Bible Nhoma a Ɛto So 43—Yohane

Nea Ɔkyerɛwee: Ɔsomafo Yohane

Beae a Ɔkyerɛw No: Efeso anaa mpɔtam

Bere a Ɔkyerɛw Wiei: Bɛyɛ 98 Y.B.

Bere a Ɛka Ho Asɛm: Nnianim no akyi, 29–33 Y.B.

NÁ WƆAKYERƐW Mateo, Marko ne Luka Nsɛmpa no awie ama nkurɔfo anya bi akenkan bɛyɛ mfe 30, na na Kristofo a wodi kan no agye atom sɛ ɛyɛ mmarima a honhom kronkron kaa wɔn no nsa ano adwuma. Ɛrekɔ afe 100 Y.B. a na Yesu asuafo no so retew no, asɛmmisa a ɛsɔree ne sɛ, Yesu ho asɛm foforo bi wɔ hɔ a wonnya nkaa ho asɛm anaa? Ná obi wɔ hɔ a obetumi akaakae Yesu som adwuma mu nsɛnhia foforo na waka akyerɛ yɛn anaa? Yiw, na obi wɔ hɔ saa. Akwakoraa Yohane nyaa hokwan soronko ne Yesu nantewee. Ɛbɛyɛ sɛ na ɔka Yohane Osuboni asuafo a wodi kan a ɔde wɔn kyerɛɛ Onyankopɔn Guammaa no ho, na nnipa baanan a wodi kan a Awurade frɛɛ wɔn sɛ wɔmmɛyɛ bere nyinaa som adwuma no bi no, na ɔka ho. (Yoh. 1:35-39; Mar. 1:16-20) Ɔne Yesu bɔe yiye wɔ ne som adwuma no nyinaa mu na ɔno ne osuani a “na Yesu dɔ no” a Twam afahyɛ a etwa to no na otweri Yesu kokom no. (Yoh. 13:23; Mat. 17:1; Mar. 5:37; 14:33) Ná ɔwɔ hɔ bere a wokum Yesu yayaayaw no, na Yesu de ne maame gyaw no; ɛyɛ ɔno na otuu mmirika dii Petro anim bere a wɔde mmirika rekɔ ɔbodan no mu akɔhwɛ sɛ Yesu asɔre afi awufo mu anaa no.—Yoh. 19:26, 27; 20:2-4.

² Mfe bɛyɛ 70 a Yohane de yɛɛ ɔsom adwuma no nti, n’ani baa fam. Wɔde ne nkutoo kɔtoo afiase wɔ Patmo supɔw so ma onyaa anisoadehu na ɔdwennwenee nneɛma ho. Eyi nyinaa siesiee no yiye ma ɔkyerɛw nsɛm a na ɔde asie ne koma mu akyɛ no. Honhon kronkron no kanyan n’adwene, na ɛma ɔkaakaee nkwagye nsɛm a ɛsom bo a na ɔde asie no pii kyerɛwee. Sɛ obi kenkan a, ɛbɛma ‘wagye adi sɛ Yesu ne Kristo, Onyankopɔn Ba no, na esiane sɛ ogye di nti ɔnam ne din so anya nkwa.’—20:31.

