Bible No Adwene

“Nokware no Bɛma Moade Mo Ho”​—Ɔkwan Bɛn So?

NNIPA ɔpepem pii te nka sɛ wɔade wɔn ho, bere a ɛnte saa ankasa. Sɛ nhwɛso no, gyidihunu de nnipa pii ayɛ nkoa. Afoforo suro awufo, na wɔbɔ ka kɛse de yɛ nneɛma de pata wɔn. Na afoforo nso, esiane sɛ wonnim tebea a obi wu a ɔkɔ mu nti, wɔama owu hunahuna wɔn. So nnipa a wɔte saa betumi ade wɔn ho afi adwennwen, ehu, ne mpo ɛka akɛse a wɔbɔ no ho? Yiw! Sɛnea Yesu Kristo nsɛm a yɛafa aka no kyerɛ no, nokware no nkutoo na ɛbɛma wɔade wɔn ho. Nanso ɛyɛ nokware bɛn? Nokware ara kɛkɛ anaa nokware pɔtẽẽ bi?

Yesu maa asɛm no mu daa hɔ. Ɔkae sɛ: “Sɛ motena m’asɛm mu a . . . mubehu nokware no, na nokware no bɛma moade mo ho.” (Yohane 8:31, 32) Yehu Yesu ‘asɛm’ anaa ne nkyerɛkyerɛ wɔ Bible mu.

Bere a Yesu kae sɛ “nokware no bɛma moade mo ho” no, na ɔreka bɔne ne owu a yɛbɛde yɛn ho afi ho ho asɛm. Ne nyinaa akyi no, Onyankopɔn Asɛm mu nokware a yebehu no nso ma yɛde yɛn ho fi nneɛma te sɛ gyidihunu, awufo ho suro, ne owu ho ahunahuna ho. Ɔkwan bɛn so?

1. De wo ho fi gyidihunu ho. Nnipa pii gye di sɛ nneɛma bi anaa nɔma ahorow bi wɔ hɔ a ɛde mmusu ba. Afoforo nso, ansa na wobesi gyinae titiriw bi no, gye sɛ wɔakɔhwehwɛ mmoa afi asumanfo hɔ ansa.

Sɛnea Bible mu nokware ma yɛde yɛn ho: Tete mmere mu no, gyidihunu nyaa Onyankopɔn ankasa nkurɔfo binom so nkɛntɛnso maa wɔkɔsom “Akraye nyame” ne “Nkrabea nyame”! Yehowa buu nea wɔyɛe no dɛn? Ɔkae sɛ: “Nea ɛyɛ m’ani so bɔne na mokɔɔ so yɛe.” (Yesaia 65:11, 12) Saa ara na Onyankopɔn tee nka wɔ nnipa a wɔkɔɔ asumanfo hɔ kɔhwehwɛɛ akwankyerɛ a wɔde bɛbɔ wɔn bra no: ‘Yehowa kyi obi a ɔkɔ abisa.’—Deuteronomium 18:11, 12.

Asiane wɔ gyidihunu ne asumansɛm mu efisɛ ɛyɛ “Ɔbonsam nnɛɛdɛe.” Yesu frɛɛ Ɔbonsam “atoro agya.” (Efesofo 6:11; Yohane 8:44) Sɛ wopɛ akwankyerɛ pa wɔ asɛnhia bi ho a, wobɛkɔ obi a ɔyɛ ɔtorofo hɔ? Worenyɛ saa! Enti ɛnyɛ papa sɛ wo ne “atoro agya” no benya abusuabɔ biara.

Ade koro pɛ a ebetumi aboa wo ma woasisi gyinae pa wɔ asetenam ne sɛ, wubenya nyansa a egyina Bible mu nnyinasosɛm a ɛyɛ nokware so, ne Onyankopɔn atirimpɔw ma adesamma no ho nimdeɛ. Mmebusɛm 2:6 ka sɛ: “Yehowa na ɔma nyansa, na n’anom na nimdeɛ ne nhumu fi.”

2. De wo ho fi awufo suro ho. Nnipa pii gye di sɛ wɔn nananom a wɔawuwu “honhom” betumi anya ateasefo so nkɛntɛnso. Wosusuw sɛ ɛsɛ sɛ wɔyɛ nneɛma bi de pata saa “ahonhom” yi, anyɛ saa a wɔn bo befuw. Eyi nti, ebinom tua sika akɛse ma wɔde yɛ amanne ahorow ma wɔn. Saa ara nso na wɔbɔ ka yɛ ayi akɛse.

