Mpanyimfo, Momfa Trenee Mmu Atɛn

“Sɛ mudi mo nuanom ntam nsɛm a, ɛsɛ sɛ mode trenee bu atɛn.”​—DEUTERONOMIUM 1:16, New World Translation.

 1. Ɛdefa atemmu ho no, ɔkwan bɛn so na wɔde tumi ahyɛ nnipa afoforo nsa, na eyi kyerɛ dɛn ma nnipa atemmufo?

SƐ ƆTEMMUFO Pumpuni no, Yehowa ama ne Ba no tumi sɛ ommu atɛn. (Yohane 5:27) Sɛ́ Kristofo asafo no Ti no, Kristo nso de akoa nokwafo ne ɔbadwemma kuw no ne ne Sodikuw no di dwuma de paw mpanyimfo a ɛtɔ mmere bi a, ɛsɛ sɛ wɔn nso di dwuma sɛ atemmufo. (Mateo 24:45-47; 1 Korintofo 5:12, 13; Tito 1:5, 9) Sɛ́ atemmufo nkumaa no, ɛyɛ eyinom asɛde sɛ wodi ɔsoro Atemmufo, Yehowa ne Kristo Yesu nhwɛso akyi pɛpɛɛpɛ.

Kristo​—Ɔtemmufo a Ɔyɛɛ Nhwɛso No

 2, 3. (a) Mesia ho nkɔmhyɛ bɛn na ɛda Kristo su horow sɛ Ɔtemmufo no adi? (b) Nsɛm bɛn na ɛfata sɛ wɔhyɛ no nsow titiriw?

² Wɔkaa Kristo sɛ Ɔtemmufo no ho asɛm nkɔmhyɛ kwan so sɛ: “Na [Yehowa] honhom besi no so, nyansa ne nhumu honhom, afotu ne mmaninyɛ honhom, nimdeɛ ne Yehowa suro honhom. Na Yehowa suro bɛyɛ no huam. Na ɛnyɛ nea n’ani hu so na obebu atɛn, na ɛnyɛ nea n’aso te so na obedi asɛm, na trenee na ɔde bebu atɛn ama wɔn a wɔba fam no, na ɔde asɛntrenee adi ama asase so ahobrɛasefo.”​—Yesaia 11:2-4, NW.

³ Hyɛ su horow a ɛma Kristo tumi ‘bu wiase ntɛn wɔ trenee mu’ no nsow wɔ saa nkɔmhyɛ no mu. (Asomafo no Nnwuma 17:31) Obu atɛn ma ɛne Yehowa honhom, ɔsoro nyansa, ntease, afotu, ne nimdeɛ hyia. Hyɛ no nsow nso sɛ obu atɛn wɔ Yehowa suro mu. Enti, “Kristo atemmu agua” no gyina hɔ ma “Onyankopɔn asɛnni agua” no ara. (2 Korintofo 5:10; Romafo 14:10) Ɔhwɛ yiye sɛ obebu atɛn sɛnea Onyankopɔn bu atɛn. (Yohane 8:16) Ɛnyɛ nea ohu anaa nea ɔte so na ogyina bu atɛn. Ɔde asɛntrenee bu atɛn ma ahobrɛasefo ne wɔn a wɔba fam no. Otemmufo a ne ho yɛ nwonwa bɛn ara ni! Na nhwɛso a ɛyɛ nwonwa bɛn ara na ɔyɛ ma nnipa a wɔtɔ sin a wɔpaw wɔn sɛ wommu atɛn nnɛ no sɛɛ yi!

Asase so Atemmufo

 4. (a) Dɛn na ɛbɛyɛ 144,000 no dwumadi biako wɔ Kristo Mfirihyia Apem Ahenni no mu? (b) Nkɔmhyɛ bɛn na ɛkyerɛ sɛ wɔbɛpaw Kristofo a wɔasra wɔn no bi sɛ atemmufo bere a wɔda so ara wɔ asase so no?

