‘Wobenyan Awufo’

“Na ɔbɛhyɛn torobɛnto, na awufo no anyan sɛ wɔn a wɔmporɔwee da, na yɛn de, yɛbɛsakra.”—1 KORINTOFO 15:52.

 1, 2. (a) Bɔhyɛ a ɛma awerɛkyekye bɛn na wɔnam odiyifo Hosea so de mae? (b) Yɛyɛ dɛn hu sɛ Onyankopɔn wɔ ɔpɛ sɛ obenyan awufo aba nkwa mu bio?

WOAHWERE wo dɔfo bi wɔ owu mu pɛn? Ɛnde na wunim ɛyaw a owu betumi de aba no. Nanso Kristofo nya awerɛkyekye wɔ bɔhyɛ a Onyankopɔn nam odiyifo Hosea so de mae no mu: “Megye wɔn mafi asaman nsam anaa? mɛpon wɔn owu mu anaa? Owu, ɛhe na wo nwonwɔe wɔ? Asaman ɛhe na wo sɛe wɔ?”—Hosea 13:14.

² Adwene a ɛne sɛ awufo bɛsan aba nkwa mu no yɛ nsɛnhunu wɔ akyinnyegyefo ani so. Nanso akyinnye biara nni ho sɛ Ade Nyinaa so Tumfoɔ no wɔ tumi a ɔde bɛyɛ anwonwade a ɛte saa! Ɔsɛmpɔw no ankasa ne ɔpɛ a ebia Yehowa wɔ sɛ ɔde awufo bɛba nkwa mu bio no. Ɔtreneeni Hiob bisae sɛ: “Sɛ onipa wu a, so ɔbɛtra ase bio?” Ɛna ɔde mmuae a ɛhyɛ nkuran yi mae: “Anka wobɛfrɛ, na me nso magye wo so, anka w’ani begyina wo nsa ano adwuma no.” (Hiob 14:14, 15) Asɛmfua ‘anigyina’ no kyerɛ fe a obi fe obi denneenen anaa ɔpɛ a emu yɛ den. (Fa toto Dwom 84:2 ho.) Yiw, Yehowa hwɛ owusɔre no kwan deneennen—n’ani gyina sɛ ɔbɛsan ahu anokwafo a wɔawuwu a wɔwɔ n’adwenem nyinaa no.—Mateo 22:31, 32.

Yesu Kyerɛkyerɛ Owusɔre no Mu

 3, 4. (a) Dɛn na Yesu ma emu daa hɔ wɔ owusɔre ho anidaso no ho? (b) Dɛn nti na wɔannyan Yesu wɔ honam mu na mmom wonyan no honhom mu?

³ Ná tete mmarima anokwafo te sɛ Hiob nni owusɔre no mu ntease a edi mũ. Yesu Kristo na ɔbɛkyerɛkyerɛɛ anidaso nwonwaso yi mu ma emu daa hɔ paa. Ɔkyerɛɛ dwuma titiriw a n’ankasa di no mu bere a ɔkae sɛ: “Nea ogye ɔba no di no wɔ daa nkwa.” (Yohane 3:36) Ɛhefa na wobenya saa nkwa no? Wɔ nnipa dodow ara a wɔbɛkyerɛ gyidi no fam no, ɛbɛyɛ asase so. (Dwom 37:11) Nanso, Yesu ka kyerɛɛ n’asuafo no sɛ: “Kuw ketewa, munnsuro! Efisɛ ɛyɛ mo agya no fɛ sɛ ɔde ahenni no bɛma mo.” (Luka 12:32) Onyankopɔn Ahenni yɛ ɔsoro de. Ne saa nti, bɔhyɛ yi kyerɛ sɛ ɛsɛ sɛ “kuw ketewa” bi kɔka Yesu ho wɔ soro sɛ honhom abɔde. (Yohane 14:2, 3; 1 Petro 1:3, 4) Hwɛ sɛnea anidaso yi yɛ anigye fa! Afei Yesu maa ɔsomafo Yohane hui sɛ “kuw ketewa” yi dodow besi 144,000 pɛ.—Adiyisɛm 14:1.

