Dɛn Na Yɛnyɛ Na Wɔagye Yɛn Nkwa?

ƆBARIMA bi bisaa Yesu bere bi sɛ: “Awurade, wɔn a wobegye wɔn yɛ kakraa bi anaa?” Yesu buae dɛn? So ɔkae sɛ: ‘Gye me di sɛ w’Awurade ne w’Agyenkwa kɛkɛ, na wobegye wo’? Dabi! Yesu kae sɛ: “Mompere nhyɛn ɔpon teateaa no mu! Na mise mo sɛ: Nnipa pii bɛhwehwɛ mu ahyɛn, na wɔrentumi.”—Luka 13:23, 24.

So Yesu antumi ammua ɔbarima no asemmisa no? Ɛnte saa, ɔbarima no ammisa sɛnea ɛyɛ den sɛ wobegye obi ho asɛm; obisae sɛ ebia wɔn dodow bɛyɛ kakraa bi anaa. Enti Yesu kyerɛe kɛkɛ sɛ nnipa kakraa bi a wosua sen nea anka obi bɛhwɛ kwan na wɔbɛpere ahwehwɛ nhyira a ɛyɛ anigye yi.

Ebia akenkanfo bi bɛka sɛ, ‘Ɛnyɛ saa na wɔka kyerɛɛ me.’ Ebia eyinom bɛfa Yohane 3:16 de aka asɛm, nea ɛka sɛ: “Na sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” Nanso, yebua sɛ: ‘Ɛnde, dɛn na ɛsɛ sɛ yegye di? Sɛ́ Yesu traa ase ankasa? Ɛte saa. Sɛ́ ɔyɛ Onyankopɔn Ba? Ɔkwan biara so! Na esiane sɛ Bible frɛ Yesu “Ɔkyerɛkyerɛfo” ne “Awurade” nti, ɛnsɛ sɛ yegye nea ɔkyerɛkyerɛe no nso di, yetie no, na yedi n’akyi?’—Yohane 13:13; Mateo 16:16.

Yesu Akyidi

Aa, ɛha na asɛm no sɔre! Ɛte sɛ nea nnipa bebree a wɔaka akyerɛ wɔn sɛ ‘wɔagye’ wɔn no nni adwene bi sɛ wobedi Yesu akyi anaasɛ wobetie no. Nokwarem no, Protestant sɔfo bi kyerɛwee sɛ: “Ampa, ɛsɛ sɛ Kristo mu gyidi a yɛwɔ no kɔ so. Nanso kyerɛ a wɔkyerɛ sɛ ɛsɛ sɛ ɛkɔ so tra hɔ koraa, anaa ehia sɛ ɛtra hɔ no nni nnyinaso biara wɔ Bible mu.”

Nea ɛne no bɔ abira no, Bible bobɔ ɔbrasɛe a abu so wɔ nnipa a wosusuw sɛ “wɔagye” wɔn mu no din. Ɛdefa obi a ɔkɔɔ so faa akwan a ɛtete saa so ho no, ɛkyerɛɛ Kristofo sɛ: “Munyi ɔbɔnefo no mfi mo mu!” Akyinnye biara nni ho sɛ Onyankopɔn rempɛ sɛ abɔnefo begu Kristofo asafo no ho fĩ!—1 Korintofo 5:11-13.

Ɛnde, Yesu akyi a yebedi no kyerɛ dɛn, na ɔkwan bɛn so na yebetumi ayɛ saa? Wiɛ, dɛn na Yesu yɛe? Na ne bra asɛe? ɔyɛ aguaman? ɔsabofo? ɔtorofo? Na onni nokware wɔ adwuma mu? Dabida! ‘Nanso,’ ebia wubebisa sɛ, ‘so ɛsɛ sɛ miyi saa nneɛma no nyinaa fi m’asetra mu?’ Sɛnea ɛbɛyɛ na woanya ho mmuae no, susuw Efesofo 4:17 kosi 5:5 ho. Ɛnka sɛ Onyankopɔn begye yɛn atom, ɛmfa ho nea yɛbɛyɛ biara. Mmom no, ɛka kyerɛ yɛn sɛ yɛnnyɛ yɛn ade te sɛ wiase amanaman no a “wɔn ani nwu ade bio . . . Na mo de, moansua Kristo sa, . . . munyi onipa dedaw a ɔresɛe wɔ nnaadaa akɔnnɔ mu no nkyene . . . Owifo nnwia ade bio . . . Na aguamammɔ ne afideyɛ nyinaa anaa anibere de, mommma wɔmmmɔ din po wɔ mo mu, sɛnea ɛsɛ ahotefo . . . Efisɛ munim dedaw sɛ aguaman biara anaa afideyɛfo anaa oniberefo a ɔyɛ ɔbosonsonni nni apɛgyade Kristo ne Nyankopɔn ahenni mu.