⁴ Kyerɛwnsɛm no kyerɛ sɛ efi asomafo 12 no so no, Kristofo a wɔasra wɔn a wɔyɛ kakraa bi bɛyɛ Kristo Yesu mfɛfo atemmufo wɔ Mfirihyia Apem Ahenni no mu. (Luka 22:28-30;. 1 Korintofo 6:2; Adiyisɛm 20:4) Wobuu honhom fam Israelfo a wɔasra wɔn no mu nkaefo a wɔwɔ asase so no ankasa nso atɛn na wɔsan gyee wɔn toom wɔ 1918-19 mu. (Malaki 3:2-4) Wɔhyɛɛ honhom fam Israel a wɔbɛsan agye wɔn atom yi ho nkɔm sɛ: “Mɛdan w’atemmufo mama wo sɛ kan no, ne w’afotufo sɛ mfiase no.” (Yesaia 1:26) Enti, Yehowa ama nkaefo a wɔasan agye wɔn atom no trenee atemmufo ne afotufo, sɛnea ɔyɛe wɔ honam fam Israel man no “mfiase” no.

 5. (a) Henanom na ‘wɔpaw wɔn sɛ atemmufo’ bere a wɔsan gyee honhom fam Israel toom no akyi, na wɔayɛ wɔn ho mfonini dɛn wɔ Adiyisɛm nhoma no mu? (b) Henanom na wɔreboa ahwɛfo a wɔasra wɔn no wɔ asɛnni adwuma no mu, na ɔkwan bɛn so na wɔde ntetee rema eyinom na ama wɔayɛ atemmufo pa?

⁵ Nea edi kan no, na ‘anyansafo’ a ‘wɔpaw wɔn sɛ atemmufo’ no nyinaa yɛ mpanyimfo a wɔasra wɔn. (1 Korintofo 6:4, 5) Wɔyɛ ahwɛfo anokwafo a wɔasra wɔn na wobu wɔn no ho mfonini wɔ Adiyisɛm nhoma no mu sɛ Yesu kura wɔn wɔ ne nsa nifa mu, kyerɛ sɛ, wɔwɔ ne nkɛntɛnso ne n’akwankyerɛ ase. (Adiyisɛm 1:16, 20; 2:1) Efi 1935 no, wɔn a wɔasra wɔn no anya “nnipakuw kɛse” a wɔkɔ so dɔɔso, na wɔn anidaso ne sɛ wobenya nkwa wɔ “ahohiahia kɛse” no mu na wɔatra ase daa wɔ paradise asase so no mmoa a wofi nokwaredi mu de ma no. (Adiyisɛm 7:9, 10, 14-17) Bere a “oguammaa no ayeforohyia” no bɛn no, Sodikuw a wɔasra wɔn no paw eyinom mu pii na wɔasom sɛ mpanyimfo ne atemmufo wɔ Yehowa Adansefo asafo ahorow bɛboro 66,000 a ɛwɔ asase so nyinaa no mu.”a (Adiyisɛm 19:7-9) Wɔnam sukuu atitiriw bi so retete wɔn ma wɔadi asɛyɛde ahorow ho dwuma wɔ “asase foforo” abusua no mu. (2 Petro 3:13) Ahenni Ɔsom Sukuu a wɔyɛe wɔ 1991 awiei wɔ aman pii so no sii ɔkwan pa a ɛsɛ sɛ wɔfa so di nsɛm no so dua. Ɛyɛ mpanyimfo a wɔsom sɛ atemmufo no asɛde sɛ wosuasua Yehowa ne Kristo Yesu a wɔn atemmu yɛ nokware ne trenee no.​—Yohane 5:30; 8:16; Adiyisɛm 19:1, 2.

Atemmufo a ‘Wɔde Osuro Bɔ Wɔn Bra’