⁴ Nanso ɔkwan bɛn so na 144,000 no bɛkɔ ɔsoro anuonyam mu? Yesu ‘nam asɛmpa no so ayi nkwa ne ade a ɛmporɔw adi hann mu.’ Ɔnam ne mogya no so buee “ɔkwan foforo a ɛwɔ nkwa” a ɛkɔ ɔsoro hokwan. (2 Timoteo 1:10; Hebrifo 10:19, 20) Nea edi kan no, owui, sɛnea Bible ka siei sɛ ɔbɛyɛ no. (Yesaia 53:12) Afei sɛnea ɔsomafo Petro kae akyiri yi no, “Yesu yi ara na Onyankopɔn anyan no.” (Asomafo no Nnwuma 2:32) Nanso wɔannyan Yesu sɛ ɔdesani. Ná waka sɛ: “Abodoo a mede bɛma no yɛ me honam a wɔde ma de gye wiase nkwa.” (Yohane 6:51, NW) Ne honam a ɔbɛsan afa no bɛma afɔrebɔ no asɛe. Enti “Wokum [Yesu] honam mu, na . . . wɔma ɔtraa ase honhom mu.” (1 Petro 3:18) Ne saa nti, Yesu ‘nyaa daa ogye maa yɛn,’ kyerɛ sɛ “kuw ketewa” no. (Hebrifo 9:12) Ɔde bo a ne nipadua a ɛyɛ pɛ no som sɛ agyede ma adesamma abɔnefo no kɔmaa Onyankopɔn, na 144,000 no na wodii kan nyaa eyi mu mfaso.

 5. Anidaso bɛn na wɔde maa Yesu akyidifo a wɔtraa ase wɔ afeha a edi kan no mu no?

⁵ Ɛnyɛ Yesu nkutoo na wobenyan no akɔ ɔsoro asetra mu. Paulo ka kyerɛɛ mfɛfo Kristofo a na wɔwɔ Roma no sɛ wɔde honhom kronkron asra wɔn sɛ, sɛ wogyina mu kodu awiei de di adanse sɛ wɔasra wɔn a, wɔbɛyɛ Onyankopɔn mma ne Kristo mfɛfo adedifo. (Romafo 8:16, 17) Afei nso Paulo kyerɛkyerɛɛ mu sɛ: “Sɛ yɛayɛ wɔn a wɔne ne wu sɛso aguam a, na yɛayɛ wɔn a wɔne ne sɔre sɛso nso aguam.”—Romafo 6:5.

Wogyinaa Owusɔre Anidaso no Akyi

 6. Dɛn nti na wɔkasa tiaa owusɔre anidaso no mu gyidi wɔ Korinto, na ɔsomafo Paulo yɛɛ n’ade dɛn wɔ ho?

⁶ Owusɔre no yɛ Kristosom mu “mfiase asɛm” no fã. (Hebrifo 6:1, 2) Nanso na wɔkasa tia nkyerɛkyerɛ no wɔ Korinto. Ná asafo no mufo bi a ɛda adi sɛ Helafo nyansapɛ anya wɔn so nkɛntɛnso no reka sɛ: “Awufo sɔre nni hɔ.” (1 Korintofo 15:12) Bere a ɔsomafo Paulo tee eyi ho asɛm no, obegyinaa owusɔre anidaso no akyi, titiriw no, Kristofo a wɔasra wɔn no anidaso no. Momma yɛnhwehwɛ Paulo nsɛm a wɔakyerɛw wɔ 1 Korintofo ti 15 no mu. Sɛnea wɔhyɛɛ ho nkuran wɔ asɛm a edi eyi anim no mu no, sɛ woakenkan ti no nyinaa a, ɛbɛboa wo.

 7. (a) (a) Ɔsɛmpɔw titiriw bɛn na Paulo twee adwene sii so? (b) Henanom na wohuu Yesu a wɔanyan no afi awufo mu no?

⁷ Wɔ 1 Korintofo ti 15 nkyekyem abien a edi kan no, Paulo kyerɛɛ nea ɔrebɛka ho asɛm: “Anuanom, merema moahu asɛmpa a mekaa mo, na mugyei nso, na mugyina mu nso, na wɔnam so gye mo nkwa nso. . . . Anyɛ saa de a, na moagye adi kwa.” Sɛ Korintofo no antumi annyina asɛmpa no mu pintinn a, na wɔagye nokware no kwa. Paulo toaa so sɛ: “Nsɛm a edi kan a me nso minyae a mede mehyɛɛ mo nsa ne sɛ: yɛn bɔne nti Kristo wui, sɛnea kyerɛw nsɛm no ka no. Na wosiee no, na ne nnansa, wonyan no, sɛnea kyerɛw nsɛm no ka no. Na ɔmaa Kefa huu no ansa na dumien no huu no. Ɛno akyi ɔmaa anuanom bɛboro ahannum huu no prɛko; wɔn mu pii da so tete ase, na ebinom nso adeda. Ɛno akyi ɔmaa Yakobo huu no ansa na asomafo no nyinaa huu no. Wɔn nyinaa akyi na ɔmaa me a mete sɛ nea wɔapatuw awo no nso huu no.”—1 Korintofo 15:3-8.

