Nokware Nyankopɔn Koro No Asomfo A Wɔyɛ Biako
“[Yehowa], . . . wo nkutoo ne Nyankopɔn.”—Dwow 86:9, 10.
1. (a.) Dɛn na Yehowa ayɛ ma ɛde ɔsom mu biakoyɛ aba? (b) Dɛn na ankyɛ na efii saa “afisiesie” no mu bae?
ƆSOM mu biakoyɛ—hwɛ sɛnea ɛyɛ anigye! Nanso adesamma mu ɔfã kɛse no ara nhuu eyi ɛ. Nanso ɔsom mu biakoyɛ nyɛ adaeso ara kwa. Ɛyɛ Onyankopɔn atirimpɔw. Mfeha dunkron a atwam ni no, Yehowa fii “afisiesie” adwuma bi ase a ne botae ne biakoyɛ—biakoyɛ a obi betumi ahu wɔ abusua a biakoyɛ ne ɔdɔ wom mu no. Ankyɛ na biakoyɛ a “afisiesie” no de bae no maa Yudafo a wɔyɛ Kristofo ne Samariafo boom somee wɔ ɔdɔ mu; afei wogyee Amanaman mufo a wɔyɛ momonotofo no baa asafo no mu. Nea ehia titiriw no biakoyɛ bɛdaa wɔn nyinaa ne Yehowa Nyankopɔn ntam esiane gyidi a wɔwɔ wɔ Yesu afɔrebɔ a ɛsom bo a ɔde pataa bɔne no mu nti. Wɔne no benyaa abusuabɔ a ɛte sɛ nea ɛda mma ne Agya a ɔwɔ ɔdɔ ntam no.
2. (a) Dɛn ne “afisiesie” no, na bere bɛn na efii ase? (b) “Nneɛma a ɛwɔ soro” a wɔboaboa ano no kyerɛ dɛn?
2 Efesofo 1:9, 10 [New World Translation] twe adwene si saa “afisiesie” yi so, sɛ: “Ɛyɛ sɛnea n’anisɔ a ɛma ɔbɔɔ ne tirim maa afisiesie [anaasɛ nhyehyɛe a wɔyɛ de hwɛ ofie nneɛma so] adwuma bi a ɔbɛyɛ wɔ mmere a wɔahyɛ ato hɔ no awiei koraa [Pentekoste afe 33 Y.B. mu reba] kyerɛ no sɛ, ɔbɛboaboa nneɛma nyinaa ano bio wɔ Kristo mu, nneɛma a ɛwɔ soro, ne [akyiri yi] nneɛma a ɛwɔ asase so no ano.” “Nneɛma a ɛwɔ soro” a wɔboaboa ano, a ɛne nnipa a wɔne Kristo bɛtra ne soro ahenni no mu no, fii ase wɔ Yudafo mu, wɔn a wodii hɔ ne Samariafo, ne afei Amanaman mufo.
3. Dɛn na “nneɛma a ɛwɔ asase so” a wɔboaboa ano no de aba?
3 Wɔ yɛn bere yi mu, titiriw efi 1935 no, yehu “nneɛma a ɛwɔ asase so” a wɔboaboa ano, a ɛne nnipa a wɔbɛma wɔn nkwa wɔ Paradise asase so no. Nnipa ɔpepem pii ayɛ Yehowa “afisiesie” adwuma a ɔdɔ wom no fã a ɛto so abien no ho biribi dedaw. Wofi aman ne kasa horow nyinaa mu. Biakoyɛ a wɔwɔ no nyɛ nnipa a wɔkɔ so kura wɔn kan gyidi ne wɔn nneyɛe ahorow mu ano ara kwa a wɔreboaboa. Na mmom, sɛnea wɔka too hɔ wɔ Yesaia 2:3 no, wɔresua Yehowa akwan sɛnea ɛbɛyɛ a wobetumi ‘anantew n’atempɔn’ so.