 6. Dɛn nti na ɛsɛ sɛ asɛnni boayikuw mu mpanyimfo ‘de osuro bɔ wɔn bra’?

⁶ Sɛ Kristo ankasa mpo de Yehowa suro ne Ne honhom no mmoa na ebu atɛn a, mpɛn ahe na ɛnsɛ sɛ mpanyimfo a wɔtɔ sin no yɛ saa! Sɛ wɔpaw wɔn sɛ wɔnsom wɔ asɛnni boayikuw bi mu a, wohia sɛ ‘wɔde osuro bɔ wɔn bra,’ na wɔsrɛ ‘Agya a ɔnhwɛ nnipa anim na obu atɛn’ no na waboa wɔn ma wɔabu atɛn wɔ trenee mu. (1 Petro 1:17) Ɛsɛ sɛ wɔkae sɛ wɔreyɛ nnipa nkwa, wɔn “akra” ho adwuma sɛ wɔn a “wobebu ho akontaa.” (Hebrifo 13:17) Esiane eyi nti, nokwarem no, wobebu asɛnni mu mfomso a anka wobetumi akwati biara a wɔbɛyɛ ho akontaa akyerɛ Yehowa. Wɔ Hebrifo 13:17 mu nkyerɛkyerɛmu bi a J. H. A. Ebrard de mae mu no, ɔkyerɛwee sɛ: “Ɛyɛ oguanhwɛfo no asɛyɛde sɛ ɔhwɛ akra a wɔde wɔn ahyɛ ne nsa sɛ ɔnhwɛ wɔn no so, na . . . ɛsɛ sɛ obu wɔn nyinaa ho akontaa, a wɔn a ɛnam ne mfomso a ɔyɛe so na wɔyerae no nso ka ho. Eyi yɛ aniberesɛm. Ma asɛm no ho somfo biara nsusuw ho, sɛ ofi ɔno ankasa pɛ mu afa asɛyɛde kɛse [a ɛyɛ den] yi ho dwumadi ato ne ho so.”​—Fa toto Yohane 17:12; Yakobo 3:1 ho.

 7. (a) Dɛn na ɛsɛ sɛ nnɛyi atemmufo ma ɛtra wɔn adwenem, na dɛn na ɛsɛ sɛ ɛyɛ wɔn botae? (b) Nneɛma bɛn na ɛsɛ sɛ mpanyimfo sua fi Mateo 18:18-20?

⁷ Ɛsɛ sɛ mpanyimfo a wodi nsɛm no kae sɛ asɛm biara mu Atemmufo ankasa ne Yehowa ne Kristo Yesu. Kae asɛm a wɔka kyerɛɛ Israel atemmufo no: “Ɛnyɛ onipa na morebu atɛn ama no, na mmom [Yehowa], na ɔne mo wɔ hɔ atemmu asɛm no mu. Na afei [Yehowa] ho hu ntra mo so. . . . Monyɛ sa, na moanni sõ.” (2 Beresosɛm 19:6-10, NW) Ɛsɛ sɛ mpanyimfo a wɔredi asɛm bi no de osuro a emu yɛ den bɔ mmɔden biara a wobetumi hwɛ hu sɛ Yehowa ‘ne wɔn wɔ hɔ ampa wɔ atemmu asɛm no mu.’ Ɛsɛ sɛ gyinae a wosi no da sɛnea Yehowa ne Kristo susuw asɛm no ho no adi pɛpɛɛpɛ. Ɛsɛ sɛ nea sɛnkyerɛnne kwan so no, ‘wɔkyekye’ (wobu no fɔ) anaasɛ ‘wɔsan’ (wobu no bem) wɔ asase so no yɛ nea wɔakyeye anaa wɔasan wɔ soro dedaw​—sɛnea nea wɔakyerɛw wɔ Onyankopɔn Asɛm a efi honhom mu no ma ɛda adi no. Sɛ wɔbɔ Onyankopɔn mpae wɔ Yesu din mu a, Yesu ‘bɛba wɔn mfinimfini’ abɛboa wɔn. (Mateo 18:18-20, Reference Bible ase hɔ asɛm; The Watchtower, February 15, 1988, kratafa 9) Ɛsɛ sɛ asɛnni bagua ase tebea kyerɛ sɛ Kristo wɔ wɔn mfinimfini ampa.

