Bible Nhoma a Ɛto So 44—Asomafo Nnwuma

Nea Ɔkyerɛwee: Luka

Beae a Ɔkyerɛw No: Roma

Bere a Ɔkyerɛw Wiei: Bɛyɛ 61 Y.B.

Bere a Ɛka Ho Asɛm: 33 Y.B.–bɛyɛ 61 Y.B.

NSƐM a Luka kae wɔ Bible nhoma a ɛto so 42 mu no yɛ Yesu asetra, nnwuma a ɔyɛe ne ɔsom adwuma a ɔne n’akyidifo no yɛe kosi sɛ ɔkɔɔ soro no. Bible nhoma a ɛto so 44, Asomafo Nnwuma no yɛ abakɔsɛm nhoma, na ɛtoa so ka Kristosom mfiase ne sɛnea wɔnam honhom kronkron mmoa so hyehyɛɛ asafo no. Afei nso ɛkyerɛ sɛnea wɔtrɛw adansedi adwuma no mu wɔ Yudafo mu, na akyiri yi ekoduu amanaman nyinaa mu. Ti biako kosi 12 ka adwuma a Petro yɛe ho asɛm titiriw, na ti 13 kosi 28 nso ka adwuma a Paulo yɛe ho asɛm. Luka ne Paulo bɔe kɛse, na ɔne no tutuu akwan pii.

² Wɔkyerɛw nhoma no kɔmaa Teofilo. Esiane sɛ wɔfrɛ no “onuonyamfo” nti, ebetumi aba sɛ na okura dibea kɛse bi anaa wɔfrɛɛ no saa de kyerɛɛ obu. (Luka 1:3) Nhoma no yɛ abakɔsɛm a edi mu a ɛkyerɛ sɛnea wɔhyehyɛɛ Kristofo asafo no na enyaa nkɔso. Edi kan ma yehu sɛ Yesu wusɔre akyi no, oyii ne ho adi kyerɛɛ n’asuafo no, na afei ɛka nneɛma akɛse a esisii bɛyɛ mfe 28 ntam fi afe 33 kosi bɛyɛ 61 Y.B.

³ Efi teteete na wɔakyerɛ sɛ nea ɔkyerɛw Luka Asɛmpa no ara na ɔkyerɛw Asomafo Nnwuma no. Wɔkyerɛw nhoma abien no nyinaa kɔmaa Teofilo. Luka san kaa n’Asɛmpa no mu nsɛm a etwa to no wɔ Asomafo Nnwuma no mfiase. Eyi si so dua sɛ onipa biako no ara na ɔkyerɛw nhoma abien no. Luka kodii mfe abien wɔ ɔsomafo Paulo nkyɛn wɔ Roma, na gyama ɛhɔ na ɔkyerɛw Asomafo Nnwuma no wiei bɛyɛ 61 Y.B. Esiane sɛ ɛkaa nsɛm a esisii saa afe no nti, ɛrentumi mma sɛ ɔkyerɛw wiei ansa na saa afe no redu. Bio nso ɛnka sɛnea Paulo asɛm a ɔde kɔdan Kaesare no kowiei. Eyi kyerɛ sɛ ɔkyerɛw wiei ansa na saa afe no reba.

⁴ Efi teteete na Bible ho animdefo agye atom sɛ Asomafo Nnwuma no ka Bible nhoma a aka no ho. Nhoma no afã bi wɔ Hela Kyerɛwnsɛm no ho tete nsaano nkyerɛwee dedaw paa a ɛda so wɔ hɔ no mu. Ebi ne Michigan No. 1571 (P³⁸), a wɔyɛe bɛyɛ mfe 1,700 ni ne Chester Beatty No. 1 (P⁴⁵) a wɔyɛe bɛboro mfe 1,800 ni no. Eyi kyerɛ sɛ Bible nhoma a nkurɔfo nsa kae no, na Asomafo Nnwuma no ka ho, enti efi tete na wobuu no sɛ ɛno nso wɔ Kyerɛw Kronkron no mu. Luka kyerɛw Asomafo Nnwuma no pɛpɛɛpɛ sɛnea yɛadi kan ahu sɛ ɔkyerɛw n’Asɛmpa no. Sir William M. Ramsay kae sɛ nea ɔkyerɛw Asomafo Nnwuma no “ka abakɔsɛm akyerɛwfo a wɔbɔ mmɔden paa no ho.” Na ɔkyerɛɛ mu sɛ: “Ade a edi kan a wɔde hu abakɔsɛm kyerɛwfo a ɔbɔ mmɔden ne nokwaredi. Ɛsɛ sɛ ne nsɛm no yɛ nokware turodoo.”a

