Di Ɔdɔ Kwan A Eye Kyɛn So No Akyi

YEHOWA NYANKOPƆN ne ɔdɔ ho nhwɛso. (1 Yohane 4:8) Ne Ba, Yesu Kristo, kae sɛ yɛnnɔ Onyankopɔn ne yɛn yɔnko. (Mateo 22:37-40) Yenim sɛ saa su yi so na Onyankopɔn nam ma amansan mũ no nyinaa yɛ adwuma. Enti baabiara a yebenya daa nkwa no, ɛsɛ sɛ yɛfa ɔdɔ kwan a eye kyɛn so no so.

Onyankopɔn yii ɔdɔ adi kyerɛɛ Israel man, nanso akyiri yi ɔpow saa ahyehyɛde no, esiane nokware a anni nti. Afei ɔma wohuu Yesu asuafo asafo no sɛ N’ahyehyɛde foforo. Ɔkwan bɛn so? Ɔyɛɛ saa denam honhom kronkron no a ɔdaa no adi wɔ ɔkwan titiriw bi so, na ɛmaa wɔn tumi ma wɔkaa kasa foforo, na wɔhyɛɛ nkɔm no so. Enti wɔ Pentekoste, 33 Y.B. mu no, Yudafo ne wɔn a wɔadan Yudafo 3,000 bɛyɛɛ gyidifo na wofii ahyehyɛde dedaw no mu kɔɔ Onyankopɔn ahyehyɛde foforo no mu. (Asomafo no Nnwuma 2:1-41) Esiane sɛ ɛno akyi no, wɔnam asomafo no so na wɔde honhom akyɛde no maa afoforo nti, bere a wowuwui no, honhom a wɔda no adi saa no to twae. (Asomafo no Nnwuma 8:5-18; 19:1-6) Nanso ebeduu saa bere no, na akyɛde ahorow no ada no adi sɛ honhom mu Israel wɔ Onyankopɔn anim dom.​—Galatifo 6:16.

Anwonwade ahorow a wɔnam honhom akyɛde horow no so yɛe no so baa mfaso. Nanso, na ɔdɔ a obi beyi adi akyerɛ anaasɛ afoforo ho a obedwen wɔ ɔkwan a pɛsɛmenkominya nnim so ho hia sen wɔ a ɔwɔ honhom akyɛde horow no. Ɔsomafo Paulo daa eyi adi wɔ nhoma a edi kan a ɔde kɔmaa Korintofo no mu (bɛyɛ 55 Y.B.). Wɔ mu no, ɔkaa ɔdɔ ho asɛm sɛ “ɔkwan a eye kyɛn so.” (1 Korintofo 12:31, New World Translation) Wɔaka saa ɔkwan no ho asɛm wɔ 1 Korintofo ti 13.

Sɛ Yenni Dɔ a, Yɛnsɛ Hwee

Paulo se: “Sɛ mede nnipa ne abɔfo tɛkrɛma mekasa, na minni dɔ a, na mete sɛ ayowa a egyigye anaa dɔn a ɛwosow.” (1 Korintofo 13:1) Sɛ yenni dɔ a, mfaso remma so sɛ yɛde onipa kasa a wɔnam honhom so de ama yɛn anaa ɔsoro abɔfo tɛkrɛma bɛkasa. Na Paulo pɛ sɛ ɔbɛka nsɛmfua anum a ɛma nkɔso sen sɛ ɔde kasa a nnipa nte ase bɛka nsɛmfua ɔpedu. (1 Korintofo 14:19) Obi a onni dɔ no bɛyɛ te sɛ ‘ayowa sin bi a egyigye’​—dawuru bi a ɛyɛ dede, na ɛhyɛ abufuw​—anaa “dɔn a ɛwosow” a ɛnka hwee. Na kasa horow a wɔka a ɔdɔ nnim nyɛ ɔkwan a wɔfa so dwudwo, na wɔhyɛ afoforo den wɔ honhom fam de hyɛ Onyankopɔn anuonyam na wɔboa ne nkurɔfo. Ɛnnɛ, yeyi ɔdɔ adi kyerɛ denam kasa a wɔte ase a yɛka wɔ ɔsom adwuma no mu no so.