Nguanhwɛfo a Wɔde Wɔn Bere Nyinaa Yɛ Adwuma

 8. Dɛn ne mpanyimfo asɛyɛde titiriw wɔ nguankuw no ho, sɛnea Yehowa ne Yesu Kristo yɛɛ ho nhwɛso no? (Yesaia 40:10, 11; Yohane 10:11, 27-29)

⁸ Mpanyimfo mfa wɔn bere nyinaa mmu atɛn. Wɔyɛ nguanhwɛfo a wɔde wɔn bere nyinaa hwɛ nguan. Wɔyɛ ayaresafo, ɛnyɛ wɔn a wɔde asotwe ma. (Yakobo 5:13-16) Adwene titiriw a ɛwɔ Hela asɛmfua ma ɔhwɛfo (e·piʹsko·pos) akyi no ne sɛ wɔbɔ biribi ho ban hwɛ so. Theological Dictionary of the New Testament no ka sɛ: “Asɛmfua a wɔde di dwuma ka oguanhwɛfo ho [wɔ 1 Petro 2:25] a ɛne [e·piʹsko·pos] no kyerɛ ɔhwɛ adwuma a ɛne sɛ wɔbɛwɛn biribi anaasɛ wɔbɛbɔ ho ban.” Yiw, wɔn asɛyɛde titiriw ne sɛ wɔbɛwɛn nguan no abɔ wɔn ho ban, wɔbɛma wɔatra nguankuw no mu.

9, 10. (a) Ɔkwan bɛn so na Paulo sii mpanyimfo asɛde a edi kan no so dua, enti nsɛm bɛn na ɛfata sɛ wobisa? (b) Paulo nsɛm a ɛwɔ Asomafo no Nnwuma 20:29 no kyerɛ dɛn, enti ɔkwan bɛn na mpanyimfo betumi afa so abɔ mmɔden sɛ wɔbɛtew nsɛm dodow a wodi so?

⁹ Ɔsomafo Paulo sii asɛm a ɛho hia no so dua bere a ɔka kyerɛɛ Efeso asafo no mu mpanyimfo no sɛ: “Monhwɛ mo ho ne nguankuw nyinaa a honhom kronkron de mo asisi wɔn so ahwɛfo sɛ monyɛn Onyankopɔn asafo a ɔde n’ankasa [Ba] mogya anya wɔn no yiye.” (Asomafo no Nnwuma 20:28) Paulo si ɔhwɛ so dua, na ɛnyɛ asotwe. Ebia ɛbɛyɛ papa sɛ mpanyimfo binom susuw asemmisa yi ho: ‘So ebia sɛ yɛde bere ne mmɔdenbɔ pii yɛ ɔhwɛ adwuma no a, ɛrentew bere pii a yehia na yɛde ahwehwɛ nsɛm a yedi no mu, na yɛadi ho dwuma no so anaa?’

¹⁰ Ampa, Paulo de “mpataku bɔne” ho kɔkɔbɔ mae. Nanso so wankasa antia eyinom esiane sɛ ‘wɔnyɛ nguankuw no brɛbrɛ no nti’? (Asomafo no Nnwuma 20:29) Na bere a nea ɔkae no kyerɛ sɛ ɛsɛ sɛ ahwɛfo anokwafo no pam “mpataku” yi fi asafo no mu no, so na ne nsɛm no nkyerɛ sɛ mpanyimfo no bɛyɛ nguankuw no ‘brɛbrɛ’ anaa? Sɛ oguan bi yɛ mmerɛw wɔ honhom mu na ogyae Nyankopɔn som a, dɛn na ohia​—ɔhwe anaa ayaresa, asotwe anaa ɔhwɛ? (Yakobo 5:14, 15) Enti, ɛsɛ sɛ mpanyimfo yɛ bere nhyehyɛe daa ma ɔhwɛ adwuma no yɛ. Nea ɛyɛ anigye a eyi de bɛba ne sɛ wɔrensɛe bere pii mfa nni Kristofo a bɔne adi wɔn so nim no nsɛm a egye bere pii no. Nokwarem no, ɛsɛ sɛ nea ehia mpanyimfo kan ne sɛ wɔbɛma afoforo anya ahotɔ ne ahoɔden, na wɔnam saayɛ so ama asomdwoe, ne ahobammɔ aba Yehowa nkurɔfo mu.​—Yesaia 32:1, 2.