 8, 9. (a) Owusɔre no mu gyidi ho hia dɛn? (b) Bere bɛn na ɛbɛyɛ sɛ Yesu maa “anuanom bɛboro ahanum” huu no no?

⁸ Wɔ wɔn a na wɔagye asɛmpa no adi no fam no, na Yesu wusɔre no mu gyidi no nyɛ ankorankoro gyidi. Ná adansefo pii wɔ hɔ a wodii adanse sɛ “yɛn bɔne nti Kristo wui,” ne sɛ wɔanyan no afi awufo mu. Wɔn mu biako ne Kefa, anaa Petro, sɛnea wɔtaa frɛ no no. Ɛbɛyɛ sɛ hu a Yesu maa Petro huu no bere a na wɔapa no anadwo a woyii Yesu mae na wɔkyeree no akyi no kyekyee ne werɛ kɛse. Yesu a wɔanyan no afi awufo mu no kɔɔ “dumien no,” asomafo no, nso nkyɛn sɛ kuw—osuahu a akyinnye biara nni ho sɛ ɛboaa wɔn ma wodii ehu a na aka wɔn no so na ɛma wodii Yesu wusɔre no ho adanse akokoduru so.—Yohane 20:19-23; Asomafo no Nnwuma 2:32.

⁹ Afei nso Kristo maa kuw bi a wɔdɔɔso sen saa, “anuanom bɛboro ahannum” huu no. Esiane sɛ na Galilea nkutoo na na Yesu wɔ akyidifo a wɔdɔɔso saa nti, ɛbɛyɛ sɛ eyi ne bere a wɔkaa ho asɛm wɔ Mateo 28:16-20 no, bere a ɔde ahyɛde mae sɛ wɔnyɛ asuafo no. Hwɛ adanse a emu yɛ den ara a saafo yi de bɛma! Bere a Paulo kyerɛw ne krataa a edi kan yi kɔmaa Korintofo no, ná wɔn mu bi da so ara te ase wɔ 55 Y.B. Nanso hyɛ no nsow sɛ wɔkaa wɔn a na wɔawuwu no ho asɛm sɛ ‘wɔadeda.’ Ná wonnya nnyanee wɔn mma wɔn nsa nkaa wɔn soro akatua no ɛ.

10. (a) Dɛn na efii nhyiam a etwa to a Yesu ne n’asuafo yɛe no mu bae? (b) Ɔkwan bɛn so na Yesu maa Paulo huu no sɛ “nea wɔapatuw awo no”?

¹⁰ Onipa foforo a ohuu sɛ wɔanyan Yesu a na ɛda nsow ne Yakobo, Yesu maame Maria ne Yosef, babarima no. Ɛda adi sɛ Yakobo ammɛyɛ gyidini kosi sɛ wonyanee Yesu. (Yohane 7:5) Nanso bere a Yesu ma ohuu no akyi no, Yakobo bɛyɛɛ gyidini na ɛbɛyɛ sɛ ɔboa ma ne nuanom afoforo bɛyɛɛ gyidifo. (Asomafo no Nnwuma 1:13, 14) Wɔ Yesu ne n’asuafo no nhyiam a etwa to ase, bere a na ɔrebɛforo akɔ soro no, ɔhyɛɛ wɔn sɛ ‘wɔnyɛ adansefo nkɔpem asase ano nohoa.’ (Asomafo no Nnwuma 1:6-11) Akyiri yi, ɔmaa Saulo a ofi Tarso, a na ɔtaa Kristofo no huu no. (Asomafo no Nnwuma 22:6-8) Yesu yii ne ho adi kyerɛɛ Saulo te sɛ “nea wɔapatuw awo no.” Ná ɛte sɛ nea wɔanyan Saulo kɔ honhom asetra mu dedaw, na otumi huu Awurade a wɔahyɛ no anuonyam no mfehaha bi ansa na saa wusɔre no redu so. Osuahu yi maa Saulo gyaee ɔsɔretia a ano yɛ den a na ɔde ba Kristofo asafo no so no mpofirim, na ɔyɛɛ nsakrae a ɛda nsow. (Asomafo no Nnwuma 9:3-9, 17-19) Saulo bɛyɛɛ ɔsomafo Paulo, Kristofo gyidi no akyitaafo atitiriw no mu biako.—1 Korintofo 15:9, 10.