⁵ Ná Edwin Smith yɛ ɔpanyin a ɔda Britania akohyɛn ano bere a wɔredi ako wɔ Mediteranea po so wɔ Wiase Ko I mu no. Ɔkyerɛw asɛm bi baa atesɛm krataa The Rudder mu wɔ March 1947 mu a ɛkyerɛ sɛ Luka kyerɛwtohɔ no nyinaa yɛ pɛpɛɛpɛ. Ɔkae wɔ atesɛm krataa no mu sɛ: “Tete no na ɛnyɛ akyerɛkyerɛkwan biako na wɔde bɔ hyɛn akyi kyerɛ no kwan sɛnea ɛte nnɛ no, na mmom na wɔde atabon akɛse abien a ɛwɔ ha ne ha na ɛkyerɛ no kwan; ɛno nti na Ɔhotefo Luka de dodow kabea kaa ho asɛm no. [Asomafo Nnwuma 27:40] . . . Adanse a edi mu a yɛanya wɔ yɛn nhwehwɛmu mu kyerɛ sɛ asɛm biara a Ɔhotefo Luka kae a ɛfa hyɛn yi akwantu ho no yɛ nokware turodoo, efi bere a etu fii Fair Havens kosi sɛ eduu Malta mpoano; asɛm a ɔka de kyerɛɛ bere tenten a edii wɔ po so no ne kwan tenten a etwae no nso hyia. Afei nso baabi a hyɛn no kodui ho asɛm a ɔkae ne sɛnea ɛhɔ te nnɛ no hyia. Eyi nyinaa di adanse sɛ akwantu a Luka kaa ho asɛm no, otuu bi, na ɔda ne ho adi sɛ obi a yebetumi agye nea ohui na ɔkae no adi koraa.”b

⁶ Tetefo nneɛma a wɔatutu fam ahu nso di adanse sɛ Luka kyerɛwtohɔ no yɛ nokware. Ɛho nhwɛso ni: Wɔatutu fam wɔ Efeso ahu Artemi asɔredan ne tete adehwɛbea a ɛhɔ na Efesofo no bɔɔ twi baa ɔsomafo Paulo so no. (Aso. 19:27-41) Wɔakohu nkyerɛwee bi a ɛkyerɛ sɛ abodin a Luka de frɛɛ Tesalonika mpanyimfo sɛ “kurow no mu atumfoɔ” no yɛ nokware. (17:6, 8) Nneɛma abien bi a ɛwɔ Maltafo nkyerɛwee mu a wɔakohu nso kyerɛ sɛ Publio a Luka frɛɛ no Malta “okunini” no yɛ nokware.—28:7.c

⁷ Bio nso, Petro, Stefano, Kornelio, Tertulo, Paulo, ne afoforo momaa ɔkasa, na ɛsono ɔkwan a Luka faa so kyerɛw emu biara. Paulo ne nnipa ahorow ahorow kasae, na ɛsono ɔkwan a ɔfaa so kasa kyerɛɛ wɔn mu biara. Eyi kyerɛ sɛ nea Luka ankasa tee ne nea afoforo hui a wɔka kyerɛɛ no na ɔkyerɛwee. Luka nyɛ obi a ɔbɔɔ ne srɛ mu kaa asɛm.

⁸ Yennim Luka ho nsɛm pii. Ná ɔnka asomafo no ho, nanso ɔne wɔn bɔe. (Luka 1:1-4) Ɔsomafo Paulo bɔɔ Luka din mprɛnsa. (Kol. 4:10, 14; 2 Tim. 4:11; Filem. 24) Ɔne Paulo nantew mfe pii, na Paulo frɛɛ no “yɛn dɔfo duruyɛfo.” Ɛtɔ da bi a ɔka sɛ “wɔn,” na edu baabi nso a, ɔka sɛ “yɛn.” Nea eyi kyerɛ ne sɛ Paulo asɛmpatrɛw akwantu a ɛto so abien mu no, na Luka ka ne ho wɔ Troa, na ɛbɛyɛ sɛ ɔtwɛn mfe dodow bi wɔ Filipi kosii sɛ Paulo san bae. Na ɛno akyi no, ɔsan ne Paulo toaa so kɔɔ Roma ma wokodii Paulo asɛm wɔ hɔ.—Aso. 16:8, 10; 17:1; 20:4-6; 28:16.

