Wubedum Ntamaa Wusiwusi?

YESU KRIST0 kaa Onyankopɔn Ahenni ho asɛmpa kyerɛɛ nnipa ahorow nyinaa. Na wɔhyɛ wɔn mu pii so, na wɔn abam abu. Nanso Yesu kaa nkuranhyɛsɛm kyerɛɛ wɔn. Na ɔwɔ ayamhyehye ma nnipa a wohu amane.

Asɛmpa kyerɛwfo Mateo sii Yesu ayamhyehye so dua denam adwene a ɔtwe sii nkɔmhyɛ bi a Yesaia kyerɛwee so no so. Mateo refa nsɛm a Kristo ma enyaa mmamu aka no, ɔkyerɛwee sɛ: “Demmire a abukaw no, ɔremmu mu, na kanea ntamaa a ayɛ wusiwusi nso, ɔrennum, de akosi sɛ ɔbɛma atemmu adu nkonim mu.” (Mateo 12:20; Yesaia 42:3) Nsɛm yi kyerɛ dɛn, na ɔkwan bɛn so na Yesu maa nkɔmhyɛ yi nyaa mmamu?

Nkɔmhyɛ no mu a Yɛbɛhwehwɛ

Demmire taa nyin wɔ baabi a ɛyɛ fɔkyee, na ɛnyɛ afifide a ɛwɔ ahoɔden na etumi kyɛ. “Demmire a abukaw” bɛyɛ mmerɛw ampa. Enti ɛte sɛ nea egyina hɔ ma nnipa a wɔhyɛ wɔn so anaa wɔrehu amane te sɛ ɔbarima a na ne nsa awu a Yesu saa no yare Homeda no. (Mateo 12:10-14) Na nkɔmhyɛ a ɛka kanea ntamaa ho asɛm no nso ɛ?

Na kanea a wɔtaa sɔ wɔ fie wɔ afeha a edi kan Y.B. mu ne kuku ketewaa bi a ɛte sɛ kuruwa a wɔakuntun ne nsa mu. Na wɔtaa de ngodua mu ngo gu kanea no mu. Bere a ntamaa a wɔanwene no nonom ngo no, ɛtwe kɔ gyaframa no mu. Nokwarem no, ‘ntamaa wusiwusi’ bɛyɛ nea ɛreyɛ adum.

Yesu kaa n’awerɛkyekyesɛm no kyerɛɛ nnipa pii a na wɔte sɛ demmire a abukaw wɔ sɛnkyerɛnne kwan so, wɔabrɛ wɔn ase na wonni baabi te. Na saa nnipa yi san te sɛ ntamaa wusiwusi efisɛ na aka kakraa bi ma wɔn nkwa nna kakra a aka no aba awiei. Na wɔhyɛ wɔn so na wobu wɔn abam ankasa. Nanso, Yesu ammubu sɛnkyerɛnne kwan so demmire a abukaw anaasɛ wannum sɛnkyerɛnne kwan so ntamaa wusiwusi bi. Nsɛm a ofi ɔdɔ, tema, ne ayamhyehye mu kae no amma nnipa a wɔrehu amane no abam ankɔ so ammu na wɔammotow. Mmom no, nea ɔka kyerɛɛ wɔn ne sɛnea ɔne wɔn dii no hyɛɛ wɔn den.—Mateo 11:28-30.

Ɛnnɛ nso, nnipa pii hia ayamhyehye ne nkuranhyɛ efisɛ wohyia ɔhaw ahorow a ebu wɔn abam. Ɛnyɛ bere nyinaa na Yehowa asomfo mpo wɔ ahoɔden a wɔde gyina ɔhaw ano. Ɛtɔ mmere bi a na ebinom te sɛ ntamaa wusiwusi. Enti ɛsɛ sɛ Kristofo hyɛ afoforo nkuran—wohuw ogya no mu, sɛnea yɛbɛka no no—na wɔnam saayɛ so ahyɛ wɔn ho wɔn ho den.—Luka 22:32; Asomafo no Nnwuma 11:23.

