“Monsɔ Mo Ho Nhwɛ Sɛ Mowɔ Gyidi No Mu Anaa”

Korintofo Nhoma a Ɛto so Abien mu Nsɛntitiriw

NA KRISTOFO a wɔwɔ Korinto no ho asɛm hia ɔsomafo Paulo. Ná wobebu afotu a ɔde mae wɔ ne krataa a edi kan a ɔde kɔmaa wɔn no mu dɛn? Ná ɔwɔ Makedonia bere a Tito de amanneɛbɔ pa bae sɛ ne krataa no ahyɛ Korintofo no awerɛhow ma wɔasakra. Anigye bɛn ara na ɛmaa Paulo nyaa sɛɛ yi!​—2 Korintofo 7:8-13.

Paulo kyerɛw Korintofo Nhoma a Ɛto so Abien no fi Makedonia, bɛyɛ afe 55 Y.B. mfinimfini akyi. Ɔkaa nea ɛsɛ sɛ wɔyɛ de tew asafo no ho, ɔkanyan ɔpɛ a ɛbɛma wɔayi ntoboa ama gyidifo a ahia wɔn wɔ Yudea, na ɔde anoyi mae wɔ ɔsomafo a ɔyɛ no ho wɔ krataa yi mu. Nea Paulo kae no mu pii betumi aboa yɛn ma ‘yɛakɔ so asɔ yɛn ho ahwɛ sɛ yɛwɔ gyidi no mu anaa.’ (13:5) Ɛnde, dɛn na yebetumi anya afi krataa yi mu?

Awerɛkyekye Nyankopɔn no Somfo

Ɔsomafo no kyerɛe sɛ sɛnea Onyankopɔn kyekye yɛn werɛ wɔ yɛn ahohiahia nyinaa mu no, ɛsɛ sɛ yɛn nso yɛkyekye afoforo werɛ, na yɛbɔ mpae ma wɔn. (1:1-2:11) Ɛwom sɛ na Paulo ne n’ayɔnkofo no wɔ ɔhyɛ a emu yɛ den kɛse ase de, nanso Onyankopɔn gyee wɔn. Nanso, na Korintofo betumi abɔ mpae ama wɔn de aboa, sɛnea ɛsɛ sɛ yɛbɔ mpae ma afoforo a wogye nokware gyidi no tom mpo no. Na ɔbarima a ne bra asɛe a wɔka ne ho asɛm wɔ 1 Korintofo ti 5 no nso ɛ? Ɛda adi sɛ na wɔatu no, nanso na wanya adwensakra. Hwɛ sɛnea ɛbɛyɛ sɛ ne werɛ kyekyee bere a Korintofo no de firii no, na wɔde ɔdɔ san gyee no baa wɔn ntam bio no.

Paulo nsɛm no betumi ama anisɔ a yɛwɔ ma Kristofo som adwuma no ayɛ kɛse, na ahyɛ nokware gyidi no afã a yegyina no mu den. (2:12-6:10) Apam foforo no asomfo wɔ ɔkwan sɛ ‘wotu nkonimdi aprenten’ a Onyankopɔn na odi anim no bi! Ná Paulo ne ne mfɛfo adwumayɛfo wɔ ɔsom adwuma a ɛsom bo no, esiane mmɔborohunu a wɔayi adi akyerɛ wɔn no nti. Te sɛ wɔn no, wɔn a wɔasra wɔn a wɔwɔ hɔ nnɛ no wɔ mpata ɔsom adwuma. Nanso, Yehowa Adansefo nyinaa ma afoforo yɛ adefo denam wɔn ɔsom adwuma no so.

Munwie Kronnyɛ na Monyɛ Ayamyefo

Paulo kyerɛ sɛ ɛsɛ sɛ Kristofo asomfo wie wɔn kronnyɛ wɔ Onyankopɔn suro mu. (6:11-7:16) Sɛ yebegyina pintinn wɔ gyidi no mu a, ɛsɛ sɛ yɛkwati kɔndua koro a yɛne wɔn a wonnye nni bɛtwe no, na ehia sɛ yɛtew yɛn ho fi ɔhonam ne honhom fam fĩ ho. Korintofo no tew wɔn ho denam ɔbɔnefo a ne bra asɛe a wotuu no no so, na Paulo ani gyei sɛ ne krataa a edi kan no ahyɛ wɔn awerɛhow ma wɔanya adwensakra ama nkwagye.

