So Afoforo Gye W’afotu Tom?

AFOTU pa a wɔde ma ɔkwampa so no sow aba pa bere nyinaa. So ɛyɛ ampa? Dabida! Mpɛn pii no, wɔtaa bu ani gu afotu a ɛkyɛn so a afotufo pa de ma mpo so anaasɛ wɔpo.—Mmebusɛm 29:19.

Eyi sii bere a Yehowa tuu Kain a na wanya ne nua Habel ho nitan fo no. (Genesis 4:3-5) Esiane sɛ na Onyankopɔn nim ɔhaw a eyi de bɛbrɛ Kain nti, ɔka kyerɛɛ no sɛ: “Ɛdɛn nti na wo bo afuw, na ɛdɛn nti na woamuna yi? Sɛ woyɛ yiye a, anka w’anim rentew anaa? Na sɛ woanyɛ yiye a, bɔne butuw ɔpon ano, na w’akyi kwan na ɛhwehwɛ, nanso di no so.”—Genesis 4:6, 7.

Enti Yehowa de bɔne totoo aboa bi a wayɛ krado sɛ ɔbɛtow ahyɛ Kain so bere a ɔkɔ so nya ne nua no ho menasepɔw no ho. (Fa toto Yakobo 1:14, 15 ho.) Ná Kain da so ara wɔ bere a ɔde bɛsakra ne nneyɛe ‘ayɛ no yiye’ sen sɛ ɔbɛkɔ so akura nneyɛe a na ɛde no bɛkɔ ɔhaw mu no mu. Awerɛhosɛm ne sɛ, Kain antie. Ɔpoo Yehowa afotu no, na ɛkowiee ɔhaw kɛse mu.

Ebinom bo fuw na wɔpo afotu biara. (Mmebusɛm 1:22-30) So ebetumi aba sɛ ɔfotufo no mfomso nti na wɔpo afotu no? (Hiob 38:2) So wo a wode afotu ma no ma ɛyɛ den ma afoforo sɛ wobetie? Nnipa sintɔ ma ɛno yɛ asiane ankasa. Nanso wubetumi abrɛ ɛno ase denam Bible mu nnyinasosɛm ahorow akyi a wubedi pɛpɛɛpɛ so. Ma yensusuw emu pii ho nhwɛ.

‘Fi Odwo Honhom mu Fa Nteɛso Ma’

“Anuanom, sɛ mfomso bi bɛto obi nso a, mo a moyɛ honhom mufo no, monteɛ nea ɔte saa no so odwo honhom mu, nanso hwɛ wo ho, na wɔansɔ wo nso anhwɛ.” (Galatifo 6:1) Enti ɔsomafo Paulo daa no adi sɛ wɔn a wɔyɛ “honhom mufo no” mmɔ mmɔden nteɛ Kristofo a ‘wodi mfomso’ no so odwo mu. Ɛtɔ da bi a, ɛte sɛ nea wɔn a wɔn ho nkokwaw yiye no na wɔn ho pere wɔn sɛ wɔde afotu bɛma. Enti, mpɛ ntɛm dodo sɛ wubetu afoforo fo. (Mmebusɛm 10:19; Yakobo 1:19; 3:1) Ɛyɛ asafo mu mpanyimfo titiriw na wɔfata wɔ honhom mu sɛ wɔyɛ saa. Nokwarem no, sɛ Kristoni a ne ho akokwaw biara hu onua bi sɛ ɔrekɔ asiane mu a, ɛsɛ sɛ ɔbɔ no kɔkɔ.

Sɛ wode nyansahyɛ anaa afotu rema a, hwɛ hu sɛ wode nea woreka no begyina Onyankopɔn nyansa so, na ɛnyɛ nnipa nkyerɛkyerɛ ne nyansapɛ so. (Kolosefo 2:8) Yɛ sɛ oduannoafo a ɔhwɛ yiye sɛ atosode biara a ɔde bɛto aduan mu no ho bɛtew na biribiara a etumi di awu nni mu no. Hwɛ hu sɛ, w’afotu begyina Onyankopɔn Asɛm so pintinn, ɛnyɛ w’ankasa wo nsusuwii so. (2 Timoteo 3:16, 17) Saa yɛ so no, wubetumi anya ahotoso sɛ w’afotu rempira obiara.

