Barnaba—“Awerɛkyekye Ba”

DABƐN ne bere a etwa to a w’adamfo bi kyekyee wo werɛ? Wokae bere a etwa to a wo nso wokyekyee obi werɛ? Yɛn nyinaa hia nkuranhyɛ wɔ bere ne bere mu, na hwɛ sɛnea yɛn ani sɔ wɔn a wofi ɔdɔ mu de ma no! Awerɛkyekye kyerɛ sɛ obi begye bere atie, ate ase, na waboa. Woasiesie wo ho sɛ wobɛyɛ saa?

Onipa biako a ɔdaa ɔpɛ a ɛte saa adi wɔ ɔkwan a ɛda nsow so ne Barnaba, a na “ɔyɛ onipa pa a Honhom Kronkron ne gyidi ayɛ no ma.” (Asomafo no Nnwuma 11:24) Dɛn nti na wotumi kaa saa faa Barnaba ho? Dɛn na ɔyɛe a ɛmaa saa asɛm no fataa no?

Ɔboafo Yamyefo

Ná ne din ankasa ne Yosef, nanso asomafo no maa no abodin bi a na ɛne ne suban sɛ—Barnaba, a ɛkyerɛ “Awerɛkyekye Ba.”a (Asomafo no Nnwuma 4:36, NW) Ná afei na wɔatew Kristofo asafo no foforo. Ebinom susuw sɛ na Barnaba yɛ Yesu suani dedaw. (Luka 10:1, 2) Sɛ́ ɛte saa anaa ɛnte saa no, na ɔbarima yi kura din pa.

Pentekoste 33 Y.B. akyi pɛɛ no, Barnaba, a na ɔyɛ Lewini a ofi Kipro no fi ne pɛ mu kɔtɔn n’asase bi de sika no brɛɛ asomafo no. Dɛn nti na ɔyɛɛ saa? Kyerɛwtohɔ a ɛwɔ Asomafo no Nnwuma no ka kyerɛ yɛn sɛ saa bere no nea Kristofo a na wɔwɔ Yerusalem no yɛe ne sɛ, “wɔkyekyɛɛ [nneɛma] mu maa obiara sɛnea ehia no.” Ɛda adi sɛ Barnaba hui sɛ na mmoa ho hia, na ofi koma mu yɛɛ ho biribi. (Asomafo no Nnwuma 4:34-37) Ɛbɛyɛ sɛ na ɔyɛ sikani, nanso wantwentwɛn ne nan ase sɛ ɔde ne honam fam ahonyade bɛma na watu ne ho asi hɔ aboa Ahenni nkɔso.b Nhomanimfo F. F. Bruce ka sɛ: “Baabiara a Barnaba hyiaa nnipa anaa tebea bi a nkuranhyɛ ho hia no, ɔde nkuranhyɛ a obetumi de ama no nyinaa mae.” Eyi da adi wɔ kyerɛwtohɔ a ɛto so abien a wɔka ne ho asɛm wom no mu.

Bɛyɛ 36 Y.B. no, na Saulo a ofi Tarso (nea akyiri yi ɔbɛyɛɛ ɔsomafo Paulo no), a na wabɛyɛ Kristoni foforo no pɛ sɛ ɔne Yerusalem asafo no bɔ, “nanso na wɔn nyinaa suro no, efisɛ wɔannye anni sɛ ɔyɛ osuani.” Ná ɔbɛyɛ dɛn atumi ama asafo no agye adi sɛ wasakra ampa, na ɛnyɛ nnaadaa kwan bi kɛkɛ na ɔrefa so de adi wɔn aborɔ bio? “Barnaba faa no de no kɔɔ asomafo no nkyɛn.”—Asomafo no Nnwuma 9:26, 27; Galatifo 1:13, 18, 19.

Wɔnka nea ɛmaa Barnaba gyee Saulo toom no ho asɛm. Nanso, “Awerɛkyekye Ba” no yɛɛ ade ma ɛne n’abodin hyiae, na otiee Saulo boaa no wɔ tebea a na ayɛ sɛ nea anidaso nnim mu. Ɛwom sɛ Saulo san kɔɔ ne kurom Tarso de, nanso na ayɔnkofa bi abɛda mmarima baanu no ntam. Na ɛso baa mfaso kɛse wɔ mfe a edii hɔ no mu.—Asomafo no Nnwuma 9:30.

