Wɔyɛɛ Yehowa Apɛde

Paulo Di Adanse Akokoduru So Wɔ Mpanyimfo Anim

NSONSONOE a na ɛda mmarima baanu no ntam no yɛ nea na wotumi hu no yiye. Ná obiako bɔ ahemmotiri na nkɔnsɔnkɔnsɔn gu obiako. Ná obiako yɛ ɔhene; na obiako nso yɛ ɔdeduani. Bere a wɔde Paulo too afiase mfe abien akyi no, wɔde no begyinaa Yudafo sodifo, Herode Agripa II anim. Ɔhene no ne ne yere, Berenike, “de ahokeka a ɛte apɔw bae, na wɔne asafohene ne kurom hɔ nnipa a wɔwɔ din kɔɔ nea wotie asɛm no.” (Asomafo no Nnwuma 25:23) Nhwehwɛmu nhoma bi ka sɛ: “Ebetumi aba sɛ na nnipa ɔhaha pii wɔ hɔ.”

Amrado foforo a na wɔapaw no, Festo, na ɔyɛɛ nhyiam no ho nhyehyɛe. Ná amrado a odii n’anim, Felike, apene so ma wɔde Paulo ato afiase. Nanso Festo tirim anteɛ no wɔ sobo a wɔde bɔɔ Paulo no ho. Asɛm no ne sɛ, Paulo kaa no deneennen sɛ onni fɔ na ɔkae mpo sɛ wɔmfa no nkɔ Kaesare anim! Ná Ɔhene Agripa ho pere no sɛ ɔbɛte Paulo asɛm no. Ɔkae sɛ: “Anka me nso mepɛ sɛ mitie onipa no.” Festo yɛɛ nhyehyɛe ntɛmntɛm, a ɛda adi sɛ na ɔresusuw nea ɔhene no bedwen afa ɔdeduani a ɔda nsow yi ho.—Asomafo no Nnwuma 24:27–25:22.

Ade kyee no, wɔde Paulo begyinaa mpanyimfo dɔm kɛse bi anim. Ɔka kyerɛɛ Agripa sɛ: ‘Mibu no anigyesɛm sɛ nnɛ merebeyi m’ano wɔ w’anim, ne titiriw no, bere a wunim amanne nyinaa ne akyinnyegyesɛm a ɛwɔ Yudafo mu no; enti mesrɛ wo sɛ tɔ wo bo ase tie me.’—Asomafo no Nnwuma 26:2, 3.

Paulo Yi Ne Ho Ano Akokoduru So

Nea edi kan no, Paulo kaa ne kan abrabɔ sɛ Kristofo taafo ho asɛm kyerɛɛ Agripa. Ɔkae sɛ: “Mehyɛɛ wɔn ma wɔkaa abususɛm, na m’ani beree wɔn so dodo nti, metaa wɔn koduu ananafo nkurow so.” Paulo toaa so kaa sɛnea onyaa anisoadehu nwonwaso bi a ɛfa Yesu a wɔanyan no afi awufo mu no ho a obisaa no sɛ: “Adɛn nti na wotaa me? Ɛyɛ den ma wo sɛ wobɛto ɔkafo poma ano dade anankoti.”a—Asomafo no Nnwuma 26:4-14.

Ɛno akyi no Yesu de ahyɛde maa Saul sɛ, kodi “nneɛma a woahu me wom ne nea merebeyi me ho makyerɛ wo wom no ho” adanse kyerɛ amanaman nyinaa. Paulo kae sɛ ɔbɔɔ mmɔden sɛ obewie ne dwumadi no. Nanso, ɔka kyerɛɛ Agripa sɛ: “Eyi nti na Yudafo bɛkyeree me asɔrefi pɛe sɛ wokum me.” Nea ɛbɛyɛ na wakanyan Agripa anigye wɔ Yudasom ho no, Paulo sii so dua sɛ wɔ n’adansedi mu no ‘na ɔnka biribiara sɛ nea adiyifo ne Mose kae sɛ ɛbɛba’ a ɛfa Mesia no wu ne ne wusɔre ho adanse ho nkutoo.—Asomafo no Nnwuma 26:15-23.

Festo twaa n’ano. Ɔteɛɛm sɛ, “Nhomanim bebrebe abɔ wo dam.” Paulo buae sɛ: “Memmɔɔ dam ɛ, ɔpanyin Festo, na meka nokware ne anidahɔ nsɛm.” Paulo kaa Agripa ho asɛm sɛ: “Na ɔhene a mede nnam meka asɛm mekyerɛ no yi nim nsɛm yi mu; na migye midi sɛ eyinom biara nhintaw no, efisɛ wɔanyɛ eyi kokoam.”—Asomafo no Nnwuma 26:24-26.