W’afotu no atirimpɔw ne sɛ ‘wobɛteɛ’ nea wafom no so, ɛnyɛ sɛ wobɛhyɛ no ma wayɛ nsakrae bi a ɔmpɛ sɛ ɔyɛ. Hela asɛmfua a wɔde di dwuma ma ‘nteɛso’ no ne asɛm a wɔde di dwuma ma dompe a atow afa ho a wɔhwɛ ka si anim na dɛmdi no anyɛ kɛse no wɔ abusuabɔ. Sɛnea nsɛm asekyerɛ nhoma kyerɛwfo W. E. Vine kyerɛ no, ɛkyerɛ “hia a boasetɔ ne mmɔdenbɔ ho hia wɔ adeyɛ no mu” no nso. Susuw hia a ahwɛyiye ne ahokokwaw ho behia na woanyɛ biribi foforo a ɛbɛma onipa no ate nipaduam yaw a ɛho nhia no ho hwɛ. Saa ara na ɛsɛ sɛ ɔfotufo yɛ ahwɛyiye kɛse na wampira nea ɔretu no fo no. Eyi yɛ den yiye bere a obi hwehwɛ afotu no. Sɛ obi mmisaa wo nkyɛn afotu mpo a, ahokokwaw ne ahwɛyiye ho hia kɛse.

Akyinnye biara nni ho sɛ, ‘worenteɛ’ obi a wunnim no so. Nea ɛbɛyɛ na woakwati saayɛ no, ma hia a ɛho hia sɛ woda “ayamhyehye, ayamye, ahobrɛase adwene, odwo, ne abodwokyɛre” adi no ntra w’adwene mu. (Kolosefo 3:12) Sɛ oduruyɛfo bi nni boasetɔ na ommu ne yarefo a, ɔyarefo no tumi po nyansahyɛ a ɔde ma no no na ɔnhwehwɛ ne nkyɛn ayaresa bio.

Eyi nkyerɛ sɛ ɛnsɛ sɛ yɛyɛ pintinn wɔ afotu mu. Yesu Kristo yɛɛ pintinn bere a otuu asafo ahorow ason a ɛwɔ Asia mantam mu fo no. (Adiyisɛm 1:4; 3:1-22) Ɔde afotu a ɛyɛ tee a ehia sɛ wɔte na wɔde di dwuma maa wɔn. Nanso Yesu pintinnyɛ no ne su horow te sɛ ayamhyehye ne ayamye karii pɛ bere nyinaa, na ɔdaa ne soro Agya no dɔ honhom adi.—Dwom 23:1-6; Yohane 10:7-15.

Ma Nyam Mmra W’afotu Mu

“Momma mo kasa ho mmra nyam daa a nkyene wɔ mu, na moahu sɛnea ɛsɛ sɛ mubua obiara.” (Kolosefo 4:6) Nkyene tumi ma aduan yɛ dɛ na ɛma ɛyɛ akɔnnɔ. Sɛ w’afotu betumi ayɛ dɛ a, ɛsɛ sɛ ɛyɛ ‘nea nyam ne nkyene wom.’ Sɛ obi wɔ atosode a eye sen biara mpo a, ebetumi aba sɛ aduan a ɔbɛnoa no renyɛ dɛ, anaa kankyee a ɔde guu mu no remma ɛnyɛ akɔnnɔ. Ɛno mma obiara kɔn nnɔ aduan no. Nokwarem no, ɛbɛyɛ den sɛ wobetumi adi kakraa bi mpo.