³ Kristofo a wɔtraa ase bɛyɛ afe 200 Y.B. no gye toom sɛ Yohane na ɔkyerɛw nhoma yi, na wobuu no sɛ ɛka Bible mu nhoma a wogye tom sɛ efi honhom mu no ho. Clement a ofi Aleksandria, Irenaeus, Tertullian, ne Origen a wɔtraa ase bɛyɛ mfe 1,800 ni no nyinaa gye toom sɛ Yohane na ɔkyerɛw nhoma no. Bio nso, nsɛm pii wɔ nhoma no ankasa mu a ɛkyerɛ sɛ Yohane na ɔkyerɛwee. Yetumi hu sɛ ɔkyerɛwfo no yɛ Yudani a onim Yudafo amammerɛ ne wɔn asase ho nsɛm yiye. (2:6; 4:5; 5:2; 10:22, 23) Sɛnea ɔkyerɛw nsɛm kɔɔ akyiri no ma yehu sɛ ɔnyɛ ɔsomafo kɛkɛ na mmom na ɔka asomafo baasa a Yesu nkɔ nnya wɔn no ho. Saa baasa yi ne Petro, Yakobo, ne Yohane. (Mat. 17:1; Mar. 5:37; 14:33) Nanso yɛrentumi nka sɛ ɛyɛ Yakobo (Sebedeo ba no) na ɔkyerɛwee, efisɛ Herode Agripa I kum no bɛyɛ afe 44 Y.B., na edii mfe pii ansa na wɔrekyerɛw nhoma yi. (Aso. 12:2) Ɛrentumi nyɛ Petro nso, efisɛ nea ɔkyerɛw nhoma yi kaa biribi wɔ Yohane 21:20-24 de kyerɛe sɛ ɔne Petro na ɛwɔ hɔ.

⁴ Nhoma no rekɔ awiei no, ɛkaa ɔkyerɛwfo no ho asɛm sɛ osuani a “na Yesu dɔ no,” na nsɛm a ɛte saa pii wɔ nhoma no mu, nanso ɔsomafo Yohane din mpue wɔ mu. Yesu ka faa ɔsomafo yi ho sɛ: “Sɛ mepɛ sɛ ɔtra hɔ kosi sɛ mɛba a, ɛfa wo ho bɛn?” (Yoh. 21:20, 22) Eyi kyerɛ sɛ na Petro ne asomafo a aka no bewu agya osuani yi. Nsɛm yi nyinaa ma yehu sɛ ɛyɛ ɔsomafo Yohane. Enti ɛnyɛ nwonwa sɛ bere a woyii no adi kyerɛɛ Yohane wɔ Adiyisɛm no mu sɛ Yesu reba no, ɔkaa asɛm yi de wiee saa nkɔmhyɛ kɛse no sɛ: “Amen! Awurade Yesu, bra.”—Adi. 22:20.

⁵ Yohane nhoma a ɔkyerɛkyerɛwee no nka bere a ɔkyerɛw Asɛmpa no, nanso nnipa dodow no ara gye di sɛ bere a wotwaa no asu kɔɔ Patmo supɔw no so bae no na ɔkyerɛwee. (Adi. 1:9) Domitian na otwaa nnipa pii asu wɔ n’ahenni awiei mu hɔ, nanso Roma ɔhempɔn Nerva a obedii n’ade wɔ afe 96-98 Y.B. no san de nnipa no pii bae. Yohane kyerɛw n’Asɛmpa no bɛyɛ afe 98 Y.B. Wogye di sɛ Yohane wui asomdwoe mu wɔ Efeso, afe 100 Y.B., Ɔhempɔn Trajan afe a ɛto so abiɛsa mu.

⁶ Nea ɛma yehu sɛ ɔkyerɛw nhoma no wɔ Efeso anaa ɛhɔ baabi no, abakɔsɛm kyerɛwfo Eusebius (a ɔtraa ase bɛyɛ 260-342 Y.B.) faa Irenaeus asɛm kae sɛ: “Awurade suani Yohane a otwerii ne kokom no na ɔkyerɛw asɛmpa yi; ɔkyerɛwee bere a na ɔwɔ Efeso wɔ Asia no.”a Ɔfrɛ Yesu atamfo wɔ nhoma no mu mpɛn pii sɛ “Yudafo,” na ɔmfrɛ wɔn “Farisifo,” “asɔfo mpanyin,” ne nea ɛkeka ho. Ɛno kyerɛ sɛ wankyerɛw nhoma no wɔ Israelfo asase so. (Yoh. 1:19; 12:9) Afei nso, ɔfrɛ Galilea Po no wɔ Roma kasa mu sɛ, Tiberia Po. (6:1; 21:1) Wɔn a wɔnyɛ Yudafo no nti, Yohane kyerɛkyerɛɛ Yudafo afahyɛ mu. (6:4; 7:2; 11:55) Yehu sɛ Patmo a wɔde no kɔe no bɛn Efeso, na Adiyisɛm ti 2 ne 3 kyerɛ sɛ na onim Efeso ne asafo nkae a ɛwowɔ Asia Kumaa no yiye.

