Nea Bible Wɔ Ka

Nimdeɛ Sɛ́ Ɔkwankyerɛfo No Di Mu Dɛn?

NIMDEƐ ho hia na obi atumi asi gyinae pa wɔ n’asetra mu. Nanso nimdeɛ a enni hɔ no betumi ama yɛasɛe bere, ahoɔden ne sika a yɛwɔ. Eyi yɛ nokware wɔ adwuma a ɛyɛ mmerɛw mpo mu. Sɛ́ nhwɛso no, ɔhene Salomo onyansafo no kae sɛ: “Sɛ obi dade ano kum na wansew ano a, ɛnde gye sɛ ɔma n’ahoɔden dɔɔso, na mfaso a wɔde di yiye ne nyansa [a egyina nimdeɛ so].”​—Ɔsɛnk. 10:10.

Nanso nsɛm ahorow bi ho nimdeɛ a obi wɔ no rentumi mfa akwankyerɛ pa mma. Biribi foforo ka ho a ɛho hia. Eyi te saa titiriw wɔ abusuabɔ a ɛda onipa ne ne mfɛfo nnipa ntam. Sɛ́ yebegyina nea yɛn ankasa yenim sɛ ɛyɛ nokware so adi dwuma no de ɔhaw horow a ɛyɛ aniberesɛm bɛba.

Kristoni ɔsomafo Paulo maa eyi mu daa hɔ wɔ krataa a ɔkyerɛw kɔmaa Korintofo no mu. Bere a ɔreka “abosom afɔrebɔde” ho asɛm no ɔkyerɛwee sɛ: “Yenim sɛ yɛn nyinaa nim de,​—nimdeɛ horan, na ɔdɔ de ɛma nkɔso​—na sɛ ɛyɛ obi sɛ onim biribi a, onnya nhui sɛnea ɛsɛ sɛ ohu ɛ.”​—1 Kor. 8:1, 2.

Kristofo a wɔwɔ Korinto no nim sɛ Onyankopɔn biako, Yehowa ne Awurade, Yesu Kristo na ɛwɔ hɔ. Wonim sɛ anyame ne awuranom ahorow pii a amanaman no som wɔn no nte ase. Ahoni yɛ nneɛma a wɔde nnua, abo anaasɛ nnade ayɛ a enni tumi biara. Esiane sɛ wɔwɔ nimdeɛ a ɛte sɛɛ nti Korinto asafo no mufo mu binom kae sɛ ɛnde na mfomso biara nni nnuan a wɔde abɔ afɔre ama ahoni no di mu. Saa gyidifo yi asɛm no teɛ wɔ ka a wɔkae sɛ saa nnuan no yɛ nea nsonsonee bi nna ɛno ne nea afoforo di no ntam no. Ahoni a wonni nkwa na wonni tumi biara no nsakraa emu biribiara ɛ, na wɔrentumi mfa eyi nso sɛ wɔn de.

Nanso so saa nimdeɛ pɔtee a ɛfa hwee a ahoni nyɛ ho no yɛ akwankyerɛ pa a wɔde si gyinae wɔ sɛ́ ɛfata sɛ wodi nnuan a wɔde abɔ afɔre ama ahoni no mu anaa? Dabi. Dɛn ntia? Ɔsomafo no kyerɛkyerɛɛ mu sɛ: “Nanso saa nimdeɛ yi nni nnipa nyinaa mu; enti ebinom de abosom ho gyidi a wɔwɔ de besi nnɛ di sɛ abosom afɔrebɔde, na sɛ wɔn ahonim yɛ mmerɛw nti, efi ka no.”​—1 Kor. 8:7.

Esiane sɛ kan no na wɔyɛ abosonsomfo nti, na gyidifo a wɔwɔ Korinto no mu binom nkɔɔ wɔn anim nkoduu faako a wɔatumi adi ɔsom mu nkate horow a ɛka nnuan a wɔde abɔ afɔre ama abosom a wodi no so. Enti, wɔtee nka sɛ ɛnteɛ sɛ wɔbɛyɛ saa, na sɛɛ na ɛbɛyɛ nso. Wɔn ahonim a ɛyɛ mmerɛw no mma wɔn kwan sɛ wommu nnuan a wɔde ama abosom no sɛ ɛte sɛ aduan biara. Bible no ka sɛ: “Na nea n’adwenem yɛ no naa no, sɛ odidi a, wadi fɔ; efisɛ emfi gyidi mu na odidi. Na biribiara a emfi gyidi mu no yɛ bɔne.”​—Rom. 14:23.

Sɛ saa gyidifo yi hu Kristoni foforo sɛ ɔredi abosom afɔrebɔde a, eyi bɛhaw wɔn yiye. Nea wɔbɛka ara ne sɛ, saa Kristoni yi som abosom ankasa. Eyi to wɔn hintidua, na ɛbɛhaw wɔn efisɛ wogye eyi di sɛ ɛyɛ bɔne a emu yɛ duru wɔ wɔn nuanom no fam. Anaasɛ, eyi bɛhyɛ wɔn nkuran na wɔafi nnuan a wɔde abɔ afɔre ama abosom no di ase, na eyi besum wɔn afiri ama wɔde wɔn ho ama ɔsom su a wokura wɔ tete mmere mu a na wɔyɛ abosonsomfo no.