Afei Paulo kasa kyerɛɛ Agripa tee. “Ɔhene Agripa, wugye adiyifo no di anaa?” Akyinnye biara nni ho sɛ asɛmmisa no maa Agripa yɛɛ basaa. Anyɛ yiye koraa no, na adwene bi a agye din wɔ hɔ a ɛsɛ sɛ ɔma no tra hɔ, na sɛ ɔne Paulo yɛ adwene a na ɛbɛyɛ te sɛ nea ɔfoa nea Festo frɛɛ no ‘abɔdamsɛm’ no so. Ebia bere a Paulo hui sɛ Agripa retwentwɛn ne nan ase sɛ ɔbɛma mmuae no, n’ankasa de mmuae no bae. Ɔkae sɛ: ‘Minim sɛ wugye di.’ Afei Agripa kasae, nanso wamma ne nsɛm no anna adwene a ɔwɔ adi. Ɔka kyerɛɛ Paulo sɛ: “Aka kakraa na woama madan okristoni.”—Asomafo no Nnwuma 26:27, 28.

Paulo fi ahokokwaw mu de Agripa kasa a ɔde kwae nsɛm no kaa asɛm a na tumi wom. Ɔkae sɛ: “Anka mepɛ Onyankopɔn fam sɛ aka kakraa oo, aka bebree oo, ɛnyɛ wo nko, na mmom wɔn a wotie me nnɛ yi nyinaa nso nyɛ sɛ me ara, gye mpokyerɛ yi nko mu.”—Asomafo no Nnwuma 26:29.

Agripa ne Festo anhu hwee a ɛkyerɛ sɛ Paulo fata owu anaasɛ afiase. Nanso, na wɔrentumi nsesa ka a ɔkae sɛ ɔde n’asɛm akɔdan Kaesare no. Ɛno nti na Agripa ka kyerɛɛ Festo sɛ: “Sɛ onipa yi amfa n’asɛm ankɔdan Kaesare a, anka wobetumi agyaa no.”—Asomafo no Nnwuma 26:30-32.

Asuade a Ɛwom Ma Yɛn

Ɔkwan a Paulo faa so dii adanse wɔ mpanyimfo anim no yɛ nhwɛso a ɛda nsow ma yɛn. Paulo de anidahɔ dii dwuma, bere a na ɔrekasa akyerɛ Ɔhene Agripa no. Akyinnye biara nni ho sɛ na onim aniwusɛm a ɛfa Agripa ne Berenike ho no. Ná wɔn aware no yɛ mogyafra, efisɛ na Berenike yɛ Agripa nuabea ankasa. Nanso Paulo ampɛ sɛ ɔbɛka abrabɔ ho asɛm saa bere no mu. Mmom no, osii nsɛm a na ɔno ne Agripa adwene hyia wɔ ho so dua. Bio nso, ɛwom sɛ Farisini nhomanimfo Gamaliel na ɛkyerɛɛ Paulo ade de, nanso ogye toom sɛ Agripa yɛ onimdefo wɔ Yudafo amammerɛ mu. (Asomafo no Nnwuma 22:3) Ɛmfa ho Agripa ɔbrasu no, Paulo fi obu mu kasa kyerɛɛ no efisɛ ná Agripa wɔ tumidi mu dibea.—Romafo 13:7.

Bere a yɛde akokoduru ka yɛn gyidi ho asɛm kyerɛ no, ɛnyɛ yɛn botae ne sɛ yɛbɛpa yɛn atiefo nneyɛe bɔne ho ntama anaa yebebu wɔn fɔ wɔ ho. Mmom no, nea ɛbɛyɛ na ayɛ mmerɛw ama wɔn sɛ wobegye nokware no, ɛsɛ sɛ yesi asɛmpa no ho nsɛm a ɛhyɛ wɔn nkuran no so dua titiriw, na yɛtwe adwene si anidaso koro a yɛne wɔn kura no so. Sɛ yɛrekasa akyerɛ mpanyimfo anaa wɔn a wodi tumi a, ɛsɛ sɛ yesusuw wɔn dibea no ho. (Leviticus 19:32) Wɔ saa kwan yi so no, yebetumi asuasua Paulo, a ɔkae sɛ: “Mede me ho meyɛɛ ade nyinaa memaa nnipa nyinaa, na ɛyɛ dɛn ara a, magye ebinom nkwa” no.—1 Korintofo 9:22.

[Ase hɔ asɛm]