Ɔkra No​—So Ɛne Wo? Anaasɛ Ɛwɔ Wo Mu?

SO WUSUSUW sɛ wowɔ ɔkra a enwu da a ɛkɔ so tra ase bere a woawu no? Nnipa pii a wɔatete wɔn wɔ nyamesom bi mu, sɛ́ ebia ɔyɛ Kristoni, Kramoni, Yudani, Shintoni, Buddani anaa Hinduni no, wɔwɔ saa gyidi biako yi. Nanso dɛn nti na wogye di? Esiane sɛ wɔwɔ biribi a edi ho adanse nti? Anaasɛ esiane sɛ asɔre ahorow no mu fã kɛse no ara akyerɛkyerɛ saa bere nyinaa anaasɛ esiane sɛ ɛyɛ atesɛm a ahyeta nti? Nokwarem no, ɛyɛɛ dɛn na gyidi a ɛfa ɔkra a enwu da ho no bɛhyɛɛ “Kristofo” nkyerɛkyerɛ mu?

Ɔbenfo Douglas T. Holden kyerɛw wɔ ne nhoma Death Shall Have No Dominion no mu sɛ: “Kristofo anyamesɛm ne Helafo nyansapɛ adi afra araa ma ayɛn nnipa a wokura Helafo adwene nkyem du mu akron ne Kristofo adwene nkyem du mu biako.” Gyidi a dodow no ara wɔ wɔ ɔkra a enwu da mu no kyerɛkyerɛ eyi mu yiye. Sɛ nhwɛso no, Plato a na ɔyɛ Helani nyansapɛfo wɔ afeha a ɛto so anan A.Y.B. mu no kyerɛwee sɛ: “Ɔkra no renwu da na wɔrentumi nsɛe no, na yɛn akra bɛtra wiase foforo bi mu ampa!”

Sɛnea Plato kyerɛ no, ɛhe na saa akra yi kɔ bere a nipadua no awu no? “Na wɔn a ɛda adi sɛ wɔanyɛ papa anaa bɔne no kɔ asubɔnten Acheron ho, . . . na wɔtra hɔ dwira wɔn ho wɔ bɔne a wɔayɛ no ho, na bere a wɔanya bɔne a wɔyɛɛ afoforo no ho asotwe no, wobu wɔn bem.” So eyi nte sɛ Kristoman ahodwiragya nkyerɛkyerɛ no? Na ɛhe na abɔnefo no akra kɔ? Wɔtow wɔn a wɔte saa no gu Tartarus [a wɔ tete Helafo fam no, ɛyɛ Hades fã bi a wɔakora so a wɔde twe abɔnefo a wonnye koraa aso] a ɛyɛ wɔn nkrabea a ɛfata wɔn na wɔremfi hɔ mma da mu.” Nokwarem no, na tete Helafo wɔ wɔn gyidi a ɛfa daa ayayade wɔ Hell ho bere tenten dedaw ansa na Kristoman asɔfo begye dii!

So Biribi Wɔ Hɔ a Enti Ɛsɛ sɛ Wogyina So Gye Ho Kyim?

Sɛ nsɛm a ɔkyerɛw wɔ ne Dialogue no mu no da n’ankasa nsusuwii adi a, ɛnde na Plato gye dii sɛ ɔwɔ ɔkra a enwu da. Ankyɛ biara ne nkyerɛkyerɛ ahorow maa afoforo a na wobu no sɛ ɔyɛ nyansapɛfo no fii ase gyee no dii. Esiane eyi nti, afeha a ɛto so abien Kristofo akyerɛwfo mpo gyee Plato nyansapɛ nkyerɛkyerɛ no toom. Encyclopedia Britannica ka wɔ eyi ho sɛ: “Plato akyidifo a wɔyɛ Kristofo no buu adiyisɛm sɛ ɛne ade a ɛho hia kɛse na na wobu Plato nyansapɛ nkyerɛkyerɛ no sɛ ade a eye sen biara a wɔwɔ a ɛbɛma wɔate Kyerɛwsɛm mu nkyerɛkyerɛ ahorow ne asɔre atetesɛm ase na woabɔ ho ban. . . . Efi afeha a ɛto so 2 Y.B. mfinimfini no, Kristofo a na woanya Plato nyansapɛ ho ntetee bi no huu hia a ɛho hia sɛ wɔka sɛnea wɔn gyidi te no ho asɛm na wɔde di wɔn ankasa nhomanim a wɔpɛ ho dwuma na ama wɔasakra abosonsomfo a wɔyɛ nhomanimfo no. Na nyansapɛ a eye sen biara ma wɔn ne Plato nyansapɛ no.”