4. (a) Ɔsom mu biakoyɛ no bɛkɔ so akodu he, na Bible no ka eyi ho asɛm dɛn? (b) Sɔhwɛ a etwa to no akyi no adesamma a wɔayɛ pɛ no ne Yehowa benya abusuabɔ bɛn?
4 Nanso ɛnyɛ faako a wobenya asomdwoe no akodu nyinaa na yɛrehu nnɛ yi. Onyankopɔn atirimpɔw ma emu da hɔ sɛ wɔbɛka Onyankopɔn abɔde a wɔwɔ nyansa nyinaa abom wɔ nokware som mu. Wɔde tebea a ɛyɛ nwonwa a ɛbɛba wɔ Kristo Mfirihyia Apem Ahenni no awiei no ho mfonini kyerɛɛ Yohane, na ɔkyerɛkyerɛ mu wɔ Adiyisɛm 5:13, sɛ: “Na abɔde a ɛwɔ ɔsoro ne asase so ne asase ase ne ɛpo so ne nea ɛwɔ mu nyinaa, metee sɛ wose: Nhyira ne nidi ne anuonyam ne tumi nka nea ɔte ahengua no so, [Yehowa], ne oguammaa no [Yesu Kristo] daa daa.” Wɔ hɔ no Yohane hui sɛ wɔn nyinaa aka abom wɔ Yesu Kristo ase wɔ Yehowa som mu. Ɛno akyi, bere a sɔhwɛ a etwa to no atwam na wɔasɛe atuatewfo a wɔwɔ hɔ nyinaa awie no, Yehowa de ɔdɔ begye adesamma a wɔama wɔayɛ pɛ nyinaa a wodii nokware no atom sɛ ne mma denam Kristo so. Wɔbɛyɛ Onyankopɔn amansan abusua a wɔaka abom no fã, na Yehowa bɛyɛ wɔn nyinaa Nyankopɔn koro, Amansan Hene ne Agya a ɔwɔ ɔdɔ daa. Eyi yɛ anidaso a ɛyɛ anigye! So ɛyɛ wo pɛ sɛ wobɛka asomfo abusua a wɔwɔ anigye yi ho? —Romafo 8:20, 21.
“Wo Nkutoo Ne Nyankopɔn”
5, 6. Wɔ Dwom 86 no, dɛn na Dawid kyerɛw faa Onii a yɛsom no no ho?
5 Dwom 86 mu a yɛbɛhwehwɛ no bɛboa yɛn ma yɛahu nea ɛsɛ sɛ yɛyɛ na yɛanya saa nhyira no mu kyɛfa. Ná Dawid a ɔyɛ saa dwom a efi honhom mu no kyerɛwfo no wɔ nokware som mu ahofama ho kyerɛwtohɔ dedaw. Nanso ohui sɛ ɛho hia sɛ n’ankasa nya nkɔso wɔ honhom mu na eyi da adi wɔ nea ɔkyerɛwee no mu.
6 Wɔ nkyekyem 8-10 mu no ɔtwe adwene si Onii a na ɔsom no no so, sɛ: “Obiara nte sɛ wo, anyame mu, [Yehowa], na biribiara nte sɛ wo nnwuma. Amanaman a woyɛe nyinaa bɛba abɛkotow w’anim, [Yehowa], na wɔbɛhyɛ wo din anuonyam. Na woyɛ kɛse, na woyɛ anwonwade, wo nkutoo ne Nyankopɔn.”