Sɛ Kristofo no, yɛpɛ sɛ yɛhyɛ afoforo den. Yɛrenhyɛ da mmɔ mmɔden sɛ yɛbɛma obi a ɔrehwehwɛ honhom mu mmoa ayɛ mmerɛw. Nokwarem no, yɛpɛ sɛ yesuasua Yesu nhwɛso wɔ afoforo a ɔhyɛɛ wɔn den no mu. (Hebrifo 12:1-3; 1 Petro 2:21) Nokwasɛm a ɛne sɛ yebetumi ama obi a ɔhwɛ kwan sɛ yɛbɛhyɛ no nkuran abotow a yɛnhyɛ da no yɛ ntease pa a enti ɛsɛ sɛ yesusuw sɛnea yɛne afoforo di no ho anibere so. Nokwarem no, yɛmpɛ sɛ ‘yedum ntamaa wusiwusi.’ Kyerɛwnsɛm mu akwankyerɛ ahorow bɛn na ebetumi aboa yɛn wɔ eyi mu?

Nea Ɔkasatia De Ba

Sɛ Kristoni bi ‘di mfomso bi a, ɛsɛ sɛ wɔn a wɔfata wɔ honhom mu no bɔ mmɔden teɛ saa onipa no so odwo honhom mu.’ (Galatifo 6:1) Nanso, ɛbɛyɛ papa sɛ yɛbɛhwehwɛ mfomso wɔ afoforo ho de hokwan biara adi dwuma de ateɛ wɔn so? Anaasɛ ɛbɛyɛ nea ɛteɛ sɛ yɛbɛhyɛ wɔn sɛ wɔmmɔ mmɔden kɛse denam kyerɛ a yɛbɛkyerɛ sɛ mmɔden a wɔbɔ mprempren no sua, na ebia ama wɔate afobu nka? Adanse biara nni ho a ɛkyerɛ sɛ Yesu yɛɛ biribi a ɛte saa. Ɛwom sɛ yɛpɛ sɛ yɛboa afoforo ma wonya nkɔanim de, nanso wɔn a yɛkasa tia wɔn denneennen no betumi ayɛ mmerɛw sen sɛ wɔbɛyɛ den. Sɛ ɔkasatia a ɛma obi nya nkɔso mpo kɔ akyiri tra so a, ebetumi abu n’abam kɛse. Sɛ mmɔden a ɛkyɛn so a Kristoni a ɔde ahwɛyiye yɛ ade bɔ no hyia ɔkasatia nkutoo a, obetumi apa abaw na waka sɛ ‘Dɛn nti na ɛsɛ sɛ mebɔ me ho mmɔden koraa?’ Nokwarem no, obetumi agyae yɛ koraa.

Ɛwom sɛ Kyerɛwnsɛm mu afotu a wɔde ma ho hia de, nanso ɛnsɛ sɛ ɛbɛyɛ mpanyimfo a wɔapaw wɔn anaa asafo no mufo afoforo su. Ɛnyɛ afotu a yɛde bɛma titiriw nti na yɛyɛ Kristofo nhyiam horow. Mmom no, yɛbom hyiam daa hyɛ yɛn ho den na yɛde nkuranhyɛ ma, na obiara anya fekubɔ ne ɔsom kronn a ɔde ma Onyankopɔn no mu anigye. (Romafo 1:11, 12; Hebrifo 10:24, 25) Hwɛ sɛnea ɛyɛ papa sɛ yehu nsonsonoe a ɛda mfomso a anibere wom ne sintɔ a nyansa ne ɔdɔ wom sɛ yebu yɛn ani gu so ntam!—Ɔsɛnkafo 3:1, 7; Kolosefo 3:13.

Nkurɔfo tie nkuranhyɛ ntɛmntɛm sen ɔkasatia. Nokwarem no, sɛ ankorankoro bi te nka sɛ wɔakasa atia wɔn wɔ ɔkwan a ɛmfata so a, wobetumi akɔ so akura suban a wɔkasa tia no mu denneennen! Nanso sɛ wɔkamfo wɔn wɔ ɔkwan a ɛfata so a, ɛhyɛ wɔn nkuran, na ɛkanyan wɔn ma wonya nkɔso. (Mmebusɛm 12:18) Enti te sɛ Yesu no, momma yɛnhyɛ afoforo nkuran na ‘yennnum ntamaa wusiwusi’ da.

Na Ntotoho a Yɛyɛ Nso Ɛ?

Kristofo afoforo suahu ahorow a ɛyɛ anigye a yetie betumi akanyan yɛn yiye. Yesu ankasa ani gyei bere a ɔtee sɛ n’asuafo no Ahenni asɛnka no asow aba no. (Luka 10:17-21) Saa ara nso na sɛ yɛte afoforo a wɔwɔ gyidi no mu nkonimdi, nhwɛso pa ne mudi mu kura ho asɛm a, ɛhyɛ yɛn nkuran na yesi yɛn bo kɛse sɛ yebekura yɛn Kristosom mu.