Enti Kristoni a ɔno de ɔnam nea onim sɛ ɛyɛ nokware a ɛfa abosom ne nnuan a wɔde abɔ atɔre ama abosom ho so yɛ ade no de ne nua no honhom mu sɛe bɛba. Bere a ɔresi saa asɛntitiriw yi so dua no, ɔsomafo Paulo kyerɛwee sɛ: “Na monhwɛ yiye, na ɛho kwan a mowɔ no anto wɔn a wɔyɛ mmerɛw no hintidua. Na sɛ obi hu wo a wunim de no sɛ wote abosonnan mu adidii a, ɛremma n’ahonim a ɛyɛ mmerɛw no nnya ahoɔden nkodi abosomafɔrebɔde? Ɛnde na ɛnam wo nimdeɛ so na onua a ɔyɛ mmerɛw a ne nti Kristo wui no bɛsɛe.”​—1 Kor. 8:9-11.

Nimdeɛ ama obi a ommu afoforo ahonim a ɛyɛ mmerɛw no ahoman. Obu afoforo animtiaa sɛ wɔyɛ katee dodo nanso obu n’ani gu nokware a ɛyɛ sɛ adeyɛ kwan bi betumi adi wɔn a wɔn ahonim yɛ mmerɛw no awu no so. Enti, ne nimdeɛ no nkutoo ntumi nyɛ akwankyerɛ pa, efisɛ ebu n’ani gu sɛnea ne kwan betumi apira afoforo no so. Wɔ bere a ɔdɔ dannan nimdeɛ a wɔde di dwuma no nkutoo na etumi yɛ akwankyerɛ pa anaa akwankyerɛ a edi mu. Sɛ ɔdɔ nni hɔ a, nea ɔwɔ nimdeɛ no ma afoforo te nka sɛ mfaso nni wɔn so na ɔhyɛ wɔn aniwu. Ɔrenhyɛ wɔn a wɔne no bɔ nkuran. Nanso, sɛ ɔdɔ kanyan obi ma ɔde ne nimdeɛ no di dwuma de hwehwɛ afoforo yiyedi a, wɔn a wɔboa wɔn saa no benya nkɔso.

Sɛ obi susuw sɛ onim biribi, na sɛ ɔma ne ho so wɔ afoforo so a, na onnim asɛm no ankasa sɛnea ɛsɛ sɛ ohu no. (1 Kor. 8:2) Wayera nokware nimdeɛ botae no, a ɛne sɛ, sɛ́ wɔde bedi dwuma de ahwehwɛ yiyedi ne anigye ama afoforo. Afei nso, pii a onipa nam nimdeɛ so hu no ma obehu sɛ onnim pii koraa. Ɛbɛma n’ani aba ne sintɔ ahorow no so yiye, na ɛremma ɔnnyɛ katee anaasɛ obi a onsusuw ade ho.

Sɛ ebetumi adi dwuma pa a, ɛnde na ɛsɛ sɛ wohu nimdeɛ sɛ nea ɛde ɔdɔ di dwuma ma Onyankopɔn. Ɔsomafo Paulo kyerɛwee sɛ: “Na obi dɔ Onyankopɔn a, ɔno na Onyankopɔn nim no.” (1 Kor. 8:3) Ɛsɛ sɛ wohu adanse a mfomso biara nni ho sɛ́ obi wɔ ɔdɔ ma Onyankopɔn no wɔ onii ko no suban ne adeyɛ ahorow a oyi no adi wɔ ne mfɛfo gyidifo no ho no mu. Ɔsomafo Yohane daa sɛnea osusuw nsɛm ho no adi sɛ: “Obiara a ɔtan ne nua no yɛ owudifo; na munim sɛ daa nkwa rentra owudifo biara mu. Eyi mu na yehu ɔdɔ no, sɛ ɔno de ne kra too hɔɔ maa yɛn. Na ɛsɛ sɛ yɛn nso sɛ yɛde yɛn kra to hɔ ma yɛn nuanom.” (1 Yoh. 3:15, 16) “Adɔfo, momma yɛnnodɔ yɛn ho; na ɔdɔ fi Nyankopɔn mu, na obiara a ɔdɔ no, Onyankopɔn na wawo no, na onim Nyankopɔn. Nea ɔnnɔ no nhuu Nyankopɔn ɛ, na Onyankopɔn ne dɔ.”​—1 Yoh. 4:7, 8.

Enti, nimdeɛ ankasa nyɛ akwankyerɛ a edi mu a wotumi de kyerɛ nea ɛfata anaa ɛteɛ wɔ tebea bi mu. Ɔkwan bi bɛyɛ nea ɛteɛ ma yɛn, nanso, sɛ yehu sɛ ɔkwan yi bepira afoforo a wɔn ahonim yɛ mmerɛw no a, yɛbɛpɛ sɛ yɛtwe yɛn ho fi si a yebesi eyi so dua no ho. Enti ɛmmra sɛ yɛbɛkɔ so ‘ahwehwɛ nea ɛnyɛ yɛn nkutoo mfaso, na mmom afoforo de,’ na yɛde saa yɛ afa yɛn nimdeɛ no so ama wɔanya nkɔso.​—1 Kor. 10:24.