Gye Yehowa Onyankopɔn a Ɔwɔ Hɔ Paa Di

Woahwɛ wim anadwo a wim tew ahu nsoromma pepeankoma pɛn? Wohwɛ a ɛyɛɛ dɛn na ɛbae?

ANADWO a wim atɛm dinn no, nsoromma no kaa biribi kyerɛɛ tete Israel hene Dawid ɔkwan bi so, na ɛkaa no maa no kyerɛw nsɛm yi: “Ɔsoro ka Onyankopɔn anuonyam, na ewim kyerɛ ne nsa ano adwuma.” (Dwom 19:1) Yiw, Ɔbɔadeɛ no na ɛfata sɛ ‘ogye anuonyam ne nidi ne tumi,’ na ɛnyɛ abɔde.—Adiyisɛm 4:11; Romafo 1:25.

Bible ka sɛ: “Nea osiesie nneɛma nyinaa ne Onyankopɔn.” (Hebrifo 3:4) Ampa sɛ nokware Nyankopɔn a ‘ne din de Yehowa no ne Ɔsorosoroni asase nyinaa so.’ (Dwom 83:18) Na ɔnyɛ biribi a wɔde daadaa yɛn—biribi a enni hɔ. Yesu Kristo kaa N’agya a ɔwɔ soro, Yehowa, ho asɛm sɛ: “Nea ɔsomaa me no wɔ hɔ paa.”—Yohane 7:28, NW.

Yehowa—Nea Ɔma Ne Tirimbɔ Bam

Yehu Onyankopɔn din Yehowa a ɛda nsow no bɛyɛ 7,000 wɔ Hebri Kyerɛwnsɛm no nko ara mu. Ne din no nko ara mpo ma yehu sɛ ɔwɔ hɔ paa. Onyankopɔn din no kyerɛ “Nea Ɔma Ɛyɛ Hɔ.” Yehowa Nyankopɔn de ne din no ma yehu sɛ Ɔma ne tirimbɔ bam. Bere a Mose bisaa Onyankopɔn ne din no, Yehowa kyerɛkyerɛɛ ne din no mu kɔɔ akyiri sɛ: “Mɛyɛ me ho nea mɛyɛ.” (Exodus 3:14, NW) Rotherham nkyerɛase no ka no pen sɛ: “Mɛyɛ me ho nea mepɛ biara.” Yehowa yɛ ne ho sɛnea ehia biara ma ne tirimbɔ ne ne bɔhyɛ ahorow a efĩ nni ho no bam. Enti ɔwɔ abodin a ɛma ɔyɛ nneɛma bebree te sɛ Ɔbɔadeɛ, Agya, Amansan Hene, Oguanhwɛfo, asafo Yehowa, mpaebɔ Tiefo, Ɔtemmufo, Ɔkyerɛkyerɛfo Kunini, Odimafo.—Atemmufo 11:27; Dwom 23:1; 65:2; 73:28; 89:26; Yesaia 8:13; 30:20; 40:28; 41:14.

Nokware Nyankopɔn no nko ara na yebetumi afrɛ no Yehowa ama no ayɛ yiye efisɛ onipa ntumi mfa ne nsa nsi ne bo nka sɛ ne tirim adwene bɛyɛ yiye. (Yakobo 4:13, 14) Yehowa nko ara na obetumi aka sɛ: “Sɛnea osu ne sukyerɛma fi soro gu fam na ɛnsan nkɔ hɔ bio, gye sɛ ɛfɔw asase ansa ma ɛba aduan na ɛsow aba, na ɛde aba ma ogufo ne aduan ma odifo no, saa ara na m’asɛm a efi m’anom bɛyɛ: ɛrensan mma me nkyɛn kwa, gye sɛ ɛyɛ nea mepɛ na ewie nea enti a mesomae no.”—Yesaia 55:10, 11.