⁷ Nsaano nkyerɛwee atitiriw bi a wohui bɛyɛ mfe ɔha ni no ma ɛda adi sɛ Yohane Asɛmpa no yɛ nokware. Emu biako ne Yohane Asɛmpa no fã bi a seesei wɔfrɛ no Papyrus Rylands 457 (P⁵²) a wohui wɔ Misraim no, na Yohane 18:31-33, 37, 38 ka ho. Wɔakora so wɔ John Rylands Nhomakorabea wɔ Manchester, England.b Sir Frederic Kenyon a ɔtraa ase tete no kyerɛ sɛ eyi foa so sɛ nea tetefo no aka ato hɔ sɛ Yohane na ɔkyerɛw nhoma no bɛyɛ mfe 1,800 ni no yɛ nokware. Ɔkae wɔ ne nhoma bi mu sɛ: “Ɛnnɔɔso de, nanso etumi di adanse sɛ bɛyɛ afe 130-150 Y.B. mu no, na saa Asɛmpa yi ho nsaano nkyerɛwee abu so wɔ Misraim, baabi a wohuu nhoma no. Ɔkyerɛw wiei no, sɛ ankyɛ koraa na nnipa pii nyaa bi mpo a, ɛno bɛkyerɛ sɛ ɛrekɔ afe 100 Y.B. na ɔkyerɛwee sɛnea tetefo kae no. Enti obi ntumi nnye tetefo no asɛm no ho kyim bio.”—The Bible and Modern Scholarship, 1949, kratafa 21.

⁸ Sɛnea Yohane fi n’Asɛmpa no ase no yɛ anigye. Ɔma yehu sɛ “mfiase no,” na Asɛm no ne “Nyankopɔn wɔ hɔ,” na ɛnam ne so na nneɛma nyinaa bae. (1:2) Bere a Yohane kaa abusuabɔ kɛse a ɛda Agya no ne Ɔba no ntam ho asɛm no, ɔkaa Yesu nnwuma a ɔyɛe ne kasa a ɔmomae ho asɛm kama, na osii so dua sɛ ɔdɔ na ɛka biribiara bom wɔ Onyankopɔn nhyehyɛe kɛse no mu. Kyerɛwtohɔ yi kaa Yesu asetra wɔ asase so ho asɛm fi afe 29-33 Y.B., na ɛkaa Twam afahyɛ anan a Yesu kɔɔ ase bere a ɔreyɛ ne som adwuma no ho asɛm, na ɛno nso di adanse sɛ ɔde mfe abiɛsa ne fã na ɛyɛɛ n’adwuma no. Ɛbɔɔ Twam afahyɛ yi abiɛsa din pen. (2:13; 6:4; 12:1; 13:1) Ɛkaa biako ho asɛm sɛ “Yudafo afahyɛ bi,” nanso kyerɛwtohɔ no ma yehu sɛ bere a Yesu kae sɛ “aka asram anan ansa na otwa bere no adu” no, ankyɛ na nhoma no kaa Yudafo afahyɛ no ho asɛm. Eyi kyerɛ sɛ na saa afahyɛ no yɛ Twam afahyɛ, na na wɔhyɛ saa fã no otwa bere mfiase mu hɔ.—4:35; 5:1.c

⁹ Yohane asɛmpa no ka nsɛm pii a enni Nsɛmpa a aka no mu; sɛ yɛkyɛ mu du a, bɛyɛ biako pɛ na ɛwɔ Nsɛmpa abiɛsa a aka no mu. Eyi nyinaa akyi no, Yohane de n’asɛm no baa awiei sɛ: “Nokwasɛm ni, nneɛma foforo pii wɔ hɔ a Yesu yɛe a, sɛ wɔkyerɛw ne nyinaa a, anka misusuw sɛ nhoma a wɔbɛkyerɛw no renkɔ wiase mpo.”—21:25.

