Sɛnea Wobetumi Asiw Nseku A Epira Ano

“[Yehowa], fa ɔwɛn bɛwɛn m’ano, na hwɛ m’anofafa pon ano.”​—DWOM 141:3.

 1. Tumi bɛn na yɛn amemene a Onyankopɔn de ama yɛn no wɔ?

YEHOWA maa yɛn amemene, na ɛyɛ nwonwa dɛn ara! Nhoma The Incredible Machine se: “Sɛ wɔde komputa ahorow a ɛyɛ nwonwa sen biara a yebetumi de yɛn ani abu no mpo toto sɛnea ɔdesani amemene no ho nsɛm dɔɔso a enni ano ne sɛnea ɛyɛ fakaa no ho a, ɛnsɛ hwee . . . Nsɛnkyerɛnne ɔpepem pii a ɛfa w’amemene mu bere biara no de nsɛm a ne dodow yɛ nwonwa na ɛnam. Ɛde wo nipadua no mu ne akyi ho nsɛm na ɛba . . . Bere a nsɛnkyerɛnne afoforo gye nsɛm no na wɔhwehwɛ mu no, wɔma wunya nkate, nkae, nsusuwii, anaa nhyehyɛe ahorow a ɛma wusi gyinae. Ɛkame ayɛ sɛ ntɛm ara no, nsɛnkyerɛnne a efi w’amemene no mu ka nea ɛsɛ sɛ wo nipadua no afã afoforo yɛ no kyerɛ wɔn . . . Bere no mu no, na w’amemene no rekyerɛ w’ahome, mogya mu dwumadi, ɔhonam mu hyew, ne dwumadi afoforo a ɛho hia a wunnim ho hwee no kwan.”​—Kratafa 326.

 2. Asemmisa bɛn na ɛfata sɛ yesusuw ho afei?

² Ampa ara, ɛnsɛ sɛ wɔde akyɛde a ɛyɛ nwonwa saa a efi Onyankopɔn hɔ no di dwuma te sɛ nwura adaka bi. Nanso, yebetumi de amemene no adi dwuma ɔkwammɔne so denam nseku bɔne anaa ntwiri a yebetie na yɛatrɛw mu no so. Ɔkwan bɛn so na yebetumi akwati ɔkasa a ɛte saa na yɛaboa afoforo ma wɔatwe wɔn ho afi emu a wɔde wɔn ho bɛhyɛ no ho?

Ma W’ani Nsɔ Adwene a Onyankopɔn de Ama Wo No

 3. Dɛn nti na nokware Kristoni biara remfa ne ho nhyɛ ntwiri kasa mu?

³ Anisɔ a yebenya ama adwene a Onyankopɔn de ama yɛn no bɛboa yɛn ma yɛatwe yɛn ho afi nseku bɔne a yebetie na yɛatrɛw mu no ho. Yehowa honhom renkanyan obiara mma ɔmmfa nsusuwii ahorow a ɛte sɛɛ nhyɛ n’adwene mu na ɔmmfa ne tɛkrɛma ntwiri obi. Onyankopɔn Asɛm se: “Ma ɔbɔne nnyaw ne kwan na onipa huhuw mpa n’adwene.” (Yesaia 55:7) Nsusuwii bɔne ahorow na ahyɛ onipa bɔne adwene ma, na ɔyɛ ntɛm twiri nea ɔteɛ. Nanso yɛrenhwɛ ɔkasa a ɛte saa kwan mfi wɔn a wɔkyerɛ adwene a Onyankopɔn de ama wɔn no ho anisɔ no hɔ da.

