“Na Kristo Mu Awufo Bɛsɔre Kan”

 1. Dɛn nti na sɛ adesamma a wɔawuwu no betumi atra nkwa mu da bi wɔ baabi a ɛnde na wohia owusɔre no, na ɔkwan bɛn so na Onyankopɔn de nhyɛase a ehia ma owusɔre no too hɔ?

SƐ ƐNYƐ owusɔre ho bɔhyɛ no a, anka anidaso bɛn na ɛwɔ hɔ ma adesamma a wɔawuwu no? Awufo no wusɔre ho hia yiye efisɛ ɔdesani kra no nyɛ nea enwu. Enti, sɛ nipadua no wu a, entumi nkɔ asetra bi a ɛkorɔn mu wɔ wiase bi a wonhu hɔ mu. (Hes- 18:4, 20; Yes. 53:12) Sɛ adesamma a wɔawuwu no betumi atra ase wɔ baabi bio a ɛnde na wohia owusɔre. Ɛno nti na Onyankopɔn de nhyɛase bi ato hɔ sɛ anwonwade a ɛte sɛɛ bɛba wɔ ne bere mu. Bere a onyan ne Ba a ɔde ne ho bɔɔ afɔre no fii awufo mu wɔ da a ɛto so abiɛsa no so no, obuee kwan maa ne ba a ɔfata yi na waforo akɔ soro faako a na ɔwɔ kan no. Ne Ba no de ne desani afɔrebɔ bo a edi mu no kaa ne ho kɔe. Yesu Kristo renwu da bi bio da. Ɔde ɔdesani nipadua biako bɔɔ afɔre maa adesamma bɔne prɛko de kosii daa. Enti sɛ ɔba nea ɛto so abien no a, ɛrenkyerɛ sɛ ɔrebehyia owu.​—Heb. 9:28; Rom. 6:9.

 2. Ɔkwan bɛn so na 1 Korintofo 15:22, 23 kyerɛ sɛ Onyankopɔn di nhyehyɛe a edidi so so wɔ owusɔre no mu?

² Yehowa Nyankopɔn di nhyehyɛe bi akyi wɔ awufo no wusɔre mu. Ɔsomafo Paulo a n’ankasa huu Yesu a wɔanyan no no anuonyam na ɔne no kasae no twee yɛn adwene kɔɔ eyi so. Eyi akyi mfirihyia 18 no, Paulo kyerɛw krataa kɔmaa Kristofo asafo a ɛwɔ Korinto, Hela no, ɛna obisaa asɛm yi: “Na sɛ wɔka Kristo ho sɛ wɔanyan no afi awufo mu a, adɛn na mo mu binom ka sɛ: Awufo sɔre nni hɔ?” (1 Kor. 15:12) Paulo kɔɔ so kyerɛkyerɛɛ saa asemmisa yi mu na ɔde mmuae a efi honhom mu mae. Bere a ɔrekɔ so no ɔkae sɛ: “Na sɛnea wɔn nyinaa wu Adam mu no, sɛ nso wɔn nyinaa benya nkwa Kristo mu ne no. Na obiara wɔ ne dibea: Kristo ne aba a edi kan, ansa na wɔn a wɔyɛ Kristo dea ne bá [Hela: parousia] mu no di hɔ” (1 Kor. 15:22, 23) Onyankopɔn nkutoo na onyan Yesu fii awufo mu.

 3. Ɔkwan bɛn so na Yesu bɛyɛɛ ‘nea odi kan’ wɔ owusɔre ho asɛm no mu?

³ Wonyan Yesu Kristo wɔ Nisan 16, afe 33 Y.B. mu, da a Yudafo sɔfo panyin no de atoko aba a edi kan bɔ afɔre no. Eyi ne yɛ a Yesu yɛ aba a edi kan” wɔ adesamma a wɔawuwu no mu nea odii kan sɔre fii awufo mu no hyia pɛpɛɛpɛ. (1 Kor.15:20) Eyi de Yesu Kristo ba “dibea” a edi kan no mu. Sɛnea na ɛte wɔ Yudafo atoko twa bere mu a wotwa aba a edi kan no, saa ara nso na ɛsɛ sɛ wonya aba a edi kan nso wɔ awufo sɔre no mu. Nanso esiane sɛ Yesu Kristo na odi kan wɔ eyi mu nti, Paulo frɛɛ no “awufo mu abakan, sɛ onni ade nyinaa mu kan.”​—Kol. 1:18.