NEA ENTI A MFASO WƆ SO

³² Asomafo Nnwuma no foa Nsɛmpa no adanse so sɛ Hebri Kyerɛwnsɛm no yɛ nokware, na honhom na wɔde kyerɛwee. Bere a Pentekoste reyɛ adu no, Petro kae sɛ nkɔmhyɛ abien a “honhom kronkron nam Dawid anom so ka faa Yuda” Iskariot ho no aba mu. (Aso. 1:16, 20; Dw. 69:25; 109:8) Petro san ka kyerɛɛ nnipadɔm a na wɔaba Pentekoste afahyɛ no ase no sɛ nea wɔrehu a ama wɔn ho adwiriw wɔn no yɛ nkɔmhyɛ yi na aba mu: “Eyi na wɔnam odiyifo Yoel so kae no.”—Aso. 2:16-21; Yoel 2:28-32; fa Asomafo Nnwuma 2:25-28, 34, 35 nso toto Dwom 16:8-11 ne Dw 110:1 ho.

³³ Bere a Petro ne nnipadɔm foforo rekasa wɔ asɔrefie no abɔnten no, ɔsan faa Hebri Kyerɛwnsɛm no mu nsɛm kae de sii n’asɛm so. Odii kan faa Mose asɛm kae na afei ɔkae sɛ: “Adiyifo no nyinaa, efi Samuel so ne wɔn a wodidi so no so no, wɔn a wɔkasae nyinaa kaa saa nna no ho asɛm fann.” Akyiri yi bere a Petro gyina Sanhedrin no anim no, ɔfaa asɛm a ɛwɔ Dwom 118:22 kae de kyerɛe sɛ Kristo, ɔbo a wɔapo no abɛyɛ “twea ti.” (Aso. 3:22-24; 4:11) Filipo kyerɛkyerɛɛ Etiopiani piani no sɛnea nkɔmhyɛ a ɛwɔ Yesaia 53:7, 8 no aba mu, na bere a opiani no tee ase no, ɔbrɛɛ ne ho ase kae sɛ wɔmmɔ no asu. (Aso. 8:28-35) Saa ara nso na bere a Petro reka Yesu ho asɛm akyerɛ Kornelio no, ɔkae sɛ: “Ɔno na adiyifo no nyinaa di no ho adanse.” (10:43) Bere a wɔredwennwen twetiatwa ho no, nea Yakobo de gyinaa n’asɛm akyi ne sɛ: “Eyi ne Adiyifo no nsɛm hyia sɛnea wɔakyerɛw” no. (15:15-18) Ɔsomafo Paulo nso de Hebri Kyerɛwnsɛm no taa ne nsɛm akyi. (26:22; 28:23, 25-27) Asuafo no ne wɔn atiefo nyinaa gye toom ntɛm sɛ Hebri Kyerɛwnsɛm no ka Onyankopɔn Asɛm ho, na ɛno ma yehu sɛ honhom na wɔde kyerɛwee.

³⁴ Mfaso bebree wɔ Asomafo Nnwuma no so efisɛ ɛkyerɛ yɛn nea ɛyɛe a Kristofo asafo no bae ne sɛnea ɛnam honhom kronkron tumi so nyinii. Sɛ yɛhwɛ kyerɛwtohɔ a ahokeka wom yi nyinaa mu a, yehu sɛ Onyankopɔn hyiraa asafo no ma ɛyɛɛ kɛse. Ɔmaa Kristofo a wodi kan no nyaa akokoduru ne anigye. Wogyinaa ɔtaa mu pintinn na wɔampa abaw. Woyii wɔn yam somee sɛnea Paulo yɛɛ ho nhwɛso no. Bere a wotuu no sɛ ɔnkɔyɛ ɔsom adwuma wɔ aman foforo so ne bere a wɔkae sɛ ɔnkɔ Makedonia no, ɔpenee so. (4:13, 31; 15:3; 5:28, 29; 8:4; 13:2-4; 16:9, 10) Saa na Kristofo asafo a ɛwɔ hɔ nnɛ no te efisɛ ɔdɔ ne biakoyɛ na ɛka wɔn bom. Afei nso botae koro na esi wɔn nyinaa ani so, enti honhom kronkron no kyerɛ wɔn kwan ma wɔka “Onyankopɔn nneɛma akɛse no ho asɛm.”—2:11, 17, 45; 4:34, 35; 11:27-30; 12:25.

