Atoro a Edi Kan​—Hena Na Odii?

MMARIMA baanu a wɔte kar mu wɔ kurow bi mu wɔ kesee fam Afrika twaam wɔ nkwanta-nan bi so. Ná kanea a ɛkyerɛ kar kwan no kyerɛ sɛ ɛsɛ sɛ wɔkɔ, nanso obi a ɔhwɛ ma wodi mmara yi so gyinaa wɔn, bisaa wɔn sɛ: “Dɛn nti na mutwaam bere a kanea no asɔ kɔkɔɔ?” Nnipa baanu no nyinaa kyerɛe sɛ ɛnte saa. Nanso owura no kae sɛ “Morekyerɛ sɛ minhu ade anaa?” Na ofii ase kyerɛw krataa maa wɔn. Ofirikafo no buae brɛoo sɛ: “Obi wɔ soro a onim nea woreyɛ no.” Owura ɛno gyaee . . . na ofii hɔ kɔe.

Yiw, na polisini no redi atoro. So ɛno yɛ nwonwa? Dabi. Atorodi agye ntini kɛse wɔ adesamma abusua no mu. Sɛnea wɔtaa ka no: “Di atoro bere nyinaa na nnipa no begye adi.” Ɛte sɛnea amansɛmdifo pii gye eyi tom, na wɔ pii adwene mu no, amansɛmdi ne atorodi na ɛnam.

Nkurɔfo di atoro esiane nneɛma ahorow pii nti. Kristoni nokwafo bi a wɔ bere bi mu na ɔnyɛ adwuma kyerɛw kɔhwehwɛɛ adwuma wɔ adwuma bi a wɔtontɔn nneɛma mu. Nanso adwuma wura no bɔɔ no kɔkɔ sɛ: “Sɛ wobɛtɔn me nneɛma a, ɛsɛ sɛ wutumi di atoro sen onipa a odi hɔ no!” Kristoni no pow adwuma no.

Nnipa a wɔyɛ nyamesomfo mpo, sɛ wɔankura Onyankopɔn nnyinasosɛm ahorow mu a, wodi atoro. So wokae sɛnea Yudafo asɔfo no yɛɛ wɔn ade fae bere a wɔtee sɛ wɔanyan Yesu a ofi Nasaret a wokum no no? Wɔmaa asraafo a na wɔrewɛn Yesu nna no sika bebree sɛ wɔnka sɛ: “Anadwo a yɛdae no na n’asuafo bae bewiaa no.”​—Mateo 28:12-15.

Nanso ɛte sɛnea atorodi nyɛ onipa ho ade. Dr. Lewis Thomas kyerɛwee sɛ: “Sɛnea mete ase no, ɔdesani rentumi nni atoro, sɛ ɛyɛ ketewaa bi mpo a, bere a ompira adwene no, a nea ɛde ba ne mpofirim adwene mu basaayɛ anaa nea ɛte saa . . . Enti, atorodi haw adwene, sɛ́ mpo ɛyɛ nea yedi de bɔ yɛn ho ban, de tetew yɛn ho, de guan anaa yɛde nya mfaso a. (Discover, December 1980) Nneɛma, a ɛde ba nipadua no so yi ma wohu atorodi.

Esiane sɛ atorodi haw adwene saa nti, ɛyɛɛ dɛn na efii ase?

Hena Na Odii Atoro A Edi Kan No?

Yesu Kristo daa ɔtorofo a odi kan no adi, na ɔkyerɛe sɛ anyɛ onipa. Ɔkae sɛ: “Sɛ [Satan] ka atosɛm a, efi n’ankasa mu na ɔka; efisɛ ɔyɛ ɔtorofo ne atoro agya.” (Yohane 8: 44) Enti ɔtorofo a odi kan no ne Satan Ɔbonsam. Bere bɛn na ofii se dii atoro? Sɛnea Bible kyerɛ no, ɛyɛ adesamma abusua no abakɔsɛm mfiase akyi bere tiaa bi.

Wɔakyerɛw nea esii no ato hɔ wɔ Bible mu nhoma a wɔfrɛ no Genesis no mu, na na atorodi no yɛ asɛm a ɛfa nkwa anaa owu ma adesamma ho. Onyankopɔn kyerɛɛ onipa a odi kan, Adan sɛ, nkwa mu a ɔbɛka so atra gyina osetie so. Ɔmaa Adam mmara ketewaa bi sɛ onni so na ɔkae sɛ, sɛ wanni saa mmara no so a ‘owu na obeku.’ Nanso Satan nam anifere kwan so dii atoro kae sɛ: “Ɛnyɛ owu na mubewu.” Ɛno ne atorodi ɔpepepem pii a wɔate wɔ Asase okyinsoromma yi so no mu nea edi kan.​—Genesis 2:17; 3:4.

Ɛnnɛ nnipa pii nnye saa asɛm a ɛwɔ Bible mu no nni. Nanso Yesu, onipa a ɔyɛ ɔnokwafo sen obiara, a watra ase pɛn no sii so dua sɛ kyerɛwtohɔ a ɛwɔ Genesis no nyɛ anansesɛm na mmom abakɔsɛm ankasa. (Mateo 19:4, 5) Nokwarem, nea saa atorodi no de bae no da so ara wɔ hɔ. Ɛde amanehunu na ɛbrɛɛ adesamma abusua no.