Dɛn Na Yɛyɛ a Ɛkyerɛ Sɛ Yennyina Ɔfã Biara Akyi?

Yesu ka kyerɛɛ n’akyidifo sɛ, ɛnsɛ sɛ ‘wɔka wiase no ho’ anaa wɔde wɔn ho bɔ wiase no. (Yohane 15:19) Wei kyerɛ sɛ, sɛ ɛba amanyɔsɛm anaa akodi a, ɛnsɛ sɛ yɛtaa ɔfã biara akyi. Nanso yɛreka yi, ɛnna fam sɛ yɛbɛyɛ saa. Ɛtɔ da a, esiane sɛ yenni ɔfã biara nti, ebinom tumi di yɛn ho fɛw anaa wɔserew yɛn. Ɛnde, yɛbɛyɛ dɛn akɔ so adi Yehowa Nyankopɔn nokware, na yɛankogyina ɔfã biara akyi?

1. Sɛn na nokware Kristofo hu nnipa aban?

Kristofo bu aban a edi tumi wɔ ɔman a wɔte mu no, na Yesu asɛm a ɔkaa sɛ “muntua Kaesare de mma Kaesare” no, wɔde yɛ adwuma. Ɛno nti, mmara biara a aban no ahyɛ no, wodi so. Ebi ne sɛ, wotua tow. (Marko 12:17) Bible ma yehu sɛ, sɛ ɛnyɛ Yehowa na ama kwan a, anka nnipa aban biara rentumi nni tumi. (Romafo 13:1) Wei ma yehu sɛ, tumi a nnipa aban wɔ no nnu Yehowa de ho baabiara. Enti yɛn de, Onyankopɔn na yɛde yɛn ani to no so, na yenim sɛ n’Ahenni no nko ara na ebetumi ayi nnipa haw afi hɔ.

2. Yɛbɛyɛ dɛn akyerɛ sɛ yenni ɔfã biara?

Yesu amfa ne ho anhyehyɛ amanyɔsɛm mu. Saa ara na yɛn nso, yɛmfa yɛn ho nhyehyɛ amanyɔsɛm mu. Bere bi, Yesu yɛɛ anwonwade bi. Bere a nkurɔfo a wɔwɔ hɔ no hui no, wɔyɛe sɛ wɔbɛkyere no asi no hene. Nanso, wamfa ne ti annye. (Yohane 6:15) Adɛn ntia? Akyiri yi ɔkaa sɛ, “m’Ahenni mfi wiase.” (Yohane 18:36) Yɛn a yɛyɛ Yesu akyidifo nso, nneɛma bɛn na yɛyɛ de kyerɛ sɛ yennyina ɔfã biara akyi? Baako ne sɛ, yɛnkɔ ɔko. (Kenkan Mika 4:3.) Afei nso, ɛwom sɛ yemmu ɔman no ahyɛnsode te sɛ frankaa animtiaa, nanso yɛmfa nidi soronko biara mma no. (1 Yohane 5:21) Bio nso, yɛntaa amanyɔkuw anaa frankaatufo biara akyi, na saa ara nso na yɛnkasa ntia wɔn. Yɛyɛ saa nneɛma yi nyinaa de kyerɛ sɛ Onyankopɔn Ahenni no nko ara na yɛtaa akyi anaa yɛde yɛn ho ato so.

SUA PII KA HO

3. Nokware Kristofo nnyina ɔfã biara akyi

Yebetumi asuasua nhwɛso pa a Yesu ne n’akyidifo no yɛe no. Monkenkan Romafo 13:1, 5-7 ne 1 Petro 2:13, 14. Afei, hwɛ VIDEO yi. Muwie a munsusuw nsɛmmisa yi ho:

VIDEO: Nokware Kristofo Nnyina Ɔfã Biara Akyi—Ɔfã 1 (4:28)

• Adɛn nti na ɛsɛ sɛ yɛda obu adi kyerɛ aban atumfoɔ?

• Nneɛma bɛn na yɛyɛ a ɛkyerɛ sɛ yɛbrɛ yɛn ho ase hyɛ atumfoɔ no ase?

Sɛ ɔko si aman mmienu ntam a, ɛyɛ a aman bi tumi ka sɛ wonnyina ɔfã biara akyi, nanso wobɛkɔ mu no, na wɔyɛ nneɛma bi de boa aman a wɔreko no. Enti sɛ yɛka sɛ obi nnyina ɔfã biara akyi a, dɛn paa na ɛkyerɛ? Monkenkan Yohane 17:16. Afei, hwɛ VIDEO yi. Muwie a munsusuw asɛmmisa yi ho:

VIDEO: Nokware Kristofo Nnyina Ɔfã Biara Akyi—Ɔfã 2 (3:11)

• Sɛ yɛka sɛ obi nnyina ɔfã biara akyi a, ɛkyerɛ sɛn?

