Yesu Asetra Ne Ne Som Adwuma

Mmɔden Foforo A Wɔbɔ Sɛ Wobekum Yesu

ESIANE sɛ ɛyɛ awɔw bere nti, Yesu nam baabi a wɔakata hɔ a wɔfrɛ hɔ sɛ Salomo abrannaa no so. Ɛwɔ asɔrefi no ho. Yudafo betwa ne ho hyia wɔ ha na wofi ase ka sɛ: “Wobɛma yɛatwɛn akosi da bɛn? Sɛ wone Kristo no a, ka kyerɛ yɛn pefee.”

Yesu bua sɛ: “Maka makyerɛ mo, na munnye nni.” Na Yesu nka nkyerɛɛ wɔn tẽe sɛ ɔne Kristo no, sɛnea ɔka kyerɛɛ Samariani ɔbea no wɔ asubura no so no. Nanso, ɔkyerɛɛ onii a ɔyɛ bere a ɔkyerɛkyerɛɛ mu kyerɛɛ wɔn sɛ ofi soro na ɔtraa ase ansa na Abraham reba no.

Nanso, Yesu pɛ sɛ nkurɔfo no ankasa de asɛm no ba awiei sɛ ɔne Kristo no denam ne nnwuma a wɔde bɛtoto nea Bible no ka siei sɛ Kristo no bɛyɛ no ho no so. Enti na odii kan ka kyerɛɛ n’asuafo no sɛ wɔnnka nkyerɛ obiara sɛ ɔne Kristo no. Na enti na afei ɔkɔ so ka kyerɛ saa Yudafo asidifo yi sɛ: “Nnwuma a meyɛ m’agya din mu no, ɛno na edi me ho adanse. Na mo de, munnye nni.”

Dɛn nti na wonnye nni? So efi adanse a ɛnnɔɔso sɛ Yesu ne Kristo no nti? Dabi, na mmom esiane ntease a Yesu de ma bere a ɔka kyerɛ wɔn sɛ: “Mumfi, me nguan no mu. Me nguan tie me nne, na me nso minim wɔn, na wodi m’akyi; na mema wɔn daa nkwa, na wɔrenyera, na obi renhuam wɔn mfi me nsam da. Nea m’agya de ama me no sõ sen nneɛma nyinaa; na obi rentumi nhuam wɔn mfi me nsam” no nti.

Afei Yesu kyerɛ ɔne n’Agya ntam’ abusuabɔ a emu yɛ den no na ɔkyerɛkyerɛ mu sɛ: “Me ne agya no yɛ baako.” Esiane sɛ Yesu wɔ asase so na n’Agya wɔ ɔsoro nti, ɛda adi sɛ ɛnyɛ nea ɔreka sɛ ɔne n’Agya no yɛ biako ankasa anaasɛ wɔyɛ biako honam mu. Mmom no, ɔkyerɛ sɛ wɔyɛ baako wɔ atirimpɔw mu anaasɛ wɔaka abom.

Bere a Yesu nsɛm no ama Yudafo no bo afuw no, wɔtasetase abo sɛ wobekum no, sɛnea wɔyɛe asram abien a atwam mu, wɔ Asese Afahyɛ no ase no. Bere a Yesu de akokoduru rehyia wɔn a wɔpɛ sɛ wokum no no, ose: “Nnwuma pa pii na mayɛ makyerɛ mo a efi agya no nkyɛn; emu nea ɛwɔ he nti na morebesiw me abo yi?”

Wobua sɛ: “Ɛnyɛ adwuma pa nti na yɛrebesiw wo abo, na abususɛm nti, efisɛ wo a woyɛ onipa yɛ wo ho sɛ onyame bi.” Esiane sɛ Yesu nkae da sɛ ɔyɛ onyame nti, dɛn nti na Yudafo no ka eyi?

Ɛda adi sɛ esiane sɛ Yesu ka sɛ ɔwɔ tumi ahorow a wogye di sɛ Onyankopɔn nkutoo na ɔwɔ no ntia. Sɛ nhwɛso no, na waka afa “nguan” no ho seesei ara sɛ “mema wɔn daa nkwa” a, ɛyɛ ade a ɔdesani biara rentumi nyɛ. Nanso, Yudafo no bu wɔn ani gu nokwasɛm a ɛyɛ sɛ Yesu gye tom sɛ onya tumi fi n’Agya nkyɛn no so.

Nea edi hɔ no, Yesu kyerɛ nea ɔka sɛ osua sen Onyankopɔn no denam eyi a obisa no so: “Wɔnkyerɛw mo Mmara no mu [wɔ Dwom 82:6], sɛ ‘Mekae sɛ: Moyɛ anyame’”? Sɛ ɔfrɛɛ wɔn a Onyankopɔn asɛm baa wɔn nkyɛn no anyame na wontumi nsan kyerɛw no a, adɛn nti na moka me a Agya no ayɛ me kronkron no na wasoma me wiase no sɛ, ‘Woka abususɛm,’ sɛ mekae sɛ Onyankopɔn Ba ne me nti?”

Yiw, esiane sɛ Kyerɛwnsɛm no frɛ adesamma atemmufo a wɔnyɛ pɛ “anyame” nti, mfomso bɛn na saa Yudafo yi betumi ahu wɔ Yesu ho sɛ ɔka sɛ “Onyankopɔn Ba ne me”? Yesu de ka ho sɛ: “Sɛ menyɛ m’Agya nnwuma a, ɛnde munnnye me nni; na sɛ meyɛ, na mede munnye me nni a, munnye nnwuma no nni, na moahwɛ ahu sɛ Agya no wɔ me mu, na me nso mewɔ ne mu.”

Bere a Yesu ka eyi no, Yudafo no bɔ mmɔden sɛ wɔbɛkyere no. Nanso oguan, sɛnea ɔyɛe wo Asese Afahyɛ no ase no. Ofi Yerusalem na otwa Yordan Asubɔnten no wɔ faako a Yohane fii ase bɔɔ asu nea aka kakraa na adu mfe anan ni no. Ɛda adi sɛ saa beae yi ne Galilea Po no mpoano nware, ɛyɛ nnanu kwan anaa nea ɛte saa fi Yerusalem.

Nnipa pii ba Yesu nkyɛn wɔ ha na wofi ase ka sɛ: “Yohane anyɛ sɛnkyerɛnne bi de, nanso nneɛma a Yohane kae oyi ho no nyinaa yɛ nokware.” Enti pii gye Yesu di wɔ ha. Yohane 10:22-42, NW: 4:26; 8:23, 58; Mateo 16:20.

◆ Dɛn na Yesu pɛ sɛ nkurɔfo de hu sɛ ɔne Kristo no?

◆ Ɔkwan bɛn so na Yesu ne n’Agya no yɛ baako?

◆ Ɛda adi sɛ dɛn nti na Yudafo no ka sɛ Yesu reyɛ ne ho onyame no?

◆ Ɔkwan bɛn so na Nnwom no mu asɛm a Yesu fa kae no kyerɛ sɛ ɛnyɛ nea ɔkyerɛ sɛ ɔne Onyankopɔn yɛ pɛ?