NEA ENTI A MFASO WƆ SO

³⁰ Yohane asɛmpa no de kasa a tumi ne ntease wom ka Asɛm a ɔbɛyɛɛ Kristo no ho asɛm anigye so, na ɛma yehu sɛnea Onyankopɔn Ba a wɔasra no yi te yiye. Ɔkwan a Yohane faa so kyerɛw ne nhoma no ne nsɛmfua a ɔde kyerɛwee no asete nyɛ den, na ɛma yehu sɛ ɔyɛ obi a ‘onsuaa nhoma na ɔyɛ ɔpapahwekwa,’ nanso tumi wɔ nea ɔkae no mu. (Aso. 4:13) Ade a ɛpagyaw n’Asɛmpa no kɛse ne sɛ, ɔka ɔdɔ kɛse a ɛda Agya no ne Ɔba no ntam ne nhyira a yenya bere a yɛne wɔn abɛyɛ biako no. Yohane de nsɛmfua “ɔdɔ” ne “dɔ” dii dwuma mpɛn pii sen Nsɛmpa a aka no nyinaa de a wɔaka abom.

³¹ Hwɛ abusuabɔ pa a na ɛda Asɛm no ne Onyankopɔn a ɔyɛ Agya no ntam fi mfiase! Onyankopɔn nam ne nhyehyɛe so maa “Asɛm no bɛyɛɛ honam bɛtraa yɛn mu, na yehuu n’anuonyam te sɛ anuonyam a agya bi de ma ne ba a ɔwoo no koro; na adom ne nokware hyɛɛ no ma.” (Yoh. 1:14) Yohane asɛmpa no nyinaa mu no, Yesu ma yehu sɛ ɔhyɛ n’Agya no ase, na ɔbrɛ ne ho ase yɛ n’apɛde, ade nyinaa mu. (4:34; 5:19, 30; 7:16; 10:29, 30; 11:41, 42; 12:27, 49, 50; 14:10) Ɔma yehu abusuabɔ pa a ɛda ɔne n’Agya ntam no kɛse wɔ mpae a ofi koma mu bɔe a ɛwɔ Yohane ti 17 no. Ɛhɔ no, Yesu ka kyerɛɛ n’Agya sɛ wawie adwuma a Ɔkae sɛ ɔmmɛyɛ wɔ asase so no, na ɔde kaa ho sɛ: “Enti afei, Agya, fa anuonyam a na mewɔ no wo nkyɛn ansa na wiase reba no hyɛ me anuonyam w’ankasa wo nkyɛn.”—17:5.

³² Na Yesu ne n’asuafo no ntam nso ɛ? Nhoma no da no adi mpɛn pii sɛ Yesu ne ɔkwan biako pɛ a Onyankopɔn nam so behyira n’asuafo no ne adesamma nyinaa. (14:13, 14; 15:16; 16:23, 24) Ɛfrɛ no, ‘Onyankopɔn Guammaa no,’ “nkwa paanoo no,” “wiase hann,” “oguanhwɛfo pa no,” “owusɔre ne nkwa,” ‘ɔkwan no ne nokware no ne nkwa,’ ne “nokware bobe no.” (1:29; 6:35; 8:12; 10:11; 11:25; 14:6; 15:1) Yesu mfatoho a ɛfa “nokware bobe” ho mu no, ɔma yehuu biakoyɛ kɛse a ɛda ɔne n’akyidifo paa no ntam ne afei wɔne n’Agya ntam. Sɛ wɔsow aba pii a, wɔbɛhyɛ n’Agya anuonyam. Yesu tuu wɔn fo sɛ: “Sɛnea Agya no dɔ me na me nso medɔ mo no, montra me dɔ mu.”—15:9.