Sɛ ɛba sɛ atumfoɔ anaa aban no ka sɛ yɛ biribi a etia Onyankopɔn mmara a, dɛn na wobɛyɛ? Monkenkan Asomafo Nnwuma 5:28, 29. Afei, hwɛ VIDEO yi. Muwie a munsusuw nsɛmmisa yi ho:

VIDEO: Nokware Kristofo Nnyina Ɔfã Biara Akyi—Ɔfã 3 (1:18)

• Sɛ aban no hyehyɛ mmara bi, na sɛ ɛne Onyankopɔn mmara nhyia a, hena na ɛsɛ sɛ yetie no?

• Tebea ahorow bi wɔ hɔ a, sɛ Kristoni bi hyia a, ɛnsɛ sɛ otie aban no. Ebi ne dɛn?

4. Nneɛma a yedwinnwen ho ne nneɛma a yɛyɛ no, ɛsɛ sɛ ɛkyerɛ sɛ yennyina ɔfã biara akyi

Monkenkan 1 Yohane 5:21. Afei, hwɛ VIDEO yi. Muwie a munsusuw nsɛmmisa yi ho:

VIDEO: Nea Enti a Nokware Kristofo Hia Akokoduru—Sɛnea Ɛbɛyɛ a Yɛrennyina Ɔfã Biara Wɔ Amanyɔsɛm Mu (2:49)

• Adɛn nti na Ayenge sii gyinae sɛ ɔrennɔm amanyɔkuw biara anaa ɔrenkyia frankaa?

• Wohwɛ a, osii gyinae pa?

Tebea afoforo bɛn na yehyia a, ebetumi ama ayɛ den sɛ yɛrennyina ɔfã biara akyi? Hwɛ VIDEO yi. Muwie a munsusuw nsɛmmisa yi ho:

VIDEO: Nea Yɛasua Afi Ɔwɛn-Aban Mu—Nnyina Ɔfã Biara Akyi Wɔ Wiase a Emu Apaapae Yi Mu (5:16)

• Sɛ agokansi bi rekɔ so wɔ aman mmienu anaa nea ɛboro saa ntam a, yɛbɛyɛ dɛn akyerɛ sɛ yennyina ɔfã biara akyi?

• Sɛ aban bi si gyinae, na sɛ ɛkɔ tia wo anaasɛ ɛboa wo mpo a, wobɛyɛ dɛn akyerɛ sɛ wunnyina ɔfã biara akyi?

• Wɔn a yɛne wɔn bɔ, ne amanneɛbɔ a yɛte wɔ TV, radio, anaa intanɛt so no betumi ama ayɛ den sɛ yɛrennyina ɔfã biara akyi. Ɔkwan bɛn so?

NEA YƐASUA

Kristofo yɛ nea wobetumi biara sɛ wɔremfa wɔn ho mfɔrefɔre amanyɔsɛm. Enti wɔde wɔn nsusuwii, wɔn nneyɛe, ne wɔn kasa nyinaa kyerɛ sɛ wonnyina ɔfã biara akyi.

Ntimu

• Ɔman biara a yɛte mu no, sɛn na ɛsɛ sɛ yehu aban a ɛwɔ hɔ no?

• Sɛ ɛba amanyɔsɛm a, adɛn nti na ɛnsɛ sɛ yegyina ɔfã biara akyi?

• Tebea ahorow bɛn na ebetumi ama ayɛ den sɛ yɛrennyina ɔfã biara akyi?

YƐ NHWEHWƐMU

Hwɛ video yi, na wubehu nneɛma bi a ebia ɛho behia sɛ yɛde bɔ afɔre sɛnea ɛbɛyɛ a yɛrennyina ɔfã biara akyi.

Yehowa Nnii Yɛn Huammɔ Da (3:14)

Dɛn na mmusua betumi ayɛ de asiesie wɔn ho, na sɛ wohyia tebea bi a ebetumi ama ayɛ den sɛ wɔrennyina ɔfã biara akyi a, wɔahu nea wɔbɛyɛ?

Kura Ɔfã Biara a Yenni No Mu Wɔ Baguam (4:25)

Ebinom adwene yɛ wɔn sɛ, sɛ obi bɔ ne man ho ban a, ɛyɛ abasobɔde a ɛsen biara a obetumi anya wɔ n’asetenam. Nanso hwɛ nea enti a yebetumi aka sɛ saa asɛm no nyɛ nokware.

“Onyankopɔn Fam De Ade Nyinaa Betumi Ayɛ Yiye” (5:19)

Sɛ worehwehwɛ adwuma a, wobɛyɛ dɛn apaw adwuma a ɛremma womfa wo ho mfɔrefɔre wiase no?