Sɛ woretu fo a, ɛho hia sɛ wopaw nsɛmfua a ɛfata. Onyansafo Salomo kae sɛ: “Asɛm a wɔka a ɛfata te sɛ sika aduaba wɔ dwetɛ kyerɛnkyɛ mu.” (Mmebusɛm 25:11) Ɛbɛyɛ sɛ na dwetɛ asankasɔn bi a wɔakurukyerɛw ho fɛfɛɛfɛ a sika aduaba a wɔanwene no yiye si so ho adwene na ɛwɔ ne tirim. Hwɛ sɛnea ɛbɛyɛ fɛ afa, na hwɛ sɛnea w’ani begye sɛ wo nsa bɛka sɛ akyɛde! Saa ara na nsɛm a woapaw no yiye a nyam wom betumi asɔ nea worebɔ mmɔden aboa no no ani.—Ɔsɛnkafo 12:9, 10.

Nea ɛne no bɔ abira no, “nsɛnnennen hwanyann abufuw mu.” (Mmebusɛm 15:1) Nsɛm a wɔmpaw no yiye no taa kowie yawdi ne abufuw mu, na ɛmma obi nkyerɛ ho anisɔ. Nokwarem no, ɛnyɛ nsɛm a ɛmfata nkutoo na etumi ma obi po afotu a ɛfata, na mmom ɛnne a wode kasa no nso. Afotu a wɔmfa mma anifere ne ɔkwampa so no betumi apira te sɛ nea wɔde akode to hyɛ obi so no. Mmebusɛm 12:18 ka sɛ: “Ɛwɔ nea ɔworo kasa sɛ nkrante nwowɔe.” Dɛn nti na ɛsɛ sɛ woworo kasa ma ɛyɛ den ma obi sɛ obetie w’afotu?—Mmebusɛm 12:15.

Sɛnea Salomo kae no, ɛsɛ sɛ afotusɛm yɛ ‘asɛm a wɔka no bere a ɛfata.’ Sɛ afotu bi bɛyɛ nea wogye tom a, ɛbere a wɔde ma ho hia kɛse! Ɛda adi sɛ obi a n’anom atow renkyerɛ aduan ho anigye. Ebia odidii nkyɛe, anaasɛ ɔyare. Nyansa nnim na ɛrenyɛ papa sɛ wɔbɛhyɛ obi a ne kɔn nnɔ aduan sɛ onnidi.

Fi Ahobrɛase Adwene mu Tu Fo

“Momma m’anigye nwie du sɛ . . . munnnwen biribi atutupɛ anaa anuonyamhunupɛ so, na mmom momfa ahobrɛase adwene mmu mo yɔnkonom nkyɛn mo ankasa mo ho. Mommma obiara nnhwɛ ne nko ade, na mmom ɔnhwɛ ne mfɛfo de bi.” (Filipifo 2:2-4) Sɛ woyɛ ɔfotufo pa a, wobɛma afoforo ‘yiyedi’ ho asɛm ahia wo. Afei nso, wobɛda “ahobrɛase adwene” adi bere a wo ne honhom mu anuanom mmarima ne mmea redi nsɛm, na woabu afoforo akyɛn wo ho. Dɛn na ɛno kyerɛ?

Ahobrɛase adwene bɛma woakwati sɛ wubebu wo ho akyɛn afoforo anaa wode ɛnne a ɛkyɛn so bɛkasa. Yɛn mu biara nni biribiara a yebegyina so ate nka sɛ yɛkyɛn yɛn mfɛfo gyidifo. Yɛn nyinaa fom bere ne bere mu. Esiane sɛ worentumi nhu nea ɛwɔ koma mu nti, ɛho hia kɛse sɛ woremmu nea wutu no fo no atɛn wɔ ne nsusuwii ho. Ebetumi aba sɛ onni nsusuwii bɔne biara, na onnim sɛ ɔredi mfomso. Sɛ ebia onim sɛ wabu Onyankopɔn gyinapɛn ahorow so a, akyinnye biara nni ho sɛ ɛbɛyɛ mmerɛw ama no sɛ obegye afotu a wofi ahobrɛase mu de ma no a ɛkyerɛ sɛ wodwen ne honhom fam yiyedi ho no atom.

