Akwila ne Priskila—Awarefo a Wɔyɛɛ Nhwɛso Pa

“MUNKYIA Priska ne Akwila, me yɔnko adwumayɛfo Kristo Yesu mu a wɔde wɔn ankasa kɔn momae de sii me kra ananmu; na ɛnyɛ me nko na meda wɔn ase, na mmom asafo a ɛwɔ amanaman nyinaa mu nso.”—Romafo 16:3, 4.

Ɔsomafo Paulo nsɛm yi a ɔde kɔmaa Kristofo asafo a ɛwɔ Roma no da obu ne ɔdɔ a emu yɛ den a na ɔwɔ ma saa awarefo yi adi. Ɔhwɛ hui sɛ ɔremma n’ani mpa wɔn so bere a na ɔrekyerɛw krataa akɔma wɔn asafo no. Nanso na henanom ne Paulo “yɔnko adwumayɛfo” yi, na dɛn nti na na wɔn ho hia ɔne asafo horow no saa?—2 Timoteo 4:19.

Ná Akwila yɛ amanaman mu Yudani (Yudafo a wɔahwete) a na ofi Ponto wɔ Asia Kumaa kusuu fam. Ná ɔne ne yere Priskila (Priska) akɔtra Roma. Anyɛ yiye koraa no, na Yudafo a wɔdɔɔso kakra wɔ saa kurow no mu, fi bere a Pompey ko faa Yerusalem wɔ afe 63 A.Y.B., bere a wɔde nneduafo pii kɔɔ Roma sɛ nkoa no. Nokwarem no, Romafo nkyerɛwee horow da no adi sɛ hyiadan bɛboro dummien na ɛwɔ tete kurow no mu. Ná Yudafo a wofi Roma no dodow no ara wɔ Yerusalem wɔ Pentekoste, 33 Y.B. bere a wɔtee asɛmpa no. Gyama ɛnam wɔn so na Kristofo asɛm no dii kan duu Roma Ahemman no ahenkurow mu.—Asomafo no Nnwuma 2:10.

Nanso, na Ɔhempɔn Klaudio ahyɛ ma wɔatu Yudafo no afi Roma wɔ afe 49 anaa 50 Y.B. mu. Ne saa nti, ɛyɛ Helafo kurow Korinto mu na ɔsomafo Paulo hyiaa Akwila ne Priskila. Bere a Paulo duu Korinto no, Akwila ne Priskila gyee no yɛɛ no hɔho ne no yɛɛ adwuma, esiane sɛ na wɔne no yɛ adwuma biako—ntamadan—nti.—Asomafo no Nnwuma 18:2, 3.

Ntamadanyɛfo

Ná eyi nyɛ adwuma a ɛyɛ mmerɛw. Ná wotwitwa aboa nhoma anaa ntama bi a ayɛ kyenkyenenn, pompam bom na wɔde ayɛ ntamadan. Sɛnea abakɔsɛm kyerɛwfo Fernando Bea kyerɛ no, na ɛyɛ adwuma a egye “ahokokwaw ne ahwɛyiye” a ntamadanyɛfo a wɔde “nhoma kyenkyenenn weserekaa a wɔde bɔ nsraban, bere a wɔretu kwan, de kata wɔn so bere a owia rebɔ anaa nsu retɔ, anaa wɔde kata nneɛma ho wɔ po so ahyɛn mu” yɛ.

Eyi ma asɛmmisa bi sɔre. So Paulo anka sɛ ‘osuaa ade wɔ Gamaliel nan ase,’ a ɛno maa onyaa hokwan sɛ anka ɔbɛyɛ adwuma a nidi wom daakye? (Asomafo no Nnwuma 22:3) Bere a eyi yɛ nokware no, afeha a edi kan no mu Yudafo no buu no sɛ nea nidi wom sɛ wɔbɛkyerɛ abarimaa nsaanodwuma bi, sɛ obesua nhoma akɔ akyiri mpo a. Enti ɛda adi sɛ na Akwila ne Paulo nyinaa asua ntamadan adwuma no bere a na wɔyɛ mmofra no. Mfaso kɛse baa saa suahu no so akyiri yi. Nanso sɛ́ Kristofo no, wɔamfa honam fam adwuma a ɛte saa anyɛ wɔn botae titiriw. Paulo kyerɛkyerɛɛ mu sɛ na adwuma a ɔne Akwila ne Priskila yɛe wɔ Korinto no yɛ nea ɛbɛboa no wɔ ne dwumadi titiriw, asɛmpa no a ɔbɛbɔ no dawuru no mu, na amma wɔanyɛ ‘adesoa biara amma obiara.’—2 Tesalonikafo 3:8; 1 Korintofo 9:18; 2 Korintofo 11:7.

