Hena Na Wopɛ Sɛ Ogye Wo Tom?

 1. Dɛn na yɛn nyinaa pɛ, na dɛn na ɛka ho?

SƐ OBI a wunim no na wubu no werɛ fi wo din a, ɛyɛ a wote nka sɛn? Anaa nea ɛyɛ yaw koraa no, sɛ ɔnkae wo koraa nso ɛ? Sɛ obi yɛ wo saa a, ebetumi ahaw wo pa ara. Adɛn ntia? Efisɛ yɛn mu biara pɛ sɛ afoforo gye no tom. Ɛnyɛ nea yɛpɛ ara ne sɛ afoforo bɛkyerɛ sɛ wonim yɛn; yɛpɛ sɛ wɔkyerɛ sɛ wonim yɛn nipaban ne nneɛma a yɛayɛ nso.—Num. 11:16; Hiob 31:6.

2, 3. Sɛ yɛpɛ sɛ nkurɔfo gye yɛn tom a, dɛn na ebetumi ama yɛn nsusuwii akyea? (Hwɛ mfoni a ɛwɔ adesua yi mfiase no.)

² Ɛwom sɛ yɛpɛ sɛ nkurɔfo gye yɛn tom de, nanso sintɔ nti, yɛanhwɛ yiye a, yɛbɛma yɛn nsusuwii akyea. Ebetumi ama yɛahwehwɛ sɛ afoforo begye yɛn atom sɛnea ɛnsɛ. Satan wiase no de, nea ɛpɛ ne sɛ ebepiapia yɛn ama yɛahwehwɛ sɛ yebegye din na yɛayɛ nnipa titiriw. Ɛba saa a, ɛremma yennye yɛn soro Agya Yehowa Nyankopɔn ntom sɛ ɔno pa ara na ɛfata sɛ yɛsom no.—Adi. 4:11.

³ Yesu bere so no, na nyamesom akannifo binom wɔ adwene a ɛnteɛ wɔ anuonyam a wobenya ho. Yesu bɔɔ n’akyidifo kɔkɔ sɛ: “Monhwɛ yiye wɔ akyerɛwfo no ho; wɔn na wɔpɛ sɛ wɔhyɛ ntade atenten kyinkyin na wɔpɛ gua so nkyia ne hyiadan mu nkongua a ɛwɔ anim [anaa nkongua papa] ne mpanyin tenabea wɔ anwummeduan ase.” Yesu toaa so kaa sɛ: “Eyinom benya atemmu a emu yɛ duru.” (Luka 20:46, 47) Nanso, Yesu kamfoo okunafo hiani a oyii ntoboa ketewaa bi a ɛbɛyɛ sɛ afoforo a na wɔwɔ hɔ anhu nea ɔyɛe no. (Luka 21:1-4) Yehu sɛ na ɛsono nea ɛma Yesu gye obi tom, ɛnna ɛsono nea ɛma afoforo nso gye obi tom. Adesua yi bɛboa yɛn ama yɛanya adwene a ɛteɛ, nea Yehowa Nyankopɔn gye tom.

 4. Hena na ogye yɛn tom a, eye sen biara, na adɛn ntia?

⁴ Ɛnde, hena na yɛyere yɛn ho ma ogye yɛn tom a eye sen biara? Ɛnyɛ edin a nkurɔfo pɛ sɛ wogye wɔ wiase yi nhomasua, aguadi, ne anigyede mu na eye sen biara. Mmom, ɛyɛ din a Paulo kaa sɛ ehia sɛ yenya. Ɔkaa sɛ: “Afei a moabehu Onyankopɔn, anaasɛ afei a Onyankopɔn mmom ahu mo no, adɛn nti na moresan adan akɔ mfitiasede hunu a hwee nnim no ho pɛ sɛ moyɛ nkoa ma no bio?” (Gal. 4:9) Hwɛ sɛnea ɛyɛ hokwan kɛse sɛ amansan Hene Pumpuni a ɔne ‘Onyankopɔn behu’ yɛn! Ɔpɛ sɛ ɔne yɛn nya adamfofa a emu yɛ den. Ɔbenfo bi kaa sɛ, ɛma “yɛbɛyɛ nkurɔfo a n’ani wɔ yɛn so.” Sɛ Yehowa gye yɛn tom sɛ ne nnamfo a, ɛnde na yɛreyɛ nea enti a ɔbɔɔ yɛn.—Ɔsɛnk. 12:13, 14.

