Onipa Su A Wɔbɛsakra No

NYANSAPƐFO Sir Isaiah Berlin kae sɛ: “Ɛnyɛ bɔne a wɔbɛko atia nkutoo so na onipa nam tra ase. Wɔnam ankorankoro ne kuw botae pa ahorow so nso.” Nanso baahe na wobetumi anya “botae pa ahorow” a ɛte sɛɛ? Mpɛn pii no, onipa su dan kɔ nea enye na ɛsɛe ade so.

Sɛ nhwɛso no, wɔ Britania no, basabasayɛ nsɛmmɔnedi ahorow kɔɔ soro ɔha biara mu nkyem 11 nnansa yi. Britania ɔsoafo panyin no se: “Yɛn adwuma ne sɛ yɛbɛhwehwɛ akwanside ahorow sɛnea ɛbɛyɛ a anibuei kɛse no betumi akɔ so.” Nanso so mmara ne amammui nhyɛso horow, ɛmfa ho sɛ adwempa bɛn ara na ɛwɔ akyi no, betumi asesa nnipa su a wɔwɔ sɛ wɔbɛyɛ nea ɛnteɛ no? Nokwasɛm a ɛyɛ sɛ amumɔyɛ wɔ hɔ na ɛkɔ anim, bere a wɔhyɛ mmara, ne bere a wɔhwɛ ma wodi mmara so dennen mpo no, kasa ma ne ho. Wohia biribi a ɛsen mmara kwan so akwanside. Ɛsɛ sɛ wɔsesa nkurɔfo su ankasa.

Bere a Bible no reka asetra ho asɛm nokwarem ne sɛnea obiara bɛte ase no, ɛkyerɛkyerɛ onipa awosu bɔne no mu. Sɛ nhwɛso no, ɔsomafo Paulo kyerɛw kɔmaa ne mfɛfo Kristofo a na wɔwɔ Galatia faa “ɔbrasɛe, efi, ne nneyɛe a ɛho ntew . . . nkurɔfo bɛyɛ atamfo na wɔko; wɔyɛ ahoɔyaw, wɔn bo fuw, na . . . wɔn ani bere ade, wɔbow, wodi agobɔne, ne nneɛma afoforo a ɛte sɛ eyi no” no ho. Sɛnea Today’s English Version a yɛafa emu asɛm aka wɔ ha no kyerɛ no, nneyɛe horow a ɛbrɛ onipa ase yi nyinaa ne “nea onipa su yɛ.”​—Galatifo 5:19-21.

Ɔhaw no Fibea

Nanso, Today’s English Version no yɛ nkyerɛase a anni mfitiase kasa no akyi pɛpɛɛpɛ na asɛm “nea onipa su yɛ” no yɛ nea Paulo kae ankasa no a wɔde wɔn nsɛm aka ara kwa. Hela asɛmfua a Paulo de dii dwuma, sarx, no kyerɛ “honam,” na ɛnyɛ “onipa su.” Eyi nti, nkyerɛase a edi mfitiase kasa no akyi pɛpɛɛpɛ no ka “ɔhonam nnwuma” wɔ ha de kyerɛ Paulo asɛm no ase pɛpɛɛpɛ wɔ yɛn nnɛyi kasa mu.a

Bible kyerɛwtohɔ a ɛfa sɛnea bɔne baa nnipa mu no mu da hɔ na asete nyɛ den ​—nokwarem no, ɛyɛ mmerɛw sɛ wɔbɛte ase araa ma pii paw sɛ wɔrennye nni. Sɛɛ na Paulo kyerɛkyerɛɛ mu: “Sɛnea ɛnam onipa biako so na bɔne baa wiase, na owu nam bɔne so bae no, saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.” (Romafo 5:12) Ɛha no na Paulo reka Genesis a ɛyɛ Bible mu nhoma a edi kan no ne onipa a odi kan, Adam, ne ne yere, Hawa, bɔ ho asɛm. Wonim wɔn pɛ mu a wofi yɛɛ asoɔden no yiye. Enti, wobuu wɔn kumfɔ. Wɔn mma nyaa wɔn sintɔ no bi na wowuwui saa ara. Ne saa nti, “wɔn nyinaa ayɛ bɔne na Onyankopɔn anuonyam abɔ wɔn.” Saa ntease titiriw yi nti, aboro so koraa na onipa su tumi da sɛnea na ɛte bere a Onyankopɔn bɔɔ onipa a na ɔyɛ pɛ mfiase no adi kakraa bi.​—Romafo 3:23; Genesis, atiri 2 ne 3.