7. Dɛn nti na gye a yebegye Yehowa atom sɛ ne nkutoo ne Nyankopɔn no ho hia titiriw?
7 Wɔ Dawid bere so, sɛnea ɛte nnɛ no, amanaman no wɔ anyame pii. Nanso Dawid de anisɔ a efi koma mu ka kyerɛɛ Yehowa sɛ: “Wo nkutoo ne Nyankopɔn.” Yesu Kristo sii nokware koro no ara so dua. Anadwo a etwa to ansa na ɔrewu no ɔbɔɔ n’Agya mpae, frɛɛ no sɛ, “nokware Nyankopɔn koro no.” (Yohane 17:3) Nanso, Kristoman som Baasakoro nyame, ɔpepem pii kotow ahoni; afoforo nso ayɛ nnipa akunini, sika, wɔn ankasa nipadua ne ɔbarima ne ɔbea nna anyame Enti, wo nso ɛ? So wo ankasa wugye di sɛ “obiara nte sɛ . . . [Yehowa],” na ɔno ne “nokware Nyankopɔn koro”?
8. Sɛnea wɔakyerɛ wɔ Dwom 86:11 no, dɛn na wɔhwehwɛ afi wɔn a wɔpɛ sɛ wɔsom Yehowa no nyinaa hɔ?
8 Ofi ne bere so rehwɛ daakye no, Dawid huu nnipa a wofi aman nyinaa mu sɛ wɔreba abɛsom Yehowa. Akyinnye biara nni ho sɛ Dawid hui sɛ sɛ nnipa a wɔte sɛɛ ba sɛ wɔbɛsom Yehowa a, ɛho behia sɛ wosua nneɛma pii. Ɛho behia sɛ wɔyɛ nsakrae wɔ wɔn asetra mu. Nanso Dawid gye toom ampa sɛ ɔno nso hia nkyerɛkyerɛ, ne sɛ nsakrae ahorow ho behia wɔn n’ankasa fam. Wɔ Dwom 86:11 no ɔkae sɛ: “[Yehowa] kyerɛ me wo kwan, mɛnantew wo nokware mu, ka me koma bom ma ensuro wo din.” So ɛyɛ yɛn nso yɛn pɛ?
9. Dɛn nti na yɛyɛ nnipa a wɔaka abom, na asɛyɛde bɛn na yɛwɔ wɔ eyi mu?
9 Biakoyɛ a ɛwɔ Yehowa Adansefo mu no yɛ nea ɛda nsow ampa. Eyi te saa efisɛ, sɛ kuw no, yɛte nka te sɛ nea Dawid tee nka no—yɛhwehwɛ Yehowa akwankyerɛ na yɛyɛ ade ma ɛne no hyia. Ɛsɛ sɛ yenya ɔpɛ sɛ yɛde yɛn suban ne yɛn abrabɔ bɛboa ma saa biakoyɛ no atra hɔ. Nea ɛka ho bio no, yebetumi abɔ yɛn biakoyɛ no ho ban na yɛaboa afoforo ma wɔabenya mu kyɛfa denam mmɔden a yɛbɛbɔ de ama anigyefo afoforo anya anisɔ ama nneɛma a ɛka yɛn bom no so.
Nneɛma A Ano Yɛ Den A Ɛka Yɛn Bom
10. Dɛn ne nneɛma a ɛka yɛn bom no mu nea edi kan?
10 Nea edi kan ne sɛ yɛn nyinaa som Yehowa na yegye hokwan a ɔwɔ sɛ ɔde nea ɛteɛ ne nea ɛnteɛ ho gyinapɛn si hɔ no tom. (Adiyisɛm 14: 6, 7; Genesis 2:16, 17) Hwɛ nkɛntɛnso kɛse a ɛno anya wɔ Yehowa nkurɔfo so wɔ wiase nyinaa! Sɛnea Bible kyerɛ no, Yehowa, ne, “Nea Ɔkorɔn na Wɔama No So, nea ɔte hɔ daa na ne din yɛ kronkron.” (Yesaia 57:15) Bere a yɛsom no na yedi n’ahyɛde horow so no, enya yɛn so nkɛntɛnso pa. Esiane sɛ saa ahyɛde yi yɛ nea ɛsɛ sɛ wɔde di dwuma wɔ asase so baabiara nti, di a yedi so no aka yɛn abom sɛ nnipa biako.
