ADESUA 56
Boa Ma Asomdwoe Ne Baakoyɛ Ntena Asafo No Mu
Ɔhene Dawid kaa sɛ: “Hwɛ sɛnea eye na ɛyɛ fɛ sɛ anuanom bom de baakoyɛ tena!” Sɛ yɛne yɛn nuanom hyiam a, saa ara na ɛyɛ a yɛn nso yɛte nka. (Dwom 133:1) Nanso asomdwoe ne baakoyɛ a ɛwɔ yɛn ntam no, ɛmma kwa. Yɛn mu biara yɛ nea obetumi sɛnea ɛbɛyɛ a asomdwoe a ɛwɔ yɛn ntam no rensɛe.
1. Dɛn na ɛma Onyankopɔn nkurɔfo yɛ soronko?
Sɛ wutu kwan kɔ ɔman foforo so, na wokɔ adesua a, ebetumi aba sɛ worente wɔn kasa no, nanso w’ani so rentan wo da. Adɛn ntia? Efisɛ ade koro no ara na yesua anaa nhoma koro no ara na yɛde sua Bible no. Afei nso, yɛbɔ mmɔden sɛ yɛbɛda ɔdɔ adi akyerɛ yɛn ho. Asɛm no ne sɛ, ɛmfa ho baabi a yɛwɔ biara no, yɛn nyinaa ‘bɔ Yehowa din, na yɛde mmati koro som no.’—Sefania 3:9, ase hɔ asɛm.
2. Wobɛyɛ dɛn aboa ama baakoyɛ akɔ so atena asafo no mu?
Bible tu yɛn fo sɛ, ‘yemfi komam nnodɔ yɛn ho denneennen.’ (1 Petro 1:22) Wobɛyɛ dɛn ayɛ saa? Mfa w’adwene nsi afoforo sintɔ ne wɔn mmerɛwyɛ so, mmom bɔ mmɔden sɛ wode w’adwene besi suban pa a wɔwɔ so. Ɛtɔ da a, yɛn ani gye ho sɛ yɛne wɔn a yɛne wɔn fi faako anaa wɔn a wɔpɛ nneɛma a yɛpɛ bɛbɔ. Nanso ɛyɛ a bɔ mmɔden sɛ wo ne anuanom a ɛsono baabi a wofi ne sɛnea wɔte nso bɛbɔ. Afei nso, sɛ yɛwɔ ɔman bi anaa nkurɔfo bi ho adwene a ɛmfata a, ɛsɛ sɛ yɛyere yɛn ho paa tu ase.—Kenkan 1 Petro 2:17.a
3. Sɛ mente-me-ho-ase bi sɔre wɔ wo ne Kristoni foforo ntam a, dɛn na wobɛyɛ?
Wɔtaa ka sɛ, dua a ɛbɛn na etwiw. Saa asɛm no kyerɛ sɛ, baakoyɛ wɔ yɛn mu de, nanso bɔne a ɛwɔ yɛn ho nti, ɛtɔ da a obi betumi aka asɛm bi ama ahye yɛn, anaa yebetumi ayɛ biribi ama ahaw obi. Ɛno nti, Onyankopɔn Asɛm tu yɛn fo sɛ, “obiara mfa ne yɔnko bɔne nkyɛ no korakora. Sɛnea Yehowa ayi ne yam de akyɛ mo no, mo nso monyɛ saa ara.” (Kenkan Kolosefo 3:13.) Yɛfom Yehowa da biara, nanso ɔde kyɛ yɛn. Ne saa nti, yɛn nuanom fom yɛn a, ɔhwɛ kwan sɛ yɛde bɛkyɛ wɔn. Sɛ wuhu sɛ woayɛ biribi ama ahaw obi a, kɔ ne nkyɛn na wo ne no nkosiesie mo ntam.—Kenkan Mateo 5:23, 24.b
SUA PII KA HO
Ɔfã yi bɛboa wo ama woahu nneɛma a wubetumi ayɛ na asomdwoe ne baakoyɛ akɔ so atena asafo no mu.
Dɛn na wobɛyɛ na asomdwoe akɔ so atena wo ne afoforo ntam?
4. Sɛ wowɔ nnipakuw bi ho adwene a ɛmfata a, bɔ mmɔden yi fi wo mu
Yɛdɔ yɛn nuanom nyinaa. Nanso wɔn a ɛsono ɔman a wofi mu anaa sɛnea wɔte no, ɛtɔ da a, ebetumi ayɛ den sɛ yɛne wɔn bɛbɔ. Dɛn na ɛbɛboa yɛn ma yɛatrɛw yɛn dɔ mu? Monkenkan Asomafo Nnwuma 10:34, 35. Muwie a munsusuw nsɛmmisa yi ho:
Yehowa nyɛ nyiyim, mmom obiara a ɔpɛ sɛ ɔsom no no, ofi he oo, ɔte sɛn oo, ogye no tom. Dɛn na yebetumi ayɛ de akyerɛ sɛ yesuasua Yehowa?
Baabi a wowɔ no, adwene a ɛmfata bɛn na nkurɔfo wɔ wɔ afoforo ho a wompɛ sɛ wunya bi?
Monkenkan 2 Korintofo 6:11-13. Muwie a, munsusuw asɛmmisa yi ho:
Anuanom a ɛsono baabi a wofi anaa sɛnea wɔte no, wohwɛ a dɛn na wubetumi ayɛ na woahu wɔn yiye?