 4. Ɛsɛ sɛ adesamma a wodii kan wuwui no wusɔre mpo twɛn de kosi sɛ bere pɔtee bɛn befi ase na bere bɛn na eyi fii ase?

⁴ Yesu Kristo nam n’afɔrebɔ wu no so san tɔɔ adesamma anaasɛ ogyee adesamma abusua no nyinaa a wɔrewu “wɔ Adam mu” no. Enti wɔn nyinaa “yɛ Kristo dea.” Nanso, ɛsɛ sɛ adesamma a wɔawuwu no mu wɔn a wobedi kan anyan wɔn no twɛn de akosi bere a Yesu Kristo ‘ba a waba’ anaasɛ parousia no afi ase akyi ansa. Ne ba a waba yi na efi ne ba a ɛto so abien no ase. Sɛnea “sɛnkyerɛnne” a Yesu kaa ho asɛm siei no ne afei nso sɛnea Bible mu bere bu kyerɛ no, ne ‘ba a waba” anaasɛ parousia a wonhu no no fii ase wɔ afe 1914 Y.B. twabere mu.​—Mat. 24:3.a

 5, 6. Ɔkwan bɛn so na 1 Tesalonikafo 4:13-17 kyerɛ sɛ Onyankopɔn bedi “dibea” bi a wɔahyehyɛ akyi wɔ wɔn a wowu wɔ “Adam mu” a wɔboaboa wɔn ano no mu?

⁵ Yehowa Nyankopɔn bedi nhyehyɛe ne “dibea” akyi wɔ wɔn a wɔrewu “wɔ Adam mu” no wusɔre no mu ne afei nso wɔ wɔn a wɔboa boa wɔn ano sɛ owusɔre no mu aba a edi kan no de nso mu. Sɛnea ɛbɛyɛ na ɔde bɛkyekye wɔn a wɔn nkurɔfo ‘adeda wɔ owu mu denam Yesu so’ no werɛ titiriw no, ɔsomafo Paulo kyerɛwee sɛ:

⁶ “Na eyi ne nea yɛnam Yehowa asɛm so ka kyerɛ mo, sɛ yɛn a yɛtete ase [Kristofo a wɔde honhom awo wɔn] na yɛreka akosi bere a Awurade aba no renni wɔn a wɔadeda owu mu [Kristofo a wɔde honhom awo wɔn] no anim efisɛ Awurade ankasa de ɔhyɛ-frɛ [ɔhyɛ a ano yɛ den, NIV],b ɔbɔfo panyin nne ne Onyankopɔn torobɛnto fi soro besian, na wɔn a wɔawuwu Kristo mu no bɛsɔre kan. Ɛno akyi no, yɛn a yɛtete ase na yɛaka no, wɔbɛfa yɛne wɔn nyinaa amununkum mu akɔ ma yɛakohyia Awurade wɔ wim, na saa na yɛne Awurade bɛtra daa.”​—1 Tes. 4:13-17, NW.

 7. Awufo pɔtee bɛn na Paulo ka wɔn ho asɛm wɔ hɔ no, na ɔkwan bɛn so na Adiyisɛm 14:12, 13 kyerɛ sɛ bere pɔtee bi wɔ hɔ a wɔde benyan wɔn?

