ɛte saa no? Wɔne Yesu Kristo akyidifo a wɔde honhom kronkron sra wɔn no. (Asomafo no Nnwuma 2:1-4) Bere a ɔsomafo Yohane huu wɔn sɛ ɔsoro nnwontofo a wokurakura asanku no, ɔkyerɛwee sɛ: “Mihui, na hwɛ, oguammaa no gyina Sion bepɔw so, na mpem ɔha aduanan anan a wɔakyerɛkyerɛw ne din ne n’agya din wɔn moma so no ka ne ho. Eyinom ne wɔn a wɔamfa mmea angu wɔn ho fi, na wɔyɛ mmabun, wɔn na wodi oguammaa no akyi baabiara a ɔkɔ. Eyinom na wɔatɔ wɔn afi nnipa mu ayɛ wɔn mmakan ama Onyankopɔn ne oguammaa no, na wɔanhu atoro bi wɔ wɔn anom; na wonni dɛm.”—Adiyisɛm 14:1, 4, 5.
4. Gyinabea bɛn na kuw ketewa no wɔ wɔ asase so nnɛ?
4 Efi Pentekoste afe 33 Y.B. reba no, saafo a wɔasra wɔn de honhom awo wɔn yi asom sɛ Kristo ahemmɔfo wɔ asase so. (2 Korintofo 5:20) Ɛnnɛ, wɔn mu nkaefo bi pɛ na wɔda so wɔ hɔ, a wɔbom som sɛ akoa nokwafo ne ɔbadwemma kuw no. (Mateo 24:45; Adiyisɛm 12:17) Efi 1935 reba titiriw no, “nguan foforo,” Kristofo a wɔwɔ asase so anidaso a mprempren wɔn dodow yɛ ɔpepem pii abɛka wɔn ho. Saafo yi boa wɔn ma wɔka asɛmpa no wɔ asase nyinaa so.—Yohane 10:16.
5. Kuw ketewa no nkaefo no su te dɛn, na dɛn nti na ɛho nhia sɛ wosuro?
5 Kuw ketewa yi mufo a wɔda so wɔ asase so su te dɛn? Esiane sɛ wonim sɛ wɔn nsa bɛka ‘Ahenni a ɛnwosow’ nti, wɔde wɔn som kronn no ma wɔ Onyankopɔn suro ne obu mu. (Hebrifo 12:28) Wofi ahobrɛase mu hu sɛ wɔanya hokwan a ɛso nni a ɛbɛma wɔanya anigye a enni kabea. Wɔahu “ahene biako a ne bo yɛ den” no a Yesu kaa ho asɛm bere a na ɔreka Ahenni no ho asɛm no. (Mateo 13:46) Bere a ahohiahia kɛse no rebɛn no, Onyankopɔn nkurɔfo a wɔasra wɔn no gyina hɔ akokoduru so. Ɛmfa ho nea ɛreba adesamma so wɔ “[Yehowa] da kɛse a ɛhyerɛn no” mu no, nkaefo a wɔasra wɔn no nsuro nea ɛbɛba daakye. (Asomafo no Nnwuma 2:19-21) Dɛn nti na ɛsɛ sɛ wɔyɛ saa?
Wɔn Dodow so Huan
6, 7. (a) Dɛn nti na kuw ketewa no mufo a wɔda so wɔ asase so sua koraa? (b) Ɛsɛ sɛ ankorankoro biara bu anidaso a ɔwɔ no dɛn?
