Sua Osetie Denam Nteɛso A Wugye Tom So

FA NO sɛ wugyina bepɔw tenten bi so a wote nka sɛ wiase no nyinaa wɔ w’ase ankasa. Ahofadi nkate a ɛyɛ anigye bɛn ara ni!

Nanso wɔato w’ahofadi no ano hye ankasa. Tumi a ɛtwe ade kɔ fam ho mmara no to w’adeyɛ biara ano hye kɛse; wo nan a woremfa nsi yiye pɛnkoro pɛ po no betumi akowie ɔhaw mu. Nanso, hwɛ sɛnea ɛyɛ anigye sɛ wubehu sɛ saa tumi a ɛtwe ade kɔ fam ho mmara koro no ara mma mframa mfa wo nkɔ wim a wuntumi nyɛ ho hwee. Enti ɛda adi sɛ wo yiyedi nti na mmara no wɔ hɔ. Anohyeto ahorow a ɛde ba wo nneyɛe so wɔ saa bepɔw atifĩ hɔ no ho wɔ mfaso, ebetumi abɔ wo nkwa ho ban mpo.

Yiw, ɛtɔ mmere bi a, mmara horow ne ɛsodi betumi ato yɛn ahofadi ano hye, nanso so eyi ma osetie yɛ ade a ɛnyɛ anigye?

Sɛnea Onyankopɔn Bu Osetie

Sɛ́ ‘Ɔbɔadeɛ Kɛse’ no, Yehowa ne ‘nkwa farebae.’ Esiane eyi nti, ɔkwan a ɛfata so no, ɛyɛ n’abɔde nyinaa asɛyɛde sɛ wɔyɛ osetie ma no. Odwontofo no daa su a ɛfata adi kyerɛw sɛ: “Mommra mma yemmutuw nkotow nsɔre [Yehowa], yɛn Yɛfo anim. Na ɔno ne yɛn Nyankopɔn, na yɛn de, yɛyɛ n’adidibea nkurɔfo ne ne nsam nguan.”​—Ɔsɛnkafo 12:1; Dwom 36:9; 95:6, 7.

Yehowa fi mfiase ahwehwɛ sɛ n’abɔde yɛ osetie. Ná Paradise a Adam ne Hawa bɛkɔ so atra no gyina osetie a wɔbɛyɛ so. (Genesis 2:16, 17) Ná wɔhwehwɛ sɛ abɔfo nso yɛ osetie, ɛwom sɛ wɔkorɔn sen adesamma de. Esiane sɛ honhom abɔde yi bi yɛɛ “asoɔdenfo, ɛbere a Onyankopɔn abodwokyɛre twɛnee, Noa nna” no mu nti, wɔtwee wɔn aso denam ‘esum kabii bun a wɔde wɔn agu mu de wɔn retwɛn atemmu’ no so.​—1 Petro 3:19, 20; 2 Petro 2:4.

Sɛ wɔbɛka no pefee a, Onyankopɔn bu osetie sɛ ahwehwɛde a ɛbɛma obi anya ne mpeneso. Yɛkenkan sɛ: “So [Yehowa] pɛ ɔhyew afɔre ne okum afɔre sɛ otie a wotie [Yehowa] anaa? Hwɛ, osetie ye sen afɔre, na asoyɛ kyɛn adwennini srade.”​—1 Samuel 15:22.

Ɛsɛ sɛ Wosua​—Dɛn Ntia na Ɔkwan Bɛn So

Osetie ma obi yɛ ɔtreneeni wɔ Onyankopɔn ani so, enti hwɛ sɛnea ɛho hia sɛ yesua! Te sɛ amannɔne kasa bi a wosua no, yebetumi asua osetieyɛ bere a yɛyɛ mmofra. Ɛno nti na Bible no si mmofra a wofi wɔn mmofraase tete wɔn so dua no.​—Yosua 8:35.

Nnɛɛmmafo bi ne Bible no nyɛ adwene, na wɔka sɛ hwehwɛ a wɔhwehwɛ sɛ mmofra yɛ osetie no te sɛ adwenem mmonnaato ara pɛ. Wogye akyinnye sɛ ɛsɛ sɛ wɔma mmofra kwan na wonya wɔn ankasa nsusuwii ne gyinapɛn ahorow a wɔde bɛtra ase a ɔpanyin biara nhaw wɔn.