Owusɔre no Mu Gyidi Hia

11. Ɔkwan bɛn so na Paulo paa nsusuwii hunu a ɛne sɛ, “Awufo sɔre nni hɔ” no ho ntama?

¹¹ Enti Yesu wusɔre no yɛ nokwasɛm a wɔde ho adanse pii ama. Paulo ka sɛ: “Sɛ wɔka Kristo ho [asɛm] sɛ wɔanyan no afi awufo mu a, adɛn na mo mu binom ka sɛ: Awufo sɔre nni hɔ?” (1 Korintofo 15:12) Ɛnyɛ sɛ na saafo no adwenem yɛ wɔn naa anaasɛ wɔnte owusɔre no ase kɛkɛ, na mmom na wɔreka pefee sɛ wonni mu gyidi. Enti Paulo pa wɔn nsusuwii hunu no ho ntama. Ɔka sɛ sɛ wɔannyan Kristo a, ɛnde Kristofo asɛm no yɛ atoro, na wɔn a wodii Kristo wusɔre no ho adanse no yɛ “Onyankopɔn ho adansekurumfo.” Sɛ wɔannyan Kristo a, ɛnde na anka wontuaa agyede biara mmaa Onyankopɔn; anka Kristofo ‘da so ara wɔ wɔn bɔne mu.’ (1 Korintofo 15:13-19; Romafo 3:23, 24; Hebrifo 9:11-14) Na anka Kristofo a ‘wɔadeda’ wɔ owu mu, a ebinom wuwui sɛ mogya dansefo no, awu a wonni anidaso papa biara. Sɛ saa asetra yi ara na Kristofo hwɛ kwan a, hwɛ sɛnea anka wɔbɛyɛ mmɔbɔ afa! Anka wɔn amanehunu no nyinaa bɛyɛ ɔkwa.

12. (a) Kristo a wɔfrɛ no “wɔn a wɔadeda no mu aba a edi kan” no kyerɛ dɛn? (b) Ɔkwan bɛn so na Kristo buee owusɔre ho kwan?

¹² Nanso na ɛnyɛ saa na asɛm no te. Paulo toa so sɛ: “Wɔanyan Kristo afi awufo mu.” Afei nso, ɔyɛ “wɔn a wɔadeda no mu aba a edi kan.” (1 Korintofo 15:20) Bere a Israelfo no fi osetie mu de wɔn nnɔbae mu aba a edi kan maa Yehowa no, Yehowa hyiraa wɔn ma wotwaa nnɔbae bebree. (Exodus 22:29, 30; 23:19; Mmebusɛm 3:9, 10) Ɛdenam frɛ a Paulo frɛ Yesu “aba a edi kan” no so no, ɔkyerɛ sɛ wobenyan afoforo nso afi awufo mu akɔ ɔsoro asetra mu sɛ aba foforo a wobetwa. Paulo ka sɛ: “Sɛnea ɛnam onipa so na owu bae no, sɛ nso awufo sɔre nam onipa so bae ne no. Na sɛnea wɔn nyinaa wu Adam mu no, sɛ nso wɔn nyinaa benya nkwa Kristo mu ne no.” (1 Korintofo 15:21, 22) Yesu nam ne desani nkwa a ɛyɛ pɛ a ɔde mae sɛ agyede no so buee owusɔre ho kwan, na ɔmaa adesamma nyaa hokwan dee wɔn ho fii bɔne ne owu nkoayɛ ho.—Galatifo 1:4; 1 Petro 1:18, 19.a

13. (a) Bere bɛn na ɔsoro wusɔre no fi ase? (b) Ɔkwan bɛn so na wɔn a wɔasra wɔn no binom ‘renna wɔ owu mu’?