Ɛda adi sɛ na ɛyɛ Akwila ne Priskila anigye sɛ wɔbɛboa Paulo wɔ n’asɛmpatrɛw adwuma no mu. Ebetumi aba sɛ nnamfo baasa no gyaee adwuma dii wɔn a wɔbɛtɔɔ wɔn nneɛma anaa wɔn a wotwaam no adanse wɔ bɔnnɔ so! Ɛwom sɛ na ntamadan adwuma no ba fam na na ɛyɛ den de, nanso na wɔn ani gye ho, na wɔyɛ adwuma “anadwo ne awia” sɛnea wɔde bɛma Onyankopɔn nneɛma anya nkɔso—te sɛ nea nnɛyi Kristofo de adwuma a wɔde bere fã yɛ anaa nea wɔyɛ no bere ne bere mu de hwɛ wɔn ho, sɛnea ɛbɛyɛ a wɔde bere dodow a aka no bɛboa afoforo ma wɔatie asɛmpa no.—1 Tesalonikafo 2:9; Mateo 24:14; 1 Timoteo 6:6.

Ahɔhoyɛ Ho Nhwɛso Ahorow

Ɛda adi sɛ Paulo de Akwila fie yɛɛ n’asoɛe wɔ n’asɛmpatrɛw dwumadi no mu wɔ asram 18 a ɔde traa Korinto no. (Asomafo no Nnwuma 18:3, 11) Enti ebetumi aba sɛ Akwila ne Priskila de anigye yɛɛ Silas (Silwano) ne Timoteo nso ahɔho bere a wofi Makedonia bae no. (Asomafo no Nnwuma 18:5) Ebia Paulo kyerɛw nkrataa abien a ɔde kɔmaa Tesalonikafo, a akyiri yi ɛbɛyɛɛ Bible no fã no wɔ bere a na ɔsomafo no te Akwila ne Priskila nkyɛn no.

Ɛnyɛ den sɛ yebesusuw sɛ wɔ saa bere yi mu no, na Priskila ne Akwila fie hɔ yɛ teokrase dwumadi asoɛe ankasa. Ɛbɛyɛ sɛ na adɔfo pii taa ba hɔ—Stefana ne ne fifo, Kristofo a wodi kan a wofi Akaia mansin mu a Paulo ankasa bɔɔ wɔn asu; Tito Yusto a ɔmaa Paulo hokwan ma ɔmaa ɔkasa ahorow wɔ ne fie; ne Krispo, hyiadan mu panyin a ɔne ne fifo nyinaa gyee nokware no. (Asomafo no Nnwuma 18:7, 8; 1 Korintofo 1:16) Afei nso na Fortunato ne Akaiko wɔ hɔ; Gaio a ebia na wɔyɛ asafo nhyiam ahorow wɔ ne fie no; Erasto a ɔyɛ kurom hɔ sikakorafo no; Tertio, ɔkyerɛwfo a Paulo ma ɔkyerɛw krataa a ɔde kɔmaa Romafo no; ne Foibe, onuawa nokwafo a na ɔwɔ asafo a ɛwɔ Kenkrea a ɛbɛn hɔ no mu, a akyinnye biara nni ho sɛ ɔno na ɔde krataa no fii Korinto kɔɔ Roma no, nso ka ho.—Romafo 16:1, 22, 23; 1 Korintofo 16:17.

Nnɛyi Yehowa asomfo a wɔanya hokwan ada ahɔhoyɛ su adi akyerɛ ɔhwɛfo kwantuni bi no nim sɛnea etumi hyɛ nkuran, na wɔkae bere nyinaa. Osuahu a ɛhyɛ nkuran a wɔka wɔ mmere a ɛte saa mu no betumi ama obiara anya honhom fam ɔhome ankasa. (Romafo 1:11, 12) Na te sɛ Akwila ne Priskila no, wɔn a wɔma wɔyɛ nhyiam horow wɔ wɔn afie, ebia Asafo Nhoma Adesua no nya anigye ne akomatɔyam sɛ wɔatumi aboa ma nokware som anya nkɔso saa kwan yi so.

Ná Akwila ne Priskila ne Paulo adamfofa no mu yɛ den araa ma bere a ofii Korinto wɔ 52 Y.B. osutɔbere mu no, wokogyaa no kwan koduu Efeso tɔnn. (Asomafo no Nnwuma 18:18-21) Wɔtraa saa kurow no mu yɛɛ ɔsomafo no nsrahwɛ a edi hɔ no ho nhyehyɛe. Ɛha na asɛmpa no ho akyerɛkyerɛfo a wɔn ho akokwaw yi faa Apolo a n’ano atew no “baa wɔn nkyɛn” na wɔn ani gyei sɛ wɔkyerɛkyerɛɛ no “Nyankopɔn kwan pɛpɛɛpɛ.” (Asomafo no Nnwuma 18:24-26) Bere a Paulo tumi kɔsraa Efeso bio wɔ n’asɛmpatrɛw akwantu a ɛto so abiɛsa mu bɛyɛ 52/53 Y.B. awɔw bere mu no, na afuw a na awarefo a wɔyɛ nam no adɔw no ahoa ma otwa. Paulo kaa “ɔkwan” no ho asɛm kyerɛkyerɛe wɔ hɔ bɛyɛ mfe abiɛsa bere a na Efeso asafo no yɛ nhyiam horow wɔ Akwila fie no.—Asomafo no Nnwuma 19:1-20, 26; 20:31; 1 Korintofo 16:8, 19.

