Nkɛntɛnso—Eyi Onipa Ayɛ Anaa Ɛhyɛ Onyankopɔn Anuonyam?

“ƐNSƐ sɛ sodifo bi kyɛn wɔn a wɔhyɛ n’ase nko, ɛsɛ sɛ ɔma wosuro no,” saa na Helani sahene a wagye din, Xenophon kyerɛwee. Ɛnnɛ nnipa pii bɛfrɛ ‘osuro’ a ɛte saa nkɛntɛnso.

Ampa, ɛnyɛ nnipa sodifo nyinaa na wɔwɔ nkɛntɛnso. Nanso wɔn a wɔwɔ bi no de wɔn adonne no ma afoforo deda wɔn fam, na wɔde kɛntɛn ɔmamfo so de di wɔn ankasa atirimpɔw ahorow ho dwuma. Gyama ɛho nhwɛso a ɛnkyɛe a agye dimmɔne paa ne Adolf Hitler de no. William L. Shirer kyerɛwee wɔ ne nhoma The Rise and Fall of the Third Reich mu sɛ: “[Wɔ 1933 mu no] na Germanfo dodow no ara bu Hitler sɛ ɔyɛ—anaa aka kakra sɛ wabɛyɛ—ɔkannifo a ɔwɔ nkɛntɛnso ankasa. Wɔ sakasakayɛ mfe dummien a edii hɔ mu no, wodii n’akyi ɔkwammɔne so, te sɛ obi a wɔama no ɔsoro nyansa bi.”

Akannifo a wɔwɔ nkɛntɛnso a wɔkanyan nkurɔfo ma wɔdedaa wɔn fam nanso wɔde wɔn kɔɔ mmusu mu no abu so wɔ nyamesom abakɔsɛm mu. Yesu bɔɔ kɔkɔ sɛ: “Monhwɛ na obi annaadaa mo. Na nnipa bebree de me din bɛba abɛka sɛ: Mene Kristo no; na wɔabɛdaadaa nnipa pii.” (Mateo 24:4, 5) Ɛnyɛ afeha a edi kan no mu nko na atoro Kristo ahorow a na wɔwɔ nkɛntɛnso bae. Wɔ 1970 mfe no mu no, Jim Jones frɛɛ ne ho “Amanfo Asɔredan no gyefo.” Wɔkaa ne ho asɛm sɛ “ɔsɔfo a ɔwɔ nkɛntɛnso” na “ɔwɔ nkurɔfo so tumi soronko,” na 1978 mu no, ɔmaa ahokum a ɛso bi mmae da no biako sii.a

Ɛda adi sɛ nkɛntɛnso betumi ayɛ akyɛde a asiane wom. Nanso, Bible no ka akyɛde soronko bi a efi Onyankopɔn hɔ a obiara betumi anya bi ma ɛso aba obiara mfaso ho asɛm. Hela asɛmfua ma saa akyɛde yi ne khaʹri·sma, na epue Bible mu mpɛn 17. Helani nhomanimfo bi kyerɛkyerɛ mu sɛ ‘ɔdom akyɛde a wɔde ma kwa, biribi a wɔde ma obi a ɔnyɛ ho adwuma biara na ɛnsɛ no, biribi a efi Onyankopɔn dom mu a anka onipa ankasa mmɔdenbɔ ntumi mma onnya da.’

Enti sɛnea Kyerɛwnsɛm no kyerɛ no, khaʹri·sma yɛ akyɛde a Onyankopɔn na ɔde dom nnipa. Dɛn ne akyɛde ahorow a Onyankopɔn fi ayamye mu de ama yɛn yi bi? Na ɔkwan bɛn so na yebetumi de ayi no ayɛ? Momma yensusuw akyɛde ahorow a efi ayamye mu yi mu abiɛsa ho.