 4. Sɛ yɛn ani sɔ yɛn amemene ne tumi a yetumi kasa no a, ɔkwan bɛn so na yɛde yɛn adwene ne yɛn tɛkrɛma bedi dwuma?

⁴ Anisɔ a ɛfata bɛboa yɛn ma yɛatwe yɛn ho afi yɛn adwene ne yɛn tɛkrɛma a yɛde bedi dwuma de ama yɛn honam a ɛyɛ bɔne no anya nea ɛpɛ no ho. Mmom no, yɛbɛma yɛn nsusuwii ne yɛn kasa ayɛ nea ɛkorɔn. Yebetumi akwati nseku bɔne denam mpaebɔ mu a yebefi de yɛn ho ato Onii a ne nsusuwii korɔn kɛse koraa sen yɛn de no so no so. Ɔsomafo Paulo tuu fo sɛ: “Nea ɛyɛ nokware [ɛnyɛ atoro anaa ntwiri], nea anim yɛ duru [ɛnyɛ mmofraasɛm], nea ɛteɛ [ɛnyɛ nea ɛyɛ bɔne], nea ɛho tew [ɛnyɛ ntwiri a ɛho ntew anaa bɔne mu a wofi de ani bu ade], nea ɛwɔ ɔdɔ [ɛnyɛ ɔtan ne animtiaabu], nea ɛwɔ din pa [ɛnyɛ dinsɛe], sɛ ɔbra pa bi wɔ hɔ a [ɛnyɛ bɔneyɛ], sɛ ayeyi bi wɔ hɔ a [ɛnyɛ ɔkasatia], saa nneɛma yi ho na munnwen.”​—Filipifo 4:8.

 5. Dɛn na na mfɛfo gyidifo ahu na wɔate wɔ Paulo ho?

⁵ Paulo de kaa ho sɛ: “Nea moasua nso na moagye na moate na moahu wɔ me ho no, ɛno ara na monyɛ! Na asomdwoe Nyankopɔn bedi mo akyi.” (Filipifo 4:9) Dɛn na na afoforo ahu na wɔate wɔ Paulo ho? Nneɛma a ɛho tew na ɛhyɛ den honhom mu. Wammfa Lidia anaa Timoteo ho nseku a aba foforo antuatua wɔn aso. Wubetumi agye adi sɛ Paulo antie mpanyimfo a wɔwɔ Yerusalem no ho atesɛm na wantrɛw mu.a Ɛda adi sɛ obu a na Paulo wɔ ma n’adwene a Onyankopɔn de ama no no boaa no ma ɔtwee ne ho fii nseku bɔne a ɔde ne ho bɛhyem no ho. Sɛ yɛn ani sɔ adwene ne tɛkrɛma a Yehowa de ama yɛn no ampa ara a, yebesuasua ne nhwɛso no.

Obu ma Onyankopɔn ne N’Asɛm

 6, 7. (a) Ɔkwan bɛn so na Yakobo kyerɛɛ nea tɛkrɛma bɔne tumi de ba? (b) Sɛ yɛwɔ obu ma Onyankopɔn ne n’Asɛm a, dɛn na ɛremma?

⁶ Obu a efi komam ma Onyankopɔn ne n’Asɛm Kronkron no nso bɛboa yɛn ma yɛasiw nseku bɔne ano. Ampa, obu a ɛte saa no bɛka yɛn ma yɛatie osuani Yakobo a ɔkyerɛɛ sɛnea tɛkrɛma te ankasa no afotu no. (Yakobo 3:2-12) Sɛ obi tumi di ne tɛkrɛma so a, obetumi ato ne nipadua mũ no nnareka, sɛnea nnareka a ɛhyɛ ɔpɔnkɔ anom tumi kyerɛ aboa no kwan no. Sɛnea ogya ketewaa bi betumi ahyew kwae no, saa ara na tɛkrɛma ketewaa no betumi ayɛ ogya a ɛsɛe asetra nyinaa. Onipa betumi adwudwo nkekaboa, nnomaa, mmoa a wɔwea, ne nsu mu abɔde ahorow, nanso Yakobo se “tɛkrɛma de, onipa biara ntumi nnwudwo no.” Nanso, ɛno nyɛ nea ɛsɛ sɛ wɔde yi wɔn ano sɛ ɛno nti na wɔmmɔ mmɔden sɛ wobesiw nseku bɔne ano.

