Yi W’adwene Fi Nea Atwam So—Hwɛ W’anim Som

1-3. (a) Dɛn na ɛma ebinom di yaw? Sɛ yɛkae mfomso a yɛadi a, ɛka yɛn dɛn? (b) Dɛn na yebetumi asua afi Paulo hɔ?

ANWENSƐM kyerɛwfo J. G. Whittier kae sɛ, sɛ yɛhwɛ nsɛm a nkurɔfo taa ka a, nea ɛyɛ awerɛhow paa ne “mihui a anka!” Nkurɔfo taa ka saa bere a wɔayɛ biribi na akyiri yi wɔahu sɛ wɔanyɛ no yiye no. Yɛn nyinaa ayɛ nneɛma bi atwam, na sɛ nnɛ a, anka yɛrenyɛ no saa. Sɛ ebinom kae nneɛma bi a wɔayɛ anaa biribi a ɛsɛ sɛ wɔyɛ a wɔanyɛ a, wodi awerɛhow paa. Wo nso ɛ, dɛn na wotaa di ho yaw?

² Nnipa bi adi mfomso akɛse anaa wɔayɛ bɔne a emu yɛ duru. Ebinom nso nyɛɛ bɔne biara, nanso ɛyɛ wɔn sɛ wɔasisi gyinae bi a ɛnyɛ papa. Ebinom mma nea atwam no nhaw wɔn; wɔhwɛ wɔn anim bɔ wɔn bra. Afoforo nso da so ara de nneɛma a asi atwam haw wɔn ho, na wɔka sɛ “mihui a anka.” (Dw. 51:3) Wo nso ɛ? Wunyae a anka woama nea atwam no atwam na woahwɛ w’anim asom Onyankopɔn? Obi wɔ hɔ a yebetumi ahwɛ no asuasua no anaa? Yiw, ɔno ne ɔsomafo Paulo.

³ Paulo sii so no, odii mfomso akɛse nanso akyiri yi osisii gyinae pa. Mfomso a odii maa ne werɛ howee nanso ne nyinaa akyi no, ɔhwɛɛ n’anim som Onyankopɔn yiye. Momma yɛnhwɛ sɛnea Paulo nhwɛso no betumi aboa yɛn.

 4. Dɛn na ɛmaa ɔsomafo Paulo dii yaw?

⁴ Bere a Paulo yɛ aberante no, na ɔyɛ Farisini. Saa bere no, ɔyɛɛ nneɛma bi a akyiri yi odii ho yaw. Odii Kristo asuafo no ani, na Bible ka sɛ bere a wokum Stefano no, ankyɛ koraa na “Saul [a akyiri yi wɔbɛfrɛɛ no Paulo] fii ase tuu n’ani sii asafo no so. Ɔhyɛnhyɛn afie mu kɔtwee mmarima ne mmea nyinaa, na ɔma wɔde wɔn guu afiase.” (Aso. 8:3) Ɔbenfo bi a wɔfrɛ no Albert Barnes kae sɛ, sɛ Bible ka sɛ Saul “tuu n’ani sii” asafo no so a, Hela asɛm a wɔde dii dwuma wɔ ha no ma yehu sɛ Saul de anibere tow hyɛɛ Kristofo asafo no so te sɛ akekaboa bi. Na Saul yɛ Yudani mapa, na na ogye di sɛ Onyankopɔn de ahyɛ ne nsa sɛ ontu Kristosom ase. Enti ɔde anibere taa Kristofo no, na na ‘ɔpɛ sɛ okunkum mmarima ne mmea nyinaa.’—Aso. 9:1, 2; 22:4.a

 5. Dɛn na ɛmaa Saul gyaee Yesu akyidifo a na ɔteetee wɔn no na ofii ase kaa Yesu ho asɛm?

⁵ Na Saul pɛ sɛ ɔkɔ Damasko kɔtwe Yesu asuafo no fi wɔn afie mu de wɔn kɔ Yerusalem kogyina Sanhedrin no anim. Nanso ne nsusuwii yɛɛ kwa efisɛ Kristofo asafo no Ti amma no kwan. (Efe. 5:23) Bere a Saul nam kwan so rekɔ Damasko no, Yesu ne no kasae na hann bi maa n’ani furae. Afei Yesu ka kyerɛɛ Saul sɛ ɔnkɔ Damasko na ɔbɛkyerɛ no nea ɔnyɛ. Yenim nea esii.—Aso. 9:3-22.