Daa Nkwa

Akyinnye biara nni ho sɛ daa nkwa ne akyɛde a ɛsen biara. Paulo kyerɛw kɔmaa Roma asafo no sɛ: “Bɔne so akatua ne owu; na Onyankopɔn dom akyɛde [khaʹri·sma] ne daa nkwa, yɛn Awurade Kristo Yesu mu.” (Romafo 6:23) Ɛfata sɛ yɛhyɛ no nsow sɛ “akatua” no (owu) yɛ biribi a yɛn nsa aka a efi bɔne a wɔde awo yɛn a yennim ho hwee. Nanso, daa nkwa a Onyankopɔn de ma no yɛ biribi a ɛnsɛ yɛn koraa a anka yɛrentumi mfa yɛn ankasa mmɔdenbɔ so nnya.

Ɛsɛ sɛ yɛkyerɛ daa nkwa akyɛde no ho anisɔ na yɛboa afoforo nso ma wonya bi. Yebetumi aboa nkurɔfo ama wɔahu Yehowa, asom no, na ama wɔde daa nkwa akyɛde no adom wɔn. Adiyisɛm 22:17 ka sɛ: “Honhom no ne ayeforo no se: Bra! Na nea otie no nka sɛ: Bra! Na nea osukɔm de no mmra, na nea ɔpɛ no mmegye nkwa nsu no kwa.”

Yɛbɛyɛ dɛn atumi akyerɛ afoforo kwan akɔ nkwa nsu yi ho? Ne titiriw no, denam Bible a yɛde bedi dwuma yiye wɔ yɛn som adwuma mu no so. Ɛyɛ ampa sɛ wɔ wiase mmeae bi no, nkurɔfo ntaa nkenkan nsɛm a ɛfa honhom fam nneɛma ho anaa wonsusuw ho; nanso, hokwan ahorow wɔ hɔ bere nyinaa a yebetumi de ‘anyan obi aso.’ (Yesaia 50:4) Wɔ eyi fam no, yebetumi anya ahotoso wɔ tumi a Bible no de kanyan nkurɔfo no mu, efisɛ “Onyankopɔn asɛm wɔ nkwa, na ahoɔden wɔ mu.” (Hebrifo 4:12) Sɛ́ ɛyɛ Bible no nyansa a wotumi de yɛ adwuma, awerɛkyekye ne anidaso a ɛde ma, anaa emu nkyerɛkyerɛmu a ɛfa asetra atirimpɔw ho no, Onyankopɔn Asɛm betumi aka nkurɔfo koma, na ama wɔafi ase anantew nkwa kwan no so.—2 Timoteo 3:16, 17.

Nea ɛka ho bio no, Bible ho nhoma betumi aboa yɛn ma yɛaka sɛ “Bra!” Odiyifo Yesaia ka siei sɛ wɔ saa honhom fam esum bere yi mu no, ‘Yehowa bɛhyerɛn’ ne nkurɔfo so. (Yesaia 60:2) Ɔwɛn Aban Asafo no nhoma ahorow da saa nhyira a efi Yehowa hɔ yi adi, na afe biara ɛkyerɛ nnipa mpempem pii kwan kɔ Yehowa, honhom fam hann Fibea, no hɔ. Nhoma ahorow no fã biara ntwe adwene nsi ankorankoro bi so. Sɛnea Ɔwɛn-Aban no nnianim kyerɛkyerɛ mu no, “Ɔwɛn-Aban no atirimpɔw ne sɛ ɛbɛkamfo Yehowa Nyankopɔn sɛ Amansan Hene. . . . Ɛhyɛ gyidi a wobenya wɔ Onyankopɔn Hene a mprempren ɔredi tumi, Yesu Kristo, a ne mogya a ohwie gui no bue kwan ma adesamma sɛ wobenya daa nkwa no mu ho nkuran.”

