Nea Bible No Wɔ Ka

Dɛn Na Kristoni Bɛyɛ Bere A Wɔagye Hokwan Ahorow A Ɔwɔ Afi Ne Nsam No?

NNIPA pii na nnɛ wɔrepere hwehwɛ hokwan a wɔwɔ. Nanso nea ɛyɛ awerɛhow ne sɛ adesamma mu ɔfa kɛse no ara nnya hokwan ahorow pii mu anigye. Wogye nea afoforo susuw sɛ ɛyɛ hokwan a wɔwɔ no fi wɔn nsam wɔ akwan horow so. Bere a Kristosom retrɛw no eyinom mu pii wɔ hɔ a wɔba bɛka Yehowa Nyankopɔn nokware asɔrefo no ho. Enti dɛn na ɛsɛ sɛ Kristoni yɛ bere a wɔagye ne hokwan ahorow afi ne nsam no?

Bere a Ɔdebɔneyɛfo Ayɛ Wo Bɔne

Ɔdebɔneyɛfo bi betumi agye hokwan a Kristoni wɔ afi ne nsam. Ebia obetumi atwa no dwow, ahwe no anaa wasisi no. Dɛn na ɛsɛ sɛ ɔyɛ? Nsase horow pii wɔ hɔ a nea wodi kan yɛ ne sɛ wɔbɛbɔ polisifo amanneɛ. Nanso sɛ nsɛmmɔnedi no ayɛ nea polisifo ntumi nyɛ ho biribi ɛ? Anaasɛ wɔrenyɛ ho biribi gye sɛ woma wɔn adanmude bi ansa ɛ?

Fa tebea a Kristoni bea bi baa mu no sɛ nhwɛso. Nnipakuw bi kum ne kunu kwa. Ɔtee nka sɛ onim wɔn a wɔyɛɛ eyi, nanso nkotɔsrɛ a ɔde kɔtoo atumfoɔ anaa nniso no anim no amfa hwee amma. Dɛn na ɛsɛ sɛ Kristoni no yɛ wɔ tebea a ɛte sɛɛ ase?

Ɔsomafo Paulo de afotu pa mae wɔ tebea a ɛte sɛɛ mu: “Mommfa bɔne ntua obiara bɔne so ka! Munnnidi mo ho were, na mmom munnyaw mma [Onyankopɔn] abufuw! Na wɔakyerɛw sɛ: Me na aweredi wɔ me, ara metua ka, Awurade [Yehowa] na ɔka saa.” (Rom. 12:17-19) Bere a yebetumi anya anidaso sɛ polisifo no bedi asɛm a ɛte sɛɛ ho dwuma no, yenim sɛ wɔ asetra yi mu de, wɔremmu atɛntrenee da. Enti, sɛnea Paulo kae no, Kristoni no remfa asɛm no nhyɛ n’ankasa nsa na ɔde bɔne atua bɔne so ka, na mmom obegyaw ama Yehowa, na ɔde n’ani ato no so na wayɛ nea ɛfata.

Asetra mu Ɔhaw Horow

Afei nso, ebia na yɛte aman horow a ɛkã kɛse da adefo ne ahiafo ntam no bi mu. Yehu sɛ wotiatia yɛn nnamfonom​—anaasɛ yɛn ankasa mpo so na wommu yɛn ho akontaa. Eyi hyɛ yɛn abufuw kɛse. Dɛn na ɛsɛ sɛ yɛyɛ?

Kristoni ɔsomafo Paulo nyaa osuahu a ɛte sɛɛ. Ɔtaa hyia nhyehyɛe horow bi a na ehia sɛ wɔsakra mu kɛse: nkoayɛ. Nkoa pii abɛdan Kristofo. Na akyinnye biara nni ho sɛ na wɔn kɔn dɔ sɛ wɔbɛde wɔn ho. So Paulo tuu fo sɛ wɔntew atua nyɛ basabasa, anaasɛ wonguan? Dabi, ɔkae sɛ: “Nkoa, muntie mo honam fam wuranom asɛm ade nyinaa ho, ɛnyɛ ani so som mu, sɛ wɔn a wɔsɔ nnipa ani, na mmom koma kronn mu sɛ wɔn a wosuro Awurade [Yehowa]. Na adwuma biara a moyɛ no, mumfi ɔkra mu nyɛ no sɛ moyɛ ma Awurade [Yehowa] na monnyɛ mma nnipa, efisɛ munim sɛ Awurade [Yehowa] nsam na mubenya apɛgyade sɛ akatua.”​—Kol. 3:22-24; afei nso hwɛ 1 Petro 2:18-20.

