Henanom Na Wodi Wiase Hann No Akyi?

“Mohyerɛn wɔn mu sɛ akanea ewiase.”​—FILIPIFO 2:15.

 1. Dɛn na Bible no ka fa atoro nyamesom hann ahorow ho?

BIBLE no da Yesu adi pefee sɛ “hann kɛse,” “wiase hann no.” (Yesaia 9:2; Yohane 8:12) Nanso, sɛ wɔde toto ho a, nnipa kakraa bi na wodii n’akyi bere a na ɔwɔ asase so no. Nnipa dodow no ara paw sɛ wobedi atoro hann ahorow, a nokwarem no, wɔyɛ sum kurafo no akyi. Onyankopɔn asɛm ka eyinom ho asɛm sɛ: “Na saa nnipa yi yɛ atoro asomafo, nnaadaa adwumayɛfo a wɔdan wɔn ho sɛ Kristo asomafo. Na ɛnyɛ nwonwa; efisɛ Satan ankasa po dan ne ho yɛ sɛ hann bɔfo. Enti sɛ n’asomfo nso dan wɔn ho yɛ sɛ trenee asomfo a, ɛnyɛ ade kɛse bi; na ebewie wɔn sɛnea wɔn nnwuma te.”​—2 Korintofo 11: 13-15.

 2. Dɛn na Yesu kae sɛ wobegyinaa so abu nnipa atɛn?

² Wɔ bo a hann no som nyinaa akyi no, ɛnyɛ nnipa nyinaa na wɔpɛ. Yesu kae sɛ: “Eyi mmom ne atemmu no, sɛ hann no aba wiase, na nnipa dɔ sum sen hann no; efisɛ wɔn nnwuma yɛ bɔne. Na obiara a ɔyɛ bɔne no tan hann no, na ɔmma hann no ho, na wɔanyi no ne nnwuma ho ntɛn.”​—Yohane 3:19, 20.

Esum Adɔfo

 3, 4. Ɔkwan bɛn so na Yesu nna no mu nyamesom akannifo kyerɛe sɛ wɔmpɛ sɛ wodi hann no akyi?

³ Susuw sɛnea na asɛm no te bere a na Yesu wɔ asase so no ho. Onyankopɔn maa Yesu tumi sɛ ɔnyɛ anwonwade a ɛyɛ anigye na ama wɔahu sɛ ɔne Mesia no. Sɛ nhwɛso no, Homeda bi ɔmaa ɔbarima bi a wɔwoo no onifuraefo huu ade. Mmɔborohunu adeyɛ bɛn ara ni! Hwɛ anisɔ ara a ɔbarima no kyerɛe. Ɛne bere a edi kan koraa a ohuu ade! Nanso, nyamesom akannifo no yɛɛ wɔn ade dɛn wɔ ho? Yohane 9:16 se: “Farisifo no mu bi [kaa Yesu ho asɛm] sɛ: Onipa yi mfi Nyankopɔn nkyɛn, efisɛ onni Homeda.” Hwɛ sɛnea na wɔn koma asɛe! Ɛha no, wasa yare wɔ anwonwa kwan so, nanso sɛ́ anka wɔn ani begye ama ɔbarima a anka ɔyɛ onifuraefo no, na wɔn ani asɔ ɔyaresafo no, wɔkasa tiaa Yesu! Saa a wɔyɛɛ nti, akyinnye biara nni ho sɛ wɔyɛɛ bɔne tiaa Onyankopɔn honhom a ɛdaa adi no, bɔne a wɔmfa mfiri.​—Mateo 12:31, 32.

⁴ Akyiri yi, bere a saa nyaatwomfo no bisabisaa Yesu ho nsɛm fii ɔbarima a anka ɔyɛ onifuraefo no hɔ no, ɔbarima no kae sɛ: “Eyi na ɛyɛ nwonwa sɛ munnim nea [Yesu] fi, nanso obuee m’aniwa. Na yenim sɛ Onyankopɔn ntie nnebɔneyɛfo; na sɛ obi fɛre Onyankopɔn na ɔyɛ nea ɔpɛ a, ɔno na otie no. Efi wiase mfiase wɔntee sɛ obi abue nea wɔwoo no onifuraefo ani pɛn. Sɛ oyi [Yesu] mfi Nyankopɔn nkyɛn a, anka ɔrentumi nyɛ hwee.” Nyamesom akannifo no buae dɛn? “Wobua see no sɛ: Wo de, bɔne mu koraa na wɔwoo wo, na wo na wokyerɛkyerɛ yɛn? Na wɔpam no fii adi.” Mmɔborohunu a wonni bɛn ara ni! Na wɔapirim wɔn koma. Enti Yesu ka kyerɛɛ wɔn sɛ ɛwom sɛ wotumi de wɔn aniwa ankasa hu ade de, nanso wɔyɛ anifuraefo wɔ honhom mu.​—Yohane 9:30-41.