Kristoni bea bi a ɔyɛ bere nyinaa somfo a wanya nkɔso kɛse wɔ ne som adwuma mu mfe pii ni no, ka sɛnea Ɔwɛn-Aban ne Nyan! boa nkurɔfo yiye ma wɔbɛn Nyankopɔn no ho asɛm sɛ: “Sɛ me Bible asuafo fi ase kenkan Ɔwɛn-Aban ne Nyan! na wonya mu anigye a, wonya nkɔso ntɛmntɛm. Mihu sɛ nsɛmma nhoma ahorow no tumi boa nkurɔfo paa ma wobehu Yehowa.”

Ɔsom Hokwan Ahorow

Ná Timoteo yɛ Kristo suani a wɔmaa no akyɛde foforo a na ehia sɛ n’ani kũ ho. Ɔsomafo Paulo ka kyerɛɛ no sɛ: “Mma wo mu dom akyɛde [khaʹri·sma] a wɔnam nkɔmhyɛ ne mpanyimfo nsa a wɔde guu wo so no so de maa wo no nnna hɔ kwa.” (1 Timoteo 4:14) Ná dɛn ne saa akyɛde yi? Ná ɛyɛ paw a wɔpaw Timoteo sɛ ɔhwɛfo kwantuni no, ɔsom hokwan a na ɛsɛ sɛ odi ho dwuma ɔkwampa so. Wɔ saa kyerɛwtohɔ no ara mu no, Paulo tuu Timoteo fo sɛ: “Bata ɔkenkan, afotu ne ɔkyerɛkyerɛ ho . . . Ma w’ani mmra wo ho ne kyerɛ no so na tra mu, efisɛ woyɛ saa a, wubegye wo ho ne w’atiefo nkwa.”—1 Timoteo 4:13, 16.

Ɛnnɛ nso ɛho hia sɛ mpanyimfo kyerɛ wɔn som hokwan ahorow ho anisɔ. Sɛnea Paulo da no adi no, ɔkwan biako a wobetumi afa so ayɛ eyi ne sɛ ‘wɔbɛma wɔn ani aba wɔn nkyerɛkyerɛ so.’ Sɛ́ anka wobesuasua wiase akannifo a wɔwɔ nkɛntɛnso no, wɔtwe adwene si Onyankopɔn so, ɛnyɛ wɔn ankasa, so. Ná wɔn Nhwɛsofo, Yesu, yɛ ɔkyerɛkyerɛfo a ɔda nsow a akyinnye biara nni ho sɛ na ɔwɔ nidi, nanso ofi ahobrɛase mu de anuonyam no maa N’agya. Ɔkae sɛ: “Me kyerɛkyerɛ nyɛ me dea, na nea ɔsomaa me no dea.”—Yohane 5:41; 7:16.

Yesu hyɛɛ ne soro Agya anuonyam denam ne nkyerɛkyerɛ a ɔde gyinaa Onyankopɔn Asɛm so no so. (Mateo 19:4-6; 22:31, 32, 37-40) Paulo nso sii so dua sɛ ɛho hia sɛ ahwɛfo ‘so nokwasɛm no mu sɛnea wɔkyerɛɛ wɔn no, de ɔkyerɛ pa di dwuma.’ (Tito 1:9) Sɛ mpanyimfo de wɔn kasa ahorow gyina Kyerɛwnsɛm no so pintinn a, na ɛkyerɛ sɛ wɔreka nea Yesu kae no bi sɛ: “Nsɛm a meka mekyerɛ mo no, emfi m’ankasa me tirim na meka.”—Yohane 14:10.

Ɔkwan bɛn na mpanyimfo betumi afa so ‘aso nokwasɛm no mu’? Denam wɔn kasa ahorow ne wɔn dwumadi ahorow a wɔde begyina Onyankopɔn Asɛm so, akyerɛkyerɛ kyerɛw nsɛm a ɛwom no mu asisi so dua so. Mfatoho ahorow a ɛkɔ akyiri dodo anaa aseresɛm betumi atwe atiefo adwene afi Onyankopɔn Asɛm so, na adan adwene aba ɔkasafo no ankasa mmɔdenbɔ so, titiriw bere a ɔma ɛtra so no. Bible mu nkyekyem ahorow no mmom na ɛbɛka atiefo no koma na akanyan wɔn. (Dwom 19:7-9; 119:40; fa toto Luka 24:32 ho.) Ɔkasa a ɛtete saa no yi adwene no fi nnipa so, de anuonyam no ma Nyankopɔn.