Yehu nso sɛ asomfo a wosuro Onyankopɔn nya wɔn ayamye ho akatua. (8:1-9:15) Wɔ ntoboa a woyi ma “ahotefo” a ahia wɔn fam no. Paulo kaa Makedoniafo nhwɛso pa no ho asɛm. Na wɔada ayamye adi ma aboro nea wotumi yɛ so, na na ɔhwɛ kwan sɛ obehu ayamye a ɛte saa ara wɔ Korintofo no fam. Ɛsɛ sɛ wɔn adema​—ne yɛn de​—fi komam, efisɛ “nea ɔtew n’anim ma no na Onyankopɔn dɔ no,” na ɔma ne nkurɔfo yɛ adefo wɔ ayamye biara ho.

Paulo​—Ɔsomafo a Odwen Afoforo Ho

Sɛ yetumi yɛ biribi wɔ Yehowa som mu sɛ n’asomfo a, momma yɛnhoahoa yɛn ho wɔ ne mu na ɛnyɛ yɛn ankasa ho mu. (10:1-12:13) Anyɛ yiye koraa no, yɛnam honhom mu akode a “ɛyɛ den Onyankopɔn anim” nkutoo so na yebetumi abɔ atoro nsusuwii agu. Ná Korintofo no mu ‘asomafo a woye kyɛn so’ ahohoahoafo no rentumi nnya Paulo boasetɔ sɛ Kristo somfo kyerɛwtohɔ no bi. Nanso, sɛnea ɛbɛyɛ na wɔrenkamfo no ntra so no, Onyankopɔn anyi ne ‘ɔhonam mu nsɔe’ no​—ebia n’ani a na enhu ade yiye no anaa saa atoro asomafo no amfi hɔ. Ná Paulo bɛhoahoa ne ho wɔ ne mmerɛwyɛ mu mmom, sɛnea ɛbɛyɛ na “Kristo ahoɔden” atumi akata no so sɛ ntamadan. Sɛ ɔbarima a ogyinaa gyidi no mu pintinn no, na ɔnnaa ne ho adi sɛ ɔba fam sen asomafo a woye kyɛn so no. Ná Korintofo no ahu ɔsomafo a Paulo yɛ no a ada “nsɛnkyerɛnne ne anwonwade ne tumide” adi wɔ wɔn mu no ho adanse.

Sɛ ɔsomfo ne ɔsomafo no, na Paulo dwen ne mfɛfo honhom fam nneɛma ho, sɛnea ɛsɛ sɛ yɛyɛ mpo no. (12:14-13:14) Ná ‘ɔde fɛw pii bɛhwere ne nneɛma nyinaa ama wɔn kra.’ Nanso na Paulo suro sɛ sɛ odu Korinto a, obehu ebinom a wɔnsakraa wɔn adwene wɔ ɔhonam nnwuma ho. Enti, otu wɔn nyinaa fo sɛ wɔnkɔ so nsɔ wɔn ho nhwɛ sɛ ebia wɔwɔ gyidi no mu, na ne mpaebɔ ne sɛ wɔnnyɛ “bɔne bi.” Ɔrewie no, ɔhyɛɛ wɔn sɛ wɔmma wɔn ani nnye, wɔnsakra na wonnya awerɛkyekye, wonnwen adwenkoro, na wɔntra ase asomdwoe mu. Afotu pa ma yɛn nso bɛn ara ni!

Monkɔ So Nsɔ Mo Ho Nhwɛ!

Enti, Paulo krataa a ɛto so abien a ɔde kɔmaa Korintofo Kristofo no kyerɛ akwan horow a yɛbɛfa so akɔ so asɔ yɛn ho ahwɛ sɛ ebia yɛwɔ gyidi no mu anaa. Ɛda adi sɛ ɛsɛ sɛ ne nsɛm no ka yɛn ma yɛkyekye afoforo werɛ, sɛnea Onyankopɔn kyekye yɛn werɛ wɔ yɛn ahohiahia nyinaa mu no. Ɛsɛ sɛ nea ɔsomafo no kae wɔ Kristofo som adwuma no ho no kanyan yɛn ma yɛde nokwaredi yɛ bere a yewie yɛn kronnyɛ wɔ Yehowa suro mu no.