Akyiri yi, bere a wɔsan baa Roma no, Paulo nnamfo baanu yi kɔɔ so “bɔɔ ahɔhoyɛ ho mmɔden” de wɔn fie mae ma wɔde yɛɛ Kristofo nhyiam horow.—Romafo 12:13; 16:3-5.

Wɔde ‘Wɔn Ankasa Kɔn Momae’ Maa Paulo

Ebia bere a na Paulo wɔ Efeso no, ɔno nso traa Akwila ne Priskila fie. So na ɔte wɔn nkyɛn bere a dwetɛ adwumfo sakasakayɛ no sii no? Sɛnea asɛm a ɛwɔ Asomafo no Nnwuma 19:23-31 kyerɛ no, bere a adwumfo a wɔyɛ abosonnan no sɔre tiaa asɛmpa no ka no, na ɛsɛ sɛ anuanom no si Paulo kwan sɛnea ɛbɛyɛ a ɔmfa ne ho nkɔto asiane mu denam basabasayɛfo no mu a ɔbɛkɔ no so. Bible mu nkyerɛkyerɛmufo bi akyerɛ sɛ ebia ɛbɛyɛ saa bere a ɛyɛ hu no ara mu na Paulo ‘tee nka sɛ ne nkwa mpo da asiane mu’ ne sɛ Akwila ne Priskila de wɔn ho gyee nsɛm mu ɔkwan bi so, ‘de wɔn ankasa kɔn momae’ maa no.—2 Korintofo 1:8; Romafo 16:3, 4.

Bere a “gyegyeegye no gyae no,” Paulo fi nyansam fii kurow no mu. (Asomafo no Nnwuma 20:1) Akyinnye biara nni ho sɛ Akwila ne Priskila nso hyiaa ɔsɔretia ne fɛwdi. So eyinom maa wɔn aba mu bui? Dabida, Akwila ne Priskila de akokoduru toaa wɔn Kristofo adwuma no so.

Awarefo a Wɔboom Yɛɛ Ade

Bere a Klaudio nniso baa awiei no, Akwila ne Priskila san baa Roma. (Romafo 16:3-15) Nanso bere a etwa to a wɔbɔɔ wɔn din wɔ Bible mu no, yehu sɛ na wɔasan kɔ Efeso. (2 Timoteo 4:19) Bio, sɛnea ɛte wɔ Kyerɛwnsɛm no mu mmeae foforo nyinaa no, wɔbɔ okunu ne ɔyere yi din bere koro mu. Awarefo a wɔboom yɛɛ ade wɔ biakoyɛ mu bɛn ara ni! Ná Paulo ntumi nsusuw ne dɔfo Akwila ho a ɔnkae nokwaredi mu a ne yere fi boaa no no. Na nhwɛso fɛfɛ bɛn ara na eyi yɛ ma Kristofo awarefo nnɛ sɛɛ yi, efisɛ mmoa a ɔhokafo fi nokwaredi mu de ma no ma obi tumi yɛ “pii wɔ Awurade adwuma no mu” na ɛtɔ mmere bi mpo a, ɛsen nea osigyani bi betumi ayɛ.—1 Korintofo 15:58.

Akwila ne Priskila somee wɔ asafo horow pii mu. Te sɛ wɔn no, nnɛyi Kristofo a wɔyɛ nnam de wɔn ho ama sɛ wɔbɛsom wɔ baabi a mmoa ho hia kɛse no. Afei nso wonya anigye ne akomatɔyam a efi Ahenni nneɛma a enya nkɔso ne sɛnea wotumi nya Kristofo nnamfo a ɔdɔ wom na ɛsom bo mu ba no bi.

Esiane Akwila ne Priskila Kristofo dɔ ho nhwɛso fɛfɛ no nti, Paulo ne afoforo ani gyee wɔn ho. Na nea ɛho hia sen saa mpo no, wonyaa din pa wɔ Yehowa ankasa anim. Kyerɛwnsɛm no ma yɛn awerɛhyem sɛ: “Onyankopɔn nyɛ nea ɔnteɛ a ne werɛ befi mo mmɔden a mobɔe ne din ho, sɛ mosom ahotefo na moda so som wɔn.”—Hebrifo 6:10.

Ebia yɛrennya hokwan a yɛde bɛbɔ yɛn ho mmɔden te sɛ nea Akwila ne Priskila yɛe no, nanso yebetumi asuasua wɔn nhwɛso pa no. Yebenya abotɔyam kɛse, bere a yehyira yɛn ahoɔden ne yɛn nkwa so ma ɔsom kronn, na yɛmma yɛn ani mpa ‘yiyeyɛ ne adekyɛ so no, efisɛ saa afɔrebɔ no sɔ Onyankopɔn ani.’—Hebrifo 13:15, 16.