Afei ɔsomafo no kae sɛ: “Na sɛ mewɔ adiyisɛnka, na minim ahintasɛm nyinaa ne nimdeɛ nyinaa, na mewɔ gyidi nyinaa ma mitutu mmepɔw, na minni dɔ a, memfra.” (1 Korintofo 13:2) Anwonwa kwan so nkɔmhyɛ, ahintasɛm kronkron a wɔte ase wɔ ɔkwan titiriw bi so, ne nimdeɛ a wɔnam honhom so de ma betumi ayɛ mfaso ama afoforo, nanso sɛ wɔn a wɔwɔ saa akyɛde horow no nni dɔ a, wɔn ankasa rennya mu mfaso. Paulo de ahintasɛm kronkron a ɔtee ase wɔ ɔkwan titiriw bi so no boaa afoforo, na nimdeɛ akyɛde bi tumi ma ɔka siei sɛ hyɛn bi a ɛbɛbɔ mufo benya nkwa. (Asomafo no Nnwuma 27:20-44; 1 Korintofo 4:1, 2) Nanso, sɛ na ɔwɔ ‘nimdeɛ nyinaa ne gyidi nyinaa’ nanso onni dɔ a, anka na ɔnsɛ hwee wɔ Yehowa ani so.

Ɛnnɛ, Yehowa honhom ma n’Adansefo tumi te Bible mu nkɔmhyɛ ahorow ne ahintasɛm kronkron ahorow ase, na ɛkyerɛ wɔn kwan ma wɔde nimdeɛ a ɛte saa ma afoforo. (Yoel 2:28, 29) Honhom no ma wonya gyidi a wohia na wɔde agyina akwanside a ɛte sɛ mmepɔw ano nso. (Mateo 17:20) Esiane sɛ honhom no yɛ nneɛma a ɛtete sɛɛ nti, ɛnteɛ sɛ yɛbɛfa so ahwehwɛ anuonyam ama yɛn ho. Sɛ yɛanyɛ nneɛma anhyɛ Onyankopɔn anuonyam, na yɛannɔ ɔno ne yɛn mfɛfo nnipa a, yɛmfra.​—Galatifo 5:6.

Afɔrebɔ a Ɔdɔ Nnim No So Remma Mfaso

Paulo se: “Na sɛ meporow m’ade nyinaa mema ahiafo na mede me nipadua mema sɛ wɔnhyew, na minni dɔ a, merennya ho mfaso.” (1 Korintofo 13:3) Sɛ Paulo de biribiara a ɔwɔ mae de hwɛɛ afoforo, na onni dɔ a, ɔrennya ho mfaso. Ɔdɔ a ɛma yɛkyɛ ade no nti na Onyankopɔn ma yɛn akatua, na ɛnyɛ bo a ade no som, anaasɛ yɛhwehwɛ anuonyam sɛ ademafo, te sɛ Anania ne Safira atorofo no nti. (Asomafo no Nnwuma 5:1-11) Paulo yɛɛ eyi ho nhwɛso pa denam ɔdɔ mu a ofi de ne ho mae wɔ ɔsom adwuma a wɔyɛ de boaa wɔn mfɛfo gyidifo wɔ Yudea no mu.​—1 Korintofo 16:1-4; 2 Korintofo 8:1-24; 9:7.

Wu a obi bewu sɛ mogya dansefo de adi nokware no ho adanse a ɔdɔ nnim no nkyerɛ hwee mma Onyankopɔn. (Mmebusɛm 25:27 ) Yesu kaa n’afɔrebɔ ho asɛm nanso wɔamfa anhoahoa ne ho. Sɛ anka ɔbɛhoahoa ne ho mmom no, ofi ɔdɔ ne ne pɛ mu de ne ho mae. (Marko 10:45; Efesofo 5:2; Hebrifo 10:5-10) Ne honhom fam nuanom no de ‘wɔn nipadua ma sɛ afɔre a ɛte ase’ wɔ Onyankopɔn som mu, ɛnyɛ sɛ mogya adansefo a wɔhyɛ wɔn ankasa ho anuonyam, na mmom wɔ akwan a ɛnyɛ hoo a ɛhyɛ Yehowa anuonyam so, de kyerɛ ɔdɔ a wɔwɔ ma no.​—Romafo 12:1, 2.