Yehowa ma ne tirimbɔ bam pɛpɛɛpɛ ma nea ɛyɛ nnipa sɛ ɛnyɛ yiye no mpo tumi yɛ yiye. Abraham, Isak, ne Yakob wuwui akyi koraa no, Yesu bɔɔ wɔn din kae sɛ: “[Yehowa nyɛ] awufo Nyankopɔn, na mmom ateasefo de; efisɛ wɔn nyinaa te ase ma no.” (Luka 20:37, 38) Ná agyanom mpanyimfo anokwafo baasa no awuwu, nanso na Onyankopɔn nim sɛ nea ɛbɛyɛ biara obenyan wɔn sɛnea na wabɔ ne tirim no, enti n’ani so de, na ɛte sɛ nea wɔte ase pɛpɛɛpɛ. Sɛnea anyɛ den amma Yehowa sɛ ɔde fam dɔte bɛbɔ onipa a odi kan no, saa na ɛnyɛ no den sɛ obenyan asomfo anokwafo yi a wɔtraa ase tete no.—Genesis 2:7.

Ɔsomafo Paulo ma yɛn nhwɛso foforo de kyerɛ sɛ Onyankopɔn ma ne tirimbɔ bam. Wɔfrɛ Abraham “amanaman . . . bebree agya” wɔ Kyerɛwnsɛm no mu. (Romafo 4:16, 17) Bere a na Abram nnya nwoe no, Yehowa sesãã ne din yɛɛ no Abraham a ase ne “Ɛdɔm (Mpempem) Agya.” Yehowa faa anwonwakwan so maa Abraham ne ne yere Sara a na wɔabɔ nkwakora ne mmerewa no tumi wo maa Abraham din no nkyerɛase yɛɛ hɔ.—Hebrifo 11:11, 12.

Esiane sɛ na Onyankopɔn ama Yesu Kristo tumi kɛse paa nti, ɔde ahotoso a ɛkyɛn nnipa de na ɛkaa nneɛma bi a na ɛbɛbam no ho asɛm. Ná Yesu adamfo paa Lasaro awu, nanso ɔka kyerɛɛ n’asuafo no sɛ: “Yɛn adamfo Lasaro ada; na merekɔ makonyan no.” (Yohane 11:11) Adɛn nti na obi a wawu no, Yesu kae sɛ wada?

Bere a Yesu duu Lasaro kurom Betania no, ɔkɔɔ ɔbodan a wɔde no toom no ho na ɔkae sɛ wonyi ɔbo a wɔde akata ano no. Ɔbɔɔ mpae denneennen wiei no, ɔteɛɛm sɛ: “Lasaro, fi bra!” Bere a nnipa a atwa ahyia wɔ hɔ hwɛ ɔbodan no haa no, “nea wawu no fii adi, ɔda mu ntama kyekyere ne nan ne ne nsa, na dukuu kyekyere n’anim.” Ɛnna Yesu kae sɛ: “Monsan no, na momma ɔnkɔ!” (Yohane 11:43, 44) Yesu nyanee Lasaro—ɔmaa ɔbarima bi a na wawu adi nnanan nyaa nkwa bio! Bere a Kristo kae sɛ n’adamfo no ada no, na ɔrennaadaa wɔn. Yehowa ne Yesu ani so de, na ɛte sɛ nea Lasaro a wawu no ada. Ampa, Yesu ne N’agya a ɔwɔ soro no de, nea wɔka biara bam.

Yehowa Betumi Ama Yɛn Anidaso Abam

Hwɛ nsonsonoe a ɛwɔ anyame a wonni hɔ ne Onyankopɔn a ɔwɔ hɔ paa no mu! Abosonsomfo di mfomso ka sɛ wɔn anyame no wɔ tumi, nanso wɔboa. Sɛ wɔsom wɔn sɛ dɛn mpo a, entumi mma anyame yi nnya tumi nyɛ anwonwade. Nanso Yehowa Nyankopɔn de, obetumi aka ama no afata sɛ n’asomfo a wɔawuwu dedadedaw no te ase, efisɛ obetumi ama wɔanya nkwa bio. “[Yehowa, NW] ne nokware Nyankopɔn,” na ɔnnaadaa ne nkurɔfo.—Yeremia 10:10.