Anyɛ yiye koraa no, sɛ yɛammɔ mmɔden antra ase ma ɛne Yesu nhwɛso anhyia a, na yɛredi n’akyi? Ɛnsɛ sɛ yɛma yɛn asetra sɛ Kristo de no kɛse? Ɛntaa mma sɛ nnipa a wɔka wɔn nsɛm te sɛ nea nyamesom kratawa bi a ɛka sɛ: “Bra Kristo nkyɛn seesei—sɛnea wote yi ara” no besusuw saa asɛnhia yi ho, sɛ wɔayɛ saa pɛn mpo a.”

Yesu asuafo no biako bɔɔ kɔkɔ sɛ amumɔyɛfo bi wɔ hɔ a “wɔdan yɛn Nyankopɔn dom ahohwi, na wɔpa otumfoɔ koro a ɔne yɛn Awurade Yesu Kristo no.” (Yuda 4) Nokwarem no, ɔkwan bɛn so na yebetumi adan Onyankopɔn mmɔborohunu “ahohwi”? Yebetumi ayɛ saa denam susuw a yebesusuw sɛ Kristo afɔrebɔ no kata boapayɛ bɔne a yɛpɛ sɛ yɛkɔ so yɛ, na ɛnyɛ bɔne a nnipa sintɔ nti na yɛyɛ, a yɛrebɔ mmɔden sɛ yebegyae no so. Akyinnye biara nni ho sɛ yɛrempɛ sɛ yɛne Amerika asɛnkafo a wonim wɔn yiye no mu biako a ɔkae sɛ ɛho nhia sɛ “wobɛsesa, wubegyae, anaasɛ wobɛdan wo ho” no yɛ adwene.—Fa toto Asomafo no Nnwuma 17:30; Romafo 3:25; Yakobo 5:19, 20 ho.

Gyidi Kanyan Obi Ma Ɔyɛ Ade

Wɔaka akyerɛ nnipa bebree sɛ “Yesu mu gyidi” yɛ bere koro mu ade a wɔyɛ no prɛko, na ɛho nhia sɛ yɛn gyidi yɛ den pii na akanyan yɛn ma yɛayɛ osetie. Nanso Bible nkyerɛ saa. Yesu anka sɛ wɔagye nnipa a wofi Kristosom ase no. Mmom no, ɔkae sɛ: “Nea obegyina ano akodu awiei no, ɔno na wobegye no nkwa.” (Mateo 10:22) Bible de yɛn Kristofo asetra kwan toto mmirikatu bi a ɛho nkonimbo yɛ nkwagye ho. Na ɛhyɛ nkuran sɛ: “Muntu mmirika saa ara, na moanya bi.”—1 Korintofo 9:24.

Enti, pii ka “Kristo a wogye no di” no ho sen nhyira horow a Yesu afɔrebɔ a ɛkyɛn so de ma a wogye tom ara kwa. Ɛhwehwɛ osetieyɛ. Ɔsomafo Petro ka sɛ atemmu fi ase “Onyankopɔn fi,” na ɔde ka ho sɛ: “Na sɛ efi yɛn so kan a, ebewie wɔn a wontie Onyankopɔn asɛmpa no dɛn?” (1 Petro 4:17, yɛn na yɛasi ɔfã bi so dua no.) Enti ɛsɛ sɛ yɛyɛ pii sen tie a yebetie na yɛagye adi kɛkɛ. Bible ka sɛ ɛsɛ sɛ ‘yɛyɛ asɛm no yɛfo, na yɛnnyɛ atiefo nko nnsisi yɛn ho.’—Yakobo 1:22.

Yesu Ankasa Nsɛm

Yesu nsɛm a ɔnam Yohane so de kɔmaa tete Kristofo asafo ahorow ason no wɔ Bible mu nhoma a ɛne Adiyisɛm no mu. (Adiyisɛm 1:1, 4) So Yesu kae sɛ esiane sɛ nkurɔfo a na wɔwɔ asafo ahorow yi mu ‘agye no adi’ dedaw nti, ɛno ara dɔɔso? Dabi. Ɔkamfoo wɔn nnwuma, wɔn brɛ, ne wɔn boasetɔ, na ɔkaa wɔn dɔ, gyidi ne wɔn som adwuma ho asɛm. Nanso ɔkae sɛ Ɔbonsam bɛsɔ wɔn ahwɛ, na wobetua wɔn mu ‘biara ka sɛnea ne nnwuma te.’—Adiyisɛm 2:2, 10, 19 23.

