So Papa Bedi Bɔne So Nkonim Da Bi?

BƐYƐ nea ɛreyɛ adu mfe mpem abien a atwam ni no, ná wɔredi Yesu Kristo, ɔbarima a onnii mfomso biara no asɛm a ebetumi ama wɔakum no. Esiane sɛ ɔkaa nokware nti, ná nnipa abɔnefo repam ne tiri so pɛ sɛ wɔsɛe no. Wɔbɔɔ no atoro sobo sɛ otutu aban ase, na nnipakuw teɛteɛɛm sɛ wonkum no. Roma amrado bi a n’ankasa amammui mu dibea som bo ma no kɛse sen duadwumfo a ɔba fam nkwa no buu Yesu fɔ ma wokum no atirimɔden so. Ná ɛte sɛ nea bɔne adi nim.

Nanso anadwo ansa na wɔrekum Yesu no, ɔka kyerɛɛ n’akyidifo no sɛ: “Me na madi wiase so nkonim.” (Yohane 16:33) Ná ɔkyerɛ dɛn? Ná nea ɔkyerɛ no bi ne sɛ bɔne a ɛwɔ wiase no amma ne bo amfuw, na wanyɛ bi antua ka nso. Ná wiase no ntumi nyɛɛ no ɔbɔnefo ɛ. (Fa toto Romafo 12:2 Phillips ho.) Bere a ɔrewu no mpo ɔbɔɔ mpae maa wɔn a na wɔrekum no no sɛ: “Agya, fa firi wɔn, na wonnim nea wɔyɛ!”​—Luka 23:34.

Yesu kyerɛe​—kosii ne wu mu​—sɛ wobetumi adi bɔne so nkonim. Ɔhyɛɛ n’akyidifo nkuran sɛ wɔn ankasa nko ntia bɔne. Wɔbɛyɛ dɛn ayɛ saa? Denam Kyerɛwnsɛm mu afotu a ese “mommfa bɔne nntua obiara bɔne so ka!” ne ‘monkɔ so mfa papa nni bɔne so nim’ a wobedi so sɛnea Yesu yɛe no so. (Romafo 12:17, 21) Nanso so ɔkwan a ɛte sɛɛ yi tumi yɛ adwuma ampa?

Bɔne a Wɔko Tiae Wɔ Dachau

Ná Else ye Germanni ɔbea bi a wɔde no too afiase wɔ Dachau a ɔde akyɛde a ɛsom bo bi, gyidi ne anidaso akyɛde no, maa Rusiani abeawa bi a wadi mfe 14.

Ná Dachau yɛ nnaduaban bi a agye dimmɔne yiye, faako a nnipa mpempem pii wuwui na wɔde ɔhaha pii, a Rusiani abeawa yi ka ho, yɛɛ aduruyɛ mu sɔhwɛ ahorow a ɛyɛ hu. Ná ɛte sɛ nea Dachau ne bɔne nhwɛso ankasa. Nanso wɔ asase a na ɛte sɛ nea entumi nsow aba yi so mpo no, papa fifii na ɛsow aba mpo.

Else dii yaw pii maa abeawa a onnii mfe aduonu a wɔhyɛɛ no nso ma ɔhwɛe bere a SS awɛmfo no too ne na mmonnaa atirimɔden so no. Else de n’ankasa nkwa too asiane mu hwehwɛɛ hokwan ahorow de kaa papa ne bɔne, ne owusɔre ho anidaso a ɛwɔ Kyerɛwnsɛm mu no ho asɛm kyerɛɛ abeawa no. Ɔkyerɛɛ n’adamfo kumaa yi sɛnea ɔbɛdɔ afoforo na ɛnyɛ sɛ ɔbɛtan wɔn. Na denam Else mmoa so no, Rusiani abeawa no faa Dachau awinyanne ahorow no mu.

Kristo nhwɛso a pɛsɛmenkominya nnim a Else pɛe sɛ odi akyi nti na ɔyɛɛ nea ɔyɛe no. Sɛ́ Yehowa Adansefo mu biako no, ná wasua sɛ ɛnsɛ sɛ ɔde bɔne tua bɔne so ka, na ne gyidi kaa no ma ɔboaa afoforo na wɔayɛ saara. Ɛwom sɛ ohuu amane wɔ Dachau de, nanso odii nniso bɔne bi so nkonim wɔ abrabɔ pa mu. Na ná ɛnyɛ ɔno nko.