⁷ Yakobo kae nso sɛ tɛkrɛma no nhyira ne nnome fi ano koro no ara mu ba. Eyi mfata, efisɛ asuti bi mfi nsu dɛdɛ ne nwenenwene wɔ ani koro mu. Borɔdoma rentumi nsow ngodua aba, na asuti nkyenenkyene rentumi mma nsu pa. Nokwarem no, mpɛn dodow a Kristofo nyɛ pɛ yi, wɔrentumi nnwudwo tɛkrɛma no pɛpɛɛpɛ. Ɛsɛ sɛ eyi ma yenya mmɔborohunu ma abɔnefo a wonu wɔn ho, nanso ɛnyɛ nseku bɔne ho anoyi. Wɔ yɛn fam de, sɛ yɛwɔ obu ma Onyankopɔn ne n’Asɛm ampa a, tɛkrɛma a wɔde di dwuma te sɛ awuduru saa no renkɔ so daa.

Sɛnea Mpaebɔ Betumi Aboa

 8. Ɔkwan bɛn so na mpaebɔ betumi aboa yɛn ma yɛasiw nseku a epira ano?

⁸ Nseku a epira a wubetie na woatrɛw mu no ho sɔhwɛ mu betumi ayɛ nea ɛyɛ den yiye. Enti, sɛ woagyaa wo ho mu ama sɔhwɛ a ɛte saa bere a atwam mu a, so ɛnsɛ sɛ wubisa Onyankopɔn hɔ fafiri ne mmoa? Yesu kyerɛɛ sɛ yɛmmɔ mpae sɛ: “Mfa yɛn nkɔ sɔhwɛ mu, na gye yɛn fi ɔbɔne no nsam.” (Mateo 6:13, New World Translation) Kristofo a wɔde anibere bɔ mpae sɛ Onyankopɔn nnyaw wɔn wɔ sɔhwɛ a ɛyɛ ɔkasa bɔne saa mu no rennyaa wɔn ho mu mma Satan afiri; wobegye wɔn afi otwirifo kɛse no nsam.

 9. Sɛ yehyia twiri a yebetwiri obi ho sɔhwɛ a, yebetumi abɔ mpae dɛn?

⁹ Sɛ yehyia sɔhwɛ a ɛbɛma yɛatwiri obi a, yebetumi abɔ mpae sɛ: “[Yehowa], fa ɔwɛn bɛwɛn m’ano, na hwɛ m’anofafa pon ano.” (Dwom 141:3) Yebetumi asɛe daa nkwa hokwan a yɛwɔ denam sɔhwɛ a yebegyaa yɛn ho mu ama na yɛasuasua Ɔbonsam sɛ otwirifo bɔne, ɔtorofo, owudifo no so. (Yohane 8:44) Ɔsomafo Yohane kyerɛwee sɛ: “Obiara a ɔtan ne nua no yɛ owudifo; na munim sɛ daa nkwa rentra owudifo biara mu.”​—1 Yohane 3:15.

Ɔdɔ Siw Nseku Kwan

10. Sɛ anka yebedi afoforo ho nseku mmom no, dɛn na yɛde wɔn ɛho ka?

¹⁰ Yɛn nyinaa de afoforo biribi ho ka, nanso yɛnne ɔtan a ɛma nseku bɔne sɔre ho ka. Paulo kyerɛwee sɛ: “Monne obiara ka gye sɛ ɔdɔ a mode dodɔ mo ho.” (Romafo 13:8) Ɛsɛ sɛ yetua saa ka no daa mmom sen sɛ yebetwiri afoforo na yɛasɛe wɔn din. Sɛ yɛka sɛ yɛdɔ Yehowa a, yɛrentumi ntwiri yɛn yɔnko ɔsomfo, efisɛ “nea ɔnnɔ ne nua a ohu no no, ɛbɛyɛ dɛn na obetumi adɔ Onyankopɔn a onhuu no ɛ?”​—1 Yohane 4:20.

11. Ɔkwan bɛn so na Yesu bɛ a ɛfa nguanten ne mpapo ho no betumi ama yɛanya biribi asusuw ho wɔ ntwiri ho?