Hwɛ awerɛkyekye a yɛwɔ sɛ yenim sɛ bere a Yehowa ahyɛ mu no, obenyan awufo a wɔn ho asɛm wɔ ne tirim no—asan de wɔn aba nkwa mu bio! (Asomafo no Nnwuma 24:15) Yiw, owusɔre mu no, Onyankopɔn bɛma awufo a onyan wɔn no asan ayɛ wɔn ade sɛnea na wɔyɛ ansa na wɔrewu no. Ɛnyɛ den mma Ɔbɔadeɛ a ne nyansa ne ne tumi nni ano no sɛ ɔbɛkae sɛnea na awufo no yɛ wɔn ade, na wanyan wɔn. (Hiob 12:13; Yesaia 40:26) Esiane sɛ Yehowa adɔe dɔɔso nti, ɔbɛkae biribiara pɛpɛɛpɛ de anyan awufo aba paradise asase so ama wɔasan anya suban a na wɔkura ansa na wɔrewu no.—1 Yohane 4:8.

Bere a Satan wiase yi rebɛn n’awiei no, nneɛma bɛyɛ yiye ɔkwan biara so ama wɔn a wɔde wɔn werɛ hyɛ Onyankopɔn nokwafo no mu no. (Mmebusɛm 2:21, 22; Daniel 2:44; 1 Yohane 5:19) Odwontofo no ma yenya saa awerɛhyem yi: “Aka kakraa sɛ na ɔbɔnefo nni hɔ, . . . na ahobrɛasefo benya asase no adi, na wɔagye wɔn ani asomdwoe bebree mu.” (Dwom 37:10, 11) Amumɔyɛ ne nsɛmmɔnedi befi hɔ. Atɛnkyea ne ohia betwam. (Dwom 37:6; 72:12, 13; Yesaia 65:21-23) Nnipa nyinaa bɛyɛ pɛ a obiara dibea ne ne honam ne ne kasa nkyɛn ne yɔnko ɔkwan biara so. (Asomafo no Nnwuma 10:34, 35) Ɔko ne akode nyinaa befi hɔ. (Dwom 46:9) Saa bere no, “ɔmanfo no mu bi renka sɛ: ‘Meyare.’” (Yesaia 33:24, NW) Obiara benya ahoɔden a edi mu asi pi. (Adiyisɛm 21:3, 4) Ɛnkyɛ biara, asase bɛyɛ paradise. Yehowa abɔ ne tirim sɛ ɔbɛyɛ!

Yiw, anidaso a Bible ama yɛanya no nyinaa bɛbam nnansa yi ara. Dɛn nti na ɛsɛ sɛ yegyae yɛn ho mu ma nneɛma a nkurɔfo de ayɛ nyame wɔ wiase yi mu no daadaa yɛn bere a yebetumi de yɛn werɛ nyinaa ahyɛ Yehowa mu? Ɛyɛ ne pɛ sɛ “wogye nnipa nyinaa nkwa na wɔba nokware nimdeɛ mu.” (1 Timoteo 2:3, 4) Momma yennyin wɔ Onyankopɔn a ɔwɔ hɔ paa no ho nimdeɛ mu na yɛmfa yɛn koma nyinaa nto no so nnyae sɛ yɛbɛsɛe bere ne sika wɔ wiase yi nnaadaa ne adehunu ne n’anyame no ho.—Mmebusɛm 3:1-6; Yohane 17:3.

[Mfonini wɔ kratafa 6]

Wɔ Yehowa ne Yesu ani so de, na Lasaro ada

[Mfonini ahorow wɔ kratafa 7]

Ɛnkyɛ biara, asase bɛyɛ paradise