Akwan Bi a Ɔdɔ Bɛma Yɛafa So Ayɛ Ade

Paulo kyerɛwee sɛ: “Ɔdɔ wɔ abodwokyɛre, ne yam ye.” (1 Korintofo 13:4a) Onyankopɔn abodwokyɛre fi bere a Adam yɛɛ bɔne no ama pii akyerɛ ahonu a ɛkɔ nkwagye mu. (2 Petro 3:9, 15) Sɛ yɛwɔ ɔdɔ a, yɛde boasetɔ bɛkyerɛkyerɛ afoforo nokware no. Yɛbɛkwati abufuw, na yebedwen afoforo ho na yɛde afiri wɔn. (Mateo 18:21, 22) Ɔdɔ yam ye nso, na Onyankopɔn ayamye nti, yetwiw bɛn no. Ne honhom aba a ɛne ayamye no mma yemmisa nea ɛtra so mfi afoforo hɔ, te sɛ nea ommisa saa mfi yɛn hɔ no. (Efesofo 4:32) Ɔdɔ ma yeyi ayamye adi kyerɛ bonniayɛfo mpo.​—Luka 6:35.

Paulo de kaa ho sɛ: “Ɔdɔ nyɛ ahoɔyaw; ɔdɔ nyɛ ahoahoa, ɛnhoran.” (1 Korintofo 13:4b) Ahoɔyaw yɛ honam adwuma a ɛmma obi nkɔ Onyankopɔn Ahenni mu. (Galatifo 5:19-21) Ɔdɔ mma yenni yaw wɔ obi foforo ahode anaa yiye a odi no ho. Sɛ onya ɔsom mu hokwan bi a yɛpɛ a, ɔdɔ bɛma yɛne no ani agye, yɛaboa no, na yɛada Onyankopɔn ase sɛ obetumi de no adi dwuma ma asafo no anya mu mfaso.

Esiane sɛ ɔdɔ “nyɛ ahoahoa” nti, ɛnkanyan yɛn mma yɛmfa nea Onyankopɔn ma yɛyɛ wɔ ne som mu no nhoahoa yɛn ho. Korintofo no mu binom hoahoaa wɔn ho te sɛ nea wɔne honhom akyɛde no farebae, nanso eyi ne Onyankopɔn nnɛyi ahyehyɛde no mu hokwan ahorow no fi ne hɔ. Sɛ anka yɛde yɛn gyinabea wɔ Onyankopɔn ahyehyɛde no mu bɛhoahoa yɛn ho no, momma yɛnhwɛ yiye na yɛanhwe ase. (1 Korintofo 1:31; 4:7; 10:12) Ɔdɔ ‘nhoran,’ nanso ahantan bɛma obi a onni ɔdɔ ti ahon. Nnipa a wɔdɔ afoforo nte nka sɛ wɔkorɔn sen wɔn.​—1 Korintofo 4:18, 19; Galatifo 6:3.

Ɛnyɛ Ne Ho Sɛnea Ɛmfata, Ɛnyɛ Pɛsɛmenkominya, Ne Bo Mfuw

Ɔdɔ ‘nyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no.’ (1 Korintofo 13:5a) Ɛma su pa, abrabɔ pa, obu ma tumidi, ne suban pa wɔ Kristofo nhyiam horow ase nya nkɔso. (Efesofo 5:3-5; 1 Korintofo 11:17-34; 14:40; fa toto Yuda 4, 8-10 ho.) Esiane sɛ ɔdɔ ma obiara te nka sɛ ne ho hia nti, te sɛ onipa nipadua akwaa nyinaa no, asafo a ɔdɔ wom yɛ baabi a asomdwoe ne guankɔbea wɔ. (1 Korintofo 12:22-25) Sɛ anka ɔdɔ de pɛsɛmenkominya bɛhwehwɛ ‘n’ankasa de no,’ ɛtɔ mmere bi a, ɛma yɛde hokwan ahorow a yɛwɔ bɔ afɔre, na yɛkyerɛ afoforo ne wɔn yiyedi ho anigye. (Filipifo 2:1-4) Ɔdɔ ma yɛnam yɛn som adwuma no so ‘yɛ ade nyinaa ma nnipa nyinaa, na yɛagye ebinom.’​—1 Korintofo 9:22, 23.