¹¹ Susuw Yesu bɛ a ɛfa nguanten ne mpapo ho no ho. Wɔka kyerɛɛ wɔn a wɔte sɛ mpapo no sɛ wɔfaa nea wɔde yɛɛ Kristo nuanom no sɛ wɔyɛ maa no. So wubedi Kristo ho nseku? Sɛ worentwiri w’Awurade ne wo Wura no a, nyɛ ne nuanom a wɔasra wɔn no saa. Nni mfomso sɛnea mpapo a ‘wobefi hɔ akɔ daa ahoyeraw mu’ no yɛe no. Sɛ wodɔ Yesu nuanom no a, da no adi denam nea woka fa wɔn ho no so.​—Mateo 25:31-46.

12. Mmebusɛm 16:2 mu ntease titiriw ne dɛn, na ɛsɛ sɛ ɛka yɛn nsusuwii, yɛn nneyɛe, ne yɛn kasa dɛn?

¹² Esiane sɛ yɛn nyinaa yɛ abɔnefo na yehia Yesu ogye afɔre no nti, sɛ obi pɛ sɛ ɔka nsɛm a ɛmfata fa yɛn ho a, obenya pii aka. (1 Yohane 2:1, 2) Nokwarem no, ebia yebesusuw sɛ yɛrebɔ mmɔden araa yiye. “Onipa akwan nyinaa so tew n’ani so, na ahonhom karifo ne [Yehowa].” Onyankopɔn mmfa nea ɔpɛ n’asɛm anaa animhwɛ nkyea ne nsɛnia. (Mmebusɛm 16:2; Asomafo no Nnwuma 10:34, 35) Ɔkari yɛn honhom, na ohu yɛn su ne nkate ahorow a ɛkanyan yɛn ma yedwen, yɛyɛ ade, na yɛkasa no. Ɛnde, ampa ara sɛ yɛrempɛ sɛ Onyankopɔn behu sɛ yedi mfomso susuw sɛ yɛn ho tew na afoforo ho agu fi ma enti wɔfata sɛ wɔka wɔn ho nsɛmmɔne. Te sɛ Yehowa no, ɛnsɛ sɛ yɛhwɛ anim, ɛsɛ sɛ yenya mmɔborohunu, ne ɔdɔ.

13. (a) Ɔkwan bɛn so na nokwasɛm a ɛyɛ sɛ “ɔdɔ wɔ abodwokyɛre, ne yam ye” no betumi aboa yɛn ma yɛasiw nseku bɔne ano? (b) Dɛn na ɛremma yɛnkasa ntia obi a onya ɔsom mu hokwan a yenni?

¹³ Nea Paulo kae wɔ 1 Korintofo 13:4-8 no a yɛde bedi dwuma no bɛboa yɛn ma yɛasiw nseku bɔne ano. Ɔkyerɛwee sɛ: “Ɔdɔ wɔ abodwokyɛre, ne yam ye.” Ebia onuawa bi a wɔretaa no wɔ ofi a emu apaapae mu rentew n’anim nkyia yɛn. Anaasɛ ebinom ho nyɛ hyew wɔ honam mu, ebia esiane ɔyare nti. So ɛnsɛ sɛ ɔdɔ ka yɛn ma yenya ntoboase ne ayamye ma wɔn a wɔte saa no mmom sen sɛ yebedi wɔn ho nseku dennen? ‘Ɔdɔ nyɛ ahoɔyaw, ɛnyɛ ahoahoa, ɛnhoran.’ Enti, sɛ Kristoni foforo nya ɔsom mu hokwan bi a yenni a, ɔdɔ remma yɛnkasa ntia no na yɛmfa ɛno nkyerɛ sɛ ɔmmfata mma adwuma no. Ɔdɔ remma yɛnhoahoa yɛn ho wɔ nea yɛatumi ayɛ ho, kasa a ebetumi ahaw wɔn a wontumi nyɛ pii nso.

14. Ɔdɔ ho ade bɛn bio na ɛwɔ hɔ a ɛbɛka nea yɛka fa afoforo ho?

