Ɔkwan a Ɛtrɛw a Ahofadi Nnim

Ná abusua bi a emu nnipa yɛ baasa—agya, ɛna ne ɔbabea ketewa—bi wɔ wɔn fie wɔ Sydney, Australia, na ogya tɔɔ ɔdan no mu. Wɔbɔɔ mmɔden sɛ wobehuruw afa mpomma mu, nanso na adaban beabea mu. Esiane adaban no nti, odumgyafo no antumi annye wɔn nkwa. Ɛna ne agya no wui wɔ wusiw ne gyaframa no mu. Ɔbabea no wui akyiri yi wɔ ayaresabea.

HWƐ awerɛhow ara a ɛyɛ sɛ saa abusua yi mufo wuwui esiane biribi a wɔde bɔɔ hɔ a na wosusuw sɛ ɛbɛbɔ wɔn ho ban nti! Ɛyɛ asɛm bi a ɛda no adi yɛn nnɛ mmere yi sɛ ɛnyɛ saa abusua yi nko na ɛde adaban ne nkradua abɔ wɔn fie ho ban. Wɔn mpɔtam hɔfo pii nso wɔ afie ne agyapade ahorow te sɛ abannennen. Dɛn ntia? Wɔrehwehwɛ ahobammɔ ne asomdwoe. Hwɛ abasamtu a ɛyɛ wɔ “ahofadi wiase” mu, bere a gye sɛ nkurɔfo to wɔn ho pon mu te sɛ nneduafo wɔ wɔn ankasa afi mu ansa na wɔate nka sɛ wɔwɔ ahobammɔ! Wɔ mmeae pii no, mmofra ntumi nni agoru dwoodwoo wɔ agodibea bi a ɛbɛn wɔn anaa wontumi nkɔ sukuu a wɔn wofo anaa ɔpanyin foforo bi nka wɔn ho. Wɔ asetram nneɛma pii mu no, ahofadi reyera te sɛ anɔpa bosu.

Asetra Kwan a Asakra

Ná yɛn nananom mmere no yɛ soronko. Bere a wɔyɛ mmofra no na wotumi di agoru bere nyinaa wɔ baabiara a wɔpɛ a wonsuro. Ná mpanyimfo nnwen kradua ne adaban ho. Wɔn ho tɔɔ wɔn, na wonyaa ahofadi kosii baabi. Nanso yɛn nananom ahu sɛ nnipa su asakra wɔ wɔn nkwa nna mu. Wonni tema, wɔn pɛsɛmenkominya adɔɔso; wɔ mmeae pii no, afipamfo ho suro abesi yɔnkodɔ ananmu, na ɛno ka ho bi na awerɛhow tebea a wɔbɔɔ din wɔ atifi hɔ no aba. Nea ɛka ahofadi a ɛreyera kɛse no ho ne abrabɔ pa a ɛresɛe ntɛmntɛm. Nnipa abɛyɛ wɔn a “abrabɔ foforo” akɛntɛn wɔn so, nanso nokwarem no, tebea no adu baabi a ɛyɛ den sɛ wobehu abrabɔ gyinapɛn bi mprempren.

Ɔbenfo Rupert Goodman, a na ɔkyerɛ nhomasua ho ade wɔ Queensland Sukuupɔn mu, kyerɛw sɛ: “Seesei mmofra hu asetra kwan . . . soronko a egyina anigyede so a wɔtwe adwene si ‘ahopɛ’ so kɛse: ahohwi, ahokyerɛ, pɛsɛmenkominya, ahopɛ.” Ɔsan ka sɛ: “Su te sɛ ahosodi, nneɛma a wɔde kame wɔn ho, adwumaden, sika a wɔhwɛ so yiye, obu a wɔde ma tumidi, ɔdɔ ne nidi a wɔde ma awofo . . . yɛ nea nnipa pii nnim.”

Ɛyɛ Ɔkwan a Ɛtrɛw Ampa

Ahopɛ a atrɛw no nyɛ wɔn a wonim Bible nkɔmhyɛ no nwonwa, efisɛ Yesu Kristo bɔɔ n’atiefo kɔkɔ sɛ: “Ɔpon a ɛso ne ɔkwan a ɛtrɛw no ne nea ɛkɔ ɔsɛe mu no, na wɔn a wɔhyɛn mu no yɛ pii. Na ɔpon teateaa ne ɔkwan hihiaa no ne nea ɛkɔ nkwa mu, na wɔn a wohu no sua.” (Mateo 7:13, 14) Ɔkwan a edi kan a nnipa pii betumi afa so no yɛ “ɔkwan a ɛtrɛw” efisɛ Bible nnyinasosɛm a ɛfa abrabɔ ne da biara asetra ho no nto ano hye. Wɔn a wɔpɛ sɛ wosusuw nsɛm ho sɛnea wɔpɛ na wɔyɛ nea wɔpɛ biara—a ahyɛde ne nhyehyɛe biara nkyekyere wɔn—no na wɔfa saa kwan no so.

