Nyamesom A Wɔde Frafra Amammuisɛm Mu​—So Eyi Yɛ Onyankopɔn Apɛde?

“GALILEANI Yuda sɔree ɔkan nna no mu, na ɔtwee nkurɔfo bebree dii n’akyi; na ɔno nso sɛee, na wɔn a wotiee no nyinaa bɔ petee.” (Asomafo no Nnwuma 5:37) Ɛha nso yɛwɔ Bible mu nhwɛso foforo a ɛkyerɛ sɛnea wɔde ɔsom frafra amammuisɛm mu.

Bere tiaa bi ansa na wɔrewo Yesu no, saa Yuda yi ‘hwehwɛɛ Sadok a ɔyɛ Farisini no hɔ mmoa na ɔtew atua.’ Ɛwom sɛ na Yuda yɛ “rabi a n’ankasa wɔ n’awaefo kuw de” nanso “ɔbɔɔ mmɔden sɛ ɔbɛkanyan kurow mma no ma wɔatew atua, na ɔka sɛ sɛ wogyaa wɔn ho mu tua tow ma Romafo a na wɔyɛ ahufo.”​—Josephus nhoma a wɔfrɛ no The Jewish Wars.

So Anka Yesu Bɛyɛ Saa?

Bere tiaa bi wɔ Yesu asubɔ akyi no, Ɔbonsam bɔɔ mmɔden sɛ ɔbɛma ɔde ne ho ahyehyɛ amansɛm mu. Satan de “wiase ahenni ne emu anuonyam” kyerɛɛ no. Kristo annye akyinnye sɛ ɔbonsam wɔ tumi wɔ nniso ahorow no so. Mmom no, Yesu pow amammui mu hokwan yi, ɛwom sɛ na anka obetumi asusuw ho sɛ ɛdenam amammui tumi so no obetumi ayɛ nnepa ama nkurɔfo.​—Mateo 4:8-10.

Akyiri yi nkurɔfo no huu sɛnea Yesu wɔ tumi sɛ ɔde aduan ma no. Ɛda adi sɛ wosusuwii sɛ, ‘Sɛ Yesu wɔ aban no mu a, anka obetumi adi yɛn sikasɛm mu ɔhaw no ho dwuma ama yɛn.’ Hyɛ nea ɛkɔɔ so no nsow. “Yesu hui sɛ wɔreba abɛfa no ahyɛ no de no akosi hene nti, ɔtwee ne ho.” (Yohane 6:10-15) Yiw, Yesu powee sɛ ɔde ne ho bɛhyehyɛ amammuisɛm mu, a fata a na ɔfata no mfa ho.

Akyiri yi bio, Yudafo bi a wɔwɔ amammui adwene bɔɔ mmɔden sɛ wobesum Yesu afiri wɔ amammuisɛm bi ho: towyi. So na Romafo tow no kɔ soro dodo? Sɛ Yudani yi tow no a, so na ɔreboa tow a woyi de boa Romafo akodi ahorow no? Yebetumi asua biribi afi mmuae a Yesu de mae no mu: “Momfa Kaesare de mma Kaesare, na momfa Onyankopɔn de mma Onyankopɔn!” (Marko 12:13-17) Nea ɛne eyi bɔ abira no, Roman Katolek asɔfo mpanyin 225 a wɔwɔ United States too aba November a etwaam no de gyee sikasɛm ho nsɛm bi a wɔatintim a ɛwɔ nkratafa 115 a ne fã bi ka eyi no toom: “Ɛsɛ sɛ wɔyɛ nsakrae wɔ towyi nhyehyɛe no mu de tew ahiafo adesoa so. . . . Ɛsɛ sɛ wɔn a wonya sika pii no yi tow akɛseakɛse.”

Sɛnea ebia yɛn adwene yɛ yɛn wɔ towyi ho biara no, Yesu amfa ne ho anhyɛ towyi ho amammuisɛm mu. N’asuafo, te sɛ ɔsomafo Paulo, yɛɛ saa ara. (Romafo 13:1-7) Wɔ nsɛm a anibere wom te sɛ nkoasom mpo mu no, wɔamfa wɔn ho anhyehyem. Wutumi hu sɛnea ɛbɛyɛ mmerɛw ama Kristoni a ɔwɔ ayamye no sɛ ɔbɛkasa atia nkoasom, te sɛnea asɔfo yɛ wɔ yafunu a wotu gu a wɔma hokwan wɔ mmara kwan so, nnipa mu nyiyim, mmea hokwan ahorow, ne nea ɛkeka ho ho no. Nanso nokware Kristofo amfa wɔn ho anhyem!

