Aristarko—Ɔhokafo Nokwafo

ƆSOMAFO PAULO mfɛfo adwumayɛfo pii a na ɔwɔ wɔn mu ahotoso no mu biako ne Aristarko. Sɛ wote ne din a, dɛn na ɛba w’adwenem? So ɛma wokae biribi? So wubetumi aka dwuma ko a odii wɔ tete Kristofo ahyehyɛde a wɔde sii hɔ no abakɔsɛm mu? Ɛwom sɛ ebia Aristarko nyɛ Bible mu nnipa a yenim wɔn yiye no bi de, nanso na ne ho wɔ nneɛma ahorow bi a wɔkaa ho asɛm wɔ Kristofo Hela Kyerɛwnsɛm mu no mu.

Ɛnde, na hena ne Aristarko? Abusuabɔ bɛn na ɔne Paulo nyae? Dɛn nti na yebetumi aka sɛ na Aristarko yɛ hokafo nokwafo? Na asuade ahorow bɛn na yebetumi anya afi ne nhwɛso a yɛbɛhwehwɛ mu no mu?

Hooyɛ ne basabasayɛ a kuw bi a wɔn bo afuw ma ɛbaa Efeso kurow mu no na ɛmaa Aristarko ho asɛm baa Asomafo nhoma no mu anwonwakwan so. (Asomafo no Nnwuma 19:23-41) Ná atoro nyame Artemi dwetɛ honi a wɔyɛ no yɛ adwuma a na ɛma Demetrio ne Efesofo afoforo a wɔyɛ dwetɛ adwumfo no nya mfaso. Enti, bere a Paulo asɛnka ɔsatu no maa nnipa pii bi poo saa nyamewa yi som a ɛho ntew no, Demetrio tutu guu adwumfo a wɔaka no asom. Ɔka kyerɛɛ wɔn sɛ ɛnyɛ sɛ Paulo asɛnka no bɛma wɔahwere sika a wonya no, na mmom ebetumi de Artemi som aba awiei ankasa.

Bere a kuw a wɔn bo afuw no anhu Paulo no, wɔhyɛɛ n’ahokafo Aristarko ne Gaio twee wɔn kɔɔ agohwɛbea hɔ. Esiane sɛ na wɔn baanu wɔ asiane kɛse mu nti, Paulo nnamfo srɛɛ no sɛ ‘ɔnnkɔ agohwɛbea hɔ.’

Fa no sɛ wowɔ saa tebea no mu. Nkurɔfokuw a wɔn bo afuw no de bɛyɛ nnɔnhwerew abien teɛteɛɛm sɛ, “Efeso Artemi yɛ ɔkɛseɛ.” Ɛbɛyɛ sɛ nnipadɔm a wɔn ani abere yi mu a na Aristarko ne Gaio wɔ a na wontumi nkasa mfa nyi wɔn ho ano mpo no yɛɛ asiane kɛse ankasa. Ɛbɛyɛ sɛ na wosusuw sɛ ebia wobefi mu afi anaa. Anigyesɛm ne sɛ, wofii mu fii. Nokwarem no, Luka kyerɛwtohɔ a emu da hɔ no ama nhomanimfo bi akyerɛ sɛ ebia onyaa ne nsɛm no fii adansefo te sɛ Aristarko ne Gaio ankasa hɔ.

Awiei koraa no, kurow mu kyerɛwfo no maa hooyɛ no gyaee. Ɛbɛyɛ sɛ Aristarko ne Gaio ho sanee wɔn yiye bere a ofi nyansam buu wɔn bem na afei wohui sɛ basabasayɛ a wɔwom no to atwa no.