Nanso yɛwɔ nnipa atitiriw a wɔasɔre atia Helafo gyidi horow a ɛfa ɔkra a enwu da ho no wɔ mfehaha pii a atwam no mu. William Tyndale (bɛyɛ 1492-1536) a na ɔyɛ Bible asekyerɛfo no kyerɛwee wɔ ne nkyerɛase no nnianim asɛm no mu sɛ: “Bere a woka sɛ akra a woafi nipadua no mu wo soro, hell anaa ahodwiragya mu no, woma nsɛm a Kristo ne Paulo de dii owusɔre ho adanse no yɛ ɔkwa . . . Sɛ ɔkra no wɔ soro a, kyerɛ me nea enti a owusɔre no wɔ hɔ?” Ɛno yɛ asemmisa a ntease wom. Sɛ ɔkra a enwu da a worentumi nsɛe no di owu so nkonim a, ɛnde owusɔre a Yesu kaa ho asɛm na tete Hebrifo agyanom mpanyimfo gye dii no di atirimpɔw bɛn ho dwuma?​—Hebrifo 11:17-19, 35; Yohane 5:28, 29.

Wɔ ne nhoma The Aging of Christianity mu no, Spaniani ɔkyerɛwfo a wɔfrɛ no Miguel de Unamuno kaa ntawntawdi koro yi ara ho asɛm. Ɔkyerɛwee wɔ Kristo ho sɛ: “Na ɔwɔ gyidi wɔ . . . sɔre a honam no bɛsɔre no mu sɛnea Yudafo nsusuwii kyerɛ no, na ɛnyɛ wu a ɔkra no nwu da no sɛnea Plato nsusuwii kyerɛ no.” Ɔkɔɔ so kae mpo sɛ: “Ɔkra a enwu da no . . . yɛ gyidi a efi abosonsomfo nyansapɛ mu. . . . Ɛyɛ nea ɛdɔɔso sɛ wobɛkenkan Plato Phaedo na ama woagye ɛno adi.”

“Ɔkra” wɔ Bible no Mu

Anwensɛm kyerɛwfo a wɔfrɛ no Longefellow kyerɛwee sɛ: “Woyɛ dɔte na dɔte mu na wobɛsan akɔ, no nyɛ nea wɔkae wɔ ɔkra no ho.” (Yɛn na yɛde nkyerɛwde soronko akyerɛw afã bi no.) So nea ɔkae no yɛ nokware? Bere a Onyankopɔn kae sɛ, “Na woyɛ dɔte na dɔte mu na wobɛsan akɔ” no, na ɔrekasa akyerɛ hena? Na ɔrekasa akyerɛ onipa a odi kan a ɔne Adam. So na owu afobu no fa Adam nipadua no nkutoo ho? Anaa so na ɛfa Adam ho sɛ ɔkra a ɔhome?

Genesis 2:7 ka no pefee sɛ: “Na [Yehowa] Nyankopɔn de fam dɔte nwenee onipa, na ohuw nkwa home guu ne hwene mu, na onipa yɛɛ ɔkra teasefo.” Kyerɛw nsɛm yi ho hia na ama woate sɛnea wɔde asɛmfua “ɔkra” dii dwuma wɔ Bible mu no ase. Ɛka no pefee sɛ, “onipa yɛɛ [ɛnyɛ sɛ onyaa] ɔkra teasefo.” Enti Onyankopɔn ka kyerɛɛ saa ɔkra teasefo anaa abɔde a ɔhome a ɔne Adam yi sɛ, sɛ ɔyɛ asoɔden a obewu na wasan akɔ asase mu nneɛma a wɔde yɛɛ no no mu.​—Genesis 2:17; 3:19.