Ɔkwan foforo a mpanyimfo betumi afa so ayɛ akyerɛkyerɛfo a wotu mpɔn ne sɛ wobesuasua wɔn ho wɔn ho. Sɛnea Paulo boaa Timoteo no, saa ara na ɔpanyin biako betumi aboa ɔfoforo. “Dade sew dade ano, na onipa sew ne yɔnko anim.” (Mmebusɛm 27:17; Filipifo 2:3) Mpanyimfo nya mfaso fi wɔn ho wɔn ho adwenkyerɛ ne nyansahyɛ ahorow mu. Ɔpanyin bi a na wɔapaw no foforo kyerɛkyerɛɛ mu sɛ: “Ɔpanyin bi a ne ho akokwaw gyee bere kyerɛɛ me sɛnea osiesie baguam ɔkasa. Bere a ɔresiesie no, ɔde nsɛmmisa a wɔnhwehwɛ ho mmuae, mfatoho ahorow, nhwɛso ahorow, anaa osuahu ntiantia, ne afei Kyerɛwnsɛm mu nsɛm bi a ɔtɔɔ ne bo ase yɛɛ ho nhwehwɛmu kaa ho. Wama mahu sɛnea metumi de nneɛma a egu ahorow ahyehyɛ me kasa mu ama ahomeka aba mu na ne tie ayɛ dɛ.”

Ɛsɛ sɛ yɛn a yɛwɔ ɔsom hokwan ahorow nyinaa, sɛ́ yɛyɛ mpanyimfo, asafo mu asomfo, anaa akwampaefo no, kyerɛ yɛn akyɛde no ho anisɔ. Bere a aka kakra ma Paulo awu no, ɔkaee Timoteo sɛ ‘onnyan Onyankopɔn dom akyɛde [khaʹri·sma] a na ɛwɔ ne mu no nsɔ ano te sɛ gya,’ a wɔ Timoteo fam no, na ɛyɛ honhom no akyɛde soronko bi. (2 Timoteo 1:6) Wɔ Israelfo afie mu no, na ogya taa yɛ nsramma kɛkɛ. Ná wotumi ‘nyan no’ ma ɛfram yɛ ogya a ano yɛ den. Enti wɔhyɛ yɛn nkuran sɛ yɛmfa yɛn koma ne yɛn ahoɔden nhyɛ yɛn dwumadi ahorow mu, na yennyan honhom fam akyɛde biara a wɔde adom yɛn no te sɛ ogya.

Honhom Fam Akyɛde Ahorow a Ɛsɛ sɛ Yɛne Afoforo Kyɛ

Ɔdɔ a na Paulo wɔ ma ne nuanom a na wɔwɔ Roma no kaa no ma ɔkyerɛwee sɛ: “M’ani gyina sɛ mehu mo, na mede honhom dom akyɛde [khaʹri·sma] bi mabrɛ mo abɛhyɛ mo den, ɛne sɛ me ne mo benya awerɛkyekye a efi gyidi a mo ne me wɔ no mu ba no bi.” (Romafo 1:11, 12) Paulo buu kasa a yetumi kasa kyerɛ afoforo de hyɛ wɔn gyidi den no sɛ ɛyɛ honhom fam akyɛde. Ná honhom fam akyɛde a ɛtete saa a wɔde bɛmema wɔn ho no bɛhyɛ wɔn gyidi den, na ama wɔahyehyɛ wɔn ho wɔn ho nkuran.