Nanso wɔ 1960 mfe no mu bere a na awofo pii kura saa adwene yi no, Wilhelm Hansen a ɔyɛ adwene ne nneyɛe ho ɔkyerɛkyerɛfo ne ɛho nsɛm ho samufo no ne wɔn anyɛ adwene. Ɔkyerɛwee sɛ: “Abofra a afei na ɔrenyin fam no, bere a ɔne n’awofo ntam abusuabɔ no da so ara nya ne so nkɛntɛnso no, ‘bɔne’ ne nea awofo bara na ‘papa’ ne nea wɔkamfo. Enti, osetie nkutoo na ɛkyerɛ abofra no kwan wɔ abrabɔ pa ne su atitiriw ho, na ɛno a ɔwɔ no na ɛbɛkyerɛ sɛ ɔde abrabɔ a ɛfata bɛyɛ adwuma anaa dabi.”​—Fa toto Mmebusɛm 22:15 ho.

Onyankopɔn Asɛm si sɛnea ehia sɛ yesua osetie no so dua. Yɛkenkan sɛ: “O AWURADE, minim sɛ ɛnyɛ onipa ankasa na ɔpaw n’akwan, na ɛnyɛ onipa de ne sɛ ɔbɛpaw asetra kwan a ɔbɛfa so.” (Yeremia 10:23, The New English Bible) Nnipa a wogyina wɔn ankasa gyinapɛn ahorow so paw wɔn ankasa asetra kwan, na saa a wɔyɛe no ma wohyiaa nsɛnnennen a anibere wom no ho nhwɛso horow ayɛ abakɔsɛm mu ma. Dɛn nti na eyi taa ba saa? Efisɛ nnipa nni nimdeɛ, nyansa, ne ntease a wɔde bɛpaw wɔn asetra kwan a obiara mmoa wɔn. Nea enye koraa sen ɛno no, wofi awosu mu tumi si gyinae ahorow a ɛmfata. Nsuyiri no akyi pɛɛ no, Yehowa kaa onipa ho asɛm sɛ: “Onipa komam adwene yɛ bɔne fi ne mmofraase.”​—Genesis 8:21.

Enti, obiara nni hɔ a onya osetieyɛ ma Yehowa no fi awo mu. Ɛsɛ sɛ yɛde dua yɛn mma mu na yɛkɔ so sua yɛn nkwa nna nyinaa mu. Ehia sɛ yɛn mu biara nya komam tebea a na Ɔhene Dawid a ɔkyerɛw nea edi so yi wɔ no bi: “[Yehowa], kyerɛ me w’akwan, na fa me fa w’atempɔn so. Ma mennantew wo nokware mu, na kyerɛkyerɛ me, na wone me nkwagye Nyankopɔn, m’ani da wo so daa nyinaa.”​—Dwom 25:4, 5.

Fa Osetieyɛ so Kyerɛkyerɛ Osetie

Ná Yesu na ne n’asase so agya nim Yesu awo mu nsɛm yiye. Enti wohuu sɛ na ɔrebedi dwuma titiriw bi wɔ Yehowa atirimpɔw ahorow mmamu mu. (Fa toto Luka 1:35, 46, 47 ho.) Wɔn fam no, na asɛm a ese “Hwɛ! [Yehowa] agyapade ne mmabanin” no kyerɛ biribi soronko. (Dwom 127:3) Wohuu asɛyɛde kɛse a na ɛda wɔn so no yiye, na ɛno ma wɔyɛɛ ntɛm de ɔsoro akwankyerɛ dii dwuma, te sɛ bere a wɔka kyerɛɛ wɔn sɛ wonguan nkɔ Misraim ne akyiri yi sɛ wɔnkɔ Galilea no.​—Mateo 2:1-23.

Yesu awofo huu nteɛso ho asɛyɛde a wɔwɔ no nso. Ɛwom, wɔ Yesu asetra ansa na ɔrebɛyɛ onipa no mu no, na ɔyɛ osetie bere nyinaa. Nanso bere a ɔwɔ asase so no, osuae sɛ ɔbɛyɛ osetie wɔ tebea horow a ɛyɛ foforo koraa mu. Ade biako ne sɛ na ɛsɛ sɛ ɔyɛ osetie ma awofo a wɔtɔ sin efisɛ abofra a ɔyɛ pɛ no mpo hia nteɛso denam ɔkyerɛkyerɛ ne adesua so. N’awofo de eyi maa no. Nanso, na nteɛso a ɛyɛ asotwe ho nhia. Yesu yɛɛ osetie bere nyinaa; na ɛho nhia sɛ wɔka asɛm kyerɛ no mprenu. Yɛkenkan sɛ: “Na ɔne wɔn [n’awofo] kɔɔ fie wɔ Nasaret na ɔyɛɛ osetie maa wɔn.”​—Luka 2:51, Phillips.