11. Ɔkwan bɛn so na yebetumi aboa wɔn a wɔaba asafo no mu foforo ma wɔanya biakoyɛ yi mu kyɛfa?
11 Nanso ɛtɔ bere bi a nnipa a wɔne yɛn bɔ de wɔn ho hyɛ abrabɔ bɔne a anibere wom mu. Dɛn ntia? Bere a wobisaa abusuabɔ a wɔne Onyankopɔn wɔ ho asɛm no, ebinom kae sɛ, ‘Ná minnye Onyankopɔn nni ankasa.’ Enti wɔammu nea ɔhwehwɛ no sɛ ɛyɛ aniberesɛm nso. So yebetumi aboa wɔn a yɛne wɔn sua ade no ma wɔabenya Yehowa mu gyidi ankasa? Ɛsɛ sɛ yesi so dua kyerɛ wɔn sɛ nokware som nyɛ nkyerɛkyerɛ ahorow bi a wogye tom, kɔ Ahenni Asa so na ebia bere ne bere mu no wɔde nnɔnhwerew kakraa bi akɔ asɛnka ara kwa. Ɛho hia sɛ wɔn a wɔpɛ sɛ wɔsom Yehowa no ne no nya abusuabɔ pa. Ɛsɛ sɛ wosua sɛnea wɔn ankasa bɛbɔ no mpae daa, ahwehwɛ n’akwankyerɛ wɔ biribiara a wɔyɛ mu. (Filipifo 4:6; Mmebusɛm 3:5, 6) Afei wobefi ase anya biakoyɛ a ɛyɛ nwonwa a yɛwɔ no mu kyɛfa.
12, 13. (a) Ɔkwan bɛn so na ade a ɛto so abien a, wɔabɔ din wɔ ha no ka yɛn bom? (b) Sɛ obi benya mu mfaso kɛse a, dɛn na ɛsɛ sɛ ɔyɛ?
12 Nea ɛto so abien ne eyi: Yɛyɛ biako efisɛ, baabiara a yɛwɔ wɔ wiase no, yɛwɔ Onyankopɔn Asɛm, Bible no, a ɛkyerɛ yɛn kwan. Yebu Bible no sɛ efi honhom mu, na nneɛma a ɛtwee yɛn mu bebree bɛbɔɔ Yehowa Adansefo ho no mu biako ne nokwasɛm a ɛyɛ sɛ Adansefo no di Bible no akyi wɔ nokware mu no.—2 Timoteo 3:16, 17.
13 Ebia wɔn a yɛne wɔn sua ade no begye atom bere a yɛka sɛ Bible no yɛ Onyankopɔn Asɛm no. Nanso wɔakenkan Bible no akodu he? Ɛbɛyɛ nea eye sɛ yɛbɛhyɛ wɔn mu biara nkuran ma wakenkan ne nyinaa, na bere a wɔyɛ saa no wɔnhwɛ sɛnea ɛsɛ sɛ Bible no ka wɔn gyinaesi ahorow wɔ da biara da asetra mu. Ná Yesu nim n’Agya apɛde yiye na ɔma ɛtraa n’adwene ne ne koma mu yiye ma enti otumi kae sɛ, “Meyɛ nea ɛsɔ n’ani daa.” (Yohane 8:29) Hwɛ botae pa a eyi yɛ ma yɛn nyinaa!
14. Dɛn nti na ade a ɛto so abiɛsa a wɔabɔ din wɔ ha no ho hia, na dɛn na yebetumi ayɛ na yɛama eyi ho anisɔ atra wɔn a wɔyɛ foforo no mu?