Wɔ Antiokia

Bɛyɛ 45 Y.B. mu no, wɔtee amanneɛbɔ wɔ Yerusalem sɛ anwonwasɛm bi resisi wɔ Antiokia wɔ Siria—ná nnipa a wɔtete saa kurow no mu a wɔka Hela kasa no pii redan gyidifo. Asafo no tuu Barnaba sɛ ɔnkɔhwɛ tebea no na ɔnyɛ ɛhɔ adwuma no ho nhyehyɛe. Ná onipa a wɔpaw no no fata yiye. Luka ka sɛ: “Ɔbae na obehuu Onyankopɔn dom no, n’ani gyei, na otuu wɔn nyinaa fo sɛ wɔmfa abodam mmata Awurade ho. Na ɔyɛ onipa pa a Honhom Kronkron ne gyidi ayɛ no ma. Na wɔde nkurɔfo bebree bɛkaa Awurade ho.”—Asomafo no Nnwuma 11:22-24.

Ɛnyɛ nea ɔyɛe ara ne no. Sɛnea nhomanimfo Giuseppe Ricciotti kyerɛ no, “na Barnaba yɛ ɔbarima a odi nneɛma ho dwuma sɛnea tebea no hwehwɛ, na ɔtee ase ntɛm ara sɛ ɛsɛ sɛ ɔyɛ biribi na ama anigye a wɔakyerɛ foforo no asow aba pii. Enti, na ade titiriw a ɛho hia ne atwafo.” Esiane sɛ na Barnaba fi Kipro nti, ɛbɛyɛ sɛ na ɔne Amanaman mufo adi ma akokwaw no. Gyama ɔtee nka sɛ ɔno na ɔfata sɛ ɔka asɛm no kyerɛ abosonsomfo. Nanso na wasiesie ne ho sɛ ɔde afoforo bɛka ne ho wɔ adwuma a ɛyɛ anigye na ɛhyɛ nkuran yi mu.

Saulo ho adwene baa Barnaba tirim. Ebia na Barnaba nim nkɔmhyɛ kwan so adiyi a wɔde maa Anania bere a Saulo sakrae no, nea ɛkae sɛ kan ɔtaafo no yɛ ‘ade a wɔayi no a ɔbɛsoa Yesu din akɔ amanaman anim’ no. (Asomafo no Nnwuma 9:15) Enti Barnaba siim kɔɔ Tarso—ne kɔ nkutoo boro kilomita 200—sɛ ɔrekɔhwehwɛ Saulo. Wɔn baanu boom yɛɛ adwuma sɛ ahokafo afe biako, na ɛyɛ “Antiokia na wodii kan too asuafo no din Kristofo” saa bere no ara.—Asomafo no Nnwuma 11:25, 26.

Klaudio nniso ase no, ɔkɔm kɛse bi baa Roma Ahemman no afã horow. Sɛnea Yudani abakɔsɛm kyerɛwfo Josephus kyerɛ no, “nnipa pii wuwui efisɛ wɔannya nea wɔde bɛtɔ aduan” wɔ Yerusalem. Enti, asuafo a wɔwɔ Antiokia no “bɔɔ wɔn tirim sɛ wɔn nyinaa mmiako mmiako de biribi bɛmena anuanom a wɔte Yudea no, sɛnea wɔn mu biara betumi, na wɔde ahwɛ wɔn. Wɔyɛɛ sa, na wɔde somaa Barnaba ne Saulo ma wɔde kɔmaa mpanyimfo no.” Bere a wɔyɛɛ adwuma yi nyinaa wiei no, wɔn baanu ne Yohane Marko kɔɔ Antiokia, na ɛhɔ na wɔkan wɔn kaa adiyifo ne akyerɛkyerɛfo a wɔwɔ asafo no mu ho.—Asomafo no Nnwuma 11:29, 30; 12:25; 13:1.