Yɛsrɛ wo, hyɛ no nsow sɛ wɔnka baabi foforo a ɔkra a wosusuw sɛ onipa wɔ no bɛkɔ ho asɛm biara. Dɛn ntia? Efisɛ na Adam ne ne nyansa no nyinaa yɛ ɔkra. Ná ɔkra nyɛ biribi a ɔwɔ. Sɛ mmeae horow te sɛ hell ne ahodwiragya wɔ hɔ a, ɛha ne beae koro a anka ɛsɛ sɛ wɔka ho asɛm wɔ Bible mu. Nanso wɔanka ho asɛm mpo. Dɛn nti na eyi te saa? Efisɛ na asoɔden ho asotwe yɛ nkwa a na Adam wɔ wɔ Paradise no abirabɔ​—ɛne owu, ɛnyɛ nkwa wɔ baabi foforo biara. Enti Paulo twa asɛm no tiaa wɔ Romafo 6:23 sɛ: “Bɔne so akatua ne owu.” (Fa toto Hesekiel 18:4, 20 ho.) Wɔammɔ hell-gya anaa ahodwiragya biara din wɔ ha, na mmom owu ara kwa. Na so saa asotwe yi ara nyɛ nea ɛdɔɔso.

Ade foforo a ɛsɛ sɛ yɛma ɛtra yɛn adwene mu ne sɛ, atɛntrenee ho dwumadi hwehwɛ sɛ na ɛsɛ sɛ onipa hu faako a wobetumi atwe n’aso akodu ansa na wayɛ asoɔden. Nanso wɔammɔ ɔkra a enwu da, hell-gya anaa ahodwiragya biara din wɔ Genesis kyerɛwtohɔ no mu. Bio nso, sɛ wɔde ɔkra a enwu da bɔɔ onipa ankasa a, ɛnde anka ɛsɛ sɛ nkyerɛkyerɛ ahorow a ɛfa ɔkra a enwu da ne faako a ɔbɛkɔ ho yi yɛ Hebrifo ne Yudafo nkyerɛkyerɛ no fã fi tete mmere no mu tɔnn. Nanso asɛm no nte saa.

Asemmisa foforo nso a ntease wom sɔre. Sɛ na Onyankopɔn mfitiase atirimpɔw ma adesamma a wɔyɛ pɛ na wɔyɛ osetie ne sɛ wɔbɛtra ase daa wɔ Paradise asase so a, ɛnde atirimpɔw bɛn na ɛwɔ ma a wɔde ɔkra a atew ne ho a enwu da bɛma onipa no mu? Anka ɛrenyɛ nea entumi nwu nko; ɛbɛyɛ nea ɛsen saa!​—Genesis 1:28.

Nea ɛka ho no, Hebri Kyerɛwnsɛm no kyerɛ pefee sɛ tete mmarima ne mmea anokwafo twɛnee owusɔre, sɛnea Paulo kaa ho asɛm wɔ Hebrifo 11:35 no mpo: “Mmea nsa kaa wɔn awufo a wɔsɔree [wɔ nsɛm tebea horow a ɛyɛ nwonwa mu]; na ebinom nso, wɔde wɔn goruu atɔprɛ, na wɔampɛ ogye, na wɔn nsa aka owusɔre a eye kyɛn so [a ɛkɔ daa nkwa mu].” Ɛda adi sɛ wɔamfa wɔn ho anto “afofantɔ” anansesɛm a ɛyɛ onipa nyansapɛ no so.