Na ɛda adi sɛ eyi ho hia. Wɔ saa nhyehyɛe bɔne a yɛwom yi mu no, yɛn nyinaa hyia nhyɛso wɔ akwan horow so. Nanso, nkuranhyɛ a yebenya afi yɛn ho yɛn ho hɔ daa no betumi aboa yɛn ma yɛagyina mu. Yɛn ho yɛn ho mmoa—ɔma ne ogye—ho hia na ama yɛakɔ so anya honhom fam ahoɔden. Ampa, ehia sɛ wɔbɔ yɛn nyinaa so wɔ bere ne bere mu, nanso yɛn nyinaa nso betumi ahyehyɛ yɛn ho yɛn ho nkuran.

Sɛ yɛde yɛn ani to fam hu mfɛfo gyidifo a wɔayɛ bosaa a, yebetumi “afa awerɛkyekye a Onyankopɔn de kyekye yɛn werɛ no so akyekye wɔn a wɔwɔ ahohia biara mu werɛ.” (2 Korintofo 1:3-5) Nea Hela asɛmfua ma awerɛkyekye (pa·raʹkle·sis) no kyerɛ ankasa ne “obi a ɔfoforo frɛ no begyina ne nkyɛn.” Sɛ ɛba sɛ bere a ɛho abehia no, yetwiw bɛn yɛn nuabarima anaa yɛn nuabea boa no a, akyinnye biara nni ho sɛ yɛn ankasa benya mmoa a ɔdɔ wom saa ara bere a yehia mmoa no.—Ɔsɛnkafo 4:9, 10; fa toto Asomafo no Nnwuma 9:36-41 ho.

Ade foforo a mfaso wɔ so nso ne mpanyimfo no nsrahwɛ a ɔdɔ wom no. Ɛwom sɛ ɛtɔ mmere bi a wɔkɔsra obi de Kyerɛwnsɛm mu afotu kɔma no wɔ asɛnhia bi ho de, nanso ahwɛfo nsrahwɛ dodow no ara yɛ bere a wɔde hyɛ afoforo nkuran, ‘ka wɔn koma to wɔn yam.’ (Kolosefo 2:2) Sɛ ahwɛfo kɔsrasra afoforo hyehyɛ wɔn gyidi den saa a, na wɔrema wɔn honhom fam akyɛde ankasa. Te sɛ Paulo no, wobehu sɛ saa ɔma soronko yi de akatua ba, na wɔn ani ‘begyina’ wɔn nuanom.—Romafo 1:11.

Ná eyi te saa wɔ ɔpanyin bi a ɔwɔ Spain a ɔkaa osuahu a edi so yi no fam: “Ná ɛkame ayɛ sɛ Ricardo, abarimaa bi a na wadi mfe 11, nkyerɛ nhyiam horow no ne asafo no ankasa ho anigye papa. Enti meka kyerɛɛ Ricardo awofo sɛ mepɛ sɛ mebɛsra wɔn ba no, na wɔpenee so ntɛm. Ná wɔte bepɔw so baabi a sɛ wode kar fi me fie rekɔ hɔ a egye bɛyɛ dɔnhwerew biako. Ɛda adi sɛ Ricardo ani gyei sɛ mekyerɛɛ ne ho anigye, na ɔyɛɛ ho biribi ntɛm ara. Ankyɛ na ɔbɛyɛɛ ɔdawurubɔfo a wɔmmɔɔ no asu ne asafo no muni a ɔyɛ hyew. Ne fɛre no tu yerae ma ɔbɛyɛɛ obi a n’anim tew na ɔbɛn afoforo. Asafo no mufo pii bisae sɛ: ‘Dɛn na aka Ricardo ama wayɛ nsakrae saa?’ Ná ɛte sɛ nea afei na wɔn adwene aba ne so. Sɛ mekae saa ahwɛfo nsrahwɛ a ɛho hia yi a, mete nka sɛ aboa me sen Ricardo. Sɛ ɔba Ahenni Asa so a, n’anim tew, na ɔba me nkyɛn ntɛm bekyia me. Ɛyɛ anigye sɛ mahu ne honhom fam nkɔso.”