Ɔbenfo E. P. Sanders a ɔwɔ Oxford kyerɛw sɛ: “Ɛkame ayɛ sɛ mprempren wogye tom wɔ wiase nyinaa sɛ adanse kakraa bi mpo nni hɔ a ɛbɛma yɛasusuw sɛ na Yesu wɔ sraadi/amammui ho ɔpɛ bi, na saa ara na na ɛte wɔ n’asuafo no ho.”

Onyankopɔn Atemmu a Wodi ho Dwuma

Sɛnea yedii kan hui no, na Yudafo akwankyerɛfo pii te nka sɛ eye ma wɔn sɛ wɔde wɔn ho bɛhyehyɛ Roma sodifo no, na wɔyɛɛ saa mpo wɔ Yesu a ɔyɛ Mesia no asenni ne ne kum mu. (Mateo 27:1, 2, 15-31) Adiyisɛm yɛ nyamesom nkɛntɛnso ne amammuifo a ɔde wɔn di dwuma no ho mfonini sɛ ‘ɔbea bi a ɔte aboa kɔkɔɔ bi so.’ So ɛno mma wunhu sɛnea Onyankopɔn bu saa afrafra a asɔfo di no?​—Adiyisɛm 17:1-5.

Atemmu a nnipa a wɔhyɛ nneɛma nsow no mu bi de ama no bi mpo ni:

Malachi Martini a ɔyɛ Vatican ɔbenfo no hui sɛ asɔfo “a wɔde wɔn ho gye amammuisɛm ne asetra mu nsɛm mu no redi huammɔ wɔ wɔn adwuma a edi kan a ɛsɛ sɛ wɔyɛ no mu: sɛ wɔbɛyɛ Yesu Kristo ananmusifo.” Ɔkae sɛ: “Sɛ nhwɛso no, asɔfo mpanyimfo nni hokwan biara sɛ wɔbɛkyerɛw sikasɛm nhyehyɛe ho asɛm anaa wɔbɛka akyerɛ ɔmampanyin sɛ ɔmmfa bɛmma ahorow nkɔ Europa.”

Nanso sɛ ɛba sɛ asɔfo ho a wɔde hyehyem no afono amansɛmdifo no ne ɔmanfo no a, dɛn na ɛbɛba?

Wɔ afeha a etwaam no mu no, nhoma a wɔfrɛ no Liberty no kaa sɛnea ɔhempɔn Constantine ‘de amammuisɛm ne nyamesom frafrae wɔ afeha a ɛto so anan no mu, na ɔde “asɔre-ne-ɔman” aboa bi sii hɔ’ no ho asɛm. Ɛka faa nnɛyi tebea no ho sɛ: “Sɛnea na ɛte wɔ Constantine bere so no, asɔre no de ɔman no redi dwuma de ahwehwɛ n’ankasa mfaso horow.”​—Yɛn na yɛde nkyerɛwee soronko akyerɛw afã bi no.

Onyankopɔn Asɛm ma nea ebefi mu aba no mu da hɔ. Ɛbere no reba a amammuifo no bɛdan wɔn ho na wɔasɛe wiase atorosom aheman a ɔde amansɛm adi adwuma bere tenten de anya n’ankasa mfaso horow no pasaa. Adiyisɛm 19:2 se eyi bɛyɛ Onyankopɔn atemmu a oyi adi.

So Wubetumi Ayɛ Obi a Onni Afã Biara?

W’ankasa wurentumi mma nyamesom akwankyerɛfo nnyae wɔn ho a wɔde hyehyɛ amansɛm mu no. Nanso sɛ́ ankorankoro no, wubetumi abɔ mmɔden te sɛ nea Bible no kyerɛkyerɛ mu fa nokware asomfo ho no. Yesu ka faa n’asuafo no ho sɛ: “Womfi wiase, sɛnea me nso mimfi wiase no.” Ɛno akyi no ɔka kyerɛɛ amrado Pilato sɛ: “M’ahenni mfi wi yi ase. Sɛ m’ahenni fi wi yi ase a, anka m’asomfo bɛko na woamfa me anhyɛ Yudafo nsa.”​—Yohane 17:16; 18:36.