6 Kuw ketewa no mufo a wɔda so wɔ asase so no dodow abɛyɛ ketewaa bi wɔ nnansa yi mfe mu. Eyi daa adi wɔ 1994 Nkaedi no ho amanneɛbɔ no mu. Wɔ Yehowa nkurɔfo asafo ahorow bɛyɛ 75,000 a ɛwɔ wiase nyinaa mu no, nnipa 8,617 pɛ na wodii abodoo nom bobesa no bi de kyerɛɛ sɛ wɔyɛ nkaefo no mufo. (Mateo 26:26-30) Nanso, nnipa a wɔbaa ase no nyinaa dodow si 12,288,917. Kristofo a wɔasra wɔn no nim sɛ ɛsɛ sɛ wɔhwɛ eyi kwan. Yehowa de nnipa dodow a wasɔ wɔn ano, 144,000, na asi hɔ ma wɔaka abom ayɛ kuw ketewa no, na ofi Pentekoste afe 33 Y.B. mu na aboaboa wɔn ano. Ntease wom sɛ, na wobegyae kuw ketewa no mufo no frɛ bere a na wɔn dodow no reyɛ aso no, na ɛho adanse ne sɛ saafo a wɔahyira wɔn titiriw yi anoboaboa baa awiei wɔ 1935 mu. Nanso, wɔhyɛɛ nkɔm sɛ nguan foforo no dodow bɛdɔɔso abɛyɛ “nnipakuw kɛse a obi ntumi nkan wɔn a wofi aman ne mmusuakuw ne nkurɔfo ne ɔkasa nyinaa mu” wɔ awiei bere no mu. Efi 1935 reba no, nnipakuw kɛse a wɔn anidaso ne sɛ wobenya daa nkwa wɔ paradise asase so yi ano na Yehowa reboaboa.—Adiyisɛm 7:9; 14:15, 16; Dwom 37:29.
7 Seesei kuw ketewa no mufo a wɔda so wɔ asase so no mu dodow no ara wɔ wɔn mfe 70, 80, ne 90 mu. Wɔn mu kakra adi boro mfe 100. Eyinom nyinaa, ɛmfa ho mfe a wɔadi, nim sɛ awiei koraa no wobenyan wɔn akɔ soro akɔka Yesu Kristo ho ne no adi hene wɔ n’anuonyam Ahenni no mu. Nnipakuw kɛse no mufo bɛyɛ Ɔhene Kristo asase so nkoa. Momma yɛn mu biara ani nnye wɔ nea Yehowa de asie ama wɔn a wɔdɔ no no ho. Ɛnyɛ yɛn na yɛkyerɛ anidaso ko a yɛpɛ sɛ yenya. Yehowa na ɛsɛ sɛ ɔkyerɛ. Akuw abien no nyinaa ani betumi agye daakye a anigye wom ho anidaso a wɔwɔ no ho, sɛ́ ɛyɛ ɔsoro Ahenni mu anaa paradise asase so wɔ saa Ahenni no mu.—Yohane 6:44, 65; Efesofo 1:17, 18.
8. Ɛhe na 144,000 no ano a wɔsɔw no akodu, na sɛ wowie a, dɛn na ɛbɛba?
8 Kuw ketewa a wɔyɛ 144,000 no ne “Nyankopɔn Israel” a abesi honam fam Israel ananmu wɔ Onyankopɔn atirimpɔw ahorow mu. (Galatifo 6:16) Enti, nkaefo no na wɔyɛ saa honhom mu man a wɔda so wɔ asase so no. Wɔresɔ saa nkaefo no ano ama awiei koraa no wɔabenya Yehowa anim dom. Ɔsomafo Yohane hui sɛ eyi rekɔ so wɔ anisoadehu mu, na ɔbɔɔ amanneɛ sɛ: “Mihuu ɔbɔfo foforo a okura Onyankopɔn a ɔte ase no nsɔano sɛ ofi owia apuei reba, na ɔde nne kɛse teɛɛm kyerɛɛ abɔfo baanan a wɔama wɔn kwan sɛ wɔnhaw asase ne ɛpo no sɛ: Monnhaw asase anaa ɛpo anaa nnua kosi sɛ yɛde agyirae besisi yɛn Nyankopɔn nkoa moma so. Na metee wɔn a wɔasɔ wɔn ano no dodow: Mpem ɔha aduanan anan na wɔasɔ wɔn ano [honhom fam] Israel mma mmusuakuw nyinaa mu.” (Adiyisɛm 7:2-4) Esiane sɛ ɛda adi sɛ honhom mu Israelfo ano a wɔsɔw yi adu akyiri nti, ɛkyerɛ sɛ, ɛrenkyɛ na nsɛm akɛse asisi. Ade biako ne sɛ, “ahohia kɛse no,” bere a abɔfo baanan no begyae mframa anan a ɛsɛe ade no mu ma abɔ afa asase so no abɛn pɛɛ.—Adiyisɛm 7:14.