Paulo afotu no a yɛde bedi dwuma no betumi ama yɛayɛ ayamyefo pii na yɛaboa afoforo. Nanso ɛsɛ sɛ ne nsɛm no kanyan yɛn ma yɛhoahoa yɛn ho wɔ Yehowa mu na ɛnyɛ yɛn ankasa ho mu. Ɛsɛ sɛ ɛma ɔdɔ a yɛde dwen yɛn mfɛfo gyidifo ho no mu yɛ den. Ná akyinnye biara nni ho sɛ eyi ne Korintofo Nhoma a Ɛto so Abien no mu nsɛntitirw afoforo betumi aboa yɛn ma ‘yɛakɔ so asɔ yɛn ho ahwɛ sɛ ebia yɛwɔ nokware no mu anaa.’

[Adaka/​Mfonini wɔ kratafa  26]

DA YEHOWA ANUONYAM ADI: Bere a Mose de Adanse abopon abien no fi Sinai Bepɔw no so sian bae no, n’anim hyerɛnee efisɛ na Onyankopɔn ne no akasa. (Exodus 34:29, 30) Paulo kaa eyi ho asɛm sɛ: “Na yɛn nyinaa de yɛn ani a ɛso da hɔ hwɛ [Yehowa] anuonyam no sɛ [wɔhwɛ] ahwehwɛ mu, na wɔsakra yɛn kɔ suban koro no ara mu fi anuonyam mu kɔ anuonyam mu, sɛ efi [Yehowa] Honhom no ara.” (2 Korintofo 3:7-18) Wɔde fagude te sɛ kɔbere na ɛyɛɛ tete ahwehwɛ a ɛwɔ nsa, na na wɔatwitwiw ho yiye sɛnea ɛbɛyɛ na anim no ahyerɛn yiye. Te sɛ ahwehwɛ no, wɔn a wɔasra wɔn no da Onyankopɔn anuonyam a ɛhyerɛn fi Yesu Kristo hɔ ba wɔn nkyɛn no adi, na ‘ɛma wonya suban’ a Yehowa Ba a ɔda n’anuonyam adi no daa no adi no nkakrankakra. (2 Korintofo 4:6; Efesofo 5:1) Ɛdenam honhom kronkron no ne Kyerɛwnsɛm no so no, Onyankopɔn de “nipasu foforo,” n’ankasa su horow a ɛda adi no hyɛ wɔn mu. (Efesofo 4:24; Kolosefo 3:10) Sɛ ebia yɛn anidaso yɛ ɔsoro anaa asase so de no, momma yɛnna saa nipasu no adi na yenkura Onyankopɔn anuonyam a yɛbɛda no adi wɔ yɛn som adwuma mu no hokwan no mu.

[Adaka/​Mfonini wɔ kratafa  27]

“TRENEE AKODE”: Ɔkwan biako a Paulo ne ne mfɛfo no faa so kamfoo wɔn ho kyerɛe sɛ Onyankopɔn asomfo ne “trenee akode mu, nifa ne benkum” so. (2 Korintofo 6:3-7) Wɔde nsa nifa no soo nkrante no mu, na wɔde benkum no no nso soo kyɛm no mu. Ɛwom sɛ na wofi baabiara toa Paulo ne ne mfɛfo adwumayɛfo no de, nanso na wɔwɔ akode a wɔde bedi honhom mu ako. Wɔde ko tiaa atoro akyerɛkyerɛfo ne ‘asomafo a woye kyɛn so’ no, na wɔantwe Korinto asafo no amfi ahofama a wɔde bɛma Kristo no ho. Paulo amfa ɔhonam a atɔ sin no akode​—nnaadaa, anitew, anifere​—anni dwuma. (2 Korintofo 10:8-10; 11:3, 12-14; 12:11, 16) Mmom no, “akode” a ɔde dii dwuma ne trenee, ɔkwan a wɔfa so ma nokware som nya nkɔso wɔ ntua nyinaa akyi. Yehowa Adansefo de “trenee akode” a ɛte sɛɛ di atirimpɔw koro no ara ho dwuma.