Nokwarem no, nnipa pii a wɔapaw ɔkwan a ɛtrɛw no kyerɛ sɛ wɔwɔ ahofadi. Nanso pɛsɛmenkominya su na edi wɔn mu dodow no ara so. Bible no ka sɛ “honhom a nnansa yi ɔyɛ adwuma asoɔden mma mu no” na edi wɔn so. Saa honhom yi ka wɔn ma ‘wɔde honam akɔnnɔ tra ase, na wɔyɛ nea honam pɛ,’ sɛ́ ɛyɛ ɔbrasɛe, nnubɔne, anaa honam fam ade dodowpɛ a atirimmɔden wom, dibea, anaa tumi.—Efesofo 2:2, 3.

Ɔkwan a Ɛtrɛw no Kɔ Asiane Mu

Hyɛ no nsow sɛ biribi piapia wɔn a wɔnam ɔkwan a ɛtrɛw so no ma ‘wɔyɛ nea honam pɛ.’ Eyi kyerɛ sɛ wonni ahofadi koraa—wɔwɔ owura bi. Wɔyɛ honam nkoa. Na owura yi a wɔsom no no betumi akowie ɔhaw pii mu—nyarewa pii a wonya fi ɔbea ne ɔbarima nna mu, afie a emu apaapae, nipadua ne adwene a nnubɔne ne asabow ama adi dɛm, sɛ yɛbɛbobɔ kakraa bi din a. Basabasayɛ, awisɛm, ne mmonnaato mpo fi nea ahopɛ kwan a ɛtrɛw no ama no kɔ so no. Na, bere a “ɔkwan a ɛtrɛw a ɛkɔ ɔsɛe mu” yi da so wɔ hɔ no, nea efi mu ba no bɛkɔ so apira kɛse.—Mmebusɛm 1:22, 23; Galatifo 5:19-21; 6:7.

Susuw asetram nsɛm abien bi a esii ankasa a efi Australia no ho. Mary gyaee ne ho mu maa sɔhwɛ, na ɔde nnuru a ne nom ka nkurɔfo hɔ dii dwuma ɔkwammɔne so san de ne ho hyɛɛ ɔbrasɛe mu.a Nanso ne nsa anka anigye a ɔhwehwɛe no. Bere a ɔwoo mma baanu akyi mpo no, n’abrabɔ yɛɛ te sɛ nea enni atirimpɔw. Oduu beae a enye koraa bere a ohui sɛ wanya AIDS no.

Tom huu amane wɔ ɔkwan foforo so. Ɔkyerɛw sɛ: “Minyinii wɔ asɔrefie bi mu wɔ Queensland kusuu fam. Bere a midii mfe 16 no, mifii asabow ase. Ná me papa, me wɔfanom, ne nnamfonom nyinaa yɛ asabowfo, enti na ɛte sɛ nea ɛfata sɛ mɛyɛ saa. Eduu baabi a na menom nsa biara, efi beer so kosi nsa a ano yɛ den so. Mifii ase nso too apɔnkɔ ho kyakya, na ɛtɔ mmere bi a, na mehwere sika a mayɛ adwumaden anya no. Ná eyi nyɛ sika ketewa, efisɛ na minya sika pii fi ahwerewtwa adwuma a na meyɛ no mu.

“Afei, mewaree na yɛwoo mma. Sɛ́ anka medi m’asɛyɛde ahorow ho dwuma no, meyɛɛ nea me nnamfonom yɛe—asanom, kyakyatow, ne ntɔkwaw. Wɔde me too kurow no afiase mpɛn pii. Nanso eyi mpo antumi me. Ná m’abrabɔ resɛe koraa. Ná ɔhaw ayɛ mu mã.”

Yiw, bere a Tom ne Mary gyaee wɔn ho mu maa akɔnnɔ bɔne no, wɔanhaw wɔn ho nko, na mmom, wɔn mmusua nso. Nea ɛyɛ awerɛhow no, mmofra pii ma kwan ma ahofadi honhom a akyea a ɛwɔ ɔkwan a ɛtrɛw no so no daadaa wɔn. Sɛ mmerante betumi ahu nnaadaasɛm a ɛwɔ saa ahofadi yi mu a, anka eye. Sɛ anka wobetumi ahu nea ɛwɔ ɔkwan a ɛtrɛw no—ɔhaw a emu yɛ den a awiei koraa no, wɔn a wɔfa saa kwan no so no hyia—ankasa so a, anka eye. Yiw, ɛsõ na ɛso fa yɛ mmerɛw. Nanso sɛnea ne kɛse te no, saa ara na ne haw nso te. Nyansasɛm a ɛsɛ sɛ obiara de to n’adwenem ne nokwasɛm a wontumi nnye ho kyim a ɛne sɛ “nea ogu gu ne honam so no fi honam mu betwa porɔwee.”—Galatifo 6:8.

Nanso, ɔkwan pa bi wɔ hɔ a wobetumi afa so. Ɛno ne ɔkwan hihiaa no. Nanso anohyeto a ɛwɔ ɔkwan yi so, hihiaa a ɛyɛ, ne kyere a ɛso akyere no te dɛn? Na ɛhe na ɛkɔ?

[Ase hɔ nsɛm]