6, 7. Yɛyɛ dɛn hu sɛ Paulo gye toom sɛ odii mfomso?

⁶ Bere a Paulo bɛyɛɛ Kristoni no, nea na esi n’ani so sesae. Obi a kan na watu n’ani asi Kristofo so no, afei de ɔde n’ahoɔden nyinaa kaa Kristo ho asɛm denneennen. Ɛno mpo no, Paulo kae sɛ: “Minim sɛ moate su a na mikura kan no wɔ Yudasom mu, sɛ metaa Onyankopɔn asafo ma ɛtraa so, pɛe sɛ mesɛe no koraa.” (Gal. 1:13) Akyiri yi bere a ɔrekyerɛw Korintofo, Filipifo ne Timoteo no, ɔsan kaa mfomso a odii kyerɛɛ wɔn. (Monkenkan 1 Korintofo 15:9; Filip. 3:6; 1 Tim. 1:13) Na ɛnyɛ Paulo dɛ sɛ ɔrekyerɛw nsɛm a ɛte saa afa ɔno ara ne ho, nanso ɔkyerɛwee ara, efisɛ na ɛyɛ biribi a asi. Ogye toom sɛ wadi mfomso kɛse.—Aso. 26:9-11.

⁷ Ɔbenfo Frederic W. Farrar kae sɛ, sɛ yɛhwɛ sɛnea Paulo tuu n’ani sii Kristofo so a, yebetumi aka sɛ akyiri yi asɛm no yɛɛ no yaw paa na ɛbɛyɛ sɛ afoforo nso de asɛm no guan ne ho. Sɛ Paulo kɔsra asafo bi a, ebetumi aba sɛ anuanom a wonhuu no da no bɛkɔ ne nkyɛn akɔka sɛ, ‘Enti wone Paulo no; wo na na woretaa yɛn no?’—Aso. 9:21.

 8. Mmɔborɔhunu ne ɔdɔ a Yehowa ne Yesu daa no adi kyerɛɛ Paulo no kaa no dɛn? Dɛn na yesua fi mu?

⁸ Paulo gye toom sɛ ɛyɛ Onyankopɔn adom ara kwa nti na otumi yɛɛ ne som adwuma no. Ɔkaa Onyankopɔn “adom” ho asɛm bɛyɛ mpɛn 90 wɔ ne nkrataa 14 no mu. Bible kyerɛwfo biara nkaa Onyankopɔn “adom” ho asɛm pii saa. (Monkenkan 1 Korintofo 15:10.) Paulo daa no adi sɛ n’ani sɔ Onyankopɔn mmɔborɔhunu paa, na na ɔmpɛ sɛ adom a Onyankopɔn ayɛ no no yɛ kwa. Enti ‘ɔbɔɔ ne ho mmɔden’ sen asomafo a wɔaka nyinaa. Dɛn na yesua fi Paulo hɔ? Sɛ yɛka yɛn bɔne na yɛsesa yɛn akwan a, Yehowa nso begyina Yesu agyede afɔre no so apopa bɔne a emu yɛ duru mpo. Sɛ ɛyɛ wo sɛ wo bɔne sõ dodo sɛ obegyina Kristo agyede afɔre no so de akyɛ wo a, kae Paulo. (Monkenkan 1 Timoteo 1:15, 16.) Ɛwom sɛ Paulo taa Kristo nanso ɔkyerɛwee sɛ ‘Onyankopɔn Ba no dɔɔ no na ɔde ne ho too hɔ maa no.’ (Gal. 2:20; Aso. 9:5) Paulo bɔɔ mmɔden sɛ ɔbɛma ne werɛ afi nea atwam no na wahwɛ n’anim asom Onyankopɔn yiye. Wo nso wubetumi ayɛ saa anaa?