Enti Yesu kaa ahofama a ɛkɔ akyiri koraa sen sɛnea nnipa dodow no ara ate ase sɛnea wɔka kyerɛɛ wɔn no sɛ wɔn nkwagye yɛ “adwuma a wɔawie” bere a ‘wogyee no dii’ ara pɛ wɔ nyamesom nhyiam bi ase no ho asɛm. Yesu kae sɛ: “Sɛ obi pɛ sɛ odi m’akyi a, ma ɔmpa ne ho akyi, na ɔmma n’asɛndua so, na onni [ɔnkɔ so nni, NW] m’akyi. Na obiara a ɔpɛ sɛ ogye ne kra nkwa no, ebefi ne nsa, na obiara a me nti ne kra bɛyera no de, ne nsa bɛka.”—Mateo 16:24, 25.

Yɛmpa yɛn ho akyi? Yɛnkɔ so nni Yesu akyi? Ɛno begye mmɔdenbɔ. Ɛbɛsesa yɛn asetra. Nanso, Yesu kae ampa sɛ ebetumi aba sɛ yɛn mu bi ‘bɛhwere yɛn akra’ mpo—awu ama no? Yiw, nneɛma akɛse a wubetumi ahu afi Onyankopɔn Asɛm no sua mu nkutoo ho nimdeɛ a wubenya na ɛbɛma woanya gyidi a ɛte saa. Ɛdaa adi wɔ da a nyamesom mu kateefo a “wɔantumi annyina nyansa ne honhom a ɔde kasae no ano” siw Stefano abo no. (Asomafo no Nnwuma 6:8-12; 7:57-60) Na Yehowa Adansefo ɔhaha pii a wowui wɔ Nasi nneduaban mu sen sɛ wɔbɛsɛe wɔn ahonim a wɔde Bible atete no ada gyidi a ɛte saa adi wɔ yɛn bere yi mu.a

Kristofo Nsiyɛ

Ɛsɛ sɛ yekura yɛn Kristofo gyidi mu pintinn efisɛ, nea ɛnte sɛ nea ebia wobɛte wɔ asɔre ahorow mu anaa television so nyamesom dwumadi ahorow mu no, Bible ka sɛ yebetumi ahwe ase. Ɛka Kristofo a wogyaw “ɔkwan trenee no” ho asɛm. (2 Petro 2:1, 15) Enti ehia sɛ ‘yɛde osuro ne ahopopo yɛ yɛn ankasa nkwagye ho adwuma.’—Filipifo 2:12; 2 Petro 2:20.

So saa na afeha a edi kan Kristofo, nnipa a wɔtee sɛ Yesu ne n’asomafo rekyerɛkyerɛ ankasa no tee asɛm no ase? Yiw. Na wonim sɛ ɛsɛ sɛ wɔyɛ biribi. Yesu kae sɛ: “Enti monkɔ nkɔyɛ amanaman nyinaa m’asuafo . . . na monkyerɛkyerɛ wɔn sɛ wonni nea mahyɛ mo nyinaa so.”—Mateo 28:19, 20.

Yesu kaa eyi akyi asram abien no, wɔbɔɔ nnipa 3,000 asu da koro pɛ. Gyidifo no dodow bɛyɛɛ 5,000 ntɛm ara. Wɔn a wogye dii no kyerɛkyerɛɛ afoforo. Bere a ɔtaa bɔɔ wɔn hwetee no, ɛmaa asɛm no mu trɛwee mmom. Bible nka sɛ akannifo kakraa bi na mmom “wɔn a wɔhwetee no kyinkyin kɔkaa asɛmpa no.” Enti bɛyɛ mfe 30 akyi no, ɔsomafo Paulo tumi kyerɛwee sɛ asɛmpa no yɛ nea “wɔaka no wiase abɔde nyinaa mu.”—Asomafo no Nnwuma 2:41; 4:4; 8:4; Kolosefo 1:23.

Paulo anka sɛ: ‘Gye Yesu di seesei, na wobegye wo daa’ amfa ansakra nkurɔfo sɛnea TV so asɛnkafo bi yɛ no. Saa ara na na onni ahotoso te sɛ Amerika sɔfo bi a ɔkyerɛwee sɛ: “Bere a na meyɛ abarimaa no, . . . na wɔagye me dedaw.” Wɔ nea ɛboro mfe 20 fi bere a Yesu ankasa paw Paulo sɛ ɔmfa Kristofo asɛm no nkɔ amanaman mufo mu no, ɔsomafo mmɔdenbɔfo yi kyerɛwee sɛ: “Mehyɛ me nipadua ahometew, na midi no nya, na mereka asɛm makyerɛ ebinom yi, m’ankasa manyɛ nea ɔmfra.”—1 Korintofo 9:27; Asomafo no Nnwuma 9:5, 6, 15.

