Bible Nhoma a Ɛto So 51—Kolosefo

Nea Ɔkyerɛwee: Paulo

Beae a Ɔkyerɛw No: Roma

Bere a Ɔkyerɛw Wiei: Bɛyɛ 60–61 Y.B.

MMARIMA baanu bi fii Efeso faa Asubɔnten Maeander (Menderes) ho wɔ Asia Kumaa de wɔn ani kyerɛɛ apuei fam. Wokoduu asu bi a wɔfrɛ no Lycus ho wɔ Frigia; saa asu no kɔbɔ asubɔnten no mu. Bere a woduu hɔ no, wɔdan wɔn ani kyerɛɛ anafo fam faa asubɔnten no ho faa mmepɔw ntam kɔe. Wɔto wɔn ani a, na wohu asase fɛfɛ bi: mmoa adidibea frɔmfrɔm bi a wɔyɛn nguan bebree wɔ so. (Adwuma titiriw a na ɛhɔfo yɛ de nya sika ne nneɛma a wɔde oguan nhwi ayɛ.a) Akwantufo no nam asubɔnten no nifa fam kotwaam Laodikea, sika kurow a na Roma de ayɛ ɔmantam no ahenkurow no. Sɛ wɔto wɔn ani hwɛ benkum so asuogya hɔ a, wohu Hierapoli, baabi a asɔrefie ne nsuɔhyew abura pii wowɔ no. Ná wobetwa bɛyɛ akwansin du akɔ wɔn anim ansa na wɔadu Kolose kurow ketewa no mu. Ná Kristofo asafo wowɔ saa nkurow yi nyinaa mu.

² Kolose na na akwantufo no rekɔ. Ná wɔn baanu nyinaa yɛ Kristofo. Obiako de, na onim mpɔtam hɔ yiye efisɛ na ofi Kolose. Ne din de Onesimo na na ɔyɛ akoa a ɔresan akɔ ne wura nkyɛn. Ná ne wura no wɔ asafo a ɛwɔ hɔ no mu. Onipa a na ɔka Onesimo ho ne Tihiko. Ɔno de, na ɔnyɛ akoa, na ɔsomafo Paulo somaa wɔn baanu nyinaa sɛ wɔmfa nhoma nkɔma “anuanom anokwafo wɔ Kristo mu a wɔwɔ Kolose.” Yenni adanse biara a ɛkyerɛ sɛ Paulo kɔɔ Kolose. Ɛbɛyɛ sɛ Epafra na ɔtew ɛhɔ asafo a na amanaman mufo na wɔdɔɔso wom no. Epafra yɛɛ adwuma denneennen maa wɔn, nanso afei de na wabedi Paulo nkyɛn wɔ Roma.—Kol. 1:2, 7; 4:12.

³ Nhoma no mfiase ne n’awiei nyinaa no, ɔsomafo Paulo ma yehu sɛ ɔno na ɔkyerɛwee. (1:1; 4:18) Nsɛm a ɔde wiee nhoma no nso kyerɛ sɛ ɔkyerɛwee wɔ afiase. Ɛno bɛyɛ bere a wɔde no too afiase nea edi kan wɔ Roma afe 59-61 Y.B no. Saa bere no na ɔkyerɛw ne nhoma a ɛhyɛ nkuran no mu pii. Ɔde Kolosefo nhoma no ne Filemon de no nyinaa somae. (Kol. 4:7-9; Filem. 10, 23) Ɛbɛyɛ sɛ bere a ɔkyerɛw Efesofo nhoma no ara na ɔkyerɛw Kolosefo nhoma no, efisɛ nneɛma a ɔkaa ho asɛm ne emu nsɛm no bi yɛ adekoro.

⁴ Biribiara nni hɔ a yebegyina so aka sɛ Kolosefo nhoma no nyɛ nokware. Wɔde aka nhoma foforo a Paulo kyerɛwee no ho wɔ nsaano nkyerɛwee a wɔyɛe bɛyɛ afe 200 Y.B. a wɔfrɛ no Chester Beatty Papyrus No. 2 (P⁴⁶) mu, na ɛkyerɛ sɛ tete Kristofo no gye toom sɛ ɛka Paulo nhoma no ho. Bible ho animdefo a wɔtraa ase tete no di adanse sɛ nhoma yi yɛ nokware sɛnea wodii Paulo nhoma a aka ho adanse no.

⁵ Dɛn na ɛkaa Paulo ma ɔkyerɛw nhoma kɔmaa Kolosefo no? Ná Onesimo resan akɔ Kolose. Afei nso na Epafra aba Paulo nkyɛn, na Kolose nsɛm a ɔbɛka kyerɛɛ no no nti, na ɛsɛ sɛ ɔkyerɛw wɔn. (Kol. 1:7, 8; 4:12) Ná nneɛma bi rekɔ so wɔ hɔ a ebetumi ahaw Kristofo asafo no. Saa bere no na ɔsom a ɛwowɔ hɔ no regu na daa wɔkeka dedaw no bi bom de tew foforo. Afei nso na wiase nyansapɛ kamfo ahotua ne ahonhonsɛmdi ne abosonsom ne gyidihunu. Sɛ ɛno da nkyɛn a na Yudasom nso kyerɛ sɛ wontua wɔn ho nnuan bi na wonni nnapɔnna. Ebetumi aba sɛ na eyinom nyinaa redidi ba asafo no mu. Sɛnea na asɛm no te biara no, ɛbɛyɛ sɛ ɛyɛ asɛnhia nti na Epafra twaa kwantenten saa kohuu Paulo wɔ Roma no. Nanso na ɛnkyerɛ sɛ nneɛma asɛe pii wɔ asafo no mu, efisɛ Epafra kamfoo wɔn sɛ wɔwɔ ɔdɔ, na wogyina hɔ pintinn. Paulo tee Kolose asafo no ho asɛm saa no, ɔkyerɛw krataa yi kɔmaa wɔn sii so dua sɛ nokware nimdeɛ ne ɔsom a ɛho tew ho hia paa. Ɔmaa emu daa hɔ sɛ Kristo a Onyankopɔn de no ama yɛn no sõ sen wiase nyansapɛ, abɔfosom ne Yudasom mu atetesɛm.