9, 10. (a) Dɛn nti na Yehowa nkurɔfo bi di yaw? (b) Dɛn nti na ɛnsɛ sɛ yedwinnwen nneɛma a atwam ho de haw yɛn ho?

⁹ Woayɛ nneɛma bi a seesei wudi ho yaw anaa? Woasɛe wo bere ne w’ahoɔden wɔ nneɛma hunu ho? Woayɛ biribi ma ahaw afoforo? Anaa biribi foforo wɔ hɔ a wudi ho yaw? Asɛm no ne sɛ, Dɛn na wubetumi ayɛ wɔ ho?

¹⁰ Nnipa pii de nneɛma haw wɔn ho dodo! Wodwinnwen mfomso a wɔayɛ atwam ho de teetee wɔn ho. Nanso adwinnwen betumi ayi ɔhaw no afi hɔ anaa? Dabi. Woyɛ saa a, ɛte sɛ nea wote akongua mu rehinhim a wonkɔ w’anim, wosɛe w’ahoɔden kwa; ɛremfa wo nkɔ baabiara. Enti sɛ asɛm bi haw wo a, ntena faako nnwinnwen ho, na mmom tu ho anammɔn. Sɛ woafom obi a, kɔpa ne kyɛw na munsiesie mo ntam. Dɛn na woyɛe a n’ani annye ho? Wuhu a ɛbɛboa wo na woanyɛ saa bio. Nanso tebea bi wɔ hɔ a woyɛ ho hwee a ɛnyɛ yiye. Sɛ wokɔ so dwinnwen ho a, ɛremmoa wo. Ebetumi abubu wo na aka wo som mpo!

11. (a) Sɛ yɛpɛ sɛ Yehowa hu yɛn mmɔbɔ na ɔda n’adɔe adi kyerɛ yɛn a, dɛn na ɛsɛ sɛ yɛyɛ? (b) Sɛ yɛpɛ sɛ yɛn asom dwo yɛn a, dɛn na Bible kyerɛ sɛ yɛnyɛ?

¹¹ Ebinom ama mfomso a wɔayɛ atwam ahyɛ wɔn so araa ma wosusuw sɛ wɔmfata wɔ Onyankopɔn anim. Ebia wosusuw sɛ wɔn mfomso mu yɛ duru dodo anaa wɔadi mfomso atoatoa so mpɛn pii, enti Onyankopɔn renhu wɔn mmɔbɔ. Nanso asɛm no ne sɛ, nea wɔayɛ atwam biara wobetumi anu wɔn ho asakra wɔn akwan, na wɔasrɛ Onyankopɔn sɛ ɔmfa nkyɛ wɔn. (Aso. 3:19) Yehowa betumi ada ne mmɔborɔhunu ne n’adɔe adi akyerɛ wɔn sɛnea wayɛ ama nnipa pii no. Sɛ obi brɛ ne ho ase, na ogye ne mfomso tom na onu ne ho a, Yehowa behu ne mmɔbɔ. Bere a Hiob kae sɛ ‘wanu ne ho dɔte ne nsõ mu’ no, Onyankopɔn huu no mmɔbɔ. (Hiob 42:6) Bible kyerɛ yɛn nea ɛsɛ sɛ yɛyɛ na yɛn asom adwo yɛn. Ɛka sɛ: “Nea ɔkata ne mmarato so no, ɛrensi no yiye, na nea ɔka na ogyae no, wobehu no mmɔbɔ.” (Mmeb. 28:13; Yak. 5:14-16) Enti ɛsɛ sɛ yɛka yɛn bɔne kyerɛ Onyankopɔn na yɛsrɛ no sɛ ɔmfa mfiri yɛn, na yɛyɛ nea yebetumi biara de siesie yɛn akwan. (2 Kor. 7:10, 11) Sɛ yetu saa anammɔn yi a, Yehowa behu yɛn mmɔbɔ na ‘ɔde afiri yɛn aboro so.’—Yes. 55:7.