 5. Dɛn na ɛsɛ sɛ yɛyɛ na ama Onyankopɔn ahu yɛn?

⁵ Mose nyaa nhyira a ɛte saa. Bere a Mose srɛɛ Yehowa sɛ ɔmma onhu n’akwan yiye no, Yehowa kaa sɛ: “Nea woaka yi nso mɛyɛ, efisɛ woanya m’anim dom, na mede wo din nim wo.” (Ex. 33:12-17) Yɛn nso, sɛ Yehowa nim yɛn a, yebenya nhyira a ɛso bi nni. Nanso, dɛn na yɛbɛyɛ na ama Yehowa de yɛn din ahu yɛn? Ɛne sɛ yebenya Yehowa ho dɔ na yɛahyira yɛn ho so ama no.—Kenkan 1 Korintofo 8:3.

6, 7. Dɛn na ebetumi asɛe yɛne Yehowa adamfofa?

⁶ Nanso, adamfofa a ɛsom bo a yɛne yɛn soro Agya no wɔ no, ehia sɛ yekura mu. Paulo kyerɛw Kristofo a wɔwɔ Galatia no sɛ, ɛnsɛ sɛ wɔyɛ nkoa ma wiase yi “mfitiasede hunu a hwee nnim no.” Saa ara na yɛn nso, ɛnsɛ sɛ yɛyɛ nkoa ma saa nneɛma no, na yɛhwehwɛ din wɔ wiase yi mu. (Gal. 4:9) Saa Kristofo a na wɔwɔ asomafo no bere so no, na wɔanya nkɔso ma enti na Onyankopɔn nim wɔn. Nanso, Paulo kaa sɛ saa anuanom no ‘resan adan akɔ’ nneɛma hunu ho. Nea na Paulo reka pa ara ne sɛ: “Baabi a moadu yi, adɛn nti na moadan mo ho resan akodi nsɛnhunu ne nneɛma hunu akyi bio?”

⁷ Yɛn nso, biribi a ɛte saa betumi ato yɛn nnɛ anaa? Yiw, ebetumi ato yɛn. Sɛnea Paulo yɛe no, yɛn nso bere a yebehuu Yehowa no, ebia yɛde edin a yebegye wɔ Satan wiase no mu too nkyɛn. (Kenkan Filipifo 3:7, 8.) Ebia yɛde hokwan a na yɛwɔ sɛ yebesua nhoma akɔ akyiri, anaa ebia yɛde dibea bi a yebegye atom too nkyɛn, anaa yɛde hokwan a na yɛwɔ sɛ yebenya sika pii wɔ aguadi mu too baabi. Ebia yenim nnwom to anaa yɛwɔ ho nimdeɛ, yɛbɔ mmɔden wɔ agodie mu, enti anka ebetumi ama yɛagye din na yɛanya sika pii. Nanso, yegyaee ne nyinaa akyi di. (Heb. 11:24-27) Seesei sɛ yenya adwene sɛ gyinae pa a yesisii no ama ‘yɛahwere ade’ a, ɛbɛyɛ nea nyansa nnim koraa! Sɛ yenya adwene a ɛte saa a, ebetumi ama yɛasan akodi nneɛma a yɛasi gyinae dedaw sɛ ɛyɛ wiase mfitiasede “hunu a hwee nnim” no akyi.a

 8. Yɛabɔ yɛn tirim sɛ yɛbɛma Yehowa agye yɛn atom. Dɛn na yɛbɛyɛ na yɛn werɛ amfi?

⁸ Yɛabɔ yɛn tirim sɛ yɛbɛma Yehowa agye yɛn atom, na ɛnyɛ wiase no. Dɛn na yɛbɛyɛ na yɛn werɛ amfi? Sɛ yebetumi ayɛ saa a, ehia sɛ yɛkae nokwasɛm mmienu bi a ɛho hia. Nea edi kan, wɔn a wɔsom Yehowa nokwarem no, ɔkae wɔn bere nyinaa. (Kenkan Hebrifo 6:10; 11:6) N’ani sɔ ne somfo biara yiye, na obu no sɛ ‘ɛnteɛ’ sɛ obebu n’ani agu wɔn a wɔsom no nokware mu no so. Yehowa “nim wɔn a wɔyɛ ne de” bere nyinaa. (2 Tim. 2:19) Yehowa “nim treneefo kwan,” na onim sɛnea obegye wɔn afi sɔhwɛ mu.—Dw. 1:6; 2 Pet. 2:9.