Nanso ebia wubebisa sɛ, Paulo nsɛm a ɛfa nea enwu ho no nso ɛ? Ampa, ɔka sɛ: “Na etwa sɛ nea ɛporɔw yi hyɛ nea ɛmporɔw no, na nea ewu yi hyɛ nea enwu no. Na sɛ nea ɛporɔw yi nya hyɛ nea ɛmporɔw no, na nea ewu yi nya hyɛ nea enwu no a, ɛno na asɛm a wɔakyerɛw no bɛba mu: Wɔamene owu nkonim mu.” (1 Korintofo 15:53, 54) Nanso yɛrentumi mfa ɔkra a enwu da ho asɛm nka nsɛm yi ho wɔ ɔkwan biara so. Paulo ka ‘nea enwu yi a ɛhyɛ nea ewu no’ ho asɛm. Enti ɛnyɛ biribi a wonya fi onipa mu na mmom abɔde foforo a wɔne Kristo bedi hene wɔ ne soro Ahenni no mu.​—2 Korintofo 5:17; Romafo 6:5-11; Adiyisɛm 14:1, 3.a

Nnɛyi asɔfo mpo rehu saa asɛm yi wɔ mfehaha pii a Kristoman de akyerɛkyerɛ ɔkra a enwu da no akyi. Sɛ nhwɛso no, Katolekfo sɔfo Hans Kung kyerɛw sɛ: “Bere a Paulo ka owusɔre ho asɛm no, nea ɔkyerɛ ara ne sɛ ɛnyɛ Helafo gyidi a ɛfa ɔkra a enwu da a ɛsɛ sɛ ɛtwe ne ho fi nipadua no ho no. . . . Sɛ Apam Foforo no ka owusɔre ho asɛm a, ɛnkyerɛ honhom ne ɔkra a ɛkɔ so twe wɔn ho fi yɛn nipadua no nneyɛe ahorow ho no.”

Germanfo Lutheran Ɔkyerɛsuasɛm (Catechism) ma Wɔn a Wɔanyin (Evangelischer Erwachsenenkatechismus) ka fa tetew a nidua no ne ɔkra no tetew mu a Plato kyerɛkyerɛ no ho sɛ: “Evangelisfo asɔfo a wɔwɔ nnɛ bere yi mu gye Helafo ne Bible nkyerɛkyerɛ ahorow a adi afra yi ho kyim. . . . Wɔpow onipa mu a wɔakyekyɛ ayɛ no ɔkra ne nipadua no. Esiane sɛ onipa no ankasa ne ɔbɔnefo no nti, wɔ owu mu no nipadua ne ɔkra no ne no wu koraa (owu ankasankasa) . . . Nsonsonoe da owu ne owusɔre ntam; onipa no kɔ so tra ase bere a Onyankopɔn kae no no.”

Nnɛyi Yehowa Adansefo rekyerɛkyerɛ eyi bɛboro mfe ɔha! Wonnyee Plato nyansapɛ a efi abosonsom mu no ntoom da, efisɛ wonim yiye sɛ na Yesu akyerɛkyerɛ sɛ: “Mommma eyi nyɛ mo nwonwa, efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi; wɔn a wɔayɛ papa no bɛkɔ nkwa sɔre mu, na wɔn a wɔayɛ bɔne no bɛkɔ atemmu sɔre mu.” (Yohane 5:28, 29) Asɛm a ɛne “ada mu” no kyerɛ sɛ Onyankopɔn “kae” saa nnipa a wɔawu no. Ɔbɛsan de wɔn aba nkwa mu bio. Nokware anidaso wɔ hɔ ma wɔn a wɔawu no, na ɛbɛbam bere a asase yi wɔ Onyankopɔn Ahenni nniso a ɛhyɛ Kristo nsa no ase no.​—Mateo 6:9, 10; Adiyisɛm 21:1-4.

[Ase hɔ nsɛm]

[Asɛm a wɔafa aka wɔ kratafa 9]

Tyndale a na ɔyɛ Bible asekyerɛfo no kyerɛwee sɛ: “Sɛ ɔkra no kɔ soro a, kyerɛ me nea enti a owusɔre no wɔ hɔ?”

[Kratafa 10 mfoni]

Spaniani nhomanimfo a wɔfrɛ na Unamuno kyerɛwee sɛ: “Ɔkra a enwu da no . . . yɛ gyidi a efi abosonsomfo nyansapɛ mu”

[Kratafa 11 mfoni]

Katolekfo sɔfo Küng: “Sɛ Paulo ka owusɔre ho asɛm a, nea ɔkyerɛ ara ne sɛ, ɛnyɛ Helafo gyidi a ɛfa ɔkra a enwu da ho no”