Asɛmpatrɛw Dwumadi Titiriw

Afei asɛm a ɛyɛ nwonwa bi sii. “Wɔresom [Yehowa, NW] na wɔredi mmuada no, [honhom kronkron, NW] kae sɛ: Munyi Barnaba ne Saulo mma me nkɔ adwuma a enti mafrɛ wɔn no mu.” Wo de susuw ho hwɛ! Yehowa honhom hyɛe sɛ wɔmma nnipa baanu no dwumadi titiriw bi. “Na afei [honhom kronkron, NW] somaa wɔn saa no, wosiim kɔɔ Seleukia, na wofi hɔ nam hyɛn mu kɔɔ Kipro.” Ná wobetumi afrɛ Barnaba nso ɔsomafo, anaa nea wɔasoma no, ma afata.—Asomafo no Nnwuma 13:2, 4; 14:14.

Bere a wokyinkyin Kipro nyinaa na wɔyɛɛ Sergio Paulo, Roma mantam so amrado a ɔwɔ supɔw no so, gyidini no, wɔtoaa so kɔɔ Perge a ɛwɔ Asia Kumaa mpoano no anafo fam, na ɛhɔ na Yohane Marko san kɔɔ Yerusalem. (Asomafo no Nnwuma 13:13) Ɛkame ayɛ sɛ ɛde besi saa bere no, gyama esiane sɛ Barnaba na na ne ho akokwaw kɛse wɔ nnipa baanu no mu nti, ɔno na na odi anim. Efi saa bere yi rekɔ no, Saulo (a afei de na wɔfrɛ no Paulo no) na odii anim. (Fa toto Asomafo no Nnwuma 13:7, 13, 16; 15:2 ho.) So nsakrae yi haw Barnaba? Dabi, na ɔyɛ Kristoni a ne ho akokwaw a ɔde ahobrɛase gye toom sɛ Yehowa de ne hokafo no nso redi dwuma wɔ ɔkwan a tumi wom so. Ná Yehowa pɛ sɛ ɔfa wɔn so ma nsasesin foforo nso te asɛmpa no.

Nokwarem no, ansa na wɔrepam wɔn baanu afi Antiokia wɔ Pisidia no, ɛhɔfo nyinaa tee Onyankopɔn asɛm fii Paulo ne Barnaba hɔ, na wɔn mu bi gyee asɛm no. (Asomafo no Nnwuma 13:43, 48-52) Wɔ Ikonion no, “Yudafo ne Helafo pii gye dii.” Eyi kaa Paulo ne Barnaba ma wɔtraa hɔ kyɛe, ‘na wɔde nnam paee mu kasa maa Yehowa, na ɔnam wɔn nsa so ma wɔyɛɛ nsɛnkyerɛnne ne anwonwade.’ Bere a nnipa baanu no tee sɛ wɔabɔ wɔn ho pɔ sɛ wɔrebesiw wɔn abo no, wohuu nyansa guanee, na wɔkɔtoaa wɔn adwuma no so wɔ Likaonia, Listra, ne Derbe. Ɛmfa ho sɛ Barnaba ne Paulo nyinaa kɔɔ tebea a ɛde wɔn nkwa too asiane mu mu wɔ Listra no, wɔkɔɔ so “hyehyɛɛ asuafo no akra den, tutuu wɔn fo sɛ wɔntra gyidi mu, kae nso sɛ etwa yɛn sɛ yɛnam amanehunu pii mu kɔ Onyankopɔn ahenni mu.”—Asomafo no Nnwuma 14:1-7, 19-22.

Asɛnkafo baanu a na wɔyɛ nnam yi amma wɔn koma antu. Mmom no, wɔsan wɔn akyi kɔhyɛɛ Kristofo afoforo a na wɔwɔ baabi a wohyiaa ɔtaa kɛse no den, na ebia wɔboaa mmarima a wɔfata ma wodii asafo afoforo no anim.