14 Ade a ɛto so abiɛsa a ɛka yɛn bom ne sɛ yɛn nyinaa nya mfaso fi nhyehyɛe koro a wɔpɛ de mo yɛn honhom fam aduan no mu. Yebu “akoa nokwafo ne ɔbadwemma kuw” no sɛ kuw a Yehowa de redi dwuma de honhom fam aduan ama wɔ bere a ɛsɛ mu.’ (Mateo 24:45-47) Yegye tom yiye sɛ ɔsoro Ahenni adedifo a wɔde honhom asra wɔn a yehu wɔn nnɛ wɔ Yehowa Adansefo mu nkutoo no na wɔbom yɛ saa “akoa” yi. Yɛn ani sɔ nea “akoa” no ne ne Sodikuw no reyɛ de adi yɛn honhom fam ahiade ho dwuma no. Na yɛda Onyankopɔn ase wɔ honhom fam nneɛma pa pii a yɛwɔ no ho. (Yesaia 65:13, 14) So yɛde bere pii reyɛ adwuma de aboa nnipa a wɔde wɔn ho bɛbɔɔ asafo no nkyɛe no ma wɔanya saa nhyehyɛe yi ho anisɔ?
15, 16. (a) Hena na yegye no tom sɛ yɛn Kwankyerɛfo? (b) Ɔkwan bɛn so na anisɔ ma afã a Yesu wɔ wɔ yɛn som mu no ka yɛn su wɔ yɛn ho yɛn ho ho?
15 Ade a ɛto so anan a ɛka yɛn bom, na ɛho hia yiye, ne sɛ, Yesu Kristo, ne yɛn Kwankyerɛfo na ɛnyɛ onipa biara, na ɔne nea yɛn nyinaa nam no so kɔ Yehowa anim wɔ ɔsom mu. Wɔ dapɛn a etwa to wɔ n’asetra mu sɛ onipa no mu no, Yesu sii hia a eyi ho hia no so dua. Wɔ Mateo 23:8, 10 (New World Translation) no ɔkae sɛ: “Wɔmmfrɛ mo . . . ’akwankyerɛfo,’ na mo Kwankyerɛfo yɛ biako, ɔne Kristo.” Ɛnnɛ, baabiara a obi wɔ wɔ wiase no, sɛ obisa Yehowa Adansefo mu biako sɛ ‘Hena ne mo Kwankyerɛfo?’ a, obenya mmuae koro no ara sɛ: ‘Ɛyɛ Awurade Yesu Kristo.’
16 Ɛnam Yesu so nkutoo na yebetumi akɔ Onyankopɔn anim wɔ ɔsom mu. Dɛn ntia? Efisɛ wɔwoo yɛn nyinaa wɔ bɔne mu, na na yɛwɔ owu afobu ase. Yɛn mu biara nni hɔ a asɛm yi mfa ne ho. Ɔkwan biako a wɔnam so gyee yɛn mu biara toom sɛ Onyankopɔn somfo ne gyidi a yenyae wɔ Yesu Kristo afɔrebɔ no mu no, na ɛnam ne nkutoo so na afei yetumi bɛn Onyankopɔn wɔ mpaebɔ mu. Eyi ho anisɔ a efi koma mu yɛ ade a ɛho hia wɔ nokware som mu.—Romafo 3:23; Yohane 14:6.
17. Ɔkwan bɛn so na yɛn su wɔ Onyankopɔn Ahenni no ho ama yɛayɛ soronko wɔ Kristoman ho nanso aka yɛn abom sɛ Yehowa Adansefo?
17 Ade a ɛto so anum a ɛka yɛn bom ne sɛ, baabiara a yɛte no yɛde yɛn ho to Onyankopɔn Ahenni no so sɛ ɛne adesamma anidaso koro pɛ. (Mateo 6:9, 10; Daniel 2:44) Kristoman asɔfo nyɛɛ eyi. Esiane eyi nti wɔde wɔn ho hyɛ wiase no amammuisɛm ne n’akodi ahorow mu. Nea ɛne eyi bɔ abira koraa no, Yehowa Adansefo a wɔwɔ nsase nyinaa so agye nokwasɛm a Yesu Kristo kae sɛ n’asuafo ‘renyɛ wiase no fã’ no atom. (Yohane 17:15, 16) Nea ɛne Onyankopɔn Asɛm hyia no, yɛde yɛn mfoa abobɔ nsɔw, de yɛn mpeaw ayeyɛ nnare. Yɛmma akode so ntia yɛn yɔnko nnipa, na yensua akodi bio. (Mika 4:3) Yegye di yiye sɛ adesamma haw no ano aduru koro pɛ ne Onyankopɔn Ahenni no. Esiane eyi nti, yɛne yɛn mfɛfo Adansefo a wɔwɔ wiase nyinaa aka abom wɔ amanaman ntam nuayɛ ankasa mu.