Wɔasakra Onipa Su!

Nanso, wobetumi adi onipa su horow a enye koraa no mu pii so. Nokwarem no, Bible se yebetumi asakra yɛn su a ntease no ne sɛ yɛbɛsakra yɛn nipasu. Ɔkwan bɛn so? Ɛdenam Onyankopɔn honhom kronkron no mmoa so.​—Romafo 8:9.

Wɔ Paulo nhoma a ɔkyerɛw kɔmaa ne mfɛfo Kristofo wɔ Kolose no mu no, ɔka no sɛɛ se: “Munyi onipa dedaw no ne ne nneyɛe ngu, na monhyɛ onipa foforo a wɔyɛ no foforo kɔ nimdeɛ mu nea ɔbɔɔ no no suban so no.” Ɔbobɔ su horow bi a ɛka nkurɔfo ma wɔdan kɔ nea ɛsɛe ade ho no din ka nipasu dedaw no nneyɛe no ho: anibere, abufuw, bobɔne, ne bɔnepɛ.​—Kolosefo 3:5-10.

Paulo rekyerɛw nea ɛte saa ara akɔma Kristofo a na wɔwɔ Efeso no, ɔka hia a “onipa foforo” a ɔka kyerɛ wɔn sɛ “wɔbɔɔ no Nyankopɔn so, nokware trenee ne ahotew mu” no ho hia no ho asɛm bio. Ɔtoa ne nkɔmmɔbɔ no so bere a ose: “Momma wonyi anobow nyinaa ne bobɔne ne abufuw ne ano kurokuro ne abususɛm ne bɔnepɛ nyinaa mfi mo mu. Na momma mo yam nyɛ yiye na ɛnhyehye mo mmoma mo ho.”​—Efesofo 4:24, 31, 32.

So na ntease wɔ Paulo nsɛm no mu? So wobetumi asakra nipasu ahorow ampa? Wiɛ, adanse no ne sɛ saa tete Kristofo no yɛɛ nsakrae akɛse wɔ wɔn asetra mu. Sɛ nnipakuw no, wɔtew wɔn ho fii wiase a na atwa wɔn ho ahyia no ho. Justin Martyr a na ɔyɛ tete Kristofo mmerɛ so abakɔsɛm kyerɛwfo bi no kyerɛwee sɛ: “Yɛn a na yɛtentan na yɛsɛe yɛn ho yɛn ho, na esiane suban mu nsonsonoe nti, yɛpowee sɛ yɛne nnipa a wofi mmusua afoforo mu bɛtra no, afei, fi bere a Kristo bae no, yɛne wɔn tra bom yɛ biribiara, na yɛbɔ mpae ma yɛn atamfo, na yɛbɔ mmɔden sɛ yɛbɛdan wɔn a wɔtan yɛn kwa no adwene ma wɔatra ase ma ɛne Kristo nsusuwii ahorow a ɛyɛ pɛ no ahyia.”

Ɛnnɛ nso ɛ? So ebetumi ayɛ yiye ara sɛ obi bɛyɛ ne su mu nsakrae akɛse a ɛte saa? Yiw! Nhwɛso ɔpedudu pii kyerɛ sɛ wɔda so ara reyɛ nsakrae akɛse. Nea edi so yi yɛ emu biako pɛ.

Wɔtetee Stephen wɔ mmeae a wɔyɛ mfiridwuma wɔ England no biako mu. Ná n’agya nnye Onyankopɔn biara nni. Stephen dii mfe 12 no, wɔde no kɔɔ mmofra bɔne sukuu mfe abiɛsa. Ná wagye atom sɛ wabɔ korɔn mpɛn 64! Ankyɛ na obu a ɔwɔ ma tumidi no yerae, na bere a ɔrenyin no, ne nsɛmmɔnedi no bɛyɛɛ nea anibere wom kɛse. Ná odwowtwa, asabow, ne basabasayɛ, a ɔne polisifo ntɔkwaw ka ho, ne bɔne a edi akyi a enti wɔde Stephen kɔtoo afiase. Ne su bɛyɛɛ basabasa kɛse. Ɔkae sɛ: “Bɔne biara nni hɔ a obi a onnim Nyankopɔn rentumi nyɛ, sɛ n’ahiade ahorow no yɛ kɛse sɛnea ɛsɛ a.”