¹⁴ Paulo kae nso sɛ ‘ɔdɔ nyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no, ɛmfa bɔne nhyɛ ne yam.’ Sɛ́ anka yɛbɛka nsɛm a ɛnyɛ Kristofo de sɛnea ɛmfata mmom no, ɛsɛ sɛ yɛma ɔdɔ ka yɛn ma yɛka afoforo ho nsɛm pa na yesusuw wɔn nneɛma ho. Ɛmma yɛn bo nhaw yɛn na yentwiri nkurɔfo wɔ opira a ɛyɛ paara anaasɛ yɛde yɛn ani bu ho. Esiane sɛ ‘ɔdɔ ani nnye nea ɛnteɛ ho na ɛne nokware ani gye’ nti, ɛmma yɛmmfa yɛn ho nhyɛ nseku a epira mu wɔ asɔretiafo a wohyia ntɛnkyea mpo ho.

15. (a) Ɛsɛ sɛ nokwasɛm a ɛyɛ sɛ ‘ɔdɔ gye ade nyinaa di na enya ade nyinaa mu anidaso’ no ka yɛn dɛn? (b) Ɔdɔ afã horow bɛn na ebetumi aboa yɛn ma yɛabata Yehowa ahyehyɛde no ho, sɛ afoforo kasa tia mpo a?

¹⁵ Ɔdɔ ‘gye Onyankopɔn Asɛm mu ade nyinaa di na enya ade nyinaa mu anidaso’ na ɛka yɛn ma yɛkyerɛ honhom fam aduan a ‘akoa nokwafo’ kuw no de ma no ho anisɔ sen sɛ yebetie awaefo atorofo nsɛm a wɔde twiri. (Mateo 24: 45-47; 1 Yohane 2:18-21) Esiane sɛ ‘ɔdɔ tɔ ne bo ase ade nyinaa mu na ɛto ntwa da’ nti, sɛ “anuanom atorofo” anaasɛ afoforo kasa tia Onyankopɔn ahyehyɛde no anaasɛ emufo a, ɛboa yɛn ma yɛkɔ so di no nokware nso.​—Galatifo 2:4.

Obu Bɔ Nseku Ano

16. Anuanom atorofo a na wɔwɔ Korinto yɛɛ Paulo dɛn?

¹⁶ Obu ma mfɛfo gyidifo nso boa yɛn ma yesiw nseku a epira ano. Esiane sɛ Onyankopɔn gye wɔn tom nti, ɛnsɛ sɛ yɛka wɔn ho nsɛmmɔne. Mommma yɛnnyɛ te sɛ “anuanom atorofo” a Paulo hyiaa wɔn no da. Akyinnye biara nni ho sɛ wɔkaa ne ho nsɛmmɔne. (2 Korintofo 11:26) Ɛbɛyɛ sɛ awaefo nso kaa ne ho nsɛmmɔne. (Fa toto Yuda 3, 4 ho.) Ebinom kae wɔ Korinto sɛ: “Ne nhoma no de, ɛyɛ duru na emu yɛ den, nanso ne nipadua wɔ hɔ a, ɛyɛ mmerɛw, na ɔkasa a wɔmfa nyɛ hwee.” (2 Korintofo 10:10, New World Translation) Nkurɔfo nka nsɛm a ɛte saa mfa wɔn adɔfo ho.

17. Nsɛm bɛn na na Diotrefe de rekeka ɔsomafo Yohane ho nsɛm?

¹⁷ Susuw ɔsomafo Yohane a Diotrefe kasa tiaa no no ho. Yohane kae sɛ: “Mekyerɛw mekɔmaa asafo no. Na Diotrefe a ɔpɛ wɔn mu panyin adi no nnye yɛn ara. Eyi nti sɛ meba a, mɛkae ne nnwuma a ɔyɛ no, sɛ ɔkeka yɛn ho nsɛmmɔne.” (3 Yohane 9, 10) Na nsɛnkeka a ɛte saa no yɛ aniberesɛm kɛse, na sɛ yetie kasa a ɛte saa ara anaa yɛtrɛw mu nnɛ a, ɛsɛ sɛ yegyae ntɛm ara.