Sɛnea Wɔsom sɛ Nguanhwɛfo ne Atemmufo Ayamyefo

11. Dɛn nti na ehia sɛ asɛnni boayikuw mu mpanyimfo yɛ wɔn a wɔnhwɛ nnipa anim a wɔwɔ “nyansa a efi soro”?

¹¹ Ɔhwɛ pii a wɔde ma ansa na Kristoni bi akodi mfomso no betumi atew Yehowa nkurɔfo mu nsɛm a wodi no dodow so. (Fa toto Galatifo 6:1 ho.) Nanso, esiane adesamma bɔne ne sintɔ nti, ɛho behia sɛ bere ne bere mu no, Kristofo ahwɛfo di bɔne a wɔyɛ ho nsɛm. Nnyinasosɛm ahorow bɛn na ɛsɛ sɛ ɛkyerɛ wɔn kwan? Nsakrae biara mmaa eyi mu fi Mose anaa tete Kristofo no bere so ɛ. Mose nsɛm a ɔka kyerɛɛ Israel atemmufo no da so ara yɛ adwuma: “Sɛ mudi mo nuanom ntam nsɛm a, ɛsɛ sɛ mode trenee bu atɛn . . . Ɛnsɛ sɛ mohwɛ nnipa anim atemmu mu.” (Deuteronomium 1:16, 17, NW) Nnipa anim a wɔnhwɛ yɛ su a wonya fi “nyansa a efi soro” no mu, nyansa a ɛho hia asɛnni boayikuw mu mpanyimfo yiye no. (Yakobo 3:17; Mmebusɛm 24:23) Nyansa a ɛte sɛɛ bɛboa wɔn ma wɔatumi ahu nsonsonoe a ɛwɔ mmerɛwyɛ ne amumɔyɛ ntam.

12. Ntease bɛn mu na ehia sɛ atemmufo yɛ nnipa pa nso, na ɛnyɛ atreneefo nko?

¹² Ɛsɛ sɛ mpanyimfo “de trenee bu atɛn,” ma ɛne Yehowa papa ne bɔne ho gyinapɛn ahorow ahyia. (Dwom 19:9) Nanso, bere a wɔrebɔ mmɔden sɛ wɔbɛyɛ nnipa atreneefo no, ɛsɛ sɛ wɔbɔ mmɔden nso sɛ wɔbɛyɛ nnipa pa, wɔ nsonsonoe a Paulo daa no adi wɔ Romafo 5:7, 8 no ntease mu. Nhoma Insight on the Scriptures reka nkyekyem ahorow yi ho asɛm wɔ emu asɛm a ɛfa “Trenee,” ho mu no, ɛkae sɛ: “Sɛnea wɔde Hela asɛmfua no dii dwuma no kyerɛ sɛ onipa a wonim no, anaa ɔda nsow sɛ onipa pa no, yɛ obi a ne yam ye (ɔpɛ papayɛ anaa ɔma afoforo nya mfaso horow) na ɔyɛ ɔdɛɛfo (ɔyɛ ade de da papayɛ a ɛte sɛɛ adi). Ɛnyɛ nea atɛntrenee hwehwɛ sɛ ɔyɛ nkutoo na ehia no na mmom ɔyɛ nea ɛboro saa nso, a nea ɛkanyan no ne afoforo ho a osusuw ne ɔpɛ a ɔwɔ sɛ ɔbɛyɛ ade a ɛho bɛba wɔn mfaso na ɛbɛboa wɔn.” (Po 2, kratafa 809) Mpanyimfo a ɛnyɛ sɛ wɔteɛ nko na mmom wɔyɛ nnipa pa no fi ayamye mu ne abɔnefo bedi no ɔkwan a ɛkyerɛ sɛ wosusuw wɔn ho so. (Romafo 2:4) Ɛsɛ sɛ wonya ɔpɛ sɛ wɔbɛda mmɔborɔhunu ne ayamhyehye adi. Ɛsɛ sɛ wɔyɛ nea wobetumi de boa ɔbɔnefo no ma ohu hia a ehia sɛ onu ne ho, ɛwom mpo sɛ mfiase no ebia ɛbɛyɛ sɛ nea ɔnkyerɛ wɔn mmɔdenbɔ no ho anisɔ de.

Su pa a Ɛsɛ sɛ Wonya wɔ Asɛnni Mu

13. (a) Sɛ ɔpanyin yɛ adwuma sɛ ɔtemmufo a, ɔda so ara yɛ dɛn nso? (b) Paulo afotu bɛn na ɛho hia wɔ nsɛm a asɛnni boayifo di nso mu?