12. (a) Sɛ yɛn ahonim haw yɛn a, dɛn na yɛbɛyɛ de asuasua Dawid? (b) Sɛ Bible ka sɛ Yehowa anu ne ho a, ɛkyerɛ dɛn? Dɛn nti na eyi hyɛ nkuran? (Hwɛ adaka no.)

¹² Mpaebɔ wɔ tumi. Sɛ yɛbɔ mpae a, Onyankopɔn betumi ayɛ pii ama yɛn. Bere a Dawid bɔɔ Yehowa mpae no, otiei. Enti ɔtoo dwom bi de kyerɛe sɛ ogye di sɛ Onyankopɔn bua mpaebɔ. (Monkenkan Dwom 32:1-5.) Bere a Dawid nnya nkaa ne bɔne nkyerɛɛ Onyankopɔn no, n’ahonim teetee no. Ebia egyaw no kɔdaanna anaa ɛbɔɔ no yare mpo. Dɛn na ɛma wɔde Dawid bɔne firii no na ne ho tɔɔ no? Ɔkaa ne bɔne kyerɛɛ Onyankopɔn. Yehowa tiee Dawid mpaebɔ na ɔhyɛɛ no den. Enti Dawid hwɛɛ n’anim som Yehowa. Wo nso sɛ mfomso a woayɛ atwam reteetee wo a, bue wo komam bɔ Yehowa mpae na yɛ nsakrae biara a ɛfata. Afei nya awerɛhyem sɛ obetie wo nkotɔsrɛ na ɔde akyɛ wo.—Dw. 86:5.

13, 14. (a) Dɛn na ɛsɛ sɛ yɛde yɛn adwene si so nnɛ? (b) Nsɛmmisa bɛn na ɛbɛboa yɛn ma yɛahwehwɛ yɛn ho mu?

¹³ Ɛyɛ nokware sɛ yebetumi asua biribi afi nea atwam mu, nanso ɛnsɛ sɛ egye yɛn ka akyiri. Enti mommma yennnwinnwen nea atwam ho dodo, mmom momma yɛnhwɛ nea yebetumi ayɛ nnɛ ne daakye. Wubetumi abisa wo ho nsɛm yi: ‘Mereyɛ biribi seesei a ɛbɛma manu me ho daakye? Gyinae a meresi nnɛ no, daakye ɛrenhaw me anaa? Mede nokwaredi resom Onyankopɔn sɛnea ɛbɛyɛ a merennu me ho daakye?’

¹⁴ Ahohiahia kɛse no abɛn paa. Enti nyansa wom sɛ yebisa yɛn ho sɛ: ‘Metumi ayɛ pii wɔ Onyankopɔn som mu? Metumi ayɛ ɔkwampaefo? Adɛn nti na menyɛ asafo mu ɔsomfo? Mereyɛ nea metumi nyinaa ahyɛ nipasu foforo no? Mehwɛ sɛnea merebɔ me bra a, enti Yehowa de me bɛkɔ wiase foforo no mu?’ Sɛ anka wode w’adwene besi nea wantumi anyɛ so no, hwɛ nea wubetumi ayɛ nnɛ na si wo bo sɛ wode nsi ne ahokeka bɛsom Yehowa. Ɛnnɛ ne bere a ɛsɛ sɛ wusi gyinae pa na woannu wo ho daakye.—2 Tim. 2:15.