 9. Ma nhwɛso fa kyerɛ sɛnea Yehowa akyerɛ sɛ ogye ne nkurɔfo tom.

⁹ Bere bi a atwam no, Yehowa faa akwan soronko so kyerɛe sɛ ogye ne nkurɔfo tom. (2 Be. 20:20, 29) Ebi ne bere a Yehowa gyee ne nkurɔfo wɔ Po Kɔkɔɔ no ho, bere a na Farao asraafodɔm taa wɔn so no. (Ex. 14:21-30; Dw. 106:9-11) Ná saa asɛm yi yɛ nwonwa araa ma mfe 40 akyi no, na nnipa a wɔwɔ mpɔtam hɔ da so ara ka ho asɛm. (Yos. 2:9-11) Wɔahyɛ nkɔm ato hɔ dedaadaw sɛ Gog a ofi Magog bɛtow ahyɛ Yehowa nkurɔfo so. Ɛrenkyɛ na saa nkɔmhyɛ no abam; ɛhyɛ nkuran pa ara sɛ yɛbɛkaakae sɛnea Yehowa daa ne dɔ ne ne tumi adi kyerɛɛ ne nkurɔfo bere bi a atwam no! (Hes. 38:8-12) Saa bere no, yɛn ani begye pa ara sɛ yɛyɛɛ nea ɛbɛma Onyankopɔn agye yɛn atom na ɛnyɛ wiase no mmom.

10. Nokwasɛm foforo bɛn na ɛsɛ sɛ yɛkae?

¹⁰ Nokwasɛm a ɛho hia a ɛto so mmienu a ɛsɛ sɛ yɛkae ne sɛ: Yehowa betumi ayɛ nneɛma bi a yɛnhwɛ kwan koraa de akyerɛ sɛ onim yɛn. Bible aka sɛ, nkurɔfo a wɔyɛ papa sɛnea nnipa behu wɔn no rennya akatua biara mfi Yehowa hɔ. Adɛn ntia? Efisɛ sɛ afoforo kamfo wɔn a, ɛno ara ne wɔn akatua. (Kenkan Mateo 6:1-5.) Nanso, nkurɔfo a wɔyɛ afoforo papa a obiara mfa nkamfo a ɛfata mma wɔn no, Yesu kaa sɛ n’Agya ‘hwɛ wɔ kokoam.’ Yehowa hu nea wɔyɛ no, na obetua obiara ka sɛnea ɛsɛ. Nanso ɛtɔ da a, Yehowa tua yɛn ka wɔ akwan bi so a yɛnna nnwenee ho da. Ma yɛnhwɛ bi.

11. Dɛn na Yehowa yɛe de kyerɛe sɛ na onim ababaa Maria?

¹¹ Bere dui sɛ Onyankopɔn ma wɔwo ne Ba no sɛ onipa no, Yehowa paw Maria a ɔyɛ ɔbaabun a ɔbrɛ ne ho ase no sɛ ɔno na ɔbɛyɛ abofra a ɔbɛyɛ onipa titiriw no maame. Ná Maria te Nasaret. Ná Nasaret nyɛ kurow titiriw biara, na na ɛmmɛn Yerusalem ne n’asɔrefie fɛfɛ no. (Kenkan Luka 1:26-33.) Adɛn nti na Maria na Yehowa paw no de hokwan yi maa no? Ɔbɔfo Gabriel ka kyerɛɛ Maria sɛ ‘wanya Onyankopɔn anim dom.’ Akyiri yi, bere a Maria ne ne busuani Elisabet rebɔ nkɔmmɔ no, Maria daa no adi sɛ ɔne Yehowa wɔ abusuabɔ a emu yɛ den. (Luka 1:46-55) Nokwasɛm ne sɛ, na Yehowa rehwɛ Maria, na ne nokwaredi nti, Yehowa ma onyaa hokwan a na n’ani nna.

12, 13. Bere a wɔwoo Yesu ne bere a wɔde no kɔɔ asɔrefie hɔ nnafua 40 akyi no, sɛn na wɔhyɛɛ no anuonyam wɔ ɔkwan a ɛfata so?