¹³ Sɛ ɛba sɛ ɛsɛ sɛ wodi asɛm bi a, ɛnsɛ sɛ ahwɛfo werɛ fi sɛ wɔda so ara yɛ nguanhwɛfo a wɔreyɛ Yehowa nguan ho adwuma wɔ “oguanhwɛfo pa” no ase. (Yohane 10:11) Mmoa a wɔde bɛma nguan a wohyia ɔhaw ahorow daa ho afotu a Paulo de mae no yɛ nea ɛsɛ sɛ wɔde di dwuma yiye wɔ asɛnni ahorow mu nso. Ɔkyerɛwee sɛ: “Anuanom, sɛ mfomso bi bɛto obi nso a, mo a moyɛ honhom mufo no, monteɛ nea ɔte saa no so odwo honhom mu, nanso hwɛ wo ho, na wɔansɔ wo nso anhwɛ. Munnyigye mo ho ade a ɛyɛ mo duru nsoa, na saa na mode bewie Kristo mmara no so di.”​—Galatifo 6:1, 2.b

14. Ɛsɛ sɛ ahwɛfo bu nsɛm a asɛnni boayifo di no dɛn, na ɛsɛ sɛ wɔyɛ wɔn ade dɛn wɔ ɔbɔnefo ho?

¹⁴ Sɛ́ anka asenni boayikuw bi mu mpanyimfo bebu wɔn ho sɛ atemmufo a wɔkorɔn a wɔahyiam de asotwe rebɛma no, ɛsɛ sɛ wobu asɛnni no sɛ wɔn ɔhwɛ adwuma no fã foforo bi. Yehowa nguan no mu biako aba ɔhaw mu. Dɛn na wobetumi ayɛ de agye no? So aka akyiri dodo sɛ wɔbɛboa oguan yi a wayera afi nguankuw no mu no? Yɛn anidaso ne sɛ ɛnte saa? Ɛsɛ sɛ mpanyimfo nya mmɔborɔhunu a wɔbɛda no adi ho adwempa, faako a eyi fata no. Ɛnkyerɛ sɛ ɛsɛ sɛ wɔbrɛ Yehowa gyinapɛn ahorow ase, sɛ wɔayɛ bɔne bi a anibere wom a. Nanso wɔn ani a wɔbɛma aba nsɛm tebea biara a ɛno nti ɛnsɛ sɛ wɔyɛ katee dodo so no bɛboa wɔn ma sɛ ɛbɛyɛ yiye a, wɔada mmɔborɔhunu adi. (Dwom 103:8-10; 130:3) Awerɛhosɛm ne sɛ abɔnefo bi sen wɔn kɔn araa ma ɛsɛ sɛ mpanyimfo no yɛ pintinn, ɛwom sɛ wɔremmɔ atirimɔden da de.​—1 Korintofo 5:13.

Asɛnni Bagua Atirimpɔw

15. Sɛ asɛm bi a anibere wom sɔre wɔ ankorankoro ntam a, dɛn na ɛsɛ sɛ wodi kan hwɛ?

¹⁵ Sɛ asɛm bi a anibere wom sɔre wɔ ankorankoro binom ntam a, mpanyimfo a wɔyɛ anyansafo bedi kan ahwɛ ahu sɛ wɔn a asɛm aba wɔn ntam no abɔ mmɔden sɛ wobesiesie wɔ kokoam sɛnea wɔakyerɛ wɔ Mateo 5:23, 24 anaa Mateo 18:15 no anaa. Sɛ eyi antumi ansiesie asɛm no a, ebia afotu a ɔpanyin anaa mpanyimfo baanu de bɛma no ara bɛdɔɔso. Bere a wɔayɛ bɔne a anibere wom a ebetumi akowie otu mu no nkutoo ansa na ɛho hia sɛ wɔpaw asɛnni boayifo ma wodi asɛm no. (Mateo 18:17; 1 Korintofo 5:11) Ɛsɛ sɛ wonya Kyerɛwsɛm mu nnyinaso pa a wobegyina so ahyehyɛ asɛnni boayikuw. (Hwɛ September 15, 1989 Ɔwɛn-Aban, kratafa 18.) Sɛ wɔhyehyɛ bi a, ɛsɛ sɛ wɔpaw mpanyimfo a wɔfata sen biara ma wodi asɛm pɔtee no.