³⁵ Asomafo Nnwuma no ma yehu sɛnea ɛsɛ sɛ Kristofo ka Onyankopɔn Ahenni no ho asɛm. Paulo yɛɛ ɛho nhwɛso maa yɛn. Ɔkae sɛ: “Mamfa nea mfaso wɔ so a ɛsɛ sɛ meka kyerɛ mo biara ne kyerɛ a ɛsɛ sɛ mekyerɛkyerɛ mo baguam ne afie mu no ankame mo.” Ɛnna ɔtoaa so sɛ: “Midii . . . adanse kyerɛkyerɛɛ mu fann.” Sɛ wokenkan nhoma no nyinaa a, asɛm a wubehu no kɛse ne ‘adanse a wodi no fann.’ Ɛda adi kɛse wɔ nsɛm a etwa to no mu. Ɛhɔ na Paulo kaa nsɛm a edi so yi de kyerɛe sɛ ofi ne koma nyinaa mu kaa asɛm no kyerɛkyerɛe bere mpo a na ɔda afiase no: “Na ɔkyerɛkyerɛɛ asɛm no mu fann kyerɛɛ wɔn de dii Nyankopɔn ahenni ho adanse, na ɔnam Mose mmara ne Adiyifo no so kaa Yesu ho nsɛm a ɛtɔ asom, fi anɔpa kosi anwummere.” Momma yɛn nso yɛmfa yɛn koma nyinaa nsi Ahenni adwuma no so daa!—20:20, 21; 28:23; 2:40; 5:42; 26:22.

³⁶ Paulo ne Efeso ahwɛfo no kasae, na afotu pii wɔ n’asɛm no mu a ebetumi aboa mpanyimfo a wɔwɔ hɔ nnɛ. Esiane sɛ honhom kronkron na apaw wɔn nti, ehia paa sɛ ‘wɔma wɔn ani ba wɔn ne nguankuw no nyinaa so,’ na wofi ɔdɔ mu hwɛ wɔn bɔ wɔn ho ban wɔ mpataku bɔne ho na wɔannya wɔn ansɛe wɔn. Eyi nyɛ adwuma a ɛda fam koraa! Ɛsɛ sɛ ahwɛfo ma wɔn ani da hɔ na wɔde Onyankopɔn asɛm a ɔde adom yɛn no hyɛ wɔn ho den. Bere a wɔreyɛ adwumaden de aboa wɔn a wɔyɛ mmerɛw no, ɛsɛ sɛ wɔkae “asɛm a Awurade Yesu ankasa kae no sɛ, ‘Ɔma mu wɔ anigye pii sen ogye.’”—20:17-35.

³⁷ Yehu Bible nnyinasosɛm pii wɔ ɔkasa foforo a Paulo momae mu. Ɛho nhwɛso ne nsɛm a ɛtɔ asom a ɔka kyerɛɛ Stoafo ne Epikurofo wɔ Areopago no. Nea edi kan no, na wɔakyerɛw afɔremuka bi ho sɛ, “De Ma Onyame Bi a Wonnim No.” Ɔfaa saa asɛm no kae, na ogyinaa so kyerɛkyerɛɛ mu sɛ nokware Nyankopɔn koro, ɔsoro ne asase wura no, nea ɔyɛɛ aman nyinaa fii onipa biako mu no ne “yɛn mu biara ntam nware.” Owiei no, ɔfaa wɔn anwensɛm akyerɛwfo bi asɛm kae sɛ, “Yɛn nso yɛyɛ n’asefo.” Ɔde asɛm yi kyerɛe sɛ nyansa nnim sɛ wobesusuw sɛ nnipa fi sika ne dwetɛ ne abo ahoni a nkwa nnim mu. Enti Paulo faa nyansa kwan so ma wohui sɛ Onyankopɔn teasefo no ne otumfoɔ. Wanka owusɔre no ho asɛm kosi sɛ ɔrebewie ne kasa no, na wammɔ Kristo mpo din. Ɔma wohuu nokware Nyankopɔn koro no tumi kɛse no, na ɛmaa ebinom bɛyɛɛ gyidifo.—17:22-34.