9. Kuw ketewa no bu nnipakuw kɛse a wɔredɔɔso no dɛn?
9 Nnipakuw kɛse a wɔaboaboa wɔn ano dedaw no dodow yɛ ɔpepem pii. Hwɛ sɛnea eyi ma nkaefo no koma ani gye! Ɛwom sɛ kuw ketewa no mufo dodow kɔ so huan de, nanso wɔatete nnipakuw kɛse no mu mmarima bi a wɔfata asiesie wɔn na wɔadi Onyankopɔn asase so ahyehyɛde a emu retrɛw no mu asɛyɛde ahorow ho dwuma. (Yesaia 61:5) Sɛnea Yesu kyerɛe no, nnipa bi befi ahohiahia kɛse no mu aka.—Mateo 24:22.
“Munnsuro!”
10. (a) Ntua bɛn na wɔde rebɛba Onyankopɔn nkurɔfo so, na ɛbɛkɔ akowie dɛn mu? (b) Nsɛm bɛn na wobisa yɛn mu biara?
10 Wɔabrɛ Satan ne n’adaemone ase aba asase so mpɔtam ha. Wɔredaadaa ɔne ne dɔm ma wɔde wɔn ahoɔden nyinaa atow ahyɛ Yehowa nkurɔfo so. Wɔaka saa ntua yi a wɔahyɛ ho nkɔm wɔ Bible mu no ho asɛm sɛ Gog a ofi Magog ntua. Henanom titiriw na Ɔbonsam tow hyɛ wɔn so? So ɛnyɛ kuw ketewa no mufo a wotwa to, Onyankopɔn honhom mu Israel a wɔte “asase mfinimfini” dwoodwoo no? (Hesekiel 38:1-12) Yiw, nanso anokwafo a wɔasra wɔn no nkaefo, ne wɔn mfɛfo anokwafo, nguan foforo no, behu sɛnea Satan ntua no bɛma Yehowa Nyankopɔn ayɛ ade anwonwakwan so. Ɔde ne ho begye asɛm no mu adi ama ne nkurɔfo, na ɛde “[Yehowa] da kɛse a ɛyɛ hu no” aba. (Yoel 2:31) Ɛnnɛ, akoa nokwafo ne ɔbadwemma no reyɛ asase so nyinaa adwuma bi a ɛho hia a egye nkwa, na wɔrebɔ gye a Yehowa de ne ho rebegye asɛm no mu yi ho kɔkɔ. (Malaki 4:5; 1 Timoteo 4:16) Wonam Yehowa Ahenni ho asɛmpa a woka no so reboa denneennen ma wɔayɛ saa adwuma no? Wobɛkɔ so ayɛ saa adwuma no sɛ Ahenni dawurubɔfo kokodurufo?
11. Dɛn nti na akokoduru ho hia nnɛ?
11 Esiane mprempren wiase nsɛm tebea nti, hwɛ sɛnea ɛyɛ bere a ɛfata sɛ kuw ketewa no tie Yesu nsɛm a ɔka kyerɛɛ wɔn no: “Kuw ketewa, munnsuro!” Akokoduru a ɛte saa ho hia, esiane nea ɛrekɔ so nnɛ a ɛne Yehowa atirimpɔw hyia nti. Kuw ketewa no muni biara hu hia a ɛho hia sɛ ogyina mu kodu awiei. (Luka 21:19) Sɛnea kuw ketewa no Awurade ne wɔn Wura, Yesu Kristo, gyinaa mu dii nokware kosii sɛ owiee n’asase so asetra no, saa ara na ɛsɛ sɛ nkaefo no mu biara gyina mu na odi nokware.—Hebrifo 12:1, 2.