18. Ɔkwan bɛn so na Onyankopɔn honhom aba no ka yɛn bom? Ma Nhwɛso ahorow.
18 Yɛtwe adwene kɔ aba a Onyankopɔn honhom kronkron no soro wɔ Yehowa asomfo asetra mu no so sɛ ade a ɛto so asia a ɛde yɛn biakoyɛ no ba. Na hwɛ aba pa a eyi yɛ —nea ɛma yɛn ani gye sɛ yɛbɛbom atra! Ɛmfa ho sɛ ɛho hia sɛ yɛn ankasa yɛ nsakrae wɔ mmeae binom no, ɛyɛ nokware sɛnea Yesu kae no: “Sɛ mododɔ mo ho a, nnipa nyinaa behu sɛ moyɛ m’asuafo.”—Yohane 13:35; Galatifo 5:22, 23.
19. Hena na yɛne no yɛ biako denam Kristofo som adwuma no mu kyɛfa a yenya no so?
19 Nea ɛka eyinom a yɛadi kan aka ho asɛm no ho ne nea ɛto so ason yi: Yɛn nyinaa sɛ Yehowa Adansefo no wɔ asɛyɛde sɛ yɛka Onyankopɔn Ahenni no ho asɛmpa. Eyi yɛ asɛyɛde, na ɛyɛ hokwan nso. Sɛnea ɔsomafo Paulo kyerɛkyerɛɛ mu no, kyɛfa a yenya wɔ Kristofo som adwuma no mu no ma yɛbɛyɛ Onyankopɔn adwumayɛboafo. Bere a ebia yɛn mu biako dua na ɔfoforo nso gugu so nsu no, Yehowa ne Nea ɔma enyin na asuafo afoforo fi mu ba.—Mateo 24:14; 1 Korintofo 3:6-9.
Pintinn Wɔ Nokware Som Afã
20. (a) Dɛn nti na ebinom a wɔba Ahenni Asa so no rennya ɔsom mu biakoyɛ mu nhyira horow no nyinaa? (b) Dɛn nti na ɛsɛ sɛ wɔde ntɛmpɛ begyina Yehowa afã mprempren ara?
20 Bere a wɔn a wɔde wɔn ho abɔ Yehowa Adansefo ho foforo no gye saa nokware ahorow a ɛka yɛn bom no tom na wɔyɛ wɔn ade ma ɛne no hyia no, wɔn nso betumi anya anigye a efi biakoyɛ a wɔde som nokware Nyankopɔn koro no mu ba no bi. Nanso, ebinom ma nokware no ho nimdeɛ a wonyae mfiase no ara dɔɔ wɔn so. Wosua Onyankopɔn Ahenni no nhyira horow no ho ade, nanso wɔmma nokware no nnye ntini wɔ wɔn koma mu. Wɔn ani gye sɛ wɔbɛka yɛn ho, nanso wɔmpɛ sɛ wɔbɛyɛ nneɛma wɔ Yehowa kwan so bere nyinaa. Wɔ akwan horow bi so no wɔte sɛ nnipa a wɔtraa ase wɔ odiyifo Elia bere so no, a wɔn na Elia kaa no ahoɔden so kyerɛɛ wɔn sɛ: “Dabɛn na mubehinhim nsɛm abien ntam akosi? Sɛ [Yehowa] ne Nyankopɔn a, munni n’akyi; sɛ Baal nso a, munni n’akyi ɛ!” (1 Ahene 18:21) Sɛ Yehowa bere a wahyɛ ato hɔ no du sɛ ɔbɛsɛe mprempren nhyehyɛe bɔne yi a, ɔrentwentwɛn ne nan ase. Ɔrentu bere no nhyɛ da na ɔrensakra ne gyinapɛn ahorow no sɛnea ɛbɛyɛ a obegye wɔn a wɔda so ara rebɔ mmɔden sɛ wɔbɛfam wiase no ho, wɔn a. wɔn koma nni mũ wɔ Onyankopɔn apɛde a wobesua na woayɛ mu no. Enti hwɛ sɛnea ɛho hia sɛ wɔn a wɔkyerɛ nokware no ho anigye nyinaa yɛ ho biribi mprempren sɛ wɔne Yehowa benya abusuabɔ ankasa a ɛtra ho daa.