¹³ Paulo toa so sɛ: “Na obiara wɔ ne dibea: Kristo ne aba a edi kan, ansa na wɔn a wɔyɛ Kristo dea [ne ba] mu no di hɔ.” (1 Korintofo 15:23) Wonyanee Kristo fii awufo mu wɔ 33 Y.B. mu. Nanso, na ɛsɛ sɛ n’akyidifo a wɔasra wɔn—“wɔn a wɔyɛ Kristo dea”—no twɛn kosi Yesu mmae wɔ adedi mu, a Bible nkɔmhyɛ kyerɛ sɛ esii wɔ 1914 mu no, akyi bere tiaa bi. (1 Tesalonikafo 4:14-16; Adiyisɛm 11:18) Na wɔn a saa mmae no bɛba abɛto wɔn sɛ wonwuwui no nso ɛ? Paulo ka sɛ: “Hwɛ, meka mo ahintasɛm: Yɛn nyinaa renna, na yɛn nyinaa bɛsakra afrɛ so, amonom, akyiri torobɛnto no hyɛn so; na ɔbɛhyɛn torobɛnto, na awufo no anyan sɛ wɔn a wɔmporɔwee da, na yɛn de, yɛbɛsakra.” (1 Korintofo 15:51, 52) Ɛda adi sɛ ɛnyɛ wɔn a wɔasra wɔn nyinaa na wɔbɛda ɔdamoa mu atwɛn owusɔre. Wɔsakra wɔn a wowu wɔ Kristo mmae no mu no amonom hɔ ara.—Adiyisɛm 14:13.

14. Ɔkwan bɛn so na ‘wɔbɔ wɔn a wɔasra wɔn no asu sɛ awufo’?

¹⁴ Paulo bisa sɛ: “Na anka wɔn a wɔma wɔbɔ wɔn asu sɛ awufo no, wɔyɛ de gye dɛn? Sɛ awufo nnyan koraa a, ɛdɛn nti na wɔma wɔbɔ wɔn asu saa? Adɛn na yɛn nso, amane siane yɛn dɔn biara?” (1 Korintofo 15:29, 30, NW) Ná Paulo nkyerɛ sɛ wɔbɔ ankorankoro a wɔte ase asu ma awufo, sɛnea Bible asekyerɛfo binom ma ɛyɛ no. Sɛ biribiara da nkyɛn a, asubɔ fa Kristofo asuafoyɛ adwuma ho, na akra a wɔawuwu ntumi mmɛyɛ asuafo. (Yohane 4:1) Mmom no, na Paulo reka Kristofo a wɔte ase, a te sɛ Paulo no, ‘dɔn biara na amane siane wɔn’ mu pii. Wɔbɔɔ Kristofo a wɔasra wɔn ‘asu kɔɔ Kristo wu mu.’ (Romafo 6:3) Sɛnkyerɛnne kwan so no, efi bere a wɔsraa wɔn no, ‘wɔbɔɔ wɔn asu’ kɔɔ tebea a ɛbɛkɔ akowie owu te sɛ Kristo de no mu. (Marko 10:35-40) Ná wobewu a wɔwɔ ɔsoro wusɔre a anuonyam wom ho anidaso.—1 Korintofo 6:14; Filipifo 3:10, 11.

15. Amane bɛn na ɛbɛyɛ sɛ Paulo hyiae, na ɔkwan bɛn so na owusɔre mu gyidi no boaa no ma ogyinaa ano?

¹⁵ Afei Paulo kyerɛkyerɛ mu sɛ amane a ɛte saa sianee n’ankasa koduu baabi a otumi kae sɛ: “Miwu da biara.” Sɛnea ɛbɛyɛ a ebinom mmɔ Paulo sobo sɛ ɔregugu nsɛm mu no, odi kan ka sɛ: “Meka mo ho ahoahoa a mewɔ no yɛn Awurade Kristo Yesu mu.” The Jerusalem Bible no ka nkyekyem yi sɛ: “Anuanom, mihyia owu da biara da, na metumi agyina mo ho ahohoahoa a mewɔ yɛn Awurade Kristo Yesu mu so aka ho ntam.” Sɛ́ asiane a Paulo hyiae ho nhwɛso no, ɔka wɔ nkyekyem 32 sɛ “ɔne mmoa koe Efeso.” Mpɛn pii no, na Romafo no nam nsɛmmɔnedifo a wɔde wɔn ma mmoa a wɔyɛ keka wɔ agumadibea so kunkum wɔn. Sɛ Paulo ne mmoa ankasa na ɛkoe a, ɛnde na ɛnam Yehowa mmoa nkutoo so na otumi dii nkonim. Sɛ owusɔre anidaso no nni hɔ a, anka asetra kwan a ɛde no to asiane a ɛte saa mu a ɔbɛpaw no bɛyɛ nea nyansa nnim ankasa. Sɛ ɛnyɛ daakye asetra ho anidaso a, anka ahokyere ne afɔrebɔ ahorow a ɛbata Onyankopɔn som ho no bɛyɛ nea mfaso titiriw biara nnim. Paulo ka sɛ: “Awufo nnyan a, ɛnde momma yennidi na yɛnnom, na ɔkyena na yɛawu.”—1 Korintofo 15:31, 32; hwɛ 2 Korintofo 1:8, 9; 11:23-27.