⁷ Ɛnyɛ adesamma nyinaa a wɔawuwu no ho asɛm na ɔsomafo Paulo reka wɔ ha no; na mmom “wɔn a wɔadeda owu mu”​—denam Kristo so no,“wɔn a wɔawuwu Kristo mu no.” Ɔsomafo Yohane wɔ biribi ka fa bere a wobenyan Kristofo a wɔte sɛɛ a wɔawuwu no afi wɔn nna mu no ho wɔ Bible mu nhoma a etwa to no mu. Yohane kyerɛwee wɔ Adiyisɛm 14:12, 13, (NW) sɛ: “Ɛha [nea ɛfa wiase ahyehyɛde a egyina hɔ ma amanaman ntam asomdwoe ne dwoodwoo asetra ho] na ahotefo boasetɔ wɔ, wɔn a wokura Onyankopɔn ahyɛde ne Yesu gyidi mu no. Na metee nne bi soro a ɛkae sɛ: ‘Kyerɛw: Awufo a wowu Awurade mu fi saa bere yi rekɔ no wɔ anigye. Honhom no se: Yiw, ma wɔnhome mfi wɔn brɛ mu, na nneɛma a woyɛe no ne wɔn kɔ prɛko.’” Enti, afei, “fi saa bere yi rekɔ no” kyerɛ bere bɛn?

 8. Dɛn nti na “fi saa bere yi rekɔ no” kyerɛ bere a Awurade aba wɔ honhom mu no, na so wɔn wu no twa nneɛma a wɔyɛ no so anaa?

⁸ Wɔ nea ɔsomafo Paulo kyerɛwee wɔ 1 Tesalonika 4:16, 17 no nti ɛsɛ sɛ ɛyɛ Yesu Kristo ‘ba a waba’ anaasɛ parousia no mu, ɛnyɛ ansa na afi ase, na mmom bere a afi asie akyi. Wɔ bere a waba wɔ honhom mu a wonhu no no mpo mu no Kristofo a wɔde honhom awo wɔn bɛtra asase so a wɔbɛdan ‘awufo a wowu wɔ ne ‘ba a waba’ no mu nti. Wɔn wu wɔ ɔhonam mu ntwa “nneɛma a wɔyɛe” no so bere tenten bi. Dɛn nti na ɛnte saa? Efisɛ “nneɛma a wɔyɛe no ne wɔn kɔ prɛko,” anaasɛ, sɛnea Hela nkyerɛwee no kyerɛ ankasa no ‘edi wɔn akyi.’

 9. Ɛnde dɛn nti na “akronkronfo” a wowu saa bere no yɛ wɔn a wɔwɔ “anigye” sɛnea Adiyisɛm 14:13 kyerɛ no?

⁹ Eyi hwehwɛ nsakrae wɔ dwumadi mu, efi nnwuma a wɔyɛ wɔ ɔhonam mu wɔ asase so kɔ nnwuma a wɔyɛ wɔ honhom mu wɔ ɔsoro atrae hɔ. Wɔ wɔn a wɔyɛ “awufo a wowu Awurade mu” no fam no, ɔsomafo Paulo kae sɛ: “Sɛ nso awufo sɔre te ne no. Wodua no porɔwee mu, ebenyan nea ɛmporɔw mu. Wodua no nea enni nidi mu, ebenyan anuonyam mu. Wodua no mmerɛw mu, ebenyan tumi mu. Wodua ɔkra nipadua, ebenyan ayɛ honhom nipadua. Ɔkra nipadua wɔ hɔ na honhom nipadua wɔ hɔ.” (1 Kor. 15:42-44) Enti awufo a wɔanyan wɔn a wɔyɛ wɔn a wɔwɔ “anigye” yi de nnwuma wɔ honhom mu nipadua mu di wɔn “brɛ” nnwuma wɔ asase so no akyi wɔ honhom mu atrae hɔ. Ɛho nhia sɛ wɔkɔ so da wɔ owu mu a wɔretwɛn Kristo ba no.