 5, 6. Dɛn na afeha a edi kan no mu nyamesom akannifo yɛe de kyerɛe sɛ wɔdɔ esum no?

⁵ Yehu nea ɛkyerɛ sɛ na saa nyamesomfo nyaatwomfo yi reyɛ bɔne atia Onyankopɔn honhom no ntɛm ara wɔ bere foforo bi mu, bere a Yesu nyan Lasaro fii awufo mu no. Saa anwonwade no nti, nnipa mpapahwekwa no mu pii gyee Yesu dii. Nanso, hyɛ nea nyamesom akannifo no yɛe nsow. “Asɔfo mpanyin ne Farisifo no ma wokohyiaa baguafo no, na wɔkae sɛ: Dɛn na yɛbɛyɛ, efisɛ onipa yi yɛ nsɛnkyerɛnne pii. Sɛ yegyaa no saa a, nnipa nyinaa begye no adi, na Romafo aba abɛfa yɛn ha yi ne yɛn man.” (Yohane 11:47, 48) Ná wodwen wɔn dibea ne wɔn din ho. Ná wɔpɛ sɛ wɔsɔ Romafo no ani wɔ ɔkwan biara so, na ɛnyɛ Onyankopɔn. Enti, dɛn na wɔyɛe? “Efi da no ara wotutuu agyina wɔn mu sɛ wobekum [Yesu].”​—Yohane 11:53.

⁶ So nea wɔyɛe nyinaa nen? Dabi. Nea wɔyɛe wɔ ɛno akyi no kyerɛ sɛnea na wɔpɛ esum no yiye: “Na asɔfo mpanyin no tuu agyina sɛ wobekum Lasaro nso, efisɛ ne nti na Yudafo pii kɔe kogyee Yesu dii.” (Yohane 12:10, 11) Atirimɔdensɛm a ɛyɛ nwonwa bɛn ara ni! Ɛwom sɛ wɔyɛɛ eyinom nyinaa de bɔɔ wɔn dibea ho ban de, nanso dɛn na esii? Saa awo ntoatoaso no ara mu no, wɔtew atua tiaa Romafo a wɔbɛtoaa wɔn wɔ 70 Y.B. mu no, na wosɛee wɔn trabea, wɔn man, na wokunkum wɔn nso!

Yesu Mmɔborohunu

 7. Dɛn nti na wɔn a wɔdɔ nokware no tuu yuu baa Yesu nkyɛn?

⁷ Wɔ yɛn bere yi mu nso, ɛnyɛ nnipa nyinaa na wɔpɛ sɛ wonya honhom fam nneɛma ho nimdeɛ. Nanso wɔn a wɔdɔ nokware no pɛ sɛ wɔba hann no ho. Wɔpɛ sɛ Onyankopɔn yɛ wɔn Hene, na wɔde anigye dan ba Yesu, a Onyankopɔn somaa no sɛ ɔmmɛkyerɛ dekode a hann no yɛ no mu nkyɛn, na wodi n’akyi. Saa ara na nnipa ahobrɛasefo yɛe bere a na Yesu wɔ asase so no. Wotuu yuu dii n’akyi. Farisifo no mpo gye toom. Wonwiinwii sɛ: “Wiase atu adi n’akyi.” (Yohane 12:19) Ná nnipa a wɔte sɛ nguan dɔ Yesu, efisɛ na ɔnte sɛ nyamesom akannifo pɛsɛmenkominyafo, ahantanfo a wɔn ani bere tumi a Yesu kaa wɔn ho asɛm sɛ: “Na wɔkyekyere nnesoa duruduru de to nnipa mmati, na wɔn ankasa de, wɔmpɛ sɛ wɔde wɔn nsateaa mpo ka. Na wɔyɛ wɔn nnwuma nyinaa sɛnea nnipa behu wɔn” no.​—Mateo 23:4, 5.