Ná Yosef ne Maria nim sɛnea wɔnam nhwɛso so bɛkyerɛkyerɛ Yesu nso. Sɛ nhwɛso no, yɛkenkan sɛ “na n’awofo kɔ Yerusalem daa afirihyia Twam afahyɛ ase.” (Luka 2:41) Ɛdenam nhyehyɛe a Yosef yɛ de n’abusua no kɔɔ bi so no, ɔkyerɛe sɛ wɔn honhom fam yiyedi ho hia no ne sɛ obu Yehowa som aniberesɛm. Saara na awofo nam osetie a wɔn ankasa yɛ wɔ nsɛm a ɛfa ɔsom ho no so betumi akyerɛ wɔn mma osetieyɛ nnɛ.

Esiane trenee mu nteɛso pa a Yosef ne Maria de maa no nti, “Yesu nyinii nyansa ne kɛseyɛ ne Nyankopɔn ne nnipa nkyɛn dom mu.” Nhwɛso fɛfɛ a Kristofo awofo betumi adi akyi nnɛ bɛn ara ni!​—Luka 2:52.

‘Osetie . . . wɔ Ade Nyinaa Mu’

“Mma, muntie mo awofo asɛm ade nyinaa ho, na eyi na ɛsɔ Awurade ani.” (Kolosefo 3:20) Yesu tumi yɛɛ osetie maa n’awofo wɔ ade nyinaa mu efisɛ osetie a wɔyɛ maa Yehowa no nti, wɔanhwehwɛ sɛ Yesu​—anaa ne nuanom mmarima ne mmea no​—yɛ biribi a ɛne Yehowa apɛde nhyia.

Awofo pii nso atumi rekyerɛkyerɛ wɔn mma ma wɔayɛ osetie wɔ ade nyinaa mu nnɛ. Tie agyanom baasa a, mprempren a wɔawie wɔn mma tete no, wɔresom wɔ Ɔwɛn Aban Asafo no baa dwumadibea bi no.

Theo ka sɛnea ɔne ne yere tetee mmabanin baanum ho asɛm. Ose: “Ɛho hia sɛ yɛbɛma mmofra ahu afi mfiase pɛɛ sɛ yɛn mpanyimfo nso tumi di mfomso ahorow. Awerɛhosɛm ne sɛ yɛsan di mfomso koro no ara bio mpo na yɛsrɛ yɛn soro Agya no hɔ fafiri ne mmoa bere nyinaa. Yɛhyɛɛ da maa yɛn mma no hui sɛ sɛnea wɔne mmofrabere mu dadwen ahorow reko no, saara na yɛne mpanyinyɛ mu dadwen ahorow reko.”

Sɛ abofra besua osetie a, ehia yiye sɛ abusuabɔ a ɔdɔ wom ba ɔne n’awofo ntam. Hermann ka ne yere ho asɛm sɛ: “Ná ɔnyɛ mmarimaa no na nko na mmom wɔn adamfo nso. Wɔn ani sɔɔ eyi, enti anyɛ den amma wɔn sɛ wɔbɛyɛ osetie.” Afei ɔde ɔkwan a wɔbɛfa so ama awofo ne wɔn mma ntam abusuabɔ no ayɛ yiye kɛse ho afotu pa bi ma sɛ: “Yɛboapa na yɛantɔ afiri a wɔde hohoro nkankyee mu no mfe pii, ma enti na ɛsɛ sɛ yɛde yɛn nsa hohoro na yɛpopa nkankyee ho. Yɛde ɛho popa no maa yɛn mmabanin no, na na wɔyɛ no nnidiso nnidiso. Ná bere biara nni hɔ a eye sen saa bere yi ma nkɔmmɔbɔ.”

Ɔwofo ne ɔba ntam abusuabɔ a ɔdɔ wom no yɛ abusuabɔ a ɛsɛ sɛ ɛba Kristoni ne Yehowa ntam no ho nhwɛso. Rudolf kyerɛkyerɛ sɛnea ɔne ne yere boaa wɔn mmarimaa baanu no ma wɔhyehyɛɛ abusuabɔ a ɛte saa no mu: “Nea yegyinaa so yɛɛ saa ne abusua adesua a yɛyɛɛ no daa. Yɛde nsɛmti bi a ɛfata maa mmofra no sɛ wɔnkɔyɛ ho nhwehwɛmu. Yɛboom kenkan Bible no, na yɛbɔɔ nea yɛkenkan no ho nkɔmmɔ. Ná yɛn mmabanin no tumi hu sɛ Yehowa hwɛ kwan sɛ awofo bɛyɛ osetie, na ɛnyɛ mmofra nkutoo.”