Nkwagye yɛ akyɛde a Onyankopɔn de ma kwa. Yentumi nyɛ ho adwuma nnya. Nanso ɛhwehwɛ sɛ yɛbɔ yɛn ho mmɔden. Sɛ obi ma wo akyɛde bi a ɛsom bo kɛse na woankyerɛ ho anigye pii amfa ankɔ a, anisɔ a woankyerɛ no betumi ama ɔdemafo no de ama onipa foforo. Wiɛ, Yesu Kristo mogya a nkwa wom no som bo dɛn? Ɛyɛ akyɛde a wɔde ma kwa, nanso ɛsɛ sɛ yɛkyerɛ ho anisɔ kɛse.

Nokware Kristofo wɔ ogye mu efisɛ wɔwɔ gyinabea a ɔdom wom wɔ Onyankopɔn anim. Sɛ kuw no, wobegye wɔn nkwa ɔkwan biara so. Sɛ ankorankoro no, ɛsɛ sɛ wodu Onyankopɔn ahwehwɛde ho. Nanso, yebetumi adi nkogu, efisɛ Yesu kae sɛ: “Sɛ obi antra me mu a, wɔtow no kyene sɛ baa, na ewu.”—Yohane 15:6.

“Onyankopɔn Asɛm Wɔ Nkwa”

Nkɔmmɔbɔ a yɛkaa ho asɛm wɔ asɛm a edi eyi anim mu no sii bɛyɛ mfe 60 a atwam ni. Johnny da so ara gye di sɛ nkwagye nam Yesu Kristo nkutoo so, nanso ohu sɛ ɛsɛ sɛ yɛpere du ho. Ɔda so ara gye di sɛ Bible twe adwene si adesamma anidaso fibea koro pɛ so, na ɛsɛ sɛ yesua saa nhoma a ɛkyɛn so no, ɛka yɛn, na yɛma ɛkanyan yɛn ma yɛyɛ nnwuma a ɛkyerɛ ɔdɔ, gyidi, ayamye, osetie, ne boasetɔ. Watete ne mma ma wɔagye nneɛma koro yi ara adi, na seesei n’ani gye sɛ ohu sɛ wɔn nso retete wɔn mma wɔ ɔkwan koro no ara so. Ɛyɛ ne pɛ sɛ anka obiara benya saa gyidi no bi, na ɔyɛ nea obetumi biara sɛ ɔde bɛhyɛ afoforo koma ne wɔn adwene mu.

Wɔde honhom kaa ɔsomafo Paulo ma ɔkyerɛwee sɛ “Onyankopɔn asɛm wɔ nkwa, na ahoɔden wɔ mu.” (Hebrifo 4:12) Etumi sesa asetra. Ebetumi akanyan wo ma woafi komam ayɛ nnwuma a ɛkyerɛ ɔdɔ, gyidi, ne osetie. Nanso ɛsɛ sɛ woyɛ pii sen nea Bible ka a ‘wubegye atom’ wɔ w’adwenem ara kɛkɛ. Sua na ma ɛnkanyan wo koma. Ma ne nyansa no nkyerɛ wo kwan. Yehowa Adansefo bɛyɛ 5,000,000 a wɔatu wɔn ho ama wɔ nsase bɛboro 230 so ne nkurɔfo yɛ ofie Bible adesua a wonnye hwee. Sɛnea ɛbɛyɛ na woahu nea wubetumi asua afi adesua a ɛte saa mu no, kyerɛw wɔn a wɔyɛ nsɛmma nhoma yi. Gyidi ne honhom fam ahoɔden a wubenya no bɛma w’ani agye!

[Ase hɔ asɛm]

[Kratafa 7 adaka]

Dɛn Nti Na Ɛsɛ Sɛ ‘Yɛpere Gyidi No Ho’?