NEA ENTI A MFASO WƆ SO

¹² Yetumi hu sɛ bere a anuanom baanu no fi Roma bedui no, ankyɛ koraa na anuanom a wɔwɔ Kolose no tee. Ɛbɛyɛ sɛ wɔde ahopere hyiaam wɔ Filemon fie kotiee Paulo nhoma no mu nsɛm. (Filem. 2) Hwɛ sɛnea nokwasɛm a ɛwom no ka koma; ɛkyerɛ Kristo gyinabea ne sɛnea nokware nimdeɛ ho hia! Hwɛ sɛnea ɛbɔɔ nnipa nyansapɛ ne Yudasom mu atetesɛm gui ne sɛnea ɛpagyaw Kristo asomdwoe ne n’asɛm! Ná asafo no mufo nyinaa—ahwɛfo, okununom, ɔyerenom, agyanom, mma, awuranom ne nkoa—obiara benya biribi asie n’adwene ne ne koma mu. Afei a na Filemon ne Onesimo rebɛtra bio sɛ akoa ne ne wura no, na wɔn nso wobenya afotu pa. Hwɛ sɛnea na ɛbɛyɛ mmoa ama ahwɛfo ma wɔaboa nguan no ama wɔadi nkyerɛkyerɛ pa so! Hwɛ sɛnea Paulo nsɛm no boaa Kolosefo no ma wohui sɛ ehia paa sɛ wofi ɔkra nyinaa mu yɛ adwuma sɛnea wɔyɛ ma Yehowa! Otuu Kolosefo no fo sɛ wɔntwe wɔn ho mfi wiase adwene ne nneyɛe a ɛde nnipa yɛ nkoa no ho, na ɛda so yɛ afotu pa ma asafo no nnɛ.—Kol. 1:9-11, 17, 18; 2:8; 3:15, 16, 18-25; 4:1.

¹³ Wɔde afotu a mfaso wɔ so ma Kristofo a wɔka asɛmpa no wɔ Kolosefo 4:6 sɛ: “Momma mo kasa ho mmra nyam bere nyinaa na nkyene mmra mu, na moahu sɛnea ɛsɛ sɛ mubua obiara.” Sɛ komapafo te nokwasɛm a ɛho wɔ nyam a, ɛyɛ wɔn akɔnnɔ, na wonya so mfaso bere nyinaa. Bio nso, sɛ Kristoni a n’ani da hɔ de komam anisɔ bɔ mpae a, Yehowa behyira no. Enti, “Munkura mpaebɔ mu daa, na momfa aseda nkɔ so nwɛn wɔ mu.” Na hwɛ sɛnea Kristofo fekubɔ de anigye ne nkuranhyɛ ba! Paulo kae sɛ: “Monkɔ so . . . nkyerɛkyerɛ mo ho . . . ntutu mo ho fo, na monto nnwom mo koma mu mma Yehowa.” (4:2; 3:16) Sɛ wohwehwɛ nhoma a wɔkyerɛw kɔmaa Kolosefo no mu a, wubenya nsɛm foforo pii a mfaso wɔ so.

¹⁴ Nhoma no ka Mmara no mu ahyɛde ho asɛm sɛ: “Saa nneɛma no yɛ nea ɛreba no sunsuma, na nea edi mũ ankasa no yɛ Kristo dea.” (2:17) Sɛnea nneɛma di mũ Kristo mu no na wɔasi so dua wɔ Kolosefo nhoma no mu no. Nhoma no taa ka anuonyam anidaso a wɔde asie soro ama wɔn a wɔwɔ Kristo mu no ho asɛm. (1:5, 27; 3:4) Saa nnipa no da Agya no ase sɛ wagye wɔn afi esum tumidi ase dedaw na ɔde wɔn aba “ne Ba a ɔdɔ no no ahenni mu.” Enti nea wɔabɛhyɛ n’ase ne Nea ɔyɛ “Onyankopɔn a wonhu no no suban, abɔde nyinaa mu abakan; efisɛ wɔnam no so na ɛbɔɔ nneɛma a aka nyinaa wɔ soro ne asase so, nhengua, mpanyinni, nniso, tumidi, nea wohu ne nea wonhu.” Oyi fata koraa sɛ odi Onyankopɔn Ahenni no so hene wɔ trenee mu. Ɛno nti Paulo tu Kristofo a wɔasra wɔn no fo sɛ: “Sɛ wɔanyan mo ne Kristo a, monkɔ so nhwehwɛ nneɛma a ɛwɔ soro, baabi a Kristo te wɔ Onyankopɔn nsa nifa so no.”—1:12-16; 3:1.

[Ase hɔ asɛm]