³⁸ Asomafo Nnwuma no hyɛ yɛn nkuran sɛ yɛnkɔ so nsua ‘Kyerɛwnsɛm no nyinaa.’ Bere a edi kan a Paulo kɔkaa asɛm no wɔ Beroia no, Yudafo a wɔwɔ hɔ no gyee “asɛm no ntɛm so, na da biara na wɔhwehwɛ Kyerɛwnsɛm no mu yiye hwɛ sɛ nsɛm no te saa anaa.” Enti ɔkamfoo wɔn sɛ wɔwɔ “adwempa.” (17:11) Ɛnnɛ, sɛ yɛn nso yɛde yɛn ho bɔ Yehowa asafo a ne honhom ahyɛ no ma no na yeyi yɛn yam hwehwɛ Kyerɛwnsɛm no mu a, ɛbɛma yɛanya ahotoso ne gyidi a emu yɛ den. Sɛ yesua ade saa a, ɛno na ɛbɛma yɛate Onyankopɔn nnyinasosɛm ase yiye. Wɔaka nnyinasosɛm yi bi ho asɛm kama wɔ Asomafo Nnwuma 15:29. Ɛhɔ na sodikuw no, kyerɛ sɛ, asomafo ne anuanom mpanyimfo a wɔwɔ Yerusalem no, ma wohui sɛ ɛnyɛ mmara bio sɛ honhom fam Israelfo twa twetia, nanso wɔkaa no pen sɛ wɔntwe wɔn ho mfi abosonsom, mogya, ne aguamammɔ ho.

³⁹ Asuafo a wodi kan yi suaa Kyerɛwnsɛm no yiye, enti wotumi faa emu asɛm kae na wɔkyerɛkyerɛɛ mu sɛnea ɛfata. Nokware nimdeɛ ne Onyankopɔn honhom hyɛɛ wɔn den ma wotumi gyinaa ɔsɔretia a emu yɛ den ano. Petro ne Yohane de akokoduru ka kyerɛɛ mpanyimfo a wɔtaa wɔn no sɛ: “Sɛ ɛteɛ wɔ Onyankopɔn ani so sɛ yetie mo mmom sen Onyankopɔn a, mo ankasa mummua. Na yɛn mmom de, nea yɛate na yɛahu no, yentumi nnyae ho asɛm ka.” Nea wɔyɛe no yɛ nhwɛso ma nokware Kristofo nyinaa. Wɔsan de wɔn baa Sanhedrin no anim. Ná ‘wɔahyɛ wɔn denneennen’ sɛ wɔnnkyerɛkyerɛ Yesu din mu bio. Nanso wɔka kyerɛɛ wɔn pen sɛ: “Ɛsɛ sɛ yetie Nyankopɔn mmom sen nnipa.” Asɛm a wɔkaa no akokoduru so yi yɛɛ adansedi kɛse maa mpanyimfo no. Ɛno maa Mmarakyerɛfo a wagye din Gamaliel kaa asɛm bi a wonim no yiye. Ɔkae sɛ wonnsiw obi som ho kwan, na ɛno ma wogyaee asomafo no.—4:19, 20; 5:28, 29, 34, 35, 38, 39.

⁴⁰ Wɔka Yehowa atirimpɔw kɛse a ɛfa n’Ahenni ho no ho asɛm wɔ Bible no mu baabiara, na ɛda adi kɛse wɔ Asomafo Nnwuma no mu. Nhoma no mfiase pɛɛ no, wɔkaa adaduanan a Yesu dii ansa na ɔrekɔ soro no ho asɛm sɛ “ɔkaa Onyankopɔn ahenni ho asɛm.” Bere a Yesu asuafo no bisaa no sɛ ɔresan de Ahenni no asi hɔ no, ɔka kyerɛɛ wɔn saa bere no sɛ wɔbɛyɛ n’adansefo akɔpem asase ano nohoa ansa. (1:3, 6, 8) Asuafo no de akokoduru kɛse kaa Ahenni no ho asɛm a wɔansuro; wɔhyɛɛ ase fii Yerusalem. Ɔtaa nti wosiw Stefano abo, na ɛmaa asuafo no pii hwete kɔɔ nsase foforo so. (7:59, 60) Wɔkae sɛ Filipo kaa ‘Onyankopɔn ahenni ho asɛmpa’ wɔ Samaria ma nkurɔfo pii tiee no na afei nso Paulo ne ne mfɛfo kaa “ahenni no” ho asɛm wɔ Asia, Korinto, Efeso ne Roma. Tete Kristofo yi nyinaa yɛɛ nhwɛso pa de kyerɛe sɛ yɛmfa yɛn ho nto Yehowa ne ne honhom a ɛma ahoɔden no so koraa. (8:5, 12; 14:5-7, 21, 22; 18:1, 4; 19:1, 8; 20:25; 28:30, 31) Sɛ yɛhwɛ sɛnea wɔde ahoɔden ne akokoduru kɛse yɛɛ adwuma ne sɛnea Yehowa hyiraa wɔn pii no a, ɛhyɛ yɛn den yiye sɛ yɛn nso yemfi nokwaredi mu ‘nni Nyankopɔn ahenni ho adanse fann.’—28:23.

[Ase hɔ nsɛm]