Susuw sɛnea wobɛte nka afa bere a obi to nsa frɛ wo wɔ adidi bi ase na afei ɔntene ne ho mma wo na ɔyɛ nneɛma bi de bu wo animtiaa no ho hwɛ! Akyinnye biara nni ho sɛ w’ani rennye aduan no ho. Nokwarem no, “mfámmiri a ɔdɔ wɔ mu ye sen nantwi a wadɔ na ɔtan wɔ mu.” (Mmebusɛm 15:17) Saa ara na ebetumi ayɛ den ama obi a wɔretu no fo sɛ obegye afotu a eye sen biara mpo atom bere a ɔfotufo no nkyerɛ ne ho anigye anaa obu no animtiaa na ɔhyɛ no aniwu no. Nanso, ɔdɔ, obu a wɔbɛkerɛ, ne ahotoso betumi ama ayɛ mmerɛw sɛ wɔde afotu bɛma anaa wobegye atom.—Kolosefo 3:14.

Afotu a Wogye Toom

Odiyifo Natan daa ahobrɛase adwene adi bere a otuu Ɔhene Dawid fo no. Ɔdɔ ne obu a na Natan wɔ ma Dawid no daa adi wɔ nea ɔkae na ɔyɛe no mu. Natan de mfatoho a na ɛbɛma ayɛ den ama Dawid sɛ ɔbɛpo n’afotu no na efii ase. (2 Samuel 12:1-4) Odiyifo no twee adwene kɔɔ atɛntrenee ne adetreneeyɛ a na Dawid pɛ no so, ɛwom sɛ anna adi wɔ ɔne Bat-Seba adeyɛ no mu de. (2 Samuel 11:2-27) Bere a osii asɛm titiriw a ɛwɔ mfatoho no mu no so dua no, ade a efi koma mu a Dawid yɛe ne sɛ: “Mayɛ [Yehowa NW] bɔne.” (2 Samuel 12:7-13) Nea ɛnte sɛ Kain a wantie Yehowa no, Dawid fii ahobrɛase mu gyee nteɛso no toom.

Akyinnye biara nni ho sɛ Yehowa kyerɛɛ Natan nea ɛsɛ sɛ ɔka, ma osusuw Dawid sintɔ ne tumi a obetumi ayɛ ade wɔ ɔkwan a ɛmfata so no ho. Natan daa anifere kɛse adi na ɛda adi sɛ, obuu Dawid sɛ ɔkorɔn esiane dibea a na Dawid wɔ sɛ Yehowa hene a wasra no nti. Sɛ wowɔ dibea bi a ɛkorɔn a, wubetumi de afotu a ɛfata ama, nanso sɛ woanna ahobrɛase adwene adi a ebetumi ayɛ den sɛ wobegye atom.

Natan fii odwo mu na ɛteɛɛ Dawid so. Ná odiyifo no nsɛm no yɛ nea nyam wom, na na wasiesie no yiye ma enti Dawid betumi agye atom ma aboa ɔno ankasa. Natan amma nea n’ankasa pɛ ankɛntɛn ne so, na saa ara na wammɔ mmɔden ansusuw sɛ ɔsen Dawid wɔ abrabɔ anaa honhom fam. Nsɛm a ɛfata a wɔka no ɔkwampa so ho nhwɛso fɛfɛ bɛn ara ni! Sɛ woda honhom a ɛte saa ara adi a, akyinnye biara nni ho sɛ afoforo begye w’afotu atom.

[Kratafa 22 mfonini]

Te sɛ aduan a ahoɔden wom no, ɛsɛ sɛ w’afotu yɛ nea ɛhyɛ den

[Kratafa 23 mfonini]

So woma w’afotu yɛ akɔnnɔ te sɛ sika aduaba a ɛwɔ dwetɛ kyerɛnkyɛ mu?

[Kratafa 24 mfonini]

Odiyifo Natan fi ahobrɛase mu twee adwene kɔɔ atɛntrenee ne adetreneeyɛ a na Dawid pɛ no so