16. Dɛn na mpanyimfo nam nsɛm a asɛnni boayifo di no so bɔ mmɔden sɛ wɔbɛyɛ?

¹⁶ Dɛn na mpanyimfo bɔ mmɔden sɛ wɔnam asɛm a asɛnni boayifo bedi no so bɛyɛ? Nea edi kan no, wɔrentumi mfa trenee mmu atɛn, gye sɛ wohu asɛm no mu nokware. Sɛnea na ɛte wɔ Israel no, ɛsɛ sɛ ‘wɔhwehwɛ’ nsɛm a anibere wom ‘mu yiye.’ (Deuteronomium 13:14; 17:4) Enti asɛm a wodi no botae biako ne sɛ wɔbɛhwehwɛ asɛm no mu nokwasɛm ahorow. Nanso wobetumi ayɛ saa wɔ ɔdɔ mu, na ɛsɛ sɛ wɔyɛ no saa. (1 Korintofo 13:4, 6, 7) Sɛ wonya hu nokwasɛm ahorow no a, mpanyimfo no bɛyɛ nea ehia sɛ wɔyɛ biara na wɔde abɔ asafo no ho ban, na wɔama Yehowa gyinapɛn ahorow a ɛkorɔn no akɔ so atra mu na biribiara ansiw ne honhom no kwan. (1 Korintofo 5:7, 8) Nanso, asɛm a wodi no atirimpɔw biako nso ne sɛ, sɛ ɛbɛyɛ yiye a, wobegye ɔbɔnefo a ne nkwa da asiane mu no nkwa​—Fa toto Luka 15:8-10 ho.

17. (a) Ɔkwan bɛn so na ɛsɛ sɛ wɔfa ne obi a wɔabɔ no sobo di bere a wɔredi asɛm no, na atirimpɔw bɛn nti na wɔbɛyɛ saa? (b) Dɛn na eyi bɛhwehwɛ afi asɛnni boayikuw mufo no hɔ?

¹⁷ Ɛsɛ sɛ wɔne obi a wɔabɔ no sobo di nsɛm sɛ Onyankopɔn guan, na ɛnyɛ ɔkwan foforo biara so. Ɛsɛ sɛ wɔyɛ no brɛbrɛ. Sɛ wayɛ bɔne (anaa bɔne ahorow) bi a, atemmufo atreneefo no atirimpɔw ne sɛ wɔbɛboa ɔbɔnefo no na wayɛ nsakrae, wɔama wahu sɛnea ɔkwan a ɔnam so no yɛ bɔne, wanu ne ho, na wɔnam saa kwan no so ahwim no afi ‘ɔbonsam afiri mu.’ Ebehia sɛ wohu ‘ɔkyerɛkyerɛ,’ ‘odwo a wɔde kasa kyerɛ.’ (2 Timoteo 2:24-26; 4:2) Na sɛ afei ɔbɔnefo no hu sɛ wayɛ bɔne, ɛwowɔ ne komam ampa, na ɔsrɛ Yehowa hɔ bɔne fafiri nso ɛ? (Fa toto Asomafo no Nnwuma 2:37 ho.) Sɛ boayikuw no tumi hu sɛ ohia mmoa ampa a, mpɛn pii no, ɛho renhia sɛ wotu no?​—Hwɛ The Watchtower, January 1, 1983, kratafa 31, nkyekyem 1.

18. (a) Bere bɛn na ɛsɛ sɛ asɛnni boayikuw da pintinnyɛ adi wɔ tu a wotu ɔbɔnefo no mu? (b) Tebea a ɛyɛ awerɛhow bɛn nti na ɛsɛ sɛ mpanyimfo yere wɔn ho boa nguan a wɔfom kwan no?