Paul Johnson kyerɛw wɔ ne nhoma A History of Christianity mu sɛ “[Yehowa Adansefo] pow sɛ wɔne Nasi ɔman a wɔkasatiae sɛ ɛyɛ bɔne koraa no bɛyɛ biako ɔkwan biara so. . . . Wɔn mu ɔha mu nkyem aduɔkron ason huu ɔtaa a egu ahorow mu amane.” So na ɛyɛ akodi a anidaso biara nnim? Wɔ nhoma Values and Violence in Auschwitz mu no, Polandni asetra mu nsɛm ho nimdefo Anna Pawelczynska kaa Adansefo no ho asɛm sɛ: “Ná nneduafo kuw ketewa yi yɛ nsusuwii tumi bi a ɛyɛ den, na wodii Nasi nniso no so nkonim.”

Nanso wɔ yɛn mu pii fam no, bɔne a ɛwɔ yɛn ankasa mu na yɛko tia titiriw sen bɔne ahorow a atwa yɛn ho ahyia no. Ɛyɛ apereperedi a ɛkɔ so wɔ yɛn ankasa mu.

Bɔne a Ɛwɔ Yɛn Mu a Yebedi So Nkonim

Ɔsomafo Paulo kyerɛkyerɛɛ akodi yi mu saa kwan yi so: “Ɛnyɛ papa a mepɛ sɛ meyɛ no na meyɛ ankasa; ɛyɛ bɔne a mempɛ sɛ meyɛ no na mekɔ so yɛ.” (Romafo 7:19, The New Testament a William Barclay yɛe) Sɛnea na Paulo nim yiye no, papa yɛ nyɛ mmerɛw bere nyinaa.

Ná Eugenioa yɛ Spaniani aberante bi a ɔde mfe tenten abien ko tiaa ne bɔne su horow. Ɔkyerɛkyerɛ mu sɛ: “Ná ɛsɛ sɛ mehyɛ me ho katee. Mifi me mmofraase pɛɛ de me ho hyɛɛ ɔbrasɛe mu. Bere a na minnii mfe aduonu no, na mifi me pɛ mu de me ho hyɛ mmarima a wɔne wɔn ho da mu sakasakayɛ mmoroso mu, na nokwarem no, na m’ani gye saa asetra kwan no ho.” Dɛn na awiei koraa no, ɛma ɔpɛe sɛ ɔbɛsakra?

Eugenio kae sɛ: “Ná mepɛ se mesɔ Onyankopɔn ani, na misua fii Bible no mu sɛ ɔmpene m’asetra kwan no so. Enti misii gyinae sɛ mɛyɛ onipa soronko, na madi Onyankopɔn akwankyerɛ ahorow so. Ná ɛsɛ sɛ meko tia nsusuwii ahorow a enye na ɛyɛ fĩ a na ɛda so ara ba m’adwenem no daa. Mebɔɔ me tirim sɛ medi ɔko yi mu nkonim, na mebɔɔ mpae daa srɛɛ Onyankopɔn mmoa. Mfe abien akyi no, na nea ɛyɛ den sen biara no atwam, ewom sɛ meda so ara hyɛ me ho katee de. Nanso na apereperedi no fata. Mprempren mibu me ho, manya aware pa, ne nea ɛsen biara no, me ne Onyankopɔn ntam abusuabɔ pa. Mahu afi m’ankasa osuahu mu sɛ wubetumi adi nsusuwii bɔne ahorow so ansa na asow aba​—sɛ woyere wo ho ampa a.”

Bere biara a wɔpow nsusuwii bɔne, na wɔpow sɛ wɔde bɔne betua bɔne so ka no, papa di bɔne so nkonim. Ɛwom sɛ nkonimdi ahorow a ɛte sɛɛ hia de, nanso enyi bɔne fibea atitiriw abien no mfi hɔ. Ɛmfa ho sɛnea yɛbɛbɔ mmɔden afa, yɛrentumi nni mmerɛwyɛ ahorow a yenya fii awo mu no so nkonim korakora, na Satan da so ara wɔ adesamma so nkɛntɛnso bɔne. Enti, so tebea yi bɛsakra da bi?