NEA AWURADE DE SIAN FI SORO

10. Dɛn na Awurade Yesu Kristo de besian afi soro saa bere no ama n’asuafo a wɔde honhom awo wɔn no wusɔre?

¹⁰ Ɔsomafo Paulo ka nea ɛka sian a Awurade sian fi soro ba wɔ honhom mu no ho no ho asɛm kyerɛ yɛn sɛ: “Yɛn a yɛtete ase na yɛreka akosi bere a Awurade aba [parousia] no renni wɔn a wɔadeda owu mu no anim [wɔ owusɔre a wɔn nsa ka wɔ honhom mu no mu] nkɔ, efisɛ Awurade ankasa de ɔhyɛfrɛ, de ɔbɔfo panyin nne ne Onyankopɔn torobɛnto fi soro besian, na wɔn a wɔawuwu Kristo mu no bɛsɔre kan.”​—1 Tes. 4:15, 16, NW.

11. Ɛhefo na wɔte Awurade Yesu Kristo “ɔhyɛ-frɛ” a ɔde sian fi soro ma wotie no no?

¹¹ Ɛhefo na wɔte “ɔhyɛ-frɛ” a Awurade Yesu Kristo de fi ne soro dibea no mu wɔ Onyankopɔn nsa nifa sian ba fam no? Ɛda adi pefee sɛ ɛyɛ Kristofo a wɔde honhom awo wɔn a de besi saa bere no na wɔawuwu wɔ “Kristo mu” no. Yenim sɛ adesamma a wɔte asase so no mu biara ntee ne nne ankasa da, efi bere a ɔhyɛn ne ‘ba a waba’ anaasɛ parousia a wonim no no mu a efii ase wɔ 1914 twabere mfiase mu no. Nanso “Kristo mu awufo” no tee ne nne na wotiee no.

12. (a) Bere bɛn na “ɛda a edi akyiri” a Yesu kaa ho asɛm wɔ Yohane 6:53, 54 no fi ase, na ɔkwan bɛn so na saa asuafo no hyɛm “daa nkwa” mu? (b) Ɛsono eyi wɔ da foforo bɛn a wɔfrɛ no “da a edi akyiri” no ho?

¹² Enti wɔn a Yesu Kristo nyan wɔn saa no ka asuafo a ɔkaa wɔn ho asɛm sɛɛ no ho: “Sɛ moanni onipa ba no honam na moannom ne mogya a, munni nkwa mo mu. Nea odi me honam na ɔnom me mogya no wɔ daa nkwa [efi bere a wonyan no fii awufo mu], na menyan no ɛda edi akyiri no.” (Yoh. 6:53, 54) Tumi kɛse wɔ ne “hyɛ-frɛ” a ɔde benyan n’asuafo a wɔanya kyɛfa wɔ saa hokwan titiriw a ɛfa ne honam ne ne mogya ho no mu afi owu nna mu wɔ saa “ɛda a edi akyiri” no mu. “Ɛda a edi akyiri no” fi ase ma saa asuafo a wɔanya hokwan no wɔ bere a wɔhyɛn “daa nkwa” mu wɔ ɔsoro, denam “honhom nipadua” a wode nyan wɔn te sɛ Kristo de no so. Esiane sɛ saa “ɛda a edi akyiri” yi fa Kristofo anokwafo a wɔde honhom awo wɔn a wɔwɔ ɔsoro anidaso no wusɔre ho nti, ɛsono ɛno wɔ “ɛda a edi akyiri” a na ɛwɔ Marta a ofi Betania no adwene mu no ho, efisɛ na onni honhom mu wusɔre a ɛde kɔ ɔsoro no ho adwene bi koraa.

13. (a) Ɛhena nne na “Kristo mu awufo” no te, na hena ne “ɔbɔfo panyin” no? (b) Kyerɛwnsɛm bɛn na yɛwɔ a edi eyi ho adanse?