Ɔdɔ “bo nhaw no.” Abufuw yɛ honam a bɔne wɔ ho no nnwuma, nanso ɔdɔ ma ‘yɛyɛ nyaa fa abufuw.’ (Yakobo 1:19; Galatifo 5:19, 20) Sɛ ɛteɛ sɛ yɛn bo fuw mpo a, ɔdɔ mma yɛmfa abufuw nhyɛ yɛn mu, na yɛnam saayɛ so ama Ɔbonsam kwan. (Efesofo 4:26, 27) Ɛsɛ sɛ mpanyimfo titiriw kwati abufuw, sɛ wɔn mfɛfo gyidifo antumi amfa nyansahyɛ bi anni dwuma a.

Paul kaa ɔdɔ ho asɛm nso sɛ: “Ɛmfa bɔne nhyɛ ne yam.” (1 Korintofo 13:5b) Ɔdɔ nyɛ bɔne ahorow ho kyerɛwtohɔ, te sɛ nea wɔkyerɛw nsɛm gu nhoma mu no. Ehu biribi pa wɔ mfɛfo gyidifo ho, na ɛmfa bɔne nsi bɔne a wɔayɛ ankasa anaa nea esusuw sɛ wɔayɛ ananmu. (Mmebusɛm 20:22; 24:29; 25:21, 22) Ɔdɔ boa yɛn ma ‘yedi nea ɛma asomdwoe akyi.’ (Romafo 14:19) Paulo ne Barnaba dii anobaebae, na wɔn mu biara faa baabi foforo wɔ Onyankopɔn som mu de, nanso ɔdɔ dii mpaapaemu no so, na wɔannya wɔn ho wɔn ho menasepɔw.​—Leviticus 19:17, 18; Asomfo no nnwuma 15:36-41.

Ɛda Trenee ne Nokware Adi

Paulo toaa so kaa ɔdɔ ho asɛm sɛ: “N’ani nnye nea ɛnteɛ ho, na ɛne nokware ani gye.” (1 Korintofo 13:6) Ebinom ani gye nea ɛnteɛ ho araa ma “wɔnna, gye sɛ wɔayɛ bɔne ansa.” (Mmebusɛm 4:16) Nanso, wɔ Onyankopɔn ahyehyɛde no mu no, yɛne yɛn ho nni asi, na yenni ahurusi bere a bɔne asum obi afiri no. (Mmebusɛm 17:5; 24: 17, 18) Sɛ na wɔdɔ Onyankopɔn ne trenee sɛnea ɛsɛ wɔ Korinto asafo no mu a, anka wɔrennya ɔbrasɛe ho koma wɔ hɔ. (1 Korintofo 5:1-13) Nea ɛka nneɛma afoforo ho no, ɔdɔ a yɛwɔ ma trenee remma yɛnhwɛ television, sini anaa agodi mu dwumadi a ɛda nneɛma a ɛnteɛ adi kyerɛ no.

Ɔdɔ ‘ne nokware ani gye.’ Wɔ ha no, wɔde nokware bɔ nea ɛnteɛ abira. Ɛda adi sɛ eyi kyerɛ sɛ ɔdɔ ma yɛn ani gye wɔ nkɛntɛnso a nokware no nya wɔ nkurɔfo so no ho. Yenya anigye wɔ nneɛma a ɛhyɛ nkurɔfo den, na ɛma nokware ne trenee nya nkɔanim no ho. Ɔdɔ mma yɛnka atosɛm, sɛ wobu teefo bem a, ɛma yɛn ani gye, na ɛma yedi ahurusi bere a Onyankopɔn nokware di nkonim no.​—Dwom 45:4.

Sɛnea Ɔdɔ Di Nneɛma Nyinaa ho Dwuma

Paulo retoa ɔdɔ asekyerɛ so no, ɔkyerɛwee sɛ: “Etie ade nyinaa, egye ade nyinaa di, enya ade nyinaa mu anidaso, ɛtɔ ne bo ase ade nyinaa mu.” (1 Korintofo 13:7) Esiane sɛ ɔdɔ ‘tie ade nyinaa’ nti, esiw abufuw ano te sɛ nea suhyɛ pa siw nsu ano no. Sɛ obi fom yɛn na afei obisa fafiri a, ɔdɔ ma yegyina nea epira yɛn no ano, na yɛde firi nea wafom yɛn no mmom sen sɛ yebedi nsɛm ho nseku. Yɛbɔ mmɔden sɛ yɛnam ɔdɔ so ‘benya yɛn nua’ no.​—Mateo 18:15-17; Kolosefo 3:13.