Dɛn na na ebetumi asakra nsɛmmɔnedifo a ɔyɛ den saa? Awiei koraa no, Stephen gyee mmoa a ne nua a na wabɛyɛ Yehowa Adansefo mu biako de maa no no toom. Bere a Stephen suaa Bible no bere tiaa bi akyi no, ofii ase hyɛɛ “onipa foforo” no. Ná nsakrae ahorow a ɔyɛe no yɛ nwonwa ampa. Mprempren, mfe anum akyi no, waware a ɔwɔ anigye na ɔyɛ Yehowa Adansefo asafo no muni a otumi di asɛyɛde ho dwuma, na emu na ɔsom sɛ asafo mu ɔsomfo.

Enti wobetumi asakra onipa su wɔ ankorankoro fam. Nanso so nnipa mmerɛwyɛ ahorow nkutoo ne ade a ‘ɛresɛe anibuei’ nnɛ?

“Ɔbonsam a Ɔwɔ Kyerɛwsɛm mu No”

Ɔsomafo Paulo kyerɛw nkɔmhyɛ bi a ɛyɛ nwonwa a ɛfa “nna a edi akyiri” no ho. Wɔakyerɛw ne nsɛm no wɔ adaka a ɛwɔ atifi hɔ no mu. Hyɛ no nsow sɛ faako a nsɛmmɔnedi ne bɔne kodu no de “mmere a emu yɛ den” ba. So onipa su nkutoo na ɛde eyi nyinaa aba?​—2 Timoteo 3:1.

Dabi, biribi foforo wɔ hɔ, nkɛntɛnso bɔne bi a ɛde onipa mmerɛwyɛ ahorow di dwuma. Sɛnea ɛyɛ den ma binom sɛ wobegye adi sɛ wɔde bɔne woo onipa no, saa ara nso na ɛyɛ wɔn den sɛ wobegye atom sɛ tumi bi a ɔkorɔn sen onipa a ɔhwehwɛ sɛ ɔde no bedi dwuma wɔ hɔ. Nanso Bible se tumi a ɛte saa wɔ hɔ: Satan Ɔbonsam.

Asɛmfua “Ɔbonsam” (a ɛkyerɛ “ɔnototofo”) no pue mpɛn 33 wɔ Bible mu, na “Satan” (a ɛkyerɛ “ɔsɔretiafo”) no pue mpɛn 52. Eyinom mu pii ka honhom mu onipa bɔne koro no ara ho asɛm. Nanso, ebinom gye Satan bi ankasa a ɔwɔ hɔ no ho akyinnye, na wɔpɛ sɛ wɔka sɛ: “Onipa su ne bɔne a ebetumi ayɛ no ne ɔbonsam a ɔwɔ Kyerɛwsɛm mu no.”b Nanso, nea ɛyɛ anigye no, wɔ kyerɛwtohɔ a ɛfa Onyankopɔn akoa nokwafo Hiob ho no mu no, Hebri kyerɛwsɛm no de asɛm has·Sa·tanʹ, Satan no na edi dwuma, na wɔ Luka 4:2 no yɛkenkan sɛ ɛyɛ Ɔbonsam no (Hela: ho di·aʹbo·los) na ɔsɔɔ Yesu hwɛe. (Hiob 1:6) Wɔ nhwɛso abien no mu no, onipa pɔtee bi na wɔkyerɛ wɔ kasa mmara mu. Onipa su mma mu.