¹³ Awurade Yesu Kristo a wɔahyɛ no anuonyam no nso de “ɔbɔfo panyin nne” na esian. Eyi yɛ n’ankasa ne nne. Ɔno ne “ɔbɛfo panyin” no. Yesu de n’ankasa ho too ɔbɔfo panyin ho wɔ ne bɛ a ɛfa nguanten ne mpapo ho no mu sɛ: “Na onipa ba no bɛba n’anuonyam mu a n’abɔfo nyinaa ka ne ho, ɔbɛtra n’anuonyam ahengua so. Na wɔbɛboaboa amanaman nyinaa ano n’anim.” (Mat. 25:31, 32) Bere a ɔmmaa asase so a na ɔwɔ soro no na ne din ne Mikael. Akyinnye biara nni ho sɛ na ɔno ne nea wɔaka ne ho asɛm wɔ nkɔmhyɛ a ɛwɔ Daniel 12:1, 2 a ɛbae ansa na Kristofo mmere no reba no: “Bere no mu na Mikael, ɔbapɔmma kɛse a ogyina hɔ ma wo [Daniel] man mma no bɛsɔre agyina; na ɛbɛyɛ ahohia bere a, efii sɛ ɔman bae no besi bere no so ɛmmae da, na ɛbere no mu na wobegye wo manfo afi mu, obiara a wobehu sɛ wɔakyerɛw ne din nhoma no mu no. Na wɔn a wɔadeda fam dɔte mu no bebree benyan, ebinom akɔ daa nkwa mu na, ebinom akɔ ahohorade ne daa ahiyɛ mu.”

14. Adiyisɛm 12:7 kyerɛ sɛ ɔbɔfo panyin no din yɛ dɛn, na ɔkwan bɛn so na Yuda 9 ka akameakame a bere bi oyi ne obi dii no ho asɛm?

¹⁴ Afei nso, Adiyisɛm 12:7 kyerɛ sɛ abɔfo no hyɛ Mikael ase, sɛ: “Na ɔko baa ɔsoro. Mikael ne n’abɔfo [ɛnyɛ Kristofo a wɔde honhom awo wɔn a wɔanyan wɔn no] koe.” Afei nso Yuda 9 ka ne ho asɛm sɛ ɔbɔfo panyin sɛ: “Ɔbɔfo panyin Mikael ne ɔbonsam redi akameakame kasakasae Mose amu no ho.” Ɔbonsam nsa anka amu no.

15. Dɛn na ɛtoo Satan Ɔbonsam wɔ ɔko a ɔne ɔbɔfo panyin Mikael koe no mu, na so obetumi asiw Kristo asuafo no wusɔre ne foro a wɔbɛforo akɔ soro na wɔne Yesu Kristo akɔtra no kwan?

¹⁵ Satan Ɔbonsam di nkogu bere nyinaa wɔ akameakame a wofi teteete adi no mu. Ɔne n’adaemone abɔfo no dii nkogu wɔ ɔko a ɛbaa ɔsoro no mu, na wofii hɔ tow ɔne n’adaemone abɔfo no guu yɛn asase yi nkyɛn baabi, wɔ bere a ɔbɔfo panyin Mikael a ɔne Awurade Yesu Kristo abɔfo no dii nkonim wɔ ɔsoro. Esiane sɛ nkonimdifo Yesu Kristo de “ɔbɔfo panyin nne” di dwuma bere a ɔhyɛ wɔn a wowuwui wɔ Kristo mu no sɛ womfi adi nti, ne “ɔhyɛfrɛ” no wɔ tumi kɛse na ɛwɔ ahoɔden na edi dwuma kɛse nso. Afei nso, Satan Ɔbonsam a wadi nkogu no nni tumi a ɛdɔɔso a obetumi de asiw wɔn a wɔawuwu wɔ Kristo mu no honhom mu wusɔre no kwan, na ɔrentumi nsiw wɔn ɔsoro atrae hɔ a wɔbɛhyɛn no nso kwan anaasɛ foro a wɔbɛforo akɔ soro na wɔne Yesu Kristo nkonimdifo no akɔtra no kwan.

16. Atirimpɔw bɛn nti na wɔhyɛn “Nyankopɔn torobɛnto” no wɔ bere a Awurade sian fi soro no, na ɛhefo na wɔbɛyɛ wɔn a wodi kan a wobegye so?