Na sɛ wɔde amanneɛbɔ bi ma wɔ ɔkwan bi so ma ɛkyerɛ sɛ ‘Wommɔ mmɔden sɛ saa Kristofo yi, na ɛsɛ sɛ wobɔ mmɔden sen sɛnea woyɛ no’ so nso ɛ? Ɛyɛ ade a otiefo no befi ase ayere ne ho denneennen sɛ obenya nkɔso? Ebia n’abam bebu na wapa abaw, ne titiriw sɛ wɔtaa yɛ ntotoho anaa wɔkyerɛ biribi saa a. Eyi bɛyɛ te sɛ ɔwofo a ɔrebisa ne ba sɛ, ‘Dɛn nti na wuntumi nyɛ w’ade sɛ wo nua no?’ Asɛm a ɛte saa no betumi ama ne bo afuw na n’abam abu, nanso entumi mma n’abrabɔ nyɛ papa. Ntotoho betumi anya mpanyimfo so tumi saa ara, na ebia ama wɔafa wɔn a wɔde wɔn toto wɔn ho no ho abufuw wɔ ɔkwan bi so.

Yentumi nhwɛ kwan sɛ nea yɛn nyinaa bɛyɛ wɔ Onyankopɔn som mu no kɛse bɛyɛ pɛ. Wɔ Yesu mfatoho ahorow no biako mu no, owura bi maa ne nkoa talente biako, abien, anaa anum. Ɔde eyi mae “sɛnea wɔn mu biara ahoɔden te.” Ɔkamfoo nkoa baanu a wodii gua nyansam de maa wɔn talente no dɔɔso no, efisɛ na wɔyɛ anokwafo, ɛwom sɛ ɛsono nea obiara adwuma ma onyae de.—Mateo 25:14-30.

Ɔsomafo Paulo kyerɛwee wɔ ɔkwan a ɛfata so sɛ: “Ma obiara nsɔ n’ankasa n’adwuma nhwɛ, ɛno na obenya n’ankasa ne ho biribi ahoahoa ne ho, na ɛnyɛ obi ho.” (Galatifo 6:4) Enti sɛ yɛbɛhyɛ afoforo nkuran ampa a, ɛnde ɛsɛ sɛ yɛbɔ mmɔden kwati sɛ yɛbɛyɛ ntotoho a ɛmfata.

Akwan Bi a Yɛbɛfa so Ahyɛ Afoforo Den

Dɛn na yebetumi ayɛ de ahyɛ wɔn a wɔn abam abu no nkuran na ‘yɛannum ntamaa bi a ayɛ wusiwusi’? Nkuranhyɛ a wɔde ma nyɛ ade a ɛsɛ sɛ wɔfa ɔkwan pɔtee bi so yɛ. Nanso, sɛ yɛde Bible nnyinasosɛm ahorow di dwuma a, ɛda adi sɛ nsɛm a yɛka no betumi ahyɛ afoforo den. Eyi mu bi ne nea ɛwɔ he?

Da ahobrɛase adi. Paulo tuu yɛn fo wɔ Filipifo 2:3 sɛ ‘yɛnnyɛ biribi atutupɛ anaa anuonyamhunupɛ so.’ Mmom no, ɛsɛ sɛ yefi ahobrɛase mu kasa na yɛyɛ ade. ‘Ɛsɛ sɛ yɛde ahobrɛase adwene bu afoforo sɛ wɔkyɛn yɛn.’ Paulo anka sɛ ɛnsɛ sɛ yedwen yɛn ankasa ho koraa. Nanso, ɛsɛ sɛ yehu sɛ obiara kyɛn yɛn ɔkwan bi so. Hela asɛmfua a wɔkyerɛɛ ase wɔ ha sɛ ‘kyɛn’ no kyerɛ sɛ obi “yi n’ani fi hokwan ahorow a n’ankasa wɔ so, na ɔhyɛ da susuw ɔfoforo dom akyɛde horow a oye kyɛn so wom no ho.” (New Testament Word Studies, a John Albert Bengel yɛe, Po 2, kratafa 432) Sɛ yɛyɛ eyi na yesusuw afoforo ho sɛ wɔkyɛn yɛn a, yɛne wɔn bedi wɔ ahobrɛase mu.