5. Yi wo yam fa bɔne kyɛ, na hwehwɛ asomdwoe
Yehowa nyɛ bɔne, enti onhia yɛn bɔne fakyɛ. Nanso yɛn de, da biara yɛfom no, nso oyi ne yam de kyɛ yɛn. Monkenkan Dwom 86:5. Muwie a munsusuw nsɛmmisa yi ho:
Dɛn na ɛwɔ kyerɛwsɛm yi mu a ɛma yehu sɛ Yehowa de bɔne kyɛ a, na ɔde akyɛ?
Sɛ wohwɛ sɛnea Yehowa de bɔne kyɛ no a, ɛma wote nka sɛn?
Nneɛma a ebetumi asɛe asomdwoe a ɛwɔ yɛne afoforo ntam no, ebi ne dɛn?
Yɛbɛyɛ dɛn asuasua Yehowa, na yɛakɔ so ama asomdwoe ne baakoyɛ atena yɛne yɛn nuanom ntam? Monkenkan Mmebusɛm 19:11. Muwie a, munsusuw asɛmmisa yi ho:
Sɛ obi hyɛ yɛn abufuw anaa ɔka asɛm bi ma ɛyɛ yɛn yaw a, dɛn na yebetumi ayɛ na asomdwoe akɔ so atena yɛne no ntam?
Ɛtɔ da a, yetumi yɛ ade ma ɛhaw afoforo. Ɛba saa a, dɛn na ɛsɛ sɛ yɛyɛ? Hwɛ VIDEO yi. Muwie a, munsusuw asɛmmisa yi ho:
Dɛn na onuawa no yɛe sɛnea ɛbɛyɛ a asomdwoe bɛtena ɔne ne nua no ntam?
6. Fa w’adwene si suban pa a wo nuanom wɔ no so
Sɛ yɛbɛn yɛn nuanom a, ɛma yehu wɔn suban pa ne wɔn sintɔ ahorow. Nanso ɛsɛ sɛ yebu yɛn ani gu wɔn sintɔ so, na yɛde yɛn adwene si wɔn suban pa so. Yɛbɛyɛ no sɛn? Hwɛ VIDEO yi. Muwie a munsusuw asɛmmisa yi ho:
Dɛn na ebetumi aboa wo ama woahu suban pa a ɛwɔ wo nuanom ho?
Yehowa de n’adwene si suban pa a yɛwɔ so. Monkenkan 2 Beresosɛm 16:9a. Muwie a munsusuw asɛmmisa yi ho:
Kyerɛwsɛm yi ma yehu sɛ Yehowa de n’adwene si suban pa a yɛwɔ no so. Wei ma wote nka sɛn?
Dɛnkyɛmmo a ɛyɛ fɛ mpo no, sɛ wode w’ani to fam a, wubehu sɛ biribi tɔ sin wɔ ho. Nanso ɛno nkyerɛ sɛ ɛnsom bo. Yɛn nuanom a yɛne wɔn som Yehowa no nso, ɛwom bɔne wɔ wɔn ho de, nanso wɔda so ara som bo ma Yehowa paa
EBINOM KA SƐ: “Me de, sɛ woyɛ me bɔne na sɛ woammɛpa me kyɛw a, meremfa nkyɛ wo da.”
Adɛn nti na ɛsɛ sɛ yeyi yɛn yam de afoforo bɔne kyɛ wɔn?
NEA YƐASUA
Sɛ woda ɔdɔ adi kyerɛ anuanom nyinaa, na wuyi wo yam de wɔn bɔne kyɛ wɔn a, ɛbɛma asomdwoe ne baakoyɛ aba asafo no mu.
Ntimu
Sɛ wunni nnipakuw bi ho adwempa a, wobɛyɛ dɛn ayi afi wo mu?
Sɛ mente-me-ho-ase bi sɔre wɔ wo ne wo nua Kristoni bi ntam a, dɛn na wobɛyɛ?
Adɛn nti na wopɛ sɛ wusuasua Yehowa na wuyi wo yam de afoforo bɔne kyɛ wɔn?
YƐ NHWEHWƐMU
Hwɛ video yi, na wubehu mfatoho bi a Yesu mae a ɛma yehu sɛ, ɛnsɛ sɛ yebu afoforo atɛn.
Sɛ obi ka sɛ woayɛ biribi ama ayɛ ne yaw, nanso wote nka sɛ wonyɛɛ no bɔne biara a, ɛsɛ sɛ wopa no kyɛw anaa?
“Kyɛwpa—Ade a Ɛde Asomdwoe Ba” (Ɔwɛn-Aban, November 1, 2002)
Hwɛ nea aboa ebinom ama wɔne nnipa a wɔfi mmaa nyinaa di no yiye.
Sɛ akasakasa bi ba wo ne Kristoni foforo ntam a, anammɔn bɛn na ɛsɛ sɛ wutu na asɛm a aba no ansɛe asafo no asomdwoe?
“Munsiesie Mo Ntam Nsɛmnsɛm Wɔ Ɔdɔ Mu” (Ɔwɛn-Aban, May 2016)
a Sɛ Kristoni bi wɔ nsanyare bi a, ɔbɛyɛ dɛn akyerɛ sɛ ɔdɔ ne nuanom? Nsɛm Bi Mu Nkyerɛkyerɛmu 6 bɛma yɛahu.
b Sɛ yɛne yɛn nua bi yɛ adwuma na sɛ nsɛmnsɛm sɔre a, dɛn na yɛbɛyɛ? Afei nsɛm bɛn saa na yebetumi akosiesie wɔ kɔɔto? Nsɛm Bi Mu Nkyerɛkyerɛmu 7 bɛma yɛanya saa nsɛmmisa yi ho mmuae.