Yesu Asetra Ne Ne Som Adwuma

Nkradi Afotu Foforo

YESU ne asomafo no rebefi abansoro dan no mu. Ɔkɔ so ka sɛ: “Eyinom na maka makyerɛ mo na moanhintiw.” Afei ɔde kɔkɔbɔ a anibere wom ma sɛ: “Wobetu mo afi hyiadan mu; mpo ɛbere reba a obiara a obekum mo besusuw sɛ ɔde resom Nyankopɔn.”

Ɛda adi sɛ kɔkɔbɔ yi haw asomafo no yiye. Ɛwom sɛ na Yesu adi kan aka sɛ wiase no bɛtan wɔn de, nanso wanka sɛ wobekum wɔn. Yesu kyerɛkyerɛ mu sɛ: “Manka mo eyinom mamfi mfiase, efisɛ me ne mo wɔ hɔ.” Nanso, hwɛ sɛnea eye sɛ ɔbɛma wɔahu asɛm yi na ama wɔada wɔn ho so ansa na wakɔ!

Yesu toa so sɛ: “Afei de, merekɔ nea ɔsomaa me no nkyɛn, na mo mu biara mmisa me sɛ: Ɛhe na worekɔ?” Ná wɔadi kan abisa no nea ɔrekɔ saa anwummere no, nanso afei de, nea ɔka kyerɛɛ wɔn no ama wɔn ho adwiriw wɔn araa ma wɔammisa no eyi ho asɛm bio. Sɛnea Yesu ka no: “Sɛ maka eyi makyerɛ mo nti, awerɛhow ahyɛ mo koma ma.” Ná ɛnyɛ ɔtaa a ɛyɛ hu a wobehyia ne sɛ wobekum wɔn a wohui no nkutoo nti na asomafo no werɛ ahow, na mmom esiane sɛ wɔn Wura no rebegyaw wɔn hɔ nti.

Enti, Yesu kyerɛkyerɛ mu sɛ: “Eye ma mo sɛ mekɔ. Na sɛ mankɔ a, okyigyinafo no remma mo nkyɛn; na sɛ mekɔ a, mɛsoma no aba mo nkyɛn.” Yesu betumi atra faako pɛ wɔ bere koro mu, nanso sɛ ɔwɔ soro a, obetumi asoma okyigyinafo a ɛne Onyankopɔn honhom kronkron no akɔ n’akyidifo nkyɛn baabiara a wɔwɔ wɔ asase so. Enti Yesu kɔ no bɛyɛ nea mfaso wɔ so.

Yesu kyerɛ sɛ honhom kronkron no ‘beyi wiase ntɛn bɔne ne trenee ne atemmu ho.’ Wiasefo bɔne a ɛne Onyankopɔn Ba no mu gyidi a wɔankyerɛ no bɛda adi. Nea ɛka ho bio no, wɔde ɔtreneeni a Yesu yɛ no ho adanse a edi mu bɛma denam n’Agya nkyɛn a ɔbɛkɔ wɔ soro no so. Na huammɔ a Satan ne ne wiase bɔne no adi sɛ wɔantumi ansɛe Yesu mudi mu kura no yɛ adanse a edi mu a ɛkyerɛ sɛ wɔabu atɛn atia wiase no sodifo.

Yesu toa so sɛ: “Mewɔ nsɛm pii bio meka mekyerɛ mo, nanso muntumi nsoa mprempren.” Enti Yesu hyɛ bɔ sɛ sɛ ohwie honhom kronkron a ɛyɛ Onyankopɔn adeyɛ tumi no ma wɔn a, ɛbɛkyerɛ wɔn kwan akɔ nneɛma yi ntease mu sɛnea wobetumi ate ase.

Ade titiriw a na asomafo no nte ase ne sɛ Yesu bewu na afei wɔayi ne ho adi akyerɛ wɔn ne wusɔre akyi. Enti wobisa wɔn ho wɔn ho sɛ: “Dɛn na ose yɛn sɛ: Aka kakraa na munhu me, na bio aka kakraa mubehu me, ɛne sɛ: Merekɔ Agya no nkyɛn yi?”

Yesu hu sɛ wɔpɛ sɛ wobisa no biribi, enti ɔkyerɛkyerɛ mu sɛ: “Nokware, nokware, mise mo sɛ: Mubesu na moatwa adwo, na wiasefo ani begye; na mo de, mo werɛ bɛhow; nanso mo awerɛhow no bɛdan anigye.” Ɛda a edi hɔ no awia a wokum Yesu no, nyamesom mu akannifo wiasefo no ani gye, nanso asuafo no di awerɛhow. Nanso, wɔn awerɛhowdi no dan anigye, bere a wonyan Yesu no! Na wɔn anigye no kɔ so bere a wɔ Pentekoste no, ɔmaa wɔn tumi sɛ wɔnyɛ n’Adansefo denam Onyankopɔn honhom kronkron a ohwie guu wɔn so no so no!

Yesu de asomafo no tebea toto ɔbea a ɔreko awo de ho, na ɔka sɛ: “Ɔbea, sɛ ɔrewo a, ohu awerɛhow, efisɛ ne dɔn adu.” Na sɛnea sɛ onya wo ne ba no a, ɔnkae n’ahohia bio no, Yesu ka sɛ: “Na mo nso, afei de, mowɔ awerɛhow; na [mesɔre a] mehu mo bio, na mo koma bɛtɔ mo yam, na mo anigye no, obi rennye mo nsam.”

Ɛde besi saa bere yi no, na asomafo no nsrɛɛ biribi Yesu din da. Nanso, afei ɔka sɛ: “Biribiara a mobɛsrɛ Agya no me din mu no, ɔde bɛma mo. . . . Na Agya no ankasa dɔ mo, efisɛ modɔ me, na moagye adi sɛ mifi Agya no nkyɛn na mebae. Mifii Agya no nkyɛn na mebaa wiase; na bio, merefi wiase na makɔ Agya no nkyɛn.”

Yesu nsɛm no yɛ nkuranhyɛ kɛse ma asomafo no. Wɔka sɛ: “Eyi mu na yegye di sɛ wufii Nyankopɔn nkyɛn na ɛbae.”

Yesu bisa sɛ: “Afei de, mugye di? Hwɛ, dɔn no reba, na anya adu sɛ mo nyinaa bɛhwete akɔ mo afie mu, na moagyaw me nko.” Ɛwom sɛ ɛyɛ den sɛ wobegye eyi adi de, nanso eyi sii ansa na ade rekye!

Yesu de ba awiei sɛ: “Eyinom na maka mo, na moanya me mu asomdwoe. Mo ho behia mo wiase de, nanso momma mo bo ntɔ mo yam! Me na madi wiase so nkonim.” Yesu dii wiase so nkonim denam Onyankopɔn apɛde a ɔde nokwaredi yɛe, a nea Satan ne ne wiase bɔɔ mmɔden yɛe sɛ wɔde bɛma wagyaa ne mudi mu no mfa ho. Yohane 16:1-33; 13:36.

▪ Yesu kɔkɔbɔ bɛn na ɛhaw n’asomafo no?

▪ Dɛn nti na na asomafo no mmisaa nea Yesu rekɔ ho asɛm no?

▪ Dɛn ankasa na asomafo no ante ase?

▪ Mfatoho bɛn na Yesu yɛ de kyerɛ sɛ asomafo no awerɛhow tebea bɛsakra ayɛ anigye tebea?

▪ Dɛn na Yesu ka sɛ ɛrenkyɛ asomafo no bɛyɛ?

▪ Ɔkwan bɛn so na Yesu di wiase so nkonim?