 8. Nea ɛne nyamesom mu nyaatwomfo su bɔ abira no, su bɛn na na Yesu kura?

⁸ Nea ɛne eyi bɔ abira no, hyɛ Yesu mmɔborohunu su no nsow: “Na ohuu nkurɔfo akuwakuw no, ne yam hyehyee no maa wɔn, efisɛ na wɔabrɛ, na wɔsam hɔ sɛ nguan a wonni hwɛfo.” (Mateo 9:36) Na dɛn na ɔyɛe wo ho? Yesu ka kyerɛɛ wɔn a na Satan nhyehyɛe adi wɔn amim no sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome. Momfa me kondua nto mo ho so, na munsua me, sɛ midwo na mebrɛ me ho ase koma mu; na mubenya ɔhome ama mo kra. Na me kondua yɛ mmerɛw, na m’adesoa yɛ hare.” (Mateo 11:28-30) Yesu yɛɛ nea wɔka siei faa ne ho wɔ Yesaia 61:1, 2 no, nea ɛkenkan sɛ: “[Yehowa] asra me sɛ menka asɛmpa menkyerɛ amanehunufo; wasoma me sɛ memmɛkyekye wɔn a wɔn koma abubu werɛ, mempae ahofadi menkyerɛ nnommum, ne nneduadan bue menkyerɛ apokyerɛfo; na mempae [Yehowa] anisɔ afe, ne yɛn Nyankopɔn aweredi da no; menkyekye nkɔmmɔdifo nyinaa werɛ.”

Hann Kurafo Anoboaboa

 9. Nsɛm atitiriw bɛn na esisii wɔ 1914 mu?

⁹ Yesu foroo kɔɔ soro akyi no, na ɛsɛ sɛ ɔtwɛn kosi sɛ bere bɛso ma Onyankopɔn ama no Ahenni tumi. Afei ɔbɛpaapae “nguanten” ne “mpapo” mu. (Mateo 25:31-33; Dwom 110:1, 2) Saa bere no dui bere a “nna a edi akyiri” no fii ase wɔ 1914 mu no. (2 Timoteo 3:1-5) Yesu a wɔama no tumi sɛ Onyankopɔn soro ahenni no Hene no fii ase boaboaa wɔn a wɔpɛ sɛ wodi hann no akyi no ano baa ne nsa nifa a ɛkyerɛ ɔdom no. Wɔ Wiase Ko I akyi no, saa anoboaboa adwuma no nyaa nkɔso ntɛmntɛm.

10. Nsɛm bɛn na wobetumi abisa afa wɔn a Yesu de wɔn reyɛ anoboaboa adwuma no ho?

¹⁰ Wɔ Yesu Kristo akanni ase no, anoboaboa adwuma no asow aba kɛse. Ɛmmae da wɔ abakɔsɛm mu sɛ nnipa pii a wofi aman nyinaa mu bɛka abom wɔ nokware som mu. Na henanom ne wɔn a wodi hann a efi Onyankopɔn ne Kristo hɔ no akyi nnɛ? Henanom na wɔreyɛ nea Filipifo 2:15 ka sɛ, ‘mohyerɛn sɛ akanea wɔ wiase,’ na wɔto nsa frɛ afoforo sɛ ‘wɔmmra mmɛnom nkwa nsu kwa’ no?​—Adiyisɛm 22:17.