12. Te sɛ Yesu no, ɔkwan bɛn so na Paulo tuu Kristofo a wɔasra wɔn no fo sɛ wonnsuro?
12 Ɛsɛ sɛ wɔn a wɔasra wɔn no nyinaa nya ɔsomafo Paulo adwene no ara bi. Hyɛ no nsow sɛ nsɛm a baguam dawurubɔfo a wɔasra no yi ka faa owusɔre ho no ne Yesu afotu a ese wonnsuro no hyia. Paulo kyerɛwee sɛ: “Kae Yesu Kristo a ɔsɔre fii awufo mu a ofi Dawid ase, sɛnea m’asɛmpa no te no. Ɛno mu na mihu amane bedu ɔkyere mu sɛ ɔdebɔneyɛfo, nanso Onyankopɔn asɛm de, wɔnkyeree no. Eyi nti metɔ me bo ase amane nyinaa mu, wɔn a wɔapaw wɔn no nti, na wɔn nso anya nkwagye a ɛwɔ Kristo Yesu mu no ne daa anuonyam. Nokwasɛm ni: sɛ yɛne no wui a, yɛne no bɛtra ase nso. Sɛ yɛtɔ yɛn bo ase a, yɛne no bedi hene. Sɛ yɛpa no a, ɔno nso bɛpa yɛn. Sɛ yɛnyɛ anokwafo a, ɔno de, ɔyɛ ɔnokwafo ara, efisɛ ontumi mpa ne ho akyi.”—2 Timoteo 2:8-13.
13. Gyidi pintinn bɛn na kuw ketewa no mufo wɔ, na eyi ka wɔn ma wɔyɛ dɛn?
13 Te sɛ ɔsomafo Paulo no, kuw ketewa no nkaefo a wɔasra wɔn no pɛ sɛ wogyina amanehunu ano bere a wɔka Onyankopɔn Asɛm no mu nkrasɛm a tumi wom no. Wɔn gyidi yɛ pintinn bere a wɔkɔ so de wɔn ho to Onyankopɔn bɔhyɛ ahorow a ɛfa nkwagye ne nea ese, sɛ wodi nokware kodu owu mu a, wɔde “nkwa abotiri” bɛma wɔn no ho so no. (Adiyisɛm 2:10) Ɛdenam nyan a wobenyan wɔn afrɛ so na wɔasakra wɔn so no, wɔde wɔn bɛkɔ akɔka Kristo ho na wɔne no adi ade sɛ ahemfo. Hwɛ nkonim a wɔn mudi mu a wokurae ama wɔadi wɔ wiase so!—1 Yohane 5:3, 4.
Anidaso Soronko
14, 15. Ɔkwan bɛn so na kuw ketewa no wusɔre ho anidaso no yɛ soronko?
14 Kuw ketewa no wusɔre ho anidaso no yɛ soronko. Akwan bɛn so? Ade biako ne sɛ, edi adesamma nyinaa wusɔre a “wɔn a wɔteɛ ne wɔn a wɔnteɛ” benya no anim. (Asomafo no Nnwuma 24:15) Nokwarem no, wɔn a wɔasra wɔn no wusɔre no ba wɔ ɔkwan bi a ɛho hia so, sɛnea nsɛm a ɛwɔ 1 Korintofo 15:20, 23 yi da no adi pefee no: “Wɔanyan Kristo afi awufo mu ayɛ wɔn a wɔadeda no mu aba a edi kan. Na obiara wɔ ne dibea. Kristo ne aba a edi kan, ansa na wɔn a wɔyɛ Kristo dea [wɔ] ne ba mu no di hɔ.” Esiane sɛ kuw ketewa no wɔ boasetɔ ne gyidi a Yesu daa no adi no bi nti, wonim nea ɛwɔ hɔ ma wɔn bere a wowie wɔn asase so adwuma no, titiriw fi bere a nokware Awurade no baa n’asɔrefi 1918 no.—Malaki 3:1.
15 Paulo de ntease foforo ka nea enti a ɛsɛ sɛ yebu saa owusɔre no soronko no ho. Sɛnea kyerɛwtohɔ a ɛwɔ 1 Korintofo 15:51-53 kyerɛ no, ɔkyerɛwee sɛ: “Hwɛ, meka mo ahintasɛm: Yɛn nyinaa renna, na yɛn nyinaa bɛsakra afrɛ so, amonom, akyiri torobɛnto no hyɛn so. . . . Na etwa sɛ nea ɛporɔw yi hyɛ nea ɛmporɔw no, na nea ewu yi nya hyɛ nea enwu no.” Saa nsɛm yi fa kuw ketewa no mufo a wowu wɔ Kristo ba no mu no ho. Wɔhyɛ nea enwu no ‘afrɛ so, amonom hɔ ara,’ a ɛho nhia sɛ wɔda wɔ owu mu bere tenteenten.
16, 17. Ɛdefa owusɔre ho anidaso a Kristofo a wɔasra wɔn a wɔwɔ hɔ nnɛ no wɔ ho no, ɔkwan bɛn so na wɔanya nhyira titiriw?