¹⁶ Biribi foforo a ɛka sian a Kristo fi soro sian ba no ho ne “Onyankopɔn torobɛnto” nnyigyei. (1 Tes. 4:16) Torobɛnto a ɛwɔ eyi mu no nyɛ ɔko ho sɛnkyerɛnne a wɔde boaboa asraafo ano ma ɔko na wɔakokunkum atamfo. Mmom, “Onyankopɔn torobɛnto” no hyɛn yɛ asomdwoe de a wɔde boaboa Yehowa nkurɔfo ano, te sɛ nea wɔhyɛn dwetɛ ntorobɛnto abien wɔ Mose nna mu de boaboa Israel mmusua kuw 12 no ano no. (Num. 10:1-10) Beae foforo a ɔsomafo Paulo de saa “torobɛnto” a wɔde kanyan nnipa boaboa wɔn ano hyia no to Kristofo a wɔawuwu no wusɔre ho nso ne nea ɛwɔ 1 Korintofo 15:52 no, faako a ɛka sɛ: “Akyiri torobɛnto no hyɛn so; na ɔbɛhyɛn torobɛnto, na awufo no anyan sɛ wɔn a wɔmporɔwee da, na yɛn de, yɛbɛsakra.” Ɛhefo ne wɔn a wodi kan a wobegye saa “akyiri torobɛnto” no so, bere a, sɛ́ “Onyankopɔn torobɛnto” no, egyigye ma wɔde boaboa awufo no ano ba nkwa mu bio no? Wɔ mmuaema mu no 1 Tesalonikafo 4:16 ka sɛ: “Na Kristo mu awufo bɛsɔre kan.”

17. Dɛn nti na “Kristo mu awufo” no wusɔre no yɛ nea ɔdesani aniwa nhu?

¹⁷ Nanso saa “Kristo mu awufo” no wusɔre no yɛ nea adesamma a wɔwɔ asase so no nhu. Dɛn ntia? Efisɛ wɔde honhom mu wusɔre hyira wɔn, wɔde “honhom nipadua” nyan wɔn mu biara. (1 Kor. 15:44) Esiane sɛ ɔdesani aniwu nyɛ den sɛnea ebetumi ahu honhom mu nipadua nti, “Kristo mu awufo” no wusɔre yɛ nea adesamma nhu. Ɛno nti na efi Kristo ‘ba a waba’ anaasɛ parousia no mfiase wɔ 1914 reba yi, adesamma nhuu no anaasɛ wonnim sɛ n’asuafo no wusɔre rekɔ so no.

18, 19. (a) Wɔ nea Paulo kae wɔ 1 Tesalonikafo 4:17 no nti, so ɔkyerɛ sɛ saa Kristofo no renwu ansa na’wɔaba abɛfa wɔn akɔ’ anaa? (b) Ɛnde ntease bɛn mu na’wɔba bɛfa wɔn kɔ,’ na nipadua bɛfa wɔn kɔ,’ na nipadua bɛn mu na wɔde foro kɔ soro kohyia wɔn Awurade no wɔ anigye mu?

¹⁸ Ɔsomafo Paulo ka n’ankasa ho asɛm te sɛ obi a ɔbɛtra asase so ara de akosi saa Kristofo a wofi honhom mu awo wɔn no anigye bere no, bere a ɔkae sɛ: “Ɛno akyi no yɛn a yɛtete ase a yɛaka no, wɔbɛfa yɛne wɔn nyinaa amununkum mu akɔ ma yɛakohyia Awurade wɔ wim; na saa na yɛne Awurade bɛtra daa.” (1 Tes. 4:17, NW.)