³³ Yesu fi ne koma mu bɔɔ Yehowa mpae sɛ n’adɔfo yi nyinaa ne ‘wɔn a wɔnam wɔn asɛm so begye no adi’ no, wɔne n’Agya ne ɔno ankasa bɛyɛ biako, na n’asɛm a ɛyɛ nokware no mma wɔnyɛ kronkron. Nokwasɛm ni, nea enti a Yesu bɛyɛɛ ne som adwuma no, wɔbɔ no mua kama wɔ ne mpaebɔ a etwa to a ɔbɔɔ n’Agya yi mu sɛ: “Mama wɔahu wo din na mɛma wɔahu, na ɔdɔ a wode dɔɔ me no atra wɔn mu na matra wɔn mu.”—17:20, 26.

³⁴ Ná Yesu begyaw n’asuafo no wɔ wiase de, nanso na obegyaw wɔn ɔboafo, ‘nokware honhom’ no. Afei nso, otuu wɔn fo sɛ wɔnhwɛ wɔn ho yiye wɔ wiase no ho, na ɔkyerɛɛ wɔn sɛnea wobetumi adi nkonim sɛ “hann no mma.” (14:16, 17; 3:19-21; 12:36) Yesu kae sɛ: “Sɛ motra m’asɛm mu a, na moyɛ m’asuafo ampa, na mubehu nokware no, na nokware no bɛma moade mo ho.” Na esum mma de, ɔka kyerɛɛ wɔn sɛ: “Mufi mo agya Bonsam hɔ, na mopɛ sɛ moyɛ mo agya no apɛde. . . . Wannyina nokware no mu, efisɛ nokware nni ne mu.” Enti momma yensi yɛn bo sɛ yebegyina nokware no mu daa na yɛasom “Agya no honhom ne nokware mu,” na yɛama Yesu nsɛm yi ahyɛ yɛn den sɛ: “Monhyɛ mo ho den! Madi wiase so nkonim.”—8:31, 32, 44; 4:23; 16:33.

³⁵ Eyi nyinaa fa Onyankopɔn Ahenni no nso ho. Bere a wɔredi Yesu asɛm no, odii adanse sɛ: “M’ahenni mfi wiase. Sɛ m’ahenni fi wiase a, anka m’asomfo bɛko na wɔamfa me amma Yudafo no. Nanso sɛnea ɛte no, m’ahenni mfi ha.” Ɛnna Pilato bisaa no asɛm ma obuae sɛ: “W’ankasa na woreka sɛ meyɛ ɔhene. Eyi nti na wɔwoo me, na eyi nti na mebaa wiase, sɛ merebedi nokware no ho adanse. Obiara a ɔwɔ nokware no afã no tie me nne.” (18:36, 37) Asoɔmmerɛfo a ‘wɔsan wo wɔn bio’ a wɔne Ɔhene no bɛkɔ “Onyankopɔn ahenni mu” no wɔ anigye ampa. “Nguan foforo” a wotie Ɔhene Guanhwɛfo no a wobenya nkwa no nso wɔ anigye. Nokwasɛm ni, ɛsɛ sɛ yɛn ani gye sɛ wɔkyerɛw Yohane Asɛmpa no, efisɛ wɔkyerɛwee ‘na moagye adi sɛ Yesu ne Kristo, Onyankopɔn Ba no, na esiane sɛ mugye di nti monam ne din so anya nkwa.’—3:3, 5; 10:16; 20:31.

[Ase hɔ nsɛm]