“Obiara Bɛsoa N’ankasa Adesoa” (Ɔwɛn-Aban, March 15, 2006)

Yɛyɛ Kristofo yi de, ɛnyɛ dɛn ara a nkurɔfo bɛsɔre atia yɛn anaa wɔbɛtan yɛn ani. Ɛsɛ sɛ wei ma yɛn koma tu anaa?

1. Adɛn nti na yɛhwɛ kwan sɛ nkurɔfo bɛtan yɛn ani?

Bible ka no pen sɛ: “Wɔn a wɔpɛ sɛ wɔde onyamesom pa tena ase sɛ Kristo Yesu akyidifo nyinaa, nkurɔfo bɛtan wɔn ani.” (2 Timoteo 3:12) Yɛhwɛ Yesu sɛɛ a, esiane sɛ wamfa ne ho amfɔrefɔre Satan wiase no nti, nkurɔfo tan n’ani. Yɛn nso, yɛmfa yɛn ho mfɔrefɔre wiase no. Enti sɛ aban ahorow ne ɔsom ahorow tan yɛn ani a, ɛnyɛ yɛn nwonwa.—Yohane 15:18, 19.

2. Yɛbɛyɛ dɛn asiesie yɛn ho nnɛ, na sɛ nkurɔfo tan yɛn ani a, yɛatumi agyina pintinn?

Ɛsɛ sɛ yɛhyɛ gyidi a yɛwɔ wɔ Yehowa mu no den. Sɛ wei bɛyɛ yiye a, da biara, ɛsɛ sɛ yegye bere kenkan n’Asɛm no, na yegye bere bɔ mpae. Afei nso, ɛnsɛ sɛ yɛma asafo nhyiam pa yɛn ti so. Sɛ yɛyɛ saa nneɛma yi nyinaa a, ɛbɛhyɛ yɛn den ama yɛanya akokoduru, na sɛ ɛba sɛ afoforo anaa yɛn abusuafo mpo tan yɛn ani a, yɛbɛkɔ so adi nokware. Yɛhwɛ ɔsomafo Paul sɛɛ a, nkurɔfo tan n’ani paa. Nanso ɔkaa sɛ: “Yehowa ne me boafo; merensuro.”—Hebrifo 13:6.

Ade baako nso a ɛbɛboa yɛn ma yɛanya akokoduru ne sɛ yɛbɛyere yɛn ho ayɛ asɛnka adwuma no. Nea enti a ɛte saa ne sɛ, asɛnka adwuma no boa ma yɛde yɛn ho to Yehowa so, na ɛma yetumi di onipa ho suro so. (Mmebusɛm 29:25) Sɛ wunya akokoduru ka asɛmpa no saa bere yi a, ɛbɛhyɛ wo den, na sɛ ɛba sɛ daakye aban no bara adwuma a yɛreyɛ no mpo a, worennyae asɛm no ka.—1 Tesalonikafo 2:2.

3. Sɛ nkurɔfo tan yɛn ani na yemia yɛn ani gyina mu a, mfaso bɛn na yenya?

Ɛwom, ɛnyɛ nea yɛpɛ ne sɛ nkurɔfo bɛtan yɛn ani, nanso sɛ yemia yɛn ani gyina mu a, ɛma yɛn gyidi yɛ den. Afei nso ɛma yɛbɛn Yehowa, efisɛ edu baabi na yɛte nka sɛ yɛn ahoɔden nyinaa asa a, ɔhyɛ yɛn den. (Kenkan Yakobo 1:2-4.) Sɛ Yehowa hu sɛ yɛrehu amane a, ɛyɛ a ɛyɛ no yaw paa. Nanso sɛ ohu sɛ nea yɛrefa mu nyinaa akyi, yɛreyere yɛn ho sɛ yebedi no nokware a, ɛma n’ani gye. Bible ka sɛ: “Sɛ adepa nti muhu amane na mode animia gyina mu a, ɛno na ɛsɔ Onyankopɔn ani.” (1 Petro 2:20) Sɛ nkurɔfo tan yɛn ani na sɛ yɛyere yɛn ho di Yehowa nokware a, ɔbɛma yɛanya daa nkwa wɔ wiase foforo no mu. Ɛhɔ de, ɛremma sɛ Yehowa a yɛresom no nti, obi bɛtan yɛn ani.—Mateo 24:13.