21. Ɛsɛ sɛ yɛboa wɔn a yɛne wɔn sua Bible no ma wonya honhom mu nkɔso bɛn?
21 Ɛnyɛ nea yɛpɛ ne sɛ yɛne wɔn a wɔrebɛn asubɔ ho no besua nokware no mfitiasesɛm no nko na mmom sɛ yɛbɛboa wɔn,ma wɔapere akɔ Kristofo onyin mu. Akɔnnɔ a wobenya ama honhom fam aduan a ɛyɛ den nso ka ho. Ɛho hia sɛ wosua sɛnea wobenya eyi mu anigye ne ahoɔden, na wɔahu sɛnea ebetumi aboa wɔn ma wɔn ankasa asisi gyinae pa.—Hebrifo 5:12-14.
22. Dɛn nti na yɛn som adwuma no yɛ hokwan kɛse ampa?
22 Hokwan kɛse bɛn ara na ɛyɛ yɛn de sɛɛ yi sɛ yebenya nhyehyɛe a Yehowa ayɛ sɛ ɔde bɛka ɔne nnipa a wofi aman nyinaa mu abom denam Yesu Kristo so no mu mfaso na yɛayɛ ade ma ɛne no ahyia! Nokware Nyankopɔn koro no de hokwan a ɛyɛ nwonwa yi ama yɛn sɛ yɛnyɛ ne din kronkron Yehowa no ho Adansefo. N’ankasa ne Dɔba koro a ɔredi tumi mprempren sɛ Ɔhene no yɛɛ nhwɛso maa yɛn na ɔda so ara yɛ nhwɛso ma yɛn wɔ ɔsom a ɛma yetumi ne Yehowa nya abusuabɔ a emu yɛ den na ɛyɛ anigye na yɛne yɛn ho yɛn ho yɛ biako no mu. Enti momma yennya Yehowa din a yɛbɛhyɛ no anuonyam ne afoforo a yɛbɛboa wɔn ma wɔahu ɔkwan a wobetumi afa so anya nhyira a ɛyɛ nnipa a wɔyɛ biako wɔ nokware Nyankopɔn koro no som mu no nkutoo de no bi no mu kyɛfa nkosi ase.
Ntimu
□ Ɔsom mu biakoyɛ no bɛkɔ so akode he, na ɛno betumi akyerɛ dɛn ama wo?
□ Ɔkwan bɛn so na yebetumi akyerɛ sɛ yɛwɔ adwene a wɔada no adi wɔ Dwom 86:11 no bi?
□ Dɛn ne nneɛma a ahoɔden wom a ɛka yɛn bom no mu binom?
□ Bere a wɔasua Bible mu nokware mfitiasesɛm no akyi no, ɛsɛ sɛ yɛboa yɛn adesuafo ma wonya nkɔso bɛn bio?
[Kratafa 11 mfoni]
‘Yehowa wo nkutoo ne Nyankopɔn’