¹² Awiei koraa no, bere a Maria woo Yesu no, Yehowa anhyɛ nnipa titiriw anaa atumfoɔ a wɔwɔ Yerusalem ne Betlehem no mu biara anuonyam efisɛ wammɔ wɔn amanneɛ. Saa bere no, na nguanhwɛfo a wommu wɔn sɛ wɔyɛ nnipa titiriw rehwɛ wɔn nguan wɔ wuram wɔ baabi a ɛbɛn Betlehem. Wɔn na Yehowa maa abɔfo kɔbɔɔ wɔn amanneɛ. (Luka 2:8-14) Ɛno akyi no, nguanhwɛfo no kɔhwɛɛ abofra a wɔawo no foforo no. (Luka 2:15-17) Bere a wɔhyɛɛ Yesu anuonyam saa no, wo de, hwɛ sɛnea ɛbɛyɛ sɛ Maria ne Yosef ani gyei na ɛyɛɛ wɔn nwonwa! Yɛnhwɛ nsonsonoe a ɛwɔ sɛnea Yehowa yɛ n’ade ne sɛnea Ɔbonsam nso yɛ n’ade mu. Bere a Satan somaa nsoromma mu ahwɛfo ma wɔkɔsraa Yesu ne n’awofo no, obiara a ɔwɔ Yerusalem tee sɛ wɔawo Yesu, na wei maa wɔn bo tui. (Mat. 2:3) Yesu awo ho asɛm a Satan ma wɔde too gua yi ma wokunkum mmofra bebree a wɔnyɛɛ bɔne biara.—Mat. 2:16.

¹³ Bere a wɔwoo Yesu na edii nnafua 40 no, na ɛsɛ sɛ Maria kɔbɔ afɔre ma Yehowa wɔ Yerusalem asɔrefie hɔ. Efi Betlehem rekɔ Yerusalem bɛyɛ akwansin nsia (kilomita 9). (Luka 2:22-24) Bere a Maria ne Yosef de Yesu nam kwan so no, ebia na Maria redwinnwen ho sɛ ɔsɔfo a ɔbɛbɔ afɔre no bɛka adwuma a Yesu bɛyɛ daakye ho asɛm soronko bi. Wɔhyɛɛ Yesu anuonyam de, nanso ɛnyɛ sɛnea ebia na Maria rehwɛ kwan no. Mmom, Simeon a ɔyɛ “onipa trenee a nyamesuro wɔ ne mu” ne odiyifobea Hana a wadi mfe 84 a ɔyɛ okunafo no na Yehowa ma wɔde too gua sɛ saa abofra no na ɔbɛyɛ Mesia, anaa Kristo a wɔahyɛ ne ho bɔ no.—Luka 2:25-38.

14. Nhyira bɛn na Maria nya fii Yehowa hɔ?

¹⁴ Maria nso ɛ? Yehowa kɔɔ so hyɛɛ Maria anuonyam sɛ́ ɔde nokwaredi hwɛɛ Yesu na ɔtetee no anaa? Yiw, ɔyɛɛ saa. Onyankopɔn ma wɔkyerɛw nneɛma a Maria yɛe ne nsɛm a ɔkae wɔ Bible mu. Ɛbɛyɛ sɛ, mfe mmiɛnsa ne fã a Yesu de tutuu akwan kaa asɛmpa no, Maria antumi ne no ankɔ. Esiane sɛ ebia na Maria yɛ okunafo nti, na ɛsɛ sɛ ɔtena Nasaret. Ɛwom sɛ nneɛma pii kɔɔ so a Maria anhu de, nanso bere a Yesu rewu no, na ɔwɔ ne nkyɛn. (Yoh. 19:26) Nanso akyiri yi, aka nna kakra ama Pentekoste afahyɛ no adu, bere a wohwiee honhom kronkron guu asuafo no so no, na Maria ka asuafo no ho wɔ Yerusalem. (Aso. 1:13, 14) Yebetumi aka pa ara sɛ na Maria ka asuafo a wɔde honhom kronkron sraa wɔn no ho. Sɛ ɛbaa saa a, ɛnde onyaa hokwan sɛ ɔbɛkɔ akɔka Yesu ho wɔ soro na ɔne no atena daa. Nokwaredi a ɔde somee ho akatua pa bɛn ara ni!