Ɔsomafo Paulo de bi ka ntease a yɛwɔ wɔ sɛnea Satan wɔ tumi kɛse no ho bere a, ɔrekyerɛw Efesofo no, ɔka “wiase yi sum mu atumfo . . . ahonhommɔne a ɛwɔ ɔsoro hɔnom” ho asɛm no. (Efesofo 6:12) Adaemone a wɔyɛ honhom mu abɔde bɔne a aniwa nhu wɔn no na wɔka Satan ho yɛ “wiase atumfo” no. ‘Wɔredaadaa amanaman nyinaa,’ na wɔde onipa tebea a ahwe ase no redi dwuma kɛse sɛnea ɛbɛyɛ yiye biara. (Adiyisɛm 12:9) Enti na Paulo hyɛ Kristoni biara dennen sɛ ‘onnyina ne Ɔbonsam nnɛɛdɛe nni asi’ no. Ɔka ho titiriw nti na adesamma aporɔw sɛnea yehu sɛ atwa yɛn ho nyinaa ahyia no.​—Efesofo 6:11.

Ɔsesɛw

Petro a ɔtraa ase Paulo bere so no ma yɛn awerɛhyem sɛ Satan ne n’adaemone no rentra hɔ daa na wɔatow ahyɛ adesamma so. Ose: “Sɛnea ne bɔhyɛ te no, yɛretwɛn ɔsoro foforo ne asase foforo a trenee te mu.” (2 Petro 3:13) Ampa, ɛrenkyɛ koraa, bɔne ne akwan horow a ɛnam so ba no nyinaa befi onipa asetra mu. Wɔbɛsɛe Satan ne n’adaemmone no. (Romafo 16:20; Adiyisɛm 20:1-3) Ɛno na afei, onipa su bɛda “Onyankopɔn anuonyam” adi ampa, na daa nkwa bɛyɛ adesamma abusua no anidaso a ɛbɛbam.​—Romafo 3:23.

Amerika ɔmanpanyin Thomas Jefferson kae sɛ: “Maka bere nyinaa na mɛka bere nyinaa sɛ nhoma Po Kronkron no a wɔyere wɔn ho pɛɛpɛɛ mu no bɛma yɛanya ɔmamma pa . . . Bible no ma wɔyɛ nnipa pa sen biara.” Sɛnea yɛahu no, sɛ yɛma kwan ma Bible mu nkrasɛm a tumi wom no nya yɛn asetra so nkɛntɛnso a, yɛn su betumi asakra. (Romafo 12:2) Yebetumi apaw sɛ yɛbɛhwehwɛ sɛ yɛn nsa bɛka nea anim yɛ nyam na ɛwɔ onyamesuro. Na sɛnea ɛbɛhyɛ yɛn den wɔ yɛn mmɔden a yɛbɔ sɛ yebenya nkɔanim no mu no, yebetumi apaw sɛ yɛne wɔn a wɔpɛ nokwarem sɛ wɔbɛyɛ saa ara no bɛbɔ fekuw. (Hebrifo 10:24, 25) Yehowa Adansefo wɔ ɔpɛ sɛ wɔbɛboa wo ɔkwan biara a ebetumi ayɛ yiye so. Dɛn nti na wo ne wɔn nni nkitaho mprempren!

[Ase hɔ asɛm]

[Adaka wɔ kratafa 6]

“NNA A EDI AKYIRI NO”​—Bible no Nkyerɛkyerɛmu

“Na hu eyi sɛ, nna a edi akyiri mu no, mmere a emu yɛ den bɛba. Efisɛ nnipa bɛyɛ ahopɛfo, sikapɛfo, ahohoahoafo, ahantanfo abususɛnkafo awofo asɛm ho asoɔdenfo bonniayɛfo, wɔn a biribiara ho ntew mma wɔn, Wɔn a wonni dɔ, apamsɛefo, ntwirifo, wɔn a wɔnhyɛ wɔn akɔnnɔ so, wɔn a wɔyɛ keka, wɔn a wɔmpɛ papa, afatwafo, anuɔdenfo, wɔn a wɔhoman, wɔn a wɔdɔ anigyede sen Nyankopɔn, wɔkatere wɔn anim kyerɛ onyamesom pa, nanso wɔpa emu ahoɔden. Saa nnipa yi, dan wo ho fi wɔn ho!””​—2 Timoteo 3:1-5.

[Mfonini wɔ kratafa 7]

Ɛrenkyɛ, onipa su bɛda Onyankopɔn anuonyam adi kɛse