16 Ntease yi nti, yebetumi ate ɔsomafo Yohane nsɛm a ɛwɔ Adiyisɛm 14:12, 13 no ase. Ɔkyerɛwee sɛ: “Ɛha na ahotefo boasetɔ wɔ, wɔn a wokura Onyankopɔn ahyɛde ne Yesu gyidi mu no. Na metee nne bi fii soro a ɛkae sɛ: Kyerɛw sɛ: Nhyira ne awufo a wowu Awurade mu fi mprempren rekɔ yi. Honhom no se: Yiw, wɔbɛhome afi wɔn brɛ no mu; na wɔn nnwuma di wɔn akyi.”
17 Akatua soronko bɛn na ɛwɔ hɔ ma kuw ketewa no nkaefo sɛɛ yi! Wɔn wusɔre bɛba ntɛm, wɔn wu akyi pɛɛ. Nsakrae a ɛyɛ nwonwa bɛn ara na nkaefo no hu bere a wofi wɔn dwumadi ase wɔ ahonhom atrae no! Esiane sɛ wogu so hyɛ kuw ketewa no anuonyam nnɛ, na Bible nkɔmhyɛ atitiriw anya mmamu adu akyiri nti, nokwarem no, ɛnsɛ sɛ kuw ketewa no mufo a wotwa to ‘suro biribiara.’ Na wɔn akokoduru no yɛ nkuranhyɛ ma nnipakuw kɛse no mufo a ɛsɛ sɛ wɔn nso nya akokoduru a ɛte saa ara bere a wɔhwɛ kwan sɛ wobegye wɔn nkwa wɔ amanehunu bere a ɛsen biara a aba asase so pɛn no mu no.
18, 19. (a) Dɛn nti na bere a yɛte mu yi gye ntɛmpɛ? (b) Dɛn nti na ɛnsɛ sɛ wɔn a wɔasra wɔn ne nguan foforo no mu biara suro?
18 Kuw ketewa no dwumadi ahorow ho nsɛm a wɔka no tumi ma wɔne nnipakuw kɛse no kɔ so suro nokware Nyankopɔn no. N’atemmu dɔn adu, na bere pa a aka no som bo. Nokwarem no, bere a aka a ɛsɛ sɛ afoforo de yɛ ade no sua. Nanso, yɛn de, yensuro sɛ Onyankopɔn atirimpɔw remma mu. Ɛbɛbam ɔkwan biara so!
19 Yɛate ɛnne akɛse a efi soro no nnyigyei dedaw sɛ: “Wiase ahenni ayɛ yɛn Awurade ne Kristo no de, na obedi hene daa daa.” (Adiyisɛm 11:15) Nokwarem no, Yehowa, Oguanhwɛfo Kɛse no, rekyerɛ ne nguan nyinaa kwan wɔ “akwantrenee so, ne din nti.” (Dwom 23:3) Wɔrekyerɛ kuw ketewa no kwan tee ma wɔakonya wɔn soro akatua no. Na wobegye nguan foforo no nkwa dwoodwoo wɔ ahohiahia kɛse no mu ma wɔakonya daa nkwa mu anigye wɔ asase so wɔ Onyankopɔn anuonyam Ahenni a Kristo Yesu di so no ase. Enti ɛwom sɛ Yesu kaa ne nsɛm no kyerɛɛ kuw ketewa no de, nanso akyinnye biara nni ho sɛ Onyankopɔn asomfo a wɔwɔ asase so nyinaa wɔ nea enti a ɛsɛ sɛ wotie ne nsɛm no: “Kuw ketewa, munnsuro!”
Wubetumi Akyerɛkyerɛ Mu?
◻ dɛn nti na ɛsɛ sɛ yɛhwɛ kwan sɛ kuw ketewa no mufo a wɔaka no dodow so behuan?
◻ nkaefo a wɔasra wɔn no tebea te dɛn nnɛ?
◻ gog a ofi magog ntua a ɛreba nyinaa akyi no, dɛn nti na ɛnsɛ sɛ kristofo suro?
◻ dɛn nti na 144,000 no wusɔre ho anidaso no yɛ soronko, titiriw ɛnnɛ?