Enti sɛ Kristoni nya hokwan a ɔde bɛde ne ho afi nkoayɛ mu a ɔbɛyɛ saa. Nanso ɛnsɛ sɛ eyi di no so ara na ɔma ɛkata atirimpɔw titiriw a ɛwɔ n’asetra mu: Yehowa a ɔbɛsom no no so. Sɛnea Paulo kae no: “Wɔfrɛɛ wo, na woyɛ akoa anaa? Mma ɛnhaw wo! Na sɛ wubetumi anya wo dehye adi nso a, fa no saa mmom!”​—1 Kor. 7:21-24.

Bere a nnɛ de nnipa kakraa bi pɛ na wɔyɛ nkoa ankasa no, ebinom bɛte nka sɛ wɔkyɛn saa nkoa no wɔ ɔkwan ketewaa bi pɛ so, esiane tebea a wɔwom wɔ sika fam no nti. Sɛ ɔkwan bi wɔ hɔ a wɔbɛfa so ama tebea a wɔwom no anya nkɔso a, ɛnde ɛno bɛyɛ ade a eye a ɛsɛ sɛ wɔyɛ. Nanso ɛnsɛ sɛ eyi yɛ nkate bi a ebegye wɔn bere nyinaa. Kae Paulo nsɛm no: “Na wɔn a wɔpɛ wɔn ho anya no hwe sɔhwɛ ne afiri ne nkwasea akɔnnɔ a enye mma nnipa na ɛtwe wɔn kogu ɔsɛe ne ɔyera mu mu.”​—1 Tim. 6:9.

Yesu Kristo nso hyiaa ɔhaw horow a ohia de ba no. Ɔkae sɛ: “Enti munnnwinnwen sɛ:

Dɛn na yebedi anaasɛ dɛn na yɛbɛnom anaasɛ dɛn na yebefura? Eyinom nyinaa akyi na wiase amanaman no di. Na mo soro agya nim sɛ eyi nyinaa hia mo. Na monhwehwɛ Onyankopɔn ahenni ne ne trenee kan; na wɔde eyinom nyinaa bɛka mo ho.”​—Mat. 6:31-33.

So na anka ɛsɛ sɛ Yesu ne Paulo de wɔn ho hyɛ ɔman mu nsɛm ne emu nsakrae ahorow mu sɛnea ebinom ka no? Wɔn a wɔpɛ sɛ nsakrae ba no mu binom sɔree wɔ Roma Ahemman no abakɔsɛm tenten no mu. Ebia wotumi yɛɛ biribi papa, wɔsakraa wɔn nnwuma no wɔ wɔn wu akyi, anaasɛ ne nyinaa sɛe kɔ koraa wɔ bere a ahemman no ankasa hwe ase. Saa ara nso na anka Yesu ne Paulo betumi ayɛ biribi wɔ nsakrae bi a wɔbɛma aba mu. Nanso akyinnye biara nni ho sɛ ɛbɛsɛe, anyɛ yiye koraa no, bere a Roma Ahemman no hwee ase koraa no. Saa na ɛba bere a wɔde mmɔdenbɔ hyɛ nhyehyɛe bi a ebetwam akɔ koraa mu no.

Sɛ́ ɔde ne ho bɛhyɛ amansɛm mu mmom no, Yesu dii ‘nokware no ho adanse.’ (Yoh. 18:37) Nea efii mu bae ne sɛ nnipa pii a wɔtraa ase wɔ ne nna no mu ne nnɛ bere mu gyee no dii na wogye no di. Enti wonyaa daa nkwa ho kwan wɔ nhyehyɛe a wɔn nsa bɛka “hokwan ahorow” a ɛyɛ wɔn de no nyinaa wɔ mu no mu. (Yoh. 3:16) Nnipa a wɔpɛ sɛ nsakrae ba afoforo asetra mu no mu baahe na wobetumi ahu nea ebefi wɔn adwumaden mu aba no mu nea ɛbɛtra hɔ daa?