Sɛ wo na wunyaa osuahu a ɛte saa a, anka wobɛte nka dɛn? So anka wobɛka sɛ worentumi nyɛ Paulo asɛmpatrɛw mu ɔhokafo, sɛ ɛyɛ hu dodo, ne sɛ ɛbɛyɛ papa sɛ wobɛhwehwɛ dwoodwoo asetra? Aristarko ansusuw saa! Esiane sɛ na ofi Tesalonika nti, akyinnye biara nni ho sɛ na onim asiane a ɛwom sɛ ɔbɛka asɛmpa no dedaw. Bere a Paulo kaa asɛm wɔ kurom hɔ mfe abien pɛ a na atwam no, basabasayɛ sii hɔ nso. (Asomafo no Nnwuma 17:1-9; 20:4) Aristarko de nokwaredi dii Paulo akyi.

Wofi Greece Kɔ Yerusalem

Dwetɛ adwumfo no basabasayɛ akyi asram bi no, na Paulo wɔ Greece, na na ɔrebɛfa hyɛn akɔ Siria na wafa hɔ akɔ Yerusalem bere a na “Yudafo tɛw no” no. (Asomafo no Nnwuma 20:2, 3) Hena na na ɔka Paulo ho wɔ saa ahokyere tebea yi mu? Aristarko!

Saa ahunahuna foforo yi maa Paulo, Aristarko ne wɔn ahokafo no sesaa wɔn kwan, nea edi kan no, wɔkɔfaa Makedonia, afei wɔkɔfaa Asia Kumaa mpoano nkurow no mu ansa na awiei koraa no, ɔrekɔ Foinike wɔ Patara. (Asomafo no Nnwuma 20:4, 5, 13-15; 21:1-3) Ɛda adi sɛ na akwantu yi atirimpɔw ne sɛ wɔde Kristofo a wɔwɔ Makedonia ne Akaia no ntoboa bɛkɔ akɔma wɔn nuanom a na ahia wɔn wɔ Yerusalem no. (Asomafo no Nnwuma 24:17; Romafo 15:25, 26) Nnipa dodow bi ne wɔn na etuu kwan no, na ɛbɛyɛ sɛ na asafo ahorow no na ɛde asɛyɛde yi ahyɛ wɔn nsa. Akyinnye biara nni ho sɛ, na kuw kɛse a ɛte saa no bɛma wɔanya ahobammɔ kɛse nso.

Aristarko nyaa hokwan kɛse kaa Paulo ho fi Greece kɔɔ Yerusalem. Nanso, na wɔn akwantu a edi hɔ no de wɔn befi Yudea araa akosi Roma.

Kwan a Wotu Kɔɔ Roma

Saa bere yi de, na tebea no yɛ soronko koraa. Ná Paulo akɔda afiase mfe abien wɔ Kaesarea, na ɔde n’adesrɛ akɔto Kaesare anim, na na ɛsɛ sɛ wɔde no to nkɔnsɔnkɔnsɔn mu kɔ Roma. (Asomafo no Nnwuma 24:27; 25:11, 12) Bɔ mmɔden susuw sɛnea Paulo ahokafo no tee nka no ho. Ná kwan a wobetu afi Kaesarea akɔ Roma no bɛyɛ kwan tenten, na na ɛbɛma wɔabrɛ wɔ nkate fam, a na wontumi nhu nea ebefi mu aba. Ná hena na ɔbɛkɔ akɔyɛ no mmoa? Wɔpaw mmarima baanu, anaasɛ wotuu wɔn ho mae. Ná wɔne Aristarko ne Luka, nea ɔkyerɛwee Asomafo no Nnwuma no.—Asomafo no Nnwuma 27:1, 2.

Ɔkwan bɛn so na Luka ne Aristarko tumi faa hyɛn koro no ara de tuu kwan nea edi kan kɔɔ Roma? Abakɔsɛm kyerɛwfo Giuseppe Ricciotti ka sɛ: “Saa nnipa baanu yi foroe sɛ nea wɔn ankasa retu kwan . . . anaasɛ, ebetumi aba sɛ, ɔsraani panyin a na ne yam ye no faa wɔn sɛ Paulo nkoa, efisɛ na mmara no ma Romani kwan sɛ nkoa baanu bɛboa no.” Hwɛ sɛnea ɛbɛyɛ sɛ wɔ a na wɔwɔ hɔ ne wɔn nkuranhyɛ no maa Paulo koma tɔɔ ne yam!