11. Kristoman gyinabea ne dɛn wɔ honhom mu hann ho?

¹¹ So Kristoman reyɛ saa? Nokwarem no, Kristoman ne ne nsɔre a ɛde mpaapaemu ba no nhyerɛn sɛ akanea. Nokwarem no, asɔfo no te sɛ Yesu bere so nyamesom akannifo no ara pɛ. Wɔnna nokware hann a efi Onyankopɔn ne Kristo ho no adi. Mfe aduasa abiɛsa a atwam ni no, Theology Today nsɛmma nhoma no kae sɛ: “Awerɛhosɛm ne sɛ ɛsɛ sɛ wogye tom sɛ hann yi nhyerɛn kɛse wɔ Asɔre no mu. . . . Asɔre no akɔ so ayɛ te sɛ nnipa a wɔatwa ho ahyia no ara pɛ mpɛn pii. Ɛnyɛ wiase hann, na mmom nea ɛma hann a ɛhyerɛn wɔ wiase no ankasa mu no da adi.” Na Kristoman tebea asɛe kɛse mpo nnɛ. Nea wose ɛyɛ hann a ɛma ɛhyerɛn fi wiase no mu no yɛ esum ankasa, efisɛ ɛno ne nea Satan ne ne wiase no betumi de ama. Dabi, hann biara mfi Kristoman mu nsɔre a wɔn adwene nhyia na ɛyɛ wiase de koraa no mu mma.

12. Henanom na wɔka bom yɛ nokware hann kurafo ahyehyɛde no nnɛ?

¹² Yebetumi de ahotoso aka sɛ Yehowa Adansefo wiase foforo ahyehyɛde no ne nokware ahyehyɛde a ekura hann no nnɛ. Emufo nyinaa​—mmarima, mmea, ne mmofra nyinaa​—nam biakoyɛ so ma wɔn hann a efi Yehowa ne Kristo hɔ no hyerɛn wɔ adesamma nyinaa anim. Afe a etwaam no, na Yehowa Adansefo asafo ahorow bɛyɛ 70,000 a ɛwɔ wiase nyinaa no mu hann kurafo bɛboro ɔpepem anan de nnamyɛ reka Onyankopɔn ne n’atirimpɔw ahorow ho asɛm kyerɛ afoforo. Afe biara, yehu sɛ wɔkɔ so boaboa nnipa bebree a wɔpɛ sɛ wonya honhom mu nneɛma ho nimdeɛ ano. Wɔrebɔ nnipa ɔpehaha pii asu bere a wɔasua Bible no na wɔanya nokware no ho nimdeɛ a edi mũ akyi no. Ampa, Onyankopɔn ‘pɛ sɛ wogye nnipa nyinaa nkwa na wɔba nokware nimdeɛ mu.’​—1 Timoteo 2:4.

13. Yɛde hann a efi Yehowa hɔ ba no bɛtoto dɛn ho?

¹³ Yebetumi de nimdeɛ a efi Yehowa hɔ ba no atoto nea esii bere a Onyankopɔn tete nkurɔfo fii Misraim no ho. “[Yehowa] dii wɔn anim, awia, omununkum dum mu, sɛ ɔrekyerɛ wɔn kwan, na anadwo, ogya dum mu, sɛ ɔrema wɔn hann, na wɔanantew awia ne anadwo.” (Exodus 13:21, 22) Ná awia omununkum no ne anadwo ogya a efi Onyankopɔn hɔ no yɛ akwankyerɛ a wotumi de ho to so. Na wotumi de wɔn ho to so te sɛ owia a Onyankopɔn bɔe a ɛma yenya adekyee mu nnɔnhwerew no. Saa ara nso na yebetumi de yɛn ho ato Yehowa so ma wama ɔkwan mu akɔ so ayɛ hann wɔ honhom mu ama wɔn a wɔhwehwɛ nokware no wɔ nna bɔne a edi akyiri yi mu. Mmebusɛm 4:18 ma yɛn awerɛhyem sɛ: “Treneefo kwan te sɛ owia hann, ɛkɔ so hyerɛn kodu awia ketee.”