¹⁸ Nanso, sɛ asenni boayikuw no mufo hu sɛ asɛm a ɛda wɔn anim no fa ɔwae a wɔnkyerɛ ahonu, Yehowa mmara a wɔboapa sɔre tia, anaa amumɔyɛ ankasa koraa ho a, ɛyɛ wɔn asɛyɛde sɛ wɔbɔ asafo no mufo afoforo ho ban denam tu a wobetu ɔbɔnefo a ɔnkyerɛ ahonu no so. Sɛ ɛda adi pefee sɛ ɔbɔnefo bi nni ne bɔne no ho awerɛhow ɔkwan a ɛfata so a, ɛnyɛ ɔhyɛ sɛ ɛsɛ sɛ asɛnni boayikuw no ne no hyia mpɛn pii anaasɛ wɔde nsɛm hyɛ n’ano, bɔ mmɔden sɛ wɔbɛhyɛ no ma wakyerɛ ahonu.c Wɔ nnansa yi mfe mu no, nnipa a wotu wɔn wɔ wiase nyinaa no dodow yɛ bɛyɛ adawurubɔfo ɔha biara mu 1. Ɛno kyerɛ sɛ wɔ bɛyɛ nguan ɔha a wɔkɔ so tra nguankuw no mu no, wɔhwere obiako​—anyɛ yiye koraa no, bere tiaa bi. Sɛ wususuw bere ne mmɔdenbɔ a egye na wɔde obi aba nguankuw no mu ho a, so ɛnyɛ awerɛhosɛm kɛse sɛ yebehu sɛ ‘wɔsan de’ wɔn mu mpempem pii ‘ma Satan’ afe biara anaa?​—1 Korintofo 5:5.

19. Dɛn na ɛnsɛ sɛ asɛnni boayikuw mu mpanyimfo werɛ fi da, enti dɛn na ɛbɛyɛ wɔn botae??

¹⁹ Ɛsɛ sɛ mpanyimfo a wɔrebefi asɛm bi di ase no kae sɛ bɔne ahorow a wɔyɛ wɔ asafo no mu no mu dodow no ara fi mmerɛwyɛ, na ɛnyɛ amumɔyɛ. Ɛnsɛ sɛ wɔn werɛ fi Yesu mfatoho a ɛfa oguan a ɔyerae no ho da, nea ɔde nsɛm a edi so yi wiee ho asɛm ka no: “Mise mo sɛ: Saa ara na anigye bɛba ɔsoro, ɔdebɔneyɛfo biako a ɔsakra n’adwene ho sen nnipa trenee aduakron akron a enhia wɔn adwensakra.” (Luka 15:7) Ampa, ‘Yehowa mpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.’ (2 Petro 3:9) Ɛmmra sɛ asɛnni boayikuw a wɔwɔ wiase nyinaa nam Yehowa mmoa so bɛyɛ nea wobetumi biara ma anigye aba ɔsoro denam abɔnefo a wɔbɛboa wɔn ma wɔahu hia a ehia sɛ wɔkyerɛ ahonu na wɔasan abɛnantew ɔkwan hihiaa a ɛkɔ daa nkwa mu so no so.​—Mateo 7:13, 14.

[Ase hɔ asɛm]

Ntĩmu Nsemmisa

◻ Bere a mpanyimfo di Oguanhwɛfo Kɛse ne Oguanhwɛfo Pa no nhwɛso akyi no, dɛn na ɛsɛ sɛ wɔma ɛho hia wɔn titiriw?

◻ Ɔkwan bɛn so na mpanyimfo betumi abɔ mmɔden sɛ wɔbɛtew nsɛm a ɛsɛ sɛ wodi no so?

◻ Ntease bɛn mu na ehia sɛ atemmufo yɛ nnipa pa nso na ɛnyɛ atreneefo nkutoo?

◻ Ɔkwan bɛn na ɛsɛ sɛ wɔfa so ne ɔbɔnefo di bere a wɔredi asɛm, na atirimpɔw bɛn nti na wɔbɛyɛ saa?

◻ Dɛn nti na sɛ hwee nni hɔ a wobetumi ayɛ a, ansa na wobetu obi?

[Mfonini wɔ kratafa 16]

Sɛ wodi kan yɛ ɔhwɛ adwuma no a, ebia wɔbɛkwati nsɛm a ɛsɛ sɛ wodi no pii

[Mfonini wɔ kratafa 18]

Bere a wɔredi asɛm bi mpo mu no, ɛsɛ sɛ mpanyimfo bɔ mmɔden sɛ wɔbɛteɛ ɔbɔnefo so wɔ odwo honhom mu