Sɛnea Bible mu nokware ma yɛde yɛn ho: Bible no ka tebea a awufo wom ho asɛm kyerɛ yɛn. Sɛ nhwɛso no, Yesu kae sɛ awufo ‘adeda.’ (Yohane 11:11, 14) Ná ɔkyerɛ dɛn? Yebehu mmuae no wɔ Ɔsɛnkafo 9:5: “Ateasefo nim sɛ wobewuwu; awufo de, wonnim biribiara.” Yiw, tebea a awufo wom no te sɛ nea wɔada nnahɔɔ a wɔnte hwee. Nokwarem no, wonni nkwa mu bio ma enti wɔrentumi nyɛ yɛn papa, na saa ara nso na wɔrentumi mpira yɛn.

Ɛwom, nnipa binom kyerɛ sɛ wɔne awufo akasa. Ɛbɛyɛ dɛn na atumi aba saa? Bible no de eyi nso ho mmuae ma. Ɛka kyerɛ yɛn sɛ tete no, abɔfo bi sɔre tiaa Onyankopɔn. (2 Petro 2:4) Ahonhommɔne a wɔfrɛ wɔn adaemone yi bɔ mmɔden sɛ wɔbɛdaadaa nnipa. (1 Timoteo 4:1) Ɔkwan biako a wɔfa so yɛ saa ne sɛ wɔyɛ wɔn ho te sɛ nea wawu no, na wɔnam saa kwan no so trɛw atosɛm a ɛne sɛ awufo te ase wɔ baabi foforo anaa wɔwɔ ahonhom atenae, no mu.

3. De wo ho fi owu ho suro ho. Owu yɛ ɔtamfo ampa, sɛnea Bible no ka no. (1 Korintofo 15:26) Enti, ɛfata sɛ yesuro owu na yɛbɔ mmɔden sɛ yɛremma ɛnto yɛn. Nanso, ɛnsɛ sɛ yɛma owu hunahuna yɛn.

Sɛnea Bible mu nokware ma yɛde yɛn ho: Nokwasɛm a ɛfa awufo ho a Bible no ma yehu akyi no, ɛsan kyerɛ yɛn sɛ Onyankopɔn abɔ ne tirim sɛ ɔnam owusɔre so bɛma awufo aba nkwa mu bio. Yesu kae sɛ: “Dɔn no reba a wɔn a wɔwɔ nkae ada mu nyinaa bɛte ne [Kristo] nne na wɔafi adi.”—Yohane 5:28, 29; Asomafo Nnwuma 24:15.

Nipadua bɛn na wɔde ‘befi adi’ aba? Yesu ma yehuu sɛnea ɛbɛyɛ bere a onyanee nnipa binom fii awufo mu no. Wɔ emu biara mu no, nnipa a onyanee wɔn no san de wɔn nipadua na ɛbae—sɛnea na wɔte kan no ara. (Marko 5:35-42; Luka 7:11-17; Yohane 11:43, 44) Nokwasɛm yi ne asɛmfua a wɔkyerɛɛ ase “owusɔre” a ɛkyerɛ “sɔre gyina hɔ” no hyia. Bere a Onyankopɔn ne ne somfo a na ne mfe akɔ anim, Daniel rekasa no, Onyankopɔn kae sɛ: “Wobɛhome [anaa wobɛda wɔ owu mu], na woasɔre abenya wo kyɛfa, nna no awiei.” (Daniel 12:13) Hwɛ sɛnea ɛbɛyɛ sɛ saa nsɛm no kyekyee Daniel werɛ ma otumi de akokoduru ne nidi gyinaa mu kosii owu mu!

Ade biako a enti Yesu baa asase so ne sɛ ‘ɔbɛka ogye ho asɛm akyerɛ nnommum’—wɔn a atoro nkyerɛkyerɛ de wɔn ayɛ nkoa no. (Luka 4:18) Esiane sɛ ne nkyerɛkyerɛ no wɔ Bible mu nti, ɛma nkurɔfo de wɔn ho da biara da. Yɛwɔ awerɛhyem paa sɛ Bible mu nokware bɛma woade wo ho nnɛ ne daa.—g12-E 05.

SO WOADWEN HO?

Ɔkwan bɛn so na Bible mu nokware ma yɛde yɛn ho fi

● gyidihunu ho?—Yesaia 8:19, 20; 65:11, 12.

● awufo ho suro ho?—Ɔsɛnkafo 9:5; Yohane 11:11, 14.

● owu ho suro ho?—Yohane 5:28, 29; Asomafo Nnwuma 24:15.

[Asɛm a wɔafa aka wɔ kratafa 19]

Bible mu nokware ma nkurɔfo de wɔn ho fi gyidihunu, awufo ho suro, ne owu ho ahunahuna ho