15, 16. (a) Nneɛma bɛn na nkurɔfo de abɔ afɔre na wɔatumi de Onyankopɔn som adi kan wɔ wɔn asetenam? (b) Adɛn nti na ɛnsɛ sɛ yenu yɛn ho sɛ yɛde nneɛma bɔɔ afɔre maa Onyankopɔn?

¹⁵ Ebia wode nneɛma bi abɔ afɔre na ama woatumi de wo bere nyinaa asom Yehowa. Ebia na wukura adwuma kɛse bi na wode too hɔ na woatumi anya bere pii ayɛ Ahenni adwuma no. Anaa ebia wusii gyinae sɛ worenware anaa worenwo mma sɛnea ɛbɛyɛ a wubetumi de wo bere nyinaa asom wɔ Betel, aboa asafo adansi adwuma, ayɛ ɔmansin anaa asɛmpatrɛw adwuma. Seesei a worenyin no, so woanu wo ho sɛ wusii gyinae a ɛte saa? Ɛyɛ a wote nka sɛ anka enhia sɛ wode nneɛma bɔ afɔre anaa wote nka sɛ woperee wo ho dodo? Dabida, ɛnsɛ sɛ wote nka saa!

¹⁶ Wusii gyinae sɛ wode wo bere nyinaa bɛyɛ ɔsom adwuma no efisɛ wodɔ Yehowa paa, na wopɛ sɛ woboa afoforo ma wɔbɛsom no. Nnya adwene da sɛ, sɛ woamfa nneɛma ammɔ afɔre a, anka biribiara bɛkɔ yiye ama wo. Wusii gyinae pa enti ma wo bo ntɔ wo yam. Ma w’ani nnye sɛ wode Yehowa som adi kan. Yehowa kae nneɛma a wode abɔ afɔre ama no no; ne werɛ remfi emu biara. Wiase foforo no mu, bere a yɛanya “nkwa ankasa” anaa daa nkwa no, Yehowa bɛma yɛn nhyira a yɛnsoo ho dae da!—Dw. 145:16; 1 Tim. 6:19.

17, 18. (a) Dɛn na ɛboaa Paulo ma ɔsom Onyankopɔn a wanni yaw? (b) Dɛn na woasi wo bo sɛ wobɛyɛ de akyerɛ sɛ woredi Paulo nhwɛso akyi?

¹⁷ Dɛn na ɛboaa Paulo ma ɔhwɛɛ n’anim som Onyankopɔn a wanni yaw? J. B. Phillips nkyerɛase no kyerɛɛ Paulo asɛm no ase sɛ: “Magyaw nea atwam no wɔ m’akyi, na metwe me nsam sɛ me nsa bɛka botae a esi m’anim no.” (Monkenkan Filipifo 3:13, 14.) Paulo amfa n’adwene ansi nneɛma bɔne a ɔyɛe wɔ Yudasom mu no so. Mmom ɔde n’ahoɔden nyinaa yɛɛ nea ɛbɛma ne nsa aka nkonimbo no—daa nkwa.

¹⁸ Yɛn nyinaa betumi asua biribi afi Paulo asɛm no mu. Ne nyinaa ne sɛ ɛnsɛ sɛ yɛde nea atwam haw yɛn ho; ‘nea mmoa adi no, wonni nkɔ.’ Nea aka ne sɛ yɛbɛhwɛ yɛn anim apere sɛ yɛn nsa bɛka nhyira a ɛda hɔ retwɛn yɛn no. Ebia yɛn werɛ remfi mfomso a yɛayɛ atwam, nanso ɛnsɛ sɛ yɛde haw yɛn ho boro so. Yɛmma nea atwam no ntwam, na yɛmfa yɛn ahoɔden nyinaa nsom Onyankopɔn nnɛ, na yɛmfa yɛn adwene nyinaa nsi nneɛma pa a yɛn nsa bɛka daakye no so!