15. Bere a Yesu wɔ asase so no, dɛn na Yehowa yɛe de kyerɛe sɛ ogye ne Ba no tom?

¹⁵ Yesu anhwehwɛ anuonyam amfi nyamesom anaa amanyɔsɛm mu akannifo a na wɔwɔ ne bere so no hɔ. Nanso, bere a Yehowa fi soro kasaa tẽẽ mprɛnsa de kyerɛe sɛ ogye Yesu tom no, wo de, hwɛ sɛnea ɛbɛyɛ sɛ ɛhyɛɛ no nkuran. Bere a Yesu bɔɔ asu wɔ Yordan Asubɔnten no mu wiei pɛ, Yehowa kaa sɛ: “Oyi ne me Ba, nea medɔ no na magye no atom.” (Mat. 3:17) Ɛbɛyɛ sɛ, Yohane Osuboni no nko ara ne onipa foforo a ɔtee saa asɛm no. Ɛno akyi no, aka bɛyɛ afe baako ama Yesu awu no, Yesu asomafo mmiɛnsa tee sɛ Yehowa reka afa Yesu ho sɛ: “Oyi ne me Ba, nea medɔ no a migye no tom; muntie no.” (Mat. 17:5) Nea etwa to no, aka nna kakra ama Yesu awu no, Yehowa san fi soro kasa kyerɛɛ ne Ba no.—Yoh. 12:28.

16, 17. Dɛn na Yehowa yɛe de hyɛɛ Yesu anuonyam a na ɔnhwɛ kwan?

¹⁶ Ɛwom sɛ na Yesu nim sɛ wobedi atoro abɔ no sobo sɛ ɔyɛ mmusubɔfo na wawu animguase wu de, nanso ɔbɔɔ mpae sɛ Yehowa apɛde nyɛ hɔ; ɛnyɛ nea ɔno Yesu pɛ. (Mat. 26:39, 42) Yesu ‘huu asɛndua ho amane, buu n’ani guu aniwu so,’ efisɛ n’Agya nkutoo na na ɔpɛ sɛ ogye no tom, na ɛnyɛ wiase no. (Heb. 12:2) Dɛn na Yehowa yɛe de kyerɛe sɛ ogye Yesu tom?

¹⁷ Bere a Yesu wɔ asase so no, ɔkaa sɛ ɔpɛ sɛ ne nsa ka anuonyam a na ɔwɔ wɔ n’Agya nkyɛn wɔ soro no. (Yoh. 17:5) Biribiara nni hɔ a ɛkyerɛ sɛ na Yesu rehwehwɛ biribi a ɛkyɛn saa. Ná ɔnhwɛ kwan sɛ “wɔbɛbɔ n’aba so” wɔ soro. Nanso, dɛn na Yehowa yɛe? Ɔhyɛɛ Yesu anuonyam maa no dibea a na ɔnhwɛ kwan. Yehowa nyanee Yesu maa no “gyinabea a ɛkorɔn” ma ɔbɛyɛɛ honhom abɔde a owu nni ne so tumi. Ɛde besi saa bere no, na obiara nnyaa biribi a ɛte saa da!b (Filip. 2:9; 1 Tim. 6:16) Yesu de nokwaredi yɛɛ ne som adwuma. Hwɛ akatua a ɛso bi nni a onyae!

18. Dɛn na ɛbɛboa yɛn na yɛanhwehwɛ sɛ wiase yi begye yɛn atom?

¹⁸ Dɛn na ɛbɛboa yɛn na yɛanhwehwɛ sɛ wiase yi begye yɛn atom? Kae sɛ, Yehowa gye n’asomfo anokwafo tom bere nyinaa, na otua wɔn ka. Mpɛn pii no, ɔma wɔn akatua a wɔnhwɛ kwan. Hena na onim nhyira a yɛnhwɛ kwan a yebenya daakye? Seesei de, yɛrefa ahokyere ne sɔhwɛ ahorow mu wɔ wiase bɔne yi mu. Nanso, momma yɛnkae bere nyinaa sɛ wiase yi ne emu anuonyam biara retwam. (1 Yoh. 2:17) Yɛn Agya Yehowa a ɔwɔ ɔdɔ no ‘nyɛ nea ɔnteɛ sɛ ne werɛ befi yɛn adwuma ne ɔdɔ a yɛdaa no adi wɔ ne din ho.’ (Heb. 6:10) Nokwasɛm ne sɛ, ɔbɛdom yɛn; ebia nea seesei yɛnna nnwenee ho da mpo na ɔbɛma yɛn nsa aka!