18. Ɔkwan bɛn so na na ɛsono Demetrio wɔ Diotrefe ho, na saa nsonsonoe yi betumi aka yɛn su dɛn?

¹⁸ Yohane rehyɛ sɛ wɔnkyerɛ obu mma wɔn a wɔteɛ no, ɔka kyerɛɛ Gaio sɛ: “Nhwɛ bɔne nsua, na mmom hwɛ papa sua. Nea ɔyɛ papa no fi Nyankopɔn mu, na nea ɔyɛ bɔne no nhuu Nyankopɔn ɛ. Demetrio de, wɔn nyinaa ne nokware ankasa adi ne ho adanse pa, na yɛn nso yedi no adanse, na wunim sɛ yɛn adanse yɛ nokware.” (3 Yohane 1, 11, 12) Yɛn mu biara betumi abisa ne ho sɛ: Meyɛ Diotrefe ɔsɛnkekafo anaasɛ meyɛ Demetrio ɔnokwafo? Sɛ yɛwɔ obu ma yɛn mfɛfo gyidifo a, yɛrenkeka wɔn ho nsɛmmɔne na ama afoforo abu yɛn sɛ yɛyɛ nsɛnkekafo.

19. Ɔkwan bɛn so na anuanom atorofo hwehwɛe sɛ wɔbɛsɛe C. T. Russell din?

¹⁹ Ɛnyɛ afeha a edi kan no mu nko na na anuanom atorofo wɔ. Wɔ 1890 mfe no mu no, nnipa abɔnefo binom a na wɔne Onyankopɔn ahyehyɛde no bɔ fekuw bɔɔ mmɔden sɛ wobenya Ɔwɛn Aban Asafo no adi so. Wɔpam Charles Taze Russell ti so, na wɔhwehwɛe sɛ wɔbɛma wahwe ase sɛ Asafo ti no titrani a odi kan. Bere a atirisopam no ahyɛ sum ase bɛyɛ mfe abien akyi no, ɛdaa adi 1894 mu. Na atosɛm a wɔde bɔ sobo no gyina nea wose Russel anni adwuma mu nokware no so titiriw. Sobo ahorow no bi daa nea na ɛyɛ anototofo no adwene ankasa no adi​—sɛ wɔbɛsɛe C. T. Russell din. Kristofo a wɔnhwɛ nnipa anim hwehwɛɛ nsɛm mu na wohui sɛ na ne de teɛ. Enti, saa pɔw yi a wɔbɔe sɛ “wɔbɛbɔ Owura Russell ne n’adwuma no akɔ wim” no dii nkogu. Enti, te sɛ Paulo no, anuanom atorofo kasa tiaa Onua Russell denneennen, nanso wohui sɛ na saa sɔhwɛ yi yɛ Satan nnɛɛdɛe. Ɛno akyi no wohui sɛ na atirisopamfo no mfata sɛ wonya Kristofo fekubɔ mu anigye.

Nnwuma Pa Ka Ntwiri Hyɛ

20. Mfomso bɛn na Paulo hui wɔ akunafo binom a na wonnyinii ho?

²⁰ Na Paulo nim sɛ mpɛn pii no nseku a epira ne hwee a wonni yɛ, nnwuma pa pii a wɔnyɛ wɔ abusuabɔ. Na n’ani nnye ho sɛ akunafo a wonnyinii binom asua sɛ ‘wɔbɛyɛ anihaw na woakyinkyin afi mu, na ɛnyɛ anihaw nko na wɔyɛ, na wɔyɛ kurokuro ne tɛretɛre nso keka nsɛm a ɛnsɛ.’ Na dɛn ne ano aduru? Dwumadi a mfaso wɔ so. Enti, Paulo kyerɛwee sɛ: “Enti mepɛ sɛ wɔn a wonnyinii ɛ no ware wo mma di ofi so, na wɔamma ɔtamfo ho kwan sɛ ɔnyaw.”​—1 Timoteo 5:11-14.

21. 1 Korintofo 15:58 ka kwati a yebekwati ntwiri mfiri horow no dɛn?