Ahenni Hann a Wɔda No Adi

14. Dɛn na ɛsɛ sɛ ɛyɛ hann kurafo atirimpɔw titiriw?

¹⁴ Ɛwom sɛ Yehowa ne nimdeɛ Fibea, na Kristo ne hann Hyerɛnfo Panyin de, nanso ɛsɛ sɛ Yesu akyidifo nso da hann adi. Ɔkaa wɔn ho asɛm sɛ: “Mone wiase hann. . . . Momma mo kanea nhyerɛn nnipa anim, na wɔahu mo nneyɛe pa, na wɔahyɛ mo agya a ɔwo soro no anuonyam.” (Mateo 5:14, 16) Ná dɛn ne hann a ɛsɛ sɛ n’akyidifo ma ɛhyerɛn wɔ adesamma anim yi asɛmti titiriw? Na dɛn na wɔbɛkyerɛkyerɛ wɔ wiase abakɔsɛm awiei yi mu? Yesu anka sɛ n’akyidifo bɛka dodow amammui, anaa kankabi nniso, Asɔre ne Ɔman nkabom, anaa wiase amammui adwene foforo bi ho asɛm. Mmom no, ɔka siei wɔ Mateo 24:14, wɔ wiase nyinaa ɔsɔretia akyi, sɛ “wɔbɛka ahenni no ho asempa yi wiase nyinaa de adi amanaman nyinaa adanse; ɛno ansa na awiei no bɛba.” Enti, hann kurafo a wɔwɔ hɔ nnɛ ka Onyankopɔn Ahenni a ɛde Satan wiase no bɛba awiei, na ɛde trenee wiase foforo no aba ho asɛm kyerɛ afoforo.​—1 Petro 2:9.

15. Ɛhe na wɔn a wɔpɛ hann no bɛdan akɔ?

¹⁵ Nea wiase yi ka ne ne botae horow rennan wɔn a wɔdɔ hann no adwene nkɔ nneɛma afoforo so. Ɛrenkyɛ, nea wɔka ne wɔn botae horow no nyinaa betu ayera, efisɛ wiase yi rebɛn n’awiei. Mmom no, wɔn a wɔdɔ hann no bɛpɛ sɛ wotie asɛmpa a wɔn a wɔma Onyankopɔn Ahenni hyerɛn kɔ asase ano nohɔ rebɔ no dawuru no. Eyinom na wɔkaa wɔn ho asɛm siei wɔ Adiyisɛm ti 7:9, 10 sɛ: “Mihui, na hwɛ, nnipakuw kɛse a obi ntumi nkan wɔn a wofi aman ne mmusuakuw ne nkurɔfo ne ɔkasa nyinaa mu no gyinagyina [Onyankopɔn] ahengua no ne Oguammaa [Kristo] no anim . . . na wɔde nne kɛse teɛɛm sɛ: Nkwagye no yɛ yɛn Nyankopɔn a ɔte ahengua no so ne Oguammaa no dea.” Nkyekyem 14 ka sɛ: “Eyinom ne wɔn a wofi ahohia kɛse no mu.” Yiw, wonya nkwa wɔ wiase yi awiei kɔ wiase foforo a ɛbɛtra hɔ daa wɔ Onyankopɔn Ahenni ase no mu.

Wiase Foforo a Ɛhyerɛn Mu

16. Dɛn na ɛbɛba Satan wiase no so wɔ ahohiahia kɛse no mu?

¹⁶ Nokware hann a ɛharan no bɛhyɛ wiase foforo no ma. Nokwarem no, susuw sɛnea tebea no bɛyɛ wɔ da a edi bere a Onyankopɔn de nneɛma nhyehyee yi bɛba n’awiei akyi no ho. Satan, n’adaemone, ne n’amammui, aguadi, ne nyamesom nhyehyɛe ahorow​—emu biara befi hɔ! Satan adwinnade a ɔde daadaa nnipa no nyinaa nso befi hɔ. Enti, wɔ Harmagedon akyi no, wɔrentintim atesɛm krataa, nsɛmma nhoma, nhoma, nhomawa, ne kratawa biara a egyina wiase bɔne yi ekyi bio da. Wɔremfi wiasefo television anaa radio adwumam mfa nsɛm a ɛsɛe ɔbra pa biara mma. Wobeyi Satan wiase no mu tebea bɔne no nyinaa afi hɔ prɛko pɛ!

17, 18. Wobɛkyerɛkyerɛ honhom mu tebea a ɛbɛba wɔ Satan wiase no awiei akyi no mu dɛn?

¹⁷ Ahotɔ kɛse a ɛbɛyɛ bɛn ara ni! Efi saa da no, honhom mu hann a eye, na ɛma denhyɛ a efi Yehowa ne n’Ahenni no hɔ nkutoo na ebenya adesemma so nkɛntɛnso. Yesaia 54:13 (NW) ka siei sɛ: “Wo mma nyinaa bɛyɛ wɔn a Yehowa akyerɛkyerɛ wɔn, na wo mma asomdwoe bɛdɔɔso.” Bere a Onyankopɔn nniso di asase mũ no nyinaa so no, sɛnea Yesaia 29:9 (NW) ka no, ne bɔhyɛ ne sɛ, “trenee na asase a ɛsow aba no sofo besua.”