So ebetumi ayɛ yiye wɔ yɛn bere yi mu sɛ obi bɛtra wiase wɔ asase so ɔman bi mu sɛ ɔman ba a mmara bɔ ne ho ban, nanso ‘omfi wiase’? Nnɛyi abakɔsɛm a ɛfa Yehowa Adansefo ho no ma mmuae sɛ yiw. Wɔadi Bible ahyɛde a ese wonyɛ ɔman mma a wodi mmara so na wɔntwe wɔn ho mfi aman a wɔte mu no amammui ne sraadi dwumadi ahorow ho no so.

Nhoma a wɔfrɛ no The Shaping of American Religion no kae sɛ: “Bere a wɔpow sɛ wobɛkyia frankaa anaasɛ wɔde wɔn ho bɛhyɛ ako a enni ntease a aman a wɔadome wɔn di mu no, wɔyɛ ɔman mma a wodi mmara so wɔ akwan afoforo so. Akuw kakraa bi na wɔatumi adi asɛnnennen a ɛyɛ sɛ wɔbɛtra wiase bi ‘mu’ nanso ‘womfi mu’ no ho dwuma wɔ ɔkwan fɛfɛ a ɛte saa so.” Eyi ayɛ nokware wɔ wiase nyinaa ne wɔ amansɛm mu tebea horow pii mu. Wɔ ɔhyɛ a ano yɛ den kɛse sɛ wɔbɛma wɔagyae wɔn ho a wɔtwe fi mu mu no, Adansefo no de wɔn nokwaredi ma Onyankopɔn Ahenni no di kan bere nyinaa.

Abakɔsɛm kyerɛwfo Brian Dunn kyerɛw sɛ: “Ná Yehowa Adansefo no ne Nasisɛm no nhyia . . . Nneɛma a na ɛmma Nasifo mpɛ kuw no asɛm no mu titiriw ne Adansefo no su wɔ ɔman no ho ne afã biara a wonni wɔ amansɛm mu no. . . . Ná eyi kyerɛ sɛ gyidifo biara nni hɔ a ɔbɛma akode so, ɔbɛto aba, obegyina apɛ dibea bi, ɔde ne ho bɛhyɛ baguam afahyɛ bi mu, anaasɛ ɔbɛyɛ nokwaredi ho sɛnkyerɛnne biara.”​—The Churches Response to the Holocaust (1986)

Afã biara a wonni a ɛte saa no da so rekɔ so. Yɛkenkan wɔ The Modern Encyclopaedia of Russian and Soviet History, po 15 mu sɛ: “Hitler de nkate a emu yɛ den tan Yehowafo no na ɔde bɛyɛ 10,000 guu afiase . . . Adansefo a na biribiara rentumi nnan wɔn adwene no gyinaa Germany adwumayɛban mu tebea no ano sen afoforo biara . . . Soviet nniso no mmaa Yehowa Adansefo dwumadi hokwan wɔ mmara kwan so da efisɛ ehu adwene bi a ɛmma kuw no mufo mfa wɔn ho mma ɔman no wɔ wɔn ho kɛse sen sɛnea ɛte wɔ nyamesom nkyerɛkyerɛ afoforo mu no mpo. . . . Wɔnto aba; wɔpow sɛ wobedi sraa; wɔbɔ mmɔden biara sɛ nsɛnkyerɛwfo rennya wɔn ho nsɛm pii.”

Nhoma a wɔfrɛ no Christian Religion in the Soviet Union (1978) no de ka ho sɛ: “Soviet Adansefo no mpene ka a wɔka sɛ wɔmfa wɔn ho nhyɛ sraadi, abato, ne amammui dwumadi afoforo mu no so,” sɛnea wɔhwɛ kwan wɔ amanfo ho no.

Enti ebetumi ayɛ yiye sɛ obi besuasua Yesu afã biara a na onni wɔ Romafo ne Yudafo nniso ahorow no amansɛm ne sraadi nnwuma mu no. Saa a wobɛyɛ nnɛ no bɛyɛ ahobammɔ bere a Onyankopɔn de n’atemmu a enye no ba nyamesom ho a ɔde ahyehyɛ amammuisɛm mu no so no.

[Kratafa 26 adaka]

“Ɛbere adu sɛ woyi amansɛm fi asɛnka agua so ne asɛnka agua fi amansɛm mu. Nyamesom akwankyerɛwfo wɔ hokwan biara sɛ wokura adwene biara a wɔwɔ wɔ wiase nsɛm ho no mu. [Nanso] sɛ ɛba sɛ wɔde asɛnka agua no di wiase nsɛm mu ade bi ho dwuma a, na wɔde redi dwuma wɔ ɔkwammɔne so.”​—U.S. Ɔman mu nsɛm Kyerɛwfo​—Abadiakyiri Langhorne Motley, June 1985.