Awofo a wɔyɛ Kristofo hu sɛ kyerɛwsɛm a efi honhom mu a ese “Nteɛso nkaanim yɛ nkwa kwan” no fa wɔne wɔn mma ho. Enti bere a ɛyɛ mmofra asɛyɛde sɛ wɔyɛ osetie ma wɔn awofo wɔ ade nyinaa mu no, ɛsɛ sɛ awofo nso yɛ osetie wɔ biribiara a Yehowa hwehwɛ fi wɔn hɔ no mu. Wɔ hyɛ a awofo ne wɔn mma bɛhyɛ wɔn ntam abusuabɔ no mu den akyi no, wɔbɛpɛ sɛ wɔhyɛ wɔne Onyankopɔn ntam abusuabɔ no mu den.​—Mmebusɛm 6:23.

Nya Osetie ho Adwempa

Hwɛ sɛnea yebetumi de aseda ama, sɛ Onyankopɔn Asɛm de mmofra ntetee ho afotu a etumi yɛ adwuma sɛɛ no ma! (Hwɛ adaka no mu.) Mmofra a wosua osetie fi awofo a wɔteɛ wɔn so wɔ trenee mu nkyɛn no ma Kristofo onuayɛ kuw no nyinaa nya anigye ankasa.

Esiane sɛ osetie a wɔyɛ ma Onyankopɔn no ma nkwa nti, ɛnsɛ sɛ yesusuw ho mpo sɛ yɛbɛpow anohyeto ahorow a Onyankopɔn ahyɛde ahorow de ba yɛn ankasa ahofadi so no​—ɛnsɛ sɛ yɛyɛ saa bere tiaa bi mpo. Sɛ nhwɛso no, fa no sɛ yebetumi ayi tumi a ɛtwe ade kɔ fam ho mmara no afi hɔ bere tiaa bi. Hwɛ sɛnea anka yɛn ani begye sɛ yebefi bepɔw bi so atu akɔ wim a biribiara nsiw yɛn ahofadi kwan! Nanso dɛn na ebesi bere a nneɛma asan ayɛ sɛnea na ɛte no! Susuw sɛnea anka yɛbɛhwe ase no ho hwɛ!

Osetie a yebesua denam nteɛso a yebegye atom so no boa ma yetumi nya nipasu a ɛkari pɛ na ɛboa yɛn ma yehu faako a yebetumi ayɛ ade akodu. Ɛboa yɛn ma yɛkwati nhyɛso a yɛbɛyɛ ne sɛ yɛrenhu afoforo hokwan ne ahiade ahorow. Ɛboa yɛn ma yɛkwati adwenem naayɛ. Ne tiatwa mu no, ɛde anigye ba.

Enti sɛ́ woyɛ ɔpanyin anaa abofra no, sua osetie denam nteɛso a wubegye atom so sɛnea ɛbɛyɛ na “awie wo yiye” na afei nso “wo nna aware asase so.” (Efesofo 6:1-3) Hena na ɔpɛ sɛ ɔde ne daa nkwa anidaso to asiane mu denam sua a ɔrensua osetie denam nteɛso a obegye atom no so?​—Yohane 11:26.

[Adaka wɔ kratafa 29]

AWOFO, MONKYERƐ OSETIE DENAM NTEƐSO A MODE BƐMA WƆ TRENEE MU SO

 1. Gyina Kyerɛwnsɛm mu mmara ne nnyinasosɛm ahorow so fa nteɛso ma.

 2. Ɛnsɛ sɛ wode nteɛso ma denam ka a wobɛka sɛ wɔnyɛ osetie ara kɛkɛ so na mmom denam nea enti a osetie yɛ nyansa kwan a wobɛkyerɛkyerɛ mu so.​—Mateo 11:19b.

 3. Ɛnsɛ sɛ wode nteɛso ma wɔ abufuw anaa nteɛteɛmu so.​—Efesofo 4:31, 32.

 4. Fa nteɛso ma wɔ abusuabɔ a ɔdɔ ne afoforo ho a wodwen wom mu.​—Kolosefo 3:21; 1 Tesalonikafo 2:7, 8; Hebrifo 12:5-8.

 5. Teɛ mmofra so fi wɔn mmofraase.​—2 Timoteo 3:14, 15.

 6. Tĩ nteɛso mu na fa ma bere biara a ehia.​—Deuteronomium 6:6-9; 1 Tesalonikafo 2:11, 12.

 7. Di kan teɛ wo ho so na wonam saayɛ so akyerɛkyerɛ denam nhwɛso so.​—Yohane 13:15; fa toto Mateo 23:2, 3.

 8. Fa nteɛso ma a wowɔ Yehowa mu ahotoso koraa, na srɛ ne hɔ mmoa wɔ mpaebɔ mu.​—Atemmufo 13:8-10.

[Mfonini wɔ kratafa 28]

“Nteɛso nkɔanim yɛ nkwa kwan”