Ɔdɔ ‘gye’ Onyankopɔn Asɛm mu “ade nyinaa” di, na ɛma yɛkyerɛ honhom fam aduan a wɔnam “akoa nokwafo ne ɔbadwemma” no so de ma no ho anisɔ. ( Mateo 24:45-47) Ɛwom sɛ yɛnyɛ wɔn a wobetumi adaadaa wɔn ntɛm de, nanso ɔdɔ mma yennya koma a ennye nni, na yɛnka sɛ yɛn mfɛfo gyidifo kura adwene a ɛnteɛ. (Ɔsɛnkafo 7:21, 22) Ɔdɔ nya “ade nyinaa” a wɔakyerɛw wɔ Kyerɛwnsɛm no mu, te sɛ Onyankopɔn Ahenni no ho nokware ahorow mu “anidaso.” Esiane sɛ ɔdɔ kanyan yɛn nti, yɛwɔ anidaso, na yɛbɔ mpae sɛ nea eye sen biara mfi tebea horow a emu yɛ den mu mmra. (1 Petro 3:15) Afei nso, ɔdɔ ‘tɔ ne bo ase ade nyinaa mu,’ a bɔne ahorow a wɔyɛ tia yɛn nso ka ho. (Mmebusɛm 10:12) Ɔdɔ a yɛwɔ ma Onyankopɔn no nso boa yɛn ma yegyina ɔtaa ne sɔhwɛ afoforo ano.

Paulo ka kaa ho sɛ: “Ɔdɔ to ntwa da.” (1 Korintofo 13:8a) Ɔdɔ to rentwa na enni huammɔ da, te sɛ nea Yehowa renni yɛn huammɔ no. Esiane sɛ yɛn Nyankopɔn a ɔte ase daa no yɛ ɔdɔ ho nhwɛso nti, su yi to ntwa da. (1 Timoteo 1:17; 1 Yohane 4:16) Ɔdɔ bedi amansan no so bere nyinaa. Enti, momma yɛmmɔ mpae sɛ Onyankopɔn bɛboa yɛn ma yɛadi pɛsɛmenkominya su horow so, na yɛayi ne honhom aba a ɛto rentwa da yi akyerɛ.​—Luka 11:13.

Nneɛma a Ebetwam Akɔ

Paulo reka nea ɛbɛba daakye no, ɔkyerɛwee sɛ: “Nkɔmhyɛ de, wobegu; ɔkasa horow de, ebegyae; nimdeɛ de, ɛbɛsa.” (1 Korintofo 13:8b) ‘Nkɔmhyɛ akyɛde horow’ no tumi maa wɔn a wɔwɔ bi no hyɛɛ nkɔm afoforo. Ɛwom sɛ akyɛde horow a ɛtete sɛɛ no twaam bere a wɔde Kristofo asafo no sii hɔ sɛ Onyankopɔn ahyehyɛde no de, nanso ne nkɔmhyɛ tumi no ntwam, na nkɔmhyɛ a yehia mprempren no nyinaa wɔ n’Asɛm no mu. Tumi a ɛma wɔka kasa foforo a honhom no de mae no to twae, na sɛnea wɔka siei no, nimdeɛ soronko no ‘sae.’ Nanso Yehowa Asɛm mu no nyinaa de nea ehia sɛ yehu na yɛanya nkwa no ma. (Romafo 10:8-10) Afei nso, Onyankopɔn honhom ahyɛ ne nkurɔfo ma na ɛma wɔsow n’aba.

Paulo toaa so sɛ: “Na yehu ade fa-ne-fa, na yɛhyɛ nkɔm fa-ne-fa. Na sɛ nea ɛyɛ pɛ no nya ba a, ɛno na wobegu nea ɛyɛ ɔfa-ne-fa.” (1 Korintofo 13:9, 10) Na nimdeɛ ne nkɔmhyɛ akyɛde horow no nni mũ. Ebia, nkɔmhyɛ a ɛte sɛɛ no ankyerɛkyerɛ nsɛm mu ankɔ akyiri, na odiyifo biara kaa nea ɛbɛba daakye no fã bi, a na onni nea ɔhyɛɛ ho nkɔm no ho nimdeɛ a edi mũ. Nanso, afei de nkakrankakra yɛrete nkɔmhyɛ ase awie. Sɛ nhwɛso no, nokwasɛm ahorow a ɛma Bible nkɔmhyɛ nya mmamu si so dua sɛ Yesu nsa kaa ahenni tumi wɔ adesamma so wɔ 1914 mu. Yɛwɔ “awiei bere” no mu fi saa bere no, na yɛkɔ so nyin wɔ honhom fam nimdeɛ ne Bible nkɔmhyɛ asete mu. (Daniel 12:4) Enti, yɛrenya nimdeɛ a edi mũ, “nea ɛyɛ pɛ” no abɛn.