16. (a) Ɛhefa na ɛbɛyɛ sɛ asɛm “momma yennidi na yɛnnom, na ɔkyena na yɛawu” no fi bae? (b) Asiane bɛn na na ɛwɔ nsusuwii yi a obi begye atom no mu?

¹⁶ Ɛbɛyɛ sɛ Paulo faa Yesaia 22:13 asɛm a ɛkyerɛkyerɛ nkrabea ho adwene a na Yerusalemfo asoɔdenfo no kura no mu asɛm na ɛkae. Anaasɛ ebia na Epikurofo a wonni owu akyi asetra ho anidaso biara, na wogye di sɛ asetra mu ade titiriw ara ne honam mu anigye no ho adwene na na ɛwɔ ne tirim. Sɛnea ɛte biara no, “yennidi na yɛnnom” adwene no mfi Onyankopɔn. Enti Paulo bɔ kɔkɔ sɛ: “Mommma wɔnnaadaa mo. Fekubɔne sɛe ɔbra a mfaso wɔ so.” (1 Korintofo 15:33, NW) Wɔn a wonnye owusɔre nni a wɔne wɔn bɛbɔ fekuw no betumi adi awu. Ɛbɛyɛ sɛ fekubɔ a ɛte saa ka ho bi na nsɛnnennen te sɛ aguamammɔ, mpaapaemu, asɛnnibea a wɔde wɔn mfɛfo kɔ, ne obu a na wɔnkyerɛ mma Awurade Anwummeduan a Paulo dii ho dwuma wɔ Korinto asafo no mu no sɔree.—1 Korintofo 1:11; 5:1; 6:1; 11:20-22.

17. (a) Afotusɛm bɛn na Paulo de maa Korintofo no? (b) Nsɛmmisa bɛn na aka a yebesusuw ho?

¹⁷ Enti Paulo de nkuranhyɛsɛm a eye yi ma Korintofo no: “Montew mo ani yiye, na monnyɛ bɔne, efisɛ ebinom nni Nyankopɔn ho nimdeɛ; meka eyi mehyɛ mo aniwu.” (1 Korintofo 15:34) Owusɔre ho adwempa a na wonni no maa ebinom yɛɛ tebɔɔ wɔ honhom mu te sɛ nea wɔaboro nsa. Ná ehia sɛ wonyan, na wɔn ani da hɔ. Saa ara nso na ehia sɛ Kristofo a wɔasra wɔn nnɛ no tew wɔn ani na wɔamma wiase no adwenem a ayɛ wɔn naa no annya wɔn so nkɛntɛnso. Ɛsɛ sɛ wokura ɔsoro wusɔre anidaso no mu denneennen. Nanso na nsɛmmisa da so ara wɔ hɔ—ma Korintofo a na wɔwɔ hɔ saa bere no, ne yɛn a yɛwɔ hɔ nnɛ yi. Sɛ nhwɛso no, tebea bɛn mu na wonyan 144,000 no kɔ soro? Na afoforo ɔpepem pii a wɔda so ara wɔ adamoa mu a wonni ɔsoro anidaso no nso ɛ? Dɛn na owusɔre no bɛkyerɛ ama saafo no? Yɛbɛhwehwɛ Paulo nsɛm a aka a ɔka fa owusɔre ho no mu wɔ yɛn asɛm a edi hɔ no mu.

[Ase hɔ asɛm]

So Wokae?

◻ Dɛn na Yesu maa emu daa hɔ wɔ owusɔre ho anidaso no ho?

◻ Kristo wusɔre no ho adansefo binom ne henanom?

◻ Dɛn nti na wɔkasa tiaa owusɔre nkyerɛkyerɛ no, na dɛn na Paulo yɛɛ wɔ ho?

◻ Dɛn nti na na owusɔre no mu gyidi ho hia ma Kristofo a wɔasra wɔn?

[Kratafa 15 mfonini]

Yairo babea no bɛyɛɛ owusɔre no ho adanse

[Mfonini wɔ kratafa 16, 17]

Sɛ owusɔre anidaso no nni hɔ a, anka mfaso biara remma nokware Kristofo mogya dansefo wu no so