Twetiatwa Ho Asɛm No

Pentekoste 33 Y.B. mu akyi bɛyɛ mfe 16 no, Barnaba nyaa twetiatwa ho asɛm a na ɛyɛ asɛntitiriw wɔ abakɔsɛm mu no mu kyɛfa. “Na nnipa bi fi Yudea bae [Antiokia wɔ Siria] bɛkyerɛkyerɛɛ anuanom no sɛ: Sɛ wɔantwa mo twetia sɛnea Mose amanne no te no a, muntumi nnya nkwa.” Ná osuahu akyerɛ Barnaba ne Paulo sɛ ɛnte saa, na wɔne wɔn gyee asɛm no ho akyinnye. Sɛ́ anka wɔde wɔn tumi bɛkɛntɛn nkurɔfo so no, wohui sɛ eyi yɛ asɛm a ɛsɛ sɛ wodi ho dwuma ma ɛboa anuanom kuw no nyinaa. Enti wɔde asɛm no kɔtoo sodikuw no anim wɔ Yerusalem, na ɛhɔ na wɔn amanneɛbɔ ahorow boa ma wosiesiee asɛm no. Ɛno akyi no, na Paulo ne Barnaba a wɔkaa wɔn ho asɛm sɛ “adɔfo . . . a yɛn Awurade Yesu Kristo din nti wɔde wɔn kra ama,” no ka wɔn a wotuu wɔn sɛ wɔnkɔka gyinaesi no nkyerɛ anuanom a na wɔwɔ Antiokia no ho. Bere a wɔkenkan krataa a sodikuw no kyerɛwee no, na wɔmaa ɔkasa ahorow no, asafo no ‘ani gyei esiane awerɛkyekye no nti,’ na ‘ɛhyɛɛ wɔn den.’—Asomafo no Nnwuma 15:1, 2, 4, 25-32.

“Akasakasa a Emu Yɛ Den”

Bere a wɔaka Barnaba ho asɛmpa pii saa no, ebia yɛbɛte nka sɛ ɛbɛyɛ den paa sɛ yebesuasua ne nhwɛso no. Nanso, na “Awerɛkyekye Ba” no nyɛ pɛ te sɛ yɛn nyinaa. Bere a ɔne Paulo reyɛ asɛmpatrɛw akwantu a ɛto so abien ho nhyehyɛe akɔsrasra asafo ahorow no, ntease anyɛ adwuma wɔ asɛm bi mu. Ná Barnaba pɛ sɛ wɔde ne busuani Yohane Marko kɔ ɔkwan biara so, nanso na Paulo susuw sɛ ɛnyɛ ne kwan so, efisɛ Yohane Marko gyaa wɔn hɔ wɔ asɛmpatrɛw akwantu a edi kan no mu. Ɛhɔ na “akasakasa a emu yɛ den bae, na ɛma wɔpaapaee mu, na Barnaba faa Marko faa nsu ani kɔɔ Kipro,” na “Paulo faa Silas, na . . . osiim kɔe” de n’ani kyerɛɛ baabi foforo.—Asomafo no Nnwuma 15:36-40.

Awerɛhosɛm! Ɛmfa ho nea ɛbae mpo no, asɛm no kyerɛ yɛn biribi foforo wɔ Barnaba nipasu ho. Nhomanimfo bi ka sɛ: “Barnaba yɛɛ ade a ɛfata nkamfo sɛ osiesiee ne ho sɛ ɔbɛyɛ biribi a ebetumi akowie nkogudi mu, na wanya Marko mu ahotoso nea ɛto so abien.” Sɛnea saa ɔkyerɛwfo no kyerɛ no, ebetumi aba sɛ “ahotoso a Barnaba nyae wɔ ne mu no boae ma ɔno nso san nyaa ahotoso, na ɛsan kanyan n’ahofama bio.” Sɛnea ɛkɔyɛe no, na saa ahotoso no fata kɛse, efisɛ bere bi bae a Paulo mpo gye toom sɛ Marko yɛɛ mmoa wɔ Kristofo som adwuma no mu.—2 Timoteo 4:11; fa toto Kolosefo 4:10 ho.

Barnaba nhwɛso no betumi akanyan yɛn ma yɛagye bere atie wɔn a wɔn koma atu, ate wɔn ase, na yɛahyɛ wɔn nkuran, ayɛ wɔn mmoa a ɛfata bere biara a yebehu sɛ ɛho hia no. Kyerɛwtohɔ a ɛkyerɛ ɔpɛ a na ɔwɔ sɛ ɔde odwo ne akokoduru bɛsom ne nuanom, ne aba pa a eyi sowee no nkutoo yɛ nkuranhyɛ. Hwɛ nhyira ara a ɛyɛ sɛ yebenya nnipa a wɔte sɛ Barnaba wɔ yɛn asafo ahorow mu nnɛ!

[Ase hɔ nsɛm]

[Kratafa 23 mfonini]

Ná Barnaba yɛ “onipa pa a Honhom Kronkron ne gyidi ayɛ no ma”