¹⁹ Ɔsomafo Paulo nkyerɛ wɔ ha sɛ Kristofo a wɔde honhom awo wɔn a wɔte sɛ n’ankasa no renwu na mmom “wɔbɛfa” wɔn ne wɔn desani nipadua nyinaa akɔ wim wɔ amununkum ankasa mu. Paulo wui. Na ɛsɛ sɛ Kristofo a wɔde honhom awɔ wɔn a ɛnnɛ wɔda so wɔ nkwa mu wɔ Kristo ‘ba a waba’ anaasɛ parousia no mu no nso wu. Ɛsɛ sɛ ‘wodua wɔn ɔkra nipadua’ te sɛ aba a wodua wɔ fam, denam wɔn desani wu so. (1 Kor. 15:44) Ɛnde na ɔkwan bɛn so na ‘wɔbɛfa wɔn wɔ amununkum mu akɔ’ a wɔn a wɔyɛ “Kristo mu awufo” a wodii kan nyan wɔn no nso ka ho no? Wɔ ɔkwan yi so: Sɛ wodua wɔn sɛ ɔkra nipadua a, wɔnhyɛn owu nna mu. Wɔn nsa ka honhom mu wusɔre amonom hɔ ara na wogyaw wɔn desani nipadua no wɔ wɔn akyi wɔ asase so, na wɔde “honhom nipadua” nyan wɔn mu biara. Enti wɔde honhom nipadua ahorow na ɛforo kɔ soro kohyia wɔn Awurade no. Esiane saa atirimpɔw ahorow yi nti wɔn titiriw na wobu wɔn sɛ wɔn a wɔwɔ “anigye” sɛnea Adiyisɛm 14:13 ka no.

20. ”Amununkum” bɛn mu na ’wɔba bɛfa’ Kristofo a wɔte ase a wɔaka no ’kɔ,’ na dɛn na ɛkyerɛ wɔ foro awɔforo kɔ no ho?

²⁰ Nanso, dɛn na fa a wɔfa wɔn kɔ wɔ “‘amununkum mu” no kyerɛ? Mmom, amununkum sen fa wim na ɛkyerɛ beae a ɛkorɔn. Afei nso ɛmma yɛn a yɛwɔ asase so no nhu nea ɛwɔ mu anaasɛ nea ɛwɔ akyi. Honhom nipadua ahorow no nhia yɛn mununkum a yehu yi na ayɛ wɔn nnipa a yenhu wɔn. Enti nea wɔkyerɛ wɔ 1 Tesalonikafo 4:17 no yɛ sɛnkyerɛnne kwan so amununkum, a sɛnea ɛte no ɛmma wɔn a wɔwɔ asase so no nhu ɔkwan a wɔfa so fa Kristofo a wɔanyan wɔn no kɔ na wɔakohyia wɔn Awurade a wɔama no so wɔ ɔsoro no. Momma yɛnkae sɛnea Yesu Kristo wusɔre no akyi da a ɛto so 40 no so no, ɔforo kɔɔ soro, na bere a ɔreforo no, “omununkum gyee no fii wɔn asuafo a wɔrehwɛ no no] anim” no.​—Aso. 1:9.

21. So nea efi sian a Awurade sian fi soro no mu ba ne asase yi so pɛɛ a ɔba anaa, na bere bɛn na “Ɛda a edi akyiri” a emu na onyan n’asuafo a wɔde honhom awo wɔn no ba awiei?

²¹ Dɛn na eyinom nyinaa kyerɛ? Eyi: Awurade Yesu Kristo a ɔresian no mma yɛn asase yi so tee. Amununkum a wɔde yɛ mfonini sɛ́ Kristofo a wɔanyan wɔn no rehyia wɔn soro Awurade no wɔ mu no sensɛn wim akyirikyiri wɔ asase yi atifi. Afei nso ɛyɛ “wim” na Kristofo a wɔanyan wɔn no hyia wɔn Awurade no, na ɛnyɛ fam ha, na ɛnyɛ Yerusalem, Ngo Bepɔw no so anaasɛ asase so ha baabiara. Afei nso, “ɛda a edi akyiri” a, emu na wɔba bɛfa wɔn kɔ no nyɛ asase so nnɔnhwere 24 da. Ɛyɛ bere tenten bi a ɛba awiei wɔ bere a wonyan saa Kristofo a wɔde honhom awo wɔn a wonya kyɛfa wɔ “ɔsɔre a edi kan” no mu no mu nea otwa to kɔɔ soro nkwa mu no. (Adi. 20:4, 6; Yoh. 6:54) Bible nkɔmhyɛ mmamu kyerɛ sɛ yɛwɔ saa “ɛda a edi akyiri” pɔtee no mu mprempren.

[Ase hɔ nsɛm]