Su a Ɛsen Biara No Tra Hɔ

Paulo reka asafo no nkɔso ho asɛm no, ɔkyerɛwee sɛ: “Meyɛ abofraa no, mekasae sɛ abofraa, medwenee sɛ abofraa, misusuwii sɛ abofraa; meyɛɛ ɔpanyin yi, magu mmofraasɛm no.” (1 Korintofo 13:11) Esiane sɛ abofra gyina nimdeɛ kakraa bi a ɔwɔ ne nyin a onnyinii pii no so na ɛyɛ ade nti, obetumi ahinhim te sɛ nea woredannan no wɔ akokoaa mpa so. Nanso ɔbarima anyin wɔ nipadua mu sen no, ɔwɔ nimdeɛ kɛse sen no, na ɔntaa nhinhim ntɛmntɛm. Wagu mmofraberem nsusuwii, su ne akwan a ɔfa so yɛ ade. Saa ara nso na bere a Onyankopɔn ahyehyɛde nyinii no, Ohui sɛ enhia honhom akyɛde a ɛne nkɔmhyɛ, kasa foforo, ne nimdeɛ. Ɛwom sɛ asafo a anyin no mufo a wɔwɔ hɔ nnɛ no nso te nka sɛ wonhia akyɛde horow a ɛtete sɛɛ no de, nanso wɔn ani gye sɛ wɔbɛsom Onyankopɔn wɔ ne honhom akwankyerɛ ase.

Paulo de kaa ho sɛ: “Na sesɛɛ de, yɛnam ahwehwɛ so hwɛ ade wɔ bɛ mu, na ɛno mu de, anim ne anim; sesɛɛ de, mihu ade fa-ne-fa, na ɛno mu de, mehu ade mu sɛnea wɔahu me nso mu.” (1 Korintofo 13:12) Wɔ asafo no mmofraase no, na bere nnui sɛ Onyankopɔn bɛda nneɛma bi adi. Enti, wɔanhu nneɛma yiye, te sɛ nea Kristofo rehwɛ ahwehwɛ a anim ayɛ wisiwisi mu. (Asomafo no Nnwuma 1:6, 7) Nanso, yɛatra bere a yenhu nneɛma yiye no. Nneɛma ho mfonini ne nkɔmhyɛ mmamu da adi pefee, efisɛ saa bere yi na Onyankopɔn yi nneɛma adi kyerɛ. (Dwom 97:11; Daniel 2:28) Ɛwom sɛ na Paulo ankasa nim Onyankopɔn de, nanso na ɔsomafo no benya Yehowa ho nimdeɛ a edi mu, ne ɔne No ntam abusuabɔ a emu yɛ den sen biara bere a wɔanyan no akɔ ɔsoro asetra mu, na ɔnam saayɛ so anya ne Kristosom so akatua nyinaa no.

Paulo de ɔdɔ ho asɛm a ɔkae no reba awiei no, ɔkyerɛwee sɛ: “Na afei gyidi, anidaso, ɔdɔ, ade abiɛsa yi na ɛtra hɔ; na ɔdɔ ne emu kɛse.” ( 1 Korintofo 13:13) Ɛwom sɛ honhom no anwonwa kwan so akyɛde horow no nni hɔ de, nanso mprempren asafo no wɔ nimdeɛ a edi mu, ne nea ɛma wonya gyidi, anidaso, ne ɔdɔ kɛse. Ɛwɔ gyidi sɛ ɛte sɛ nea biribiara a Onyankopɔn ahyɛ ho bɔ no abam dedaw. (Hebrifo 11:1) Gyidi mu nneɛma bɛba awiei bere a nneɛma a wɔka siei wɔ Onyankopɔn Asɛm mu no bam no. Anidaso ho nneɛma to betwa bere a yehu sɛ nneɛma a yɛhwɛ kwan no aba no. Enti, momma Yehowa Adansefo nyinaa nkɔ so nni ɔdɔ kwan a eye kyɛn so no akyi.