Akyinnye biara nni ho sɛ ahwɛfo nsrahwɛ ahorow te sɛ eyi de nhyira pii ba. Nsrahwɛ a ɛtete saa no ne Yesu nkuranhyɛ yi hyia: “Hwɛ me nguan!” (Yohane 21:16) Nokwarem no, ɛnyɛ mpanyimfo nkutoo na wobetumi ama afoforo honhom fam akyɛde a ɛtete saa. Asafo no muni biara betumi atwetwe afoforo akɔ ɔdɔ ne nnwuma pa mu. (Hebrifo 10:23, 24) Sɛnea wɔde ahama kyekyere nnipa a wɔreforo bepɔw bom no, saa ara na honhom fam ahama aka yɛn abom. Yɛn nneyɛe ne yɛn kasa tumi ka afoforo a yentumi nyɛ ho hwee. Kasa a ɛnyɛ dɛ anaa ɔkasatia a emu yɛ den betumi agow hama a ɛkyekyere yɛn bom no mu. (Efesofo 4:29; Yakobo 3:8) Nea ɛne no bɔ abira no, kasadɛ a ɛhyɛ nkuran ne mmoa a ɛkyerɛ ɔdɔ betumi ama yɛn nuanom adi wɔn haw ahorow so. Sɛ yɛyɛ saa a, na yɛrema yɛn ho yɛn ho honhom fam akyɛde a ɛsom bo daa.—Mmebusɛm 12:25.

Onyankopɔn Suban a Yɛbɛda no Adi Yiye

Ɛda adi sɛ Kristoni biara wɔ nkɛntɛnso bi. Wɔama yɛn daa nkwa anidaso a ɛsom bo kɛse no. Yɛwɔ honhom fam akyɛde ahorow a yebetumi ne yɛn ho yɛn ho akyɛ. Na yebetumi abɔ mmɔden ahyɛ afoforo nkuran anaa yɛakanyan wɔn ama wɔayɛ nneɛma a ɛfata. Ebinom wɔ akyɛde afoforo a ɛne ɔsom hokwan ahorow. Saa akyɛde ahorow yi nyinaa yɛ Onyankopɔn dom ho adanse. Na esiane sɛ akyɛde biara a yɛwɔ no yɛ nea yɛanya afi Onyankopɔn hɔ nti, ɛda adi sɛ ntease nnim sɛ yɛde bɛhoahoa yɛn ho.—1 Korintofo 4:7.

Sɛ́ Kristofo no, ɛbɛyɛ papa sɛ yebebisa yɛn ho sɛ, ‘So mede ɔdom akyɛde biara a mewɔ no bɛhyɛ Yehowa, “akyɛde pa nyinaa ne adekyɛde a ɛyɛ pɛ nyinaa” Mafo no, anuonyam? (Yakobo 1:17) So mesuasua Yesu na masom afoforo sɛnea m’ahoɔden ne me nsɛm tebea bɛma kwan?’

Ɔsomafo Petro bɔ eyi ho asɛyɛde a yɛwɔ no mua sɛ: “Sɛnea mo nyinaa nyinyaa ɔdom akyɛde [khaʹri·sma] no, momfa nsonsom mo ho mo ho sɛ Onyankopɔn dom ahorow no so afiehwɛfo pa. Sɛ obi ka asɛm a, ɔnka no sɛ Onyankopɔn nsɛm. Sɛ obi som a, ɔnsom sɛ efi ahoɔden a Onyankopɔn de ma, na wɔnam Yesu Kristo so ahyɛ Onyankopɔn anuonyam, ade nyinaa mu.”—1 Petro 4:10, 11.

[Ase hɔ asɛm]

[Mfonini Fibea wɔ kratafa 23]

Corbis-Bettmann

UPI/Corbis-Bettmann