Wɔkyerɛw Bible mu nhoma a ɛne Yuda no kɔmaa “wɔn a wɔafrɛ wɔn . . . na wɔakora wɔn ama Yesu Kristo.” So ɛka sɛ esiane sɛ na ‘wɔagye Yesu adi’ nti wobenya nkwagye ɔkwan biara so? Dabi, Yuda ka kyerɛɛ saa Kristofo no sɛ ‘wɔmpere gyidi no ho.’ Ɔkyerɛɛ wɔn nneɛma abiɛsa nti a ɛsɛ sɛ wɔyɛ saa. Nea edi kan, Onyankopɔn “gyee ɔman no fii Misraim asase so,” nanso akyiri yi wɔn mu bebree hwee ase. Nea ɛto so abien, abɔfo mpo tew atua bɛyɛɛ adaemone. Nea ɛto so abiɛsa, Onyankopɔn sɛee Sodom ne Gomora esiane nna mu ɔbrasɛe kɛse a na ɛkɔ so wɔ saa nkurow no mu nti. Yuda de Bible mu nsɛm yi mae sɛ “sɛnnahɔ.” Yiw, ɛsɛ sɛ gyidifo a “wɔakora wɔn ama Yesu Kristo” no mpo hwɛ yiye na wɔamfi nokware gyidi no ho anhwe ase.—Yuda 1-7.

[Kratafa 8 adaka]

Nea Ɛwɔ He Na Ɛyɛ Nokware?

Bible ka sɛ: “Wɔkwati mmara nnwuma de gyidi na ebu onipa bem.” Ɛka nso sɛ: “Efi nnwuma mu na wobu onipa bem, na emfi gyidi nko mu.” Nea ɛwɔ he na ɛyɛ nokware? Wɔnam gyidi so na ebu yɛn bem anaasɛ wɔnam nnwuma so?—Romafo 3:28; Yakobo 2:24.

Mmuae a efi Bible mu a ehyia ne sɛ ne baanu no nyinaa teɛ.

Mfehaha pii a etwaam no mu no, na Onyankopɔn Mmara a ɔnam Mose so de mae no hwehwɛ sɛ Yudafo asomfo de afɔre ne ayɛyɛde ahorow pɔtee bi ma, wodi afahyɛ nna, na wodi aduan ho mmara horow ne ahwehwɛde foforo so. Bere a Yesu bɔɔ afɔre a ɛsen biara no, na saa “mmara nnwuma,” anaa ne tiaatwa mu “nnwuma,” no ho nhia bio.—Romafo 10:4.

Nanso nokwasɛm a ɛyɛ sɛ Yesu afɔrebɔ a ɛkyɛn so no besii saa nnwuma yi a wɔyɛe wɔ Mose Mmara ase no ananmu no nkyerɛ sɛ yebetumi abu yɛn ani agu Bible akwankyerɛ so. Ɛka sɛ: “Mpɛn ahe ara na Kristo mogya . . . rentew yɛn ahonim ho mfi nnwuma funu [dedaw no] mu, na yɛmfa ɔsom kronn mma Onyankopɔn teasefo no?”—Hebrifo 9:14, NW.

Ɔkwan bɛn so na yɛde ‘ɔsom kronn ma Onyankopɔn teasefo no’? Nneɛma foforo akyi no, Bible ka kyerɛ yɛn sɛ yɛnko ntia ɔhonam nnwuma, yɛnko ntia wiase ɔbrasɛe, na yɛnkwati ne mfiri ahorow no. Ɛka sɛ: “Ko gyidi ko pa no,” na tow “bɔne a ɛnkyɛ na etwa yɛn ho si” no gu, na “yɛmfa boasetɔ ntu aperepere a ɛda yɛn anim no mu mmirika, nhwɛ gyidi mu dikanfo ne ne wiefo Yesu.” Na Bible hyɛ yɛn nkuran sɛ ‘yɛmmmrɛ, na yɛn kra antɔ piti.’—1 Timoteo 6:12; Hebrifo 12:1-3; Galatifo 5:19-21.

Ɛnyɛ saa nneɛma yi a yɛyɛ so na yɛnam nya nkwagye, efisɛ onipa biara ntumi nyɛ pii a ɛbɛma wafata ama nhyira a ɛyɛ nwonwa a ɛte saa no da. Nanso sɛ yɛanyɛ nneɛma a Bible ka sɛ Onyankopɔn ne Kristo pɛ sɛ yɛyɛ no amfa anna yɛn dɔ, ne osetie adi a, yɛmfata sɛ yɛn nsa bɛka saa akyɛde kɛse yi. Sɛ yɛamfa nnwuma anna yɛn gyidi adi a, kyerɛ a yɛkyerɛ sɛ yedi Yesu akyi no bɛtɔ sin koraa, efisɛ Bible ka no pefee sɛ: ‘Gyidi, sɛ enni nnwuma a, na awu wɔ ne nko fam.’—Yakobo 2:17.

[Kratafa 7 mfonini]

Sua Bible, na ma ɛnkanyan wo