Ɔbonsam a Wotu No Gu

Yesu Nokwaredi kosi owu mu no yɛɛ nkogudi kɛse maa Satan. Ɔbonsam dii nkogu wɔ mmɔden a ɔbɔe sɛ ɔbɛma Yesu agyaa ne mũdi mu no, na saa nkogudi yi na ɛhyɛɛ Satan awiei mfiase agyirae. Sɛnea Bible kyerɛkyerɛ mu no, Yesu kaa owu hwɛe sɛ “ɔnam owu so betu . . . Ɔbonsam.” (Hebrifo 2:14) Yesu wusɔre akyi no, ɔka kyerɛɛ n’asuafo no sɛ: “Wɔde ɔsoro ne asase so tumi nyinaa ama me.” (Mateo 28:18) Na ɔde saa tumi yi bedi dwuma de asɛe Satan nnwuma.

Adiyisɛm nhoma no ka da a na Yesu betu Satan afi soro no ho asɛm. Ná ɛsɛ sɛ wɔma saa Ɔbɔnefo Panyin yi ne n’adaemone no tra asase so nkutoo. Enti, Bible bɔ kɔkɔ sɛ bɔne bɛdɔɔso: “Asase ne ɛpo nnue, efisɛ Ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ yɛ tiaa.”​—Adiyisɛm 12:7-9, 12.

Bible nkɔmhyɛ kyerɛ sɛ adeyɛ titiriw yi asi dedaw​—wɔ Wiase Ko a Edi Kan bere no mu.b Ɛno ma yɛte nea enti a bɔne adɔɔso kɛse sɛnea yehu wɔ yɛn bere yi mu no ase. Nanso ɛrenkyɛ na wɔasiw Satan kwan korakora na wantumi annya obiara so nkɛntɛnso bio.​—Hwɛ Adiyisɛm 20:1-3.

Dɛn na eyi nyinaa bɛkyerɛ ama adesamma?

“Wɔrenyɛ Bɔne”

Sɛ́ Onyankopɔn Ahenni mu Hene no, ɛrenkyɛ, Yesu de ‘n’asase so tumi no’ bɛyɛ honhom fam ɔkyerɛkyerɛ a wɔde ma bio ho nhyehyɛe. ‘Trenee na wɔn a wɔte asase a ɛsow aba no so besua ampa.’ (Yesaia 26:9) Obiara behu emu mfaso horow no. Bible no ma yɛn awerɛhyem sɛ: “Wɔrenyɛ bɔne na wɔrensɛe ade bio, . . . na [Yehowa] hu bɛyɛ asase ma, sɛ nsu kata po so no.”​—Yesaia 11:9. Mprempren mpo yebetumi adi yɛn bɔne su horow no pii so. Sɛ adaemone nkɛntɛnso fi hɔ a, ɛbɛyɛ mmerɛw koraa ama yɛn sɛ ‘yebekyi bɔne na yɛayɛ papa.’​—1 Petro 3:11.

Yɛwɔ biribiara a yebegyina so anya awerɛhyem sɛ papa bedi bɔne so nkonim, efisɛ Onyankopɔn ye, na ɛnam ne mmoa so no, wɔn a wɔpɛ sɛ wɔyɛ papa no betumi adi bɔne so nim, sɛnea Yesu nam n’ankasa nhwɛso so de ho adanse mae no. (Dwom 119:68) Wɔn a mprempren wɔpɛ sɛ wɔko tia bɔne no betumi ahwɛ kwan sɛ wɔbɛtra asase a wɔatew so a Onyankopɔn Ahenni a ɛyɛ nniso a ɛbɛpopa bɔne afi hɔ koraa no di so bi so. Odwontofo no kyerɛkyerɛ nea ebefi mu aba no mu sɛ: “Ɔdom ne nokware behyia, na trenee ne asomdwoe adi mfewano. Nokware befifi asase so, na trenee afi soro ahwɛ.”​—Dwom 85:10, 11.

[Ase hɔ asɛm]