¹⁸ Adwene ne honhom mu tebea bɛsakra ayɛ papa ntɛm ara. Nneɛma a ɛma denhyɛ titiriw na ɛbɛtra hɔ, na ɛnyɛ nneɛma a ɛma wɔbotow a ɛsɛe ɔbra pa a abu so nnɛ no. Wɔbɛkyerɛkyerɛ obiara a ɔte ase no Onyankopɔn ne n’atirimpɔw ahorow ho nokware ho ade. Nkɔmhyɛ a ɛwɔ Yesaia 11:9 no bɛbam koraa, ɛka sɛ: “[Yehowa] hu bɛyɛ asase ma, sɛ nsu kata po so no.”

Ɛsɛ sɛ Wudi Hann no Akyi Ntɛm

19, 20. Dɛn nti na ehia sɛ wɔn a wɔpɛ sɛ wodi hann no akyi no ma wɔn ani da hɔ?

¹⁹ Ɛnnɛ, wɔ nhyehyɛe bɔne yi mfe a etwa to no mu no, ɛsɛ sɛ yedi wiase hann no akyi ntɛm. Na ehia sɛ yɛhwɛ yiye, efisɛ ɔko bi a emu yɛ den a ɛbɛma yɛagyae hann no mu nantew rekɔ so. Ɔsɔretia yi fi sum mu atumfo no hɔ​—efi Satan, n’adaemone, ne n’asase so ahyehyɛde no hɔ. Ɛno nti ɔsomafo Petro de kɔkɔbo ma sɛ: “Mo ani nna hɔ, monwɛn, efisɛ mo tamfo Bonsam no nam sɛ gyata a ɔbobom hwehwɛ nea obenya no amene.”​—1 Petro 5:8.

²⁰ Satan de akwanside biara bɛto wɔn a worehu nokware no kwan mu, efisɛ ɔpɛ sɛ wɔkɔ so tra sum mu. Ebetumi ayɛ nhyɛso a efi obi abusuafo, anaa ne kan nnamfo a wɔsɔre tia nokware no hɔ. Ebetumi ayɛ adwenem naayɛ wɔ Bible no ho, esiane sɛ atoro som nkyerɛkyerɛ anaa wɔn a wose Onyankopɔn nni hɔ ne wɔn a wontumi nhu sɛ Onyankopɔn wɔ hɔ anaa onni hɔ a wonni gyidi no nsɛm a ɛsɛe adwene no afura n’ani nti. Ebetumi ayɛ obi ankasa bɔne su horow na ama ɛyɛ den sɛ obɛma n’abrabɔ ne ɔsoro ahwehwɛde ahyia.

21. Dɛn na ɛsɛ sɛ wɔn a wɔpɛ sɛ wɔtra ase wɔ Onyankopɔn wiase foforo no mu yɛ?

²¹ Nanso, ɛmfa ho sɛ akwanside ahorow bɛn na ɛwɔ hɔ no, so wopɛ sɛ wunya asetra mu anigye wɔ wiase foforo a ohia, nsɛmmɔnedi, nsisi anaa ɔko nnim mu? So wopɛ sɛ wunya akwahosan a edi mũ ne daa nkwa wɔ paradise asase so? Ɛnde gye Yesu Kristo tom sɛ wiase hann, na tie wɔn a wokura “nkwa asɛm” no mu denneennen na ‘wɔhyerɛn sɛ akanea wɔ wiase no mu’ no nkrasɛm no.​—Filipifo 2:15, 16.

Wubebua Dɛn?

◻ Ɔkwan bɛn so na nyamesom akannifo kyerɛ sɛ wɔyɛ wɔn a wɔdɔ sum?

◻ Su bɛn na na Yesu wɔ wɔ nnipa ho?

◻ Hann kurafo no anoboaboa akɔ so dɛn?

◻ Nsakrae atitiriw bɛn na ɛbɛba nnansa yi ara?

◻ Dɛn nti na egye ntɛmpɛ sɛ wubedi wiase hann no akyi nnɛ?

[Mfonini wɔ kratafa 14, 15]

Farisifo komadenfo no pam ɔbarima a Yesu buee n’ani no