Luka ne Aristarko daa wɔn dɔ adi kyerɛɛ Paulo wɔ adehwere ne asiane mu. Nokwarem no, wohyiaa tebea a ɛde wɔn nkwa too asiane mu bere a wɔne wɔn hokafo dommum no guu asu wɔ Malta supɔw so no.—Asomafo no Nnwuma 27:13–28:1.

Paulo “Yɔnko Dommum”

Bere a Paulo kyerɛw ne krataa a ɔde kɔmaa Kolosefo ne Filemon wɔ 60-61 Y.B. mu no, na Aristarko ne Luka da so ka ne ho wɔ Roma. Wɔka Aristarko ne Epafra ho asɛm sɛ Paulo ‘yɔnko nnommum.’ (Kolosefo 4:10, 14; Filemon 23, 24) Enti, Aristarko de bere bi traa Paulo ho wɔ afiase.

Ɛwom sɛ anyɛ yiye koraa no, Paulo yɛɛ deduani wɔ Rome bɛyɛ mfe abien de, nanso wɔmaa no kwan ma ɔtraa ofie a n’ankasa tuaa ho ka mu maa sraani hwɛɛ no so, baabi a na obetumi aka asɛmpa no akyerɛ wɔn a na wɔba ne nkyɛn no. (Asomafo no Nnwuma 28:16, 30) Enti, Aristarko, Epafra, Luka, ne afoforo som Paulo, na wɔboaa no kyekyee ne werɛ.

“Awerɛkyekye”

Sɛ wususuw nneɛma ahorow a Aristarko ho wom wɔ Bible kyerɛwtohɔ a efi honhom mu no ho a, dɛn na ɛba w’adwenem? Sɛnea nhoma kyerɛwfo W. D. Thomas kyerɛ no, Aristarko “da nsow sɛ ɔbarima a otumi gyinaa ɔsɔretia ano na ɔde gyidi a emu yɛ den faa mu a ne tirim a na wabɔ sɛ ɔbɛsom no ammrɛ ase. Ɔda nsow sɛ ɔbarima a na ɔdɔ Nyankopɔn, ɛnyɛ mmere pa a biribiara kɔɔ so pɛpɛɛpɛ mu nko, na mmom ɔhaw ne amanehunu mu nso.”

Paulo ka sɛ na Aristarko ne afoforo yɛ no “awerɛkyekye” (Hela, pa·re·go·riʹa), kyerɛ sɛ awerɛkyekye fibea. (Kolosefo 4:10, 11) Enti Aristarko nam awerɛkyekye ne akomatɔyam a ɔmaa Paulo nyae so yɛɛ ɔhokafo nokwafo wɔ ahokyere mmere mu. Ɔsomafo no a ɔne no bɔe faa no adamfo mfe pii no yɛ ade a ɛma onyaa akomatɔyam ne honhom fam nhyira pii.

Ebia yɛrenhyia tebea a ɛyɛ nwonwa te sɛ nea Aristarko hyiae no de. Nanso, nokwaredi a ɛte saa a yebeyi akyerɛ Kristo honhom fam anuanom ne Yehowa ahyehyɛde no ho hia ma wɔn a wɔwɔ Kristofo asafo no mu nnɛ nyinaa. (Fa toto Mateo 25:34-40 ho.) Akyinnye biara nni ho sɛ, ɛtɔ mmere bi a, mfɛfo asomfo a yenim wɔn hyia ɔhaw anaa amanehunu, ebia esiane owu, yare, anaa sɔhwɛ afoforo nti. Sɛ yɛka yɛn ho fam wɔn ho yɛ wɔn mmoa, kyekye wɔn werɛ, hyɛ wɔn nkuran a, yebetumi anya anigye, na yebetumi ada yɛn ho adi sɛ ahokafo anokwafo.—Fa toto Mmebusɛm 17:17; Asomafo no Nnwuma 20:35 ho.