Na Ɔtaa Nso Ɛ?

Kristofo rehu ɔtaa ne hokwan a wɔwɔ sɛ wɔsom na wɔde wɔn ano pae mu ka wɔn som no kyerɛ wɔ ahofadi mu no mu amane wɔ wiase afanan ahorow nyinaa. Wɔyɛ ebinom ayayade na wokum wɔn mpo. Ɛsɛ sɛ wɔyɛ wɔn ade dɛn wɔ bɔne a wɔyɛ wɔn yi ho?

Wodi Yesu nhwɛso no akyi bio. Hwɛ sɛnea wɔkyeree no na wɔtwee no fii Getsemane turo no mu sɛnea ɛmfata, sɛnea wodii n’asɛm, na wobuu no fɔ wɔ ɔkwan a ɛnteɛ so, ne sɛnea wogyee hokwan a ɔwɔ no fii ne nsam wɔ Pilato anim. Dɛn nti na Yesu amfrɛ nnipa pii a wɔwɔ Yudafo no mu a wodi n’akyi no na wɔaboa no ma waguan afi atɛnkyea yi mu? N’ankasa kyerɛkyerɛɛ mu sɛ: “M’ahenni mfi wi yi ase. Sɛ m’ahenni fi wi yi ase a, anka m’asomfo bɛko na wɔamfa me anhyɛ Yudafo no nsa; nanso m’ahenni mfi ha.”​—Yoh. 18:36.

Enti Yesu anka ankyerɛ n’akyidifo no sɛ wɔmfa akode ntew atua na wɔde abɔ hokwan a sɛ́ ɔdesani no ɔwɔ no ho ban. Kristofo a wɔwɔ hɔ nnɛ di ne nhwɛso no akyi. Nanso sɛ mmara kwan bi wɔ hɔ a wɔbɛfa so abɔ wɔn som mu ahofadi no ho ban a, wɔbɛfa ɛno so. Ɔsomafo Paulo de nkotɔsrɛ kɔtoo Kaesare ankasa anim, sɛnea ɛbɛyɛ na ‘wabɔ mmɔden abɔ asɛmpa no ho ban na ɔde asi hɔ wɔ mmara kwan so.’ (Aso. 25:11; Fil. 1:7) Nanso sɛ mmara kwan bi nni hɔ a wobetumi afa so a, Kristoni no bedi ne gyidi horow no nokware na ɔde n’ani ato Yehowa so ama nea eye a ebefi mu aba. Eyi ne nea Yesu yɛe, na ɛwom sɛ ɔkwan yi ma wokum no de, nanso susuw nea ɛyɛ nwonwa a efii mu ba maa n’ankasa ne adesamma no ho hwɛ.​—Heb. 2:9, 14, 15.

Enti, Kristoni a wɔagye hokwan ahorow a ɔwɔ no afi ne nsam wɔ biribi nti no bɛte ase nnɛ sɛ, obiara nni hɔ a onya nea wɔfrɛ no “hokwan a ɔdesani wɔ” no nyinaa mu anigye. Wɔ nokwarem no, obiara hwehwɛ Onyankopɔn nneɛma nhyehyɛe foforo a wahyɛ ho bɔ, a trenee bɛtra mu na wɔde “hokwan” ahorow a obiara wɔ no bɛma no no denneennen. (2 Pet. 3:13) Sɛ ɛsɛ sɛ yehu amane wɔ hokwan a yɛwɔ no a wɔamfa amma yɛn nti a, yebetumi anya awerɛkyekye afi adwene a efi honhom mu a obi daa no adi yi mu: “Na me de, Awurade [Yehowa] na mehwɛ no kwan, mɛtwɛn me nkwagye Nyankopɔn no; me Nyankopɔn betie me.”​—Mika 7:7.