²¹ Sɛ mmea di ofi so, wɔyɛn mmofra sɛnea Onyankopɔn gyinapɛn ahorow te, na wɔde wɔn ho hyɛ nneɛma ahorow a mfaso wɔ so mu a, wɔrennya bere pii mfa nkasakasa kwa a ebetumi akowie nseku bɔne mu. Sɛ nnwuma pa ama mmarima nso nni adagyew a, wɔrennya bere pii mma kasa a ɛte saa. ‘Pii a yɛbɛyɛ Awurade adwuma no mu daa’ no bɛboa yɛn nyinaa ma yɛakwati ntwiri a epira ho mfiri horow no. (1 Korintofo 15:58) Koma nyinaa mu a yefi de yɛn ho hyɛ Kristofo som adwuma no, asafo nhyiam horow, ne onyamesom pa mu dwumadi afoforo mu no bɛma yɛde yɛn adwene asi honhom mu nneɛma so titiriw sɛnea ɛbɛyɛ a yɛrennyɛ nsekufo ne wɔn a wɔde wɔn ho hyehyɛ afoforo nsɛm mu a wonni hwee yɛ.

22. Mmebusɛm 6:16-19 ka sɛnea Onyankopɔn bu ntwirifo ho asɛm dɛn?

²² Sɛ yɛde yɛn ho hyɛ onyamesom pa nnwuma mu na yɛhwehwɛ sɛ yebehyira afoforo honhom mu a, yɛbɛyɛ nnamfo anokwafo, ɛnyɛ nsɛnkekafo atorofo. (Mmebusɛm 17:17) Na sɛ yɛkwati nseku bɔne a, yebenya Adamfo a ɔsen biara​—Yehowa Nyankopɔn. Momma yɛnkae sɛ nneɛma ason a okyi ne “ani a ɛtra ntɔn, atoro tɛkrɛma, ne nsa a ehwie mogya a edi bem gu; koma a edwen mmusu adwene, nan a ɛyɛ hare tu mmirika kɔ bɔne mu; ɔdansekurumfo a ohuw atosɛm, ne nea ɔhyɛ anuanom ntam takrawogyam.” (Mmebusɛm 6:16-19) Nsekufo gugu nsɛm mu na wokyinkyim no, na ntwirifo wɔ atoro tɛkrɛma. Wɔn nsɛm ma nsɛnkekafo tew si akwan so. Ɛkame ayɛ sɛ ne nyinaa mu no, akasakasa na efi mu ba. Nanso sɛ yɛtan nea Onyankopɔn tan a, yɛbɛpow nseku a epira afoforo a ebetumi apira obi a ɔteɛ na ama otwirifo kɛse Satan Ɔbonsam ani agye no.

23. Ɛdefa yɛn kasa ho no, ɔkwan bɛn so na yebetumi ama Yehowa koma ani agye?

²³ Enti, momma yɛmma Yehowa koma ani nnye. (Mmebusɛm 27:11) Momma yɛnkwati kasa a okyi, yɛmpow sɛ yebetie ntwiri, na yɛnyɛ nea yebetumi biara mfa nsiw nseku bɔne ano. Akyinnye biara nni ho sɛ yebetumi ayɛ saa denam yɛn Nyankopɔn Yehowa a ɔyɛ kronkron no mmoa so.

[Ase hɔ asɛm]

Wubebua Dɛn?

◻ Ɔkwan bɛn so na mpaebɔ betumi aboa yɛn ma yɛakwati afoforo a yebetwiri wɔn?

◻ Ɔkwan bɛn so na 1 Korintofo 13:4-8 a yɛde bedi dwuma no betumi aboa yɛn ma yɛasiw nseku bɔne ano?

◻ Ɔkwan bɛn so na obu a yɛwɔ ma yɛn ho betumi aboa yɛn ma yɛabɔ mfɛfo gyidifo a yebetwiri wɔn ho sɔhwɛ biara ano?

◻ 1 Korintofo 15:58 betumi aka kwati a yebekwati nseku bɔne ne ntwiri ho mfiri horow no dɛn?