Da obu adi. Sɛ yefi komam kasa a, yebetumi ada no adi pefee sɛ yɛwɔ yɛn mfɛfo gyidifo anokwafo mu ahotoso, na yebu wɔn sɛ nnipa a wɔpɛ sɛ wɔsɔ Onyankopɔn ani. Nanso fa no sɛ wohia honhom fam mmoa. Sɛ saa a, momma yɛmfa obu ne nidi mmoa wɔn. Paulo ka ho asɛm wɔ saa kwan yi so sɛ: “Munni kan nnidi mo ho ni.”—Romafo 12:10.

Yɛ otiefo pa. Yiw, nea ɛbɛyɛ na yɛahyɛ wɔn a wohyia nsɛnnennen a ebu wɔn abam nkuran no, ehia sɛ yɛyɛ atiefo pa na ɛnyɛ wɔn a wonim kasa tenten. Sɛ anka yɛde nyansahyɛ a aba nnim kɛse bɛma ntɛm so no, momma yennye bere a ehia no mfa Kyerɛwnsɛm mu akwankyerɛ ahorow a edi ahiade ahorow a ɛwɔ hɔ ho dwuma ankasa mma. Sɛ yennim nea yɛbɛka a, Bible nhwehwɛmu bɛboa yɛn ma yɛaka awerɛkyekyesɛm akyerɛ afoforo na yɛahyɛ wɔn den.

Yi ɔdɔ adi. Ɛho hia sɛ yenya ɔdɔ ma wɔn a yɛpɛ sɛ yɛhyɛ wɔn nkuran no. Sɛ ɛfa yɛn mfɛfo Yehowa asomfo ho a, ɛsɛ sɛ ɔdɔ a yɛwɔ no ma yɛyɛ ade tra nea yɛyɛ na ama wɔadi yiye kɛkɛ. Ɛsɛ sɛ yenya tema a emu yɛ den ma wɔn. Sɛ yɛwɔ ɔdɔ a ɛte saa ma Yehowa nkurɔfo nyinaa a, nsɛm a yɛka no bɛhyɛ wɔn nkuran ankasa. Sɛ ehia mpo sɛ yɛde nyansahyɛ a ɛbɛma wɔanya nkɔso ma a, ɛremma sɛ wɔrente nea yɛbɛka no ase anaasɛ ebepira wɔn bere a yɛn botae ne sɛ yɛde mmoa a efi ɔdɔ mu bɛma na ɛnyɛ sɛ yɛbɛka asɛm bi kɛkɛ no. Sɛnea Paulo kae wɔ ɔkwan a ɛfata so no, “ɔdɔ de, ɛma nkɔso.”—1 Korintofo 8:1; Filipifo 2:4; 1 Petro 1:22.

Hyɛ Afoforo Den Bere Nyinaa

Wɔ “nna a edi akyiri” a emu yɛ den yi mu no, Yehowa nkurɔfo hyia sɔhwɛ pii. (2 Timoteo 3:1-5) Ɛnyɛ nwonwa sɛ ɛtɔ mmere bi a wohu amane kosi baabi a ɛte sɛ nea faako a wobetumi agyina akodu ara nen. Sɛ Yehowa asomfo no, akyinnye biara nni ho sɛ yɛmpɛ sɛ yɛbɛka nsɛm anaa yɛbɛyɛ nneɛma a ebetumi ama yɛn mfɛfo asomfo mu biara ate nka te sɛ ntamaa wusiwusi a ɛreyɛ adum.

Ɛnde, hwɛ hia a ɛho hia sɛ yɛhyɛ yɛn ho yɛn ho nkuran! Momma yɛmmɔ mmɔden biara sɛ yɛbɛhyɛ yɛn mfɛfo asomfo den denam ahobrɛase ne obu a yebeyi adi akyerɛ wɔn no so. Ɛmmra sɛ yɛbɛyɛ komm atie wɔn bere a wɔka wɔn kokoam nsɛm kyerɛ yɛn na yɛnhwehwɛ sɛ yɛbɛboa wɔn bere nyinaa denam wɔn adwene a yɛbɛtwe asi Onyankopɔn Asɛm, Bible so no so. Nea ɛsen ne nyinaa no, momma yenyi ɔdɔ adi nkyerɛ, efisɛ Yehowa honhom kronkron aba yi bɛboa yɛn ma yɛahyɛ yɛn ho yɛn ho den. Mommma yɛnnkasa anaa yɛnnyɛ ade wɔ ɔkwan biara a ebetumi ‘adum ntamaa wusiwusi’ bi so.