SUA PII KA HO

4. Sɛ w’abusuafo sɔre tia wo a, wubetumi agyina mu

Ná Yesu nim paa sɛ, sɛ yɛyɛ yɛn adwene sɛ yɛbɛsom Yehowa a, yɛn abusuafo betumi asɔre atia yɛn, enti ɔkaa ho asɛm kyerɛɛ n’akyidifo no. Monkenkan Mateo 10:34-36. Muwie a munsusuw asɛmmisa yi ho:

• Sɛ obi si gyinae sɛ ɔbɛsom Yehowa a, dɛn na n’abusuafo betumi ayɛ no?

VIDEO: Yehowa De Yɛn Aba Ne Fie (5:13)

• Sɛ wo busuani anaa w’adamfo bi mpɛ sɛ wosom Yehowa a, dɛn na wobɛyɛ?

Monkenkan Dwom 27:10 ne Marko 10:29, 30. Sɛ mokan kyerɛwsɛm biara wie a, munsusuw asɛmmisa yi ho:

• Sɛ w’abusuafo anaa wo nnamfo sɔre tia wo a, sɛn na saa kyerɛwsɛm yi betumi ahyɛ wo den?

5. Sɛ nkurɔfo tan w’ani a, kɔ so ara som Yehowa

VIDEO: Wɔtan Wɔn Ani, Nanso Wonyaa Akokoduru (6:27)

• Anuanom a wɔn ho asɛm wɔ video no mu no, dɛn na wɔyɛe a ɛhyɛ wo den?

Monkenkan Asomafo Nnwuma 5:27-29 ne Hebrifo 10:24, 25. Sɛ mokan kyerɛwsɛm biara wie a, munsusuw asɛmmisa yi ho:

• Sɛ aban no ka sɛ yennyae asafo nhyiam ne asɛnka kɔ a, adɛn nti na ehia sɛ yɛkɔ so ara som Yehowa?

6. Yehowa bɛboa wo ama woagyina mu

VIDEO: Yehowa Nyankopɔn Bɛhyɛ Me Den (3:40)

• Anuanom a wɔwɔ video no mu no, dɛn na ɛboaa wɔn ma wotumi gyinaa ɔsɔretia a wohyiae no ano?

Monkenkan Romafo 8:35, 37-39 ne Filipifo 4:13. Sɛ mokan kyerɛwsɛm biara wie a, munsusuw asɛmmisa yi ho:

• Dɛn na ɛwɔ kyerɛwsɛm yi mu a ɛma wunya awerɛhyem sɛ, ɔsɔretia biara a wubehyia no, wubetumi agyina mu ama ayɛ yiye?

Monkenkan Mateo 5:10-12. Muwie a munsusuw asɛmmisa yi ho:

• Sɛ nkurɔfo tan yɛn ani mpo a, yɛn ani betumi agye. Adɛn ntia?

NEA YƐASUA

Sɛ nkurɔfo tan yɛn ani, na Yehowa hu sɛ ne nyinaa akyi yɛda so ara resom no a, ɛyɛ a n’ani sɔ paa. Ɔtaa biara a yebehyia no, obetumi aboa yɛn ama yɛagyina ano!

Ntimu

• Adɛn nti na ɛsɛ sɛ Kristofo hwɛ kwan sɛ nkurɔfo bɛtan wɔn ani?

• Dɛn na wubetumi ayɛ de asiesie wo ho nnɛ, na sɛ wuhyia ɔtaa a, woatumi agyina mu?

• Dɛn na ebetumi ama woanya awerɛhyem sɛ, sɛ nkurɔfo tan w’ani sɛ dɛn mpo a, wubetumi akɔ so asom Yehowa?

YƐ NHWEHWƐMU

Esiane sɛ onua aberante bi kaa sɛ ɔrenkɔ sraadi nti, wɔde no kɔtoo afiase. Tie n’anom asɛm, na hwɛ sɛnea Yehowa boaa no ma ogyinaa mu.

Nya Boasetɔ Bere a Worehyia Ɔtaa (2:34)

Hwɛ video yi, na wubehu nea ɛboaa awarefo bi ma wɔkɔɔ so dii Yehowa nokware, ɛmfa ho sɛ aban no tan wɔn ani mfe pii no.

Yɛasom Yehowa wɔ Nsakrae Mmere Mu (7:11)

Sɛ nkurɔfo tan w’ani a, dɛn na ɛbɛboa wo ama woanya akokoduru agyina mu? Kenkan saa asɛm yi, na wubenya ho mmuae.

“Siesie Wo Ho Nnɛ Ma Ɔtaa” (Ɔwɛn-Aban, July 2019)

Sɛ yɛn abusuafo sɔre tia yɛn a, ɛsɛ sɛ yɛyɛ yɛn ade sɛn, na dɛn na ɛbɛboa yɛn ama yɛadi Yehowa nokware?

“Nokware no, ‘Ɛmfa Asomdwoe Mma, na Mmom Nkrante’” (Ɔwɛn-Aban, October 2017)